ᑖᓚᔅ ᕝᓚᑦ−ᕙᐸᔅ ᓄᑖᖑᕗᖅ ᖃᓄᐃᓕᐅᖃᑦᑕᖅᑕᒥᓄᑦ ᑭᓯᐊᓂ ᐃᓱᒪᑦᑎᐊᕐᓇᖅᖢᓂ. ᕝᓚᑦ−ᕙᐸᔅ, ᑮᓯᑰᔅ ᓄᓇᖃᖅᑳᖅᓯᒪᔪᓂᑦ ᑭᓯᐊᓂ ᒫᓐᓇ ᑉᕌᓐᑕᓐ, ᒫᓂᑑᐸᒥᐅᑕᐅᕗᖅ, ᐱᙳᐊᒐᒃᓴᓂᑦ ᐋᖅᑭᒃᓱᐃᔨᐅᓪᓗᓂ ᐊᒻᒪᓗᑦᑕᐅᖅ ᐱᓕᕆᖃᑎᒌᒃᐸᒃᖢᓂ.

"ᑲᔪᓯᑦᑎᐊᑦᑎᐊᖅᑐᖅ. ᐊᒻᒪᓗ ᖁᕕᐊᒋᔭᖃᕈᕕᑦ ᐱᙳᐊᕐᓂᐅᔪᓂᒃ, ᑕᐃᒪᓕ ᑕᒪᓐᓇ ᓱᒃᑲᓕᓂᖅᓴᐅᕗᖅ. ᐊᑑᑎᖃᖅᑰᔨᙱᑦᑐᖅ. ᐊᓕᐊᓇᐃᑦᑐᒻᒪᕆᐅᓪᓗᓂᓗ," ᐅᖃᖅᑐᕕᓂᖅ ᕝᓚᑦ−ᕙᔅ.

ᕝᓚᑦ−ᕙᐸᔅ ᐱᔪᒪᑦᑎᐊᓚᐅᖅᑐᖅ ᑕᕐᕆᔮᒃᓴᓕᐅᕐᖢᓂ ᐱᙳᐊᕈᑎᓂᒃ ᓄᑕᕋᐅᑎᓪᓗᒍ, ᓲᖃᐃᒻᒪ ᐃᒃᐱᖕᓂᐊᑎᑦᑎᕙᓚᐅᕐᒪᑕ ᐃᒃᐱᖕᓂᐊᓂᕐᒥᒃ. ᐃᓐᓇᕈᖅᐸᓪᓕᐊᓕᖅᑎᓪᓗᒍ ᐅᔾᔨᕈᓱᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᑕᕐᕆᔮᒃᓴᑦ ᐱᑕᖃᑦᑎᐊᙱᓐᓂᖏᓐᓂᒃ ᐱᙳᐊᕈᑎᓂᒃ ᐃᖏᕐᕋᓂᓪᓗᐊᑕᒃᑯᑦ ᐅᕝᕙᓘᓐᓃᑦ ᓄᓇᖃᖅᑳᖅᓯᒪᔪᑦ ᐱᐅᓯᖏᓐᓂᒃ "ᓇᖕᒥᓂᖅ−ᓇᓗᓇᐃᖅᑕᐅᓯᒪᔪᒃᑯᑦ."

"ᐱᔪᒪᓇᔭᖅᑕᕋ ᐃᓚᖓ ᐱᑕᖃᙱᓐᓂᐅᔪᖅ ᐃᓗᓪᓕᖅᓱᕐᓗᒍ, ᑭᓯᐊᓂᑦᑕᐅᖅ ᐊᓯᒃᑲ ᐃᑲᔪᕐᓗᒋᑦ ᐅᒃᐱᕈᓱᒃᓗᑎᒃ ᑕᐃᒪᓐᓇᑦᑕᐃᓐᓇᖅ ᐱᓕᕆᔪᓐᓇᕐᓂᖏᓐᓂᒃ," ᐅᖃᖅᑐᖅ ᕝᓚᑦ−ᕙᐸᔅ.

10-ᓂᒃ ᐅᑭᐅᖃᖅᑎᓪᓗᒍ, ᐱᙳᐊᕈᒪᓂᖃᓚᐅᖅᑐᖅ ᑭᓯᐊᓂ ᖃᐅᔨᒪᙱᖦᖢᓂ ᖃᓄᖅ, ᐅᖃᖅᖢᓂᓗ ᐃᓕᓐᓂᐊᖅᑕᖓ ᐃᒻᒥᓂᒃ−ᐊᐅᓚᑕᐅᓂᕋᖅᖢᓂᐅᒃ.

ᐊᑯᓂᒻᒪᕆᒃ ᐃᓕᓐᓂᐊᓚᐅᖅᑎᓪᓗᒍ ᐊᔾᔨᓕᐅᕈᑎᒥᒃ ᐊᔾᔨᓕᐅᕆᓪᓗᓂ ᐊᖏᕐᕋᖓᓂ ᐊᒻᒪᓗ ᐋᖅᑭᒃᓱᐃᓪᓗᓂ ᑕᕐᕆᔮᒃᓴᒥᒃ ᖃᕋᓴᐅᔭᖓᓂ, ᐃᓕᓐᓂᐊᖅᑐᓂ ᐊᑐᖅᑐᓂ ᒎᒍᓪᒥᒃ ᐊᒻᒪᓗ ᓇᓂᓯᓪᓗᓂ ᐊᑭᖃᙱᑦᑐᒥᒃ ᖃᕋᓴᐅᔭᓕᕆᔾᔪᑎᒥᒃ ᐊᑐᕈᓐᓇᕋᔭᖅᑕᖓᓂᒃ ᓴᓇᓯᒪᔭᖓᓄᑦ.

ᒍᕋᐃᑦ 12-ᒦᑎᓪᓗᒍ, ᐃᓕᓐᓂᐊᕐᕋᔅᓴᐃᑦ ᐊᑦᔨᒌᖏᑦᑐᓂᒃ ᓄᓇᓕᐸᐅᔭᓂᒃ ᓄᐊᕙᐃ ᐃᓪᓗᖓᓅᓚᐅᖅᑐᖅ ᑕᐃᒃᓱᒪᓂ ᐊᒻᒪᓗ ᖃᐅᔨᓪᓗᓂ ᐋᔅᓂᐳᐃᓐ ᓯᓚᑦᑐᕐᓴᖅᕕᖓᓂᒃ ᐳᕌᓐᑕᓐᒥ.

ᓴᖅᑭᔮᖅᑎᑦᑎᓚᐅᖅᐳᑦ ᐃᓕᓐᓂᐊᕋᔅᓴᒥᒃ ᐃᓕᓐᓂᐊᖅᑎᑦᑎᒐᔭᖅᑐᓂᒃ ᐃᓕᓐᓂᐊᖅᑎᓂᒃ ᑎᑎᖅᑐᒐᕐᓂᒃ ᐊᒻᒪ ᖃᕋᓴᐅᔭᒃᑯᑦ ᑎᑎᖅᑐᒐᕐᓂᒃ. ᕝᓚᑦ−ᕗᐊᐸᔅ ᐊᒃᓱᕉᑎᖃᓚᐅᙱᑦᑐᖅ ᐃᑭᐊᖅᑭᕕᐅᑉ ᐋᖅᑭᒃᓯᒪᓂᖓᓂᒃ, ᑭᓯᐊᓂ ᖃᐅᔨᓪᓗᓂ ᐊᓯᖏᓐᓂᒃ ᐃᓕᑦᑎᔪᓐᓇᕐᓂᕐᒥᓂᒃ ᑕᕝᕙᓂ ᐱᓕᕆᐊᖑᔪᒥ.

"ᑕᐃᑲᓂ ᐃᓕᓐᓂᐊᖅᑎᓪᓗᖓ, ᐱᙳᐊᕈᓐᓇᓚᐅᕋᒪ ᑖᒃᑯᓂᖓ ᓇᖕᒥᓂᖅ−ᐊᐅᓚᑕᐅᔪᓂᒃ ᐱᓕᕆᐊᒃᓴᓂᒃ, ᖁᔭᒋᑦᑎᐊᖅᑕᒃᑲ, ᐊᔪᓕᑐᐃᓐᓇᕆᐊᖃᓚᐅᕐᒪᑕ ᖃᓄᐃᓕᖓᓂᖓᓄᑦ," ᐅᖃᓚᐅᖅᐳᖅ ᕝᓚᑦ−ᕙᐸᔅ.

ᐃᓕᓐᓂᐊᓚᐅᖅᑎᓪᓗᒍ ᑕᐃᑲᓂ, ᐳᕌᓐᑕᓐ ᓯᓚᑦᑐᓴᕐᕕᕐᔪᐊᖓᓅᓚᐅᖅᑐᖅ ᐃᓕᓐᓂᐊᖅᑐᓂ ᓴᓇᖑᐊᓂᕐᒥᑦ ᐊᒻᒪ ᓴᙵᖅᑎᕆᓪᓗᓂ ᓴᓇᒻᒪᐅᓯᖏᓐᓂᑦ ᐱᕙᓪᓕᐊᑎᑦᑎᓂᕐᒧᑦ ᐱᔪᓐᓇᕐᓂᖏᓐᓂᑦ.

ᒫᓐᓇ ᐱᙳᐊᖃᑕᐅᔪᖅ ᐱᙳᐊᖅᑎᐅᔪᖅ ᐸᓚᐅᒑᓕᐅᕐᓗᓂ "ᐱᕈᖅᓴᐃᓗᓂ" ᓴᓂᓕᕇᒡᓗᓂ ᐊᒻᒪ ᐱᙳᐊᖅᑎᓪᓗᒍ ᐊᑐᖅᑎᐅᔪᖅ ᐃᓕᓐᓂᐊᕋᔭᕐᒥᔪᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ.

ᑕᒪᓐᓇ ᓱᓕ ᐱᓕᕆᐊᕆᒻᒪᒍ, ᐊᒻᒪᓗ ᑲᔪᓯᓂᐊᖅᑐᓂ ᐊᕐᕌᒎᓂᐊᖅᑐᒧᑦ ᒪᕐᕉᓄᓪᓘᓐᓃᑦ ᒪᓕᓪᓗᒋᑦ ᑮᓇᐅᔭᐃᑦ ᐊᒻᒪᓗ ᐊᓯᖏᑦ. ᓴᖅᑭᑦᑎᔪᒪᒐᓗᐊᖅᐳᖅ ᐊᑐᐃᓐᓇᐅᓂᖅᓴᐅᓗᓂ ᓄᓇᖃᖅᑳᖅᓯᒪᔪᓄᑦ.

"ᐊᕕᒃᑐᕈᒪᙱᑕᒃᑲ ᐃᓄᐃᑦ ᑭᓱᓂᒃ ᐃᓗᓕᖃᕐᒪᖔᑕ, ᑭᓯᐊᓂ ᑕᑯᔭᕋ ᐅᓄᖅᑐᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ ᐅᓄᖅᑐᑦ ᐅᖃᓘᑎᖃᖅᑐᑦ ᐱᙳᐊᕐᓗᑎᒃ ᐅᕝᕙᓘᓐᓃᑦ iPads−ᓂᒃ ᑕᐅᑐᒃᓗᑎᒃ YouTube ᑕᕐᕆᔮᒃᓴᓂᒃ ᐊᓯᖏᓐᓂᒃᓗ," ᐅᖃᖅᑐᖅ ᕝᓚᑦ−ᕙᐸᔅ.

ᐃᓕᓐᓂᐊᖅᑎᓄᑦ ᓄᓇᒥᓂᒃ ᐊᐅᓪᓚᖅᑐᓄᑦ, ᐅᖃᖅᐳᖅ ᐊᔾᔨᒌᙱᑦᑐᓂᒃ ᐋᓐᓂᐊᕐᓂᖃᕐᓂᐊᕐᓂᕋᖅᖢᓂ ᐃᓱᒪᖅᓲᑎᖃᕐᓗᑎᒡᓗ, ᑭᓯᐊᓂ ᖃᓄᖅ ᐋᓐᓂᐊᕈᓐᓃᖅᐹᓪᓕᖅᑎᑦᑎᔪᓐᓇᕐᒪᑕ ᐊᒻᒪ ᐃᓱᒪᖅᓱᕈᓐᓃᖅᑎᑦᑎᕚᓪᓕᕐᓗᑎᒃ.

ᐃᓚᒥᓂᒃ ᓄᓇᖃᓚᐅᖅᑐᖅ ᓄᐊᕙᐃᒥ ᑯᕇᒥ, ᑭᓯᐊᓂ ᐃᓚᒥᓂᒃ ᕿᒪᐃᓪᓗᓂ ᐃᓕᓐᓂᐊᕆᐊᖅᖢᓂ ᐳᕌᓐᑕᓐᒥ. ᐊᒥᓱᑦ ᕝᓚᑦ-ᕙᐸᔅ ᐋᓐᓂᐊᕐᓂᖓ ᑐᓵᙱᖦᖢᓂ ᐊᓈᓇᒥᓂᒃ ᐊᓂᒥᓂᒡᓘᓐᓃᑦ ᐅᖃᓪᓚᖕᓂᕐᒥ ᑐᓴᖃᑦᑕᓚᐅᖅᑕᖓᑎᑐᑦ ᐃᒡᓗᖓᓂ. ᐊᓯᔾᔨᑳᓪᓚᖕᓂᐅᔪᖅ ᐊᓯᔾᔩᒐᓛᓚᐅᖅᑐᖅ ᐅᖃᖅᖢᓂᓗ ᓂᐱᖃᙱᓐᓂᖅ "ᐱᔭᕆᙱᖦᖢᓂ" ᖃᓄᐃᓕᐅᕈᒪᙱᖦᖢᓂᓗ.

"ᐃᓱᒪᒋᔭᕋᓕ ᐱᓕᕆᑦᑎᐊᕐᓂᖅ ᐃᓕᖕᓂᒃ ᑕᖅᑲᐅᖓᖅᑎᑦᑎᓇᔭᖅᑐᖅ ᐃᒻᒪᖄᓗ ᓇᓂᓯᓗᑎᑦ ᐃᓄᖕᓂᒃ ᐊᔾᔨᕐᓚᖏᓐᓂᒃ ᐊᑐᖅᑐᓂᑦ ᑕᒪᔅᓯᒃ ᓴᖖᒋᓂᖅᓴᐅᔪᓐᓇᕐᓂᕐᓂᒃ," ᐅᖃᖅᑐᖅ ᕝᓚᑦ−ᕙᔅ.

ᐃᓱᒪᒻᒥᔪᖅᑕᐅᖅ ᓴᓐᖏᓂᖅᐸᐅᖃᑕᐅᒋᐊᖓᓂᒃ ᐊᐅᓚᕐᓗᓂ ᓄᓇᒥᓐᓂᒃ ᐃᓱᒪᒋᐊᕐᓗᓂ ᓱᓇᒥᒃ ᑐᕌᒐᖃᕐᒪᖔᑕ ᐊᐅᓪᓚᕐᓂᕐᒧᑦ, ᐅᑎᕐᓗᑎᒃ ᐱᔪᓐᓇᕐᓂᖏᓐᓄᑦ ᓄᓇᓖᑦ ᑭᓐᖒᒪᒋᔭᖏᓐᓂᒃ ᐅᕝᕙᓘᓐᓃᑦ ᓂᐱᒥᒃ ᑐᓴᖅᑕᐅᖁᔨᑐᐃᓐᓇᕐᓗᑎᒃ.

"ᐃᓱᒪᒋᔭᕋᓕ ᐃᓗᐊᓂᑐᐊᖅ ᑐᑭᓯᓗᒍᓗ ᑭᓱ ᐱᐅᓇᔭᕐᒪᖔᑦ ᐱᔪᒪᓕᕐᓇᕐᓗᓂ ᑕᐅᓄᙵᕈᕕᑦ, ᓯᓚᑖᓃᑎᓪᓗᑎᑦ ᓄᓇᓕᕕᑦ."

ᐊᐳᖅᑕᕈᑎᒋᓂᖅᐹᕆᖃᑦᑕᓚᐅᖅᑕᖓ ᐃᓕᓐᓂᐊᖅᖢᓂ ᐃᓛᒃᑰᕈᓐᓇᖅᓯᓂᕐᒥᒃ ᐊᒻᒪ ᐃᓅᔪᓐᓇᖅᓯᓂᕐᒥᒃ ᖃᑕᙳᑎᖃᙱᓪᓗᓂ. ᐃᓄᑦᑎᐊᕙᐅᓚᐅᖅᑐᖅ ᓲᖃᐃᒻᒪ ᐃᓚᒥᓂᒃ ᐱᖃᑎᖃᐃᓐᓇᖃᑦᑕᓚᐅᕐᒪᑦ, ᐊᒻᒪᓗ ᓱᓕ ᐊᐅᓪᓚᓚᐅᕋᓂ ᓄᓇᒥᓂᒃ.

ᐅᖃᖅᐸᓚᐅᖅᑐᖅ ᐱᖃᓐᓇᕆᔭᒥᓂᒃ ᓇᓂᓯᓪᓗᓂ ᐱᙳᐊᖃᑎᒋᖃᑦᑕᕐᖢᓂᒋᓪᓗ, ᐃᓚᒥᓂᒡᓗ ᐅᖄᓚᖃᑎᖃᖅᐸᒃᖢᓂ ᓱᓕ ᐅᖃᖃᑎᒋᖃᑦᑕᕐᓂᐊᕐᒪᒋᑦ.

ᐊᒻᒪᓗ ᐊᑕᐅᓯᕐᒥᒃ ᐅᖃᐅᔾᔨᒍᓐᓇᕈᓂ ᓄᑲᖅᑎᒥᓂᒃ, ᐋᖅᑭᒍᑎᑕᖃᐃᓐᓇᕋᔭᖅᑐᖅ ᐊᑲᐅᖏᓕᐅᕈᑎᒧᑦ.

"ᓇᓂᓯᔭᕆᐊᖃᖅᑐᑎᑦ ᐱᐅᓛᒥᒃ ᖃᐅᔨᓗᒍ ᐊᑲᐅᙱᓕᐅᕈᑎ, ᐅᖃᐅᓯᒃᑯᑦ. ᑲᑉᐱᐊᓱᙱᓪᓗᑎᓪᓗ ᐃᑲᔪᖅᑕᐅᔪᒪᔭᕆᐊᒃᓴᖅ ᓇᓂᓯᓇᓱᒃᓗᑎᓪᓗ ᐋᖅᑭᒍᑎᒃᓴᒥᒃ ᐊᑲᐅᙱᓕᐅᕈᑎᒧᑦ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.