"ᐃᓛᓐᓂᒃᑯᑦ ᐃᓗᑦᑐᖅᑎᓯᒪᔪᖅᑕᖃᓲᖑᖕᒪᑦ, ᐃᒋᐅᖅᑲᕈᓐᓇᖅᖢᑎᒡᓗ ᐊᓗᒡᕕᖕᒧᑦ. ᑭᓯᐊᓂᓕ ᐃᓱᒪᓲᖑᒐᒪ ᐃᓛᓐᓂᒃᑯᑦ ᑕᒪᒃᑯᐊ ᐱᑦᔪᐊᖑᔪᑦ ᐱᐅᓂᖅᐸᐅᒍᓐᓇᕐᒪᑕ ᐅᕙᑦᑎᓐᓄᑦ. ᐊᒻᒪᓗ ᑖᓐᓇ ᐅᓂᒃᑳᓪᓚᕆᐅᔪᖅ ᐊᕙᓯ ᐴᑦᒥᒃ," ᐅᓂᒃᑳᖅᑐᖅ ᑯᕆᔅᑏᓐ ᒪᕆ, ᓴᔅᑲᑑᓐᒥᐅᑕᖅ, ᓴᔅᑳᑦᓱᐊᓐᒥ ᐃᓅᓚᐅᖅᓯᒪᔪᖅ ᐊᒻᒪᓗ ᐱᕈᖅᓴᓪᓗᓂ ᐊᓪᓚᓄᑦ ᐊᐃᑉᐸᖃᖏᑦᑐᒧᑦ ᐊᓈᓇᒥᓄᑦ. ᐊᑖᑕᖓ ᐱᓕᐲᓄ ᓯᕗᓕᕕᓂᖃᖅᐳᖅ ᑭᓯᐊᓂ ᐱᕈᖃᑎᒋᓚᐅᙱᑕᖓ ᐅᕝᕙᓘᓐᓃᑦ ᐃᓕᓐᓂᐊᓚᐅᖅᓯᒪᙱᖦᖢᓂ ᐃᓕᖅᑯᓯᕐᒥᓂᒃ. ᒫᓐᓇ ᐊᓈᓇᐅᓕᖅᑐᖅ, ᐱᕈᖅᓴᐃᔪᖅ ᒪᕐᕉᖕᓂᒃ ᒪᒃᑯᒃᑑᖕᓂᒃ ᓄᑲᑉᐱᐊᓂᒃ ᓇᖕᒥᓂᖃᕐᓂᕐᒥᒃ ᓴᓇᑎᓪᓗᒍ. ᑖᓐᓇ ᓇᖕᒥᓂᕆᔭᐅᔪᖅ ᐱᕕᔾᔪᐊᖑᓚᐅᖅᐳᖅ ᐊᖅᑯᑎᒋᓚᐅᖅᑕᖓᓂᑦ, ᐊᓯᔾᔩᓯᒪᔪᖅ ᖃᑕᙳᑎᖏᑕ ᐃᓅᓯᖏᓐᓂᑦ. 

ᐃᓕᓴᐃᔨᒥᒃ ᓴᓇᔨᐅᓂᕐᒥᒃ, ᑎᓕᐅᖅᑕᐅᓚᐅᖅᐳᖅ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓴᐃᔨᒧᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᖁᔭᐅᓪᓗᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᑎᓪᓗᒍ, ᐃᓚᒥᓂᒃ ᐱᑕᖃᕋᔪᙱᖦᖢᓂ. ᓯᓚᑐᔫᓗᐊᙱᑦᑐᖅ, ᒪᕆ ᐱᔪᒪᙱᖦᖢᓂ ᑭᓯᐊᓂ ᐃᓕᓴᐃᔨᖓ ᐊᒃᓱᕉᑎᖃᕐᖢᓂ ᐱᔪᒪᔭᖏᓐᓂ ᐃᖕᒥᓂᒃ ᑎᓕᐅᕆᓪᓗᓂᓗ ᐱᔪᓐᓇᕐᓂᕐᒥᓂᒃ ᐃᓕᓐᓂᐊᕌᓂᒍᓯᐊᕐᒥᒃ ᐱᔪᒪᒍᓂ. 

ᑕᐃᑲᙵᑦ, ᕿᒥᕐᕈᓚᐅᖅᑐᖅ ᓯᓚᑦᑐᓴᕐᕕᔾᔪᐊᒥ ᐃᓕᓐᓂᐊᕋᔅᓴᓂᒃ, ᐱᓇᓱᐊᖅᑐᓂ, ᐊᔅᓱᕈᖅᑐᓂ ᐃᖅᑲᓇᐃᔭᓚᐅᖅᑐᖅ ᐊᒻᒪ ᐱᔭᕇᖅᓯᓪᓗᓂ ᐅᐱᒋᔭᐅᓪᓗᓂ. ᐃᓕᑦᑎᓚᐅᖅᑐᖅ ᐱᐅᓯᕆᔭᐅᕙᓚᐅᖅᑐᓂᒃ ᐊᓪᓚᖓᔪᐃᑦ ᒥᒃᓵᓄᑦ ᐊᒻᒪ ᓄᓇᕐᔪᐊᕐᒥᐅᓄᑦ ᑕᐅᑐᒃᑕᐅᓂᖓ ᐊᓯᔾᔨᖅᖢᓂ. "ᑖᓐᓇ ᐃᒃᐱᒋᓚᐅᖅᑕᕋ ᓯᕗᓪᓕᖅᐹᒥ ᐃᓅᓯᓐᓂ, 19−ᖑᓚᐅᖅᑐᖓᓗ, ᑲᙳᓲᑎᒋᔭᕆᐊᖃᕈᓐᓃᖅᑕᕋ ᓄᓇᖃᖅᑳᖅᓯᒪᓪᓗᖓ. ᐱᐅᔪᒻᒪᕆᐊᓗᖕᓂᒃ ᖃᓄᐃᓕᐅᖃᑦᑕᖅᓯᒪᕗᖓ," ᒪᕆ ᐃᖅᑲᐅᒪᕗᖅ. ᑕᒪᓐᓇ ᒫᓐᓇ ᐅᖃᐅᓯᕆᖃᑦᑕᖅᑕᖓ ᐱᓕᕆᔨᒻᒪᕆᐅᓪᓗᓂ ᐃᓅᓯᖓᓂ. 

ᐊᕐᕌᒍᓄᑦ ᐱᖓᓱᓄᑦ, ᐃᓕᓐᓂᐊᖅᑎᑦᑎᓚᐅᖅᑐᖅ ᐃᓅᓱᒃᑐᓂᒃ ᐊᒻᒪᓗ ᓇᓪᓕᒋᔭᐅᓪᓗᓂ. ᐃᓚᒥᓂᒃ ᐱᒋᐊᕋᒥ, ᕿᑐᕐᖓᒥᓂᒃ ᐊᖏᕐᕋᖅᓯᒪᖃᑎᖃᓚᐅᖅᑐᖅ ᐊᕐᕌᒍᓄᑦ ᑕᓪᓕᒪᓄᑦ. ᐱᑐᐃᓐᓇᕆᐊᖃᙱᖦᖢᓂ ᐃᖅᑲᓇᐃᔭᕐᕕᖕᒧᑦ, ᒪᕆ ᐃᓱᒪᓪᓗᓂ ᖃᓄᐃᓕᐅᕈᓐᓇᕐᒪᖔᑦ ᖃᕋᓴᐅᔭᒃᑯᑦ ᐊᖏᕐᕋᒥ ᕿᑐᕐᖓᖏᑦ ᕿᒫᑎᓪᓗᒋᑦ. ᑕᐃᔅᓱᒪᓂᓕ ᐃᓱᒪᒋᔭᐅᓕᓚᐅᖅᑐᖅ ᐊᕙᓯ ᐴᑦ ᐃᓅᓯᖓᓅᓚᐅᕐᒪᑦ, ᖃᐅᔨᒐᒥ ᓄᓇᖃᖅᑳᖅᓯᒪᔪᑦ ᓄᑕᕋᖃᙱᒻᒪᑕ ᐊᒻᒪᓗ ᓱᕈᓯᖏᑦ ᐊᓐᓄᕋᔾᔨᐅᖅᑐᖃᕋᓂ ᑲᓇᑕᐅᑉ ᐅᐊᓕᓂᖓᓂ. ᐃᒻᒥᓂᒃ ᐱᒋᐊᓚᐅᖅᑐᖅ. 

ᓴᖅᑭᑦᑎᓪᓗᓂ ᖃᕆᑕᐅᔭᒃᑯᑦ−ᑮᓇᐅᔭᓕᐅᕋᓱᐊᕐᕕᖕᒥᑦ, ᐱᔪᓐᓇᖅᑐᖅ ᐱᔭᐅᔪᒪᔪᓂᑦ ᐃᓚᓕᒫᖏᓐᓄᑦ ᓇᖕᒥᓂᖅ ᐱᕈᖅᓴᐃᑎᓪᓗᒍ. ᓴᓇᔭᕆᐊᒃᓴᖅ ᖁᕕᐊᒋᔭᓕᒃ ᓴᖅᑭᑦᑎᔭᕆᐊᒃᓴᖅ ᓴᓇᐅᒐᓂᑦ ᐃᓕᖅᑯᓯᒧᑦ ᐅᐱᒍᓱᖕᓂᖕᓂᑦ ᒪᒃᑯᒃᑐᓂᑦ ᓄᓇᖃᖅᑳᖅᓯᒪᔪᓂᑦ ᓄᑕᖅᑲᓂᑦ, ᓇᖕᒥᓂᖅ ᐱᕈᖅᓯᒪᙱᖦᖢᓂ. ᐊᓐᓄᕌᖏᑦ ᑐᑭᓕᐊᖓᑎᓪᓗᒋᑦ, ᐊᓯᔾᔩᕙᓪᓕᐊᕗᖅ ᑕᑯᔪᒪᔭᒥᓂᒃ ᓄᓇᕐᔪᐊᕐᒥ. 

ᓇᖕᒥᓂᖃᖅᖢᓂ ᐃᑲᕐᕋᒥᓂᒃ ᐋᖅᑭᒃᓯᓪᓗᓂ ᐊᖓᔪᖅᑳᕆᓪᓗᓂᐅᒡᓗ, ᐅᖃᑲᐅᖅᑐᖅᐳᖅ ᐊᔪᕐᓇᙱᓐᓂᖓᓂᒃ. ᐊᒃᓱᕈᕐᓇᖅᑐᒻᒪᕆᐊᓘᖕᒪᑦ ᐊᒻᒪᓗ ᐃᓕᑦᑎᕚᓪᓕᕐᓇᖅᖢᓂ ᓄᖅᑲᓚᐅᖅᓯᒪᙱᖦᖢᓂ. ᑭᒡᓕᓕᐅᕐᓂᖅ ᓇᓕᒧᒌᒃᑎᓐᓇᓱᒃᖢᒋᑦ ᐱᓕᕆᐊᖏᑦ ᐊᓈᓇᐅᔪᑦ ᓇᖕᒥᓂᖃᖅᑏᓪᓗ ᒪᕆᐅᑉ ᐱᓕᕆᐊᕆᔭᕆᐊᖃᖅᑕᖓ, ᐱᓗᐊᖅᑐᒥᒃ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓄᑦ ᐃᕐᖐᓐᓈᕈᑎᒃᑯᓪᓗ ᐃᓚᒋᔭᐅᓪᓗᓂ 24/7 ᖃᕋᓴᐅᔭᒃᑯᑦ ᓄᓇᕐᔪᐊᒥ. ᐃᓕᑦᑎᓚᐅᖅᑐᖅ ᓴᐃᓕᔭᕆᐊᖃᕐᓂᕐᒥᓂᒃ ᖃᑕᙳᑎᖏᓪᓗ ᑕᖃᖁᓇᒋᑦ.

ᑲᑎᒪᔾᔪᑎᒃᓴᓂᒃ ᑎᑎᕋᖅᓯᒪᓪᓗᓂ, ᐱᓕᕆᓂᐊᕐᓗᓂ ᑎᑎᕋᖅᓯᒪᔪᓂᒃ ᐊᒻᒪ ᐸᕐᓇᐃᓪᓗᓂ, ᐅᓪᓘᑉ ᐃᓚᐃᓐᓇᖓᓂᒃ ᐃᖅᑲᓇᐃᔭᖅᑎᑦᑎᔪᓐᓇᖅᐳᖅ. ᑕᐃᒪᓕ ᐅᓪᓗᓕᒫᖅ ᓅᓐᓂᐊᖅᑐᖅ ᑭᓯᐊᓂ ᐃᖅᑲᓇᐃᔭᙱᒃᑳᖓᑦ, ᒪᕆᐅᑉ ᕿᑐᕐᖓᖏᑦ ᑕᐅᑐᓪᓗᐊᑕᖅᑕᖏᑦ. ᐃᒻᒥᓂᒃ ᑲᒪᒋᑦᑎᐊᕋᓱᒃᓗᓂ, ᒪᕇ ᐃᖃᐃᓕᓴᓲᖅ ᓇᖕᒥᓂᖅ−ᑲᒪᒋᑦᑎᐊᕐᓂᕐᒥᒃ, ᐃᖃᐃᓕᓴᕐᕕᖕᒥ ᐱᓕᕆᕙᒃᖢᓂ, ᐃᓄᒋᐊᓄᑦ, ᐅᕕᓂᖕᓂᐊᖅᖢᓂ ᑳᐱᑐᕆᐊᖅᑐᖅᖢᓂᓗ ᐃᒻᒥᓂᒃ ᑲᒪᒋᔭᖅᑐᖅᖢᓂ. ᐅᑉᓛᒃᑰᖏᑦᑐᖅ, ᓯᓂᓕᖃᑦᑕᖅᑐᖅ. ᐅᖃᓕᒫᖅᖢᓂ ᖁᕕᐊᓇᒃᑲᓐᓂᖅᐳᖅ ᖃᒥᓐᓇᓱᒃᐸᒃᖢᓂᐅᒡᓗ ᐃᑲᕐᕋᓕᒫᖅ ᓯᓂᖕᓂᐊᓕᕋᒥ. ᖁᕕᐊᓲᑎᖃᕐᓂᖅ ᐊᖏᔪᒥᒃ ᐊᓂᒍᖅᑕᐅᔪᓂᒃ ᐱᒻᒪᕆᐅᔪᖅ ᑖᔅᓱᒧᖓ, ᐊᒻᒪᓗᑦᑕᐅᖅ ᖁᔭᓕᓂᖅ ᐃᓱᒪᒃᓴᖅᓯᐅᕐᓂᕐᓗ. 

"ᐅᕙᖓᐅᕗᖓ, ᐅᓇ ᐃᓅᖃᑎᒋᓚᐅᖅᑕᕋ."

ᑐᓴᖅᑎᑦᑎᒍᓐᓇᕈᓂ ᓄᑲᖅᑎᐅᓂᖅᓴᓄᑦ ᓇᒻᒥᓂᖅ ᐅᐱᒍᓱᒃᑲᔭᖅᑐᖅ ᑭᓇᐅᓂᕐᒥᓂᒃ, ᐱᓕᕆᔪᖅ ᐊᖑᑎᓂᒃ. ᒪᕆ ᐱᕈᖅᓯᒪᖁᔨᕗᖅ ᑕᐃᒪᓐᓇ ᖁᓱᙱᖦᖢᓂ. ᕿᑐᕐᖓᖏᑦ ᐱᔪᒃᓯᑎᑦᑎᓲᑦ ᐃᖅᑲᓇᐃᔮᒥᓂᒃ ᐱᕈᖅᐸᓪᓕᐊᖏᓐᓇᕈᒪᓪᓗᓂᓗᑕᐅᖅ. ᐅᕕᒃᑲᐅᓂᕐᓴᐅᑎᓪᓗᒍ, ᑐᓴᕐᓂᕆᓂᖅᐹᖓ ᐃᓐᖏᐅᓯᖓ ᒪᒥᓴᕐᓂᐅᔪᖅ ᓯᓚᕐᔪᐊᒥᑦ ᒪᐃᑯ ᔮᒃᓴᓐᒧᑦ ᐊᒻᒪᓗ ᐅᖃᐅᓯᖅᑕᖏᑦ ᓯᓚᕐᔪᐊᒥᑦ ᑲᔪᖏᕐᓴᐃᑦᑎᐊᓂᖅᓴᐅᖁᓪᓗᒍ ᖃᓄᖅ ᕿᒪᐃᔪᓐᓇᕐᒪᖔᖅ ᓯᓚᕐᔪᐊᒥᑦ ᐊᑲᐅᓂᕐᓴᒥᒃ ᕿᑐᕐᖓᖏᓐᓄᑦ ᐊᒻᒪᓗ ᑭᖑᕚᒃᓴᖏᓐᓄᑦ ᐊᒻᒪᓗ ᖃᓄᖅ ᓇᓗᓇᐃᒃᑯᑕᐅᔪᖅ ᕿᒪᒍᓐᓇᕐᒪᖔᕐᒥᐅᒃ. 

ᐅᖃᐅᓯᖃᖅᖢᓂ ᐸᑦᑕᑯᓗᖕᒥᑦ ᖁᕕᐊᓇᖅᐳᖅ, ᐃᓱᒪᓪᓗᓂ ᓯᕗᓪᓕᖅᐹᒥᑦ ᐃᒡᓚᖅᑎᓪᓗᒍ "ᓄᑕᕋᓛᒥᑦ" ᐅᕕᓂᕈᖏᓐᓂᑦ. ᑎᔅᓯᓈᕿᓂᖓ ᖁᕕᐊᓱᓐᓂᖓᓗ ᖀᓕᕐᓂᖃᕈᓐᓃᓚᐅᖅᑐᖅ. ᐃᓄᐃᑦ ᖃᐅᔨᒪᖁᓪᓗᓂᒋᑦ ᓇᒻᒥᓂᖁᑎᖓᑕ ᒥᔅᓵᓄᑦ ᑮᓇᖓᓃᑐᐃᓐᓇᕆᐊᖃᖅᑎᓪᓗᒍ ᐊᒻᒪ ᓂᐱᖓ, ᓄᓇᓕᐅᓯᒪᕗᖅ ᓴᖅᑮᓯᒪᔪᖅ ᓇᒻᒥᓂᖁᑎᖃᖅᑐᓂᒃ ᑲᔪᓯᑦᑎᐊᖁᓪᓗᒍ ᑐᓴᖅᑕᐅᖁᓪᓗᒍ, ᐅᓂᒃᑳᖅᑐᐊᑦ ᐊᒻᒪ ᐃᓕᓐᓂᐊᕐᓂᖅ. ᒪᕆ ᖁᔭᓕᔪᖅ ᑕᒪᐃᓐᓂᒃ ᐃᓚᐅᖃᑕᐅᔪᓂᒃ ᓇᒧᙵᐅᕙᓪᓕᐊᓂᕆᔭᐅᔪᒧᑦ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᓄᓇᖃᖅᑳᖅᑐᓄᑦ ᐱᓇᔪᒍᒪᔪᓄᑦ ᐱᔪᒪᔭᒥᓂᒃ ᐃᒪᓐᓇ, ᐃᒃᐱᒋᔭᖃᕈᑎᒃ ᐅᖄᓚᓂᕐᒥᒃ, ᐱᑐᐃᓐᓇᐅᙱᑦᑐᓂᒃ ᑐᓐᓂᖅᑯᓯᐊᓂᒃ ᐊᔪᙱᓐᓂᖃᕐᓂᕐᒥᒡᓗ ᐆᒃᑐᕐᓂᐊᕐᓗᓂ ᑭᓱᑐᐃᓐᓇᓂᒃ, ᖃᐅᔨᓇᓱᒡᕕᖃᕐᓗᑎᒃ ᐱᕕᒃᓴᓂᒃ ᐊᑐᕐᓗᑎᒡᓗ. ᖁᕕᐊᓱᒃᑐᖅ ᑕᑯᔭᕆᐊᒃᓴᖅ ᑭᓱᑦ ᐱᓂᐊᕐᒪᖔᑕ brilliant−ᑯᓐᓂᙶᕐᓗᑎᒃ, ᓴᓇᑐᓂᒃᑯᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓂᕆᐅᒃᐳᕐᓗ ᖃᓄᑐᐃᓐᓇᖅ ᐱᓗᑎᒃ ᖃᓄᑐᐃᓐᓇᖅ ᓯᕗᓪᓕᕐᒥ ᐊᓪᓗᕆᐊᕈᑎᖏᓐᓂ ᐃᖏᕐᕋᓂᖏᓐᓂ. ᕿᓂᖁᔨᕗᖅ ᐃᑲᔪᖅᑐᐃᔪᓐᓇᖅᑐᓂᒃ ᑲᑐᔾᔨᖃᑎᒌᓂᒃ ᐃᑲᔪᕈᓐᓇᖅᑐᓂᒃ ᐱᓕᕆᕙᓪᓕᐊᓂᓕᒫᒥ ᑕᒪᒃᑯᐊᓗ ᓄᓇᖃᖅᑳᖅᑐᑦ ᓯᓐᓇᒃᑐᒪᔭᖏᑦ ᓯᕗᒻᒧᐊᖅᐸᓪᓕᐊᖏᓐᓇᖁᓪᓗᒋᑦ. 

ᐊᕐᕌᒍᒐᓴᐅᓕᖅᑐᓂᑦ, ᑯᕆᔅᑏᓐ ᒪᕆ ᖃᐅᔨᓯᒪᔪᖅ ᐃᓛᓐᓂᒃᑯᑦ ᐃᓅᓯᕐᓂᑦ ᐃᓗᑦᑐᖅᑎᓯᒪᔪᖃᖃᑦᑕᕐᒪᑦ ᐅᕙᑦᑎᓐᓄᑦ ᐃᒋᑦᑎᒍᓐᓇᖅᑐᓂᑦ, ᐃᓛᓐᓂᒃᑯᑦ ᐱᐅᓂᖅᐹᖑᕙᒻᒪᑕ ᐅᕙᑦᑎᓐᓄᑦ. ᓴᖅᑭᑦᑎᓪᓗᓂ ᐊᕙᓯ ᐴᑎᒥᒃ, ᐊᖓᔪᖅᑳᑦᑎᐊᕙᐅᓂᕐᒧᑦ ᐃᓕᖅᑯᓯᑐᖃᕐᓄᓪᓗ ᐅᐱᒍᓱᒍᓐᓇᓚᐅᖅᑐᖅ, ᕿᑐᕐᖓᒥᓂᒃ ᐊᓯᖏᓐᓂᒡᓗ ᐱᓚᐅᖅᓯᒪᙱᑕᒥᓂᒃ ᑐᓂᓯᓪᓗᓂ: ᓯᓚᑐᓂᖏᑦ ᓈᒻᒪᖕᓂᖏᓐᓂᒃ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.