ᓯᕗᓪᓕᕐᒥ ᑲᔪᓯᑦᑎᐊᙱᒃᑯᕕᑦ, ᐆᒃᑐᒃᑲᓐᓂᕐᓗᑎᑦ. ᑕᒪᓐᓇ ᐃᓕᒍᑕᐅᕗᖅ ᐅᓂᒃᑳᒃᑯᑦ ᐸᐃᓕ ᔮᓐᓴᓐᒧᑦ. ᕗᕆᑎᔅ ᑲᓚᒻᐱᐊᒥᙶᖅᑐᖅ ᑖᒻᓴᓐ ᐅᑲᓈᒐᓐᒥ, ᑕᐃᑲᓂ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ. ᓯᕗᓪᓕᖅᐹᒥ ᐊᕐᕌᒍᒥ ᐃᓕᓴᐃᔨᐅᓪᓗᓂ, ᐃᖅᑲᓇᐃᔭᖅᑐᖅ ᒍᕋᐃᑦ 5-ᒥ ᐃᓪᓗᕈᓯᕐᒥ ᕚᓐᑰᕙᒥ. ᖁᕕᐊᓱᖃᑎᖃᖅᐳᖅ ᖃᓄᖅ ᐱᑐᐃᓐᓇᕆᐊᖃᓕᕐᓂᕐᒥᓂᒃ ᐅᑎᕐᓂᐊᕐᓗᓂ ᐃᓕᓴᐃᓗᓂᓗ ᐊᖏᕐᕋᕆᔭᒥᓂ ᓄᓇᓕᖕᒥᓂ. 

ᐃᓕᓐᓂᐊᕐᕕᕐᔪᐊᕐᒨᓚᐅᖅᑐᖅ, ᓯᓚᑦᑐᓴᕐᕕᕐᔪᐊᕐᒨᓚᐅᖅᑐᖅ. ᐊᐅᓚᓂᖃᓚᐅᖅᑐᖅ ᖃᓪᓗᓈᖑᖃᑎᒌᓄᑦ ᐱᕕᒃᓴᕆᑎᑕᐅᔪᓂᑦ ᐊᒻᒪᓗ ᐃᒃᐱᒍᓱᒃᖢᓂ ᐊᒃᓱᕈᕐᓇᕐᓂᖓᓂᒃ ᐅᐊᓕᓂᕐᒥᑦ ᐱᓕᕆᔾᔪᓯᕐᒧᑦ ᐊᔭᐅᕆᓪᓗᓂ ᖁᑦᑎᖕᓂᖅᓴᒥᑦ ᐃᓕᓐᓂᐊᕐᓂᕐᒥᑦ ᓱᒃᑲᓕᓗᐊᕐᓂᕐᒧᑦ. ᐃᓱᒪᒋᓗᐊᓚᐅᙱᒻᒪᒍ ᕿᒡᒋᓗᐊᖅᑐᓂᓗ. ᓯᓚᑦᑐᓴᕐᕕᕐᔪᐊᕐᒥᑦ ᐊᒃᓱᕈᖅᑎᑕᐅᓕᓚᐅᖅᑐᖅ ᐊᒻᒪᓗ ᓯᕗᓪᓕᖅᐹᒥ ᐊᕐᕌᒍᒥ ᖃᐅᔨᓴᖅᑐᓕᕆᓂᕐᒥᑦ ᐊᐅᓚᓂᖃᑦᑎᐊᓚᐅᓐᖏᓚᖅ. ᐱᓱᑲᑕᕈᓘᔭᓚᐅᖅᑐᖅ, ᓇᓗᓪᓗᓂ ᖃᓄᐃᓕᐅᕆᐊᒃᓴᖅ ᐃᓅᓯᖓᓂ, ᐃᓱᒪᓪᓗᓂ ᓯᓚᑦᑐᖅᓴᕐᕕᒃ ᓈᒻᒪᖕᒪᖔᑦ ᑖᔅᓱᒧᖓ ᐊᒻᒪ ᐃᓂᑕᖃᕐᒪᖔᑦ ᐃᓂᒋᔭᖓᓂ.

ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕈᑎᓄᑦ ᐅᖃᐅᔾᔨᒋᐊᖅᑎᖓ ᐅᖃᐅᔾᔨᓚᐅᖅᑐᖅ NITEP ᒥᒃᓵᓄᑦ, ᓄᓇᖃᖅᑳᖅᓯᒪᔪᑦ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᖅ. ᓯᕗᓪᓕᕐᒥ, ᖃᐅᔨᒪᓚᐅᙱᑦᑐᖅ ᐃᓕᓴᐃᔨᙳᕈᒪᖕᒪᖔᑦ, ᓲᖃᐃᒻᒪ ᐸᕐᓇᒃᓯᒪᓚᐅᖅᓯᒪᙱᒻᒪᑦ. ᓇᓗᓇᖅᑐᒦᑲᐃᓐᓇᖅᑐᓂ, ᑲᔪᓯᔪᒪᓕᓚᐅᖅᑐᖅ ᐊᒻᒪᓗ ᑭᖑᒧᑦ ᑕᑯᒋᐊᓚᐅᖅᓯᒪᓇᓂ. "ᑕᒪᕐᒥᑦᑎᐊᖅ ᓯᓚᑦᑐᖅᓴᕐᕕᒡᔪᐊᒥ ᐊᑐᖃᑦᑕᖅᓯᒪᔭᒃᑲ ᐊᓯᔾᔨᓚᐅᖅᐳᑦ, ᐱᐅᒋᓕᓚᐅᖅᖢᒍᓗ ᐃᓄᒐᓴᒡᔪᐊᓄᑦ ᐃᓕᓐᓂᐊᕈᑕᐅᕙᒃᑐᓄᑦ," ᐃᓱᒪᓪᓗᓂ ᖁᔭᓕᓪᓗᓂ ᖃᓄᖅ ᑕᒪᓐᓇ ᐱᓕᕆᐊᒃᓴᖅ ᐊᓯᔾᔨᖅᓯᓚᐅᕐᒪᖔᑦ ᐃᓅᓯᖓᑕ ᐊᖅᑯᓯᓂᖓᓂᒃ. 

ᔮᓐᓴᓐ ᓅᒻᒪᑦ ᐱᓕᕆᐊᒧᑦ, ᓇᓂᓯᓚᐅᖅᑐᖅ ᐃᑲᔪᖅᑐᐃᓂᕐᒥᑦ ᓇᓂᓯᓂᕐᒥᑦ ᖃᓄᖅ ᐊᒻᒪᓗ ᐅᖃᐅᓯᖃᖅᑐᓂ ᐱᔭᕆᐊᖃᕐᑕᖏᓐᓂᑦ. ᐅᐊᓕᓂᕐᒥᑦ−ᑐᙵᕕᓕᒃ ᓯᓚᑦᑐᖅᓴᕐᕕᒡᔪᐊᒥᑦ ᐊᑐᓚᐅᖅᑕᖓ ᓅᓚᐅᖅᐳᖅ ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑕᐅᕙᓪᓕᐊᓂᖏᓐᓄᑦ, ᑕᒪᓐᓇᓗ ᑲᔪᓯᓂᖃᑦᑎᐊᕈᑎᒋᓚᐅᖅᖢᓂᐅᒃ. ᑲᔪᖏᖅᓴᐃᔨᖃᕐᖢᓂ ᐱᓕᕆᐊᖓᓂ ᐱᙳᐊᕐᓂᕐᒧᑦ−ᑭᐳᒍᑎᓪᓗᓂ ᐃᓕᑦᑎᓪᓗᓂᓗ ᐊᐅᓚᑦᑎᓂᕐᒥᒃ ᑎᔅᓯᓈᕿᓂᕐᒥᒃ. ᑭᖑᓪᓕᖅᐹᒥ, ᖃᐅᔨᓪᓗᓂ ᐱᕕᖃᕈᓐᓇᕐᓂᕐᒥᓂᒃ, ᐃᑲᔪᖅᑕᐅᔪᒪᓗᓂ ᐊᓂᒍᐃᓗᓂᓗ ᑐᓗᕈᑎᓂᒃ ᖁᓱᙱᓪᓗᑎᒃ ᑐᒃᓯᕋᕆᐊᒃᓴᖅ ᐱᑕᖃᖅᑐᓂᒃ ᐱᔭᕆᐊᖃᖅᑕᖏᓐᓂ. ᔮᓐᓴᓐ ᓂᕆᐅᒃᑐᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᖃᐅᔨᓗᑎᒃ ᐊᒥᓱᓂᒃ ᐊᑐᐃᓐᓇᐅᔪᓂᒃ ᐱᑕᖃᕐᓂᖓᓂᒃ ᐃᑲᔪᕐᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ, ᐃᓕᓴᐃᓂᕐᓂ, ᖃᓄᐃᙱᑦᑎᐊᕐᓂᕐᒥ ᐊᑐᕋᓲᑎᓂᒃ, ᐃᓂᖃᕐᓂᖅ ᐃᓕᑦᑎᓂᕐᒧᑦ ᐃᑲᔪᒃᑲᓐᓂᕐᓂᕐᒧᓪᓗ ᐊᖅᑯᑎᒃᑯᑦ.

ᐃᓕᓐᓂᐊᕐᕕᐅᑉ ᓯᓚᑖᓂ, ᐃᓕᓴᐃᖃᑦᑕᕐᒥᔪᖅ ᔫᒐᒥᒃ. ᑕᒪᓐᓇ ᐱᓚᐅᖅᑕᖓ ᓯᓚᑦᑐᖅᓴᕐᕕᒡᔪᐊᒥ ᐊᒃᓱᕉᑎᖃᓚᐅᖅᑎᓪᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ. ᔫᒐᒥᑦ ᐃᓕᓐᓂᐊᓚᐅᖅᑐᖅ ᖃᐅᔨᓪᓗᓂᓗ ᐊᑑᑎᖃᖕᓂᖏᓐᓂᑦ ᒫᓐᓇᒧᑦ, ᐃᓱᒫᓘᑎᒥᓂᒃ ᐅᖃᐅᓯᖃᖅᖢᓂ ᐊᐅᓚᑦᑐᓐᓇᙱᑕᖏᓐᓂᑦ. ᓂᑲᒋᔭᐅᓚᐅᖅᑐᖅ ᐊᒻᒪᓗ ᐊᒥᓱᐊᖅᑎᖅᑐᓂ ᐃᓕᓴᐃᔨᕈᕈᒪᓕᓚᐅᖅᑐᖅ. ᔮᓐᓴᓐ ᐃᓕᓴᐃᖃᑦᑕᕋᓗᐊᖅᑎᓪᓗᒍ ᐃᓕᓐᓂᐊᕐᕕᖕᒥ, ᑲᔪᓯᑎᑦᑎᓪᓗᓂ ᔫᒐᒥᒃ ᐊᑐᕋᓱᒃᐸᒃᑕᒥᓂᒃ ᐅᐃᒪᙱᖦᖢᓂ, ᐱᓕᕆᐊᒃᓴᖃᕐᔪᐊᕐᖢᓂ ᐃᖅᑲᓇᐃᔮᒥᒃ ᐆᒻᒪᕆᖕᓇᖅᑐᒥᒃ.  

ᐃᓱᒪᒋᓪᓗᒍ ᖃᓄᖅ ᕿᒪᐃᓚᐅᕐᒪᖔᑦ ᒥᑭᑦᑐᒥᒃ ᐅᑲᓇᒐᓐ ᓄᓇᓕᖕᒥ ᓅᖦᖢᓂᓗ UBC−ᒧᑦ, ᐅᖃᐅᔾᔨᒋᐊᕈᑎᖃᖅᑐᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓄᑦ ᐃᓱᒪᒋᔭᖃᖅᑐᓂᒃ ᐊᔾᔨᕐᓚᖓᓂᒃ ᐃᖏᕐᕋᓂᕐᒥᒃ. ᓅᑉᐸᓪᓕᐊᓂᖅ ᐊᖏᔪᒧᑦ ᐃᓂᒋᔭᐅᕙᒃᑐᒧᑦ ᐊᒃᓱᕈᕐᓇᓚᐅᖅᐳᖅ, ᐃᓄᑑᑎᑕᐅᓪᓗᓂ ᐱᓕᕆᖃᑦᑕᖅᓯᒪᓂᑰᓪᓗᓂ, ᑕᐃᒪᐃᓐᓂᖓᓄᓪᓗ ᐃᒪᓐᓇᐅᖁᔨᕗᖅ, ᐱᔪᒃᓯᓂᕆᔭᐃᑦ ᐱᓇᔪᒡᕕᒋᔪᒪᓗᒍᓗ ᓄᓇᓕᖕᓂ ᐋᖅᑭᒃᓯᒪᓂᕆᔭᐅᔪᓂ ᐊᑕᓂᕆᔭᐅᔪᓂᒃ ᐋᖅᑭᒃᓱᐃᓂᐊᕐᓗᓂ. ᐱᓕᕆᖃᑎᒌᒍᓯᖏᑦ ᓴᓇᖃᑦᑕᓚᐅᖅᑕᖏᑦ ᐃᖢᕐᕆᓐᓇᕐᓂᖅᓴᐅᓚᐅᖅᐳᑦ ᐊᑐᐃᓐᓇᐅᓂᖅᓴᐅᓪᓗᑎᒡᓗ ᐊᒻᒪ ᓇᖕᒥᓂᖅ ᐊᖏᕐᕋᖅᓯᒪᑦᑎᐊᓕᖅᖢᓂ ᓄᓇᖃᖅᑳᖅᓯᒪᔪᑦ ᐃᒡᓗᖓᓐᓂ ᐃᓕᓐᓂᐊᕐᓂᕐᒧᑦ, ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᐃᓕᓐᓂᐊᕐᕕᖓᓐᓂ. ᐃᓕᓐᓂᐊᖃᑎᒥᓂᒃ ᐱᖃᑎᖃᖅᖢᓂ, ᓯᓚᑦᑐᖅᓴᕐᕕᒡᔪᐊᖅ ᐊᑦᑕᕐᓇᙱᓐᓂᖅᓴᐅᖅᑰᔨᓚᐅᖅᐳᖅ ᐊᒻᒪ ᐃᓕᕋᓇᙱᓐᓂᖅᓴᐅᓪᓗᓂ. ᓄᓇᓕᕈᓚᐅᖅᑐᖅ ᐱᔭᕆᐊᖃᓚᐅᖅᑕᖓ ᐊᒻᒪᓗ ᓂᕆᐅᑦᑐᓂ ᐊᑦᔨᖓᓂᒃ ᓇᓂᓯᓂᐊᕆᐊᔅᓴᖅ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᐃᒃᑲᔭᖅᑐᖅ, "ᐃᓅᓯᓕᒫᑎᑦ ᖃᐅᔨᔭᕆᐊᖃᙱᑕᑎᑦ. … ᐃᖏᕐᕋᓂᕆᔭᐅᔪᖅ ᐊᔾᔨᕐᓚᒋᙱᒻᒪᒍ. ᖃᓄᐃᓕᐅᕐᓗᑎᑦ ᓯᕗᓪᓕᐅᔾᔨᓂᕐᒥᑦ ᐊᑕᖏᑦᓯᐊᖅᑐᒥᑦ ᖃᓄᐃᖏᑦᓯᐊᕐᓂᕐᒧᑦ... ᒪᑐᐃᙶᕐᓗᑎᑦ ᐊᔪᓕᕐᓂᐊᕐᓂᕐᓂ... ᐊᑐᕐᓗᒍᓗ ᐱᕕᒃᓴᐅᓗᓂ ᐱᕈᖅᐸᓪᓕᐊᓗᓂ ᐱᕕᖃᖅᑎᓪᓗᒍᓗ ᐃᑲᔪᕐᓗᑎᑦ ᐊᖅᑯᑎᒋᓂᐊᖅᑕᕐᓂᒃ ᓲᖃᐃᒻᒪ ᐊᔪᕐᓂᐅᔪᖅ ᐊᔪᕐᓇᕐᒪᑦ. ᐱᓇᔪᑐᐃᓐᓇᕐᓗᑎᑦ ᐊᒻᒪ ᓴᐱᓕᖅᓴᕋᐃᙱᓐᓂᔅᓯᓐᓂᒃ ᓇᓂᓯᓗᑎᑦ." ᑎᓕᐅᕆᓇᔭᕐᖢᓂ ᐃᖕᒥᓂᒃ ᓄᖅᑲᖓᑎᑕᐅᙱᓪᓗᓂ ᐱᕕᒃᓴᓄᑦ ᐱᔨᑦᑎᙱᑦᑐᓄᑦ ᐊᒻᒪ ᐱᓕᕆᓗᓂ ᓇᖕᒥᓂᖅ ᐱᕕᒃᓴᖏᓐᓂ ᓱᓕᓂᖅᓴᐅᓪᓗᓂ. 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ ᐃᓕᓴᐃᔨᐅᓪᓗᓂ ᐅᖓᑖᓄᑦ ᔫᒐ ᐊᑐᕋᓱᒃᐸᒃᑕᖓᓂ, ᓇᓂᓯᓪᓗᓂ ᓴᐃᓕᓐᓇᖅᑐᒥᒃ ᓄᓇᓕᖕᒥ, ᐱᖃᑎᖃᕐᓂᕐᓂ, ᐱᑕᖃᖅᑐᓂ, ᐊᒃᑐᐊᓂᖃᕐᖢᓂ ᐊᖏᕐᕋᖓᑕ ᓄᓇᓕᖓᓄᑦ ᐅᖃᓪᓚᒃᓗᓂᓗ ᐊᖕᒪᓗᖅᓯᓯᒪᔪᓂ. ᓯᓚᑖᓃᙶᖅᑐᓂᒃ ᐱᓕᕆᔨᖃᕐᓂᖅ ᐃᑲᔫᑎᖃᖅᓯᒪᔪᖅ ᐊᒻᒪᓗ ᓇᓂᓯᓯᒪᓪᓗᓂ ᓯᓚᑖᓂᒃ ᐃᓱᒪᒋᔭᐅᔪᓂᒃ. ᑎᒥᖓ ᐊᐅᓚᔾᔭᒃᑎᑉᐸᓪᓕᐊᓗᒍ ᐃᑲᔪᖅᐸᒃᐳᖅ ᕿᓄᐃᓵᕐᓂᕐᒥᒃ ᓇᓂᓯᔪᓐᓇᖅᖢᓂᓗ ᐃᖅᑲᓇᐃᔭᕐᓂᕐᒥᒃ−ᐃᓅᓯᕐᒥᒃ ᓇᓕᒧᒌᒃᑎᑦᑎᓂᕐᒥᒃ.  

ᑲᔪᖏᖅᓴᐃᔭᕆᐊᖃᓕᕌᖓᑦ, ᐃᓕᓴᐃᔨᓂᒃ ᑕᐅᑐᖃᑦᑕᖅᐳᖅ ᐃᓅᓯᖓᓂ. ᐃᓕᓴᐃᔨᖏᑦ ᐃᓕᓴᐃᔨᐅᓂᕐᒧᑦ ᐱᓕᒻᒪᒃᓴᕐᓂᖃᓚᐅᖅᑐᑦ, ᐱᓕᕆᐊᕆᔭᖏᑦ ᐊᒻᒪᓗ ᖃᓄᖅ ᐊᒃᑐᐃᓂᖃᖅᓯᒪᖕᒪᖔᑕ ᐱᔪᒃᓯᑎᑦᑎᔾᔪᑎᒋᔭᒥᓂᒃ ᓯᕗᒻᒧᐊᒃᐸᓪᓕᐊᖏᓐᓇᕐᓂᕐᒧᑦ. "ᐊᒃᓱᕈᕋᓱᖃᑦᑕᖅᑐᖓ ᐅᓪᓗᕐᒥ ᐊᑕᐅᓯᕐᒥ," ᖁᖓᑉᐸᒃᖢᓂ. 

ᐃᓚᖓ ᐊᖏᓛᖑᔪᖅ ᐃᓕᓐᓂᐊᒐᒃᓴᖅ ᐃᓕᓴᐃᔨ ᐸᐃᓕ ᔮᓐᓴᓐ ᐃᓕᑦᑎᓪᓗᓂ ᓯᕗᓪᓕᕐᒥ ᑲᔪᓯᑦᑎᐊᙱᒃᑯᕕᑦ, ᐆᒃᑐᒃᑲᓐᓂᕐᓗᑎᑦ. ᓯᕗᓪᓕᖅᐹᒥ ᐊᕐᕌᒍᒥ ᖃᐅᔨᓴᖅᑐᓕᕆᓂᕐᒥᑦ ᑲᔪᓯᓚᐅᙱᑦᑐᖅ ᑭᓯᐊᓂ ᐊᖅᑯᑎᑖᓚᐅᖅᑐᖅ ᓄᑖᒧᑦ ᐸᕐᓇᐅᑎᒧᑦ: ᐃᓕᓴᐃᓂᖅ ᐃᓕᓐᓂᐊᕐᕕᐊᕈᓯᕐᒥᑦ ᐊᒻᒪ ᔫᒐ ᓴᓇᙳᐊᕐᕕᖕᒥᑦ. ᐊᓇᐅᑖᓂ ᐃᓕᓐᓂᐊᖃᑎᒥᓂᒡᓗ, ᐃᓕᓐᓂᐊᓚᐅᖅᑐᖅ ᓄᖅᑲᖓᓚᐅᑲᑐᐃᓐᓇᙱᖦᖢᓂ ᓴᒃᑯᐃᔪᓐᓇᖅᖢᓂᓗ ᐃᓱᒫᓘᑎᓂᒃ ᓂᕆᐅᒋᔭᓂᒡᓗ ᑕᓯᓯᔪᓐᓇᕐᓂᐊᕐᒪᑦ ᐱᕕᖃᕈᓐᓃᕐᓗᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

‍