ᑯᕆᔅ ᒐᓯᓕᓐ ᐸᓖᓯᐅᖃᑕᐅᕗᖅ ᐸᓖᓯᒃᑯᓐᓄᑦ, ᑲᒪᒋᔭᖃᖅᖢᓂ ᓄᓇᖃᖅᑳᖅᓯᒪᔪᑦ ᐸᓖᓯᖃᕐᕕᖓᓂ ᐃᓄᖕᓂᒃ ᐱᔨᑦᑎᕋᖅᐸᒃᖢᓂ − ᓲᕐᓗ ᑯᕆᔅᑎᑐᑦ − ᓄᓇᖅᑲᑎᒥᓂᒃ ᐅᖓᓯᒋᒐᓗᐊᖅᖢᓂᐅᒃ. ᑯᕆᔅ ᐊᑎᑐᖃᖓ ᒪᑲᑦᒪᑯᐊ, "ᕿᕐᓂᖅᑐᖅ ᓇᓄᕐᓂᙶᖅᑐᖅ." ᖃᑕᙳᑎᖏᑦ ᐆᔨᐳ ᒥᑭ ᒫᓂᑑᐸᒥᐅᑕᖅ, ᐊᒻᒪ ᑯᕆᔅ ᑎᑎᕋᖅᑕᐅᓯᒪᓪᓗᓂ ᑐᑦᑖᓇᐱᖕ ᑎᑕᒃᑎᓄᑦ. ᑭᓯᐊᓂ ᑯᕆᔅ ᐃᓅᓚᐅᖅᓯᒪᔪᖅ ᑕᓐᑐ ᐸᐃᒥ ᐱᕈᖅᓴᓚᐅᖅᓯᒪᓪᓗᓂᓗ ᓯᓕᐹᒃᒥ, ᐅᓪᓗᒥ ᓄᓇᖃᖅᖢᓂ. ᑯᕆᔅ ᑕᓪᓕᒪᓂᒃ ᕿᑐᕐᖓᓕᒃ; ᓄᓕᐊᖓ ᑭᑎᒪᑦ, ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐸᓖᓯᐅᒋᓪᓗᓂ.

ᑕᐃᒪᙵᓂᑦ ᑯᕆᔅ ᓱᕈᓯᐅᓚᐅᖅᓯᒪᒻᒪᓂᑦ, ᐸᓖᓯᕈᕈᒪᓕᓚᐅᖅᑐᖅ. ᐱᔾᔪᑎᖃᓗᐊᖅᖢᓂ ᐃᖅᑲᐅᒪᓵᓕᖃᑦᑕᓚᐅᕐᓂᖓᓄᑦ ᐊᑲᐅᓂᖅᓴᒃᑰᕆᐊᖅᑎᑦᑎᓇᓱᖕᓂᕐᒥᒃ ᐱᐅᑦᑎᐊᓚᐅᖅᑐᖅ. "ᐱᕈᓚᐅᖅᑐᖓ ᐊᖏᕐᕋᓐᓂ ᐅᐃᕆᓯᒪᔭᖃᕐᓂᕐᒧᑦ. ᐃᒥᐊᓗᓗᐊᖃᑦᑕᕐᓂᖅ ᐊᒃᓱᐊᓗᒃ ᓴᖅᑭᔮᓚᐅᖅᑐᖅ ᐅᕙᖓ ᐃᓚᖏᓐᓄᑦ. ᐊᒥᓱᓂᒃ ᐋᓐᓂᖅᑎᕆᓂᖅ ᐱᕈᖅᐸᓚᐅᖅᑐᖅ, ᐊᒻᒪᓗ ᐅᖃᖅᑕᐃᓕᒪᑦᑎᐊᒻᒪᕆᑦᑐᑎᒃ, ᐸᓖᓯᒃᑯᑦ ᓴᖅᑭᒻᒪᑕ ᓄᖅᑲᑎᑦᑎᕙᓚᐅᖅᑐᑦ ᐋᓐᓂᖅᑎᕆᓂᕐᒥᒃ."

ᒪᒥᐊᓇᖅᑑᒐᓗᐊᖅ, ᑯᕆᔅᐅᑉ ᐃᓅᓱᒃᑑᑉ ᐃᓅᓯᖓ ᐊᖏᕐᕋᐅᑉ ᓯᓚᑖᓃᓚᐅᕐᒥᔪᖅ. "ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐊᖏᕐᕋᒥ, ᓲᕐᓗ ᓄᑕᖅᑲᑦ ᐅᓄᖅᑐᑦ, ᐃᓕᓐᓂᐊᕐᕕᖕᒥ ᐊᒃᓱᕈᕐᓇᖅᑐᖅᓯᐅᖃᑦᑕᓚᐅᖅᑐᖓ. ᐃᕐᖐᓐᓇᖅ ᐃᓱᒪᒋᔭᐅᓚᐅᕋᒪ ᐊᑲᐅᙱᓕᐅᕈᑎᐅᓂᕋᖅᑕᐅᓪᓗᖓ, ᐃᓕᑦᑐᐃᑦᑑᓂᕋᖅᑕᐅᓪᓗᖓ. ᐊᔪᖅᓴᖅᑐᓃᓚᐅᖅᑐᒍᑦ, ᓂᕈᐊᖅᑕᐅᓚᐅᖅᑐᒍᑦ... ᑲᒪᒋᔭᖃᓚᐅᖅᑐᖓ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ, ᐃᓕᓴᐃᔨᑦ ᐅᖃᐅᓯᖃᖅᑐᑦ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ. ᒪᒃᑯᒃᑑᓚᐅᖅᑐᖓ, ᐱᓕᕆᐊᕆᔪᓐᓇᓚᐅᙱᑕᕋ, ᑕᐃᒪᓕ ᕿᑦᓵᓚᐅᖅᑐᖓ."

ᐊᑕᐅᓯᖅ ᐃᓕᓴᐃᔨ ᑯᕆᔅ ᐅᖃᐅᔾᔨᒋᐊᓚᐅᖅᑐᖅ ᐊᓯᔾᔩᓯᒪᒻᒪᕆᑦᑐᒥᑦ ᐃᓅᓯᖓᓂᑦ: "ᖃᖓᑐᐃᓐᓇᖅ ᑕᐃᒪᐃᓕᐅᖃᑦᑕᕋᕕᑦ," ᒥᔅᑕ ᐆᓪᓴᓐ ᐅᖃᐅᔾᔨᓚᐅᖅᑐᖅ, "ᑕᐃᒪᓕ ᐅᖃᕋᕕᑦ." ᐅᖃᕐᖢᓂ, "ᖃᐅᔨᒪᔪᖓ ᑖᓐᓇ ᓯᓐᓇᑦᑑᒪᒋᒐᕕᐅᒃ ᐱᓕᕆᔨᐅᓗᑎᑦ, ᑭᓯᐊᓂ ᐱᓚᐅᖅᓯᒪᔾᔮᙱᑕᑦ ᐅᓇᑕᕐᓂᒃᑯᑦ ᓱᐴᖅᑐᕐᓂᒃᑯᓪᓘᓐᓃᑦ. ᓯᓐᓇᑦᑑᒪᒋᓪᓚᕆᒃᑯᕕᐅᒃ, ᐃᓱᒪᓕᐅᕆᐊᖃᕐᓂᐊᖅᑐᑎᑦ."

ᒪᒥᐊᓇᖅᑑᒐᓗᐊᖅ, ᒥᔅᑕ ᐆᓪᓴᓐ ᐅᖃᐅᓯᖏᑦ ᓴᐳᔾᔨᔪᓐᓇᓚᐅᙱᒻᒪᑕ ᑯᕆᔅᒥᒃ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ. "ᐲᖅᑕᐅᓚᐅᖅᑐᖓ ᐃᓕᓐᓂᐊᕌᓂᓵᖅᑎᓪᓗᖓ. ᖁᑦᑎᓐᓂᓕᒃ 12-ᒥ, ᐊᖓᔪᖅᑳᑉ ᑐᖏᓕᖓ ᖃᐃᓚᐅᖅᑐᖅ ᐅᕙᓐᓄᑦ ᐊᒻᒪᓗ ᐅᖃᐅᑎᓪᓗᓂᖓ ᑕᐃᓐᓇᑎᑐᑦ ᐃᓕᓐᓂᐊᕆᐊᖃᖏᑦᑐᖅ, ᐱᔭᕇᕆᐊᖃᖏᑦᑐᖅ." ᑯᕆᔅ ᑲᓐᓯᑦᔅ, "ᑐᑭᓯᔪᖓ ᐊᑲᐅᙱᓕᐅᕈᑎᖃᕐᓂᕋᖅᖢᖓ ᐃᓕᓐᓂᐊᕐᕕᖕᒥ, ᑭᓯᐊᓂ ᐱᔾᔪᑎᑕᖃᕐᓂᖅᓴᐅᖅᑰᓚᐅᖅᑐᖅ ᖃᓄᐃᒻᒪᑦ ᐅᕙᓐᓂᒃ ᐱᐅᒃᓴᙱᒻᒪᖔᑦ."

ᐊᕐᕌᒍᑦ ᐊᓂᒍᖅᑎᓪᓗᒋᑦ, ᑯᕆᔅ ᑐᓂᔭᐅᑎᓪᓗᒍ ᖁᑦᑎᓛᒥᒃ ᐸᓖᓯᒥᒃ ᑲᓇᑕᒧᐊᕈᓐᓇᖅᑐᒥᒃ, ᐊᖑᑦ ᐅᐸᒃᓯᓪᓗᓂ ᐊᒡᒐᒥᓂᒃ ᑎᒎᑎᔭᖅᑐᖅᖢᓂ. ᐊᖓᔪᖅᑳᑉ ᑐᖏᓕᕆᓚᐅᖅᐹ. "ᐅᕙᓐᓄᑦ ᐅᖃᖅᖢᓂ, 'ᖃᐅᔨᓴᖃᑦᑕᖅᓯᒪᔭᕋ ᐃᖅᑲᓇᐃᔮᑦ....ᖃᐅᔨᒪᐃᓐᓇᐅᔭᖅᑐᖓ ᖃᓄᐃᓕᐅᕋᔭᕐᓂᕐᓂᒃ ᐃᓅᓯᕐᓂ.'" ᑯᕆᔅ ᐊᒡᒐᒥᓂᒃ ᑎᒎᑎᓪᓗᓂ, "ᑭᓯᐊᓂ ᐃᓗᐊᓂ, ᖃᐅᔨᒪᓚᐅᖅᑕᕋ ᐅᕙᓐᓄᑦ ᐅᖃᐅᓯᕆᖃᑦᑕᓚᐅᖅᑕᖓ ᒪᒃᑯᒃᑎᓪᓗᖓ, 'ᑭᓱᑐᐃᓐᓇᕐᒧᑦ ᑎᑭᓚᐅᖅᓯᒪᔾᔮᙱᑦᑐᑎᑦ.'"

ᑯᕆᔅ ᐊᑐᖃᑦᑕᖅᓯᒪᔭᖏᑦ ᖃᑕᙳᑎᒌᓄᑦ ᖁᐊᖅᓵᖓᓇᖅᑐᒃᑰᖅᓯᒪᔪᓄᑦ, ᐱᓂᕐᓗᑦᑕᐅᓂᕐᒧᑦ, ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒧᑦ, ᐊᒻᒪ ᐊᔪᖅᓴᓗᐊᕐᓂᕐᒧᑦ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᓐᓂᑦ ᑐᓴᖅᑎᑦᑎᓂᕐᒥᑦ ᐊᒻᒪ ᐅᖃᐅᔾᔨᒋᐊᕐᓂᕐᒥᑦ ᒐᕙᒪᒃᑯᑦ ᒥᓂᔅᑕᖏᓐᓂᑦ ᐊᒻᒪ ᐸᓖᓯᒃᑯᓐᓂᑦ ᑲᓇᑕᓕᒫᒥᑦ, ᓄᓇᖃᖅᑳᖅᓯᒪᔪᑦ ᓄᓇᓕᓐᓂᑦ ᐊᑲᐅᙱᓕᐅᕈᑎᖃᕐᓂᕐᒧᑦ ᐱᓕᕆᐊᖏᑎᒍᑦ, ᓄᓇᖃᖅᑳᖅᓯᒪᔪᓂᑦ ᑐᓴᐅᒪᑎᑦᑎᔨᐅᓪᓗᓂ, ᓄᓇᖃᖅᑳᖅᓯᒪᔪᓂᑦ ᐸᓖᓯᓕᕆᓪᓗᑎᑦ, ᐊᒻᒪ ᓄᓇᖃᖅᑳᖅᓯᒪᔪᓂᑦ ᐱᓕᕆᐊᖃᖅᑎᓪᓗᒋᑦ. "ᐃᓕᑦᑎᔭᕆᐊᖃᙱᑦᑐᖓ ᖃᕆᑕᐅᔭᒃᑯᑦ ᐃᓕᓐᓂᐊᒐᒃᓴᓂᒃ. ᐃᓅᓱᒃᑑᓪᓗᖓ ᐃᓅᓂᑰᔪᖓ. ᐃᓅᓂᑰᔪᖓ ᐅᕕᒃᑲᐅᓪᓗᖓ ᐸᓖᓯᐅᓪᓗᖓ. ᓄᓇᖃᖅᓯᒪᕗᖓ ᓄᓇᖃᖅᑳᖅᓯᒪᓪᓗᖓ."

ᑐᑭᓕᐅᕆᓗᒍ, ᓄᕙᒡᔪᐊᕐᓇᖅ ᓇᒧᙵᕈᓘᔭᖅᓯᒪᔪᖅ ᓄᓇᕐᔪᐊᒥ, ᑯᕆᔅ ᑲᔪᓯᑦᑎᐊᕐᖢᓂ ᑲᓲᑎᑎᑦᑎᓪᓗᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐸᓖᓯᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐱᔨᑦᑎᕋᐅᑎᖏᓐᓂ. "ᐊᒃᓱᕈᕐᓇᓚᐅᖅᑐᖅ ᓄᓇᓕᒃᑎᒎᕆᐊᒃᓴᖅ ᓯᓚᑖᓂᙶᖅᑐᓂᒃ ᐱᔪᒪᙱᑦᑕᕌᖓᑕ." ᑯᕆᔅ ᐃᒃᐱᒍᓱᑦᑎᐊᓚᐅᖅᑐᖅ ᐃᓱᒫᓘᑎᖏᓐᓂᒃ ᐃᓐᓇᐃᑦ. "ᑲᑉᐱᐊᓱᓪᓚᕆᓚᐅᖅᑐᖅ; ᑐᑭᓯᐅᒪᔪᖃᙱᓚᖅ ᐊᐃᑦᑐᐃᓐᓇᖅᑐᓂᒃ ᐋᓐᓂᐊᕆᔭᐅᓕᓲᓂᒡᓗ ᓲᕐᓗ ᐃᓄᖁᑎᑦᑎᓐᓂᒃ ᖃᓄᕐᓗ ᑕᒪᓐᓇ ᐱᐅᙱᑦᑑᖕᒪᖔᑦ Turtle Island."

ᑯᕆᔅᐅᑉ ᑐᕌᕆᔭᖓ ᑐᑭᓯᓇᑦᑎᐊᖏᓐᓇᐅᔭᖅᑐᖅ ᑖᔅᓱᒧᖓ, "ᐃᓚᒋᔭᐅᓕᓚᐅᖅᑐᖓ ᐸᓖᓯᒃᑯᓐᓄᑦ ᐱᔨᑦᑎᕐᓗᒋᑦ ᐃᓄᖁᑎᒃᑲ." ᑭᓯᐊᓂ ᓯᕗᓪᓕᖅᐹᒥ ᑯᕆᔅ ᐱᓇᔪᓚᐅᖅᑐᖅ, ᐊᖏᖅᑕᐅᓚᐅᙱᑦᑐᖅ. "ᐊᓱᐃᓪᓛᓗᒃ."

ᑭᓯᐊᓂᓕ, ᐊᑯᓂᒻᒪᕆᒃ ᐃᖅᑲᓇᐃᔭᖅᓯᒪᑎᓪᓗᒍ ᐸᓖᓯᐅᓂᕐᒧᑦ, ᖃᐅᔨᒪᐃᓐᓇᖃᑦᑕᓚᐅᕐᒪᑦ ᑕᒪᑐᒥᖓ ᑐᕌᒐᐅᔪᒥᒃ. "ᐅᕙᖓ ᑭᓯᐊᓂ 35-ᓂᒃ ᐅᑭᐅᖃᓕᖅᑎᓪᓗᖓ ᓯᓐᓇᑦᑑᒪᒋᔭᓐᓂᒃ ᑲᔪᓯᑎᑦᑎᓇᓱᓚᐅᖅᑐᖓ."

"ᐃᖏᕐᕋᓂᐅᓵᖅᐳᖅ," ᑯᕆᔅ ᐋᑦᒥᔅ. "ᐊᒃᓱᕈᕐᓇᖅᑐᒻᒪᕆᐅᕗᖅ ᐱᓕᕆᐊᖃᕆᐊᒃᓴᖅ ᓄᓇᕐᔪᐊᕐᒥ ᐸᓖᓯᓕᕆᔾᔪᓯᕐᒥᒃ, [ᓇᖕᒥᓂᖅ ᐃᓕᖅᑯᓯᕐᒥᒍᑦ], ᐊᒻᒪᐃᓛᒃ ᐱᓕᕆᓕᖅᐸᒃᖢᑎᒃ ᐃᓄᖁᑎᑦᑎᓐᓂᒃ ᐃᓕᖅᑯᓯᕆᔭᐅᔪᒃᑯᑦ ᑕᐅᑐᒃᑕᒃᑯᑦ. ᐃᓛᓐᓂᒃᑯᑦ ᑕᒪᒃᑯᐊ ᒪᕐᕉᒃ ᓄᓇᕐᔪᐊᒃ ᓴᖅᑭᕋᓱᐊᖅᐸᒻᒪᒋᒃ ᐅᐱᓐᓇᕋᓂ, ᐅᒡᒍᐊᓇᖅᑑᒐᓗᐊᖅ ᐸᓖᓯᒃᑯᑦ, ᐃᓚᐅᖃᑕᐅᖃᑦᑕᓚᐅᕐᓯᒪᒐᑦᑕ ᐃᒪᐃᑦᑐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ. ᑕᒪᓐᓇ ᕿᕐᓂᖅᑕᒻᒪᕆᐅᕗᖅ ᓯᕗᓂᕆᓯᒪᔭᑦᑎᓐᓂᑦ ᐊᒥᓱᑦ ᓄᓇᖃᖅᑳᖅᓯᒪᔪᑦ ᐸᓖᓰᑦ ᐊᔅᓱᕈᖅᑐᑎᒃ ᐊᓯᔾᔩᓇᓱᐊᖅᓯᒪᒻᒪᑕ. ᐊᑐᓚᐅᖅᓯᒪᔾᔮᖏᑦᑐᒍᑦ [ᐊᑐᓚᐅᖅᓯᒪᔾᔮᖏᑕᕗᑦ] ᖃᓄᐃᑦᑐᖃᕐᓂᕐᒪᖔᑦ, ᑭᓯᐊᓂ ᓯᕗᒻᒧᑦ ᐃᖏᕐᕋᓗᑕ, ᑐᑭᓯᐅᒪᔪᐃᓐᓇᐅᔪᒍᑦ ᐱᒻᒪᕆᐅᓂᖓᓂᒃ ᐊᑐᕆᐊᒃᓴᖅ ᐊᓐᓄᕌᓂᒃ ᐃᓄᖁᑎᓕᒫᕗᓪᓗ, ᐃᓐᓇᐅᒐᓗᐊᖅᐸᑕ, ᒪᒃᑯᒃᑐᖑᒐᓗᐊᖅᐸᑕ, ᐅᕙᑦᑎᓐᓂᒃ ᑕᑯᓗᑎᒃ ᐅᐱᒍᓱᒡᓗᑎᒡᓗ ᐱᓕᕆᔾᔪᓯᐅᔪᖅ ᐱᐅᓗᐊᙱᒻᒪᑦ, ᓄᓇᖃᖅᑳᖅᓯᒪᔪᓂᒃ ᐱᓕᕆᔪᖃᕐᒪᑦ."

ᑯᕆᔅ ᓂᕆᐅᒃᐳᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐱᓕᕆᐊᒥᓂᒃ ᐱᒋᐊᕐᓂᐊᕐᓂᕐᒥᓂᒃ, ᐸᓖᓯᙳᕈᒪᓕᕐᓗᑎᒡᓗ. "ᓄᓇᖃᖅᑳᖅᓯᒪᒍᕕᑦ, ᒫᓐᓇ ᑲᒪᓇᑦᑎᐊᖅᑐᖅ ᐃᖅᑲᓇᐃᔭᖅᑎᑖᕋᓱᒃᓗᓂ ᐊᐅᓪᓚᕐᓗᓂᓗ ᑲᓇᑕᒧᑦ ᐱᓕᕆᖃᑎᖃᕐᓗᓂᓗ ᐃᓄᖁᑎᑦᑎᓐᓂᒃ. ᑭᓯᐊᓂ ᓄᓇᖃᖅᑳᖅᓯᒪᓂᕐᓄᑦ, ᑐᑭᖃᙱᑦᑐᖅ ᐱᓕᕆᔭᕆᐊᖃᕐᓂᕐᓂᒃ ᓴᓂᕐᕙᒃᑕᐅᓯᒪᔪᓂᒃ. ᖁᓕᒥᒎᓕᒃᑯᑦ ᐊᖁᑎᐅᔪᓐᓇᖅᑐᑎᑦ, ᐊᐅᓚᑦᑎᔪᓐᓇᖅᑐᑎᑦ ᐸᓖᓯᒃᑯᑦ ᐅᒥᐊᖓᓂ, ᐊᖅᑲᐅᒪᔨᐅᓗᑎᑦ, ERT-ᑯᓐᓄᑦ ᐃᓚᒋᔭᐅᓗᑎᑦ, SWAT, ᕿᒻᒥᖅ ᐊᖑᑦ, ᐃᓄᒐᙳᐊᓂᒃ ᑎᒍᓯᔪᓐᓇᖅᑐᑎᑦ, ᐅᕝᕙᓘᓐᓃᑦ ᐃᓄᐊᖅᓯᓗᑎᑦ."

ᑯᕆᔅ ᐅᖃᖅᖢᓂ, "ᐊᓯᔾᔩᔾᔮᙱᓚᑎᑦ ᑲᑐᔾᔨᖃᑎᒌᒥᒃ ᓯᓚᑖᓂᙶᖅᑐᒥᒃ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.