"ᑕᐃᒪᙵᑦ ᐃᓅᓯᓐᓂ ᐃᒥᐊᓗᖃᑦᑕᕈᓐᓃᕋᒪ, ᐱᓕᕆᔪᓐᓇᖅᓯᓯᒪᕗᖓ ᐃᓱᒪᒋᓚᐅᙱᑕᓐᓂᒃ ᐱᓕᕆᓂᐊᕆᐊᒃᓴᖅ," ᐅᖃᖅᑐᖅ ᐋᓕᒃᓵᓐᑐ ᑕᐃᓗ-ᒪᑳᓚᒻ. ᑖᓐᓇ Kwakwaka'wakw ᐊᒻᒪᓗ Nuu-chah-nulth-ᖑᓪᓗᓂ ᓄᓇᖃᖅᖢᓂᓗ ᕕᒃᑑᕆᐊ, ᐳᕆᑎᔅ ᑲᓚᒻᐱᐊᒥ. ᐃᙱᖅᑎᐅᔪᖅ ᐊᑎᖃᖅᖢᓂ ᐱᓐᑎᐊᓐ ᐊᒻᒪ ᓴᓇᙳᐊᖅᑎᐅᓪᓗᓂ, ᐊᒥᐊᕆᔨᐅᓪᓗᓂ ᐊᒻᒪ ᑎᑎᖅᑐᒐᖅᑎᐅᓪᓗᓂ. ᐃᓚᓯᕙᒃᐳᖅ hiphop−ᒥᒃ ᑎᑎᕋᐅᔭᖅᑕᒥᓄᑦ. ᐃᒻᒥᓂᒃ ᐃᓕᑦᑎᕙᓪᓕᐊᕗᖅ ᐃᓕᖅᑯᓯᑐᖃᒃᑯᑦ ᓴᓇᓯᒪᓂᐅᔪᓂᒃ ᐊᒻᒪᓗ ᑕᑯᒃᓴᐅᑎᖦᖢᓂᒋᑦ ᑎᖕᒥᑳᕈᑎᒧᑦ ᒥᖑᐊᕈᑎᒧᑦ. ᒪᒃᑯᒃᑑᓪᓗᓂ, ᑎᑎᕋᖃᑦᑕᓕᓚᐅᖅᐳᖅ ᐳnk ᐃᙱᐅᑎᓂᒃ ᒫᓐᓇᓗ hiphop−ᒥᒃ ᑎᑎᕋᖔᕈᒪᓕᖅᖢᓂ. ᐃᙱᖃᑦᑕᖅᓯᒪᔪᖅ ᓄᓇᕐᔪᐊᕐᒥ ᓄᓇᖃᖅᑳᖅᓯᒪᔪᑦ hiphop awards-ᒥ, ᐊᒻᒪ ᓂᐱᓕᐅᕆᓛᕈᒪᑦᑎᐊᖅᐳᖅ ᐃᓗᐃᑦᑐᒥᒃ ᓂᐱᓕᐅᕆᓂᕐᒥᒃ.

ᓴᓇᙳᐊᖅᑎᐅᓪᓗᓂ, ᑕᐃᓗ-ᒪᑳᓚᒻ ᓇᖕᒥᓂᖅ ᐃᓕᓐᓂᐊᖅᑎᓪᓗᐊᑕᐅᕗᖅ, ᐃᓕᑦᑎᕙᓪᓕᐊᓪᓗᓂ ᓄᓇᖃᖅᑳᖅᓯᒪᔪᑦ ᓴᓇᙳᐊᒐᖏᓐᓂᒃ ᐅᖃᓕᒫᒐᕐᓂᒃ ᐱᓚᐅᖅᑕᖏᓐᓂᒃ ᐃᓕᓐᓂᐊᕐᕕᐊᓗᖕᒥ ᓴᓇᙳᐊᕐᓂᕐᒧᑦ ᐃᓕᓐᓂᐊᖅᑎᓪᓗᒋᑦ. ᐱᕈᖅᓴᓪᓗᓂ ᕕᒃᑑᕆᐊᒥ ᐊᓈᓇᒥᓂᒃ ᐱᖃᑎᖃᖅᖢᓂ, ᐃᓕᑦᑎᓗᐊᓚᐅᙱᑦᑐᖅ ᐅᖃᐅᓯᕐᒥᓂᒃ, ᐱᖅᑯᓯᖏᓐᓂᒃ, ᐃᙱᐅᓯᖏᓐᓂᒃ, ᐊᒻᒪ ᒧᒥᕈᓯᖏᓐᓂᒃ, ᑭᓯᐊᓂ ᓄᓇᖓᓄᑦ ᐳᓛᕆᐊᖅᓯᒪᒐᓗᐊᖅᖢᓂ ᐊᑖᑕᒥᓄᑦ. ᑭᖑᕚᕆᔭᐅᓪᓗᓂ ᐃᓚᒌᓄᑦ ᓴᓇᙳᐊᖅᑎᓄᑦ, ᐊᓈᓇᖓ ᑕᑯᓚᐅᖅᓯᒪᙱᓚᖅ ᐊᑖᑕᓪᓚᑦᑖᒥᓂᒃ. ᐊᓈᓇᑦᑎᐊᖓ ᓄᐊᑦᑎᖃᑦᑕᓚᐅᖅᐳᖅ ᐱᖓᖕᓇᖅᐸᓯᐊᓂ ᓄᓇᖃᖅᑳᖅᓯᒪᔪᑦ ᓴᓇᙳᐊᒐᖏᓐᓂᒃ ᐊᒻᒪ ᓴᓇᙳᐊᒐᖏᓐᓂᒃ ᐱᕈᖅᓴᓚᐅᖅᖢᓂᓗ ᓄᓇᖃᖅᑳᖅᑐᑦ ᓴᓇᙳᐊᒐᖏᓐᓂᒃ ᐊᕙᓗᔭᐅᓯᒪᓪᓗᓂ. ᖁᕕᐊᒋᔭᖃᐃᓐᓇᐅᔭᖅᑐᖅ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ. ᐱᔪᒃᓯᑎᑕᐅᓯᒪᕗᖅ ᑰᕆ ᐴᓪᐱᑦ ᐊᒻᒪ K.C. ᕼᐋᓪ ᐊᒻᒪ hip hop ᑎᑎᖅᑐᒐᕈᓯᖏᓐᓂᒃ. ᑲᔪᖏᖅᓴᐃᔨᖃᖃᑦᑕᖅᓯᒪᕗᖅ ᐊᒃᑲᒋᓚᐅᖅᑕᒥᓄᑦ ᐱᐊᓪ ᑎᒃ ᐊᖓᔪᖅᑳᕆᔭᐅᓪᓗᓂ ᓴᓇᙳᐊᖅᑎᒻᒪᕆᐅᓪᓗᓂᓗ.

ᐊᖏᓛᖅ ᐊᒃᓱᕈᕐᓇᕐᓂᖅᐹᖅ ᑕᐃᓗ-ᒪᑳᓚᒻ ᒫᓐᓇᒧᑦ ᑎᑭᖦᖢᒍ ᐃᒻᒥᓂᒃ−ᐊᑭᕋᖅᑐᖅᐸᖕᓂᖓ, ᐃᓱᒪᓪᓗᓂ ᖃᓄᐃᓕᐅᕈᓐᓇᕐᒪᖔᕐᒥ ᓴᓇᙳᐊᕈᓐᓇᕐᒪᖔᕐᒥᓘᓐᓃᑦ. "ᓴᓇᔭᓕᒫᒃᑲ, ᐊᒥᐊᒐᓕᒫᑦᑎᐊᑦ ᐊᒻᒪ ᐊᑭᓐᓇᕐᒥᐅᑕᑦ ᐅᕝᕙᓘᓐᓃᑦ ᑐᐱᒃᓴᓕᐊᕆᓯᒪᔪᑦ, ᐃᓕᑦᑎᕚᓪᓕᕈᑎᒋᕙᒃᑲ," ᐅᖃᖅᑐᖅ. ᓴᓇᙳᐊᕋᓱᒃᐸᒃᐳᖅ ᑭᓱᑐᐃᓐᓇᓂᒃ ᐲᔭᐃᙱᖦᖢᓂ ᐃᔨᖅᓯᓯᒪᙱᖦᖢᓂᓗ. ᓂᔾᔭᐅᓯᔭᕐᓂᒃᑯᓪᓕ, ᐃᙱᐅᓯᖏᑦ ᐊᔪᕈᓐᓃᖅᓴᖅᐸᒃᖢᓂᒋᑦ ᑭᓯᐊᓂ ᓂᐊᖁᕐᒥᓃᓕᖅᑎᓪᓗᒋᑦ. ᐃᙱᖅᑎᐅᖃᑎᒋᕙᒃᑕᖓ, ᓂᑭ ᐃ ᑲᔪᖏᖅᓴᐃᓚᐅᖅᐳᖅ ᖁᙱᐊᖅᑕᐅᖃᑎᒋᔪᒪᓪᓗᓂᐅᒃ ᕚᓐᑰᕙᒥ ᐊᖏᕈᒪᙱᖦᖢᓂᓗ ᑕᐃᒪᓐᓇᓗ ᐱᙳᐊᖃᑦᑕᓕᓚᐅᖅᐳᖅ hiphop−ᒥᒃ.

ᐃᒻᒥᓂᒃ−ᐊᑭᕋᖅᑐᕋᓗᐊᖅᑎᓪᓗᒍ, ᐊᒥᓱᐊᓗᖕᓂ ᐱᐅᔪᓂᒃ ᐅᖃᐅᔾᔭᐅᓯᒪᕗᖅ ᐃᙱᐅᓯᓕᐊᕆᓚᐅᖅᑕᖓᓄᑦ ᐊᓈᓇᑦᑎᐊᖓᑕ ᒥᒃᓵᓄᑦ ᐃᓄᐊᖅᑕᐅᓚᐅᖅᓯᒪᔪᒥ ᓄᓇᖃᖅᑳᖅᑐᒥ ᐊᕐᓇᒥ ᐊᒻᒪ ᐊᓯᐊᓂ ᐃᙱᐅᓯᕐᒥ ᑎᑎᖅᑲᐅᓪᓗᓂ ᑲᓇᑕᒧᑦ. ᓄᓇᑖᖅᓯᒪᔪᑦ ᖁᔭᓕᕗᑦ ᓱᓕᔪᓂᒃ ᐅᖃᐅᓯᕆᔭᖏᓐᓂᒃ. "ᐄ, ᓴᐱᓕᖅᓴᕋᐃᙱᑦᑐᒍᑦ, ᐊᒻᒪ ᑕᒪᒃᑯᓂᖓ ᐃᙱᐅᓯᖃᖅᖢᑕ ᑭᓯᐊᓂ ᐊᒥᓱᑦ ᐃᓄᖁᑎᕗᑦ ᓱᓕ ᐊᒃᓱᕈᕈᑎᖃᖅᐳᑦ ᐊᒻᒪ ᑲᔪᓰᓐᓇᖅᑐᒥᒃ, ᖃᐅᑕᒫᑦ. ᐃᙱᕐᓂᑐᐃᓐᓇᐅᙱᓚᖅ ᕿᓚᐅᔾᔭᕐᓂᑐᐃᓐᓇᐅᙱᖦᖢᓂᓗ ᓄᓇᓕᐸᐅᔭᒃᑯᑦ ᖃᓄᐃᓕᐅᖅᑎᑦᑎᓂᕆᕙᒃᑕᖏᓐᓂᒃ," ᐅᓂᒃᑳᕆᓪᓗᓂ.

ᐃᙱᐅᓯᖏᑦ ᐅᖃᐅᓯᖃᕆᕗᑦ ᐱᔪᒃᓯᓕᕐᓂᕆᓚᐅᖅᑕᒥᓂᒃ ᑕᑯᔭᕌᖓᒥ ᑭᖑᕚᒃᓴᕗᑦ ᑎᑭᑉᐸᓪᓕᐊᔪᑦ ᐃᓕᑦᑎᕙᓪᓕᐊᓪᓗᑎᒡᓗ ᐅᖃᐅᓯᕐᒥᓂᒃ ᐃᓕᖅᑯᓯᕐᒥᓂᒡᓗ ᑭᖑᕚᕇᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐅᕝᕙᓘᓐᓃᑦ ᐊᒃᓱᕈᕈᑎᖃᖅᐸᓚᐅᖅᑐᓄᑦ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᖅᓯᒪᔪᓄᑦ.

ᐋᖓᔮᕈᓐᓃᖅᓯᒪᓕᖅᑐᖅ ᐊᕐᕌᒎᖕᓄᑦ ᒪᕐᕉᖕᓄᑦ ᓇᑉᐸᖓᓄᓪᓗ ᐊᒃᓱᕉᑎᖃᓚᐅᖅᖢᓂ ᐅᐃᕆᓯᒪᓂᕐᒧᑦ ᑕᐃᒪᙵᓂᑦ ᐅᑭᐅᖃᓕᕋᒥ 11-ᓂᒃ. ᖃᑕᙳᑎᖏᑦ ᓄᖅᑲᖅᑎᑦᑎᓇᓱᓚᐅᖅᐳᑦ ᐋᖓᔮᕈᓐᓃᖁᓪᓗᓂᐅᒃ ᖁᕕᐊᓱᒃᑲᓐᓂᖁᓪᓗᒍᓗ. ᐱᒃᑯᒍᓱᒃᐸᙱᓚᖅ ᐃᒥᐊᓗᖕᒥᒃ ᐋᖓᔮᕐᓇᖅᑐᓂᒡᓘᓐᓃᑦ ᐃᙱᐅᓯᕐᒥᓂ, ᖃᐅᔨᒪᓪᓗᓂ ᑕᒪᓐᓇ ᐃᓅᓯᖓᑕ ᐃᓚᒋᙱᒻᒪᒍ ᓇᖕᒥᓂᕐᓗ ᑲᒪᒋᔪᓐᓇᙱᖦᖢᓂᐅᒃ. ᑎᓕᐅᕆᔪᒪᕗᖅ ᐊᓯᒥᓂᒃ ᐊᒃᓱᕉᑎᖃᑐᐃᓐᓇᕆᐊᓕᖕᓂᒃ ᐋᖓᔮᕈᓐᓃᕐᓂᕐᒧᑦ, ᐅᖃᖅᖢᓂ "ᑕᒪᒃᑯᓂᖓ ᐊᓂᒍᐃᔪᓐᓇᕈᒪ..., ᐃᒪᐃᓕᐅᕈᓐᓇᕆᕗᑎᑦᑕᐅᖅ, ... ᐊᔪᕐᓇᙱᑦᑎᐊᖅᐳᖅ, ᑕᒫᓃᒃᑲᔭᙱᖦᖢᖓᓗ ᓄᓇᖅᑲᑎᒃᑲ ᓇᒡᓕᒍᓱᖕᓂᖃᙱᒃᑯᒪ, ᖃᑕᙳᑎᑐᐊᕆᙱᑕᒃᑲ, ᑭᓯᐊᓂ ᓄᓇᖅᑲᑎᒃᑲ." ᐃᑲᔪᕈᒪᕙᒃᐳᖅ ᑕᐃᒃᑯᓂᖓ ᐊᒃᓱᕈᕐᓇᖅᑐᒃᑰᖅᑐᓂᒃ ᐅᖃᖅᖢᓂᓗ ᐃᑲᔪᖅᑕᐅᔪᓐᓇᕐᓂᕋᖅᖢᓂᒋᑦ ᐊᒻᒪ ᓯᕗᓕᕆᓚᐅᖅᑕᒥᓄᑦ ᐅᖄᓚᔪᓐᓇᕆᓪᓗᑎᒃ.

ᓂᔾᔭᐅᓯᔭᕐᓂᐅᑉ ᐅᖓᑖᓄᑦ, ᑕᐃᓗ-ᒪᑳᓚᒻ ᐊᖏᖅᓯᒪᑦᑎᐊᖅᐳᖅ ᒪᕐᕉᖕᓄᑦ ᐃᕐᓂᖏᖕᓄᑦ ᐸᓂᒃᓴᖓᓄᓪᓗ ᑕᑯᑎᖦᖢᓂᒋᓪᓗ ᐊᔪᕐᓇᙱᓐᓂᖏᓐᓂᒃ. ᖁᙱᐊᖅᑕᐅᕙᒃᑭᕗᖅ ᑎᓕᐅᖅᑕᐅᓚᐅᖅᖢᓂ ᐆᒃᑐᖁᔭᐅᓪᓗᓂ ᐊᖓᒃᑯᒥᓄᑦ. ᐅᖃᓪᓚᖃᑎᖃᖅᓯᒪᕗᖅ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑎᓄᑦ ᐱᕈᖅᓴᔭᐅᓂᕆᓚᐅᖅᑕᖓᑕ ᒥᒃᓵᓄᑦ, ᐊᒃᑐᐃᔾᔪᑕᐅᓲᓂᒃ ᑭᖑᕚᕇᓄᑦ ᖁᐊᖅᓵᖅᓯᒪᓂᕐᒧᑦ, ᐅᐃᕆᓯᒪᓂᕐᒧᑦ ᐊᒻᒪ ᐋᓐᓂᖅᓯᕆᓂᕐᒧᑦ. ᐃᓕᓐᓂᐊᕐᕕᐊᓗᖕᒥ ᐊᓂᒍᐃᓚᐅᙱᒃᑲᓗᐊᖅᖢᓂ, ᐃᓱᒪᓯᒪᕗᖅ ᐊᓂᒍᐃᓂᕐᒧᑦ ᓇᓗᓇᐃᒃᑯᑕᖅᑖᕈᒪᓪᓗᓂ. "ᐃᓱᒪᑦᑎᐊᓚᐅᖅᐳᖓ ᓄᖅᑲᑐᐃᓐᓇᓚᐅᖅᖢᖓ, ᐃᒥᐊᓗᓗᐊᖅᐸᒃᖢᖓ ᒪᒃᑯᒃᑐᓄᑦ ᐱᕋᔭᒃᐸᒃᖢᖓ ᐅᖃᓪᓚᖃᑦᑕᓕᖅᖢᖓ ᓯᓚᑦᑐᖅᓴᕐᕕᒡᔪᐊᓂ ᐊᒻᒪ ᖁᙱᐊᖅᑕᐅᕙᒃᖢᖓ ᐊᒻᒪ ᕚᓐᑰᕙᒥ ᐱᙳᐊᕐᕕᖕᒥ... ᖁᔭᓕᑦᑎᐊᖅᐳᖓ ᐃᓅᓯᖃᓕᕋᒪ ᒫᓐᓇ. ᑕᑯᒃᓴᐅᑎᑦᑎᓪᓚᕆᒃᐳᖅ ᖃᓄᖅ ᐊᓯᔾᔨᕈᓐᓇᖅᑎᒋᖕᒪᖔᑕ ᑭᐱᓯᒍᕕᑦ ᑭᓱᒥᒃ ᓄᖅᑲᖓᑎᑦᑎᓪᓚᕆᒃᐸᒃᑐᒥᒃ."

ᓯᕗᓂᒃᓴᒧᑦ ᑕᐅᑐᒃᖢᒍ, ᑕᐃᓗ-ᒪᑳᓚᒻ ᐅᖃᖅᑐᖅ, "ᐃᓅᓯᖃᕈᒪᑐᐃᓐᓇᖅᐳᖓ ᕿᑐᕐᖓᒃᑲᓗ ᑕᑯᑎᑦᑐᒪᓪᓗᒋᑦ ᐃᓅᓯᖃᕈᓐᓇᕐᓂᓐᓂᒃ ᓇᓕᒧᒌᒃᑐᒥᒃ ᐅᓪᓗᒥᐅᓕᖅᑐᒥ, ᖃᓪᓗᓈᓄᑦ ᓄᓇᕐᔪᐊᒥ ᓄᓇᓕᐸᐅᔭᕐᓂ, ᓴᓇᙳᐊᖅᑏᑦ ᐊᓯᖏᓪᓗ ᐊᒻᒪ ᐃᓕᖅᑯᓯᒃᑯᑦ ᐃᓅᓯᕆᔭᐅᔪᑦ." ᓄᓇᒥᓄᑦ ᐅᑎᕈᒪᒐᓗᐊᖅᐳᖅ ᐊᒻᒪ ᐃᓕᓴᐃᔨᑖᕐᓗᓂ ᐃᓚᒥᓄᑦ ᐃᓕᓐᓂᐊᖅᑎᑦᑎᓂᐊᖅᑐᒥᒃ ᐃᓕᖅᑯᓯᑐᖃᒃᑯᑦ ᓴᓇᙳᐊᕐᓂᕐᒥᒃ ᓴᓇᙳᐊᕐᓂᕐᒥᒡᓗ. ᐅᖃᐅᓯᕐᒥᓂᒃ ᐃᓕᓐᓂᐊᕈᒪᔪᖅ ᕿᑐᕐᖓᒥᓂᒃ ᐱᖃᑎᒋᓗᓂᒋᑦ, ᐊᓯᖏᓐᓂᒃ ᐃᙱᐅᓯᓕᐅᖃᑦᑕᕈᒪᓪᓗᓂ, ᑕᕐᕆᔭᐅᓯᐅᖃᑦᑕᕈᒪᓪᓗᓂᓗ.

ᑲᔪᖏᖅᓴᐃᓕᕌᖓᒥ, ᑕᐃᓗ−ᒪᑳᓚᒻ ᕿᑐᕐᙵᒥᓄᑦ ᑕᐅᑐᒃᐸᒃᐳᖅ, ᓯᕗᕚᒥᓄᑦ ᖃᑕᙳᑎᖏᓐᓄᓪᓗ. ᐱᔪᒃᓯᓯᒪᖕᒥᔪᖅ ᐊᓯᖏᓐᓂᒃ ᐃᙱᖅᑎᓂᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᑎᑕᒃᑎᓂᒃ. ᓂᔾᔭᐅᓯᔭᕐᓂᕐᒧᑦ ᖁᕕᐊᒋᔭᖏᑦ ᐊᖓᔪᖅᑳᖏᑕ ᐊᒃᑐᖅᓯᔾᔪᑎᒋᓚᐅᖅᐸᖏᑦ ᐊᒻᒪ ᑐᓴᕐᓈᕈᒪᔭᖏᑦ ᐊᔾᔨᒌᙱᑦᑑᑎᐅᕗᑦ hip hop−ᒥᑦ ᐳnk−ᒧᑦ ᐊᒻᒪ ᑐᓴᕐᓈᒐᒃᓴᑐᖃᕐᓄᑦ.

ᐃᓱᒪᒥᒍᑦ ᖃᓄᐃᖏᑦᑎᐊᕈᒪᓪᓗᓂ, ᑕᐃᓗ−ᒪᑳᓚᒻ ᐅᔾᔨᕈᓱᑦᑎᐊᖅᐳᖅ ᖃᐅᑕᒫᑦ ᑐᒃᓯᐊᖃᑦᑕᕆᐊᒃᓴᖅ. ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑰᕆᐊᖃᕋᓗᐊᖅᖢᓂ ᐱᓕᕆᐊᒥᓂᒃ ᓴᖅᑭᔮᖅᑎᑦᑎᒃᑲᓐᓂᕋᓱᒃᖢᓂ, ᐅᖄᓚᐅᑎᒥᓂᒃ ᐅᐊᔭᒨᖅᑐᓂᒡᓗ ᑲᑉᐳᔾᔭᐃᖅᓯᒪᓂᖅᓴᐅᓇᓱᒃᐸᒃᐳᖅ ᓂᐱᖃᙱᖦᖢᓂᓗ. ᐳᐃᔾᔪᕋᕐᕕᓕᐊᖃᑦᑕᖅᐳᖅ, ᐳᐃᔾᔪᕋᕆᐊᖅᑐᖅᐸᒃᖢᓂ ᐊᒻᒪ ᓂᕆᑦᑎᐊᕐᓂᖅᓴᐅᓇᓱᒃᐸᒃᖢᓂ. ᕚᔅᑭᑦᐹᓪᒥᑦᑕᐅᖅ ᐱᙳᐊᖃᑕᐅᕙᒃᑭᕗᖅ. ᓂᔾᔭᐅᓯᔭᕐᓂᖅ ᐊᒻᒪ ᓴᓇᙳᐊᕐᓂᖅ ᐃᒻᒥᓂᒃ−ᑲᒪᒋᑦᑎᐊᕐᓂᐅᕗᖅ, ᐃᓚᒋᔭᐅᖕᒥᖕᒪᑕ ᐱᓕᕆᐊᖏᓐᓄᑦ ᐃᓛᓐᓂᒃᑯᑦ ᐋᖅᑭᒍᑎᑦᑎᐊᕙᐅᙱᓐᓂᖅᓴᐅᕙᒃᐳᑦ ᑕᐃᒪᙵᓂᑦ. ᐳᔪᖅᑐᕐᕕᖕᒦᒋᐊᒃᓴᖅ ᖁᕕᐊᒋᔭᖃᕐᒥᔪᖅᑕᐅᖅ ᐊᒻᒪᓗ ᒧᒥᕆᐊᕈᒪᑦᑎᐊᖅᖢᓂ.

ᐅᐃᕆᓯᒪᙱᖦᖢᓂ, ᐊᓕᒃᓵᓐᑐ ᑕᐃᓗ−ᒪᑳᓚᒻ ᓴᓇᙳᐊᖏᓐᓇᖅᐳᖅ ᐊᒻᒪ ᐃᙱᐅᓯᕐᒥᓂᒃ ᐊᒻᒪ ᐱᐅᔪᒥᒃ ᐆᒃᑑᑎᑦᑎᐊᕙᐅᓪᓗᓂ ᕿᑐᕐᖓᒥᓄᑦ. ᐅᖃᓪᓚᖃᑎᖃᖅᓯᒪᕗᖅ ᓯᓚᑦᑐᖅᓴᕐᕕᒡᔪᐊᒥ ᐃᓕᓐᓂᐊᖅᑎᓄᑦ, ᐃᙱᖃᑕᐅᕙᒃᖢᓂ ᓄᓇᕐᔪᐊᓕᒫᒥ ᓄᓇᖃᖅᑳᖅᑐᓄᑦ hiphop ᑐᓐᓂᖅᑯᓯᐊᓄᑦ ᐊᒻᒪ ᐸᕐᓇᒃᐸᓪᓕᐊᓪᓗᓂ ᐃᓗᐃᑦᑐᒥᒃ ᓂᐱᓕᐅᖅᓯᒪᔪᒥᒃ ᒫᓐᓇ ᐋᖓᔮᕈᓐᓃᕋᒥ. ᐅᖃᐅᓯᖃᖅᖢᓂ ᐱᓪᓚᑦᑖᖑᔪᓂᒃ ᑭᖑᕚᕇᓄᑦ ᖁᐊᖅᓵᖅᓯᒪᓂᐅᕙᒃᑐᓂᒃ ᓄᓇᑖᖅᓯᒪᔪᑦ ᑐᑭᓯᐅᒪᖁᓪᓗᒋᑦ ᐊᒻᒪ ᐅᖃᐅᓯᕐᓂᒃ ᑎᓕᐅᕆᕙᒃᖢᓂ ᐊᓯᒥᓄᑦ ᐱᓱᒍᒪᔪᓄᑦ ᐊᐅᐸᖅᑐᒃᑯᑦ ᐊᖅᑯᑎᒃᑯᑦ, ᐊᓯᒥᓄᑦ ᐃᑲᔪᖃᑕᐅᕙᒃᑭᕗᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.