"ᓂᕈᐊᓚᐅᖅᓯᒪᙱᑦᑐᖓ, ᐅᖃᐃᓐᓇᐅᔭᖅᐳᖓ, ᑕᐃᒪᐃᓕᓚᐅᖅᐳᖓ," ᐅᓂᒃᑳᖅᐳᖅ ᐱᐅᕆ ᐸᐃᓐ. ᕼᐃᐊᕚᑕ ᓄᓇᖃᖅᑳᖅᓯᒪᔪᖅ ᐋᓐᑎᐅᕆᐅ ᓂᒋᖅᐸᓯᐊᓂ ᑭᓯᐊᓂ ᐱᕈᖅᓴᓂᑰᔪᖅ ᑐᕌᓐᑐᒥ, ᐱᕈᖅᓴᔭᐅᓪᓗᓂ ᐊᓈᓇᒋᔭᐅᔪᒧᑦ ᐅᐃᖃᙱᖦᖢᓂ ᓴᓇᕝᕕᖕᒥ ᐃᖅᑲᓇᐃᔭᖅᖢᓂ. ᐊᓈᓇᖓᑕ ᐃᓕᓐᓂᐊᖅᑎᓚᐅᖅᓯᒪᔭᖓ ᐃᒻᒥᒃᑰᕈᓐᓇᕐᓂᕐᒥᒃ ᐊᒻᒪ ᐅᐱᒍᓱᖕᓂᕐᒥᒃ ᑭᓇᐅᓂᕐᒥᓂᒃ. ᐊᔾᔨᒌᙱᑦᑑᑎᓂᒃ ᓄᓇᖃᖅᖢᓂ, ᐃᓕᑦᑎᓚᐅᖅᐳᖅ ᐃᓅᖃᑎᖃᕐᓂᕐᒥᒃ ᐃᓄᖕᓂᒃ ᓇᑭᙶᕈᓘᔭᖅᑐᓂᒃ. 

ᐃᖅᑲᓇᐃᔭᖅᖢᓂ ᒪᒃᑯᒃᑑᑎᓪᓗᒍ, ᐸᐃᓐ ᐊᒃᓱᕈᖃᑦᑕᓚᐅᖅᐳᖅ ᑭᓯᐊᓂ ᓂᐅᕐᕈᑎᒃᓴᓕᕆᔨᙳᕋᒥ. ᓯᕗᓪᓕᕐᒥ ᐊᔪᐃᓐᓇᖅᖢᓂ ᐊᔪᙱᓐᓂᖃᕐᓂᕐᒧᑦ ᖃᐅᔨᓴᖅᑕᐅᓂᖓᓂᒃ, ᓵᓚᖃᓚᐅᖅᐳᖅ ᐱᓇᔪᐃᓐᓇᕐᓂᕐᒥᓄᑦ ᐃᖅᑲᓇᐃᔮᖅᑖᖅᖢᓂᓗ ᐱᑦᓂ ᕘᔅᒧᑦ. ᐱᕚᓪᓕᓚᐅᖅᐳᖅ ᐊᔪᙱᑦᑎᐊᖅᖢᓂᓗ, ᓅᖦᖢᓂ Canon-ᒧᑦ, ᖁᕝᕙᓯᖕᓂᖅᓴᒧᑦ, ᑭᖑᓂᐊᒍᓪᓗ Xerox-ᒧᑦ. ᓅᖦᖢᑎᒃ ᓂᐅᕐᕈᑎᖃᖅᐸᖕᓂᕐᒧᑦ ᐱᓕᕆᕝᕕᒋᔭᐅᕙᒃᑐᒧᑦ ᑕᒪᓐᓇᓗ ᓅᖦᖢᓂ ᓯᕗᓪᓕᖅᐹᑦᑎᐊᒥ ᓇᖕᒥᓂᖅ−ᐃᖅᑲᓇᐃᔭᕐᓂᕐᒧᑦ ᐱᓕᕆᓂᐅᕙᒃᑐᒧᑦ. ᐃᓄᓕᕆᔨᑐᖃᒃᑯᓐᓄᑦ ᐅᐸᒍᑎᓚᐅᖅᐳᖅ ᓴᓂᕐᕙᒃᑕᐅᓯᒪᔪᑎᒍᑦ ᐱᓕᕆᐊᒃᑯᑦ ᓄᓇᖃᖅᑳᖅᓯᒪᔪᑦ ᓇᖕᒥᓂᖁᑎᖏᓐᓄᑦ ᓴᓂᕐᕙᐃᓯᒪᓪᓗᑎᒃ ᐃᓚᖏᓐᓂᒃ ᓂᐅᕕᖅᑕᖏᓐᓂᒃ ᐱᓕᕆᖃᑎᖃᕐᓂᐊᕐᓗᑎᒃ ᓄᓇᖃᖅᑳᖅᓯᒪᔪᑦ ᑲᒻᐸᓂᖏᓐᓂᒃ ᐊᒻᒪ ᓂᐅᕐᕈᑎᖃᖅᐸᓪᓕᐊᓕᖅᖢᓂ ᒐᕙᒪᒃᑯᓐᓄᑦ.

"ᓯᓚᑦᑐᖅᓴᕐᕕᒡᔪᐊᒧᐊᕐᓂᖅ ᖃᐅᔨᕚᓪᓕᕈᑎᒋᓚᐅᖅᑕᕋ ᐃᓕᓐᓂᐊᕐᓂᖅ ᐃᓅᓯᓕᒫᒧᑦ ᐃᖏᕐᕋᓂᐅᖕᒪᑦ."

ᐃᓕᓐᓂᐊᖅᑎᑕᐅᓯᒪᓪᓗᓂ ᖃᐅᑕᒫᑦ ᐊᑐᖅᓯᒪᔭᒥᒍᑦ, ᐃᓅᖃᑎᖃᖅᐸᒃᖢᓂ ᑲᔪᓯᓂᖃᑦᑎᐊᖅᑐᓂᒃ ᐊᒻᒪ ᐱᔪᒪᓂᖃᑦᑎᐊᖅᑐᓂᒃ, ᐅᖃᓕᒫᖅᐸᒃᖢᓂ ᑲᔪᖏᖅᓴᐃᓂᕐᒧᑦ ᐅᖃᓕᒫᒐᕐᓂᒃ ᐊᒻᒪ ᓈᓚᒃᐸᒃᖢᓂ Amway ᓂᐱᓕᐅᖅᓯᒪᔪᓂᒃ. ᐸᐃᓐ ᐃᓕᓐᓂᐊᓚᐅᖅᓯᒪᖕᒥᔪᖅ ᔪᐊᒃ ᓯᓚᑦᑐᖅᓴᕐᕕᒡᔪᐊᕐᒥ ᐊᕐᕌᒍᓄᑦ 7-ᓄᑦ ᑭᓯᐊᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᙱᑦᑐᖅ. ᐊᓂᒍᐃᑦᑎᐊᓚᐅᖅᐳᖅ ᐱᓇᔪᖕᓂᕐᒥᒍᑦ ᐱᓇᔪᖕᓂᕐᒥᒍᓪᓗ, ᐃᖏᕐᕋᕙᒃᖢᓂ ᐃᑲᕐᕋᓄᑦ ᑎᓴᒪᓄᑦ ᖃᐅᑕᒫᑦ ᐋᑐᕚᒧᑦ ᐊᕐᕌᒍᒐᓴᖕᓄᑦ. ᓇᖕᒥᓂᕆᔭᒥᓂᒃ ᐱᕈᖅᑎᑦᑎᓇᓱᒃᖢᓂ, ᐃᓕᓐᓂᐊᖅᑎᑦᑎᓚᐅᖅᐳᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᓇᖕᒥᓂᖅ ᐊᑐᐊᒐᖏᓐᓂᒃ ᐊᒻᒪ ᖃᐅᔨᓴᕐᔪᐊᖅᐸᒃᖢᓂ ᐸᕐᓇᐃᓂᕐᒧᑦ ᑲᑎᒪᓂᐅᓛᖅᑐᓄᑦ. ᖃᑕᙳᑎᖏᑦ ᑐᑭᓯᓚᐅᙱᒃᑲᓗᐊᖅᑎᓪᓗᒋᑦ ᓇᖕᒥᓂᖅ ᐱᓕᕆᔪᒪᓂᖓᓂᒃ, ᖁᕕᐊᓱᑦᑎᐊᓚᐅᖅᐳᖅ ᓂᐅᕕᖅᑕᐅᔪᓕᒫᓂᒃ ᐊᒻᒪ ᐱᔪᒪᓂᖃᑦᑎᐊᖅᖢᓂ ᐃᓗᒥᒍᑦ. 

ᐸᐃᓐ ᐱᕚᓪᓕᕐᔪᐊᓚᐅᖅᐳᖅ ᑐᓴᕋᒥ ᐃᓄᓕᕆᔨᑐᖃᒃᑯᑦ ᑎᑎᕋᕐᕕᖕᒥ ᓴᓇᒃᑲᓐᓂᓕᕐᓂᖏᓐᓂᒃ ᐊᒻᒪ ᐱᓕᕆᖃᑎᖃᖅᖢᓂ ᐃᒡᓗᒥᐅᑕᓂᒃ ᓴᓇᕙᒃᑐᓂᒃ ᑕᒪᑐᒧᖓ ᐊᖏᕈᑎᒧᑦ. ᑭᖑᓂᐊᒍᑦ, $8 ᒥᓕᐊᓐᓂᒃ ᑳᓐᑐᕌᒃᑖᓚᐅᖅᐳᖅ ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᓐᓄᑦ. ᓂᐅᕐᕈᑎᖃᓕᓚᐅᖅᐳᖅ ᓇᑉᐸᖓᓂᒃ ᐃᒡᓗᒥᐅᑕᓂᒃ ᐃᒡᓗᒥᐅᑕᓂᒃ ᓄᓇᖃᖅᑳᖅᓯᒪᙱᑦᑐᓄᑦ ᑲᒻᐸᓂᒋᔭᐅᔪᒧᑦ ᓱᒃᑲᓕᔪᒥᒡᓗ ᐊᖏᒡᓕᕚᓪᓕᓚᐅᖅᐳᖅ. ᐃᖅᑲᓇᐃᔭᖅᑎᑦᑎᓚᐅᖅᐳᖅ 15-ᓂᒃ ᐊᒻᒪ ᐱᖓᔪᒋᔭᐅᓕᖅᖢᓂ ᐊᖏᓛᖑᓪᓗᓂ ᐱᖃᖅᑎᑦᑎᔨᐅᓪᓗᓂ ᒐᕙᒪᑐᖃᒃᑯᓐᓄᑦ $20 ᒥᓕᐊᓐᓂᒃ ᐊᕐᕌᒍᒧᑦ ᓂᐅᕐᕈᑕᐅᕙᒃᑐᓄᑦ. ᐊᑦᑎᖅᓯᑦᑎᐊᓚᐅᖅᐳᖅ ᓇᖕᒥᓂᕆᔭᒥᓂᒃ ᓯᕗᓪᓕᖅᐸᐅᑎᑕᐅᓂᐊᕐᒪᑦ ᑎᑎᕋᖅᓯᒪᔪᓂ ᓂᐅᕕᖅᐸᒃᑐᓄᑦ ᐱᓕᕆᔨᓄᑦ ᐊᑐᖅᑕᐅᓇᔭᖅᑐᓂᒃ. ᐱᒋᐊᖅᑎᑦᑎᓚᐅᕆᕗᖅ ᐃᖅᑲᓇᐃᔭᖅᑎᒃᓴᖅᓯᐅᖅᑎᓂᒃ ᑲᒻᐸᓂᒥᒃ ᐊᔾᔨᒌᙱᕈᓘᔭᖅᑐᓂᒃ ᐱᓕᕆᔪᒪᔭᒥᓂᒃ, ᐱᓕᕆᖃᑎᒋᕙᒃᑕᒥᓂᒃ ᐱᖃᑎᖃᓕᖅᖢᓂ ᐊᐅᓚᑦᑎᓂᐊᖅᑐᓂᒃ ᐊᒡᓚᕝᕕᓕᕆᔾᔪᑎᓂᒃ ᐊᓕᐊᓇᐃᒋᙱᑕᒥᓂᒃ. 

ᐊᕐᕌᒍᓂ ᐊᓂᒍᖅᑐᓂ, ᐸᐃᓐ ᐊᒥᓱᓄᑦ ᑲᑐᔾᔨᖃᑎᒌᒃᑐᓄᑦ ᓇᖕᒥᓂᕆᔭᐅᔪᓄᑦ ᐃᓚᐅᓪᓗᓂ ᐃᒪᕐᒥᒃ ᓂᐅᕕᐊᒃᓴᖃᕐᓂᖅ, ᐃᓅᓕᓴᐅᑎᑦ, ᐊᒻᒪ ᐊᕙᑎᒥᒃ ᖃᐅᔨᓴᕐᓂᖅ. ᐱᓕᕆᐊᖃᒃᑲᓐᓂᓕᓚᐅᖅᐳᖅ ᐱᓕᕆᐊᒃᓴᓪᓗᐊᑕᖏᓐᓂᒃ ᐊᒻᒪ ᑐᓴᐅᒪᖃᑎᒌᒍᑎᓂᒃ ᖃᐅᔨᒪᓂᐊᕋᒥ ᓈᒻᒪᒃᑐᓂᒃ ᐃᓄᖕᓂᒃ ᐱᓕᕆᐊᒃᓴᓂᒃ ᓴᖅᑭᑦᑐᖃᕌᖓᑦ. ᐃᓐᓇᐅᓗᐊᓕᕋᒥ ᐃᕿᐊᙳᓕᖅᖢᓂᓗ, ᒐᕙᒪᑐᖃᒃᑯᑦ ᐱᓕᕆᐊᒃᓴᖅᑖᖅᑎᓚᐅᖅᓯᒪᔭᖓ ᓄᓇᖃᖅᑳᖅᑐᓂᒃ ᐊᒻᒪ ᑲᒻᐸᓂᐅᔪᓂᒃ ᐱᓕᕆᖃᑎᖃᖃᑦᑕᕈᒪᓪᓗᓂ ᒐᕙᒪᑐᖃᒃᑯᓐᓂ ᑳᓐᑐᓛᒋᔭᐅᔪᓂᒃ.

ᑕᒪᕐᒥᑦᑎᐊᖅ ᑐᓴᐅᒪᖃᑎᒌᖕᓂᖅ ᐱᓕᕆᖃᑦᑕᖅᓯᒪᓂᑰᓂᕐᓗ ᒐᕙᒪᒃᑯᓐᓂ ᓂᐅᕕᖃᑦᑕᕐᓂᕐᒧᑦ ᐊᑑᑎᖃᓚᐅᖅᐳᖅ ᐊᒻᒪ ᐸᐃᓐ ᑐᓂᓯᔪᓐᓇᓚᐅᖅᐳᖅ ᖃᐅᔨᒪᓂᕆᔭᒥᓂᒃ ᐃᑲᔪᕈᒪᓪᓗᓂ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᑲᔪᓯᑦᑎᐊᖁᓪᓗᒋᑦ. "ᐅᓇ ᖁᕕᐊᓇᕐᓂᖅᐹᖑᕗᖅ ᐃᓂᒋᓚᐅᖅᓯᒪᔭᓐᓂ. ᐊᕐᕌᒍᒐᓴᖕᓄᑦ ᑕᐃᒪᐃᓕᐅᖃᑦᑕᓕᓚᐅᖅᐳᖓ, ᓲᖃᐃᒻᒪ ᖃᐅᔨᒪᓂᕆᔭᓐᓂᒃ ᐊᒥᖅᑳᖃᑎᖃᕈᒪᑦᑎᐊᓚᐅᕋᒪ. ᑭᓯᐊᓂᓕ ᒫᓐᓇ ᐊᑭᓕᖅᑕᐅᕙᖕᒥᔪᖓ, ᑕᒪᓐᓇᓗ ᐱᐅᔪᒻᒪᕆᐅᓪᓗᓂ," ᖁᕕᐊᓱᒃᑐᖅ.  "ᐅᕙᓐᓄᓪᓕ, ᑮᓇᐅᔭᑐᐃᓐᓇᕐᒨᖓᙱᓚᖅ, ᑭᓯᐊᓂᓕ ᖁᕕᐊᓱᖕᓂᕐᒥᒃ ᐃᓅᓯᕐᒥᒃ. ᑮᓇᐅᔭᖅ ᖃᓄᐃᓕᐅᕈᓐᓇᖅᑎᑦᑎᕗᖅ ᐃᓅᓯᕐᓂ, ᑭᓯᐊᓂ ᐃᓅᓯᕆᔭᐃᑦ ᖁᕕᐊᓱᙱᒃᑯᓂ, ᖃᓄᖅ ᑐᑭᖃᖅᐸ ᑮᓇᐅᔭᖅ? ᑮᓇᐅᔭᖅ ᐅᕙᓐᓄ ᐃᖏᕐᕋᔾᔪᑕᐅᓚᐅᙱᓚᖅ, ᓴᖅᑭᑐᐃᓐᓇᓚᐅᖅᐳᖅ ᓲᖃᐃᒻᒪ ᑕᐃᒪᐃᓚᐅᕐᓂᓐᓂ ᖃᓄᐃᓕᐅᓚᐅᕐᓂᓐᓂ," ᐅᖃᒃᑲᓐᓂᖅᐳᖅ.

ᐃᖏᕐᕋᓂᖃᑦᑎᐊᖏᓐᓇᐅᔭᙱᓚᖅ ᐸᐃᓐᒧᑦ. ᓄᓇᓯᐅᑎᒃᑯᑦ ᐱᕐᕈᓗᐊᕿᓪᓗᓂ, ᓂᐅᕐᕈᑕᐅᕙᒃᑐᑦ ᓱᒃᑲᐃᒡᓕᕚᓪᓕᖅᖢᑎᒃ ᓯᒃᑭᑖᕈᓐᓇᐃᓪᓕᓪᓗᓂ ᑕᖅᑭᓄᑦ 6-ᓄᑦ ᐃᒡᓗᖃᕈᓐᓃᖅᖢᓂᓗ ᐃᓕᑦᑎᕚᓪᓕᕈᑎᒋᓚᐅᖅᐸᖓ ᐊᔾᔨᒌᙱᕈᓘᔭᖅᑐᓂᒃ ᐱᓕᕆᖃᑎᖃᕈᓐᓇᕐᓂᕐᒥᒃ ᐊᒻᒪ ᓇᖕᒥᓂᖅ ᓂᐅᕐᕈᑎᖃᖅᑎᐅᙱᖦᖢᓂ. ᐃᓕᑦᑎᓚᐅᖅᐳᖅ ᖃᓄᖅ ᑮᓇᐅᔭᖅᑖᕈᓐᓇᕐᓂᕐᒥᒃ, ᐃᓱᒪᒃᓴᖅᓯᐅᕈᓐᓇᕐᓂᕐᒥᒃ ᐊᒻᒪ ᐊᑲᐅᙱᓕᐅᕈᑎᓂᒃ ᐋᖅᑭᒃᓯᔪᓐᓇᕐᓂᕐᒥᒃ. ᐃᓱᒪᒋᑐᐃᓐᓇᖅᐸᓚᐅᖅᑕᖏᑦ ᐱᓂᐊᕐᓂᖃᑦᑎᐊᕐᓂᖏᑦ ᐃᓄᐃᑦ ᐱᓕᕆᖃᑎᒋᕙᒃᑕᖏᑦ ᒫᓐᓇᓗ ᐅᓂᒃᑲᐅᓯᖃᖅᐸᒃᖢᓂ ᐊᑐᖅᓯᒪᔭᒥᓂᒃ ᐃᑲᔪᕈᒪᓪᓗᓂ ᐊᓯᒥᓂᒃ ᓇᖕᒥᓂᖅ ᓂᕈᐊᕈᓐᓇᑦᑎᐊᖁᓪᓗᒋᑦ. ᐃᓱᒪᒋᓪᓗᒋᑦ ᐊᒃᓱᕈᕐᓇᖅᑐᑦ ᐊᒻᒪ ᐊᓯᐅᔨᓂᕆᓚᐅᖅᑕᖏᑦ ᐅᖃᓚᐅᖅᐳᖅ, "ᐃᓕᑦᑎᔾᔪᑕᐅᔪᐃᓐᓇᐅᕗᑦ. ᐃᓄᐃᑦ ᓯᓚᑦᑐᓴᕐᕕᔾᔪᐊᕐᒨᖅᐸᑦᑐᑦ ᐊᒻᒪᓗ ᐊᑯᓂᐊᓗᒃ ᐊᑐᖅᐸᑦᑐᑎᒃ ᐊᒻᒪᓗ ᑮᓇᐅᔭᓂᒃ ᐊᒻᒪᓗ ᐊᑭᓕᒃᓴᖃᓕᖅᑐᑎᒃ $80-100,000-ᓂᒃ. ᑖᓐᓇᓕ ᓯᓚᑦᑐᖅᓴᕐᕕᒡᔪᐊᕆᓚᐅᕋᒃᑯ."

"ᐊᓯᑎᑦ ᑲᒪᒋᕙᒡᓗᒋᑦ ᑲᒪᒋᔭᐅᔪᒪᓇᔭᕐᓂᕐᓂᒃ. ᑕᒪᓐᓇ ᓯᕗᓪᓕᖅᐹᖑᕗᖅ ᑲᔪᓯᑦᑎᐊᕐᓂᕐᒧᑦ." 

ᐃᓕᓚᐅᖅᑕᖓ ᐊᕐᕌᒍᓂ ᐊᓂᒍᖅᑐᓂ ᓂᐅᕕᐊᒃᓴᓂᒃ ᖃᐅᔨᒪᓂᖅ ᐱᒻᒪᕆᐅᙱᓐᓂᖅᓴᖅ ᓂᐅᕕᐊᒃᓴᖃᕐᓂᕐᒥᒃ ᓂᐅᕕᖅᐸᒃᑐᓂᒃ ᐱᒻᒪᕆᐅᓂᖓᓂᒃ ᐱᓕᕆᖃᑎᖃᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᓇᖕᒥᓂᖁᑎᖏᓐᓂᒃ. ᐅᑯᓇᙵᑦ ᒐᕙᒪᑐᖃᒃᑯᓐᓂ ᐊᒻᒪ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᒐᕙᒪᐅᔪᓂ ᐊᒻᒪ ᑯᐊᐳᕇᓴᓂ ᕿᓂᖅᑐᓂ ᐱᓕᕆᖃᑎᖃᕐᓂᕐᒥ ᓄᓇᖃᖅᑳᖅᓯᒪᔪᓂ ᓇᖕᒥᓂᕆᔭᐅᔪᓂ, ᑕᑯᕗᖅ ᐊᒥᓱᓂ ᐱᕕᒃᓴᐅᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᕚᓪᓕᕈᓐᓇᕐᓂᖏᓐᓂ. ᐃᑲᔪᖅᑐᖅᑕᐅᓯᒪᕗᖅ ᑲᓇᑕᒥ ᑲᑎᒪᔨᓂᑦ ᓄᓇᖃᖅᑳᖅᑐᓄᑦ ᓇᖕᒥᓂᕆᔭᐅᔪᓄᑦ ᐊᒻᒪᓗ ᑲᓇᑕᒥᐅᓄᑦ ᓄᓇᖃᖅᑳᖅᑐᓄᑦ ᐊᒻᒪᓗ ᐅᓄᙱᓐᓂᖅᓴᓄᑦ ᐱᖁᑎᖃᖅᑎᑦᑎᕙᒃᑐᓄᑦ ᑲᑎᒪᔨᓄᑦ. 

"ᐊᓯᔾᔨᕈᓐᓇᙱᑕᕗᑦ ᐅᑭᐅᑦ 200 ᐊᓂᒍᖅᓯᒪᓕᖅᑐᑦ, ᑭᓯᐊᓂ ᐊᓯᔾᔨᕈᓐᓇᖅᑕᕗᑦ ᑭᖑᓪᓕᖅ."

ᓯᓚᑖᓂ ᐃᖅᑲᓇᐃᔮᖓᑕ ᑎᓕᐅᕆᓪᓗᓂ ᓄᓇᖃᖅᑳᖅᓯᒪᔪᑦ ᐃᓚᐅᓂᖏᓐᓂᒃ ᒐᕙᒪᒃᑯᑦ ᓂᐅᕕᖃᑦᑕᕐᓂᖏᓐᓄᑦ, ᐊᓯᐊᑦᑕᐅᖅ ᐊᒃᑐᖅᓯᓯᒪᖕᒥᔪᖅ ᐱᔪᒃᓯᑎᑦᑎᓂᕐᒥᒃ ᓄᓇᖃᖅᑳᖅᑐᓂᒃ ᓇᖕᒥᓂᕆᔭᐅᔪᓂᒃ ᐅᑯᑎᒎᓇᖅ, Junior Achievement. ᓇᑉᐸᖏᑦ ᐃᓚᐅᖃᑕᐅᔪᑦ ᐱᓕᕆᐊᖏᓐᓂ ᓇᖕᒥᓂᖅᑖᖅᐸᓪᓕᐊᓲᖑᕗᑦ ᐃᓅᓯᖏᓐᓂ ᓂᕆᐅᒃᐳᕐᓗ ᐃᓕᓐᓂᐊᒐᒃᓴᖅ ᐃᒃᐱᒋᔭᖃᕐᓂᖅᓴᐅᓂᐊᕐᓂᖓᓂᒃ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᑕᑯᕙᒃᑐᓄᑦ ᓄᓇᖃᖅᑳᖅᓯᒪᔪᓂᒃ ᓇᖕᒥᓂᕆᔭᐅᔪᓂᒃ ᑲᑎᙵᖃᑎᒋᔪᓐᓇᖅᑕᖏᓐᓂᒃ. ᑖᒃᑯᓇᙵᑦ ᓇᖕᒥᓂᕆᔭᐅᔪᓂᒃ ᓂᕆᐅᒃᐳᖅ ᐊᔪᖅᓴᙱᓐᓂᕐᒥᒃ ᓴᖅᑭᑎᑦᑎᓂᕐᒥᒃ ᐊᔪᖅᓴᙱᓐᓂᐅᙱᖔᕐᓗᑎᒃ, ᐱᓗᐊᙳᐊᖅᑐᒥᒃ ᐃᓱᒪᒋᓪᓗᒋᑦ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᑕ ᑭᒡᓕᓯᓂᐊᖅᓯᒪᔭᖏᑦ ᑮᓇᐅᔭᓕᒫᑦ ᐊᑐᖅᑕᐅᔪᑦ ᓄᓇᓕᖕᓂ ᑮᓇᐅᔭᓕᐅᕈᑕᐅᒃᑲᓐᓂᖅᐸᖕᓂᖏᓐᓂᒃ $3.00-ᑲᓐᓂᕐᓂᒃ. ᐊᑐᓕᖁᔨᔾᔪᑎᒋᔭᖓ ᒪᒃᑯᒃᑐᓄᑦ ᐋᖅᑭᒃᓱᐃᕙᓪᓕᐊᓗᑎᒃ ᖃᕆᑕᐅᔭᒃᑯᑦ ᐊᔪᙱᓐᓂᖃᑦᑎᐊᕐᓂᕐᒥᒃ ᐊᒻᒪᓗ ᐃᒻᒥᓂᒃ ᑐᑭᓕᕇᓕᕐᓗᑎᒃ ᓇᖕᒥᓂᖅᑖᖅᐸᓪᓕᐊᓂᕐᒧᑦ ᖁᕕᐊᒋᔭᒥᓂᒃ ᐱᓕᕆᓗᑎᒃ. 

ᐊᒥᓱᓕᐅᕈᑎᓂᒃ ᓂᐅᕕᐊᒃᓴᖃᖃᑦᑕᓕᓚᐅᖅᓯᒪᔪᖅ, ᓇᖕᒥᓂᖅᑖᖅᐸᓪᓕᐊᓪᓗᓂ ᒐᕙᒪᒃᑯᓐᓄᑦ ᓂᐅᕐᕈᑎᖃᖅᐸᒃᖢᓂ ᐊᒻᒪ ᑭᖑᓂᐊᒍᑦ ᐊᑭᓖᕙᒃᖢᓂ ᑕᑯᑎᑦᑎᓪᓗᓂ ᐊᓯᒥᓂᒃ ᖃᓄᖅ ᐃᔾᔪᐊᖅᓯᔪᓐᓇᕐᒪᖔᑦ ᑲᔪᓯᑦᑎᐊᕐᓂᕆᓚᐅᖅᑕᒥᓂᒃ. ᐱᐅᕆ ᐸᐃᓐ ᐃᓕᑦᑎᓚᐅᖅᐳᖅ ᖃᓄᖅ ᒐᕙᒪᒃᑯᑦ ᐊᑐᐊᒐᖏᓐᓂᒃ ᐊᐅᓚᑦᑎᔪᓐᓇᕐᓂᕐᒥᒃ, ᑐᓴᐅᒪᖃᑎᒌᑦᑎᐊᕐᓂᕐᒥᒃ ᐊᒻᒪ ᑲᑐᔾᔨᖃᑎᒌᒃᑐᓂᒃ ᓴᖅᑭᑦᑎᔪᓐᓇᕐᓂᕐᒥᒃ ᐃᒻᒥᓄᑦ ᐱᓕᕆᖃᑎᒋᔭᖏᓐᓄᓪᓗ. ᐃᓅᓯᓕᒫᕐᒥᓂ ᐃᓕᑦᑎᕙᓪᓕᐊᖏᓐᓇᖅᑐᖅ ᐊᓂᒍᐃᓚᐅᙱᑦᑐᖅ ᓯᕗᓪᓕᕐᒥ ᐊᔪᙱᓐᓂᕐᒧᑦ ᖃᐅᔨᓴᕈᑎᒥᒃ ᑭᓯᐊᓂ ᓵᓚᖃᓚᐅᖅᑐᖅ ᐱᔪᒪᓂᖃᑦᑎᐊᖅᖢᓂ, ᓇᓂᓯᓚᐅᖅᐳᖅ ᐱᔪᒪᓂᖃᑦᑎᐊᕐᓂᕐᒥᒃ ᐃᓗᒥᒍᑦ ᐊᔪᐃᓐᓇᕈᒪᓪᓗᓂ ᐃᑲᔪᕈᒪᓪᓗᓂᓗ ᐊᓯᖏᓐᓂᒃ ᓄᓇᖃᖅᑳᖅᑐᓂᒃ ᓵᓚᖃᕋᓱᐊᕐᓂᕐᒥᒃᑕᐅᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.