ᐅᐊᑯᒪᓐ ᐸᐄᔅ, ᐆᔨᑉᕗᐊ, ᐅᐊᓯᖕ ᓄᓇᖃᖅᑳᖅᓯᒪᔪᓂᑦ, ᐱᓕᕆᓗᐊᙱᑦᑐᖅ TakingITGlobal−ᒥᑦ ᐃᓕᓐᓂᐊᕐᑎᑦᑎᓪᓗᓂᓗ ᒪᒃᑯᒃᑐᓂᑦ ᐊᒃᑐᐊᖃᑦᑕᐅᑎᔪᓂᑦ ᐅᑭᐅᖅᑕᖅᑐᒥᑦ ᐱᓕᕆᐊᓂᑦ, ᐊᓯᖏᓐᓂᑦ ᐱᓕᕆᐊᖃᖅᐸᒃᑭᕗᖅ ᓄᓇᖃᖅᑳᖅᓯᒪᔪᓂᑦ ᑕᕐᕆᔭᐅᓯᐅᖅᑎᐅᓪᓗᓂ. ᑭᓯᐊᓂ ᑕᐅᕗᙵᕋᓱᒋᐊᒃᓴᖅ ᐊᔪᕐᓇᓚᐅᖅᑐᖅ.

ᐱᕈᖅᓴᓪᓗᓂ ᐃᖅᑭᓖᑦ ᓄᓇᖃᖅᑳᖅᓯᒪᔪᓂᑦ ᐱᐅᕆ ᑲᖏᖅᖢᖓᑕ ᖃᓂᒋᔮᓂ, ᐹᕕᔅ ᐅᖃᖅᖢᓂ ᑐᓗᖅᑕᕈᑎᖃᕐᔪᐊᖃᑦᑕᕐᓂᕋᖅᖢᓂ ᒪᒃᑯᒃᑐᖁᑎᒥᓂᒃ ᐃᓚᐅᓪᓗᑎᒃ ᐊᖓᔪᖅᑳᖏᑦ ᐊᕕᖦᖢᑎᒃ ᒪᒃᑯᒃᑎᓪᓗᒍ, ᑰᖕᒧᑦ ᑯᕕᖅᑕᖃᑦᑕᙱᖦᖢᓂ ᐃᒪᕐᓗ ᐃᓛᓐᓂᒃᑯᑦ, ᐊᒻᒪ ᐃᓛᓐᓂᒃᑯᑦ ᓂᖀᑦ ᐊᒥᒐᖅᑎᓪᓗᒋᑦ. ᑭᓱᓕᒫᑦ ᐃᓱᒪᒋᓇᒋᑦ, ᐅᖃᖅᐳᖅ ᓱᓕ ᖁᔭᓕᓂᕋᖅᖢᓂ.

"ᐃᓱᒪᒋᔭᖃᓚᐅᖅᑐᖓ ᐃᓅᓯᐅᑉ ᒥᒃᓵᓄᑦ ᐱᐅᙱᑦᑐᓂᒃ, ᖁᔭᓕᓪᓗᐊᖅᑐᖓ ᐱᓯᒪᔭᓐᓄᑦ," ᐅᖃᖅᑐᖅ ᐹᕕᔅ.

ᓈᓴᖃᑦᑕᓚᐅᖅᑕᖏᑦ ᖁᔭᓕᔾᔪᑎᒋᔭᖏᑦ ᐊᒻᒪᓗ ᐃᓱᒪᒋᒐᔭᓚᐅᖅᑕᖏᑦ ᐃᓄᐃᑦ ᐊᔪᓚᐅᖅᑐᑦ. ᑕᕝᕙᓂ, ᐃᓕᓐᓂᐊᕐᕕᖓ ᐊᒻᒪ ᐃᓕᖅᑯᓯᑐᖃᕐᒥᑦ ᐃᓕᓐᓂᐊᖅᑎᑦᑎᓂᖓ ᐃᓕᓐᓂᐊᖅᑎᑕᐅᓚᐅᖅᑐᖅ ᐃᓱᒪᑦᑎᐊᕚᓕᖁᓪᓗᒍ.

"ᖃᐅᔨᒪᔪᖓ ᐊᓕᐊᓇᐃᒍᓱᑦᑎᐊᓚᐅᖅᑐᖓ ᐊᒻᒪ ᐊᓕᐊᓇᐃᒍᓱᑦᑎᐊᖅᖢᖓ ᐃᑲᔪᖅᓱᕈᓐᓇᓚᐅᕋᒪ ᐊᒻᒪ ᐃᑲᔪᖅᓱᖅᑕᐅᖃᑦᑕᖅᖢᖓ ᐊᕙᑎᓐᓂ, ᑐᓗᖅᑕᕈᑎᖃᕋᓗᐊᖅᑎᓪᓗᒋᑦ ᐊᒻᒪ ᐊᒃᓱᕈᕐᓇᖅᑐᑦ."

ᐹᕕᔅ ᓄᓇᒥᓂᒃ ᐊᐅᓪᓚᓚᐅᖅᐳᖅ ᐊᔾᔨᓕᐅᕆᔭᖅᑐᖅᖢᓂ ᑕᕐᕆᔭᐅᓯᐅᖅᑎᐅᓪᓗᓂ ᐃᓕᓐᓂᐊᕆᐊᓚᐅᖅᓯᒪᓪᓗᓂᓗ Loyalist ᓯᓚᑦᑐᖅᓴᕐᕕᖕᒥ ᐱᐅᓪᕕᓕ, ᐋᓐᑎᐅᕆᐅᒥ − ᐃᑲᕐᕋᓄᑦ ᑕᓪᓕᒪᓄᑦ ᐃᖏᕐᕋᓪᓗᓂ ᓄᓇᖓᓂ.

ᓅᑉᐸᓪᓕᐊᓂᖅ ᓄᓇᒥᓂᑦ ᐃᓕᓐᓂᐊᕐᕕᒋᔭᖓᓄᑦ "ᑲᔪᓯᓂᖃᑦᑎᐊᓚᐅᖅᑐᖅ," ᐱᔾᔪᑕᐅᓗᐊᖅᑐᖅ ᐱᖃᑎᐊᓗᖓ ᑕᕝᕙᓂᑦᓴᐃᓐᓇᖅ ᐃᓕᓐᓂᐊᕐᕕᒻᒦᖃᑦᑕᓚᐅᕐᒪᑦ ᐊᕐᕌᒍᒻᒥ ᓯᕗᓂᐊᒍᑦ ᐊᐱᕆᓯᒪᑦᓱᓂᓗ ᐹᐅᔅᒥᑦ ᐃᓅᖁᔨᑦᓱᓂ ᓇᓂᓯᖁᔨᑦᓱᓂᓗ ᓇᒦᕝᕕᑦᓴᒥᑦ.

ᐃᑲᔪᕐᔪᐊᓚᐅᕐᒥᔪᑦᑕᐅᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᕕᖓᑦ, ᐃᓂᒃᓴᐅᓪᓗᓂ ᐊᒻᒪ ᐱᔾᔪᑎᒃᓴᐅᓪᓗᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᓄᑦ. ᑕᐃᑲᓂ, ᐅᖃᖅᑐᖅ, ᐃᑲᔪᕋᔭᖅᑐᑦ ᓇᓂᓯᓂᕐᒥᑦ ᐃᖅᑲᓇᐃᔮᒥᑦ ᐱᔭᕆᐊᖃᖅᐸᑕ, ᓇᒥ ᓄᓇᖃᕐᓂᕐᒥᑦ, ᐊᓯᖏᓐᓂᓪᓗ ᐃᑲᔫᑎᓂᑦ ᐃᓕᓐᓂᐊᖅᑎᓄᑦ ᐱᔭᕆᐊᖃᖅᐸᑕ.

"ᐅᐸᒡᕕᒋᔪᓐᓇᓚᐅᖅᑕᕋ, ᐃᖢᕐᕆᓂᖅᓴᐅᓗᖓ ᐊᓯᓐᓂᒃ ᑕᑯᔭᕆᐊᒃᓴᖅ, ᑲᑎᖃᑎᖃᕐᓗᓂ ᐊᓯᖏᓐᓂᒃ ᒪᒃᑯᒃᑐᓂᒃ ᐃᓕᓐᓂᐊᖅᑎᓂᒡᓗ ᓄᓇᓕᖕᓃᙶᖅᓯᒪᔪᓂᑦ. ᐅᕙᑦᑎᓐᓂᒃ ᑲᒪᒋᔭᖃᓪᓚᕆᓚᐅᖅᑐᑦ."

ᐊᕐᕌᒍᓄᑦ ᐱᖓᓱᓄᑦ, ᐹᐃᔅ ᖃᐅᔨᓴᓚᐅᖅᐳᖅ ᐊᒃᖢᓈᓂᒃ ᐃᓕᓐᓂᐊᖅᖢᓂ ᓄᓇᕐᔪᐊᕐᒥ ᑕᕐᕆᔭᐅᓯᐅᕐᓂᕐᒥᒃ, ᐊᓐᓄᕋᔾᔨᐅᕐᓂᕐᒥᒃ ᖃᓄᓗᒃᑖᖅ ᑕᑯᒃᓴᐅᙱᑦᑐᓂᒃ ᑎᑎᕋᕐᓂᒃᑯᑦ ᑕᕐᕆᔮᒃᓴᓕᐅᕋᓱᒃᖢᑎᒃ.

"ᖃᐅᔨᓴᓪᓚᕆᒋᐊᖃᓪᓚᕆᑦᑐᒍᑦ ᐃᓘᓐᓇᖏᓐᓂᑦ ᐊᔾᔨᒌᖏᑦᑐᓂᑦ ᑕᕐᕆᔭᓕᐅᕐᓂᕐᒥᑦ, ᓴᓇᒻᒪᐅᓯᕐᓂᑦ ᓴᓇᔭᐅᓂᐊᖅᑐᓄᑦ, ᓴᓇᔭᐅᒌᖅᓯᒪᔪᓄᑦ ᐱᓕᕆᐊᓄᓪᓗ ᓈᒻᒪᑦᑐᓄᑦ ᐃᓗᐊᓂ."

ᐃᓕᓐᓂᐊᕐᕕᖕᒥ ᐃᓕᖃᑕᐅᓚᐅᖅᑐᖅ, ᐹᕕᔅ ᓂᒡᓚᓱᒃᑐᒥᑦ ᑕᐃᔭᐅᔪᖅ Big Soul Productions, ᓄᓇᖃᖅᑳᖅᓯᒪᔪᑦ ᑕᕐᕆᔭᐅᓯᐅᖅᑎᑦ ᑐᕌᓐᑐᒥᑦ. ᑕᐃᑲᓂ, ᐅᖃᖃᑎᖃᕈᒪᓚᐅᕐᒪᑦ ᐊᖓᔪᖅᑳᖓᓐᓂᒃ ᑲᑉᐸᓂᐅᔪᑦ, ᓗᐊᕋ ᒥᓕᑲᓐ, 5-ᒥᓂᑦᓯᒥᒃ ᐱᕕᖃᖁᓪᓗᒍ. ᐅᖄᓚᓚᐅᖅᑐᖅ ᐃᑲᕐᕋᐅᑉ ᐅᖓᑖᓄᑦ, ᐊᐱᖅᓱᕈᓐᓇᖅᓯᓪᓗᓂ ᐃᖅᑲᓇᐃᔮᒧᑦ ᓴᖅᑭᓛᖅᑐᒧᑦ ᑎᒥᐅᔪᒥᑦ.

ᐱᒋᐊᓚᐅᖅᓯᒪᔪᖅ ᐱᓕᕆᓪᓗᓂ ᑕᐃᔭᐅᔪᒥᒃ ᕋᐱᑦᔅ ᐃᑲᔪᖅᑎᐅᓪᓗᓂ, ᑳᐱᑐᖅᑐᓂ ᐊᒻᒪᓗ ᐃᑲᔪᖅᑐᓂ ᑕᑯᒃᓴᐅᖏᑦᑐᓂᒃ. ᐊᓱᐃᓛᒃ ᓅᖦᖢᓂ ᐃᑲᔪᕆᐊᖅᑐᕐᖢᓂ ᐋᖅᑭᒃᓱᐃᓂᕐᓂ ᓴᓇᔭᐅᕌᓂᒃᑎᓪᓗᒋᑦ ᑕᕐᕆᔮᒃᓴᑦ, ᐱᕕᖃᖅᑎᑕᐅᓪᓗᓂᓗ ᑕᑯᑎᑦᑎᓂᕐᒥᒃ ᑭᓱᒃᑲᓐᓂᕐᓂᒃ ᐱᖃᕐᒪᖔᑦ.

"ᐅᕙᓐᓄᑦ, ᓴᖅᑭᑦᑎᓂᑐᐃᓐᓇᐅᓚᐅᖅᑐᖅ ᐱᕕᒃᓴᒥᑦ ᐱᕕᖃᓕᕌᖓᒪᓗ, ᐱᓚᐅᖅᑕᕋ."

ᐹᕕᔅ ᑐᓄᐊᓂ ᐊᔾᔨᓕᐅᕆᑲᑕᓚᐅᖅᐳᑦ ᓂᔾᔭᐅᓯᔭᕐᓂᕐᒧᑦ ᑕᕐᕆᔮᒃᓴᒥᒃ ᐊᒻᒪ ᑲᔪᓯᑐᐃᓐᓇᖅᖢᓂ ᑎᑕᒃᑎᐅᓪᓗᑎᒃ ᑕᐃᑲᙵᑦ − ᑕᕐᕆᔭᐅᓯᐅᖅᖢᑎᒃ, ᑕᕐᕆᔭᐅᓯᐅᖅᖢᑎᒃ, ᐊᔾᔨᓕᐅᕆᓪᓗᑎᒃ, ᐋᖅᑭᒋᐊᖅᓯᓪᓗᑎᒃ, ᐊᒻᒪ ᓱᓕᒃᑲᓐᓂᖅ.

ᒫᓐᓇ, ᐹᐃᔅ ᐱᓕᕆᖃᑎᖃᖅᐸᓕᖅᑐᖅ TakingItGlobal−ᒥᒃ. ᐱᔪᒪᓂᖃᐃᓐᓇᐅᔭᖅᑐᖅ ᐃᓕᓐᓂᐊᕐᓂᓕᕆᓂᕐᒥᒃ, ᐱᔭᕇᓚᐅᖅᑎᓪᓗᒍᓗ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᕐᖢᓂ ᐱᓕᕆᐊᖃᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓂ ᖁᕝᕙᕆᐊᖅᑎᓪᓗᒍ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕐᓂᖅ. ᑕᑯᓚᐅᖅᑐᖅ ᐃᖅᑲᓇᐃᔮᒃᓴᒥᒃ ᒪᑐᐃᖅᓯᓂᕐᒥᒃ ᐱᓕᕆᐊᒧᑦ ᑕᐃᔭᐅᔪᒥᒃ Connected North-ᒥᒃ, ᐱᓕᕆᔪᖅ ᐃᓕᓐᓂᐊᖅᑐᓕᕆᓂᕐᒥᑦ, ᐊᒻᒪᓗ ᐱᔪᒪᓂᖃᖅᖢᓂ ᓴᖅᑭᑦᑎᓂᕐᒥᒃ ᓄᓇᕐᔪᐊᕐᒥᐅᓂᒃ ᐃᓕᓐᓂᐊᕐᓂᕐᒥᒃ ᐊᒻᒪᓗ ᖁᕕᐊᒋᔭᖃᕐᓂᖓ ᑕᕐᕆᔭᐅᓯᐅᕐᓂᕐᒧᑦ ᐊᑕᐅᑦᑎᒃᑯᑦ.

"ᐅᓪᓗᕆᐊᑦ ᑐᑭᓕᐊᖓᑎᖦᖢᓂᖓ. ᐊᒻᒪᓗ ᐅᕙᓐᓂᒃ ᓴᖅᑭᔮᖅᑎᑦᑎᔪᓐᓇᑎᐊᖅᑐᓂ ᐊᒻᒪᓗ ᑲᑎᑎᑦᑎᑎᐊᕐᓗᖓ ᐃᓅᓱᒃᑐᓂᒃ ᓯᕗᓂᑦᑎᓐᓂ ᐊᖅᑯᑎᐅᒍᓐᓇᖅᑐᓂᒃ, ᐃᓕᓐᓂᐊᕐᓂᕐᒥᒃ, ᐃᖅᑲᓇᐃᔮᓂᒃ, ᐊᒻᒪᓗ ᑕᐃᒪᐃᑦᑐᒐᓚᓐᓂᒃ. ᐱᐅᒋᑦᑎᐊᖅᑕᒃᑲᓗ ᒪᒃᑯᒃᑐᑦ ᑲᑎᖃᑎᒋᓗᒋᑦ ᐊᒥᖅᑳᖃᑎᒋᑐᐃᓐᓇᕐᓗᒋᓪᓗ ᐱᕕᒃᓴᑦ ᑕᐃᒃᑯᓄᖓ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.