"ᖃᐅᔨᒪᔪᒍᑦ ᖁᐊᖅᓵᖅᓯᒪᓂᕐᒥᑦ. ᖃᐅᔨᒪᔪᒍᑦ ᐋᓐᓂᐊᓂᕐᒥᒃ. ᑭᓯᐊᓂᑦᑕᐅᖅ, ᓴᙱᔪᓂᒃ ᐃᓄᖕᓂᒃ," ᐊᔅᐳᕋ ᐋᖁᐊᖅ, ᑕᑯᒃᓴᐅᑎᑦᑎᓪᓗᓂ ᓴᙱᓂᕆᔭᖓᓂᒃ ᐃᓄᐃᑦ ᐱᐅᓯᑐᖃᖏᓐᓂᒃ. ᐊᑎᖓ ᐃᓅᓪᓗᓂ ᐹᐱ ᐊᒻᒪᓗ ᑲᑕᔾᔭᖅᑎᐅᓪᓗᓂ, ᒎᓕᓯᒥ, ᒥᖅᓱᖅᑎ, ᕿᓚᐅᔾᔭᖅᑎᐅᔪᖅ ᑕᕐᕆᔭᓕᐅᖃᑦᑕᖅᑐᖅ ᓴᓂᕌᓂ. ᐃᖃᓗᐃᑦ ᐃᓕᓐᓂᐊᓚᐅᖅᑐᖅ ᑕᑯᒥᓴᐅᑎᓂᒃ ᐊᒻᒪᓗ ᓴᕕᕋᔭᓕᕆᓂᕐᒥᒃ ᐊᕐᕌᒎᓐᓄᑦ ᒪᕐᕉᓐᓄᑦ ᐃᓕᓐᓂᐊᖅᑐᓂ, ᑲᔪᓯᓪᓗᓂ ᐊᕐᕌᒍᒃᑲᓂᕐᒧᑦ ᒎᓗᓯᐅᕐᓂᕐᒧᑦ. ᐃᓗᐊᖅᓴᐃᔨᐅᓂᕐᒧᑦ ᐃᓕᓐᓂᐊᓯᒋᐊᓚᐅᙱᓐᓂᖓᓂ, ᐃᓕᓐᓂᐊᓚᐅᖅᓯᒪᖕᒥᔪᖅ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐊᕐᕌᒍᒧᑦ ᐊᒻᒪ ᐊᓯᔾᔨᖅᐸᓪᓕᐊᓂᕐᒧᑦ ᐊᕐᕌᒍᒥ ᐃᓕᓐᓂᐊᓚᐅᖅᓯᒪᓪᓗᓂ ᑖᓪᕼᐊᐅᓯᒥ. 

"ᖃᐅᔨᒪᔪᒍᑦ ᖁᐊᖅᓵᖅᓯᒪᓂᕐᒥᑦ. ᖃᐅᔨᒪᔪᒍᑦ ᐋᓐᓂᐊᓂᕐᒥᒃ. ᑭᓯᐊᓂᑦᑕᐅᖅ, ᓴᙱᔪᓂᒃ ᐃᓄᖃᖅᐳᒍᑦ."

ᒫᓐᓇᐅᔪᖅ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᑎᐅᔪᖅ ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕈᓯᐊᖅᑖᕋᓱᐊᖅᑐᓂ. ᐃᓗᐊᖅᓴᐃᔨᙳᕆᐅᖅᓴᓂᖅ ᐊᒃᓱᕈᕐᓇᖅᑑᓚᐅᖅᐳᖅ, ᓱᒃᑲᓴᖅᖢᓂ ᐱᔭᕆᐊᖃᖅᖢᓂ ᖁᑦᑎᒃᑐᒦᖏᓐᓇᖁᓪᓗᒍ. ᐱᓕᕆᔪᒻᒪᕆᐅᓚᐅᖅᐳᖅ ᐊᒥᓱᓂᒃ ᖃᐅᔨᓴᖅᑐᓂ ᑭᓯᐊᓂ ᖃᐅᔨᓚᐅᖅᐳᖅ ᐊᑑᑎᖃᖅᑐᒻᒪᕆᐅᒋᐊᖓ. ᐋᖁᐊᖅ ᐱᔪᒃᓯᑎᑕᐅᓕᓚᐅᖅᑐᖅ ᑕᐅᓄᙵᕆᐊᒃᓴᖅ ᐅᖄᓚᐅᑎᒃᑯᑦ ᐃᓅᓯᓕᕆᔨᐅᓪᓗᓂ 20-ᖏᓐᓂ. ᑕᒪᓐᓇ ᐊᑐᓚᐅᖅᑕᖓ ᐃᓱᒪᓕᕆᔨᕈᕈᒪᓚᐅᕐᒪᑦ ᐊᒻᒪᓗ ᐱᓕᕆᐊᖃᓪᓗᐊᑕᖅᑐᓂ ᑎᑎᖅᑐᒐᕐᓂᕐᒧᑦ. 

ᐱᕈᖅᓴᓪᓗᓂ, ᐊᑖᑕᖓ ᐃᖅᑲᓇᐃᔭᓚᐅᖅᓯᒪᔪᖅ ᓄᓇᑦᓯᐊᑉ ᐃᒡᓗᓕᕆᔨᕐᔪᐊᒃᑯᖏᓐᓄᑦ ᓄᓇᑦᓯᐊᕐᒥ ᓄᓇᕗᒻᒥᓗ ᓄᓇᖃᓚᐅᖅᓯᒪᓪᓗᓂ. ᐊᕐᕌᒍᓄᑦ 20-ᓄᑦ, ᐃᖃᓗᒻᒥᐅᑕᐅᓚᐅᖅᑐᖅ ᐊᒻᒪᓗ ᓯᕗᓂᐊᒍᑦ ᔫ ᐅᖅᑑᒦᓚᐅᖅᓯᒪᒻᒪᑦ, ᓄᐊᒪᓐ ᐅᐃᓪᔅ ᐊᒻᒪᓗ ᐃᖃᓗᒃᑑᑎᐊᖅ, ᐃᓚᐃᓐᓇᖏᑦ ᑕᐃᓪᓗᒋᑦ. ᐊᑯᐊᖅ ᑲᑕᔾᔭᕈᓐᓇᖅᓯᓚᐅᖅᐳᖅ ᒥᑭᑦᑐᒥ ᓄᓇᓕᖕᓂ ᓄᓇᕗᑦ ᐊᒻᒪ ᒫᓂᑑᐸ ᑭᒡᓕᖓᑕ ᑭᒡᓕᖓᒍᑦ. ᐱᖃᓐᓇᕆᔭᖓ ᐃᓕᓐᓂᐊᖅᑎᒍᒪᓚᐅᖅᑕᖓ ᐱᓱᒃᑎᓪᓗᒋᑦ ᐊᖏᕐᕋᒧᑦ ᓂᕆᓐᓇᒥ. 50-ᓂᒃ ᓯᓚᕈᔫᑎᓪᓗᒍ, ᐳᕙᖏᑦ ᐋᓐᓂᓇᖅᑐᑎᒃ, ᐃᓕᓐᓂᐊᓚᐅᖅᑐᖅ ᓴᓇᐅᒐᕐᒥᒃ. 

ᑕᐃᒪᓐᖓᓂᓪᓕ, ᐊᓯᖏᑦ ᐊᕐᓇᐃᑦ ᐃᑲᔪᖅᓯᒪᔪᑦ ᑲᑕᔾᔭᕈᓐᓇᖅᓯᓪᓗᓂ ᐊᒻᒪᓗ ᖃᐃᖁᔭᐅᓯᒪᓪᓗᓂ ᐃᓐᖏᖁᔭᐅᓪᓗᓂ Hollywood producer-ᒧᑦ. "ᓇᔭᒋᖅᑰᔨᓕᖅᑕᐃᑦ ᑲᑕᔾᔭᖅᑎᙳᕈᕕᑦ ᓲᖃᐃᒻᒪ ᐃᓕᑦᑎᑐᐃᓐᓇᖃᑦᑕᕋᕕᑦ ᐊᔾᔨᒌᙱᑦᑐᓂᒃ ᐃᙱᐅᑎᓂᒃ ᐊᔾᔨᒌᙱᑦᑐᓂᒃ ᓄᓇᓕᖕᓂᙶᖅᑐᓂᒃ. ᐊᒻᒪᓗ ᐄ, ᑕᒪᓐᓇ ᑲᑕᔾᔭᕐᓂᖅ. ᐱᙳᐊᑦᑎᐊᖅᑐᕐᔫᔮᖅᑐᖅ. ᐅᑎᖅᑕᕋᐅᔭᖅᑐᖅ ᐊᒻᒪ ᑭᓇᑐᐃᓐᓇᖅ ᐃᒡᓚᖅᑐᖅ ᐊᓯᐅᔨᖅᑳᓲᖅ ᑖᔅᓱᒥᖓ ᐱᓂᑭᓴᐅᑎᓂᕐᒥᒃ," ᓇᓗᓇᐃᖅᓯᓪᓗᓂ. ᑖᓐᓇ ᓇᔭᖓ ᐅᑭᐅᖅᑕᖅᑐᒦᙶᖅᑐᖅ ᐅᓛᓴ, ᐊᓛᔅᑲ, ᔫᑳᓐ, ᓄᓇᑦᓯᐊᖅ, ᓄᓇᕗᑦ, ᓛᐸᑐᐊ, ᑯᐸᐃᒃ ᑕᕐᕋᖓᓂ ᐊᒻᒪ ᑲᓛᖦᖡᑦ ᓄᓈᓐᓂ. "ᓇᒥᑐᐃᓐᓈᖅᑐᒍᑦ ᐊᒻᒪ ᑲᑕᔾᔭᕐᓂᒃᑯᑦ ᑲᑎᙵᖃᑎᒌᒃᐳᒍᑦ ᐊᒻᒪ ᖁᕕᐊᓇᖅᐳᖅ ᑕᐃᒪᐃᓐᓇᔭᕋᑦᑕ," ᑲᔪᓯᓪᓗᓂ. 

ᐃᖃᓗᖕᓄᑦ ᓅᒻᒪᑦ 16-ᒥ ᑲᑕᔾᔭᖅᑎᓄᑦ ᓲᕐᓗ ᓛᑯᓗᒃ, ᑲᓛᖦᖡᑦ ᓄᓈᓐᓂ ᐱᙳᐊᖅᑎᐅᔪᖅ ᑮᓇᕐᒧᑦ ᒪᑐᐊᕐᒥᒃ ᒧᒥᖅᑐᖅ. ᑲᑕᔾᔭᖅᑎᒃᑲᓐᓂᖅ ᓯᐅᓪᕕᐊ ᑯᓘᑦᑎᐊ ᓄᓇᕕᖕᒥᙶᖅᑐᖅ ᓛᑯᓗᒃ. ᐹᓖᓐ ᖃᔮᖅ ᐊᖅᑯᐊᑉ ᑲᑕᔾᔭᖅᑎᖓ ᐱᖃᑎᒋᓪᓗᓂᐅᒃ ᓅᕙ ᓯᑰᓴᒥ ᐊᒻᒪ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐱᖃᓐᓇᕆᔭᖃᕐᔪᐊᓚᐅᖅᑐᖅ ᐊᔪᕈᓐᓃᖅᓴᖅᑐᓂᒃ. ᑐᓴᐅᒪᖃᑎᒌᖏᓐᓇᓲᑦ ᐅᖓᓯᒌᒃᑲᓗᐊᖅᖢᑎᒃ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᔪᓄᑦ ᕿᒪᐃᔪᒪᓪᓗᑎᒃ ᓄᓇᓕᖕᒥᓂᒃ ᐃᓕᓐᓂᐊᕈᒪᓗᑎᒃ ᐃᖅᑲᓇᐃᔮᖃᕈᒪᓗᑎᒡᓘᓐᓃᑦ ᓇᓂᓯᔪᒪᓂᐅᕗᖅ ᐱᐅᔪᒥᒃ ᐃᑲᔪᖅᑐᐃᓂᕐᒧᑦ ᐊᑐᖅᑕᐅᕙᒃᑐᒥᒃ. ᓄᓇᖃᖅᑳᖅᓯᒪᔪᓄᑦ ᖃᐅᔨᓴᕐᓂᕐᒧᑦ ᐱᓕᕆᕝᕕᒃ ᓄᑖᒥ ᓯᓚᑦᑐᖅᓴᕐᕕᔾᔪᐊᕐᒥᑦ ᐱᒋᐊᕐᕕᑦᓴᐅᕗᖅ ᑲᓲᒪᖃᑎᖃᕐᓂᕐᒥᑦ ᐊᓯᖏᓐᓂᑦ ᐃᓕᓐᓂᐊᖅᑎᓂᑦ ᐊᑐᕐᓂᕐᒥᓪᓗ ᐃᑲᔫᑎᓂᑦ ᐱᓕᕆᔾᔪᑎᓂᓪᓗ. ᐃᓄᑑᓪᓗᓂ ᐊᓈᓇᐅᓪᓗᓂ, ᐱᓕᕆᐊᒃᓴᖃᕐᔪᐊᖅᑐᖅ ᐱᕕᒃᓴᒥ ᐊᐅᓚᑦᑎᓂᖅ ᒪᑐᐃᕈᑎᐅᓯᒪᔪᖅ. 

ᐃᓕᓐᓂᐊᕐᕕᖓᑕ ᖄᖓᓃᖏᓐᓇᕐᓂᐊᕐᓗᓂ, ᐋᖁᐊᖅ ᑎᑎᕋᙳᖅᑎᑦᑎᕙᒃᐳᖅ ᐃᓕᓐᓂᐊᕐᓇᐅᑉ ᐅᓪᓗᖅᓯᐅᑎᖓᓂᒃ ᐋᖅᑭᒃᓱᐃᓪᓗᓂᓗ ᐃᓱᓕᕝᕕᒃᓴᖓᓂᒃ ᐱᐅᓂᖏᓐᓂᒡᓗ ᑕᒪᐃᑕ ᐊᑐᓂᑦ ᐱᓕᕆᐊᒃᓴᕆᔭᐅᔪᑦ. ᑖᓐᓇ ᐃᑲᔪᖃᑦᑕᖅᑐᖅ ᑕᐅᑐᒃᑕᒥᓂᒃ ᑭᓱᑦ ᐱᒻᒪᕆᐅᓛᖑᖕᒪᖔᑕ. ᐊᒃᓱᕈᖅᓯᒪᔪᖅ ᐅᐸᖃᑦᑕᕐᓂᕐᒧᑦ ᑭᓯᐊᓂ ᐱᓕᕆᔪᖅ. 

ᐊᖏᕐᕋᖅᓯᓂᖅ ᐊᑦᓱᕈᕐᓇᖅᓯᒪᔪᖅᑕᐅᖅ. "ᓄᓇᖃᕈᓐᓃᕌᖓᒪ. ᕿᑦᓵᖅᑰᔨᒐᒪ ᓄᓇᕗᖁᑎᓐᓄᑦ. ᓲᕐᓗᓕ ᐃᓅᖃᑎᒋᖃᑦᑕᕋᒃᑭᑦ ᐃᓐᓇᑐᖃᐃᑦ ᖃᐅᔨᒪᔭᒃᑲ ᐃᓅᓯᖏᑦ ᐃᓱᓕᓛᓕᕐᒥᒻᒪᑕ ᒫᓐᓇᕈᓗᒃ. ᐃᒃᐱᒍᓱᒃᑐᖓ ᐊᒻᒪᓗ ᐃᒃᐱᒍᓱᒃᑐᖓ ᐊᖏᔪᒥᒃ ᐃᓕᑦᑏᓐᓇᕋᓱᒃᖢᖓ ᐃᓕᖅᑯᓯᓐᓂᒃ ᐃᓐᓇᓪᓚᕆᖕᓂᑦ ᐃᓅᓚᐅᖅᓯᒪᔪᓂᑦ ᓄᓇᒥᑦ," ᐋᖁᐊᖅ ᓴᖅᑭᔮᖅᑎᑦᑎᔪᖅ. ᐊᖓᔪᖅᑳᖏᒃ ᐃᓅᓚᐅᖅᓯᒪᔪᑦ ᓄᓇᒥ ᐊᒻᒪᓗ ᐃᓐᓇᓪᓚᕆᓐᓄᑦ ᐃᓅᓚᐅᖅᓯᒪᓐᓂᖅᑐᓂ. ᖃᑕᙳᑎᖏᓐᓂ ᕿᑐᕐᖓᖏᓐᓂᒃᓗ, ᐃᒃᐱᒍᓱᒃᑐᖅ ᐱᖃᑎᖃᙱᖦᖢᓂ. ᐊᖏᕐᕋᖃᑦᑕᖅᑐᖅ ᐊᐅᔭᒃᑯᑦ ᐊᒻᒪᓗ ᖁᕕᐊᓱᕝᕕᒻᒥ, ᐃᓚᒥᓂᒃ ᐱᖃᑎᖃᖅᑐᓂ ᐱᔪᓐᓇᕋᐃᒻᒪᑦ. 

ᕼᐊᓕᕚᒃᔅᒥ, ᐋᖁᐊᖅ ᐊᑐᐃᓐᓇᖃᕐᒪᑦ ᐃᓐᓇᑐᖃᕐᓂᒃ ᑕᓯᐅᖅᑎᐅᓪᓗᑎᒃ ᐊᒻᒪᓗ ᑲᔪᖏᖅᓴᐃᔨᐅᓪᓗᑎᒃ.  ᐸᓂᖓ 9-ᓂᒃ ᐅᑭᐅᖃᓚᐅᖅᑐᖅ ᓅᒻᒪᑕ ᓅᕙ ᓯᑰᓴᒧᑦ ᐊᒻᒪᓗ ᔭᒐᐃᓪᓗᓂ ᐃᓄᒃᑎᑐᑦ ᓴᓐᖏᑦᑎᑉᐸᓪᓕᐊᓪᓗᓂ ᖃᓪᓗᓈᑎᑐᑦ. ᖁᔭᓕᔪᖅ ᐃᓕᑦᑎᔪᓐᓇᕐᓂᕐᒥᓂᒃ ᐅᖃᐅᓯᖅᑕᖏᓐᓂ ᖃᕋᓴᐅᔭᒃᑯᑦ ᐅᓄᖅᑐᓂᒃ ᐱᑕᖃᐅᖅᑐᓂᒃ ᐊᑐᐃᓐᓇᐅᔪᖃᓕᕐᓗᓂ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᓄᑦ ᓇᖕᒥᓂᖅ ᐃᒪᐃᒃᑲᔭᖅᑐᖅ, "ᐱᔪᒪᓇᔭᖅᑕᕐᓂᒃ ᐱᓕᕆᓗᑎᑦ. ᐅᒃᐱᕆᑐᐃᓐᓇᕐᓗᒍ ᑭᓱᑐᐃᓐᓇᐃᓪᓗ ᐱᔪᒪᔭᑎᑦ, ᐱᓕᕆᐊᕆᑐᐃᓐᓇᕐᓗᒋᑦ." ᑲᒪᒋᔭᖃᕐᓂᖅ ᐋᓐᓂᖅᑎᕆᓂᕐᒥᑦ ᐊᑦᓱᕈᓐᓇᓚᐅᖅᑐᖅ ᐊᒻᒪᓗ ᐋᖁᐊᖅ ᐊᑐᐃᓐᓇᐅᑎᑦᓯᒍᒪᒐᔭᖅᑐᖅ ᓇᓗᓇᐃᖅᓯᑲᓐᓂᕐᓂᕐᒥᑦ ᐊᑲᐅᔪᒥᓪᓗ. "ᐃᓕᖕᓂᒃ ᖃᐅᔨᒪᕗᑎᑦ. ᐃᓕᖕᓂᒃ ᓇᒡᓕᒋᓗᑎᑦ. ᓇᒡᓕᒋᔭᐅᔭᕆᐊᖃᓪᓚᕆᒃᑐᑎᑦ. ᓴᓇᕙᒃᑕᑎᑦ, ᐱᐅᔪᐊᓘᖕᒪᑕ. ᐱᓕᕆᐊᑎᑦ ᐱᐅᔪᑦ. ᑕᐃᒪᐃᓕᐅᑐᐃᓐᓇᕆᑦ.. ᓇᒡᓕᒍᓱᖕᓂᖅ ᖀᒥᒍᓱᖕᓂᐅᕗᖅ ᓇᒡᓕᒍᓱᑐᐃᓐᓇᖅᖢᓂ ᐱᖃᑦᑕᖅᑕᕐᓂᒃ," ᑲᔪᓯᓗᓂ. 

"ᐃᓕᖕᓂᒃ ᖃᐅᔨᒪᕗᑎᑦ. ᐃᓕᖕᓂᒃ ᓇᒡᓕᒋᓗᑎᑦ. ᓇᒡᓕᒋᔭᐅᔭᕆᐊᖃᓪᓚᕆᒃᑐᑎᑦ."

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ, ᑕᐅᑐᓪᓗᐊᑕᕐᖢᓂ ᓂᕿᑦᑎᐊᕙᓕᕆᓂᕐᒥᒃ ᐊᑐᕐᓗᓂᓗ ᐊᖓᒃᑯᕐᒥᒃ ᓯᕘᕋᓂᖓᓄᑦ. ᐃᒥᖅᓯᒪᐃᓐᓇᕋᓱᓲᖅ ᐸᑦᑕᐃᑦᑐᓂᒡᓗ ᐱᕙᒃᖢᓂ. • ᐊᑯᐊᒃ ᐃᒻᒥᓂᒃ ᑕᑯᓇᓱᓲᖅ ᐊᑕᖐᔪᒥᒃ ᐊᒻᒪ ᐃᒡᓗᒌᑦᑎᐊᖅᑰᔨᓇᓱᒃᖢᓂ. 

ᐅᑭᐅᖅᑕᖅᑐᒥ, ᐃᒻᒥᓃᖃᑦᑕᕐᓂᖅ ᓴᖅᑭᔮᖅᑐᒻᒪᕆᐅᕗᖅ ᐊᒻᒪ ᕿᒃᓵᖕᓇᖅᑐᒻᒪᕆᐅᓪᓗᓂ ᐊᒻᒪ ᐃᓚᙵᕈᑕᐅᓪᓗᓂ. ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᔪᓄᑦ ᐃᖕᒥᓃᕐᓂᕐᒧᑦ ᑲᒪᒋᔭᐅᓗᓂ ᐱᕙᒌᔭᖅᑕᐅᕙᓪᓕᐊᑎᓪᓗᒋᑦ ᐅᒃᐱᕈᓱᒃᓗᑎᒃᓗ ᐃᖕᒥᓃᕐᓂᖅ ᐋᖅᑭᒃᓯᒪᓗᓂ ᐋᓐᓂᐊᕐᓂᕐᒧᑦ ᖃᓄᐃᓕᖓᓂᖓᓂᒃ ᐱᔭᕆᐊᖃᕐᓗᓂ ᐃᓅᖃᑎᒌᖕᓂᕐᒧᑦ ᐃᑲᔪᖅᑕᐅᓂᕐᒥᒃ. ᐃᓚᓪᓗᒍ ᖁᐊᖅᓵᖅᓯᒪᓂᐅᔪᑦ ᐃᓗᕕᕐᓄᑦ, ᐊᒥᓲᕗᑦ ᐊᑦᑐᐃᔪᑦ ᐃᓱᒪᓕᕆᓂᕐᒥᑦ. ᑐᓵᓪᓗᓂ ᐅᓂᒃᑳᖏᓐᓂᒃ ᐃᓐᓇᑐᖃᖏᑕ ᐊᒻᒪᓗ ᐋᓐᓂᐊᕐᓂᕆᔭᖏᓐᓂᒃ ᐃᓚᐃᖅᐸᓪᓕᐊᓪᓗᑎᒃ ᐊᒻᒪᓗ ᓱᓕ ᓴᓐᖏᓂᕐᒥᓂᒃ ᑲᔪᓯᑎᑦᑎᓪᓗᑎᒃ, ᐅᖃᐅᓯᖏᑦ ᑲᔪᓯᔾᔪᑎᒋᕙᑉᐸᖏᑦ. 

ᐋᖁᐊᖅ ᑲᔪᖏᖅᓴᐃᓂᖓ ᐱᖃᓐᓇᕆᔭᒥᙶᖅᐳᖅ ᐊᒻᒪ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᐅᐸᒃᑕᐅᖅᑳᖅᐸᒃᑐᓂᑦ ᓴᐳᔾᔨᓇᓱᐊᖅᑐᓂᑦ ᐃᒪᕐᒥᑦ ᑰᖕᓂᓪᓗ. "ᐊᕐᓇᐃᑦ ᐅᕙᓐᓂᒃ ᑲᔪᖏᖅᓴᐃᔪᑦ. ᓴᓐᖏᔪᐊᓘᒻᒪᑕ. ᑕᒪᒃᑯᐊ ᐊᕐᓇᐃᑦ ᐅᕙᓐᓄᑦ ᒪᒥᓴᖅᑐᑦ," ᐅᖃᖅᑐᖅ.  

ᖁᐊᖅᓵᖅᓯᒪᓂᕐᒥᑦ ᖃᐅᔨᒪᓪᓗᓂ, ᐋᓐᓂᐊᓂᕐᒥᑦ ᖃᐅᔨᒪᓂᕐᒥᑦ, ᑭᓯᐊᓂ ᖃᐅᔨᒪᓂᕐᒥᑦ ᐃᓄᖁᑎᖏᑕ ᓴᙱᓂᖏᓐᓂᑦ, ᐹᐳᕋ ᐊᑯᐊᒃ ᐃᓕᖅᑯᓯᕐᒥᓂᒃ ᐊᑐᖃᑦᑕᖅᑐᖅ ᑲᑕᔾᔭᕐᓂᒃᑯᑦ ᐊᒻᒪ ᐊᓯᖏᓐᓂᑦ ᐱᖅᑯᓯᒃᑯᑦ ᓴᓇᙳᐊᕐᓂᕐᒥᑦ. ᐃᓚᒋᓪᓗᓂᐅᒃ ᓇᔭᒋᔭᐅᑉ, ᓇᓂᓯᓪᓗᓂ ᓄᓇᓕᖕᒥ ᓂᐱᖓᒍᑦ. ᖃᐅᔨᒪᔭᐅᓪᓗᓂ ᐃᓅᓪᓗᓂ ᐹᐱ, ᖁᙱᐊᖅᑕᐅᕝᕕᖕᒧᐊᖃᑦᑕᖅᑐᖅ ᐊᒻᒪ ᐃᓕᓐᓂᐊᕐᕕᐊᕈᓯᕐᒧᑦ ᐃᓕᓐᓂᐊᖅᖢᓂ ᐃᖢᐊᖅᓴᐃᔨᐅᓂᕐᒥᒃ, ᒪᒥᓴᕐᓂᕐᒥᒃ ᐃᓅᓕᓴᐅᑎᓂᒃ ᐊᒻᒪ ᐃᓕᖅᑯᓯᓕᕆᓂᕐᒥᒃ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.