ᐃᔾᔪᐊᒐᒃᓴᑦᑎᐊᕙᐅᓚᐅᖅᑐᖅ ᐊᒻᒪᓗ ᒫᓐᓇ ᐃᔾᔪᐊᒐᒃᓴᑦᑎᐊᕙᐅᓕᖅᑐᖅ. ᐊᖅᑯᑎᒋᔭᖓ ᐱᓱᒡᕕᒋᓵᖅᑕᖓ ᐱᔪᒃᓯᓐᓇᖅᐳᖅ. ᓵᓖᓐ ᐳᔪᖅ ᑎᐊᑐᓪ ᒃᓛᓐᒥᙶᖅᑐᖅ ᐃᓚᒋᔭᐅᓪᓗᓂᓗ ᐋᓪᑐᕕᐅᓪ ᓄᓇᖃᖅᑳᖅᓯᒪᔪᓂᑦ. ᐊᑎᖃᖅᑐᖅ ᖁᖅᓱᖅᑕᖅ ᔅᑖᕐ ᐊᕐᓇᐅᔪᖅ ᐊᒻᒪᓗ ᐊᓂᔅᓈᐱ, ᒧᕼᐊᒃ ᐊᒻᒪᓗ ᒥᑎᔅ. ᐃᓅᓂᑰᓪᓗᓂ ᕚᓐᑰᕗᒥ, ᓄᓇᖃᖅᓯᒪᓕᖅᑐᖅ ᐋᒡᓇᓯᒥ ᐊᕐᕌᒍᑦ ᖁᓕᑦ ᐅᖓᑖᓄᑦ. ᐃᓕᓴᐃᓚᐅᖅᑐᖅ Sts'ailes First Nation School-ᒥ ᐊᕐᕌᒍᓄᑦ 8-ᓄᑦ ᐊᒻᒪᓗ ᓇᒡᓕᒍᓱᒃᖢᓂ ᐃᓄᖕᓂᒃ ᓄᓇᒦᑦᑐᓂᒃ. 

ᐅᓪᓗᒥ, ᓱᐴᖅᑐᕐᓂᖅ ᐃᓕᓴᐃᕗᖅ ᐊᔪᙱᓐᓂᓕᖕᓂ 5−ᒥ ᖁᕕᐊᒋᔭᖃᑦᑎᐊᖅᖢᓂᓗ ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑕᐅᕙᖕᓂᖏᓐᓄᑦ, ᑕᒪᓐᓇ ᐊᒥᓱᓪᓗ ᓄᓇᖃᖅᑳᖅᑐᑦ ᐃᓄᐃᑦ ᐊᑐᕈᓐᓇᓚᐅᙱᓚᑦ ᐊᖏᒡᓕᕙᓪᓕᐊᓂᕐᒥᒃ. ᐃᖅᑲᓇᐃᔭᖃᑦᑕᖅᑐᖅ ᐃᒻᒥᒃᑰᖅᑐᒥᑦ ᐃᓕᓐᓂᐊᕐᕕᒻᒥᑦ ᒪᐃᐳ ᕆᑦᔅᒥᑦ ᐃᒃᓯᕙᐅᑕᐅᑦᓱᓂᓗ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᖏᓐᓄᑦ ᐃᓕᓐᓂᐊᕐᕕᒻᒥᑦ ᐃᓚᒋᔭᐅᑦᓱᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᖃᑎᒌᓂᑦ ᐃᒻᒥᒃᑰᖅᑐᓂᑦ ᐃᓕᓐᓂᐊᕐᕕᓐᓂᑦ ᑲᑐᔾᔨᖃᑎᒌᓂᑦ ᐳᕆᑎᔅ ᑲᓚᒻᐱᐊᒥᑦ. 

ᐱᕈᖅᓴᓪᓗᓂ ᐅᐃᓂᐹᒡ ᐊᒻᒪ ᕚᓐᑰᕗ ᐊᑯᓐᓂᖓᓂ, ᑎᓴᒪᓂᒃ ᑕᓪᓕᒪᓂᓪᓘᓐᓃᑦ ᓄᑲᖅᖡᑦ ᐃᓕᓐᓂᐊᕐᕕᖏᓐᓄᑦ ᓄᖅᑲᓚᐅᖅᐳᖅ ᐃᓕᓐᓂᐊᕈᑎᓕᖕᓄᑦ 10-ᒥ ᐃᔾᔪᐊᒐᒃᓴᓕᐅᕆᐊᖅᑐᖅᖢᓂ. ᑭᖑᓂᐊᒍᑦ, ᓛᖓᕋᐅᑉ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᖓᓄᑦ ᐃᓕᓐᓂᐊᓚᐅᖅᑐᖅ ᐃᓐᓇᐅᓪᓗᓂ ᐃᓕᓐᓂᐊᖅᑎᐅᓪᓗᓂ ᓇᒡᓕᒋᔭᐅᓪᓗᓂᓗ. ᑕᐃᑲᙵᑦ, ᐱᔭᕇᖅᓯᓪᓗᓂ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ UBC−ᑯᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕈᑎᖏᓐᓄᑦ ᐱᓕᕆᐊᒃᓴᖓᓂ. 

ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ, ᐊᓪᓚᐃᑦ ᐃᓕᓐᓂᐊᕐᓂᓕᕆᔨᑦ ᑲᑎᒪᔨᕋᓛᖏᓐᓂ ᐃᖅᑲᓇᐃᔭᓚᐅᖅᓯᒪᕗᖅ ᐊᒻᒪ ᐃᖅᑲᐅᒪᓪᓗᓂ ᓄᑕᕋᐅᓂᕐᒥᓂᒃ ᐃᓕᓴᐃᔨᙳᕈᒪᓂᖓᓂᒃ, ᐃᓕᓴᐃᖃᑦᑕᓚᐅᖅᓯᒪᕗᖅ ᕿᑐᕐᖓᐅᔭᒥᓂᒃ. ᐳᔪᖅ SFU−ᒧᐊᕐᖢᓂ ᐃᓕᓴᐃᓂᕐᒧᑦ ᓇᓗᓇᐃᒃᑯᑕᖅᑖᕐᖢᓂ ᐃᓕᓴᐃᓕᕐᖢᓂᓗ ᑭᓯᐊᓂ ᐃᓕᓐᓂᐊᕌᓂᒍᓯᐊᖅᑖᕐᖢᓂ. ᐊᓂᒍᐃᓚᐅᖅᐳᖅ Master's−ᒥᒃ ᐃᓕᓐᓂᐊᕐᓂᓕᕆᓂᕐᒧᑦ ᓯᕗᓕᖅᑎᐅᓂᕐᒥᒃ. 

ᐃᓕᓴᐃᔨᕈᓚᐅᖅᑎᓐᓇᒍ, ᖃᐅᔨᔭᐅᓚᐅᖅᑐᖅ ᐃᔾᔪᐊᒐᒃᓴᑦᑎᐊᕙᐅᓂᖓᓂᒃ ᓯᓚᐃᓐᓇᕐᒥ ᐊᒻᒪᓗ ᐃᑲᔪᖅᑕᐅᓪᓗᓂ ᐃᔾᔪᐊᒐᒃᓴᓕᐅᖅᑎᓄᑦ, ᐊᐅᓪᓚᕈᓐᓇᓚᐅᖅᑐᖅ ᓂᐅ ᔪᐊᒃᒧᑦ, ᐱᐅᕆᔅᒧᑦ ᐊᒻᒪᓗ ᐊᖏᕐᕋᖓᑕ ᐃᓚᖓᓄᑦ. ᐆᒃᑑᑎᒃᑯᑦ, ᐳᔪᖅ ᐊᒃᑐᐊᓂᖃᓕᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓄᑦ ᓄᓇᓕᖕᓂ ᐊᒻᒪ ᐃᔾᔪᐊᒐᒃᓴᑦᑎᐊᕙᐅᓕᖅᖢᓂ ᓄᓇᖃᖅᑳᖅᓯᒪᔪᑦ ᐊᓐᓄᕋᔾᔨᐅᖅᑎᖏᓐᓄᑦ ᐹᒻ ᐸᐃᑯᒧᑦ. 

ᐊᐅᓪᓚᕐᓂᖅ ᐃᖅᑲᓇᐃᔭᕐᓂᕐᓗ ᑲᓇᑕᐅᑉ ᓯᓚᑖᓂ ᑲᑉᐱᐊᓇᓚᐅᙱᑦᑐᖅ ᓱᐴᖅᑐᕆᐊᒃᓴᖅ ᐃᓄᑑᖏᓐᓇᐅᔭᖅᑐᖅ ᐃᓕᑦᑎᓴᕋᐃᖦᖢᓂᓗ ᓇᖕᒥᓂᖅ ᑲᒪᒋᔭᕆᐊᒃᓴᖅ. ᐊᓂᑎᑕᐅᓪᓗᓂ ᐃᒡᓗᒥ ᐃᓄᑑᓪᓗᓂᓗ ᐊᓱᐃᓛᒃ ᐊᑲᐅᒃᓴᕐᖢᓂ ᓇᓂᓯᓂᕐᒥᒃ ᓄᑖᓂᒃ ᐊᑐᖅᑐᓂᑦ, ᐃᓄᖕᓂᒃ ᓇᓂᐅᓂᖏᓐᓂᓗ. ᐃᓅᓪᓗᓂ ᐊᓐᓇᐅᒪᓇᓱᖕᓂᒃᑯᑦ, ᐃᒃᐱᒍᓱᓚᐅᖅᑐᖅ ᓴᐳᔾᔭᐅᓯᒪᓂᕐᒥᒃ ᑲᑉᐱᐊᓱᖕᓂᕐᒧᑦ. 

"ᐃᒃᐱᒋᑦᑎᐊᓚᐅᖅᑕᕋ ᓯᕗᓕᕆᓚᐅᖅᑕᒃᑲ. ᐄ, ᑕᐃᒪ ᐊᑦᑕᓇᖅᑐᒦᓪᓚᕆᓚᐅᕋᒪ ᐊᒻᒪᓗ ᖃᐅᔨᒪᓐᖏᑕᓐᓂᒃ ᐱᑲᒻᒪᐃᓐᓇᓲᖑᒐᒪ. ᐃᓄᑑᒐᓗᐊᖅᑎᓪᓗᖓ, ᐃᓚᓐᓂᒃ ᐱᖃᓐᓇᕆᔭᓐᓂᓪᓗ ᑲᑎᙵᔪᓐᓃᕋᓗᐊᖅᑎᓪᓗᖓ ᐊᒻᒪ ᓄᑕᖅᑲᒥᒃ ᓄᓇᕐᔪᐊᕐᒥ, ᑐᙵᕕᖃᐃᓐᓇᐅᔭᓚᐅᖅᑐᖅ," ᐃᖅᑲᐅᒪᔪᖅ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᓱᒪᔪᓄᑦ ᕿᒪᐃᔪᒪᓪᓗᑎᒃ ᓄᓇᒥᓂᒃ ᖁᔭᓕᓂᐅᕗᖅ ᐃᖅᑲᐅᒪᓗᓂᓗ ᐃᓄᑑᓗᐊᙱᓐᓂᖏᓐᓂᒃ, ᓯᕗᓕᕕᓂᖃᕐᓂᖏᓐᓂᒃ. ᐳᔪᖅ ᐃᒪᐃᖁᔨᕗᖅ ᑲᑎᙵᖃᑎᖃᕐᓂᕐᒥᒃ ᐃᓕᓐᓂᐊᕐᕕᐅᑉ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᐱᔨᑦᑎᕋᐅᑎᖏᓐᓂᒃ. ᐊᓂᒍᐃᔪᓐᓇᕐᓂᕐᒥᓂᒃ ᓇᓗᓇᐃᖅᓯᓚᐅᖅᐳᖅ ᐃᓅᓯᓕᕆᔨᓄᑦ, ᐃᓐᓇᕐᓄᑦ, ᐃᓕᓐᓂᐊᖃᑎᒥᓄᑦ ᐊᒻᒪ ᐃᑲᔪᖅᑐᐃᔪᓐᓇᑦᑎᐊᕐᓂᖓᓄᑦ ᐃᓕᓐᓂᐊᕐᕕᖕᒥ. "ᐃᖅᑲᐅᒪᒋᑦ ᐱᓕᕆᒐᕕᑦ ᐃᓕᖕᓄᑦ ᑐᕌᖓᑐᐃᓐᓇᙱᑦᑐᒥᒃ, ᑭᓯᐊᓂ ᐊᓯᓕᒫᕐᓄᑦ, ᐊᒻᒪ ᐊᖅᑯᑎᒃᑰᖅᑎᓪᓗᑎᑦ," ᑎᓕᐅᕆᔪᖅ.

"ᐃᖅᑲᐅᒪᒋᑦ ᐱᓕᕆᒐᕕᑦ ᐃᓕᖕᓄᑦ ᑐᕌᖓᑐᐃᓐᓇᙱᑦᑐᒥᒃ, ᑭᓯᐊᓂ ᐊᓯᓕᒫᕐᓄᑦ, ᐊᒻᒪ ᐊᖅᑯᑎᒃᑰᓕᕋᕕᑦ"

ᓄᑕᕋᐅᓚᐅᖅᑎᓪᓗᒍ ᐊᔪᕐᓇᖅᑐᒃᑰᓚᐅᖅᑎᓪᓗᒍ, ᐳᔪᖅ ᐊᒃᓱᕈᕐᓇᖅᑐᒃᑰᕐᔪᐊᕐᖢᓂ ᐃᓅᖃᑎᖃᕈᓐᓇᑦᑎᐊᙱᖦᖢᓂᓗ. ᕿᓄᐃᓵᕈᑎᖃᕐᖢᓂ ᐋᖓᔮᕐᓇᖅᑐᓄᑦ ᐃᒥᐊᓗᖕᒧᑦ ᑮᓇᐅᔭᖃᐃᓐᓇᐅᔭᙱᖦᖢᓂᓗ ᓂᕿᓄᑦ ᐊᑐᖅᑐᐊᕈᑎᒧᓪᓘᓐᓃᑦ. ᐃᓄᑑᓪᓗᓂ ᐊᖓᔪᖅᑳᖑᓪᓗᓂ ᐃᓕᓴᐃᔨᙳᕋᓱᒃᑎᓪᓗᒍ, ᐃᓵᖅᓴᖅᑐᖅ ᐅᓐᓄᐊᒃᑯᑦ ᕿᒪᒃᖢᓂᐅᒃ ᐃᕐᓂᖓᓗ PTSD−ᒧᑦ.  

ᐊᔭᐅᖃᑦᑕᓚᐅᖅᑕᖓ ᐃᓕᓐᓂᐊᖅᑕᖓᑎᒍᑦ ᐊᒻᒪᓗ ᐃᖅᑲᓇᐃᔭᓕᒻᒪᒃᓴᕐᓂᖓ ᓄᖅᑲᖓᑲᐃᓐᓇᕈᓐᓇᖏᒻᒪᑦ ᐱᒋᐊᕆᐊᖃᕋᓂ. "ᖁᕕᐊᓇᙱᓪᓚᕆᖕᒪᑦ ᑕᐃᒫᒃ ᐱᓕᕆᔾᔪᓯᐅᔪᖅ, ᑭᓯᐊᓂ ᐱᕙᒌᔭᖅᓯᒪᔭᕆᐊᖃᕋᕕᑦ. ᖃᓄᕐᓕ ᐃᓅᓯᖅ ᑲᒪᒋᓂᐊᖅᐱᐅᒃ? ᓲᖃᐃᒻᒪ ᐃᓅᓯᖅ ᐊᑐᓲᖑᓂᖓᓄᑦ, ᐱᓗᐊᖅᑐᒥᒃ ᐅᕙᑦᑎᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐊᓯᖏᓐᓂᒃ ᐃᓗᓕᓕᒃ ᓇᐅᒃᑯᑐᐃᓐᓈᖅᑐᓂᒃ ᐱᔾᔪᑎᓂᒃ," ᐊᔾᔨᖃᖅᑐᖅ.  

ᐃᓕᓐᓂᐊᖅᑎᓪᓗᒍ UBC−ᒥ, ᓯᖓᐃᓕᓚᐅᖅᑐᖅ ᓄᑕᕋᓛᖓᓗ ᓇᒃᓴᕐᖢᓂᐅᒃ ᐃᓕᓐᓂᐊᖃᑎᒥᓄᑦ ᐱᔭᕇᕈᓐᓇᕐᓂᐊᕐᒪᑦ ᐱᔭᕇᕈᓯᐊᖓᓂᒃ. ᐊᖏᖅᑕᐅᔪᒪᖅᑲᐅᖏᒻᒪᑦ ᐊᓯᖏᓐᓂᒃ ᓇᓖᕌᕈᑎᖃᓚᐅᙱᒻᒪᑦ. "ᖃᐅᔨᒪᙱᑦᑐᖓ ᖃᓄᖅ ᐱᓕᕆᐊᕆᖕᒪᖔᒃᑯ. ᑭᓯᐊᓂ ᑕᐃᒪᐃᓚᐅᖅᑐᖓ," ᐃᖅᑲᐅᒪᔪᖅ, ᐃᓱᒪᓪᓗᓂ ᖃᓄᖅ ᐊᐳᖅᑕᕈᑎᖃᖃᑦᑕᓚᐅᕐᒪᖔᑦ ᐃᑲᔪᖅᑕᐅᓪᓗᓂ ᐱᖃᓐᓇᕆᔭᖏᓐᓄᑦ, ᖃᑕᙳᑎᖏᓐᓄᑦ ᓴᙱᔪᓄᓪᓗ ᐊᕐᓇᓄᑦ ᑐᙵᓱᒃᑎᑦᑎᓚᐅᖅᑐᓄᑦ ᐊᖏᕐᕋᖏᓐᓄᑦ ᓴᐃᓕᑎᖦᖢᒍᓗ ᑏᒧᑦ.  

ᐃᓛᓐᓂᒃᑯᑦ ᐃᓱᒪᓪᓗᓂ ᓄᖅᑲᖓᔭᕆᐊᖃᕐᓂᕐᒥᓂᒃ ᐃᖕᒥᓂᒃᓗ ᑲᒪᒋᑦᑎᐊᕐᓂᖅᓴᐅᓗᓂ ᑭᓯᐊᓂ ᐃᓱᐊᓂ, ᒪᒥᓴᖅᑕᐅᓕᕐᖢᓂ, ᐃᑲᔪᖅᑕᐅᓪᓗᓂ ᐱᔭᕆᐊᖃᖅᑕᖓᓂᒃ ᐋᖅᑭᒍᑎᓗᒍᓗ ᐃᕐᓂᖓᑕ ᐊᑖᑕᖓ. ᑲᑎᓯᒪᓕᖅᑐᑦ ᐊᕐᕌᒍᓄᑦ 20-ᓄᑦ ᐊᒻᒪᓗ ᐃᕐᓂᖓ ᓯᕗᓪᓕᖅᐹᖑᓪᓗᓂ ᐃᓚᒋᔭᖏᓐᓂ ᐱᔭᕇᖅᑐᓂ ᐃᓕᓐᓂᐊᕐᕕᐊᓗᒻᒥ ᐊᒻᒪᓗ ᓯᓚᑦᑐᓴᕐᕕᕐᔪᐊᕐᒨᖅᑐᑎᒃ. 

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᐃᒪᐃᒃᑲᔭᖅᐳᖅ, "ᐱᓕᕆᓗᑎᑦ ᐱᓕᕆᐊᕆᔭᕐᓂᒃ. ᐅᒃᐱᕆᓗᒋᑦ ᐅᖃᖅᑕᑎᑦ, ᐃᒃᐱᒍᓱᖕᓂᕐᓂᒃ ᐱᔾᔪᑎᖃᕐᓂᕐᓂᒃ. ᐱᔾᔪᑎᑕᖃᖅᑯ ᓱᒻᒪᑦ ᑲᒪᒍᓐᓇᓂᕐᒥᑦ ᑭᓱᑐᐃᓐᓇᕐᓂᑦ ᑲᒪᒋᔭᓐᓂ. ᐊᒃᓱᕈᐃᓐᓇᕆᑐᐃᓐᓇᕐᓗᒋᑦ. ᐱᐊᓂᒃᐸᑦ ᐱᓕᕆᐊᖑᔪᐃᓐᓇᐅᓂᐊᖅᑐᑦ." 

ᐅᖃᕋᔭᕐᒥᔪᖅ, "ᐃᓕᖅᑯᓯᕐᒧᑦ ᐅᑎᕐᓗᓂ, ᐅᖃᐅᓯᕐᒧᑦ ᐊᒻᒪ ᖁᕕᐊᓲᑎᖃᕐᓂᕐᒧᑦ ᕿᓚᒻᒥᐅᓂᖅᓴᒃᑯᑦ... ᐅᑉᐱᕈᓱᓪᓚᕆᒃᑲᒪ ᐃᓕᖅᑯᓯᖅ ᐃᓅᓕᒃᓯᒻᒪᑦ. ᐱᐅᓕᔭᐅᓚᐅᖅᑐᖅ. ᖁᕕᐊᓱᑦᑎᐊᖅᐳᖓ ᐃᓂᖓᓃᓕᕋᒪ ᒫᓐᓇ ᐃᓂᒋᔭᓐᓂ." ᓯᕗᓪᓕᖅᐸᐅᓪᓗᓂ ᖃᑕᙳᑎᖏᓐᓂ ᐱᔪᒪᓗᓂ ᑐᑭᓯᓇᓱᒃᓗᓂᓗ ᐃᓕᖅᑯᓯᒥᒃ, ᖁᕕᐊᓲᑎᖃᕐᓂᕐᒥᒃ ᐅᖃᐅᓯᕐᒥᒃᓗ, ᓱᐴᖅᑐᕐᓂᖅ ᐅᖃᖅᑐᖅ, "ᐃᓱᒪᒋᔭᕋ ᑖᓐᓇ ᑐᓐᓂᖅᑯᓯᐊᖑᓂᖓᓂᒃ. ᑕᕝᕘᓇ ᓴᙱᓂᕐᒥᒃ ᐅᑎᖅᑎᑦᑎᔪᓐᓇᖅᐳᒍᑦ."

ᐋᖅᑭᒃᓯᒪᐃᓐᓇᖅᑎᓪᓗᒍ ᐃᓱᒪᖓ, ᐳᔪᖅ ᐊᒃᑐᐊᓂᖃᐃᓐᓇᓲᖅ ᐱᖃᓐᓇᕆᔭᖏᓐᓄᑦ ᖃᑕᙳᑎᖏᓐᓄᓪᓗ ᓲᕐᓗ ᐊᓂᖓᑎᑐᑦ. ᐱᓱᑲᑕᒍᒪᑦᑎᐊᓲᖅ ᐊᒻᒪ ᐱᓱᖃᑎᒋᕙᒃᖢᓂᐅᒃ ᕿᒻᒥᓂ. ᐱᔭᕆᐊᑭᓪᓕᑎᕆᓂᖅ ᐃᓅᓯᕐᒥᒃ ᐊᒻᒪᓗ ᓇᓂᓯᓂᖅ ᓇᓕᒧᒌᒃᑎᑦᑎᓂᕐᒥᒃ ᐱᒻᒪᕆᐅᓚᐅᖅᑐᖅ ᑖᔅᓱᒧᖓ. ᓂᕆᑦᑎᐊᖃᑦᑕᕐᓂᖅ ᐸᕐᓇᐃᑦᑎᐊᕐᓂᕐᓗ ᓯᕗᓂᒃᓴᒧᑦ ᐃᑲᔪᖅᑐᖅ ᐃᓱᒪᖓ ᖃᓄᐃᙱᑦᑎᐊᕐᓗᓂ. ᐃᑲᕐᕋᒥᒃ ᐃᖅᑲᓇᐃᔭᖅᖢᓂ ᐃᖅᑲᓇᐃᔭᙱᖦᖢᓂᓗ, ᐊᒃᓱᕈᕐᓇᖅᑐᒥᒃ ᓴᖅᑭᑎᑦᑎᕙᒃᖢᓂ ᖃᐅᑕᒫᓪᓗ ᑕᑯᕙᒃᖢᓂ. 

ᐱᔪᒃᓯᑎᑦᑎᔪᒪᓪᓗᓂ, ᕿᒪᐃᓯᒪᕐᔪᐊᓚᐅᖅᑐᖅ Indspire ᑲᓇᑕᓕᒫᒥ ᑲᑎᓐᓂᕆᔭᐅᔪᒥ ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑕᐅᓂᖏᓐᓄᑦ. ᐊᕐᕌᒍᑦ 20 ᐊᓂᒍᖅᑐᓂᒃ, ᐱᕈᖅᐸᓪᓕᐊᕐᔪᐊᖅᓯᒪᔪᑦ ᐊᒻᒪ ᐊᓂᒍᐃᔪᓐᓇᑦᑎᐊᖅᑐᑦ ᐊᒻᒪ ᓅᑉᐸᓪᓕᐊᖏᓐᓇᖅᖢᑎᒃ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᓂᒍᐃᔪᑦ ᑐᕌᒐᖃᖅᖢᑎᒃ ᑎᑎᕋᖅᐸᓪᓕᐊᔪᒪᓪᓗᑎᒃ ᐅᖃᓕᒫᒐᕐᓂᒃ ᐊᒻᒪ ᑎᑎᕋᖅᓯᒪᔪᓂᒃ, ᐃᓕᓐᓂᐊᕈᑎᒃᓴᓂᒃ ᐱᕙᓪᓕᐊᑎᑦᑎᓂᕐᒥᒃ, ᑲᑐᔾᔨᖃᑎᒌᖕᓂᕐᒥᒃ ᐊᒻᒪ ᑭᒡᒐᖅᑐᐃᓂᕐᒥᒃ ᐃᓕᓐᓂᐊᖅᑐᓕᕆᓂᕐᒥᒃ ᐱᓕᕆᔨᒻᒪᕆᐅᓗᓂ. ᑐᓵᓗᒋᑦ ᐅᓂᒃᑳᑦ ᐃᖅᑲᓇᐃᔭᖅᑎᐅᖃᑎᖏᑦ ᐅᓂᒃᑳᖏᑦ ᐃᒻᒥᓂᒃ ᐱᔪᒃᓯᑎᑦᑎᔪᑦᑕᐅᖅ. ᐱᔪᒃᓯᓕᖅᑎᑦᑐᒪᓪᓗᒋᑦ ᓄᓇᖃᖅᑳᖅᑐᑦ ᒪᒃᑯᒃᑐᑦ, ᐃᒪᓐᓇ ᐅᖃᖅᖢᓂ, "ᓯᓐᓇᑦᑑᒪᒋᔭᑎᑦ ᐊᑐᕐᓗᒋᑦ, ᐃᒃᐱᒋᔭᑎᑦ. ᑕᐅᑐᒐᖃᓪᓚᕆᒃᑲᒪ ᐃᑲᔪᖅᑐᒻᒪᕆᐅᒻᒪᑦ ᐊᒻᒪᓗ ᐃᑲᔪᖅᑐᐃᓪᓗᓂ ᐃᓕᓐᓂᒃ. ᑕᐅᑐᒐᖃᕐᓗᑎᑦ ᐊᒻᒪᓗ ᑕᐃᒪᐃᓕᖓᑐᐃᓐᓇᕐᓗᑎᑦ." 

ᐊᓐᓄᕌᑦᑎᐊᖅᓯᒪᓚᐅᖅᑐᖅ ᐊᒻᒪᓗ ᒫᓐᓇ ᓵᓖᓐ ᐳᔪᖅ ᐃᓕᓐᓂᐊᑦᑎᐊᕐᓂᐅᓕᖅᑐᖅ. ᐊᖅᑯᑎᒋᔭᖓ ᐱᓱᒡᕕᒋᔭᖓ ᐱᔪᒃᓯᓐᓇᖅᐳᖅ ᓱᓕᓗ ᓯᕗᓕᖅᑎᐅᓪᓗᓂ ᐃᓕᓐᓂᐊᕐᕕᐊᕈᓯᕐᒥ. ᓇᒧᓕᒫᖅ ᐊᐅᓪᓚᓚᐅᖅᑐᖅ ᓄᓇᕐᔪᐊᓕᒫᒥᑦ ᐅᑎᖅᖢᓂᓗ ᐃᑲᔪᖅᑐᐃᓪᓗᓂ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᕐᑎᓂᑦ, ᐱᕙᒌᔭᖅᖢᓂᔾᔪᒃ ᓇᖕᒥᓂᖅ ᓇᒧᙵᐅᕙᓪᓕᐊᓂᖏᓐᓂᑦ. ᓯᓚᑐᔫᓪᓗᓂ ᐊᒥᖅᑳᕈᑎ, ᐅᖃᐅᓯᖏᑦ ᐱᔪᒪᓕᖅᑎᑦᑎᓂᕐᓂ ᐋᖅᑭᒃᓯᒪᐃᓐᓇᐅᔭᖅᑐᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.