ᐊᓕᒃᓵᓐᑐᕋ ᔨᐅᕋᑦ ᖃᐅᔨᒪᔪᖅ ᖃᓄᖅ ᐱᓕᕆᑲᑕᐃᓐᓇᕆᐊᒃᓴᖅ ᐱᓕᕆᔨᒻᒪᕆᑐᐃᓐᓇᐅᙱᓪᓗᓂ, ᑭᓯᐊᓂᑦᑕᐅᖅ ᐊᖏᕐᕋᒥ. ᔨᐅᕋᑦ ᐱᕈᖅᓴᓚᐅᖅᓯᒪᕗᖅ Meadow Lake-ᒥ, SK-ᒥ, ᑭᓯᐊᓂ ᓵᔅᑲᑑᓐᒥ ᓄᓇᖃᖅᓯᒪᓕᖅᑐᖅ ᐊᕐᕌᒍᓄᑦ ᖁᓕᓄᑦ. ᐊᓈᓇᒋᔭᐅᔪᖅ ᐱᖓᓱᓄᑦ ᓄᑕᖅᑲᓄᑦ ᓇᖕᒥᓂᕐᓗ ᑯᐊᐳᕇᓴᖃᕐᖢᓂ ᐊᔾᔨᓕᐅᕆᔨᐅᓪᓗᓂ/ᑎᑎᕋᐅᔭᖅᑎᐅᓪᓗᓂ ᓂᐅᕕᐊᒃᓴᖃᕐᓂᕐᒧᑦ ᓇᓗᓇᐃᒃᑯᑕᖅᑖᕋᓱᒃᓯᒻᒫᑦ.

ᔨᐅᕋᑦ ᐱᔪᒪᐃᓐᓇᖅᐸᓚᐅᕐᒪᑦ ᑎᑎᖅᑐᒐᕐᓂᕐᒥᒃ, ᑕᐃᒪᓐᓇ ᑕᕝᕙ ᐊᔾᔨᓕᐅᕆᔪᒪᓕᓚᐅᖅᑐᖅ. 2013-ᒥ, Canon Rebel ᐊᔾᔨᓕᐅᕈᑎᑖᓚᐅᖅᑐᖅ ᖁᕕᐊᓱᒡᕕᖕᒧᑦ ᑕᐃᑲᙵᓪᓗ ᐊᔾᔨᓕᐅᕆᑲᑕᓕᖅᖢᓂ ᕿᑐᕐᖓᒥᓂᒃ.

"ᓴᖅᑭᔮᖅᑎᑦᑎᖃᑦᑕᓕᓚᐅᖅᑐᖓ ᐊᔾᔨᓕᐅᕆᑲᑕᒃᖢᖓᓗ ᐃᓄᖕᓂᑦ ᐊᑭᖃᙱᑦᑐᓂᑦ ᐱᓕᕆᐊᒃᓴᓕᐅᑐᐃᓐᓇᖅᖢᖓ. ᐊᒻᒪᓗ ᑕᐃᒪᐃᓚᐅᖅᑐᖓ ᐊᕐᕌᒍᑦᑎᐊᕙᒻᒧᑦ ᑭᓯᐊᓂ ᐊᑭᓖᑎᑦᑎᖃᑦᑕᓕᓚᐅᖅᑐᖓ $50, $40, ᑭᓇᑐᐃᓐᓇᖅ ᐊᑭᓖᒐᔭᖅᑐᖅ ᐅᕙᓐᓂᒃ, ᐱᒐᔭᖅᑕᕋ. ᐊᒻᒪᓗ 2014-ᒥ ᐊᐃᕆᓕᒥ, ᓇᖕᒥᓂᖃᖅᑎᐅᖃᑕᐅᓕᓚᐅᖅᑐᖓ," ᐅᖃᓚᐅᖅᐳᖅ ᔨᐅᕋᑦ.

ᖃᖓᑦᑎᐊᓵᒃᑯᑦ, ᐃᓚᓕᐅᔾᔨᓚᐅᖅᐳᖅ ᐊᑐᖅᖢᓂᓗ ᑐᓐᓂᖅᑯᑕᐅᑐᐃᓐᓇᖅᐸᒃᑐᓂᒃ ᑮᓇᐅᔭᓂᒃ ᓂᐅᕕᕐᓂᐊᕐᓗᓂ ᐱᔭᕆᐊᖃᖅᑕᒥᓂᒃ ᓯᕗᒻᒧᐊᖅᐸᓪᓕᐊᓂᐊᕐᓗᓂ. ᐊᔾᔨᓕᐅᕆᖃᑦᑕᕐᒥᔪᖅ ᐊᔾᔨᒌᙱᑦᑐᓄᑦ ᐊᐅᓪᓚᑲᑕᖕᓂᖓᓄᑦ, ᐊᓯᖏᓪᓗ ᓄᓇᓖᑦ ᐊᓯᖏᓐᓂᒃ ᐊᕐᓇᓂᒃ ᐱᖃᑎᖃᖅᖢᑎᒃ.

ᔨᐅᕋᑦ ᐱᓕᕆᖃᑎᖃᖃᑦᑕᖅᓯᒪᔪᖅ ᓯᓇᑦᒥᒃ, ᕼᐃᐊᓚᓐ ᐆᕈ ᑎᑎᖅᑐᒐᖅᑎᓂᒃ ᐊᒻᒪᓗ ᐊᑦᔨᒌᖏᑦᑐᓂᒃ ᓴᓇᖑᐊᖅᑎᓂᒃ ᐋᖅᑭᒃᓱᐃᓪᓗᑎᒃ "ᐊᐅᓪᓛᖅᓯᒪᓂᕐᒥᒃ" ᐃᓕᓐᓂᐊᑎᑦᑎᓂᐊᖅᑐᒥᒃ ᓂᕕᐊᖅᓯᐊᓂᒃ ᖃᓄᖅ ᐃᔾᔪᐊᒐᒃᓴᓕᐅᕈᓐᓇᕐᓂᕐᒥᒃ, ᐱᓱᒍᓐᓇᓂᕐᒥᒃ ᒥᕝᕕᒻᒥᒃ, ᐊᒻᒪᓗ ᐃᑲᔪᕐᓗᒋᑦ ᐃᒻᒥᓂᒃ-ᑕᐅᑐᒐᖃᕐᓂᒃᑯᑦ.

"ᐊᓐᓄᕌᓂᑦ ᑕᑯᔭᒐᖃᖅᑎᑦᑎᓚᐅᖅᑐᑦ ᓄᓇᓕᖏᓐᓄᑦ. ᐱᖃᓐᓇᕆᔭᖏᑦ ᐃᓚᖏᓪᓗ ᖃᐃᓪᓗᑎᒃ ᑕᐅᑐᒋᐊᖅᑐᖅᑐᖅᖢᑎᒃ. ᓂᔾᔭᐅᑎᓕᐅᓚᐅᖅᑐᒍᑦ ᐊᒻᒪᓗ ᒪᒃᑯᒃᑐᓕᒫᑦ ᑐᙵᓇᖅᑐᐃᓐᓇᐅᒐᓗᐊᕐᒪᖔᑕ ᐃᓛᓐᓂᒃᑯᑦ ᓲᕐᓗ, 'ᓂᐱᒋᙵ.' ᓄᑕᖅᑲᑦ ᐃᑲᔪᖁᕙᒃᑲ," ᔨᐅᕋᑦ ᐅᖃᖅᑐᖅ.

"ᑕᒪᒃᑯᐊ ᑐᕌᖓᔪᑦ ᐱᑦᑕᐃᓕᑎᑦᑎᓂᖕᒧᑦ ᐱᓕᕆᐊᓄᑦ ᐃᒻᒥᓃᖅᑕᐃᓕᒪᑎᑦᑎᓂᑐᐃᓐᓇᕐᒧ ᐃᒻᒥᓂᒃ ᐅᐱᒋᓂᕐᓴᐅᓕᕐᖢᑎᒃ ᐊᔾᔨᒋᙱᑖᑎᒍᑦ."

ᐊᒻᒪᓗ ᐃᓕᓐᓂᐊᖅᑏᑦ ᐃᓱᒪᑉᐸᑕ ᐊᐅᓪᓚᕈᒪᓗᑎᒃ ᓄᓇᒥᓐᓂᒃ ᓯᕗᓪᓕᖅᐹᒥ ᓇᓪᓕᐊᓐᓄᑐᐃᓐᓇᖅ ᓯᓚᑦᑐᕐᓴᖅᕕᒃᑯᑦ ᐅᕝᕙᓘᓐᓃᑦ ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ, ᔨᐅᕋᑦ ᐅᖃᖃᑦᑕᖅᑐᖅ ᐱᔭᕆᐊᑭᓐᓂᖅᓴᐅᒋᐊᖓ ᑕᐃᑯᖓ ᑎᑭᒐᓱᐊᕐᓗᓂ ᑕᐅᕗᙵᑐᐃᓐᓇᕈᕕᑦ.

ᔨᐅᕋᑦᒧᑦ, ᐱᒻᒪᕆᐅᓚᐅᖅᐳᖅ ᓇᓂᑐᐃᓐᓇᖅ ᕿᓂᕆᐊᖃᕈᓂ ᐊᑐᒐᒃᓴᓂᒃ ᐋᖅᑭᒃᓯᓗᓂᓗ ᐱᒋᐊᕐᕕᒋᓂᐊᖅᑕᖏᓐᓂᒃ.

"ᖃᓄᑐᐃᓐᓇᖅ ᐃᑲᔫᑎᒃᓴᖅᑕᖃᖅᐸᑦ, ᖃᓄᑐᐃᓐᓇᖅ ᓈᒻᒪᒋᔭᕐᓂᒃ ᐃᑲᔪᕈᓐᓇᖅᑕᕐᓂᒃ ᐃᑲᔫᑎᒃᓴᖅᑖᕈᓐᓇᕋᕕᑦ, ᐱᓗᒍ," ᐅᖃᓚᐅᖅᐳᖅ ᔨᐅᕋᑦ.

ᔨᐅᕋᑦ ᕿᓂᖅᐸᓚᐅᖅᑐᖅ ᑐᑭᓯᒋᐊᕈᑎᓂᑦ ᓂᕿᓂᒃ ᓄᐊᑦᑎᕕᓐᓂᑦ, ᐅᖃᖃᑎᖃᖅᐸᓚᐅᖅᑐᖅ ᐊᓯᖏᓐᓂᑦ ᐃᓕᓴᐃᔨᓂᓪᓗ ᑮᓇᐅᔭᓕᐅᑦᑎᐊᖏᓐᓂᕋᐃᓪᓗᓂ, ᐊᒻᒪᓗ ᐃᑲᔪᖅᑕᐅᒐᔭᖅᑐᓂ ᖃᓄᑐᐃᓐᓇᖅ ᐃᓕᓐᓂᐊᕐᕖᑦ ᐊᐅᓚᒍᓐᓇᖅᑕᖏᓐᓂᑦ.

"ᑕᑯᓗᒋᑦ ᑖᒃᑯᐊ ᐊᔾᔨᒌᖏᑦᑐᑦ ᐱᑕᖃᖅᑐᑦ ᖃᐅᔨᒪᑦᑎᐊᕐᓗᑎᓪᓗ ᑭᓲᖕᒪᖔᑕ ᐃᑲᔪᕈᑎᑦ. ᐊᑐᐃᓐᓇᐅᔪᒻᒪᕆᐅᒻᒪᑕ, ᐱᓗᐊᖅᑐᒥᑦ ᑐᓂᕐᕈᓯᐊᑦ ᐊᒻᒪ ᐃᓕᓐᓂᐊᖅᑎᓄᑦ ᐃᑲᔫᑏᑦ ᐊᒻᒪ ᐃᖅᑲᓇᐃᔭᖅᑐᑎᒃ."

ᑭᓯᐊᓂ ᔨᐅᕋᑦ ᐃᑲᔪᖃᑦᑕᖅᓯᒪᒐᓗᐊᖅᑎᓪᓗᒍ ᐊᒻᒪᓗ ᐱᓕᕆᑦᑎᐊᖅᓯᒪᔪᒻᒪᕆᐅᓪᓗᓂ, ᓱᓕ ᐊᐳᖅᑕᕈᑎᖃᕆᐊᖃᓚᐅᕐᒪᑦ.

ᐅᖃᕐᖢᓂ ᐃᓕᓐᓂᐊᕆᐊᕋᒥ, ᒪᕐᕉᖕᓂᒃ ᓄᑕᕋᖃᕐᖢᓂ ᑕᐃᔅᓱᒪᓂ ᐅᖃᕐᖢᓂᓗ ᐃᓄᑑᑎᑕᐅᓂᖓᓂᒃ ᑭᒃᑯᓕᒫᖑᙱᑦᑐᖅ ᐃᓕᓐᓂᐊᕐᕕᐊᕈᓯᖏᓐᓂ ᕿᑐᕐᖓᖃᕐᖢᓂ, ᐃᓱᒪᑐᐃᓐᓇᕐᖢᓂᓗ ᐊᔾᔨᒋᙱᑕᖓᓂᒃ ᐅᓄᕐᓂᖅᓴᓂ ᑭᓇᒥᑭᐊᖅ "ᐱᖃᙱᖦᖢᓂ".

"ᐃᖅᑲᐅᒪᔪᖓ ᐊᓂᒍᖅᐸᓪᓕᐊᓪᓗᖓ ᐊᒻᒪ ᑐᑭᓯᔭᐅᖅᑰᔨᙱᖦᖢᖓ ᐊᒻᒪ ᐃᓄᑑᓪᓗᖓ ᐊᒃᓱᕈᖃᑦᑕᓚᐅᖅᑐᖓ ᐃᓱᒪᒃᑯᑦ ᖃᓄᐃᙱᑦᑎᐊᖅᖢᖓ," ᐅᖃᓚᐅᖅᐳᖅ ᔨᐅᕋᑦ.

ᐊᖓᔪᖅᑳᖑᓪᓗᓂ ᐃᖅᑲᓇᐃᔭᕆᐊᖃᖅᑎᓪᓗᒍᑦᑕᐅᖅ ᐊᒃᓱᕈᕐᓇᖅᑑᓚᐅᖅᑐᖅ ᑖᔅᓱᒧᖓ, ᒥᑕᐅᑎᖃᕆᐊᖃᖅᖢᓂ ᐊᒻᒪ ᐋᖅᑭᒃᓱᐃᔭᕆᐊᖃᖅᖢᓂ. ᑭᓯᐊᓂ ᐅᖃᕐᖢᓂ ᐅᑎᓚᐅᖅᑎᓪᓗᒍ ᐃᓕᓐᓂᐊᕐᕕᖕᒧᑦ ᓄᖅᑲᖓᓚᐅᖅᑎᓪᓗᒍ ᑕᑯᓪᓗᓂ ᐱᑕᖃᒃᑲᓐᓂᖅᑐᓂᒃ ᐱᑕᖃᖅᑐᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᓄᑦ.

"ᑖᓐᓇ ᑲᑎᑎᖦᖢᒍ ᐊᔪᕐᓇᙱᓐᓂᖅᓴᐅᓂᐊᕐᒪᑦ ᓇᓂᓯᔭᕆᐊᒃᓴᖅ ᐃᓄᖕᓂᒃ ᐃᕝᕕᑎᑐᑦ, ᐊᓱᐃᓛᒃ ᐊᔪᕐᓇᙱᓐᓂᖅᓴᐅᕌᕐᔪᒃᖢᓂ ᐃᒃᐱᒋᔭᕆᐊᒃᓴᖅ ᐊᖏᕐᕋᖅᓯᒪᔭᕆᐊᒃᓴᖅ ᓇᓂᓯᑐᐃᓐᓇᕐᓗᓂᓗ ᓄᓇᖃᖅᑳᖅᓯᒪᔪᑦ ᐱᑕᖃᐅᖅᑐᓂᑦᑕᐅᖅ," ᐅᖃᖅᑐᖅ ᔨᐅᕋᑦ.

ᐊᒻᒪᓗ ᖃᓄᑐᐃᓐᓇᖅ ᐅᖃᐅᔾᔨᔪᓐᓇᕈᓂ ᒪᒃᑯᖕᓂᖅᓴᒥᓂᒃ, ᑕᐅᑐᓪᓗᐊᑕᕋᔭᖅᑐᖅ ᐱᓕᕆᐊᒃᓴᒥᒃ, ᑎᑎᕋᕐᓗᓂ ᖃᐅᑕᒫᑦ ᑐᕌᒐᒃᓴᓂᒃ, ᐊᒻᒪᓗ ᐋᖅᑭᒃᓯᓗᓂ ᐱᕕᖃᕐᓂᕐᒥᒃ ᓯᓚᒦᓪᓗᓂ.

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.