"ᐱᔪᒥᒋᑦᑎᐊᖅᑕᕋ ᒪᒥᓴᕐᕕᒃᓴᓕᐅᕐᓂᖅ ᐊᒻᒪ ᒪᒥᓴᕐᓂᕐᒧᑦ ᓴᓇᙳᐊᕐᓂᖅ ᐅᕙᓐᓄᑦ ᐊᓯᓐᓄᓪᓗ," ᓇᓗᓇᐃᖅᐳᖅ ᕗᕌᓂᑲ ᔮᓂ. ᐃᓅᓂᑯ ᕗᐊᑦ ᓯᒥᑦᒥ, ᑯᕇ ᐊᕐᓇᐅᔪᖅ ᓇᓗᓇᐃᖅᓯᓪᓗᓂ ᒪᕐᕉᓂ ᓯᐱᓂ ᐊᒻᒪ ᑕᑯᓴᐅᑎᑕᐅᓚᐅᕐᓱᓂ ᑲᓇᑕᒥ ᓄᓇᖑᐊᓂ. ᐊᒥᓲᓕᖓᔪᓂᑦ ᑎᑎᖅᑐᒐᖅᑎ ᐊᒻᒪ ᐊᒡᒐᒻᒧᑦ ᕿᓚᐅᔾᔭᖅᑎ ᐅᔭᕋᓐᓂᑦ ᑎᑕᒃᑎᖃᖅᑐᖅ ᑕᐃᔭᐅᔪᖅ ᔮᓐᓂᔅ, ᔮᓂ ᐃᓅᓚᐅᖅᑐᖅ ᐱᕈᖅᓴᓪᓗᓂᓗ ᓄᓇᑦᓯᐊᕐᒥ. ᔮᓂ ᐊᓈᓇᐅᔪᖅ ᐋᓐᑎᐅᕆᐅᑉ ᐅᐊᖕᓇᖓᓂ ᓄᓇᖃᖅᑐᖅ ᓇᖕᒥᓂᖃᖅᖢᓂᓗ ᐊᑎᖃᖅᖢᓂ IndigenEd ᑐᑭᓯᐅᒪᓕᕐᓇᖅᖢᓂ ᓄᓇᖃᖅᑳᖅᓯᒪᔪᑦ ᐊᒻᒪ ᓄᓇᖃᖅᑳᖅᓯᒪᙱᑦᑐᑦ ᐃᓄᐃᑦ, ᑲᑎᒪᑎᑦᑎᕙᒃᖢᑎᒃ ᐊᒻᒪ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᐱᖏᓐᓂᒃ ᓂᔾᔭᐅᑎᖦᖢᓂᒋᑦ, ᓴᓇᐅᒐᒃᑯᑦ ᐊᒻᒪ ᑕᕐᕆᔭᐅᓯᐅᕐᓂᒃᑯᑦ. ᐃᓚᖓᑦ ᑐᓂᕐᕈᓯᐊᖓ ᑲᑎᖅᓱᐃᔪᖅ ᐃᓄᖕᓂᒃ ᒪᒥᓴᕐᓂᕐᒧᑦ ᓴᓇᙳᐊᕐᓂᒃᑯᑦ.

"ᐅᒃᐱᕈᓱᒃᑐᖓ, ᑕᕝᕙᓃᑦᑐᐃᓐᓇᐅᒐᑦᑕ ᑭᓱᒥᒃ ᐱᔾᔪᑎᖃᖅᖢᑕ, ᐃᓅᔪᐃᓐᓇᐅᒐᑦᑕ ᑐᓐᓂᖅᑯᓯᐊᒥᒃ, ᑐᓂᕐᕈᓯᐊᖃᑎᒋᔪᒪᓪᓗᒍᓗ."

ᒪᒥᓴᕆᐊᖃᓚᐅᖅᑐᖅ ᐊᕐᕌᒍᒥᒃ ᓇᑉᐸᖓᓂᓪᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ ᕗᐊᑦ ᓯᒻᑉᓴᓐᒥ. ᐊᓈᓇᖓ ᑕᐅᑐᕋᓐᓈᕐᖢᓂ ᖃᑕᙳᑎᖏᓪᓗ ᓅᖦᖢᑎᒃ ᐃᐊᑦᒪᓐᑕᓐᒧᑦ ᐃᓚᐅᖃᑕᐅᓕᕐᖢᑎᒃ ᓄᓇᓕᖕᒥ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐅᑎᕋᓱᖕᓂᖏᓐᓂ ᕗᐊᑦ ᓯᒥᑦᒧᑦ. ᐱᔭᕇᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥ ᑕᐃᑲᓂ ᐊᒻᒪᓗ ᐃᓕᓐᓂᐊᖅᑐᓂ ᐊᕈᐊᕋ ᓯᓚᑦᑐᓴᕐᕕᖓᓂ. ᐊᓈᓇᙳᓚᐅᕐᒥᔪᖅ 17-ᖑᑐᐃᓐᓇᖅᑎᓪᓗᒍ, ᐸᓂᓂ ᐱᕈᖅᓴᓪᓗᓂᐅᒃ ᐃᑲᔪᖅᑕᐅᓪᓗᓂ ᐃᓚᒥᓄᑦ.

ᐸᓂᖓ ᐊᓈᓇᒥᓃᖏᓐᓇᓚᐅᖅᑐᖅ ᓇᔭᒥᓂᒡᓗ, ᐃᓚᐅᖏᓐᓇᕋᓗᐊᖅᖢᓂ ᓄᓇᖃᓚᐅᖅᓯᒪᓪᓗᓂᓗ ᔭᓗᓇᐃᒥ ᐃᖅᑲᓇᐃᔭᓚᐅᖅᓯᒪᓪᓗᓂᓗ. ᐱᓕᕆᖃᑎᖃᓚᐅᖅᑐᖅ ᐃᓄᓕᕆᔨᑐᖃᒃᑯᓐᓂᑦ ᖃᕋᓴᐅᔭᓕᕆᔨᐅᓂᕐᒧᑦ ᐊᒻᒪᓗ ᑭᖑᓂᐊᒍᑦ ᐃᖏᕐᕋᔪᓕᕆᔨᒃᑯᓐᓂᑦ ᖃᕋᓴᐅᔭᓕᕆᔨᐅᓪᓗᓂ. ᐃᓕᓚᐅᖅᑐᖅ ᖃᕋᓴᐅᔭᓂᒃ ᓴᓇᔪᓐᓇᖅᓯᓪᓗᓂ ᑭᓯᐊᓂ ᐊᓯᔾᔨᖅᑐᖃᕐᒪᑦ ᒐᕙᒪᒃᑯᓐᓂ ᐊᒻᒪᓗ ᐃᓕᓐᓂᐊᕆᐊᒃᑲᓐᓂᓕᖅᑐᓂ. ᔮᓂ ᐃᓕᓐᓂᐊᓚᐅᖅᑐᖅ ᐅᐊᔭᒨᖅᑐᓂᒃ ᐋᖅᑭᒃᓱᐃᔨᓂᒃ ᑳᓪᒍᕆᒥ ᒪᕐᕉᖕᓄᑦ ᐃᓕᓐᓂᐊᕈᑏᖕᓄᑦ ᑭᓯᐊᓂ ᓇᓂᓯᒐᒥ ᕚᓐᑰᕙᒥ ᑐᓵᔾᔪᑎᓕᕆᔨᙳᕐᓗᓂ ᐊᒻᒪ ᐅᐊᔭᓕᕆᔨᙳᕐᓗᓂ. ᐸᓂᖓ ᓅᖃᑎᒋᓪᓗᓂᐅᒃ ᐃᓇᖐᓯᒪᓪᓗᓂᓗ ᐃᓕᓐᓂᐊᓚᐅᑲᒃᖢᓂ ᑭᓯᐊᓂ ᐅᑎᕋᒥᒃ ᕗᐊᑦ ᓯᒥᑦᒧᑦ.

ᐊᖏᕐᕋᒥᓂ, ᔮᓂ ᐃᖅᑲᓇᐃᔭᓚᐅᖅᑐᖅ ᓂᐱᓕᐅᕆᔨᐅᓪᓗᓂ, ᐃᖑᓚᖅᑐᐃᓪᓗᓂ ᓴᖅᑭᔮᑲᐅᑎᒋᔪᓂᑦ ᐊᒻᒪ ᓂᐱᓂᑦ. ᐱᖃᑎᒥᓂᒃ ᑲᑎᖃᑎᖃᓚᐅᖅᑐᖅ 20-ᓂᒃ ᐅᑭᐅᓂᒃ ᐃᖅᑲᓇᐃᔭᖃᑎᒋᓯᒪᓪᓗᓂᐅᒃ ᕗᑦ ᐸᕙᓗ ᑲᓇᑕᒥ ᒥᙳᐃᖅᓯᕕᖕᒥ. ᐃᖅᑲᓇᐃᔭᕈᓐᓇᖅᓯᓚᐅᖅᑐᖅ ᐊᓪᓚᓄᑦ ᐅᖃᐅᓯᓕᕆᓂᕐᒧᑦ ᐊᐅᓚᑦᑎᔨᐅᓪᓗᓂ. ᐱᖃᑎᖓ, ᐱᒋᐊᓚᐅᖅᑐᖅ ᑎᑕᒃᑎᓂᑦ ᑕᐃᔭᐅᔪᓂᑦ ᔮᓐᔅ ᐊᒻᒪᓗ ᓂᔾᔭᐅᓯᔭᕐᓂᕐᒧᑦ ᐱᓕᕆᓕᓚᐅᖅᑐᖅ. ᖁᕕᐊᓱᐃᓐᓇᓚᐅᖅᑐᑦ ᐊᕐᕌᒍᓄᑦ ᐊᒥᓱᓄᑦ ᐅᑎᕋᓱᐊᕐᓂᖓᓂ ᐃᐊᑦᒪᓐᑕᓐᒧᑦ ᐃᓕᓐᓂᐊᕈᓐᓇᖅᓯᓂᐊᕐᒪᑦ.

ᐊᑯᓂᐊᓗᒃ ᐱᖃᑎᒋᖃᑦᑕᖅᑕᖓ ᐱᖃᓐᓇᕆᔭᐅᓕᖅᖢᓂ ᐊᒻᒪ ᐱᓕᕆᖃᑎᒌᒃᐸᒃᖢᓂ ᐃᖅᑲᓇᐃᔭᖃᑎᒥᓄᑦ ᐊᒻᒪ ᑎᑕᒃᑎᐅᖃᑎᒥᓄᑦ, ᓂᑲᒍᓱᑦᑎᐊᖅᐸᒃᖢᓂ. ᐃᓚᒥᓂᒃ ᐃᑲᔪᓚᐅᖅᑐᖅ ᓴᓇᔪᓐᓇᕐᓂᐊᕐᒪᑦ ᐊᒻᒪᓗ ᑎᑕᒃᑎᐅᓚᐅᕐᒪᑦ. ᑐᕌᓐᑐᒧᑦ ᓅᓚᐅᖅᓯᒪᔪᑦ ᐸᓂᖓ ᐃᓱᓕᑦᑎᓚᐅᖅᑎᓪᓗᒍ ᐊᒻᒪᓗ ᐊᒃᓱᕈᖅᖢᓂ ᐱᓕᕆᓪᓗᓂ ᐅᓪᓗᒃᑯᑦ ᐃᖅᑲᓇᐃᔭᖅᖢᓂ ᐊᕐᕌᒍᓄᑦ ᖁᓕᓄᑦ ᓂᔾᔭᐅᓯᔭᖅᖢᓂ. ᒫᓐᓇ, ᒫᓂᑑᓕᓐ ᕿᑭᖅᑕᖓᓃᓕᖅᑐᑦ, ᓄᓇᓕᐸᐅᔭᓕᐊᖅᐸᓕᖅᖢᑎᒃ ᑕᖅᑭᑕᒫᑦ ᐊᒃᑐᐊᓂᖃᐃᓐᓇᕆᐊᖅᑐᖅᖢᑎᒃ ᑐᕌᓐᑐᒥ ᓴᓇᐅᒐᖃᕐᕕᐅᔪᒧᑦ.

ᑮᓇᐅᔭᖃᖅᑎᑕᐅᓪᓗᓂ ᓴᓇᐅᒐᖏᑦ ᐊᒃᓱᕈᕈᑎᒋᖃᑦᑕᓚᐅᖅᑕᖓ. ᐃᓚᖓᑦᑕᐅᖅ ᐃᓕᖅᑯᓯᒧᑦ ᖁᒃᓴᓪᓚᖕᓇᓚᐅᕐᒥᔪᖅ ᐊᒻᒪᓗ ᑐᕌᓐᑐᒥ ᐃᓅᓪᓗᓂ ᐅᖅᑰᓯᑎᓪᓗᒍ ᐱᕈᖅᓴᔭᐅᓚᐅᖅᑎᓪᓗᒍ. ᖃᐅᔨᒪᓕᓚᐅᖅᑐᖅ ᓄᑖᒥᒃ ᓄᓇᓕᐸᐅᔭᕐᒥᒃ ᐃᖏᕐᕋᕙᓪᓕᐊᓂᖓᓂᒃ. 

"ᓇᒥᑐᐃᓐᓈᖅᑐᖅ, ᓴᓇᐅᒐᐃᑦ ᓇᒥᑐᐃᓐᓈᖅᑐᑦ, ᓱᓕᕚ? ᐲᖅᑕᐃᓐᓇᕆᓂᐊᕈᑦᑎᒍ, ᐃᓅᓯᖅ ᐊᔾᔨᒋᒐᔭᙱᒻᒪᒍ." 

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᕿᓂᖅᑐᓄᑦ ᐃᖅᑲᓇᐃᔮᒃᓴᒥᒃ ᓴᓇᙳᐊᕐᓂᕐᒧᑦ ᓇᓂᓯᓗᓂ ᓄᓇᓕᖕᒥ, ᐃᑲᔪᖅᑕᐅᔪᒪᓗᓂ ᓴᖅᑭᓪᓗᓂᓗ. "ᓴᓇᙳᐊᕐᓂᕐᒧᑦ ᐱᒋᐊᓕᑕᐃᓐᓇᕐᓂᖅ," ᑲᔪᓯᓗᓂ. ᐃᓕᑦᑎᓪᓗᓂ ᑯᒃᑭᑕᐹᕐᓂᕐᒥᒃ 25−ᖑᓕᕐᖢᓂ ᑭᖑᓂᐊᒍᑦ ᓂᔾᔭᐅᑎᐅᓪᓗᓂ, ᓂᔾᔭᐅᑎᓪᓗᓂ ᐅᖃᓪᓚᒃᖢᓂ, ᐃᓱᒪᓪᓗᓂᓗ ᑭᖑᕙᓗᐊᔾᔮᕋᓱᒋᙱᖦᖢᒍ ᐃᓕᑦᑎᓂᕐᒥᒃ. ᔮᓂ ᐅᒃᐱᕈᓱᒃᐳᖅ ᐃᓕᓐᓂᐊᖅᖢᓂ ᓴᓇᐅᒐᕐᓂᒃ ᐃᑲᕐᕋᓂᒡᓗ ᐋᖅᑭᒃᓱᐃᓪᓗᓂ ᐱᐅᓯᒋᐊᖁᓪᓗᒍ, '10,000 ᐃᑲᕐᕋᑦ' ᓯᓚᑐᓂᖏᑦ ᐃᓱᒪᑦᑎᐊᕐᓇᖅᐳᖅ. ᐅᐊᑲᓪᓚᓗᐊᖑᖅᑰᔨᔫᒐᓗᐊᖅ ᑭᓯᐊᓂ ᐊᐅᓚᑕᒃᓴᐅᓪᓗᓂ ᐅᐸᒃᑕᐅᔭᕌᖓᒥ. ᑮᓇᐅᔭᖃᖅᑎᑦᑎᓂᖅ ᓴᓇᙳᐊᕐᓂᕐᒧᑦ ᐊᑐᕋᓱᒃᐸᒃᑕᕐᓂᒃ ᐊᒃᓱᕈᕐᓇᕐᓂᐊᓕᕐᒥᔪᖅ, ᓴᓇᙳᐊᖅᑎᓕᒫᑲᓴᑦ ᐱᓕᕆᓲᖑᓪᓗᑎᒃ ᐃᖅᑲᓇᐃᔮᒃᓴᑎᒍᑦ ᑭᓯᐊᓂ ᕿᒥᕐᕈᖁᔨᕗᖅ ᐅᓄᖅᑐᓂᒃ ᓄᑖᓂᒃ ᑮᓇᐅᔭᖅᑖᕐᕕᒃᓴᓂᒃ ᐱᓕᕆᐊᒃᓴᓂᒃ ᓴᓇᙳᐊᖅᑎᙳᖅᐸᓪᓕᐊᔪᓄᑦ.

"ᒫᓐᓇ ᑕᑯᕙᓪᓕᐊᑎᓪᓗᑕ, ᒪᒥᓴᕈᑎᒋᕐᔪᐊᖅᑕᕗᑦ, ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕆᔭᑦᑎᓐᓄᑦ, ᖃᐅᑕᒫᑦ ᐃᓅᓯᑦᑎᓐᓄᑦ."

ᐃᖅᑲᓇᐃᔭᕐᓂᖅ ᐅᓪᓗᒃᑯᑦ ᐃᖅᑲᓇᐃᔮᓂᑦ ᐱᕈᖅᑎᑦᓯᕙᓪᓕᐊᓂᕐᒥᓪᓗ ᖃᐅᔨᒪᓂᕐᒥᑦ ᓴᓇᙳᐊᕐᓂᕐᒧᑦ, ᔮᓂ ᐅᑉᐱᕈᓱᑦᑐᖅ ᓄᓇᖃᖅᑳᖅᓯᒪᔪᑦ ᒪᒃᑯᑦᑐᖏᑦ ᓴᓇᒍᓐᓇᕆᐊᖏᓐᓂᑦ ᖁᕕᐊᓇᖅᑐᒥᑦ ᐃᖅᑲᓇᐃᔮᕆᓯᒪᔭᖏᑦᑕ ᐱᔪᒥᒋᔭᖏᓐᓂᑦ. ᐱᕕᒃᓴᖃᑦᑎᐊᓚᐅᖅᑐᖅ ᔮᓐᔅ−ᑯᑦ ᐊᒻᒪ ᕿᓚᐅᔾᔭᖅᑎᐅᓪᓗᓂ, ᐊᔪᕈᓐᓃᖅᓴᕈᑕᐅᓚᐅᖅᑐᖅ ᐊᑐᖅᑕᐅᖁᔭᐅᙱᖦᖢᓂ ᐃᓚᒋᔭᐅᓪᓗᓂ ᓄᓇᑐᖃᕆᙱᑕᒥᓄᑦ ᓄᓇᑖᖅᑎᑕᐅᓂᕐᒧᑦ. ᐊᒡᒐᒧᑦ ᕿᓚᐅᔾᔭᖅᑎᖃᕐᖢᓂ, ᔮᓂ ᑐᓂᔭᐅᔪᓐᓇᓚᐅᖅᑐᖅ ᐱᖓᓱᓂᒃ ᕿᓚᐅᑎᓂᒃ ᓇᓂᓯᓪᓗᓂᓗ ᐃᓕᓴᐃᔨᓂᒃ, ᐃᓐᓇᑐᖃᕐᓂᒃ ᕿᓚᐅᔾᔭᖅᑎᓂᒡᓗ ᐃᓕᓴᐃᔪᓂᒃ ᖃᓄᖅ ᕿᓚᐅᑎᙳᐊᓂᒃ. ᕿᓚᐅᔾᔭᖃᑦᑕᖅᓯᒪᓕᖅᑐᖅ ᐅᑭᐅᑦ ᖁᓕᑦ ᐅᖓᑖᓄᑦ. 

ᐅᖃᐅᔾᔨᒋᐊᕈᑎᖓ ᑐᓂᓯᔪᒪᔭᖓ ᒪᒃᑯᑦᑐᓂᑦ ᐅᑉᐱᕈᓱᓐᓂᕐᒥᑦ ᐊᒻᒪᓗ ᐃᒻᒥᓂᒃ ᐅᑉᐱᕆᓂᕐᒥᑦ. "ᐅᕙᓐᓂᒃ ᐅᒃᐱᕈᓱᑦᑎᐊᕈᒪᕗᖓ, ᐃᓅᓯᓐᓂ ᕿᓚᒻᒥᐅᓂᖅᓴᒃᑯᑦ, ᐊᒻᒪ ᐃᓅᓯᓐᓂ. ᖁᐊᖅᓵᖅᓯᒪᓂᕆᖃᑦᑕᓚᐅᖅᑕᕋ ᐊᒥᓱᐊᖅᑎᖅᑐᓂ," ᐅᖃᐅᔾᔨᒋᐊᖃᑦᑕᖅᑐᖅ. ᓂᖏᐅᖓ ᐅᖃᐅᔾᔨᕙᓚᐅᖅᓯᒪᔪᖅ ᐅᔾᔨᖅᓱᑦᑎᐊᖁᔨᓪᓗᓂ ᖃᓄᖅ ᐃᓱᒪᒻᒪᖔᖅ, ᖃᐅᔨᒪᓪᓗᓂ ᐊᐅᓚᒍᓐᓇᖅᑕᓕᒫᑦᑎᓐᓂᒃ ᐃᓱᒪᒋᔭᑦᑎᓐᓂᒃ, ᐅᖃᖃᑦᑕᓂᕐᒥᒃ ᐊᒻᒪᓗ ᖃᓄᐃᓕᐅᖃᑦᑕᓂᕐᒥᒃ. ᔮᓂᑦᑕᐅᖅ ᑭᒡᒐᖅᑐᐃᕙᒃᑭᕗᖅ ᓇᖕᒥᓂᖅ ᐃᓱᒪᒋᔪᓐᓃᕈᒪᓂᕐᒥᒃ ᓲᖃᐃᒻᒪ ᑕᒻᒪᖅᑐᐃᓐᓇᐅᕙᒃᑲᑦᑕ. ᖃᖓᑦᑎᐊᓵᒃᑯᑦ ᐃᓱᒪᒋᔪᓐᓃᕆᐊᖃᓕᓚᐅᕐᒪᑦ, ᒪᒥᐊᖦᖢᓂ ᐊᓯᔾᔨᖅᑎᕆᓪᓗᓂᓗ ᐃᓅᓯᖓᓂ.

ᐱᔭᕇᓕᖅᖢᒍ, ᔮᓂ ᖁᔭᓕᑦᑎᐊᖁᔨᕗᖅ, ᐊᓂᖅᓵᖅᑐᑦᑎᐊᑲᑕᒃᖢᓂ ᐊᒻᒪ ᐊᓂᖅᓵᖅᑐᑦᑎᐊᑲᑕᒃᖢᓂ, 15 ᒥᓂᑦᐸᓗᖕᒥ ᓯᕿᓐᓂᖃᑦᑕᖅᖢᓂ ᐅᓪᓗᖅ ᐊᑕᐅᓯᖅ, ᐃᒪᖅᑐᑦᑎᐊᖃᑦᑕᖅᖢᓂ ᐃᒪᕐᒥᒡᓗ ᐃᒃᐱᒍᓱᑦᑎᐊᖅᖢᓂ. "ᐃᒪᖅ ᐃᒪᑦᑎᐊᕙᐅᖕᒪᑦ ᐃᒪᕐᓗ ᐃᖅᑲᐅᒪᔪᓐᓇᖅᖢᓂ," ᐅᖃᐅᓯᕆᕙᐅᒃ. ᑎᓕᐅᕆᔪᖅ ᑭᒃᑯᓕᒫᓂᑦ ᐃᓚᒋᔭᐅᖁᔨᑦᓱᓂ ᐋᖅᑭᑦᓯᓂᕐᒥᑦ ᓯᓚᐅᑉ ᐊᑦᓱᕈᓐᓇᕐᓂᖓᓂᑦ ᕿᒪᐃᓂᕐᒥᓪᓗ ᓇᒻᒥᓂᖁᑎᓂᑦ ᑕᐃᒪᐃᒐᔪᑦᑐᓂᑦ. "ᒫᓐᓇ ᐊᓯᔾᔨᑦᑎᐊᕐᓇᖅᓯᕗᖅ ᐱᓕᕆᐊᕆᔪᓐᓇᖅᖢᑎᒍᓪᓗ. ᐃᓱᒪᕗᖓᓕ ᐃᓱᒪᕈᓘᔭᖅᑐᐃᓐᓇᐅᒍᑦᑕ ᐊᒻᒪᓗ ᐃᓱᒪᙳᐊᕐᓗᑕ ᓄᓇᕐᔪᐊᖅ ᐱᔪᓐᓇᕋᑦᑎᒍ, ᐱᔪᓐᓇᐸᓪᓚᐃᔭᕗᑦ. ᐄᑦᑎᐊᒻᒪᕆᒃ," ᐅᖃᑦᑎᐊᓲᖅ.

ᒪᒥᓴᕐᕕᓕᐅᕐᓂᖅ ᐊᒻᒪ ᒪᒥᓴᕐᓂᕐᒧᑦ ᓴᓇᐅᒐᐃᑦ ᐃᒻᒥᖕᓄᑦ ᐊᓯᒥᓄᓪᓗ, ᕗᕌᓂᑲ ᔮᓂ ᓴᓇᙳᐊᖅᓯᒪᔪᖅ ᓴᓇᙳᐊᒐᕐᒥᒃ. ᕿᓚᐅᔾᔭᕐᓂᖅ ᐊᒻᒪ ᓂᔾᔭᐅᓯᔭᕐᓂᖅ, ᓂᔾᔭᐅᑎᓕᐅᖅᑐᖅ ᖃᓄᖅ ᐃᓅᔾᔪᑎᒋᔪᒪᔭᖓ ᐃᓅᓯᖓᓂ. ᐃᖏᕐᕋᑎᓪᓗᒍ ᐅᑭᐅᖅᑕᖅᑐᒥ ᖃᓪᓗᓈᑦ ᓄᓇᖓᓐᓂᓗ, ᖃᐅᔨᓚᐅᖅᑐᖅ ᐅᒃᐱᕆᔪᓐᓇᕐᓂᕐᒥᓂᒃ ᐊᒻᒪ ᐃᒻᒥᓂᒃ ᐅᖃᐅᓯᖃᑦᑎᐊᕈᓐᓇᖅᖢᓂ ᐊᒻᒪ ᑐᓐᓂᖅᑯᓯᐊᒥᓂᒃ ᑐᓴᖅᑎᑦᑎᓪᓗᓂ ᓇᒧᙵᐅᒐᓗᐊᕈᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.