"ᐊᓈᓇᙳᓵᖅᑐᖅ ᖃᐅᔨᓇᓱᒃᑐᖅ ᑭᓇᐅᔭᕆᐊᖃᕐᒪᖔᕐᒪ ᐃᓅᓗᖓ ᐊᓈᓇᐅᙱᖦᖢᖓ." ᑕᐃᒪᓐᓇ ᐃᙱᖅᑎ, ᐃᙱᐅᓯᐅᖅᑎ ᐊᒻᒪ ᐃᙱᖅᑎ ᐱᐊᑭ ᕼᐋᓐ ᐅᖃᐅᓯᖃᖅᑐᖅ ᐱᒋᐊᕐᓂᖓᓂᒃ ᓂᔾᔭᐅᓯᔭᕐᓂᕐᒧᑦ ᐃᖏᕐᕋᓂᕆᔭᖓ. ᐃᖏᕐᕋᓂᕆᔭᖓ ᐃᓅᓪᓗᓂ ᐱᒋᐊᓚᐅᖅᑐᖅ ᓄᓇᑎᒍᑦ ᐅᑭᐅᖅᑕᖅᑐᒦᓐᓂᖅᓴᐅᓪᓗᓂ. ᕼᐋᓐ ᐱᕈᖅᓴᓚᐅᖅᓯᒪᕗᖅ ᐃᒃᐱᐊᕐᔪᖕᒥ ᒫᓐᓇᓗ ᓄᓇᖃᓕᖅᖢᓂ ᐊᖏᖃᑎᒌᒍᑎ 6-ᒥ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ, ᐃᒪᓐᓇ ᖃᐅᔨᒪᔭᐅᓪᓗᓂ, ᓵᔅᑲᑑᓐ, ᓴᔅᑳᑦᓱᐊᓐ. ᓅᓚᐅᖅᑐᖅ ᓵᔅᑲᑑᓐᒧᑦ ᐅᐃᖏᑦ ᐃᖅᑲᓇᐃᔭᕐᓂᖏᓐᓄᑦ, ᐊᓯᔾᔨᑐᐃᓐᓇᕆᐊᖃᓕᕐᖢᓂ ᓄᑖᓂᒡᓗ ᖃᓄᐃᓕᐅᕈᓘᔭᕐᓂᕐᒥᒃ ᕿᑐᕐᖓᖏᓪᓗ ᓄᑖᓂᒃ ᐱᕕᒃᓴᖃᖅᑎᖦᖢᓂᒋᑦ ᐱᕈᖅᓴᓚᐅᖅᓯᒪᙱᑕᒥᓂᒃ.

ᕼᐋᓐ ᑎᑕᒃᑎᙳᓚᐅᖅᑐᖅ ᐱᔮᕆᙱᖦᖢᓂ. ᐃᙱᕐᓂᕐᒥᒃ ᐱᐅᒃᓴᐃᓐᓇᐅᔭᖅᑐᖅ, ᑐᒃᓯᐊᕐᕕᖕᒥ ᐱᕈᖅᓴᓪᓗᓂ. ᑕᐃᒪᐃᒃᑲᓗᐊᖅᑎᓪᓗᒍ, ᐃᖕᒥᓂᒃ ᓇᓗᓇᐃᕐᖢᓂ ᓱᓕᓗ ᑕᓗᕈᒃᑯᑎᓂᕐᒥᓂᒃ, ᒫᓐᓇ ᖁᙱᐊᕈᓐᓇᓕᕋᓗᐊᖅᑎᓪᓗᒍ, ᐃᙱᕐᓗᓂ ᐅᖃᕐᓗᓂᓗ ᒥᑕᐅᑎᒃᓴᓂᒃ. ᐃᙱᖃᑦᑕᓕᓚᐅᖅᑐᖅ ᐃᓱᒪᒥᒍᑦ ᖃᓄᐃᙱᑦᑎᐊᕐᓂᕐᒥᒃ ᐊᓈᓇᐅᓕᓵᖅᖢᓂ ᐊᓈᓇᐅᓪᓗᓂ, ᐅᖓᓯᒃᑐᒦᖦᖢᓂ ᐊᖏᕐᕋᖓᓂ ᓄᓇᖓᓂ ᑲᓇᑕᒥ ᐊᕕᒃᑐᖅᓯᒪᓂᕐᒥ ᐱᖃᓐᓇᕆᔭᖅᑖᓚᐅᖅᓯᒪᙱᖦᖢᓂ ᓱᓕ.

ᐊᖏᕐᕋᖅᓯᓪᓗᓂ ᐊᒻᒪᓗ ᐋᖅᑭᒋᐊᖅᓯᓪᓗᓂ ᓄᑖᒥᒃ ᐃᓅᓯᖓᓂᒃ, ᑎᑎᕋᓕᓚᐅᖅᑐᖅ ᐊᒻᒪᓗ ᑐᓂᔭᐅᓪᓗᓂ ᑯᒃᑭᑕᐹᕐᓂᕐᒧᑦ ᖁᕕᐊᓱᕝᕕᒻᒧᑦ. ᐃᒻᒥᓂᒃ ᐃᓕᓴᐃᓚᐅᖅᑐᖅ ᐱᙳᐊᖃᑎᖃᕐᓂᕐᒥᒃ Youtube-ᒥᒃ ᐊᒻᒪᓗ google-ᒥᒃ, ᐃᓕᑦᑎᕙᓪᓕᐊᓂᕐᒥᒃ ᑯᑯᓂᒃ. ᐃᓄᒃᑎᑐᑦ ᐅᓂᒃᑳᖅᑐᐊᓂᒃ ᓂᔾᔭᐅᑎᖃᑦᑕᓕᓚᐅᖅᐳᖅ ᑐᓴᕐᓈᖅᖢᓂ ᐃᓄᖕᓄᑦ ᑐᓴᒐᒃᓴᓂᒃ. ᐱᐅᒋᔭᐅᒻᒪᕆᓚᐅᖅᑐᑦ ᐃᓅᖃᑎᒥᓄᑦ ᐊᒻᒪᓗ ᓂᔾᔭᐅᓯᔭᖅᑎᓂᑦ ᑐᓴᒃᑲᓐᓂᕈᒪᔪᓂᒃ.

ᑲᙳᓱᓕᕐᓂᖅ ᐊᒃᓱᕈᕐᓇᖅᑑᓚᐅᖅᑐᖅ Hᐊᓐᒧᑦ; ᐅᖃᐅᓯᖃᓚᐅᖅᑐᖅ ᐋᓐᓂᕐᓇᕐᓂᖓᓂᒃ ᐊᒻᒪ ᓂᑲᓇᕐᓂᖓᓂᒃ. "ᐊᔪᕈᓐᓃᖅᓴᖃᑦᑕᕐᓗᓂ, ᑕᐃᒪᐃᓕᐅᕆᐊᖃᑐᐃᓐᓇᖅᑐᑎᑦ ᖃᐅᑕᒫᓪᓗ ᐊᔪᕐᓇᙱᓐᓂᖅᓴᐅᓕᓲᖅ ᐅᕝᕙᓘᓐᓃᑦ ᖃᐅᔨᒪᓂᖅᓴᐅᓕᖅᖢᑎᑦ. ᖃᐅᔨᒪᕗᑎᑦ ᖃᓄᐃᓕᐅᕆᐊᖃᕐᒪᖔᑦ ᐱᓕᕆᐊᕆᓗᒍᓗ," ᐅᖃᖅᖢᓂ.

ᓂᐊᖁᓂ ᑐᓵᓪᓗᓂ, ᓇᖕᒥᓂᖅ ᐱᐅᔪᒥᒃ ᐅᖃᓪᓚᑲᑕᒃᖢᓂ, ᐃᓱᒪᒃᑯᑦ ᐱᕙᒌᔭᖅᖢᓂ ᐃᒻᒥᓂᒃ ᒪᑭᑉᐸᓪᓕᐊᓪᓗᓂ ᖀᖅᓱᖅᖢᓂ ᖀᖅᓱᖃᑦᑕᓚᐅᖅᓯᒪᔪᖅ. "ᑐᐹᑐᐃᓐᓇᕈᓐᓇᙱᓐᓇᒪ ᐃᓯᑐᐃᓐᓇᕐᓗᖓᓗ. ᐅᕙᓐᓄᑦ ᕿᑎᐊᓃᓚᐅᑲᒋᐊᖃᕐᓇᕐᒪᑦ ᐊᓂᖅᓵᑦᑎᐊᑲᑕᒡᓗᖓᓗ. ᑭᓯᐊᓂ ᑕᑉᐸᐅᙵᕌᖓᒪ, ᑎᑎᕋᕐᕕᒋᓯᒪᙱᑦᑐᖓ ᐱᓱᓕᕐᐸᒃᖢᖓᓗ ᐃᓛᓐᓂᒃᑯᑦ ᐱᐅᒋᖃᑦᑕᖅᑐᖓ, ᖃᓄᖅ ᐅᖃᖅᑲᐅᕗᖓ? ᑕᒪᓐᓇ ᑲᔪᓯᓂᖃᑦᑎᐊᖅᑐᒃᓴᐅᕗᖅ," ᕼᐋᓐ ᑐᓴᖅᑎᑦᑎᕗᖅ.

ᕼᐋᓐ ᓂᔾᔭᐅᓯᔭᖃᑦᑕᓚᐅᖅᐳᖅ ᐊᖏᕐᕋᒥᓂᒃ ᖃᕋᓴᐅᔭᒃᑯᑦ ᓄᕙᕐᔪᐊᕐᓇᖅ ᑎᑭᓚᐅᙱᑎᓪᓗᒍ ᑭᓯᐊᓂ ᐱᕕᒃᓴᖃᖅᑎᑕᐅᓚᐅᖅᐳᖅ ᓄᓇᕗᑦ ᒐᕙᒪᒃᑯᑎᒍᑦ ᐃᖂᓗᐃᑦ ᐃᙱᕆᐊᖅᑐᖅᖢᓂ. ᓄᓇᒥᓄᑦ ᐅᑎᓚᐅᖅᑐᖅ 2018−ᒥᑦ ᓂᔾᔭᐅᓯᔭᕐᓂᕐᒧᑦ ᐃᓕᓐᓂᐊᖅᖢᓂ. "ᐊᒃᓱᕈᕐᓇᖅᑐᒻᒪᕆᐅᓚᐅᖅᑐᖅ ᐊᖕᒪᓗᖅᓯᓵᖅᑎᓪᓗᖓ ᐱᒋᐊᓵᖅᑎᓪᓗᖓ ᐅᑎᕆᐊᖃᓕᖅᖢᖓᓗ ᑖᓐᓇ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᑲᑎᒪᑎᑦᑎᔨᐅᓪᓗᓂ, ᐃᓕᓐᓂᐊᖅᑎᖦᖢᒋᓪᓗ ᓄᑕᖅᑲᑦ ᐃᙱᐅᓯᐅᕐᓂᕐᒥᒃ," ᐃᖅᑲᐅᒪᔪᖅ.

‍

ᒫᓐᓇᕋᑖᖑᓚᐅᖅᑐᕐᓗ, Hᐊᓐ ᐊᐅᓪᓚᖅᓯᒪᖏᑦᑐᖅ ᐊᒻᒪᓗ ᓱᒃᑲᐃᓪᓕᒋᐊᖅᑎᑦᑎᓪᓗᓂ ᓂᔾᔭᐅᑎᒥᓂᒃ ᐱᔾᔪᑎᒋᓪᓗᒍ ᓄᑖᖅ ᐃᖅᑲᓇᐃᔮᖓ ᑲᓇᑕᒥ ᑐᐊᕕᕐᓇᖅᑐᖃᖅᑎᓪᓗᒍ ᐃᑲᔪᕆᐊᖅᑎᓄᑦ. "ᓱᓕ ᑎᑎᕋᖅᑐᖓ, ᓱᓕ ᐱᙳᐊᓲᖑᔪᖓ ᐊᖏᕐᕋᓐᓂ. ᓱᒃᑲᐃᓐᓂᖅᓴᐅᕌᕐᔪᒃᑐᖅ," ᖁᖓᖦᖢᓂ. ᐃᓚᒋᔭᐅᑉᓗᓂ ᓄᓇᓕᖕᓂᑦ ᐱᓕᕆᐊᒃᓴᓕᕆᓂᕐᒧᑦ, Hᐊᓐ ᑐᑭᓕᐅᕆᖃᑦᑕᖅᑐᖅ, ᖃᐅᔨᒋᐊᖃᑦᑕᖅᑐᖅ ᓄᓇᓕᖕᒥᐅᓂᑦ, ᐋᖅᑭᒃᓱᐃᕙᒃᖢᓂ ᒪᒃᑯᒃᑐᓄᑦ ᓯᕗᓕᐅᖅᑎᑦ ᑲᑎᒪᓂᖓᓂᑦ, ᐱᓕᕆᖃᑎᖃᖅᖢᓂᓗ ᒪᒃᑯᒃᑐᓂᑦ ᓄᓇᕗᒻᒥᑦ. ᐅᖃᐅᓯᖃᖅᑐᖅ ᑲᑐᔾᔨᖃᑎᒌᓐᓂᕐᒥᑦ "ᐱᐅᑦᓯᐊᖅᑐᓂᑦ" ᓄᑖᒥᓪᓗ ᐱᓕᕆᐊᖓᓄᑦ ᑕᐃᒪᐃᖏᓐᓇᖅᓯᒪᔪᖅ.

ᐱᓕᕆᖃᑎᒌᑦᑎᐊᓚᐅᕐᒥᔪᑦ Hᐊᓐ ᕿᒥᕐᕈᓯᒪᔪᖅ TakingITGlobal's Connected North-ᒥ. ᐃᓕᓴᐃᔨᒥᒃ ᐃᒃᐱᐊᕐᔪᖕᒥᐅᑕᒥᒃ ᕿᒥᕐᕈᖁᔨᓚᐅᖅᐳᖅ ᑕᒪᑐᒥᖓ ᐱᓕᕆᐊᒃᓴᒥᒃ, ᑐᓴᓚᐅᖅᓯᒪᙱᖦᖢᓂᐅᓪᓗ. ᐅᖃᖅᖢᓂ ᖃᐅᔨᒋᐊᕐᓂᐊᕐᓂᕋᖅᖢᓂ ᐊᒻᒪᓗ ᑲᑎᖃᑎᖃᓕᕐᓂᕋᖅᖢᓂ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᖕᓂ ᑲᓇᑕᓕᒫᒥ, ᖁᕕᐊᓲᑎᖃᓵᖅᖢᓂ 30-ᓂᒃ ᐃᓕᓐᓂᐊᕐᓇᓂᒃ.

ᓇᒻᒥᓂᖅ ᐃᓕᓐᓂᐊᕐᕕᒻᒥ ᐊᑐᖅᓯᒪᔭᖓ ᐃᓕᓐᓂᐊᓕᓵᖅᑐᓂᑦ ᖁᕝᕙᓯᓐᓂᓕᓐᓄᑦ 12-ᒧᑦ ᐃᓕᓐᓂᐊᕐᕕᒻᒥ 200-ᑐᐃᓐᓇᐅᓚᐅᖅᑐᑦ ᐃᓕᓐᓂᐊᖅᑏᑦ ᐃᓕᓐᓂᐊᕐᕕᓕᒫᒥ. ᐱᔭᕇᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥᒃ ᑕᐃᑲᓂ ᐊᒻᒪᓗ ᖃᓪᓗᓈᑦ ᓄᓇᖓᓐᓄᑦ ᓅᑦᑐᓂ ᑕᑯᔭᖅᑐᖅᑐᓂ ᑭᓱᒃᑲᓐᓂᕐᒥᒃ ᐱᑕᖃᕐᒪᖔᖅ ᐊᒻᒪᓗ ᓯᐊᒻᒪᑦᑎᕆᓪᓗᓂ ᐃᓴᕈᖏᓐᓂᒃ. ᒫᓂᑑᕙᓕᐊᓚᐅᖅᑐᖅ ᐊᓈᓇᙳᖅᖢᓂᓗ. "ᖁᔭᓐᓇᒦᒃ, ᑐᓴᕐᓈᓚᐅᖅᑐᖓ ᐃᑲᔪᑦᑎᐊᖅᖢᓂᓗ ᖁᓱᙱᓐᓂᓐᓂᑦ ᐃᓕᑦᑎᓪᓗᖓᓗ ᑭᓇᐅᖕᒪᖔᕐᒪ, ᑭᓇᐅᖕᒪᖔᕐᒪ, ᑭᓇᐅᔪᓐᓇᕐᒪᖔᕐᒪᓗ," ᐃᙱᖅᑕᐅᓚᐅᖅᑐᖅ.

Hᐊᓐ ᐱᔪᒃᓯᑎᑕᐅᕗᖅ ᐃᓚᒥᓄᑦ, ᓴᙱᓂᖃᕐᓂᖓᓄᑦ ᕿᑐᕐᖓᖏᑕ ᐊᒻᒪᓗ ᐅᐃᖓᑕ ᐅᒃᐱᕆᔭᖓ. ᓇᓗᓇᐃᖅᑕᖓ ᑭᓇᒥᑭᐊᖅ ᓂᑲᒋᔪᓐᓇᖅᑕᖓᓂᒃ ᐃᑲᔪᖃᑦᑕᖅᑐᒥᒃ ᐱᕈᖅᐸᓪᓕᐊᑎᓪᓗᒍ ᐃᓅᓪᓗᓂ. ᐱᔪᒃᓯᑎᑕᐅᖕᒥᔪᖅ ᐃᓅᓯᕐᒥᓂ ᐊᑐᕐᓂᑯᖏᓐᓂ, ᐃᓅᓯᖅ ᐱᕈᖅᐸᓪᓕᐊᓪᓗᓂ ᐊᖏᕐᕋᒥ, ᖃᓄᖅᓗ ᐃᒃᐱᖕᓇᕐᒪᖔᑦ ᐊᐅᓪᓚᖅᓯᒪᓪᓗᓂ ᐊᖏᕐᕋᒥ.

ᐃᓱᒪᑦᑎᐊᕐᖢᓂ ᐅᖃᐅᔾᔨᒋᐊᕈᑎᖃᕐᖢᓂ ᐃᓕᓐᓂᐊᖅᑎᓄᑦ ᐃᓱᒪᑐᐃᓐᓇᕆᐊᓕᖕᓄᑦ ᐊᐅᓪᓚᕆᐊᒃᓴᖅ ᐊᖏᕐᕋᒧᑦ ᐃᓕᓐᓂᐊᕆᐊᕐᓗᑎᒃ ᑲᓇᑕᐅᑉ ᓯᓚᑖᓄᑦ ᐊᐅᓪᓚᕐᓗᑎᒃᓘᓐᓃᑦ. "ᒪᑐᐃᙶᕐᓗᑎᑦ ᐃᓕᑦᑎᕙᓪᓕᐊᓂᕐᒧᑦ, ᐱᑐᐃᓐᓇᕆᐊᖃᓕᕐᓗᑎᑦ ᑕᒻᒪᕐᓂᕐᓄᑦ ᖃᓄᐃᙱᖦᖢᓂᓗ ᑕᒻᒪᕆᐊᒃᓴᖅ. ᐃᓕᖕᓂᒃ ᐊᒃᓱᕈᓗᐊᙱᓪᓗᑎᑦ, ᐊᔪᕐᓇᙱᑦᑐᑯᓘᖕᒪᑦ ᐃᓕᖕᓂᒃ ᓵᓚᒋᓇᓱᒋᐊᒃᓴᖅ. ᑭᓯᐊᓂ ᓱᓕᓪᓗᖓ, ᐅᕙᓃᑦᑐᐃᓐᓇᐅᒐᑦᑕ ᐃᓕᑉᐸᓪᓕᐊᒐᑦᑕ. ᖃᐅᔨᒪᔪᖃᓐᖏᒻᒪᑦ ᖃᓄᐃᓕᐅᕐᒪᖔᑕ. ᖃᓄᐃᙱᑦᑐᖅ," ᐃᓅᓯᓕᕆᓪᓗᓂ.

ᒪᑭᑦᑎᓂᖅ ᐱᒻᒪᕆᐅᓪᓗᓂ ᐊᔪᙱᓐᓂᐅᔪᖅ ᐃᙱᖅᑎᒧᑦ, ᐃᙱᐅᓯᐅᖅᑎᒧᑦ ᐊᒻᒪ ᑎᑕᒃᑎᒧᑦ. ᐃᕐᓂᓚᐅᖅᑎᓪᓗᒍ ᕿᑐᕐᖓᒥᓄᑦ, ᕼᐋᓐ ᐃᕐᓂᓚᐅᖅᑐᖅ ᓄᑖᒧᑦ ᐃᖅᑲᓇᐃᔮᒧᑦ ᑭᓇᐅᓂᕐᒧᓪᓗ. ᐱᒋᐊᓚᐅᖅᑐᖅ "ᓄᑖᖅ ᐊᓈᓇᐅᔪᖅ ᖃᐅᔨᓇᓱᒃᑐᖅ ᑭᓇ [ᐊᕐᓇᖅ] ᐃᓅᔭᕆᐊᖃᕐᒪᖔᑦ ᐊᓈᓇᐅᙱᖦᖢᓂ," ᓇᓂᓯᓪᓗᓂᓗ ᓄᑖᒥᒃ ᐊᑐᒐᒃᓴᒥᒃ ᐃᑲᔪᕐᓂᕐᒥᒃ ᐊᖏᕐᕋᖓᓄᑦ ᓄᓇᕗᒻᒥ, ᐅᖓᓯᒃᑲᓗᐊᖅᑎᓪᓗᒍ... ᐊᒻᒪᓗ ᑕᒪᓐᓇ ᐃᙱᖅᑕᐅᒋᐊᖃᖅᑐᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.