ᐊᓖᓯᐊ ᒧᐊᕈ ᐅᖃᖅᐳᖅ ᓴᖅᑭᑦᑎᓂᖅ ᓈᒻᒪᒃᑐᓂᒃ ᓄᓇᓕᖕᓂ ᐱᒻᒪᕆᐅᕗᖅ ᓲᖃᐃᒻᒪ ᐱᒻᒪᕆᐅᖕᒪᑦ ᐊᑦᑕᕐᓇᖅᑐᒦᙱᓐᓂᕐᒥᒃ ᐃᒃᐱᒍᓱᒋᐊᒃᓴᖅ. 

ᐊᓖᓯᐊ ᒧᐊᕈ ᓄᓇᓕᓕᐅᖅᑐᖅ ᐅᓂᒃᑳᖃᑦᑕᐅᑎᓪᓗᑎᒃ. "ᐃᓱᒪᓕᐅᓕᓚᐅᖅᑐᖓ ᓴᖅᑭᑦᑎᔪᒪᓕᖅᖢᖓ ᖃᕆᑕᐅᔭᒃᑯᑦ ᓄᓇᓕᖕᓂᑦ ᐅᓂᒃᑳᖃᑎᒌᒍᒪᔪᓂᑦ ᐊᓂᒍᐃᔪᓂᑦ, ᐱᒋᐊᓚᐅᖅᖢᓂᓗ ᑕᑯᒃᓴᐅᙱᑦᑐᓂᑦ ᑎᒥᒥᒍᑦ ᐊᔪᕈᑎᓕᖕᓂᑦ," ᐅᖃᖅᑐᕕᓂᖅ 26−ᓂᑦ ᐅᑭᐅᓕᒃ. 

"ᐱᕈᖅᐸᓪᓕᐊᕌᓚᓴᖅᑎᓪᓗᒍ ᐊᔾᔨᒌᙱᑦᑐᓄᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᐃᕆᓯᒪᔪᓄᑦ, ᐊᐃᑉᐸᕇᒍᓐᓃᖅᖢᑎᒃ, ᑐᖁᓪᓗᑎᒃ. ᓲᕐᓗ ᐃᓄᐃᑦ ᐅᖃᐅᓯᕆᕙᙱᑕᖏᑦ, ᐊᓯᔾᔨᖅᐸᓪᓕᐊᑲᐅᖅᑐᓲᖑᓪᓗᓂᓗ ᓄᓇᓕᖕᓄᑦ."

ᒧᐊᕈ ᑯᕇᔅ ᐹᐸᔅ ᑯᕇᔅᒥᙶᖅᑐᖅ ᑭᓯᐊᓂ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᕆᔭᐃᓇᒥ. ᑎᒍᐊᙳᐊᖅᑎᐅᖃᑦᑕᓚᐅᖅᐳᖅ ᐊᒻᒪ ᐊᔭᐅᖅᑐᐃᔨᐅᓪᓗᓂ ᐃᓄᐃᑦ ᐃᓚᒥᓂᒃ ᓴᖅᑭᑦᑎᔭᕆᐊᖃᖃᑦᑕᕐᓂᖏᓐᓂᒃ. ᐊᒻᒪᓗ ᐊᕙᓗᓯᒪᓗᑎᒃ ᐃᓄᖕᓂᒃ ᐆᒻᒪᑎᒥᒍᑦ ᐱᔪᒪᓂᖃᑦᑎᐊᖅᑐᓂᒃ. 

ᒧᐊᕈ ᐊᐃᑉᐸᕐᒥᓄᑦ ᐊᕙᓗᔭᐅᓯᒪᓕᖅᑐᖅ, ᒪᕐᕉᒃ ᕿᒻᒥᒃ ᐊᒻᒪ ᐱᕈᖅᓯᐊᖏᑦ. 

"ᐃᓱᒪᒋᔭᕋ ᐅᖃᐅᔾᔭᐅᔪᒪᓇᔭᕐᓂᓐᓂᒃ, ᐃᓕᖕᓂᒃ ᓇᒡᓕᒍᓱᖕᓂᕋᖅᖢᓂ, ᕿᓂᕋᓱᙱᖦᖢᖓᓗ ᑭᓇᒥᑭᐊᖅ ᐅᕝᕙᓘᓐᓃᑦ ᑭᓱᑐᐃᓐᓇᒥᒃ," ᐅᖃᖅᑐᖅ ᒧᐊᕈ.

ᐊᑯᓂᑲᓪᓚᕈᓗᒃ ᓇᓪᓕᒋᓯᒪᓕᖅᑕᖓ ᐊᒻᒪᓗ ᐃᒻᒥᓂᒃ ᐃᓄᑦᑎᐊᕙᐅᓂᖅᓴᐅᓕᖅᑐᓂ. ᒧᐊᕈ ᖁᕕᐊᓱᙱᖦᖢᓂ ᓯᕗᓪᓕᕐᒥ ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕌᓂᒍᓯᐊᖓ ᐊᕐᕌᒍᓄᑦ ᐊᕐᕕᓂᓕᖕᓄᑦ ᐱᔭᕇᕋᓱᒃᓗᓂ ᑭᓯᐊᓂ ᒪᒥᓴᐃᓂᖅ ᐃᑲᔪᕐᖢᓂ ᑕᑯᓪᓗᓂᐅᒃ ᓱᒃᑲᓴᐅᔾᔪᐊᙱᖦᖢᓂ. ᑕᒪᓐᓇ ᐊᒃᓱᕈᕐᓗᓂ ᐱᓕᕆᓗᓂ ᐊᒻᒪᓗ ᐱᔪᒪᓂᖃᕐᓗᓂ ᑐᕌᒐᐅᔪᓂᒃ ᐱᔭᕇᖅᑕᐅᔪᓐᓇᖅᑐᖅ ᓇᒻᒥᓂᖅ ᐱᕕᒃᓴᖏᑎᒍᑦ.

ᐊᒻᒪᓗ ᐊᓯᐊ ᓴᖑᔾᔪᑎᒻᒪᕆᐅᓚᐅᖅᑐᖅ ᓄᓇᓯᐅᑎᒃᑯᑦ ᐱᕐᕈᓗᐊᕿᓂᕐᒧᑦ. 

"ᑐᑭᓯᐅᒪᓪᓚᕆᓚᐅᙱᓐᓇᒪ ᑕᒪᑐᒥᖓ, ᓄᓇᓯᐅᑎᓗ ᐱᕐᕈᓗᐊᕿᓂᖅ ᐱᐅᓛᒥᒃ ᐃᓅᓯᓐᓂ ᓴᖅᑭᑎᑦᑎᓚᐅᖅᐳᖅ, ᑭᓯᐊᓂᓗᑦᑕᐅᖅ ᐊᔪᕐᓇᖅᑐᒻᒪᕆᐅᓚᐅᖅᐳᖅ ᓅᑉᐸᓪᓕᐊᓪᓗᓂ ᐊᓂᒍᖅᑎᑦᑐᒪᓪᓗᒍ. ᓲᖃᐃᒻᒪ ᓄᓇᓯᐅᑎᒃᑯᑦ ᐱᕐᕈᓗᐊᕿᔪᖃᙱᑉᐸᑦ, ᐱᒋᐊᕋᔭᓚᐅᙱᑦᑐᖓ ᐅᑎᕐᑎᑕᐅᓗᖓ," ᐅᖃᖅᑐᕕᓂᖅ ᒧᐊᕈ.

ᑎᒥᒃᑯᑦ ᐋᓐᓂᖅᓯᒪᓗᐊᒧᑦ ᐊᒻᒪ ᐊᒃᓱᕈᖅᖢᓂ ᐃᒡᓗᖓᑕ ᓯᓚᑖᓄᑦ ᐊᒃᑐᐊᓇᓱᒃᖢᓂ. ᐊᒻᒪᓗ ᐊᒃᓱᕈᓕᓚᐅᖅᑐᖅ ᐱᐅᔪᒧᑦ ᓴᖅᑭᑦᑎᓪᓗᓂ ᐃᓄᖕᓄᑦ ᑐᓴᒐᒃᓴᓕᕆᓂᕐᒥᑦ ᓄᓇᓕᖕᓂᑦ ᐅᖃᐅᓯᖃᖅᖢᓂ ᐃᓄᖕᓂᑦ, ᖁᕕᐊᓲᑎᖃᖅᖢᓂ ᐊᓯᖏᓐᓂᑦ ᐃᓄᐃᑦ ᐅᓂᒃᑳᖅᑐᐊᖏᓐᓂᑦ.

ᒧᐊᕈ ᐅᖃᖅᐳᖅ ᑲᒪᒋᔭᒃᓴᖃᕐᓂᕐᒥᓂᒃ ᐊᒥᖅᑳᖃᑎᖃᕐᓂᕐᒥᒃ ᑕᒪᒃᑯᓂᖓ ᐅᓂᒃᑲᐅᓯᕐᓂᒃ ᑲᒪᒋᔭᖃᑦᑎᐊᕐᓗᓂ ᖁᐊᖅᓵᕐᓇᕈᓐᓇᕐᓗᓂᓗ. ᑕᐃᒃᑯᐊ ᐅᓂᒃᑳᖅᑐᐊᑦ ᐱᔪᓐᓇᕐᓂᖅᑖᖅᑎᑦᑎᖁᒐᓗᐊᖅᐸᖏᑦ ᐊᓯᒥᓂᒃ ᐃᓄᖕᓂᒃ ᑕᐅᑐᖅᑰᖅᑕᒥᓂᒃ ᐅᖃᐅᓯᖃᕈᓐᓇᖅᓯᖁᓪᓗᒋᑦ. 

"ᑮᓇᐅᔭᓕᐅᕐᓗᑎᑦ ᖃᓄᐃᓕᐅᕈᒪᔭᕐᓄᑦ, ᐱᒋᐊᖅᑎᑦᑎᔪᒪᒍᕕᓪᓗ ᐱᓕᕆᐊᒃᓴᕐᓂᑦ, ᐱᒋᐊᖅᑎᑦᑎᓗᑎᑦ ᐱᓕᕆᐊᒃᓴᑦᑎᐊᕙᖕᒥᑦ. ᐃᓱᒪᔪᖓᓕ ᐱᔪᒃᓯᑎᑦᑎᓛᖑᔪᖅ ᖃᐅᔨᒪᓪᓗᓂ ᐱᑕᖃᙱᓐᓂᖓᓂᒃ ᑭᐳᒥ," ᐅᖃᖅᑐᖅ ᒧᐊᕈ.

ᒧᐊᕈ ᐱᔭᕇᖅᓯᓯᒪᔪᖅ ᐱᔭᕇᕈᓯᐊᕐᒥᑦ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᕐᓂᕐᒧᑦ ᓂᕆᐅᒋᔭᖃᖅᓱᓂᓗ ᐱᕕᖃᑲᓐᓂᕐᓂᕐᒥᑦ ᐅᑎᕐᓂᕐᒧᑦ ᑲᑐᔾᔨᖃᑎᒌᒧᑦ. ᓂᕆᐅᒃᑐᖅ ᐅᓄᕐᓂᖅᓴᑦ ᐃᓄᐃᑦ ᐱᓇᓱᒃᓗᑎᒃ ᑐᕌᕆᓇᓱᒃᑕᖏᓐᓂ.

"ᖃᓄᐃᓕᐅᕈᒪᓇᔭᕋᓱᒋᓚᐅᕈᕕᑦ, ᒫᓐᓇ ᐆᒃᑐᕆᐊᖃᓕᖅᑕᐃᑦ ᐱᐅᙱᓛᖓ ᓴᖅᑭᑦᑐᓐᓇᙱᒻᒪᑦ. ᑭᓯᐊᓂ ᐃᓱᒪᐃᓐᓇᕐᓂᐊᖅᑐᑎᑦ ᖃᓄᐃᓕᖓᓂᐊᕐᒪᖔᑦ ᐆᒃᑐᙱᒃᑯᕕᐅᒃ," ᐅᖃᖅᑐᖅ ᒧᐊᕈ. 

ᖁᔭᓐᓇᒦᒃ ᐋᔅᑳᕐ ᐸᐃᑯᕐ III ᑎᑎᕋᕋᕕᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.