"ᐃᓅᓯᖅ ᐱᕕᖃᖅᑎᑦᑎᕗᖅ ᐊᒻᒪ ᑭᓱᑐᐃᓐᓇᒥᒃ ᖁᕕᐊᒋᔭᖃᕈᕕᑦ, ᐃᓅᓯᕐᓂ ᓴᖅᑭᓐᓇᔭᖅᐳᖅ," ᐅᖃᖅᐳᖅ ᑕᐃᕋ ᒨᓯᓯ, ᑕᐅᑐᖅᑰᖅᑕᖃᑦᑎᐊᕐᓂᖓᓂᒃ ᓯᕗᓂᒃᓴᑦᑎᓐᓂ ᐊᐅᓚᑕᐅᔪᒥᒃ ᐅᓂᒃᑳᕐᓂᒃᑯᑦ ᐊᒻᒪ ᐃᓕᖅᑯᓯᒃᑯᑦ ᐅᐱᒍᓱᖕᓂᕐᒥᒃ. ᕗᐊᑦ ᓯᒻᑉᓴᓐᒥᐅᑕᖅ ᓄᓇᑦᓯᐊᕐᒥᑦ ᐊᐅᓚᑦᓯᔨᒻᒪᕆᐅᑦᓱᓂᓗ ᐱᒋᐊᖅᑎᑦᓯᔨᐅᑦᓱᓂᓗ ᐊᓪᓚᓂᑦ ᐱᕙᓪᓕᐊᔪᓕᕆᔨᓂᑦ, ᐊᖏᖅᓯᒪᓂᖃᖅᑐᖅ ᓄᓇᖃᖅᑳᖅᓯᒪᔪᓂᑦ ᑭᒡᒐᖅᑐᐃᔨᓂᑦ ᐱᕙᓪᓕᐊᔪᓕᕆᔨᓂᑦ ᐃᓕᓐᓂᐊᕐᓂᕐᒧᓪᓗ ᐊᓪᓚᐃᑦ ᐃᓱᒪᒋᔭᖏᓐᓂᑦ, ᐱᔪᓐᓇᑎᑦᓯᓂᕐᒥᑦ ᐊᓪᓚᓂᑦ ᒪᒃᑯᑦᑐᓂᑦ ᐊᓪᓚᓂᓪᓗ ᐅᓂᒃᑳᖅᑎᓂᑦ.

ᐊᐅᐸᖅᑐᒥᑦ ᓇᕿᑕᐅᓯᒪᔪᒥᑦ ᐅᐊᔭᓕᕆᔨᒥᑦ ᓴᓇᔨᐅᓂᕐᒥᑦ ᐊᕐᕌᒍᓂᑦ ᖁᓕᓂᑦ ᐅᔭᕋᓐᓂᐊᓂᕐᒥᑦ, ᐅᑎᓚᐅᖅᑐᖅ ᓯᓚᑦᑐᖅᓴᕐᕕᔾᔪᐊᕐᒧᑦ ᐊᓯᔾᔩᔭᖅᑐᖅᑐᓂ ᐃᖅᑲᓇᐃᔮᕆᓛᕈᒪᔭᖏᓐᓂᑦ. ᑭᖑᓂᑦᑎᓐᓂ, ᐊᔾᔨᓕᐅᕆᔪᒪᑦᑎᐊᖃᑦᑕᓚᐅᖅᐳᖅ. ᐊᓈᓇᙳᕐᓂᖅ ᐃᖅᑲᐃᓯᓪᓗᓂ ᑲᑎᖃᑎᖃᕐᓂᕐᒥᒃ ᐃᓕᖅᑯᓯᕐᒥᓂᒃ ᑎᓕᐅᕆᓪᓗᓂᓗ ᐅᑎᖁᓗᒍ ᐊᖏᕐᕋᖓᑕ ᓄᓇᓕᖓᓄᑦ, ᓅᑎᓪᓗᒍ ᓇᖕᒥᓂᖅ ᐱᓕᕆᔨᒻᒪᕆᐅᓂᕐᒧᓪᓗ ᐃᓅᓯᖓ. ᐊᔾᔨᓕᐅᕆᑲᑕᒍᓐᓃᖅᖢᓂ ᑕᕐᕆᔭᐅᓯᐊᒧᑦ ᐊᒻᒪ ᐱᕙᓪᓕᐊᔪᓕᕆᓪᓗᓂ, ᐱᓕᕆᐊᖓᑕ ᐊᖏᓂᖓ ᐊᖏᒡᓕᒋᐊᓚᐅᖅᐳᖅ.

ᐱᓕᕆᐊᖃᖅᓯᒪᔪᖅ podcast−ᒥᑦ ᓯᓚᐅᑉ ᖃᓄᐃᓐᓂᖓᓂᑦ ᐊᓪᓚᐃᑦ ᐃᓱᒪᒋᔭᖏᓐᓂᑦ, ᑕᐃᔭᐅᔪᖅ ᐅᑭᐅᓕᒫᑦ ᓂᐱᓕᒫᖏᑦ Podcast ᐃᓚᓕᐅᔾᔨᓂᕐᒥᑦ ᐊᓪᓚᐃᑦ ᓂᐱᖏᓐᓂᑦ ᖃᐅᔨᓴᕐᓂᕐᒧᑦ ᓇᓗᓇᐃᖅᓯᓂᕐᒥᓪᓗ ᑲᓇᑕᓕᒫᒥᑦ ᓄᓇᕐᔪᐊᕐᒥᓪᓗ. ᐊᓪᓚᐃᑦ−ᐊᐅᓚᑕᐅᔪᑦ ᖃᐅᔨᓴᕐᓂᕐᒧᑦ ᐱᓕᕆᐊᖅ ᐃᓚᖃᖅᑐᖅ ᐱᓕᕆᖃᑎᖃᕐᓂᕐᒥᑦ ᑎᓱᓱ ᓄᓇᖃᖅᑳᖅᓯᒪᔪᓂᑦ, ᐅᐃᓪᕗᕆᑦ ᓗᕆᐊᐃ ᓯᓚᑦᑐᓴᕐᕕᒡᔪᐊᖓᓂᑦ ᐊᒻᒪᓗ ᑎᓱ ᑲᑐᔾᔨᖃᑎᒌᓐᓂᕐᒥᑦ ᓄᓇᐅᑉ ᐃᑭᐊᖓᓂ ᖁᐊᖑᐃᓐᓇᐅᔭᖅᑐᒥᑦ.

ᐱᔪᒃᓯᑎᑕᐅᓪᓗᓂ ᐱᔪᒃᓯᑦᑎᐊᕐᓂᖓᓄᑦ, ᑐᓐᓂᖅᑯᓯᐊᖏᓐᓄᑦ ᑭᓱᓂᒡᓗ ᖁᕕᐊᓱᒃᑎᑦᑎᕙᖕᒪᖔᑦ, ᐱᓕᕆᐊᖃᖅᐳᖅ ᑕᒪᑐᒥᖓ ᐱᓕᕆᐊᒃᓴᒥᒃ. ᖃᐅᔨᒪᑎᓪᓗᒍ ᐱᒻᒪᕆᐅᓂᖓᓂᒃ ᓴᓈᖅᑖᕈᓐᓇᖅᓯᓂᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐱᔪᒪᓪᓗᓂ ᐊᔾᔨᒋᙱᑕᖓᓂᒃ ᓴᓇᓗᓂᓗ ᑲᒻᐸᓂᖓᓂᒃ ᐊᑐᕐᓗᓂ ᓇᖕᒥᓂᖅ ᐊᑐᒐᒃᓴᖏᓐᓂ. "ᑕᒪᓐᓇ ᐊᔪᕐᓇᙱᑎᑦᑐᒪᑐᐃᓐᓇᖅᑕᕋ ᐃᓄᖕᓄᑦ ᓲᖃᐃᒻᒪ ᖃᐅᔨᒪᔪᖓ ᐱᔭᕆᐊᖃᕐᓂᖓᓂᒃ ᖃᐅᔨᒪᓪᓗᖓᓗ ᐱᑎᑦᑎᔪᓐᓇᕐᓂᓐᓂᒃ ᑖᔅᓱᒥᖓ ᐋᖅᑭᒍᑎᒃᓴᒥᒃ ᐱᑎᑦᑎᔪᓐᓇᕐᓗᖓᓗ ᖃᐅᔨᓴᕐᓂᕐᓂ ᐃᓚᐅᑎᑦᑎᓂᕐᓂ ᑐᑭᖃᑦᑎᐊᖅᑐᒥᒃ ᐅᓄᖅᑐᓄᑦ ᓇᓃᓐᓂᕐᓄᑦ, ᐱᕙᓪᓕᐊᔪᓕᕆᓂᒃᑯᑦ ᐃᓕᓐᓂᐊᕐᓂᒃᑯᑦ," ᐅᖃᖅᑐᖅ, ᐃᓱᒪᒋᔭᖃᕐᖢᓂ ᐱᔪᒪᓂᖓᓂᒃ ᐱᑎᑦᑎᓗᓂ ᑐᙵᕕᖕᒥᑦ ᐊᓪᓚᐃᑦ ᓂᐱᖏᓐᓄᑦ ᖃᓄᑐᐃᓐᓇᖅ ᐅᑭᐅᓕᖕᓄᑦ ᑐᓴᖅᑕᐅᓗᓂ. "ᐊᓕᐊᓇᐃᒋᑐᐃᓐᓇᖅᑕᒃᑲ ᐊᓪᓚᐃᑦ ᐊᒻᒪ ᓇᒡᓕᒋᑦᑎᐊᖅᑕᒃᑲ ᑎᐊᓐᓂ ᐃᓄᐃᑦ ᑕᐃᒪᓐᓇᓗ ᐱᓕᕆᓲᖑᕗᖓ," ᑲᔪᓯᓪᓗᓂ.

ᑎᑎᕋᖅᓯᒪᔪᖃᑦᑎᐊᙱᓐᓂᖓᓄᑦ ᐃᓕᖅᑯᓯᑐᖃᒃᑯᑦ ᐅᓂᒃᑲᐅᓯᕐᓂᒃ, ᐃᓱᒪᕗᖅ ᑕᒪᓐᓇ ᑲᔪᓯᑎᑕᐅᔭᕆᐊᖃᕋᓱᒋᓪᓗᒍ ᐊᓪᓚᓄᑦ. ᐃᓕᓐᓂᐊᕈᑎᓕᐅᖅᑕᐅᓯᒪᔪᑦ ᑭᒡᒐᖅᑐᖅᑕᐅᑦᑎᐊᖅᓯᒪᙱᑦᑐᑦ ᐊᓪᓚᐃᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐱᐅᓯᕆᕙᓚᐅᖅᑕᖏᑦ ᐊᒻᒪ ᒨᓯᓯ ᐱᓕᕆᖃᑎᖃᕈᒪᖕᒪᑕ ᓄᓇᖃᖅᑳᖅᓯᒪᔪᓂᒃ ᐅᓂᒃᑳᖅᑐᐊᒥᓂᒃ ᑐᓴᖅᑎᑦᑎᓗᑎᒃ ᐊᒻᒪ ᓄᓇᓕᖕᓂ ᐃᓚᐅᑎᑦᑎᓗᑎᒃ ᐅᓂᒃᑳᖅᑐᐊᕐᓂᒃᑯᑦ.

"ᐅᒃᐱᕈᓱᑦᑎᐊᖅᐳᖓ ᓯᕗᒻᒧᐊᒃᐸᓪᓕᐊᑦᑎᐊᕐᓂᑦᑎᓐᓂᒃ, ᑖᒃᑯᐊ ᓄᓇᖃᖅᑳᖅᓯᒪᔪᑦ ᐱᕈᖅᑎᒃᑲᓐᓂᕈᓐᓇᕋᑦᑎᒍ ᐅᓂᒃᑳᖅᑐᐊᕐᓂᒃᑯᑦ."

ᐃᓕᓐᓂᐊᖅᑎᐊᖅᓯᒪᑦᑎᐊᕐᓂᖅ, ᒪᕐᕉᖕᓂᒃ ᐃᓕᓐᓂᐊᕌᓂᒍᓯᐊᖅᑖᕋᓱᐊᖅᑐᖅ ᓯᓚᑦᑐᖅᓴᕐᕕᒡᔪᐊᒥ ᓚᑦᐳᕆᔾᒥ, ᐃᓕᓐᓂᐊᖅᖢᓂ ᐃᓕᖅᑯᓯᓕᕆᓂᕐᒥᒃ ᐊᒻᒪ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ, ᓄᓇᖃᖅᑳᖅᓯᒪᔪᓂᒃ ᐊᐅᓚᑦᑎᓂᕐᒥᒃ ᑐᕌᒐᖃᖅᖢᓂ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ ᐃᓕᓐᓂᐊᖅᑕᒥᓂᒃ. ᐊᒃᓱᕉᑎᖃᖃᑦᑕᖅᑐᖅ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᓐᓂᒃ ᐱᑕᖃᙱᑎᓪᓗᒍ ᐃᓕᖅᑯᓯᓕᕆᓂᕐᒥᒃ ᐊᒻᒪ ᐃᓱᒪᒃᓴᖅᓯᐅᕈᑎᖃᒃᑲᓐᓂᖅᖢᓂ ᖃᓄᖅ ᑕᑖᖅᑎᒋᖕᒪᖔᑦ ᐊᓈᓇᐅᓪᓗᓂ ᐊᒻᒪ ᓇᖕᒥᓂᖃᖅᑎᐅᓪᓗᓂ.

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᐊᖏᕐᕋᖏᓐᓂ ᓄᓇᓕᖏᓐᓂ ᐊᖏᓂᖅᓴᓄᑦ ᐅᐸᒐᕐᓄᑦ ᐃᓕᓐᓂᐊᕐᕕᖕᓄᑦ ᐃᖅᑲᓇᐃᔮᒧᓪᓘᓐᓃᑦ ᒪᓕᑦᑎᐊᕐᓗᓂ ᐱᔪᒪᔭᖏᓐᓂ ᐊᒃᓱᕈᕐᓗᓂᓗ ᐃᖅᑲᓇᐃᔭᕐᓗᓂ. ᒨᓯᓯ ᐃᓕᓐᓂᐊᒃᑲᓐᓂᕈᒪᔪᖅ ᐅᖃᐅᓯᐅᒃᑲᓐᓂᓚᐅᖅᑐᖅ." ᑕᒪᓐᓇ ᐃᔨᒋᑦᑎᐊᕐᓇᖅᐳᖅ ᐊᔪᕐᓇᙱᓐᓂᓕᒫᖓᓄᑦ ᓄᓇᕐᔪᐊᕐᒥ... ᐱᓪᓗᐊᑕᐅᕗᖅ ᐅᕙᑦᑎᓐᓂᒃ ᓴᙱᓂᖅᑖᖅᑎᑦᑎᓂᐊᕐᓗᓂ ᓄᓇᖃᖅᑳᖅᓯᒪᔫᓪᓗᑕ, ᐃᖅᑭᓖᑦ, ᐃᓅᓪᓗᑕ, ᐅᑎᖅᑎᑦᑎᔪᓐᓇᖅᐳᒍᑦ ᐅᓂᒃᑲᐅᓯᑦᑎᓐᓂᒃ, ᐊᓯᔾᔨᕈᓐᓇᖅᐸᕗᑦ ᖃᓄᐃᓕᐅᖅᑕᐅᕙᓚᐅᖅᑐᑦ, ᓇᖕᒥᓂᖅ ᐅᓂᒃᑲᐅᓯᕆᔪᓐᓇᖅᐸᕗᑦ ᐅᖃᐅᓯᕆᓗᒋᓪᓗ ᓇᖕᒥᓂᖅ ᓱᓕᓂᖅᐳᑦ," ᑕᐃᒪᓐᓇ ᐅᖃᖅᖢᓂ.

ᒨᓯᓯ ᖃᐅᔨᒪᔪᖅ ᐊᒃᓱᕈᖅᖢᓂ ᐱᓕᕆᖃᑦᑕᕐᒪᑦ. ᓇᒻᒥᓂᕐᒥᓂᒃ ᐱᒋᐊᖅᑐᓂ, ᐱᓕᕆᔾᔪᑎᔅᓴᖃᑦᑎᐊᖏᓐᓂᖅ ᐊᕝᕕᐊᕈᑕᐅᓚᐅᖅᑐᖅ. ᐱᒋᐊᓚᐅᖅᑐᖅ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᒻᒥᑦ ᐱᓕᕆᖃᑎᖃᖅᓱᓂᓗ ᓇᒻᒥᓂᖃᕐᓂᕐᒧᑦ ᐃᑲᔪᖅᑎᒥᑦ ᐱᐅᓯᕚᓪᓕᑎᑦᓯᓂᕐᒥᑦ ᓇᒻᒥᓂᖁᑎᖓᓂᑦ. ᑐᔅᓯᐅᔾᔨᓚᐅᖅᑐᖅ ᐊᒻᒪ ᑲᑎᖃᑎᖃᖅᑐᓂ ᓄᓇᓕᖓᓐᓂᑦ ᑕᑯᓐᓇᒐᖅᑖᓚᐅᖅᑐᖅ ᐱᔪᒪᓂᖃᑦᑎᐊᖅᑐᓂ. ᑭᓱᓕᒫᓂᒃ ᐃᓕᓐᓂᐊᖅᑎᐅᓪᓗᓂ, ᐅᓪᓗᖏᓐᓂᒃ ᐊᑐᖅᖢᓂ zoom−ᒥ ᐊᒃᓱᕈᕐᓇᖅᑑᓯᒪᕗᖅ ᑭᓯᐊᓂ ᐊᔪᙱᓐᓂᓕᒫᒥᓂᒃ ᐱᓕᕆᓯᒪᕗᖅ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ ᐱᒻᒪᕆᐅᑎᑦᑎᓇᔭᖅᑐᖅ ᐃᓕᓐᓂᐊᕐᓂᖕᒥᑦ. "ᐃᒃᐱᒋᑦᑎᐊᖅᑕᕋ ᐃᓕᓐᓂᐊᕐᓂᖅ ᐱᓪᓗᐊᑕᐅᓂᖓᓂᒃ ᓯᕗᒻᒧᐊᒃᓗᓂ ᐱᔪᓐᓇᖅᑎᑦᑎᓗᓂ ᓄᓇᖃᖅᑳᖅᓯᒪᔪᑦ ᓄᓇᓕᕐᔪᐊᖏᓐᓂ ᐃᓕᓴᕆᔭᐅᔪᑦ ᐊᑎᖃᖅᑎᐅᓪᓗᑎᒃ ᓄᓇᒥᓗ ᓇᖕᒥᓂᖃᖅᑎᐅᓪᓗᑎᒃ ᑕᕝᕙᓂ ᓄᓇᒥ," ᐱᖃᖃᑕᐅᔪᖅ. ᐅᑭᐅᖅᑕᖅᑐᒥᐅᑕᐅᓂᖅ ᐊᒥᓱᓂᒃ ᐱᕕᒃᓴᖃᖅᐳᖅ ᐊᑕᓕᕈᓐᓇᕐᓂᕐᒥᒃ ᓄᓇᒧᑦ, ᐅᖃᐅᓯᕐᒧᑦ ᐃᓕᖅᑯᓯᑐᖃᕐᓄᓪᓗ ᐃᒪᓐᓇ ᑐᑭᖃᖅᐳᖅ, ᓅᑦᑐᓐᓇᕐᓂᖅ ᖃᓪᓗᓈᓄᑦ ᐃᓕᓐᓂᐊᕐᕕᖕᒧᑦ ᐱᕕᒃᓴᖃᖅᑎᑦᑎᕙᒃᐳᖅ ᖁᔭᓕᓂᕐᒥᒃ ᐊᖏᕐᕋᕆᔭᒥᓂᒃ ᐅᑎᕈᕕᑦ, ᑖᓐᓇ ᑕᐅᑐᒐᕆᔭᖓ.

ᖃᖓᙳᖅᐸᓪᓕᐊᓂᖓᓄᑦ, ᐃᓕᑦᑎᓚᐅᖅᐳᖅ ᐱᒻᒪᕆᐊᓘᓂᖓᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᑦ. ᐅᖃᐅᓯᓕᕆᓂᕐᒥ ᐃᓕᓐᓂᐊᕐᓂᖅ ᐊᒃᓱᕈᕐᓇᕈᓐᓇᖅᑐᖅ ᐱᒻᒪᕆᐅᓇᓱᒋᓪᓗᓂᐅᒡᓗ ᐃᖅᑲᐅᒪᓗᒍ ᐊᕕᖕᓂᖅ ᐅᖃᐅᓯᕐᒥᑦ ᐃᓚᒋᔭᐅᖕᒪᑦ ᓄᓇᑐᖃᕆᙱᑕᒥᓄᑦ ᐊᒻᒪ ᓇᖕᒥᓂᖅ ᐊᔪᓕᕈᑕᐅᙱᖦᖢᓂ. ᓄᑖᓂᒃ ᐱᕕᒃᓴᖃᖅᑎᓪᓗᒋᑦ ᐊᒃᑐᐊᓂᖃᓕᕐᓂᐊᕐᓗᓂ ᐅᖃᐅᓯᕐᒧᑦ, ᒨᓯᓯ ᑕᑯᕗᖅ ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᓯᕗᒻᒧᐊᖅᐸᓪᓕᐊᓂᐊᕐᓗᓂ ᐅᖃᓪᓚᒍᓐᓇᕐᓂᕐᒧᑦ. ᐃᓚᖓᓂ ᑲᒻᐸᓂᖓᑕ ᐱᓕᕆᐊᕆᔭᖓᓂ, ᐃᓚᓯᓚᐅᖅᑐᑦ ᖃᓪᓗᓈᑎᑐᑦ ᑕᐃᒎᓯᕐᓂᒃ ᐊᓪᓚᓄᑦ ᑕᕐᕆᔮᒃᓴᓄᑦ ᑲᓲᑎᖁᓪᓗᒋᑦ ᐃᓄᐃᑦ ᐱᖅᑯᓯᑐᖃᒃᑯᑦ ᐅᓂᒃᑳᓄᑦ. ᑕᑯᓐᓇᖅᑐᖅ ᐅᑎᖅᑎᑦᑎᓂᕐᒥᒃ ᓄᓇᓕᓐᓄᑦ ᐃᑲᔪᖅᑐᐃᓂᒃᑯᑦ ᐊᒻᒪᓗ ᖁᕕᐊᓇᑦᑐᓂ.

ᑲᔪᓯᑎᓪᓗᒍ ᐃᓱᒪᖓ, ᒨᓯᓯ ᐱᖃᑦᑕᖅᑐᖅ ᐃᓱᒪᓕᕆᓂᕐᒧᑦ ᐱᔨᑦᑎᕋᐅᑎᓂᑦ ᐃᓕᓐᓂᐊᕐᕕᒃᑯᑦ. ᑐᔅᓯᐅᔾᔨᖃᑦᑕᖅᑐᖅ, ᐊᑐᐃᓐᓇᖃᑦᑕᖅᑐᓂ, ᑕᑯᓐᓇᖅᑐᓂ ᑲᔪᖏᖅᓴᐃᔪᓂᑦ ᑕᕐᕆᔮᔅᓴᐅᔪᓂᑦ, ᐃᓄᑑᒍᓐᓇᖅᑐᓂ, ᐊᒻᒪ ᑐᓴᖅᑎᑦᑎᓪᓗᓂ ᐃᓱᒪᖓᑕ ᖃᓄᐃᓐᓂᖓᓂᑦ ᖃᕋᓴᐅᔭᒃᑯᑦ. ᐅᖃᖃᑎᖃᖃᑦᑕᖅᑐᖅ ᐃᓄᓐᓂᑦ, ᐱᓱᑦᑐᓂᑦ, ᐅᖃᖃᑎᖃᖅᑐᓂ ᓄᓇᒥ ᐊᒻᒪ ᓇᒻᒥᓂᖅ ᑲᒪᒋᑦᑎᐊᕋᓱᐊᖅᑐᓂ. ᓴᐃᓕᓐᓇᖅᓯᔭᓕᖅᐸᒃᖢᓂ, ᑏᕖᒃᑯᑦ ᑕᐅᑐᒃᖢᓂ, ᐱᙳᐊᖅᑐᓂᒃ ᐱᙳᐊᖃᑎᖃᖅᖢᓂ, ᐅᕝᕙᓘᓐᓃᑦ ᐸᓂᒥᓂᒃ ᐱᙳᐊᖃᑎᖃᖅᖢᓂ.

ᑲᔪᖏᖅᓴᐃᓂᕐᒧᑦ, ᒨᓯᓯ ᑕᐅᑦᑐᖃᖅᑐᖅ ᓄᓇᒥᓄᑦ, ᐃᓄᖏᓐᓄᑦ, ᓄᓇᖓᓄᑦ ᐸᓂᖓᓄᓪᓗ. ᐊᓯᔾᔩᔪᒪᕗᖅ ᓯᕗᓂᒃᓴᒧᑦ, ᓴᖅᑭᑦᑎᓗᓂ ᓄᑖᓂᑦ ᑲᓱᖃᑎᒌᖕᓂᖕᒧᑦ ᐃᑲᔪᖕᓂᖕᒧᓪᓗ ᑭᒡᒐᖅᑐᐃᑦᑎᐊᖕᓂᕐᓴᐅᓂᖕᒧᑦ. ᓂᕆᐅᒃᑭᕗᖅ ᓴᖅᑭᑦᑎᒃᑲᓐᓂᓛᕆᐊᒃᓴᖅ ᐃᖅᑲᓇᐃᔮᒃᓴᒃᑲᓐᓂᕐᓂᒃ ᓄᓇᖃᖅᑳᖅᓯᒪᔪᓄᑦ ᐱᓕᕆᕝᕕᒋᔭᖓᓂ.

ᑖᓐᓇ ᐱᓕᕆᓂᕆᔭᖓ ᐊᒃᓱᕈᖅᖢᓂ ᐱᓕᕆᔪᖅ ᑭᓯᐊᓂ ᐃᑲᔪᕈᒪᑦᑎᐊᖅᑐᖅ ᐊᓯᔾᔨᖅᐸᓪᓕᐊᔪᓄᑦ ᐅᓂᒃᑳᖅᑕᐅᔪᓄᑦ ᐱᕙᓪᓕᐊᔪᓕᕆᔨᓄᑦ ᐊᒻᒪ ᐃᓕᓐᓂᐊᖅᑐᓕᕆᓂᕐᒧᑦ ᐱᔪᒃᓯᑦᑎᐊᖅᑎᓪᓗᒍ. ᐃᑲᔪᖅᑐᖅᑕᐅᓪᓗᓂ ᓴᙱᔪᓄᑦ ᑲᔪᖏᖅᓴᐃᔨᓄᑦ, ᐃᓕᓴᐃᔨᒻᒪᕆᖕᓄᑦ, ᐃᓕᖅᑯᓯᕐᓄᑦ ᓯᕗᓕᖅᑎᓄᑦ, ᖃᐅᔨᒪᓂᕐᒧᑦ ᐱᓯᒪᔨᓄᑦ, ᐃᓐᓇᕐᓄᑦ, ᐊᖓᔪᖅᑳᓄᑦ ᖃᑕᙳᑎᖏᓐᓄᓪᓗ ᒪᓕᖁᓪᓗᒋᑦ ᐱᔪᒪᔭᖏᓐᓂ ᐃᓅᓗᓂᓗ ᓱᓐᓂᐅᒪᓗᓂ ᐃᓅᓯᖓᓂ, ᐊᒃᑐᖅᑕᐅᓯᒪᔪᖅ ᐃᓕᖅᑯᓯᖓᓄᑦ ᐱᐅᓛᖑᓗᓂ ᐃᓅᓗᓂ. ᐅᓂᒃᑳᖅᑐᐊᓂᒃ ᐊᓯᐅᓯᒪᔪᓂᒃ ᐅᖃᐅᓯᖃᖅᖢᓂ ᖃᓪᓗᓈᖑᖃᑎᒌᙱᑦᑐᓂᒃ, ᐃᑲᔪᖅᐳᖅ ᓄᑖᒥᒃ ᓯᕗᒻᒧᐊᒃᐸᓪᓕᐊᓂᕐᒧᑦ.

"ᑕᐃᒪᓕ ᐱᕕᖃᓕᕐᒥᒐᑦᑕ ᐅᑎᖅᑎᓐᓇᓱᒃᓗᑎᒍᑦ ᑲᔪᓯᑐᐃᓐᓇᕐᓗᑕᓗ, ᐱᓇᔪᐃᓐᓇᕐᓗᑕ, ᑕᑯᑎᑦᑎᓗᑕ ᓴᐱᓕᖅᓴᕋᐃᙱᓐᓂᑦᑎᓐᓂᒃ ᓄᓇᖃᖅᑳᖅᓯᒪᔪᑦ ᓄᓇᖏᓐᓂᑦ, ᐃᖅᑭᓖᑦ ᓄᓇᓕᕐᔪᐊᖏᓐᓂ ᐱᔪᒪᓕᖅᑎᑦᑎᕙᓪᓕᐊᖏᓐᓇᕐᓗᑕᓗ ᐱᑎᑦᑎᓗᑎᒃᓗ ᓂᕆᐅᖕᓂᕐᒥᒃ ᒪᒃᑯᒃᑐᓄᑦ ᐃᓐᓇᕈᓕᓵᖅᑐᓄᓪᓗ ᐃᓐᓇᕐᓄᑦ, ᐃᓄᓕᒫᓄᑦ ᓲᖃᐃᒻᒪ ᐱᔭᕆᐊᖃᖅᑐᐃᓐᓇᐅᖅᑰᕋᑦᑕ. ᐊᒻᒪᓗ ᐊᑕᐅᓯᑐᐃᓐᓇᐅᒐᓂᓗ ᑭᖑᕚᕇᓄᑦ. ᑭᖑᕚᕇᓄᑦ ᐱᔾᔪᑎᖃᕐᒪᑦ. ᓯᕗᒻᒧᑦ ᐃᖏᕐᕋᓂᐅᕗᖅ ᐊᑕᐅᑦᑎᒃᑯᑦ ᓇᓂᓯᓂᕐᒧᓪᓗ ᓄᓇᓕᖕᒥ ᖁᔭᓕᑦᑎᐊᖅᐳᖓᓗ ᐅᓪᓗᒥ ᑕᒫᓃᑦᑐᓐᓇᕋᒪ," ᐱᙳᐊᖅᑐᖅ.

ᑕᐃᕋ ᒨᓯᓯ ᖃᐅᔨᒪᔪᖅ ᐃᓅᓯᖅ ᐱᕕᖃᖅᑎᑦᑎᓂᖓᓂᒃ ᐊᒻᒪᓗ ᖁᕕᐊᒋᔭᖃᕈᕕᑦ ᑭᓱᒥᑭᐊᖅ, ᓴᖅᑭᓐᓂᐊᖅᑐᖅ ᐃᓅᓯᕐᓂ. ᐱᕕᖃᕐᓂᖅᓴᐅᓪᓗᓂ ᐱᓇᓱᐊᕐᓂᕐᒥᑦ ᖁᕕᐊᒋᔭᖃᕐᓂᕐᒥᑦ ᐃᓕᓐᓂᐊᖅᑎᐅᓪᓗᓂ, ᐊᓈᓇᐅᓪᓗᓂ, ᓇᒻᒥᓂᖃᖅᑎᐅᓪᓗᓂ ᐅᖃᐅᓯᓕᕆᓂᕐᒧᓪᓗ ᐃᓕᓐᓂᐊᖅᑎᐅᓪᓗᓂ, ᐅᑎᖅᐸᓪᓕᐊᓕᖅᑐᖅ ᐃᓕᖅᑯᓯᕐᒧᑦ, ᓄᓇᓕᓐᓄᑦ ᐊᑦᑐᐊᓂᖃᕐᓂᕐᒥᓪᓗ ᓱᓇᓂᑦ ᐱᒻᒪᕆᐅᔪᓂᑦ. ᑐᙵᕕᓕᐅᖅᖢᓂ ᐊᒻᒪ ᓂᐱᑦᑕᖅᑐᓕᐅᖅᖢᓂ, ᐃᓂᒃᓴᓕᐅᖅᐳᖅ ᐊᓪᓚᓄᑦ ᑭᒡᒐᖅᑐᐃᔨᒃᓴᓂᒃ ᐊᒻᒪ ᐃᓕᓐᓂᐊᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑦᓵᑦ ᑎᑎᕋᓚᐅᕐᒪᑦ ᑕᒪᑐᒥᖓ.