"ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᑎᐅᒐᒪ, ᐊᒻᒪ ᐊᑐᕈᒪᓲᖑᕗᖓ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᓕᕆᔾᔪᑕᐅᕙᒃᑐᓂᒃ ᐱᕕᒃᓴᖃᓕᑐᐊᕌᖓᒪ," ᑯᕋᐃᒡ ᑳᒻᐸ ᐅᖃᓚᐅᖅᐳᖅ. ᐊᓂᓯᓈᐱ ᑭᑎᒐᓐ ᓰᐱ ᒫᓐᓇ ᒪᓐᑐᕆᐊᒥᐅᑕᖅ. ᐃᖅᑲᓇᐃᔮᖓ ᐱᒋᐊᓚᐅᖅᓯᒪᕗᖅ ᑕᕐᕆᔭᐅᓯᐅᕐᓂᕐᒥᒃ ᐊᒻᒪ ᓂᔾᔭᐅᓯᔭᕐᓂᕐᒥᒃ ᒫᓐᓇᓗ ᑕᐅᑐᒐᖃᓪᓗᐊᑕᓕᖅᖢᓂ ᑕᑯᒃᓴᐅᔪᓂᒃ ᓴᓇᙳᐊᕐᓂᕐᒥᒃ ᐃᓕᓐᓂᐊᖅᑎᑦᑎᕙᒃᖢᓂᓗ ᓴᓂᕌᒍᑦ.

ᑕᑯᒃᓴᐅᔪᒃᑯᑦ ᓴᓇᙳᐊᖅᐸᒃᑕᒥᒍᑦ, ᑲᒻᐸ ᒥᖅᑯᓕᐅᖅᐸᒃᐳᖅ, ᐳᔪᖅᑐᖅᐸᒃᖢᓂ ᑐᒃᑐᕙᙳᐊᓂᒃ, ᑐᒃᑐᙳᐊᓂᒃ ᓄᕕᖅᓵᕆᓂᕐᒥᒃ, ᓴᐸᖓᓕᕆᓂᕐᒥᒃ ᐊᒻᒪᓗ ᑎᑎᕋᐅᔭᖅᐸᒃᖢᓂᓗ ᐊᒥᐊᕆᕙᒃᖢᓂᓗ. ᒫᓐᓇᓵᖑᓚᐅᖅᑐᖅ ᐱᐊᓂᒃᓯᓚᐅᖅᐳᖅ ᑲᓐᓄᔭᐅᔭᕐᒥᒃ ᓴᓇᙳᐊᕐᓂᕐᒧᑦ ᐊᔪᕈᓐᓃᖅᓴᕐᓂᕐᒥᒃ. ᑕᐃᑲᓃᓐᓂᕐᒥᓂ, ᓴᓇᙳᐊᒐᓕᐅᓚᐅᖅᐳᖅ ᐊᑐᖅᓯᒪᔭᒥᓂᒃ ᕿᑐᒻᒪᒃᓴᐃᓂᕐᒥᒃ ᐊᒻᒪᓗ ᐱᖁᑎᓂᒃ ᐅᑎᖅᑎᑕᐅᓚᐅᖅᑐᓂᒃ ᑕᑯᔭᒐᖃᕐᕕᖕᓂ ᓄᓇᓕᖓᓄᑦ.

ᒫᓐᓇᓕ, ᑲᒻᐸ ᐱᓕᕆᐊᖃᖅᐳᖅ ᐊᓐᓄᕌᓂᒃ ᐋᖅᑭᒃᓱᐃᓂᕐᒧᑦ ᐱᓕᕆᐊᖑᔪᒥᒃ ᐃᓚᒋᔭᐅᓪᓗᓂ ᑲᑎᙵᔪᓄᑦ 6−ᓄᑦ ᓴᓇᙳᐊᖅᑎᓄᑦ. ᐊᓐᓄᕌᓕᐅᖅᑐᖅ ᖁᓪᓕᕐᓂᒃ, ᓴᐸᖓᕐᓂᒃ ᐊᒻᒪ ᓄᕕᖅᓴᖅᓯᒪᔪᓂᒃ. ᐱᔭᕇᖅᑕᐅᒃᐸᑦ, ᑕᑯᒃᓴᐅᑎᑕᐅᓛᖅᑐᖅ ᑕᑯᔭᒐᖃᕐᕕᖕᒥ ᑯᐸᐃᒃ ᓯᑎᒥ.

ᐱᔪᒃᓯᓂᕆᔭᖓᓕ ᓴᓇᙳᐊᕐᓂᕐᒧᑦ, ᑳᒻᐸ ᐃᒃᐱᒍᓱᒃᐳᖅ ᑕᒪᓐᓇ ᐱᙳᐊᕈᑎᒋᓚᐅᖅᖢᓂᐅᒃ. ᓯᕗᓪᓕᕐᒥ, ᓂᔾᔭᐅᓯᔭᖅᑎᐅᔪᒪᓕᓚᐅᖅᓯᒪᕗᖅ, ᑭᖑᓂᐊᒍᓪᓗ ᑕᕐᕆᔭᐅᓯᐅᖃᑦᑕᓕᓚᐅᖅᓯᒪᕗᖅ, ᓴᓇᙳᐊᕈᑎᒋᓕᖅᖢᓂᐅᒃ. ᐱᓕᕆᖃᑎᖃᓚᐅᖅᐳᖅ ᐅᐊᐱᑯᓂ ᒨᔅᑯᓐᓂᒃ, ᑮᓇᐅᔭᓕᐅᕋᓱᒃᑎᐅᙱᖦᖢᓂ ᐊᔾᔨᒌᙱᑦᑐᓄᑦ ᓄᓇᖃᖅᑳᖅᑐᓄᑦ ᓄᓇᓕᖕᓅᖅᐸᒃᖢᓂ ᓇᐃᑦᑐᓂᒡᓗ ᑕᕐᕆᔭᐅᓯᐅᖅᐸᒃᖢᓂ ᒪᒃᑯᒃᑐᓂᒃ, ᐊᔪᕆᖅᓲᔾᔨᕙᒃᖢᓂ ᖃᓄᖅ ᑕᕐᕆᔭᐅᓯᐅᕈᓐᓇᕐᓂᕐᒥᒃ. ᑕᕐᕆᔮᒃᓴᓕᐅᓚᐅᖅᐳᖅ ᐅᖃᐅᓯᖃᖅᖢᓂ ᐃᒃᐱᒋᔭᒥᓂᒃ ᓄᒫᓱᒃᑎᓪᓗᒍ. ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᓕᓚᐅᖅᐳᖅ ᐊᒻᒪ ᑕᕐᕆᔭᐅᓯᐅᕐᓂᕐᒧᑦ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᕙᓪᓕᐊᓕᖅᖢᓂ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᖅᐳᖅ.

ᑕᐃᔅᓱᒪᓂᐅᑎᓪᓗᒍ ᑲᒻᐸ ᑲᑎᖃᑎᖃᓚᐅᖅᐳᖅ ᑎᑎᕋᐅᔭᖅᑎᒥᒃ ᓂᑯ ᐅᐃᓕᐊᒻᔅᒥᒃ ᐃᓕᓐᓂᐊᖅᖢᓂ Concordia-ᒥ ᐊᒻᒪᓗ ᐃᓕᑦᑎᓪᓗᓂ ᓴᐸᖓᕐᓂᒃ ᓄᕕᖅᓴᕐᓂᕐᒥᒃ. ᒪᑐᓯᒪᑎᓪᓗᒋᑦ, ᑳᒻᐸ ᐊᔪᕈᓐᓃᖅᓴᓚᐅᖅᐳᖅ ᓴᐸᖓᓕᕆᓂᕐᒥᒃ ᐊᒻᒪ ᐊᒥᕐᓂᒃ ᕿᑐᒻᒪᒃᓴᐃᕙᓪᓕᐊᓕᖅᖢᓂ, ᐃᓚᐅᓕᖅᖢᓂ ᒪᓐᑐᕆᐊᓪᒥ ᑲᑎᙵᔪᓂᒃ ᑕᐃᔭᐅᔪᓂᒃ Buckskin Babes.

ᐃᓕᓐᓂᐊᕐᓂᖓᒍᓪᓕ, ᑲᒻᐸ ᐅᖃᓚᐅᖅᐳᖅ "ᐃᖏᕐᕋᓂᐅᔪᒥ ᒪᓕᒃᖢᓂ ᐃᓱᒪᒋᔭᓐᓂ ᐊᒻᒪ ᑕᐅᑐᙳᐊᖅᑕᓐᓂ." ᐱᒋᐊᓚᐅᖅᓯᒪᕗᖅ ᐋᓪᒑᓐᑯᐃᓐ ᓯᓚᑦᑐᖅᓴᕐᕕᖓᓂ ᐋᑐᕚᒥ, ᐃᓕᓐᓂᐊᒐᒃᓴᒥ ᑕᐃᔭᐅᔪᒥ ᓴᓇᙳᐊᖅᑐᓕᕆᓂᖅ ᐊᒻᒪ ᖃᐅᔨᓴᖅᑐᓕᕆᓂᖅ ᑕᐅᑐᒐᖃᓪᓗᐊᑕᖅᖢᓂ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᑐᓴᐅᒪᔪᓕᕆᓂᕐᒥᒃ. ᑭᖑᓂᐊᒍᑦ, ᐊᕐᕌᒎᖕᓄᑦ ᒪᕐᕉᖕᓄᑦ ᑭᖕᔅᑕᓐᒦᓕᓚᐅᖅᐳᖅ ᓴᐃᓐᑦ ᓘᕋᓐᔅ ᓯᓚᑦᑐᖅᓴᕐᕕᖓᓂ, ᐱᓕᕆᐊᖑᔪᒥ ᑕᐃᔭᐅᔪᒥ ᓂᔾᔭᐅᓯᔭᕐᓂᕐᒧᑦ ᐊᒻᒪ ᖃᕋᓴᐅᔭᒃᑰᖅᑐᒃᑯᑦ ᐱᕙᓪᓕᐊᔪᓕᕆᓂᕐᒧᑦ, ᑕᐃᑲᓂᓗ ᐃᓕᑦᑎᓚᐅᖅᐳᖅ ᓂᔾᔭᐅᓯᔭᕐᓂᐅᑉ ᐊᐅᓚᓂᖓᓂᒃ ᐃᓚᖃᖅᖢᓂ ᓂᔾᔭᐅᓯᔭᕐᓂᕐᒧᑦ ᖃᓄᐃᓕᐅᖅᑕᐅᕙᓚᐅᖅᑐᓂᒃ, ᓂᐱᓕᐅᕆᓂᕐᒥᒃ, ᑕᕐᕆᔭᐅᓯᐅᕐᓂᕐᒥᒃ, ᐊᒻᒪ ᐊᔾᔨᓕᐅᕆᓂᕐᒥᒃ. ᐊᖏᕐᕋᓚᐅᖅᓯᒪᔪᖅ ᑕᕐᕆᔭᐅᓯᐅᖅᐸᒃᖢᓂᓗ ᐊᕐᕌᒍᓄᑦ ᑕᓪᓕᒪᓄᑦ ᑕᕐᕆᔭᐅᓯᐅᕐᓂᕐᒧᑦ ᐃᓕᑕᕆᔭᐅᔾᔪᑎᑖᕋᓱᖕᓂᕐᒥᓂ.

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᔪᓄᑦ ᓄᓇᓕᕋᓛᖑᓂᖅᓴᓂ ᐃᓕᓐᓂᐊᕆᐊᕐᓗᑎᒃ ᓄᓇᓕᐸᐅᔭᐅᓂᖅᓴᓄᑦ ᐃᒪᓐᓇᐅᓇᔭᖅᐳᖅ, "ᐃᓴᕈᓯ ᐃᓴᕈᓯ ᐊᒻᒧᒃᑎᒋᐊᕐᓗᒋᑦ ᖃᖓᑕᓗᓯᓗ. ᐅᒃᐱᕈᓱᒋᐊᖃᖅᐳᑎᑦ ᐊᒻᒪ ᐊᓪᓗᕆᐊᕐᓗᑎᑦ, ᓲᖃᐃᒻᒪ ᑕᐃᒪᐃᒃᑯᕕᑦ, ᖃᐅᔨᓂᐊᖅᐳᑎᑦ ᓄᓇᕐᔪᐊᕐᒥ ᐃᓄᐃᑦ ᐃᓕᖕᓂᒃ ᖃᐅᔨᔪᒪᓂᐊᖅᖢᑎᒃ, ᐊᒻᒪ ᖃᐅᔨᔪᒪᓂᐊᖅᖢᑎᒃ ᓇᑭᙶᕐᒪᖔᖅᐱᑦ, ᐃᓕᖅᑯᓯᕐᓂᒃ.... ᑭᓯᐊᓂ ᑕᒪᓐᓇ ᑲᑉᐱᐊᒋᔭᕆᐊᖃᙱᑕᕗᑦ, ᓲᖃᐃᒻᒪ ᐃᓄᑦᑎᐊᕙᒃᑕᖃᕐᒪᑦ ᑕᖅᑳᓂ, ᖃᐅᔨᓂᐊᖅᐳᑎᓪᓗ ᐱᐅᓂᖓᓂᒃ ᓄᓇᕐᔪᐊᑉ ᐃᓄᐃᓪᓗ ᐃᓕᖅᑯᓯᖏᓐᓂᒃᑕᐅᖅ, ᑕᐅᖅᓰᖃᑎᒌᒍᓐᓇᕐᓂᐊᖅᐳᓯᓗ ᑕᐃᒪᓐᓇ ᐃᓱᒪᒧᓪᓗ ᖃᐅᔨᕚᓪᓕᕐᓇᖅᖢᓂ. ᐊᔭᐅᖅᑐᑦᑎᐊᖅᐸᕋ ... ᐊᒥᓱᐊᓗᖕᓂ ᐃᓕᑦᑎᓂᐊᖅᐳᑎᑦ, ᐊᒻᒪ ᐃᓅᓂᕐᓄᑦ ᐱᕈᖅᐸᓪᓕᐊᓂᐊᖅᐳᑎᑦ, ᐱᓗᐊᖅᑐᒥ ᐊᐅᓪᓚᖃᑦᑕᕐᓂᕐᒧᑦ."

"ᐊᐅᓪᓚᕈᕕᑦ ᐊᒻᒪᓗ ᐃᓕᓐᓂᐊᕐᓗᓂ, ᐊᒻᒪᓗ ᐃᓕᑦᑎᓗᓂ ᐊᓯᓐᓂᒃ ᐃᓄᓐᓂᒃ, ᐱᓕᕆᖃᑎᒌᒍᓐᓇᕋᕕᑦ ᐃᑲᔫᑎᖃᖅᑐᒥᒃ ᓄᓇᓕᒋᔭᕐᓄᑦ... ᐊᔪᙱᓐᓂᒃᑲᓐᓂᕐᓂᒃ ᐅᑎᖅᑎᑦᑎᒍᕕᑦ, ᐊᔪᕈᓐᓃᖅᑕᕐᓂᒃ ᑐᓂᓯᔪᓐᓇᕐᓂᖅᓴᐅᓂᐊᖅᐳᑎᑦ. ᓲᖃᐃᒻᒪ ᑕᒪᓐᓇ ᖃᐅᔨᒪᓂᖅ ᐱᔾᔪᑕᐅᖕᒪᑦ, ᑐᓐᓂᖅᑯᓯᐊᖑᕗᖅ ᑐᓂᓯᓐᓇᐅᔭᖅᖢᓂ," ᐅᖃᕆᓪᓗᓂ ᑳᐸ.

ᐊᕝᕕᐊᕈᑕᐅᔪᓂᒃ ᐊᓂᒍᖅᑎᑦᑎᔭᕆᐊᖃᓕᕌᖓᒥ, ᐊᒥᓱᑦ ᐃᓱᒪᒥᒍᑦ ᐃᓚᐅᓪᓗᑎᒃ ᐃᒻᒥᓂᒃ ᓇᓗᓕᖅᖢᑎᒃ ᐃᓕᑦᑎᔪᓐᓇᕐᒪᖔᕐᒥᓂᒃ ᐅᕝᕙᓘᓐᓃᑦ ᓄᑖᓂᒃ ᐱᓕᕆᔪᓐᓇᕐᒪᖔᕐᒥᓂᒃ. ᐃᓕᑦᑎᓚᐅᖅᐳᖅ ᑭᐅᔾᔪᑎᒥᒃ ᐃᒪᓐᓇ, "ᖁᕕᐊᓱᒍᑎᒋᖅᑳᓚᐅᕐᓚᕗᑦ" ᐊᒻᒪᓗ ᓂᕆᐅᒋᔭᖃᙱᖦᖢᓂ ᐱᐅᑦᑎᐊᕋᔭᕐᓂᖓᓂᒃ ᐃᕐᖐᓐᓇᖅ. "ᐱᒻᒪᕆᐅᓂᖅᓴᐅᕗᖅ ᐱᕚᓪᓕᖅᓯᒪᓗᓂ ᐱᐅᓛᖑᙱᖔᕐᓗᓂ, ᐊᒻᒪ ᐱᒻᒪᕆᐅᓂᖅᓴᐅᕗᖅ ᖁᕕᐊᓱᒡᓗᓂ ᐱᓕᕆᖅᑳᕐᓗᓂ ᐊᔪᐃᓐᓇᙱᖔᕐᓗᓂ ᐱᐅᑦᑎᐊᕈᒪᓂᕐᒧᑦ," ᐅᖃᓚᐅᖅᐳᖅ ᑲᒻᐸ.

ᐱᐅᑦᑎᐊᕈᒪᓂᖅ ᑐᓗᖅᑕᕈᑕᐅᕙᖕᒥᔪᖅ ᖃᐅᔨᓪᓗᓂᓗ ᐱᐅᓂᖅᓴᐅᓂᖓᓂᒃ ᐱᐅᓛᒥᒃ ᐱᓇᔪᖔᕐᓗᓂ ᐃᒻᒥᓂᒃ−ᐱᐅᓯᕚᓪᓕᕈᑎᐅᓗᓂ. ᖃᐅᔨᒪᓪᓗᓂ ᐃᓄᖕᓂ ᐱᐅᓂᖅᓴᖅᑕᖃᕐᓂᖓᓂ ᑲᔪᖏᖅᓴᐃᓂᐅᕗᖅ ᐃᓱᒪᒋᔭᖃᕈᓐᓇᕐᓂᖓᓂ ᓇᖕᒥᓂᖅ ᓂᐱᖓᓂ ᐱᓕᕆᓂᐅᔪᒥ ᐊᒻᒪ ᖃᓄᖅ ᐅᖃᕋᓱᐊᕐᓂᖓᓂ. ᐊᓯᐊᑦᑕᐅᖅ ᑐᓗᖅᑕᕈᑎᐅᖕᒥᔪᖅ ᐃᓯᕈᓐᓇᕐᓂᕐᒧᑦ, ᓲᖃᐃᒻᒪ ᐃᓚᖏᑦ ᐱᙳᐊᒐᒃᓴᐃᑦ ᐊᔪᕐᓇᕐᓂᖅᓴᐅᖕᒪᑕ, ᓲᕐᓗ ᑲᓐᓄᔭᐅᔭᖅ. ᓯᕗᓪᓕᖅᐹᖑᓪᓗᓂ ᓄᓇᖃᖅᑳᖅᑐᒥ ᓴᓇᙳᐊᖅᑎᐅᓚᐅᖅᐳᖅ ᑲᓐᓄᔭᐅᔭᕐᒥ ᑕᐃᑲᓂ ᐃᓕᑦᑎᓚᐅᖅᓯᒪᕗᖅ.    

ᐊᒃᓱᕈᕐᓇᖅᑐᒃᑰᓕᕌᖓᒥ ᓇᓗᓕᕐᓇᖅᑎᓪᓗᒍᓗ, ᑲᒻᐸ ᐃᑲᔪᖅᑎᒋᕙᒃᑕᒥᓄᑦ ᑕᐅᑐᒃᐸᒃᐳᖅ ᐊᓂᑎᑉᐸᒃᖢᓂᓗ. ᐱᖃᓐᓇᕆᔭᒥᓂᒃ ᐱᖃᑎᖃᖅᐸᒃᐳᖅ ᐅᖃᓪᓚᖃᑎᖃᖅᐸᒃᖢᓂᓗ, ᐱᕕᖃᖅᑎᖦᖢᓂᒋᑦ ᐱᕈᖅᑎᑉᐸᓪᓕᐊᔪᓐᓇᖅᖢᓂᒋᑦ. ᓴᓇᙳᐊᖅᐸᒃᑭᕗᖅ, ᐊᒡᒐᒥᓂᒃ ᐱᓕᕆᑎᑦᑎᕙᒃᖢᓂ ᐃᑲᔪᖅᐸᒃᖢᓂᓗ ᐃᒃᐱᒋᔭᒥᓂᒃ ᑲᒪᒋᔭᖃᖅᐸᒃᖢᓂ. ᑐᓴᕐᓈᕐᓂᖅ ᐃᑲᔪᖅᐸᒃᐳᖅ ᐃᒃᐱᒋᔭᒥᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ.

ᐱᔪᒃᓯᑎᑦᑎᓂᒃᑯᓪᓕ, ᑲᒻᐸ ᐱᔪᒃᓯᑎᑦᑎᕙᒃᐳᖅ ᓄᑕᐅᙱᑦᑐᓂ ᓲᕐᓗ ᐅᑎᖅᑎᑕᐅᓂᑯᓂ ᐱᖁᑎᓂ ᐊᖏᕐᕋᕆᓚᐅᖅᑕᖓᓂ. ᐱᔪᒃᓯᓯᒪᖕᒥᔪᖅ ᐃᓕᑦᑎᕙᓪᓕᐊᓂᕐᒥᒃ ᐃᓕᖅᑯᓯᑐᖃᒃᑯᑦ ᓴᓇᙳᐊᕐᓂᕐᒥᒃ ᓲᕐᓗ ᓴᐸᖓᓕᕆᓂᕐᒥᒃ, ᖁᓪᓕᓕᐅᕐᓂᕐᒥᒃ ᐊᒻᒪ ᓄᕕᖅᓵᕆᓂᕐᒥᒃ ᓲᖃᐃᒻᒪ ᐊᒥᓲᓗᐊᙱᓐᓂᖅᓴᐅᖕᒪᑕ ᐃᓄᐃᑦ ᐊᑐᖅᐸᒃᑕᖏᑦ ᑭᓯᐊᓂ ᐅᑎᖅᐸᓪᓕᐊᓕᕐᒪᑕ. "ᐃᓚᒋᔭᐅᔪᒪᕗᖓ ᐃᓄᖕᓂ ᐃᓕᑦᑎᕙᓪᓕᐊᔪᓂᒃ ᑕᒪᒃᑯᓂᖓ ᐊᒻᒪ ᑭᖑᓂᐊᒍᑦ ᑐᓂᔾᔪᑎᒋᔪᓐᓇᖅᖢᓂᒋᑦ," ᐅᓂᒃᑳᖅᑐᖅ, ᐃᓱᒪᒋᓪᓗᓂᒋᑦ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᐃᓕᓐᓂᐊᖅᑎᑦᑎᖃᑦᑕᖅᑕᖏᑦ. ᓴᓇᕙᒃᑭᕗᖅ ᓇᐹᖅᑐᕕᓂᕐᓂᒃ ᐊᒻᒪ ᕿᕐᓂᖅᑕᓂᒃ ᐊᕐᔭᓂᒃ ᐴᒃᓴᓂᒃ. "ᐊᒃᓱᕉᑎᖃᒻᒪᕆᒃᐳᖓ ᐊᓯᐅᑎᑦᑎᑦᑕᐃᓕᒪᓂᕐᒥᒃ ᑕᒪᒃᑯᓂᖓ ᐱᓕᕆᔾᔪᓯᕐᓂᒃ ᓲᖃᐃᒻᒪ ᐊᒥᓲᙱᑦᑐᑦ ᐃᓄᐃᑦ ᑕᐃᒪᐃᓕᐅᖅᐸᙱᒻᒪᑕ... ᐱᔪᒃᓯᑎᑕᐅᔪᒪᑦᑎᐊᖅᐳᖓ ᐃᓕᖅᑯᓯᑦᑎᓐᓂᒃ ᓇᑭᙶᖅᓯᒪᓂᓐᓂᑦᑕᐅᖅ," ᐅᖃᕆᓪᓗᓂ. ᐱᔪᒃᓯᓯᒪᖕᒥᔪᖅ Woodland ᓴᓇᙳᐊᒐᖏᓐᓂᒃ.

ᐃᓱᓕᑉᐸᓪᓕᐊᓕᕐᓗᓂ, ᑳᒻᐸ ᐅᖃᕈᒪᕗᖅ, "ᐃᓴᕈᒃᑭᒃ ᐃᓴᕈᒃᑭᒃ ᖃᖓᑕᓗᓯᓗ, ᐱᓇᔪᒍᓐᓇᖅᐳᑎᑦ ᒪᓕᒡᓗᓯᓗ ᑕᐅᑐᙳᐊᖅᑕᕐᓂᒃ. ᑕᐅᑐᙳᐊᖅᑕᑎᑦ ᒪᓕᑦᑎᐊᖅᐸᒡᓗᒋᑦ ᐱᔪᓐᓇᕐᓂᓕᒫᕐᓂ. ᑭᓇᑐᐃᓐᓇᕐᒧᑦ ᓴᖑᑎᑕᐅᑦᑕᐃᓕᒋᑦ ᐱᓇᓱᐊᖅᑕᕐᓄᑦ, ᐱᖃᓐᓇᕆᔭᕐᓄᑦ, ᖃᑕᙳᑎᖕᓄᓪᓘᓐᓃᑦ, ᑭᓇᑐᐃᓐᓇᕐᒧᑦ ᐊᖓᔪᖅᑳᒧᑦ, ᐃᓚᐅᓪᓗᑎᒃ ᐊᖓᔪᖅᑳᑎᑦ... ᐊᑕᐅᓯᑐᐊᕐᒥᒃ ᐃᓅᓯᖃᕋᑦᑕ....ᐱᕕᒃᓴᕆᔭᐃᑦ ᐊᑐᑦᑎᐊᕐᓗᒍ, ᓲᖃᐃᒻᒪ ᐱᒻᒪᕆᐊᓘᖕᒪᑦ, ᑕᒪᑦᑕᓗ ᐃᓐᓇᕈᕈᓐᓇᙱᖦᖢᑕ.. ᐱᕕᒃᓴᕆᔭᐃᑦ ᐃᓱᒪᒋᑐᐃᓐᓇᙱᓪᓗᒍ, ᖃᐅᒃᐸᑦ ᐊᐅᓪᓚᑐᐃᓐᓇᕆᐊᖃᕋᑦᑕ. ᐊᔪᕈᓐᓃᖅᓴᖅᐸᒡᓗᑎᑦ ᖁᔭᓕᓂᕐᒥᒃ ᐊᔪᕐᓇᙱᑐᐊᕌᖓᑦ, ᒥᑭᑦᑐᑯᓘᒐᓗᐊᖅᐸᑦ, ᐃᓕᖕᓂᒃ ᐃᑲᔪᕋᔭᖅᑐᒥᒃ ᖁᔭᓕᓂᕐᒥᒃ ᓇᖕᒥᓂᖅ ᐃᓅᓯᕐᓂᒃ ᖃᓄᐃᓕᐅᕈᓐᓇᕐᓂᕐᓂᒃᓗ.  ᖃᐅᔨᔪᒪᑦᑎᐊᕐᓗᑎᑦ. ᒪᓕᒃᐸᒡᓗᒋᑦ ᖃᐅᔨᔪᒪᔭᑎᑦ, ᓲᖃᐃᒻᒪ ᖃᐅᔨᒪᕙᙱᓐᓇᕕᑦ ᖃᓄᐃᑦᑐᓂ ᖃᐅᔨᓂᐊᕐᒪᖔᖅᐱᑦ ᐃᓕᖕᓂᒃ ᐱᓕᕆᓕᕈᕕᑦ. ᑲᑉᐱᐊᓱᙱᓪᓗᑎᑦ ᐱᓇᓱᐊᕆᐊᒃᓴᖅ ᐊᔾᔨᒋᙱᑕᖏᓐᓂᒃ ᒫᓐᓇ ᐱᓕᕆᐊᕆᔭᕐᓂᒃ, ᓲᖃᐃᒻᒪ ᑕᒪᕐᒥᑦᑎᐊᖅ ᐃᓅᔪᓐᓇᖅᑐᓕᒫᑦ ᐃᓅᓯᕐᓂ, ᑕᐃᒪᐃᑉᐸᒌᖅᐳᑎᑦ. ᑲᑉᐱᐊᓱᙱᓪᓗᓯ ᐅᔭᖅᑲᐃᑦ ᓴᖑᑎᒋᐊᒃᓴᖅ, ᑕᑯᓂᐊᕐᓗᓯᓗ ᑭᓱᑦ ᐹᕐᖑᕐᒪᖔᑕ."

ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᑎᐅᓪᓗᓂ ᐊᑐᖅᖢᓂ ᐊᔾᔨᒌᙱᑦᑐᓂᒃ ᐱᓕᕆᔾᔪᑕᐅᕙᒃᑐᓂᒃ, ᑯᕋᐃᒡ ᑳᒻᐸ ᖃᐅᔨᓇᓱᒃᐸᒃᐳᖅ ᓴᓇᙳᐊᕐᓂᕐᒥᒃ ᖃᐅᑕᒫᑦ. ᐱᒋᐊᓚᐅᖅᓯᒪᕗᖅ ᓂᔾᔭᐅᓯᔭᕐᓂᕐᒥᒃ ᑕᕐᕆᔭᐅᓯᐅᕐᓂᕐᒥᒡᓗ ᐊᒻᒪ ᓴᐸᖓᓕᕆᓂᕐᒥᒃ, ᕿᑐᒻᒪᒃᓴᐃᓂᕐᒥᒃ, ᐊᓐᓄᕌᓕᐅᕐᓂᕐᒥᒃ, ᓴᓇᙳᐊᕐᓂᕐᒥᒃ ᐊᓯᕈᓘᔭᖏᓐᓂᒡᓗ. ᐃᓕᑦᑎᕙᓪᓕᐊᔪᒻᒪᕆᐅᕗᖅ ᐊᒻᒪ ᑐᓂᓯᕙᓪᓕᐊᓪᓗᓂ, ᐅᖃᐅᓯᖃᖅᖢᓂ ᐃᓕᑕᒥᓂᒃ ᐃᓚᒋᔭᐅᓪᓗᓂ ᓴᖅᑭᑉᐸᓪᓕᐊᓂᐅᔪᒧᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.