"ᑎᑭᐅᑎᓯᒪᙱᑦᑎᐊᕋᒪ ᐃᖅᑲᓇᐃᔮᕆᔪᒪᓇᔭᓚᐅᖅᑕᓐᓂᒃ," ᐅᖃᖅᑐᖅ ᕙᓂᓴ ᐳᕉᓱ ᐱᕈᖅᓴᓚᐅᖅᑐᖅ ᑎᒥᓐᔅ, ᐋᓐᑎᐅᕆᐅᒥ ᐊᒻᒪ ᓄᒃᑎᓚᐅᖅᓯᒪᓪᓗᓂ ᐊᑕᕙᐱᔅᑲᑦᒧᑦ 20 ᐅᑭᐅᖃᓕᓵᖅᑎᓪᓗᒍ. ᑭᖑᓂᐊᒍᑦ, ᐅᑎᓕᓚᐅᖅᐳᖅ ᑎᒥᓐᔅᒧᑦ, ᑭᖑᓂᐊᒍᓪᓗ ᐋᑐᕚᒧᑦ, ᓄᐊᑦ ᐸᐃᒧᑦ, Niagara Falls-ᒧᑦ, ᒫᓐᓇᓗ ᓄᐊᑦ ᐸᐃᒧᑦ ᐅᑎᖅᓯᒪᓕᖅᐳᖅ, ᐊᖏᕐᕋᕆᖏᓐᓇᕐᓂᐊᕋᓱᒋᓪᓗᓂᐅᒃ.

ᐊᖓᔪᒃᖡᑦ ᐃᓕᓐᓂᐊᕇᕋᒥ, ᐳᕉᓯᐅ ᓄᓇᖃᖅᑳᖅᑐᓄᑦ ᐃᓅᓯᓕᕆᔨᐅᓂᕐᒧᑦ ᐃᓕᓐᓂᐊᓚᐅᖅᐳᖅ ᓯᖓᐃᓕᖅᖢᓂᓗ ᐊᐃᑉᐸᖓᓂ ᐊᕐᕌᒍᖓᓂ. ᐃᓱᓕᑦᑎᓚᐅᖅᐳᖅ ᐃᕐᓂᓂ ᑎᒍᒥᐊᖅᖢᓂᐅᒃ. ᐊᕐᕌᒍᓂ ᖁᓕᓂ, ᐃᓄᓕᕆᔨᐅᓚᐅᖅᐳᖅ ᒪᒥᓴᕐᕕᖕᒥ ᐊᑕᕚᐱᔅᑲᑦᒥ, ᑭᖑᓂᐊᒍᓪᓗ ᐃᖅᑲᓇᐃᔭᓕᓚᐅᖅᓯᒪᓪᓗᓂ ᓄᓇᖃᖅᑳᖅᑐᓄᑦ ᓄᑕᖅᑲᓄᑦ ᐃᓚᒌᓄᓪᓗ ᐱᔨᑦᑎᕋᖅᑎᓄᑦ ᑎᒥᓐᔅᒥ ᓇᔭᖓ ᐊᓯᐅᓚᐅᙱᓐᓂᖓᓂ. ᐃᓕᓐᓂᐊᕐᕕᖕᒧᑦ ᐅᑎᓚᐅᖅᐳᖅ ᑎᑎᕋᕐᕕᖕᒥ ᐊᐅᓚᑦᑎᔨᐅᓂᕐᒧᑦ, ᐊᓂᒍᐃᓪᓗᓂ ᐅᐱᒋᔭᐅᑦᑎᐊᖅᖢᓂ. "ᐱᓕᕆᔾᔪᑎᑦ ᐃᓕᓯᒪᔭᒃᑲ ᓱᓕ ᐅᓪᓗᒥ ᐃᑲᔪᖅᓯᒪᕗᑦ, ᑭᒡᒐᖅᑐᐃᓂᕐᒧᑦ, ᓴᖅᑭᑎᑦᑎᓂᕐᒧᑦ ᐃᓗᓕᖏᓐᓂᒃ, ᐃᓄᓕᒫᓄᑦ ᐅᖃᓪᓚᖕᓂᒃᑯᑦ, ᐊᒻᒪ ᐊᔾᔨᒌᙱᕈᓘᔭᖅᑐᓂᒃ ᑭᓱᑐᐃᓐᓇᕐᓂᒃ. ᖁᔭᓕᕐᔪᐊᖅᐳᖓ ᐊᖅᑯᑎᒋᓚᐅᕋᒃᑯ," ᐳᕉᓯᐅ ᐅᖃᓚᐅᖅᐳᖅ.

ᒪᒥᓴᕐᔪᐊᓚᐅᖅᐳᖅ ᓇᔭᒥᓄᑦ ᐊᓯᐅᓯᒪᔪᒧᑦ ᖃᓄᐃᓕᐅᕆᐊᖃᓕᖅᖢᓂᓗ ᒪᒥᓴᕐᓂᕐᒧᑦ. ᐃᓄᑐᖃᐃᑦ ᑐᓂᓯᓚᐅᖅᓯᒪᔭᖓ ᕿᓯᒥᓂᕐᓂᒃ ᐋᑐᕚᒥᐅᑕᐅᑎᓪᓗᒍ ᐊᒻᒪᓗ ᓯᐅᒻᒥᐅᑕᓕᐅᖃᑦᑕᓕᓚᐅᖅᓯᒪᓪᓗᓂ. ᐅᔾᔨᕈᓱᓕᖅᑎᑦᑎᒃᑲᓐᓂᕈᒪᓚᐅᖅᐳᖅ ᐊᓯᐅᓯᒪᔪᓂᒃ ᐃᓄᐊᖅᑕᐅᓯᒪᔪᓂᒡᓗ ᓄᓇᖃᖅᑳᖅᑐᓂᒃ ᑕᐃᒪᐃᓐᓂᖓᓄᑦ ᒥᑭᑦᑐᑯᓗᖕᓂᒃ ᐊᐅᐸᖅᑐᓂᒃ ᐊᓐᓄᕌᓕᐅᖃᑦᑕᓕᓚᐅᖅᐳᖅ ᕿᓯᐅᑉ ᐊᒥᖓᓂᒃ. ᐱᐅᒋᔭᐅᒻᒪᕆᓕᓚᐅᖅᑐᑦ ᐊᒻᒪᓗ ᓄᓇᙳᐊᓕᐅᖅᑐᓂ ᑕᑯᔅᓴᐅᑎᑦᑎᓪᓗᓂ ᓇᒥ ᓂᐅᕕᐊᔅᓴᖃᖃᑦᑕᕐᒪᖔᖅ ᐊᐅᐸᖅᑐᓂᒃ ᕿᓯᓐᓂᒃ ᖃᑭᖅᑯᐊᓂᒃ ᐅᕝᕙᓘᓐᓃᑦ ᓯᐅᒻᒥᐅᑕᓂᒃ ᑕᑯᔅᓴᐅᑎᑦᑎᓪᓗᓂ ᖃᓄᑎᒋ ᐃᓄᒃ ᐊᑕᐅᓯᖅ ᐅᔾᔨᕈᓱᒍᓐᓇᕐᒪᖔᖅ ᐊᒻᒪᓗ ᑎᓕᐅᕆᓪᓗᓂ ᐊᓯᒥᓂᒃ ᓂᐱᒥᓂᒃ ᐊᑐᖁᔨᓪᓗᓂ.  

ᐊᓪᓚᖓᔪᖅ ᑎᑎᕋᐅᔭᖅᑎ ᔭᐃᒥ ᐸᓛᒃ ᐱᒋᐊᖅᑎᑦᑎᓚᐅᖅᓯᒪᕗᖅ ᐊᐅᐸᖅᑐᒥᒃ ᐊᓐᓄᕌᓕᐅᕐᓂᕐᒧᑦ ᐱᓕᕆᐊᒥᒃ 2010-ᒥ ᐊᒻᒪ ᐳᕉᓯᐅ ᓇᔭᖓ ᐊᓯᐅᓯᒪᓚᐅᖅᖢᓂ ᐊᕐᕌᒍᓂᒃ 7-ᓂᒃ ᑕᐃᔅᓱᒪᓂᐅᑎᓪᓗᒍ. ᐳᕉᓯᐅ ᖁᔭᓕᓚᐅᖅᐳᖅ ᐊᒻᒪ ᐊᒃᑐᐊᓂᖃᖅᖢᓂ ᐱᓕᕆᐊᖑᔪᒧᑦ. "ᑕᒪᓐᓇ ᐅᐱᒋᑦᑎᐊᓚᐅᖅᐸᕗᑦ ᓇᒡᓕᒋᔭᕗᑦ ᐃᖅᑲᐅᒪᓪᓗᒋᓪᓗ ᓇᒡᓕᒋᔭᕗᑦ ᐱᐅᔪᒃᑯᑦ, ᐱᐅᔪᒻᒪᕆᒃᑯᑦ. ᑎᒍᓯᑲᐅᑎᒋᓚᐅᖅᐸᕋ, ᑕᒪᓐᓇᓗ ᒪᒥᓴᕈᑎᒋᓕᖅᖢᒍ ᐅᕙᓐᓄᑦ, ᐊᒻᒪᓗ ᐃᒃᐱᒋᔭᖃᓕᖅᖢᖓ ᖃᓄᐃᓕᐅᓪᓚᕆᓕᕐᓂᓐᓂᒃ ᓇᔭᓐᓄᑦ," ᐃᖅᑲᐅᒪᔪᖅ.

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐊᖏᕐᕋᒥᓂ ᐊᐅᓪᓚᖅᑐᓄᑦ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᓴᖅᑭᑦᑎᓗᑎᒃ ᓄᓇᓕᖕᓂ ᐃᑲᔪᖅᓱᐃᔾᔪᑎᒃᓴᓂᒃ ᐃᒻᒥᓄᑦ, ᐃᓄᖕᓂᑦ ᐱᖃᓐᓇᕆᔭᖃᕐᕕᖕᓂ, ᐃᓕᓴᐃᔨᓂᒃ, ᓄᓇᖃᖅᑳᖅᓯᒪᔪᓂᒃ ᐃᖅᑲᓇᐃᔭᖅᑎᓂᒃ ᐃᓕᓐᓂᐊᕐᕕᖕᒥ, ᐃᓄᖕᓂ ᐅᒃᐱᕆᔭᖃᑦᑎᐊᕈᓐᓇᕐᓂᕐᒥᒃ. "ᑕᒪᓐᓇ ᐱᒻᒪᕆᐅᓇᓱᒋᕙᕋ, ᓲᖃᐃᒻᒪ ᐊᒥᓱᐊᖅᑎ ᐊᑯᓂᐅᓗᐊᓲᖑᖕᒪᑦ ᐅᖃᐅᓯᖃᕆᐊᒃᓴᖅ ᐊᓯᐅᓯᒪᔪᒥᒃ, ᐊᒻᒪ ᐳᐃᒍᓲᖑᒐᑦᑕ ᖃᐅᔨᒋᐊᕆᐊᒃᓴᖅ ᐃᓄᖕᓂ ᐊᒻᒪ ᖃᐅᔨᒪᒐᓗᐊᕐᒪᖔᑕ ᓇᓃᒻᒪᖔᖅᐱᑦ ᐃᓄᐃᑦ ᖃᐅᔨᒪᓂᐊᕐᒪᑕ ᑕᑯᔭᐅᙱᓚᐅᑲᒃᑯᕕᑦ, ᑕᐃᒪᓕ ᖃᐅᔨᒪᓕᕐᓗᑎᒃ ᓇᓂ ᕿᓂᕆᐊᖃᕐᒪᖔᖅᐱᑦ," ᐅᖃᖅᑐᖅ. ᒫᓐᓇᓘᓐᓃᑦ, ᐳᕉᓯᐅ ᖃᐅᔨᒋᐊᖅᐸᒃᐳᖅ ᓇᒧᙵᐅᖕᒪᖔᕐᒥᓂᒃ ᐃᒻᒥᓂᒃ ᖁᐊᖅᓵᕐᓇᖅᑐᒦᖁᓇᒍ.

ᐊᓂᒍᖅᑎᑦᑎᓇᓱᒃᖢᓂ ᐊᔭᖅᑭᑦᑕᕈᑕᐅᕙᒃᑐᓂᒃ, ᐳᕉᓯᐅ ᐅᖃᓚᐅᖅᐳᖅ, "ᓄᓇᒦᑉᐳᖓ. ᓄᓇᒦᖏᓐᓇᐅᔭᖅᑐᖓ. ᐊᒻᒪᓗ ᑕᒪᓐᓇ ᐱᔾᔪᑎᒋᓪᓗᒍ ᓄᐊᑦ ᐸᐃ ᐱᐅᒋᓗᐊᖅᑕᕋ. ᑲᔾᔮᕐᓇᖅᑐᒻᒪᕆᐊᓗᖕᓂᒃ ᓄᓇᑕᖃᖅᐳᖅ ᑕᒫᓂ ᓄᓇᒥ ᐃᒪᑦᑎᐊᕚᓘᓪᓗᓂᓗ. ᑕᒪᓐᓇ ᐅᑎᕐᕕᒋᓲᕆᒐᒃᑯ, ᐊᒻᒪᓗ ᑕᒪᓐᓇ ᐃᓄᓐᓄᑦ ᑐᑭᓯᔭᐅᖁᒻᒥᔭᕋ, ᐅᑕᕿᑐᐃᓐᓇᖏᓪᓗᑎᑦ ᓇᒻᒥᓂᖅ ᑲᒪᒋᒋᐊᖃᓕᕈᕕᑦ. ᖃᐅᑕᒫᑦ...ᐅᑕᖅᑭᙱᓪᓗᑎᑦ. ᑕᐃᒪᐃᓕᐅᑐᐃᓐᓇᕆᑦ. ᐃᓅᓕᓴᐅᑎᑎᑐᑦ. ᐊᑏ ᐱᓕᕆᓗᑎᑦ ᐆᒻᒪᑎᖕᓄᑦ ᖁᕕᐊᓱᒃᑎᑦᑎᔪᓐᓇᖅᑐᒥᒃ. ᐱᓱᔪᒃᐸᒃᖢᖓ, ᓇᐹᖅᑐᓕᖕᓂᒃ ᐊᒃᑐᖅᓯᕙᒃᖢᖓ, ᐃᓯᒐᒃᑲ ᐃᒪᕐᒧᐊᖅᐸᒃᖢᒋᑦ. ᓄᓇᒧᑦ ᐊᒃᑐᐊᓂᖃᓪᓚᕆᒃᐳᖓ, ᑕᐃᒪᓐᓇᓗ ᐅᕙᓐᓂᒃ ᑐᙵᕕᖃᑦᑎᐊᓕᖅᖢᖓ ᑕᒫᓃᓕᖅᖢᖓᓗ ᒫᓐᓇᓗ. ᑕᒪᓐᓇ ᐱᒻᒪᕆᐅᓇᓱᒋᕙᕋ, ᐃᓕᖕᓂᒃ ᑲᒪᒋᑦᑎᐊᖅᐸᒡᓗᑎᑦ, ᑕᒪᓐᓇ ᐊᐅᓚᑕᒃᓴᐅᔪᓐᓃᓚᐅᙱᓐᓂᖓᓂ."

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐃᓕᖕᓂᒃ ᐅᒃᐱᕆᓗᑎᑦ. ᖃᓄᑐᐃᓐᓇᑦᑎᐊᖅ ᐱᓕᕆᔪᓐᓇᖅᐳᑎᑦ, ᖃᓄᑐᐃᓐᓇᑦᑎᐊᖅ. ᑭᓇᑐᐃᓐᓇᑦᑎᐊᑎᑐᑦ ᐊᔪᙱᑦᑎᐊᖅᐳᑎᑦ, ᐱᐅᓂᖅᓴᐅᙱᒃᑯᕕᑦ. ᐊᒻᒪᓗ ᑕᒪᓐᓇ ᑕᑯᔭᕆᐊᖃᖅᑕᐃᑦ, ᓲᖃᐃᒻᒪ ᐃᓕᖕᓂᒃ ᐅᒃᐱᕆᙱᒃᑯᕕᑦ, ᑭᓇᑐᐃᓐᓇᕐᒧᑦ ᐅᒃᐱᕆᔭᐅᔾᔮᙱᓐᓇᕕᑦ. ᑕᐃᒪᓐᓇ ᐊᐅᓚᓂᖃᓲᖑᕗᖅ." ᐊᔭᐅᖅᑐᖅᑕᐅᙱᖦᖢᓂ, ᑐᓴᓚᐅᙱᓚᖅ. ᐳᕉᓱ ᐅᒃᐱᕈᓱᒃᐳᖅ ᑕᐃᒪᐃᓚᐅᕈᓂ, ᒪᒥᓴᕋᐃᓐᓂᖅᓴᐅᓇᔭᓚᐅᖅᐳᖅ.

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᓄᓇᒥ ᒪᒥᓴᕐᓂᐅᑉ ᐅᖓᑖᓄᑦ, ᐳᕉᓱ ᐅᒃᐱᕈᓱᒃᐳᖅ ᐅᖃᓪᓚᖃᑎᖃᕈᓐᓇᕐᓂᕐᒥᒃ ᑭᓇᑐᐃᓐᓇᕐᒧᑦ ᑭᓱᑐᐃᓐᓇᓂᒃ ᐊᓂᑎᑦᑎᓂᐊᕐᓗᓂ. ᓴᓇᙳᐊᕐᓂᖅ, ᐊᒡᒐᒥᓄᑦ ᐱᓕᕆᐃᓐᓇᕐᓂᖅ, ᑎᑕᒃᑎᓂᒃ ᐱᙳᐊᕐᓂᖅ ᐊᒻᒪ ᑲᑎᙵᖃᑎᖃᕐᓂᖅ ᐃᓕᖅᑯᓯᕆᔭᐅᔪᓂᒃ ᐊᖑᓇᓱᖕᓂᒃᑯᑦ, ᒧᒥᕐᓂᒃᑯᑦ ᕿᓚᐅᔾᔭᕐᓂᒃᑯᓪᓘᓐᓃᑦ. "ᖃᐅᔨᒪᑦᑎᐊᕆᐊᖃᖅᐳᑎᑦ ᒪᑭᑕᑦᑎᐊᖏᓐᓇᕐᓗᑎᑦ, ᑕᐃᒪᐃᙱᒃᑯᕕᑦ ᐊᑲᐅᓯᔾᔮᙱᓐᓇᕕᑦ," ᐅᖃᖅᑐᖅ.

"ᑐᓴᕐᓈᕐᓂᖅ ᒪᒥᓴᕐᓇᕐᔪᐊᖅᐳᖅ ᐃᓛᓐᓂᒃᑯᓪᓗ ᖃᐅᔨᕙᙱᖦᖢᑕ ᖃᓄᖅ ᒪᒥᓴᕈᓐᓇᕐᒪᖔᑦ."

ᐱᔪᒃᓯᑎᑦᑎᓇᓱᓕᕌᖓᒥ, ᐳᕉᓯᐅ ᑕᐅᑐᒃᐸᒃᐳᖅ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑯᑦ ᐅᕝᕙᓘᓐᓃᑦ ᐃᓄᖕᓂᒃ ᑲᑎᖃᑦᑕᖅᑕᖏᓐᓂᒃ ᖃᓄᐃᓕᐅᖅᑐᖃᖅᑎᓪᓗᒍ ᐅᕝᕙᓘᓐᓃᑦ ᓄᓇᓕᖕᓂ. "ᐊᑕᐅᓯᑐᐊᖑᙱᓚᖅ ᐃᓄᒃ. ᑕᒪᑦᑕᑦᑎᐊᖅ ᐃᓚᐅᓂᖃᖅᑐᐃᓐᓇᐅᕗᒍᑦ. ᑕᒪᑦᑕᑦᑎᐊᖅ ᐃᑲᔪᖅᐸᒃᐳᒍᑦ ᖃᓄᑐᐃᓐᓇᖅ, ᑕᒪᑦᑕᑦᑎᐊᕐᓗ ᐱᔪᓐᓴᐅᑎᖃᖅᑐᐃᓐᓇᐅᕗᒍᑦ ᓇᒃᓴᕐᓂᐊᖅᑕᑦᑎᓐᓂᒃ ᓄᓇᕐᔪᐊᒧᑦ... ᐆᒻᒪᑏᑦ ᒪᑐᐃᙶᖅᑎᑉᐸᒡᓗᒍ ᐃᓄᓕᒫᓄᑦ," ᑎᓕᐅᕆᕗᖅ.

ᐃᓱᓕᓕᖅᑎᓪᓗᒍ ᒪᕐᕉᖕᓂᒃ ᐅᓂᒃᑳᓚᐅᖅᐳᖅ, ᐃᓚᖓᑦ ᓱᓗᖓ ᖃᐅᓯᖅᑐᒥ ᓇᓂᓚᐅᖅᑕᖓᓂ ᐅᓪᓗᕐᒥ ᐊᒃᓱᕈᓗᐊᓕᖅᑎᓪᓗᒍ ᐋᓐᓂᖅᓯᕆᓂᐅᔪᒥ, ᐃᓅᖃᑎᒥᓂᒃ ᐊᑭᕋᖅᑐᕐᓂᕐᒧᑦ ᐊᒻᒪ ᓲᖑᓴᖕᓂᐅᔪᒥ ᑭᓯᐊᓂ ᐃᒃᐱᒋᓚᐅᖅᐳᖅ ᐆᒻᒪᑎᒥᓂ ᑲᔪᓯᖁᔭᐅᓪᓗᓂ ᐊᒻᒪ ᐅᖃᓪᓚᐃᓐᓇᖁᔭᐅᓪᓗᓂ. ᐊᐃᑉᐸᖓ ᐅᓂᒃᑳᖓ ᐅᐃᖓᑕ ᑲᑎᓯᓂᕆᓚᐅᖅᑕᖓ ᑐᓗᒐᕐᒥᒃ ᒥᖑᐊᖅᓯᒪᔪᒥᒃ ᐅᔭᖅᑲᒥᒃ ᖃᓂᕐᒥᓄᑦ ᐃᙱᖅᖢᓂᓗ. ᐅᔭᕋᒃ ᐅᖃᖅᖢᓂ, "ᑲᒪᓇᑦᑎᐊᖅᐳᑎᑦ."  

ᐃᖅᑲᓇᐃᔮᕆᔪᒪᔭᒥᓄᑦ ᑎᑭᐅᑎᓚᐅᙱᑦᑐᖅ ᑭᓯᐊᓂ ᐊᓯᔾᔩᓯᒪᕗᖅ. ᐃᓄᓕᕆᔨᐅᓂᕐᒥᒃ ᐊᐅᐸᖅᑐᓂᒃ ᐊᓐᓄᕌᓂᒃ ᐅᔾᔨᕈᓱᒃᑎᑦᑎᓂᕐᒥᒃ, ᕙᓂᓴ ᐳᕉᓯᐅ ᐃᓅᓯᖏᓐᓂᒃ ᐊᑲᐅᓯᕚᓪᓕᖅᑎᑦᑎᓯᒪᕗᖅ ᐃᓄᖕᓄᑦ ᐊᒃᓱᕈᕈᑎᖃᖅᑐᓄᑦ. ᐃᓅᓯᖓ ᐊᓯᔾᔨᓚᐅᖅᐳᖅ ᓇᔭᖓ ᐊᓯᐅᖕᒪᑦ ᐊᒻᒪ ᑭᓱᑐᐃᓐᓇᐃᑦ ᐊᓯᔾᔨᓚᐅᖅᓯᒪᙱᖦᖢᑎᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.