ᑖᑯᑕ ᓇᓄᖅ 26-ᓂᒃ ᐅᑭᐅᓕᒃ hip hop-ᒥ ᓴᓇᙳᐊᖅᑎ, ᓄᓇᒥ ᓴᐳᔾᔨᔨ, ᐅᓇᑕᖅᑎ, ᐊᓐᓄᕌᓂᒃ ᐋᖅᑭᒃᓱᐃᔨ, ᓇᖕᒥᓂᖃᖅᑎᓄᑦ ᖃᐅᔨᒃᑲᐃᔨ, ᐅᖃᖅᑎ, ᐊᒻᒪ ᒪᒃᑯᒃᑐᓄᑦ ᑲᔪᖏᖅᓴᐃᔨᒋᔭᐅᔪᖅ 6-ᒥ ᓄᓇᕘᒥ. ᐱᔪᒪᓂᖃᕐᓂᖓ ᐅᖃᓪᓚᒃᐳᖅ ᐆᒻᒪᕆᖕᓂᖓᓄᑦ ᐱᔪᒃᓯᑦᑎᐊᕐᓂᖓᓄᓪᓗ; ᐊᒻᒪᓗ, ᐅᓄᖅᑐᓂ ᐱᓇᓱᐊᖅᑕᖏᓐᓂ, ᑕᑰᑕ ᓄᓇᖃᖅᑳᖅᓯᒪᔪᑦ ᐃᓕᓴᕐᓇᐅᑎᖏᓐᓂ ᓯᕗᕌᓄᐊᖅᓯᕗᖅ.

"ᑎᑎᕋᖅᑐᖓ ᐃᙱᐅᓯᕐᒥᒃ ᐅᕝᕙᓘᓐᓃᑦ ᐱᓕᕆᐊᒃᓴᓕᐅᕐᓗᖓ, ᐃᓱᒪᐃᓐᓇᓲᖑᔪᖓ ᑭᓇ ᓈᓚᖕᒪᖔᑦ, ᐊᒻᒪ ᑭᓱᓂᒃ ᐱᖕᒪᖔᑕ... ᑲᔪᖏᖅᓴᐃᓂᖅ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖓᓐᓃᙶᖅᑐᖅ."

ᑖᓐᓇ ᑕᕝᕙ Dakota−ᑯᑦ ᐱᓕᕆᐊᖓ ᐅᓇᑕᖅᑎᐅᓪᓗᓂ ᓇᖕᒥᓂᖃᖅᖢᓂ ᐃᒪᓐᓇ ᐱᔾᔪᑎᖃᖅᐳᖅ: "ᐱᒻᒪᕆᐅᒋᔭᐅᔪᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖓᓐᓄᑦ ᐊᒻᒪ ᓇᖕᒥᓂᖅ ᐱᓕᕆᕝᕕᑦᑎᓐᓄᑦ ᓇᒃᓴᕐᓗᒋᑦ: ᐅᕙᑦᑎᓐᓂᒃ ᑲᔪᓯᑎᑦᑎᑦᑎᐊᕐᓂᖅ, ᓄᓇᓕᖕᓄᑦ ᐅᑎᖅᑎᓪᓗᑕ, ᐱᔭᕆᐊᖃᖅᑕᑦᑎᓐᓂᒃ ᐊᑐᑐᐃᓐᓇᕋᓗᐊᕐᒪᖔᑦᑕ." ᑕᑰᑕ ᓴᓇᖃᑦᑕᖅᑐᖅ ᐃᓘᓐᓇᖏᓐᓂᑦ ᓇᒻᒥᓂᖁᑎᖏᓐᓂᑦ ᑖᑦᓱᒧᖓ ᐱᐅᓚᕆᑦᑐᒧᑦ ᐃᓕᖅᑯᓯᖃᕐᓂᕐᒥᑦ, ᐊᑐᐃᓐᓇᐅᑎᑦᓯᓂᕐᒥᓪᓗ ᐅᖃᐅᔾᔪᐃᓂᕐᒥᑦ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᓇᒻᒥᓂᖁᑎᓕᓐᓄᑦ.

ᑖᑯᑕ ᓂᔾᔭᐅᓯᔭᖅᓯᒪᓕᕋᓗᐊᖅᑎᓪᓗᒍ ᐊᕐᕌᒍᓄᑦ ᖁᓕᓄᑦ, ᑭᓯᐊᓂ ᐃᓕᓐᓂᐊᕆᐊᖅᓯᒪᓕᖅᖢᓂ ᓇᖕᒥᓂᖃᕐᓂᕐᒧᑦ ᐃᓕᓐᓂᐊᖅᖢᓂ ᕚᓐᑰᕗᒥ ᖃᐅᔨᓚᐅᖅᑐᖅ ᐱᔪᒃᓯᑦᑎᐊᓕᒃᑲᓐᓂᖅᖢᓂ, "ᖁᕕᐊᒋᑐᐃᓐᓇᙱᖦᖢᒍ ᐅᕝᕙᓘᓐᓃᑦ ᖃᓄᑐᐃᓐᓇᖅ ᓂᕆᑎᓚᐅᖅᓯᒪᔭᕋ ᓴᓇᑐᓂᒃᑯᑦ, ᑭᓯᐊᓂ ᐃᖅᑲᓇᐃᔮᖃᕈᓐᓇᖅᓯᓚᐅᖅᑐᖓ."

ᑖᑯᑕ ᐊᑐᕈᓐᓇᓚᐅᖅᑐᖅ ᐃᓕᑕᒥᓂᒃ ᐃᓄᖕᓄᑦ, ᓂᐅᕐᕈᑎᖃᕋᓱᐊᕐᓂᕐᒥᒃ, ᓇᐅᒃᑯᑐᐃᓐᓇᕐᓗ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ ᐊᓯᖏᓐᓄᑦ ᐱᓕᕆᐊᕆᔭᖏᓐᓄᑦᑕᐅᖅ. "ᐃᓕᓐᓂᐊᕐᓂᖅ ᐅᕙᓐᓄᑦ ᐃᑲᔫᑎᖃᕐᔪᐊᓚᐅᖅᑐᖅ. ᐃᓕᑦᑎᔪᒻᒪᕆᐅᓚᐅᖅᑐᖓ ᑕᖅᑭᑦ 8 ᐃᓗᐊᓂᑦ." ᑭᓯᐊᓂ ᑕᑰᑕ ᐃᓕᑦᑎᓯᒪᖕᒥᔪᖅ ᐱᙱᓐᓂᖅᓴᐅᔪᓂᒃ, ᐊᒻᒪᓗᑦᑕᐅᖅ: "[ᐅᕙᖓ] ᖃᕋᓴᐅᔭᒃᑯᑦ ᐃᓕᓐᓂᐊᖅᑎᑦᑎᓚᐅᖅᑐᖓ ᓇᓂᑐᐃᓐᓇᖅ, ᓄᓇᖃᖅᑳᖅᓯᒪᔪᑦ ᐃᓕᓴᐃᔨᖃᕐᖢᑎᒃ ᖃᕋᓴᐅᔭᒃᑯᑦ ᑕᕐᕆᔮᒃᓴᓂᒃᓘᓐᓃᑦ, ᖃᓄᕐᓗ ᐃᓕᓴᐃᔪᓐᓇᕐᒪᖔᑕ. ᐊᒻᒪᓗ ᑕᒪᓐᓇ ᖃᐅᔨᒪᓂᖅ ᐊᑐᕐᓗᒍ... ᐊᒻᒪᓗ ᐊᑐᕐᓗᒍ ᑕᒪᓐᓇ ᐃᑲᔪᕐᓂᐊᕐᓗᓂ ᓴᖅᑭᑎᑦᑎᓂᕐᒧᑦ [a]-ᒥᒃ ᓇᖕᒥᓂᕆᔭᐅᔪᒥᒃ."

ᑖᑯᑕᐅᑉ ᐱᓕᕆᐊᖏᑦ ᓴᖅᑭᑦᑎᓂᑐᐃᓐᓇᐅᙱᑦᑐᖅ, ᑭᓯᐊᓂᑦᑕᐅᖅ ᐊᒥᖅᑳᖃᑎᖃᖕᓂᖅ. "ᑐᙵᕕᒋᔭᓐᓂ, ᑐᓴᖅᑎᑦᑎᔪᒪᒐᓗᐊᖅᐳᖓ ᓂᕆᐅᒋᔭᖃᕐᓂᕐᒥᒃ ᒪᒃᑯᒃᑐᓄᑦ ᓄᓇᖃᖅᑳᖅᓯᒪᔪᓄᑦ, ᐊᒻᒪᓗ ᓱᓕᔪᓂᒃ ᐅᔾᔨᕈᓱᒃᑎᑦᑎᓂᕐᒥᒡᓗ ᐱᔾᔪᑕᐅᓲᓂᒃ ᓄᓇᖃᖅᑳᖅᓯᒪᔪᖑᓪᓗᑕ, ᑐᓴᕐᓈᕐᓂᒃᑯᑦ, ᐅᕝᕙᓘᓐᓃᑦ ᐊᓐᓄᕌᒃᑯᑦ ᐅᕙᖓ ᐱᓕᕆᖃᑎᒋᔭᕐᒪᓗ ᐋᖅᑭᒃᓯᒪᓂᖓᒍᑦ, ᐅᕝᕙᓘᓐᓃᑦ ᐅᖃᓪᓚᖕᓂᖅᓴᐅᓗᑕ ᐃᓕᓐᓂᐊᕐᕕᖕᓂ....................

ᑖᑯᑕᐅᑉ ᐱᔪᒃᓯᑦᑎᐊᕐᓂᕆᔭᖓ ᑕᓯᐅᖅᓯᔪᒪᓪᓗᓂ ᐱᔪᒃᓯᑎᑦᑎᓪᓗᓂᓗ ᐊᓯᒥᓂᒃ ᐱᒋᐊᑐᐃᓐᓇᕆᐊᓕᒃ ᐊᔪᕈᓐᓃᖅᓴᖅᑎᑕᐅᓂᕐᒥᒃ ᑕᓯᐅᖅᓯᓂᕐᒥᒡᓗ ᐱᓚᐅᖅᑕᖓᓂᒃ ᒪᒃᑯᒃᑎᓪᓗᒍ ᐊᒃᓱᕈᕐᓇᖅᑐᒃᑰᖅᑎᓪᓗᒍᓗ. "ᐊᑖᑕᒐ ᐊᓂᑎᓪᓗᒍ, ᐊᒃᑲᒃᑲ ᐅᕙᓐᓂᒃ ᐃᓕᓐᓂᐊᖅᑎᑦᑎᔪᒪᖃᑦᑕᓚᐅᖅᐳᖅ ᐱᕈᖅᓴᔭᕆᐊᖃᖅᑕᓐᓂᒃ ᒪᒃᑯᒃᑎᓪᓗᖓ. ᑕᐃᒃᑯᐊ ᑲᔪᖏᖅᓴᐃᔨᐅᖁᓪᓗᒋᑦ ᐃᓅᓯᓐᓂ, ᑕᐃᒃᑯᐊ ᐃᓚᒌᑦ, ᐃᑲᔪᖅᑐᒻᒪᕆᐅᓚᐅᖅᑐᑦ ᐅᕙᓐᓂᒃ."

ᐅᒡᒍᓇᖅᑑᒐᓗᐊᖅ, ᑖᑯᑕᐅᑉ ᐊᒃᑲᖓᑕ ᐃᓚᖓ ᐃᓅᔪᓐᓃᓚᐅᕐᒪᑦ 2016-ᒥ. ᐊᓯᐅᔨᓪᓗᓂᐅᒃ ᐃᑲᔪᓚᐅᖅᑐᖅ ᑖᑯᑕᒥᑦ ᑐᑭᓯᒃᑲᓐᓂᖅᖢᓂ ᐱᒻᒪᕆᐅᔪᒥᑦ ᐊᒃᑲᖓᑕ ᐱᓕᕆᐊᖓᓂᑦ ᑖᑯᑕᐅᑉ ᐃᓅᓯᖓᓂᑦ. "ᐅᔾᔨᕈᓱᓕᓚᐅᖅᑐᖓ ᐱᒻᒪᕆᐅᓂᖓᓂᒃ ᑕᐃᑲᓃᑦᑐᖃᕆᐊᒃᓴᖅ... ᑕᐃᒪᓐᓇᓗ ᐊᖏᖅᓯᒪᕗᖓ ᐃᑲᔪᕈᒪᓪᓗᖓ ᒪᒃᑯᒃᑐᓂᑦ... ᓲᕐᓗ ᓂᑲᒍᓱᑐᐃᓐᓇᖅᑐᑎᑐᑦ."

ᑕᑰᑕ ᐅᖃᐅᓯᖃᖅᑐᖅ ᒪᒃᑯᖕᓂᖅᓴᒥᒃ "ᐊᒃᓱᕈᕐᓇᖅᑐᐊᓘᓂᖓᓂᒃ ᑕᒻᒪᖅᖢᓂ... ᐱᓱᑲᑕᕈᓘᔭᕐᓂᖅ, ᐱᕕᖃᕐᓂᖅ, ᐃᒥᕐᓂᖅ ᐊᒻᒪ ᐃᒥᕐᓂᖅ." ᐊᕐᕌᒍᒐᓵᓗᖕᓂᑦ ᖃᐅᔨᓕᓚᐅᕋᓂ ᑕᐃᒫᒃ ᐃᓕᖅᑯᓯᖃᓕᓚᐅᖕᒪᑦ "ᐊᒃᓱᕈᖅᖢᓂ ᐱᐅᙱᑦᑐᒥᑦ ᑭᖑᕚᕇᓄᑦ ᖁᐊᖅᓵᖓᓇᖅᑐᒃᑰᖅᖢᓂ."

ᑖᑯᑕ ᓇᓗᓇᐃᖅᓯᔪᖅ ᑐᑭᖓᓂᑦ ᑖᑦᓱᒪ ᓴᙱᔪᒥᑦ ᑕᐃᒎᓯᕐᒥᑦ: "ᑭᖑᕚᕇᓄᑦ ᖁᐊᖅᓵᖅᓯᒪᓂᖅ' ᐃᑉᐱᓐᓂᐊᓂᖃᖅᑐᖅ ᐊᑦᑐᖅᑕᐅᓂᖏᓐᓄᑦ ᐊᓂᒍᐃᓂᕐᒧᑦ ᐱᔪᓐᓇᐅᑎᓕᕆᓂᕐᒧᓪᓗ ᐊᑐᖅᑕᐅᖃᑦᑕᖅᑐᓂᑦ, ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, 60-ᖏᓐᓂᑦ ᐊᒻᒪᓗ ᐅᖓᑖᓄᑦ, ᖁᐊᖅᓵᖅᓯᒪᓇᕐᓂᖏᑦ ᑖᒃᑯᐊ ᐊᓈᓇᑦᓯᐊᑦᑕ ᐊᑖᑕᑦᓯᐊᑦᑕ ᐊᖓᔪᖅᑳᕗᓪᓗ ᐃᑉᐱᓐᓂᐊᓂᖃᖅᓯᒪᔪᑦ ᐅᕙᑦᑎᓄᑦ ᐊᖅᑯᓵᖅᓯᒪᖏᑦᓱᑎᒃ. ᑕᒪᓐᓇ ᐊᐅᒃᑯᑦ ᑲᒪᒋᕙᑉᐸᕗᑦ, DNA-ᑯᑎᒍᑦ ᑲᒪᒋᕙᑉᐸᕗᑦ. ᖁᐊᖅᓵᖅᓯᒪᓂᖅ ᐊᑕᑎᑕᐅᔪᓐᓇᖅᑐᖅ ᑕᐃᒫᒃ."

ᐊᑖᑕᖃᕐᖢᓂ ᐅᐸᙱᖦᖢᓂ, ᐊᓈᓇᐅᔪᖅ ᐸᑦᑕᒃᓯᒪᔪᖅ, ᐊᓯᖏᓪᓗ ᖃᑕᙳᑎᒋᔭᐅᔪᑦ ᐊᒃᓱᕉᑎᖃᖅᑐᑦ ᐃᒥᐊᓗᓗᐊᕐᓂᕐᒥᒃ, ᑖᑯᑕ ᕿᓂᕐᖢᓂ ᐱᐅᔪᓂᒃ ᐆᒃᑑᑎᓂᒃ ᐊᔾᔨᕐᓚᒋᓪᓗᓂᐅᒃ ᑲᔪᓯᑎᑕᐅᔪᖅ ᓄᓇᖃᖅᑳᖅᓯᒪᔪᑦ ᐊᐅᖏᑎᒍᑦ.

"ᖃᐅᔨᒪᒋᕗᖅᑕᐅᖅ ᓴᐱᓕᖅᓴᕋᐃᙱᓐᓂᑦᑎᓐᓂ. 500-ᓂᒃ ᐊᕐᕌᒍᓂᒃ ᖃᓪᓗᓈᖑᖃᑎᒌᑦ ᐊᖅᑯᓵᖃᑦᑕᖅᓯᒪᔭᕗᑦ, ᐊᒃᓱᕈᕈᑎᓕᒫᑎᒍᑦ ᐊᒻᒪᓗ ᖃᐅᒪᓂᒃᑯᑦ, ᑕᕝᕘᓇᓕᒫᖅ, ᓱᓕ ᑕᒫᓃᒃᑲᑦᑕ. ᓱᓕ ᑲᔪᓯᔪᒍᑦ. ᓱᓕ ᐱᕈᖅᐸᓪᓕᐊᔪᒍᑦ. ᐃᓕᑉᐸᓪᓕᐊᔪᒍᑦ ᓱᓕ ᐃᓕᖅᑯᓯᑦᑎᓐᓂᒃ. ᓱᓕ ᐅᖃᐅᓯᑦᑎᓐᓂᒃ ᐃᓕᑉᐸᓪᓕᐊᔪᒍᑦ. ᖃᐅᔨᒪᑦᑎᐊᖅᖢᑕᓗ ᐱᕈᕈᓐᓇᕐᓂᑦᑎᓐᓂᒃ ᓯᕗᒻᒧᐊᒍᓐᓇᖅᖢᑕᓗ."

ᐅᓪᓗᒥ, ᑕᑰᑕ ᕚᓐᑰᕙᒥ ᓄᓇᖃᖅᑐᖅ, ᐊᒥᓱᓂᒃ ᐱᔪᒪᔭᒥᓂᒃ ᐱᓕᕆᓪᓗᓂ − ᓂᔾᔭᐅᓯᔭᕐᓂᖅ, ᑕᕐᕆᔮᒃᓴᑦ, ᐋᖅᑭᒃᓱᐃᓂᖅ, ᒪᒃᑯᒃᑐᓂᒃ ᐃᓕᓐᓂᐊᖅᑎᑦᑎᓂᖅ, ᓇᖕᒥᓂᖃᕐᓂᖅ, ᐊᒻᒪ ᐅᔾᔨᕈᓱᓕᖅᑎᑦᑎᓂᖅ ᓄᓇᖃᖅᑳᖅᓯᒪᔪᑦ ᓄᓇᖓᓂ ᐊᒻᒪ ᐱᔪᓐᓇᐅᑎᖏᓐᓂᒃ − ᐊᒻᒪᓗᑦᑕᐅᖅ ᓇᒡᓕᒍᓱᖕᓂᖅ, ᐅᓪᓗᓕᒫᖅ ᐊᐃᑉᐸᕆᔭᐅᓂᖅ ᐊᒻᒪ ᐊᑖᑕᐅᓂᖅ. ᑖᓐᓇ ᖃᑕᙳᑎᖏᓪᓗ ᐃᓕᖅᑯᓯᕐᒥᓂᒃ ᐊᑐᖃᑦᑕᖅᐳᑦ ᑲᑎᙵᖃᑎᒌᖏᓐᓇᖅᖢᑎᒃ ᐊᒻᒪ ᑐᙵᑦᑎᐊᖅᐸᒃᖢᑎᒃ, ᑐᒃᓯᐊᕐᓂᒃᑯᑦ, ᓴᒡᓗᓪᓗᑎᒃ, ᖁᔭᓕᓪᓗᑎᒃ, ᐊᒻᒪ ᐊᐅᓪᓛᖅᓯᒪᓪᓗᑎᒃ. "ᑕᒪᒃᑯᐊ ᐱᐅᔪᐊᓘᖕᒪᑕ ᓂᕆᑎᖦᖢᑎᒍᓪᓗ, ᓂᕆᑎᑉᐸᒃᑎᒍᑦ ᑕᕐᓂᕗᑦ."

ᑕᑰᑕ ᖃᐅᔨᒪᔪᖅ ᐊᒥᓱᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᑲᑕᒃᓯᒪᑐᐃᓐᓇᕆᐊᖃᕐᓂᖏᓐᓂᒃ ᑭᖑᕚᕇᓄᑦ ᖁᐊᖅᓵᖅᓯᒪᓂᕐᒧᑦ, ᐊᒻᒪ ᐅᖃᐅᓯᕆᔭᖓ − ᑐᓴᕐᓈᕐᓂᖓᑎᑐᑦ − ᑕᐃᒃᑯᓄᖓ ᑐᕌᖓᖕᒪᑦ.

"ᖃᐅᔨᒪᓂᖅᓴᐅᔪᒪᓇᔭᖅᐳᖓ ᒪᒃᑯᖕᓂᖅᓴᐅᑎᓪᓗᖓ. ᑐᑭᓯᒃᑲᓐᓂᕈᒪᒐᓗᐊᖅᑐᖓ ᑕᒪᒃᑯᓂᖓ, ᐅᖃᖃᑎᖃᕐᓗᖓ ᐃᓅᓯᓕᕆᔨᓂᒃ, ᒪᒥᓴᐃᓂᕐᒥᒃ ᑕᒪᒃᑯᓂᖓ. ᒫᓐᓇ ᐱᓕᕆᐊᕆᓕᖅᑕᕋ. ᑭᖑᕙᓗᐊᓐᖏᑦᑐᖅ. 26-ᓂᒃ ᐊᖏᖅᑐᖓ, ᖃᓄᐃᒐᓂᓗ. ᐱᕕᖃᖅᑎᓚᐅᑲᒃᖢᒋᑦ ᐃᓕᑦᑎᓇᓱᒃᑎᓪᓗᖓ. ᐃᒻᒥᓂᒃ ᐋᓐᓂᖃᑦᑕᖅᑐᖓ ᐊᒻᒪᓗ ᑕᒻᒪᖃᑦᑕᓚᐅᖅᑐᖓ. ᑭᓯᐊᓂ ᐱᕈᖅᓯᒪᕗᖓ ᑕᒪᒃᑯᓂᖓ.

"ᑕᐃᒪᓕ ᐅᖃᐅᑎᓇᔭᖅᑕᒋᑦ ᐃᓕᖕᓂᒃ ᑲᒪᒋᑐᐃᓐᓇᕋᔭᖅᐳᑎᑦ ᖃᐅᔨᒪᒋᐊᕐᓗᑎᓪᓗ ᑭᓱᒥᑭᐊᖅ ᐅᖁᒪᐃᓐᓂᖃᕈᕕᑦ ᓴᒡᕕᒃᑯᑦ ᐊᒻᒪ ᖃᓄᑐᐃᓐᓇᖅ ᐊᑐᕈᕕᑦ, ᖃᓄᐃᙱᑦᑎᐊᕐᓇᖅᑐᓂᒃ ᐊᑐᒐᒃᓴᖅᑕᓕᒃ ᑲᒪᒋᓂᐊᕐᓗᒋᑦ ᑕᒪᒃᑯᐊ. ᐃᓕᑦᑎᕝᕕᒋᔪᓐᓇᖅᑕᓯ, ᐱᕈᕈᓐᓇᖅᑐᓯ, ᓴᙱᔪᒻᒪᕆᐅᓗᑎᓪᓗ... ᖃᐅᔨᒪᒋᐊᕐᓗᑎᑦ ᐱᐅᔪᒥᒃ ᐃᑲᔪᖅᑕᐅᔾᔪᑎᖃᕐᓗᑎᑦ ᐊᒻᒪᓗ... ᐃᒻᒥᓂᒃ ᐅᖃᐃᓐᓇᖃᑦᑕᕋᕕᑦ ᐊᒻᒪᓗ ᑕᒪᓐᓇ ᐅᖃᐅᓯᕆᑐᐃᓐᓇᕐᓇᒍ, ᒥᑕᐅᑎᒋᓐᖏᓪᓗᒍ. ᐊᒻᒪᓗ ᖃᐅᔨᒪᑦᑎᐊᕐᓗᑎᑦ [ᑐᕌᒐᖃᐃᓐᓇᕐᓗᑎᑦ] ᖃᓄᐃᙱᑦᑎᐊᕐᓗᑎᑦ ᖁᕕᐊᓱᒡᓗᑎᓪᓗ."

ᐃᓱᒪᖅᓱᕐᓂᖅ, ᑖᑯᑕ ᓇᓄᕐᒧᑦ

"ᑐᓴᕐᓂᐊᖅᑕᑦᑎᒋᑦ ᐅᖓᓯᒋᒐᓗᐊᕐᓗᒍ/

ᓱᕈᓯᐅᔪᒍᑦ ᐊᓂᑕᐅᓚᐅᖅᑎᓪᓗᑎᑦ/

ᑐᕌᒐᕆᔭᕗᑦ ᖃᐅᔨᙱᑐᐃᓐᓇᖅᑕᑎᑦ/

ᑭᖑᕚᕆᔭᐅᒐᑦᑕ ᒪᒥᓴᐃᔨᓄᑦ ᐊᒻᒪ ᐊᖓᔪᖅᑳᓄᑦ/

ᖃᐅᔨᒪᑐᐃᓐᓇᖅᑐᒍᑦ ᐊᒃᓱᕈᕐᓂᕆᔭᕗᑦ ᓇᐃᑦᑑᒻᒪᑕ...

ᐅᓇᑕᖅᑎᐅᔪᒍᑦ!"

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.