ᕆᑦᓱᑦ ᐆᔨᐳᐃ ᐊᒻᒪᓗ ᐊᓪᓚᑎᔅ ᐊᕐᓇᖅ ᐊᒻᒪᓗ ᐱᕈᖅᓴᓚᐅᖅᓯᒪᓪᓗᓂ ᑐᕌᓐᑐᒥ. ᐅᐃᓂᐸᒡᒥ ᐃᓅᓚᐅᖅᓯᒪᔪᖅ ᐅᑎᖅᖢᓂᓗ ᓄᓇᓕᐸᐅᔭᕐᒧᑦ ᐊᓈᓇᑦᑎᐊᖓ ᐃᓅᔪᓐᓃᓚᐅᖅᑎᓪᓗᒍ.

ᐃᖅᑲᓇᐃᔭᖅᖢᓂ, ᕆᑦᓱᑦ ᐅᖃᖅᐳᖅ '7−ᓂᒃ ᐃᖅᑲᓇᐃᔮᖃᖅᑰᔨᓂᖓᓂᒃ.' ᐊᕐᕌᒎᖕᓄᑦ ᒪᕐᕉᖕᓄᑦ, ᐱᓕᕆᖃᑎᖃᖃᑦᑕᖅᓯᒪᕗᖅ TakingITGlobal−ᒥᒃ ᖃᔅᓯᑲᓪᓚᖕᓄᑦ ᐱᓕᕆᐊᒃᓴᓄᑦ ᐃᓚᒋᔭᐅᓪᓗᓂ #RisingYouth ᐱᓕᕆᐊᖑᕙᒃᑐᖅ, ᐊᑕᖃᑦᑕᐅᑎᓂᖅ ᐅᑭᐅᖅᑕᖅᑐᒥ, ᓯᕗᓂᒃᓴᒥᓗ ᐊᖅᑯᓯᓂᕆᔭᐅᕙᒃᑐᓄᑦ, ᑕᒪᒃᑯᐊᓗ ᐱᓕᕆᐊᒃᓴᐃᑦ ᑐᕌᖓᑎᑕᐅᓪᓗᑎᒃ ᓯᕗᓂᒃᓴᑦᑎᐊᕙᓕᐅᕐᓂᐊᕐᓗᓂ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ.

ᓇᖕᒥᓂᖅ−ᐅᖃᐅᓯᖃᖃᑦᑕᓚᐅᖅᓯᒪᔪᖅ 'ᖃᖓᑕᓲᒃᑯᑦ ᐃᑲᔪᖃᑦᑕᖅᖢᓂ' ᐊᑭᓕᖅᓱᖅᑕᐅᙱᖦᖢᓂᓗ ᐃᑲᔪᖅᐸᓚᐅᖅᓯᒪᓪᓗᓂ ᓄᓇᓕᖕᓂ ᐱᓕᕆᐊᖑᕈᓘᔭᖅᑐᓄᑦ. ᕆᑦᓱᑦ ᐅᖃᖅᑐᖅ ᑖᒃᑯᐊ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᖃᑦᑕᖅᑐᑦ ᑐᓂᓯᓚᐅᖅᑐᑦ ᐊᔪᙱᓐᓂᕐᒥᖕᓂᒃ ᐃᓚᐅᖃᑕᐅᓂᕐᒧᑦ ᓄᑖᓂᒃ ᐊᒻᒪᓗ ᐱᓕᕆᔨᒻᒪᕆᐅᓂᕐᒧᑦ ᐱᕕᖃᕐᓂᐅᔪᓂᒃ.

"ᑕᐃᒪᓕ, ᐱᓕᕆᐊᖃᖅᐸᒃᐳᖓ ᐱᓕᕆᐊᖃᓕᕌᖓᒪ, ᐱᕙᒌᔭᐃᑎᓪᓗᖓ, ᓄᓇᖃᖅᑳᖅᑐᓄᑦ ᐱᓕᕆᐊᖑᔪᓄᑦ ᐊᐅᓚᑦᑎᕝᕕᖃᕐᓂᕐᒥᒃ, ᐱᕙᓪᓕᐊᔪᓕᕆᓂᕐᒥᒃ, ᑭᒃᑯᑐᐃᓐᓇᓂᒡᓗ ᐅᖃᓪᓚᖕᓂᕐᒥᒃ, ᐃᒪᓐᓇᐅᖅᑰᔨᓪᓗᓂᓗ, ᓇᓂᑐᐃᓐᓈᖏᓐᓇᐅᔭᖅᑰᔨᕗᖓ," ᑕᐃᒪᓐᓇ ᕆᑦᓱᑦ ᐅᖃᖅᖢᓂ.

ᐅᖃᕐᖢᓂ ᖃᓄᐃᓕᐅᕋᓗᐊᕈᓂ, ᑭᓱᓕᒫᑦ ᐅᑎᓲᑦ ᒪᓕᒃᖢᑎᒃ ᐊᓈᓇᑦᑎᐊᖓᑕ ᑐᒥᖏᓐᓂ ᐱᓕᕆᐊᖃᕐᖢᓂᓗ ᐱᐅᓯᒋᐊᖁᓪᓗᒍ ᓄᓇᓕᒃ.

ᕆᑦᓱᑦ ᐃᓕᓐᓂᐊᕐᓂᖓᓄᑦ ᐃᖏᕐᕋᓂᕆᔭᖓᑦ ᐊᔪᕐᓇᙱᑦᑐᑯᓘᓯᒪᙱᓚᖅ ᑖᔅᓱᒧᖓ.

ᐃᓕᓐᓂᐊᕐᕕᐊᓗᒻᒦᑎᓪᓗᒍ, ᐊᔅᓱᕈᐃᓐᓇᖅᐸᓚᐅᖅᑐᖅ ᐃᓕᓐᓂᐊᖅᑐᓂ ᐊᒻᒪ ᐅᖃᖅᑐᓂ ᐅᑎᖅᑐᓂ ᖃᓄᖅ ᓄᑲᖅᑎᐅᓂᕐᓴᓂ ᐃᓕᓐᓂᐊᖅᑐᓂ ᐊᒻᒪ ᖃᓄᖅ ᐊᔅᓱᕈᖃᑦᑕᓂᕐᒪᖔᖅ ᐃᓕᓐᓂᐊᖅᑐᓂ.

ᐃᕿᐊᙳᒐᔪᓚᐅᖅᑐᖅ ᐃᓕᓐᓂᐊᕐᕕᐊᕈᓯᕐᒥ ᖃᐅᔨᓴᕐᖢᓂᓗ ᓅᑦᑐᓐᓇᑐᐃᓐᓇᕆᐊᖃᕐᓂᕐᒧᑦ ᑐᓐᓂᖅᑯᓯᐊᒧᑦ ᐃᓕᑦᑎᓂᕐᒧᑦ ᐃᓕᓐᓂᐊᕐᕕᖕᒧᑦ, ᑭᓯᐊᓂ ᐱᔪᒪᙱᖦᖢᓂ ᐊᒻᒪ ᐋᖅᑭᒃᓯᒪᐃᓐᓇᕐᖢᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒧᑦ ᓄᖅᑲᕐᖢᓂ ᐱᖓᓱᐃᕐᖢᓂ.

"ᐃᓕᓐᓂᐊᑦᑎᐊᓚᐅᙱᓐᓇᒪ, ᐃᓕᓴᐃᔩᑦ ᐅᕙᓐᓂᒃ ᐱᕕᖃᖅᑎᑦᑎᔪᒪᐃᓐᓇᐅᔭᖅᑐᑦ. ᐅᑎᑐᐊᕌᖓᒪ ᑖᒃᑯᓂᖓ ᑭᑭᑕᐅᔪᓐᓇᖃᑦᑕᕐᓂᐊᖅᑐᖓ," ᕆᑦᓱᑦ ᐅᖃᖅᑐᖅ.

ᐱᔭᕇᓕᓚᐅᖅᑐᖅ ᐊᓈᓇᑦᑎᐊᒥᓂᒃ ᐊᓂᒍᐃᓚᐅᖅᑎᓪᓗᒍ, ᐅᖃᖅᖢᓂᓗ 'ᖁᕕᐊᓱᖕᓂᕋᖅᖢᓂ ' 'ᖁᕕᐊᓱᖕᓂᕋᖅᖢᓂ' ᓯᓚᑦᑐᖅᓴᕐᕕᒡᔪᐊᕐᒧᐊᖅᖢᓂᐅᒃ. ᐅᖃᖅᖢᓂ ᐊᒃᓱᕈᕐᓇᕐᓂᖓᓂᒃ ᕿᓂᕐᓂᕋᖅᖢᓂ, ᐊᒻᒪ ᓇᖕᒥᓂᖃᕐᓂᕐᒧᑦ ᐃᓕᓐᓂᐊᕐᕕᖕᒧᐊᖅᖢᓂ ᐅᑎᒧᑦ ᑕᑯᒋᐊᓚᐅᖅᓯᒪᙱᖦᖢᓂ.

"ᓯᕗᓪᓕᖅᐹᒥ ᐱᔪᒪᓚᐅᖅᓯᒪᕗᖓ ᓂᐅᕐᕈᑎᖃᕋᓱᖕᓂᕐᒥᒃ ᒪᓂᓴᐅᑎᓂᒡᓗ, ᑭᓯᐊᓂ ᓇᖕᒥᓂᖃᕐᓂᕐᒧᑦ ᐃᓕᓐᓂᐊᕐᕕᖕᒧᐊᑐᐊᕋᒪ, ᐃᓕᓐᓂᐊᓕᓚᐅᖅᐳᖓ ᓄᓇᖃᖅᑳᖅᓯᒪᔪᑦ ᐱᕙᓪᓕᐊᔪᓕᕆᓂᕐᒥᒃ ᐊᒻᒪᐃᓛᒃ ᐋᖅᑭᒃᓯᑐᐃᓐᓇᖅᖢᖓ ᐃᖏᕐᕋᓂᕆᓵᖅᑕᓐᓂᒃ ᑕᐃᒪᙵᓂᒃ," ᕆᑦᓱᑦ ᐅᖃᖅᑐᖅ.

ᕆᑦᓱᑦ ᐊᒥᓱᓂᒃ ᑐᓗᖅᑕᕈᑎᖃᖃᑦᑕᖅᓯᒪᔪᖅ ᐅᓪᓗᒥᒧᑦ ᑎᑭᖦᖢᒍ, ᐅᖃᖅᖢᓂᓗ ᒪᒃᑯᒃᑐᑦ ᐊᕐᕌᒍᖏᑦ ᐊᒃᓱᕈᖃᑦᑕᓚᐅᕐᓂᖏᓐᓂᒃ ᐊᒃᓱᕈᐃᓐᓇᖅᐸᒃᖢᑎᒡᓗ, ᐋᖅᑭᒃᓱᐃᓪᓗᑎᒃ ᖃᔅᓯᑲᓪᓚᖕᓂᒃ ᐱᓕᕆᐊᒃᓴᓂᒃ ᐃᓚᖃᖅᑐᓂᒃ ᐊᖏᕐᕋᖃᙱᖦᖢᓂ ᐊᓂᒍᐃᓪᓗᓂᓗ ᐃᔅᓯᕙᐅᑕᑯᑖᓂ ᓯᓂᖃᑦᑕᕐᓂᕐᒧᑦ ᐊᒻᒪᓗ ᒪᒃᑯᒃᑐᒃᑯᕕᖕᒦᖏᓐᓇᕐᓂᕐᒧᑦ.

"ᑕᐃᒫᒃ ᐃᓅᓯᕐᒦᑎᓪᓗᑎᑦ ᐊᒻᒪᓗ ᐊᖕᒪᓗᖅᓯᓯᒪᔪᒦᒃᑯᕕᑦ, ᐊᕙᓗᔭᐅᓯᒪᕗᑎᑦ ᖃᐅᑕᒫᑦ, ᑕᑯᓪᓚᑦᑖᖃᑦᑕᙱᖦᖢᓯ ᖃᓄᖅ ᐱᐅᑎᒋᖕᒪᖔᑦ," ᐅᖃᖅᑐᖅ ᕆᑦᓱᑦ.

ᐊᓈᓇᑦᑎᐊᖓ ᐃᓅᔪᓐᓃᕐᒪᑦ, ᓂᕆᐅᖕᓂᖃᕈᓐᓃᓚᐅᖅᑐᖅ ᐊᒻᒪᓗ ᑕᑯᙱᖦᖢᓂ ᓯᓚᑦᑐᖅᓴᕐᕕᒡᔪᐊᑉ ᐃᓂᖓᓂᒃ, ᐃᖅᑲᓇᐃᔮᖃᖅᖢᓂ, ᐊᓯᒃᑲᓐᓂᖏᓐᓂᒡᓗ. ᓄᓇᓯᐅᑎᒃᑯᑦ ᐱᕐᕈᓗᐊᕿᓪᓗᓂ ᐃᓱᒪᖓ ᐊᓯᔾᔨᖅᑐᒻᒪᕆᐅᓚᐅᖅᐳᖅ.

"ᐃᓱᒪᓚᐅᖅᑐᖓ '20-ᑐᐃᓐᓇᐅᓇᓱᒋᓪᓗᖓ ᑐᖁᓐᓂᕈᒪᓗ ᓄᓇᓯᐅᑎᒃᑯᑦ ᐱᕐᕈᓗᐊᕿᑎᓪᓗᖓ, ᑕᐃᒪᓕ ᑭᓱᒥᒃ ᐱᔾᔪᑎᖃᕋᔭᓚᐅᖅᐳᖓ 20-ᓄᑦ ᐊᕐᕌᒍᓄᑦ ᐊᓈᓇᑦᑎᐊᓐᓄᑦ, ᑭᓱᓕᒫᑦ ᐃᓕᓐᓂᐊᖅᑎᓚᐅᖅᑕᖏᑦ ᐊᒻᒪ ᑭᓱᓕᒫᑦ ᐅᕙᓐᓄᑦ ᐱᓕᕆᓚᐅᖅᑕᖓᑦ?' ᑕᐃᒪᓕ, ᑕᒪᓐᓇ ᐅᕙᓐᓄᑦ ᓴᖑᔾᔪᑎᒋᓕᓚᐅᖅᑕᕋ."

ᐊᒻᒪᓗ ᐅᖃᐅᔾᔭᐅᒋᐊᕈᓐᓇᕈᓂ ᓄᑲᖅᑎᐅᓂᕐᓴᒧᑦ, ᐃᓕᒃᑲᔭᖅᑐᖅ ᑭᓪᓕᒋᔭᕐᓂᒃ ᐊᒻᒪᓗ ᖃᓄᐃᒐᓂ ᐋᒡᒑᕐᓗᓂ ᑭᓱᑐᐃᓐᓇᕐᒧᑦ ᐊᒻᒪᓗ ᐃᑉᐱᒋᔭᐅᑦᑎᐊᕆᐊᖃᕋᕕᑦ.

"ᐅᓄᖅᑐᓂᒃ ᐃᓱᒪᓕᐅᕆᓇᔭᓚᐅᖅᑐᖓ ᐊᔾᔨᒋᙱᑕᖓᓂᒃ ᖃᐅᔨᒪᓵᕈᒪ ᐋᒃᑳᕈᓐᓇᖅᑐᑎᑦ ᑲᒪᒋᔭᐅᑦᑎᐊᕆᐊᖃᖅᖢᑎᓪᓗ," ᐅᖃᖅᑐᖅ ᕆᑦᓱᑦ.

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.