"ᐱᕈᖅᐸᓪᓕᐊᑎᓪᓗᖓ, ᐃᓱᒪᐃᓐᓇᐅᔭᓚᐅᖅᐳᖓ ᐃᖅᑲᓇᐃᔭᕐᓂᐊᕋᓱᒋᓪᓗᖓ ᓄᓇᕗᑦ ᒐᕙᒪᒃᑯᖏᓐᓄᑦ, ᖃᐅᔨᒪᓪᓚᕆᓚᐅᙱᓐᓇᒪ ᖃᓄᓪᓚᑦᑖᖅ ᓇᓂᓗ ᖃᖓᒃᑯᓪᓗ," ᐃᖅᑲᐅᒪᔪᖅ ᐋᑕᒻ ᓚᐃᑦᓯᑑᓐ. ᒪᓕᒐᓕᐅᖅᑎᐅᔪᖅ ᑭᒡᒐᖅᑐᐃᓯᒪᓪᓗᓂ ᒪᓂᕋᔭᒻᒥᒃ ᐊᕐᕌᒍᓂᒃ 8-ᓂᒃ. "ᐊᕐᕌᒍᓂ 8-ᓂ ᖁᕕᐊᓇᕐᓂᖅᐹᖑᓯᒪᕗᖅ ᐃᓅᓯᓐᓂ," ᖁᕕᐊᓱᒃᑐᖅ, ᐅᖃᐅᓯᖃᖅᖢᓂ ᖁᕕᐊᓇᕐᓂᖓᓂ ᐃᖅᑲᓇᐃᔮᖓᓂ ᑭᓯᐊᓂ ᐅᐃᒪᓇᒐᓚᖕᓂᖓᓂ. ᑲᖏᖅᖠᓂᕐᒥᐅᑕᒃᓴᔭᖅ, ᒪᒃᑯᒃᖢᓂ ᐊᐅᓪᓚᓚᐅᖅᓯᒪᔪᖅ, ᖃᔅᓯᐊᕐᔪᖕᓂ ᐊᕐᕌᒍᓂ ᖃᓪᓗᓈᓃᓚᐅᖅᓯᒪᓪᓗᓂ ᐃᖃᓗᖕᓄᐊᓚᐅᖅᑳᕋᓂ ᐃᓅᓯᓕᒫᑲᓴᖕᒥᓂ.

ᒐᕙᒪᓕᕆᔨᙳᓚᐅᖅᑳᕋᓂ, ᓚᐃᑦᓯᑑᓐ ᐃᖅᑲᓇᐃᔭᓚᐅᖅᓯᒪᕗᖅ ᓄᓇᕗᑦ ᒐᕙᒪᒃᑯᖏᓐᓄᑦ ᑮᓇᐅᔭᓕᕆᔨᒃᑯᓐᓂᑦ. 2005-ᖑᑎᓪᓗᒍ ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒥ ᐱᔭᕇᓚᐅᖅᓯᒪᔪᖅ. ᐊᕐᕌᒍᓂᒃ ᐊᒥᓱᑲᓪᓚᓐᓂᒃ ᐃᖅᑲᓇᐃᔭᓚᐅᖅᓯᒪᓪᓗᓂ ᐃᓕᓐᓂᐊᑲᓐᓂᓚᐅᓐᖏᓐᓂᖓᓂ.  ᓄᓇᕗᑦ ᓯᕗᓂᒃᓴᕗᒻᒧᐊᓚᐅᖅᓯᒪᕗᖅ ᐋᑐᕚᒥ, ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕈᑕᐅᕙᒃᑐᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐃᓕᓐᓂᐊᖅᑎᑦᑎᕙᒃᖢᓂ ᐃᓄᖕᓄᑦ ᐃᓕᓐᓂᐊᖅᑎᓄᑦ ᐊᒻᒪ ᐃᓕᖅᑯᓯᑐᖃᕐᓄᑦ ᐃᓕᓐᓂᐊᕈᑕᐅᔪᓐᓇᖅᖢᓂ. ᐊᕐᕌᒍᓄᑦ ᐱᖓᓱᓄᑦ ᑮᓇᐅᔭᓕᕆᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᓯᒪᕗᖅ ᓴᐃᓐᑦ ᓘᕋᓐᔅ ᓯᓚᑦᑐᖅᓴᕐᕕᒡᔪᐊᕐᒥ, ᑭᖑᓂᐊᒍᓪᓗ ᐃᓕᑕᕆᔭᐅᔾᔪᑎᑖᖅᖢᓂ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᔨᐅᓂᕐᒧᑦ Laurentian ᓯᓚᑦᑐᖅᓴᕐᕕᒡᔪᐊᕐᒥ.

ᒐᕙᒪᒃᑯᓐᓂ ᐃᖅᑲᓇᐃᔭᕈᒪᒐᒥ, ᓚᐃᑦᓯᑑᓐ ᐃᓕᓐᓂᐊᕈᒪᓕᓚᐅᖅᐳᖅ ᓇᖕᒥᓂᖃᕐᓂᕐᒥᒃ ᐊᒻᒪ ᑮᓇᐅᔭᓕᕆᓂᕐᒥᒃ ᑕᐅᑐᒐᖃᓪᓗᐊᑕᕈᒪᓪᓗᓂ ᓲᖃᐃᒻᒪ ᐱᓕᕆᕝᕕᓕᒫᑦ ᐃᖅᑲᓇᐃᔭᖅᑐᓕᕆᔨᖃᕐᒪᑕ, ᑮᓇᐅᔭᓕᕆᓂᕐᒥᒃ ᐊᒻᒪ ᑐᓴᐅᒪᔪᓕᕆᓂᕐᒥᒃ. ᖁᕕᐊᒋᔭᖃᓚᐅᖅᑐᖅ ᒐᕙᒪᒃᑯᓐᓄᑦ ᐃᖅᑲᓇᐃᔭᕆᐊᔅᓴᖅ ᐊᒻᒪᓗ ᐃᖅᑲᓇᐃᔮᖓ ᓱᒃᑲᓕᒋᐊᓚᐅᖅᑐᖅ ᐊᒥᓲᙱᑦᑐᑦ ᐃᓄᐃᑦ ᑮᓇᐅᔭᓕᕆᔨᐅᖃᑦᑕᖅᓯᒪᓂᖏᓐᓄᑦ. ᐋᖅᑭᒃᓱᐃᖃᑦᑕᓚᐅᖅᑐᖅ ᑮᓇᐅᔭᓂᒃ ᐊᑐᖅᑐᒃᓴᓂᒃ, ᕿᒥᕐᕈᕙᒃᖢᓂ ᑮᓇᐅᔭᓂᒃ ᑐᒃᓯᕋᐅᑕᐅᔪᓂᒃ ᐊᒻᒪᓗ ᐊᑐᓕᖁᔨᔾᔪᑎᓕᐅᖅᐸᒃᖢᓂ ᒥᓂᔅᑕᓄᑦ ᑮᓇᐅᔭᓕᕆᓂᕐᒧᑦ. Excel−ᒥᒃ ᐊᑐᕆᐊᒃᓴᖅ ᖁᕕᐊᒋᑦᑎᐊᓚᐅᖅᐸᐅᒃ.

ᐊᑐᖅᓯᒪᔭᖓ ᐊᖏᕐᕋᒥᓂ ᐊᐅᓪᓚᖅᖢᓂ ᐃᓕᓐᓂᐊᒃᑲᓐᓂᕋᓱᒃᖢᓂ ᐱᐅᓚᐅᖅᐳᖅ. ᐃᓐᓇᕐᓂᒃ ᑲᒪᒋᔭᖃᓕᖅᖢᓂ ᓲᕐᓗ ᐊᑭᓕᒃᓴᓂᒃ ᐊᑭᓕᖅᓱᐃᓂᖅ ᐊᒻᒪ ᓂᕿᓂᒃ ᓂᐅᕕᕆᐊᕐᓂᖅ ᖃᐅᔨᕚᓪᓕᕈᑎᒋᓚᐅᖅᐸᐅᒃ. ᐃᑲᔪᖅᑐᖅᑕᐅᓂᖓ ᓚᐃᑦᓯᑑᓐ ᓄᓇᕗᑦ ᓯᕗᓂᒃᓴᕗᒃᑯᓐᓂᑦ ᐃᑲᔫᑎᖃᓚᐅᖅᑐᖅ ᐃᓚᓕᐅᑎᓂᕐᒧᑦ ᓄᓇᓕᐸᐅᔭᕐᒧᑦ. ᐃᓕᓐᓂᐊᕐᕕᒋᓕᖅᑕᖓ ᒥᑭᑦᑑᓪᓗᓂ ᓯᓚᑦᑐᕐᓴᕐᕕᒃ, ᐃᓄᑭᑦᑐᑯᓘᓪᓗᓂ ᐃᓕᓐᓂᐊᕐᕕᐊᕈᓯᖃᖅᖢᓂ, ᐃᑲᔪᕐᓂᖃᓚᐅᖅᑐᖅ ᓴᙱᔪᒥᒃ ᑲᑎᙵᖃᑎᖃᓕᖅᖢᓂ ᐃᓕᓐᓂᐊᖃᑎᒥᓂᒃ. ᐅᒃᐱᕈᓱᒃᐳᖅ ᐊᒥᓱᓂᒃ ᐱᕚᓪᓕᕈᑎᑕᖃᕐᓂᖓᓂᒃ ᐃᓕᓐᓂᐊᕆᐊᕐᓗᓂ ᒥᑭᓐᓂᖅᓴᓄᑦ ᓯᓚᑦᑐᖅᓴᕐᕕᖕᓄᑦ.

ᑐᓗᖅᑕᕈᑎᑕᖃᓕᕌᖓᒥ, ᓚᐃᑦᓯᑑᓐ ᐊᒃᓱᕈᕈᑎᖃᓚᐅᖅᐳᖅ, ᑮᓇᐅᔭᑎᒍᑦ ᐃᑲᔪᖅᑕᐅᓪᓗᓂ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᑲᔪᙱᓐᓂᖅᓴᐅᓚᐅᖅᐳᖅ ᐃᓕᓐᓂᐊᕆᐊᓕᕌᖓᒥ ᐅᓪᓗᒥᑎᑐᑦ. ᑮᓇᐅᔭᖅᑖᒃᑲᓐᓂᕈᓐᓇᓚᐅᖅᑐᖅ ᐃᑲᔪᕈᑎᒃᓴᓂᒃ ᑭᓯᐊᓂ ᐃᓕᓐᓂᐊᕈᑎᓄᑦ ᑮᓇᐅᔭᖅᑖᕆᖃᑦᑕᓚᐅᖅᑕᖏᑦ ᓈᒻᒪᓚᐅᙱᒻᒪᑕ ᐊᑕᐅᓯᕐᒧᓪᓘᓐᓃᑦ ᐃᓕᓐᓂᐊᕈᑎᓄᑦ. ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᒃ ᐱᓇᔪᒃᖢᓂ ᐊᓂᒍᐃᔪᓐᓇᑦᑎᐊᓚᐅᖅᐳᖅ ᐊᒻᒪ ᐃᓱᐊᓂ ᑎᑎᕋᕈᓐᓇᑦᑎᐊᓚᐅᖅᐳᖅ ᐱᔪᒥᓇᖅᑐᓂᒃ ᐅᓂᒃᑳᓂᒃ ᐃᓕᓐᓂᐊᖅᑎᓄᑦ ᐃᑲᔫᑎᓄᑦ ᑐᒃᓯᕋᐅᑎᓂᒃ ᑮᓇᐅᔭᓕᐅᕈᑕᐅᒃᑲᓐᓂᕋᔭᖅᑐᓂᒃ. ᐊᓯᐊᑦᑕᐅᖅ ᐊᒃᓱᕉᑎᒋᕙᓚᐅᖅᑕᖓ ᐃᓕᓐᓂᐊᖅᑕᒥᓂᒃ ᒪᓕᑦᑎᐊᖏᓐᓇᕋᓱᒃᖢᓂ. ᐃᓕᓐᓂᐊᖃᑎᒌᓂᒃ ᑲᑎᙵᖃᑎᖃᖅᖢᓂ ᐃᑲᔪᕈᑎᑦᑎᐊᕙᐅᓚᐅᖅᐳᖅ ᐊᓂᒍᐃᔪᓐᓇᖅᖢᓂ.

ᓚᐃᑦᔅᑑᓐ ᒪᒃᑯᖕᓂᖅᓴᒥ ᐃᒻᒥᓄᑦ ᐅᖃᐅᔾᔨᔪᓐᓇᕈᓂ ᐱᒻᒪᕆᐅᓂᖓᓂ ᐸᕐᓇᐅᑎᖃᕐᓂᖅ ᐊᒻᒪ ᑐᕌᒐᒃᓴᓕᐅᕐᓂᖅ. "ᑐᕌᒐᒃᓴᖃᓚᐅᖅᓯᒪᙱᒃᑯᕕᑦ, ᖁᕕᐊᓱᒍᑎᖃᕈᓐᓇᔾᔮᙱᑦᑐᑎᑦ ᐱᐊᓂᒃᓯᓂᕐᒥᒃ ᑕᒪᒃᑯᓂᖓ ᐊᓂᒍᖅᑎᑕᐅᔪᓂᒃ. ᐃᓅᓯᕐᒧᑦ ᐸᕐᓇᐅᑎᓪᓗᐊᑕᖅ ᐃᒪᓐᓇᐅᕗᖅ, ᐃᓕᓐᓂᐊᕇᕐᓂᖅ, ᐃᖅᑲᓇᐃᔭᐃᓐᓇᕐᓂᖅ ᐃᖅᑲᓇᐃᔭᖃᑕᐅᓕᕐᓗᓂᓘᓐᓃᑦ, ᓂᐅᕕᕐᓂᖅ ᓯᕗᓪᓕᖅᐹᒥᑦ ᓄᓇᒃᑰᕈᑎᒥᑦ, ᓯᕗᓪᓕᖅᐹᒥᑦ ᐃᒡᓗᑖᕐᓂᖅ, ᓄᐊᑦᑎᓂᖅ ᓂᐅᕕᕐᓂᕐᓗ ᓯᕗᓪᓕᖅᐹᒥᑦ ᐃᒡᓗᒥᑦ, ᑲᑎᑎᑕᐅᔪᒪᓂᖅ ᑲᑎᑎᑕᐅᔪᒪᓂᕐᓘᓐᓃᑦ, ᑕᒪᓐᓇ ᐱᒻᒪᕆᐅᓪᓗᓂ ᐊᓪᓗᕆᐊᕈᑎ ᐃᓄᖕᓄᑦ ᐃᓚᓕᐅᑎᓯᒪᔭᕆᐊᖃᒻᒪᕆᒃᑐᖅ ᐃᓅᓯᖏᓐᓄᑦ ᐸᕐᓇᐅᑎᖏᓐᓄᑦ, ᕿᑐᕐᙵᖅᑖᕐᓂᖅ ᐱᖓᔪᐊᓂᑦ ᕿᑐᕐᙵᖅᑖᕐᓗᓂᓘᓐᓃᑦ, ᖃᔅᓯᓂᒃ ᐱᔪᒪᒐᓗᐊᕈᕕᑦ. ᐃᓅᓯᕐᒥ ᐸᕐᓇᐅᑎᓕᐅᕈᒪᓇᔭᓚᐅᖅᐳᖓ ᖃᐅᔨᒪᓂᖅᓴᐅᓂᐊᕋᒪ ᖃᓄᐃᓕᐅᕈᒪᖕᒪᖔᕐᒪ ᐊᒻᒪ ᖃᓄᐃᓕᐅᕆᐊᖃᕐᒪᖔᕐᒪ ᑕᐃᑯᙵᕈᒪᓗᖓ," ᐅᖃᖅᑐᖅ.

ᐊᒃᓱᕈᕐᓇᕐᔪᐊᖅᑐᐊᓗᖕᒥ ᐃᖅᑲᓇᐃᔮᖃᖅᖢᓂ, ᓚᐃᑦᔅᑑᓐ ᐅᖃᓚᐅᖅᐳᖅ, "ᐊᑕᐅᓯᑐᐊᑦᑎᐊᒥᒃ ᐱᓕᕆᐊᖃᕈᓐᓇᓚᐅᖅᐳᖓ ᐊᑕᐅᓯᐅᓈᖅᑎᕐᓗᒋᑦ, ᐊᑕᐅᓯᐅᓈᖅᑎᕐᓗᒋᑦ, ᐅᓪᓗᑕᒫᑦ, ᑭᖑᓂᐊᒍᓪᓗ ᐊᓂᒍᖅᑎᑦᑐᓐᓇᖅᑕᒃᑲ ᐊᔪᕐᓇᖅᑐᖅᓯᐅᕈᑕᐅᕙᒃᑐᑦ, ᐊᒃᓱᕈᕐᓇᖅᑐᑦ, ᐅᑎᕐᓗᖓᓗ ᐃᓗᐊᕐᓂᖅᓴᒧᑦ ᐃᓂᒧᑦ." ᐊᖏᓂᖅᐹᖅ ᐱᓕᕆᐊᖓ ᒪᓕᒐᓕᐅᖅᑎᐅᓪᓗᓂ ᕿᒥᕐᕈᓪᓗᓂ ᐊᒻᒪᓗ ᑲᔪᓯᑎᑦᑎᓪᓗᓂ ᒪᓕᒐᕐᓂᒃ, ᐊᐃᕙᔾᔪᑎᖃᖅᑐᓂ ᑮᓇᐅᔭᓂᒃ ᐊᑐᖅᑐᒃᓴᓂᒃ, ᐊᒻᒪᓗ ᐊᑐᐊᒐᕐᓂᒃ. ᑭᒡᒐᖅᑐᐃᕙᒃᑭᕗᖅ ᑭᒡᒐᖅᑐᐃᕙᒃᖢᓂᓗ ᓂᕈᐊᖅᑎᒋᔭᒥᓄᑦ. ᐅᐸᒍᑎᒐᔪᒃᐳᖅ ᐊᒥᓱᓄᑦ ᖃᓄᐃᓕᐅᕐᓂᐅᔪᓄᑦ ᐊᒻᒪᓗ ᑲᑎᒪᓂᐅᔪᓄᑦ ᐊᒻᒪᓗ ᐅᔾᔨᕈᓱᒃᑐᖅ ᑕᐅᑐᒃᑕᐅᖏᓐᓇᐅᔭᕐᓂᕐᒥᓂᒃ, ᐅᔾᔨᖅᓱᑦᑎᐊᖅᐸᒃᖢᓂ ᐅᖃᖅᑕᒥᓂᒃ ᐊᒻᒪᓗ ᖃᓄᐃᓕᐅᖅᑕᒥᓂᒃ ᖃᐅᑕᒫᑦ. 

ᐃᖅᑲᐅᒪᔪᖅ ᑲᓇᑕᐅᑉ ᒪᓕᒐᓕᐅᕐᕕᔾᔪᐊᖓᓅᓚᐅᖅᓯᒪᒐᒥ ᓄᓇᕗᑦ ᓯᕗᓂᒃᓴᕗᒻᒦᑎᓪᓗᒍ ᐊᒻᒪᓗ ᑕᑯᓪᓗᓂ ᓂᕈᐊᖅᑕᐅᓯᒪᔪᓕᒫᓂᒃ ᐊᐃᕙᐅᑎᔪᓂᒃ. ᒐᕙᒪᓕᕆᔨᐅᔪᓐᓃᓚᐅᖅᓯᒪᕗᖅ ᒪᒃᑯᒃᑑᑎᓪᓗᒍ. ᑕᒪᓐᓇ ᑕᑯᖃᑦᑕᖅᓯᒪᔭᖓ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᑲᑎᒪᕕᒡᔪᐊᕐᓂᐅᔪᓂᑦᑕᐅᖅ, ᐹᑎᓄᑦ ᒐᕙᒪᓕᕆᓂᖅ ᐊᒻᒪ ᐸᒡᕕᓵᕆᓂᖅ ᐊᐅᓚᑦᑎᖔᓕᖅᑎᓪᓗᒍ ᑲᑎᒪᓂᕐᒥ ᐊᒻᒪ ᐃᒃᐱᒍᓱᑦᑎᐊᙱᓐᓂᖅ ᐊᒃᓱᕈᕐᓇᕐᔪᐊᖅᐳᖅ. ᑖᓐᓇ ᐅᐱᒋᔭᖃᓪᓚᕆᒻᒪᑦ ᓄᓇᕗᑦ ᒪᓕᒐᓕᐅᖅᑎᖏᓐᓂᒃ ᐃᓕᖅᑯᓯᖏᑦ ᑕᐃᒪᐃᓐᖏᒻᒪᑕ. ᐊᐃᕙᐅᑎᕈᓘᔭᖃᑦᑕᕋᓗᐊᖅᑎᓪᓗᒋᑦ, ᐃᓄᐃᑦ ᐃᒃᐱᒋᔭᐅᑦᑎᐊᖅᐸᒃᐳᑦ.

ᐱᔪᒃᓯᓕᕋᓱᓕᕌᖓᒥ, ᓚᐃᑦᓯᑑᓐ ᓵᙵᕗᖅ ᐊᔭᒥᓄᑦ ᐄᕙᒧᑦ ᑐᒡᓕᕆᔭᐅᓚᐅᖅᑐᖅ ᓯᕗᓕᖅᑎᒧᑦ ᓄᓇᕗᒻᒥ. ᐃᕐᓂᕐᒥᓄᑦ ᑕᐅᑐᑦᑎᐊᕐᒥᔪᖅ ᐊᒻᒪ ᑭᒃᑯᓕᒫᓄᑦ ᓄᓇᕘᒥᐅᓄᑦ. "ᐱᓕᕆᐊᕆᒐᔪᒃᑕᕋ ᐱᐅᓯᕚᓪᓕᖅᑎᑦᑎᓇᓱᒃᖢᖓ ᐃᓅᓯᕆᔭᐅᔪᓂᒃ ᐊᒻᒪ ᐃᓅᓯᕆᔭᐅᔪᓂᒃ ᓄᓇᕗᒻᒥᐅᓄᑦ ᓱᓕ ᐊᔪᖅᓴᙱᑦᑐᓄᑦ," ᐅᖃᖅᑐᖅ. ᑕᐅᑐᒐᖃᓪᓗᐊᑕᖅᐳᖅ ᒪᒃᑯᒃᑐᓄᑦ ᐱᓕᕆᐊᖑᕙᓪᓕᐊᔪᒪᔪᓂᒃ, ᓂᕿᓕᕆᓂᕐᒧᑦ ᐱᓕᕆᐊᖑᕙᒃᑐᓂᒃ ᐃᓕᓐᓂᐊᕐᕕᖕᓂ, ᐱᐅᓯᒋᐊᖅᑎᑦᑎᓂᕐᒥᒡᓗ ᐃᑲᔪᖅᑐᐃᓂᕐᒥᒃ ᐃᓕᓐᓂᐊᕐᕕᖕᓂ ᐃᓕᓐᓂᐊᕌᓪᓚᓚᐅᕐᓗᓂ ᐃᓕᓐᓂᐊᒃᑲᓐᓂᕐᓂᕐᒥᒃ. ᐅᐱᒍᓱᒻᒥᔪᖅ ᐋᖅᑭᒋᐊᕈᑕᐅᔪᓂᒃ ᑮᓇᐅᔭᑎᒍᑦ ᐃᑲᔫᑎᓄᑦ ᓄᓇᕗᒻᒥ ᐃᓕᓐᓂᐊᖅᑎᓄᑦ ᒪᓕᒐᕐᒧᑦ, ᐱᑕᖃᑦᑎᑦᑎᓪᓗᓂ ᐃᓗᐃᒃᑲᕐᒥᒃ ᐃᑲᔪᖅᑐᐃᓂᕐᒥᒃ ᐱᖃᓯᐅᑎᓪᓗᒋᑦ ᑮᓇᐅᔭᖃᖅᑎᑦᓯᓂᖅ ᐸᐃᕆᕕᓐᓄᑦ ᕿᑐᕐᖓᖏᓐᓄᑦ ᐃᓕᓐᓂᐊᖅᑎᐅᔪᑦ, ᐃᓕᓐᓂᐊᕈᑎᒥᓂᒃ ᐃᑲᔪᖅᑕᐅᓂᕐᒧᑦ ᐊᒻᒪᓗ ᐊᓯᖏᓐᓄᑦ ᐊᐅᓚᔾᔭᒋᐊᕈᑕᐅᔪᓄᑦ.

ᐃᓱᓕᑉᐸᓪᓕᐊᓕᕐᓗᓂ, ᓚᐃᑦᓯᑑᓐ ᓴᙱᒃᑎᒋᐊᖅᑎᑦᑎᒃᑲᓐᓂᖅᐳᖅ ᐱᒻᒪᕆᐅᓂᖓᓂᒃ ᒪᒃᑯᒃᑐᑦ ᐅᓪᓘᑉ ᐃᓚᐃᓐᓇᖓᓂ ᐃᖅᑲᓇᐃᔭᖃᑦᑕᕆᐊᖃᕐᓂᖏᓐᓂᒃ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓚᐅᙱᓐᓂᖏᓐᓂᒃ. ᐊᔭᐅᖅᑐᐃᒻᒥᔪᖅ ᐃᓅᓱᒃᑐᓄᑦ ᓴᓇᔨᕈᕆᐅᔅᓴᓂᕐᒧᑦ ᐃᓕᓐᓂᐊᕋᔅᓴᒥᒃ ᐋᖅᑭᑦᑕᐅᓯᒪᔪᒥᒃ ᐃᓕᓐᓂᐊᕈᑎᔅᓴᓄᑦ. ᑕᑯᔪᒪᕗᖅ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᓕᖅᑎᑦᑎᓗᑎᒃ ᐊᒥᓱᓂᑦ ᒪᒃᑯᒃᑐᓂᑦ ᐊᔪᕐᓇᙱᓐᓂᓕᒫᖓᓂ ᐊᐅᔭᒃᑯᑦ ᐊᒻᒪ ᐊᕐᕌᒍᓕᒫᒥ ᐃᓕᓐᓂᐊᕌᓂᒃᑳᖓᑕ ᐱᕕᒃᓴᓂᑦ. ᐅᔾᔨᕈᓱᓕᖅᑎᑦᑎᓚᐅᕆᕗᖅ 30%-ᖏᑦ ᐃᓄᒋᐊᓐᓂᖏᑦ ᑐᕚᖃᖅᐸᒻᒪᑕ ᓱᒃᑯᐊᕿᕙᑦᑐᓂᒃ ᐊᒻᒪᓗ 40%-ᖏᑦ ᒪᒃᑯᑦᑐᐃᑦ ᓱᒃᑯᐊᕿᕙᑦᑐᑦ. ᑲᔪᖏᖅᓴᐃᕙᒃᐳᖅ ᒪᒃᑯᒃᑐᓂᒃ ᐃᖅᑲᓇᐃᔮᒃᓴᖅᓯᐅᖃᑦᑕᖁᔨᓪᓗᓂ ᐱᒋᐊᓕᓵᖅᑎᓪᓗᒋᑦ.

ᓚᐃᑦᓯᑑᓐᒧᓪᓕ, ᖃᐅᔨᒪᓚᐅᖅᑐᖅ ᐃᖅᑲᓇᐃᔭᕐᓂᐊᕐᓂᕐᒥᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ, ᖃᐅᔨᒪᓚᐅᙱᑦᑐᖅ ᖃᓄᖅ ᐅᕝᕙᓘᓐᓃᑦ ᖃᖓ ᐅᕝᕙᓘᓐᓃᑦ ᓇᒥ ᐊᒻᒪᓗ ᓱᓇᐅᕝᕙ ᐃᖅᑲᓇᐃᔭᕋᔭᖅᑐᖅ ᑮᓇᐅᔭᓕᕆᔨᒃᑯᓐᓄᑦ ᐊᒻᒪᓗ ᒪᓕᒐᓕᐅᖅᑎᕈᕐᓗᓂ. ᑲᔪᖏᖅᓴᖅᑕᐅᓪᓗᓂ ᐊᔭᒥᓄᑦ ᓯᕗᓕᖅᑎᐅᓚᐅᖅᓯᒪᔪᒧᑦ, ᕿᑐᕐᖓᖏᓐᓄᑦ ᐊᒻᒪᓗ ᓄᓇᕗᒻᒥᐅᓕᒫᓄᑦ, ᐱᔪᓐᓇᕐᓂᓕᒫᒥᒍᑦ ᐱᓕᕆᕙᑦᑐᖅ ᑭᒡᒐᖅᑐᐃᓪᓗᓂ ᓂᕈᐊᖅᑎᒋᔭᒥᓂᒃ ᐊᒻᒪᓗ ᓯᕗᓕᖅᑎᐅᑦᑎᐊᕈᒪᓪᓗᓂ. ᐃᖅᑲᓇᐃᔮᖓ ᐊᒃᓱᕈᕐᓇᖅᑑᒐᓗᐊᖅ ᑭᓯᐊᓂ ᖁᕕᐊᒋᑦᑎᐊᖅᑕᖓ ᐊᒻᒪ ᖁᕕᐊᓱᒃᐸᒃᖢᓂ, ᐃᓛᓐᓂᒃᑯᑦ ᐊᒃᓱᕈᕐᓇᕋᓗᐊᖅᑎᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.