Computing Connection: ᓛᓐᑎᔅ ᓕᐱᓐ STEM ᐃᓕᓐᓂᐊᖅᑎᐅᑉ ᐃᓅᓯᖓ
ᐃᓱᒪᒥᒃ ᖃᐅᔨᓴᖅᐸᓪᓕᐊᓕᓚᐅᖅᐳᖅ, ᑭᓯᐊᓂ ᓈᓴᐅᓯᕆᓂᖅ ᐊᓯᐊᓄᖔᖅ ᑐᕌᕈᑎᒋᓕᖅᖢᓂᐅᒃ. ᓛᓐᑎᔅ ᓕᐱᓐ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐋᓪᐴᑕᒥ, ᓲᕗᑦ ᐹᒃ ᐊᒻᒪ ᐃᐊᑦᒪᓐᑕᓐ ᐊᑯᓐᓂᖓᓂ. ᐊᓪᓚᐃᑦ ᐊᓪᓚᖓᔪᑦ ᐃᓚᒋᔭᐅᓪᓗᓂᓗ ᐊᓪᓚᖓᔪᓄᑦ ᐋᓪᐴᑕᒥ. ᐅᓪᓗᓕᒫᖅ ᐃᓕᓐᓂᐊᖅᑎᐅᔪᖅ ᓯᓚᑦᑐᖅᓴᕐᕕᒡᔪᐊᒥ ᐋᓪᐴᑕᒥ ᐱᖓᔪᒋᓕᖅᑕᖓᓂ ᐊᕐᕌᒍᖓᓂ ᐱᓕᕆᐊᖃᖅᖢᓂ ᖃᕋᓴᐅᔭᓕᕆᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᖃᕋᓴᐅᔭᓕᕆᔾᔪᑎᓂᒃ. ᐊᖓᔪᖅᑳᑉ ᑐᒡᓕᐊ ᓯᓚᑖᓂ ᓄᓇᖃᖅᑳᖅᑐᓄᑦ STEM ᐃᓕᓐᓂᐊᖅᑎᓄᑦ ᑲᑐᔾᔨᖃᑎᒌᓄᑦ ᐊᒻᒪ ᐃᖅᑲᓇᐃᔭᖅᐸᒃᖢᓂ ᓄᓇᖃᖅᑳᖅᓯᒪᔪᑦ ᐃᒡᓗᖓᓂ, ᓄᓇᖃᖅᑳᖅᓯᒪᔪᑦ ᑲᑎᙵᓂᐅᔪᑦ ᐱᑎᑦᑎᕙᒃᖢᑎᒃ ᑐᙵᕕᒋᔭᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᐃᑲᔪᖅᓱᐃᔾᔪᑎᓂᒃ ᓯᓚᑦᑐᖅᓴᕐᕕᒡᔪᐊᕐᒥ. ᐃᓕᓴᐃᔨᐅᔪᖅ ᖃᐅᔨᓴᖅᑐᓕᕆᓂᕐᒧᑦ ᐃᓕᓐᓂᐊᒐᒃᓴᓂᒃ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᓅᑉᐸᓪᓕᐊᓂᕐᒧᑦ ᐊᕐᕌᒍᒧᑦ ᐱᓕᕆᐊᒃᓴᒥ, ᐃᑲᔪᖅᐸᒃᖢᓂᒋᑦ ᓈᓴᐅᓯᕆᓂᕐᒧᑦ ᐊᒻᒪ ᐱᓕᕆᐊᒃᓴᓕᕆᓂᕐᒧᑦ ᐃᓕᓐᓂᐊᒐᒃᓴᓄᑦ.
ᐱᒋᐊᓚᐅᖅᓯᒪᕗᖅ ᐃᓱᒪᓕᕆᔨᐅᓂᕐᒥᒃ ᑭᓯᐊᓂ ᐊᒃᑐᐊᓂᖃᖅᑰᔨᓚᐅᙱᑦᑐᖅ ᐃᓕᓐᓂᐊᒐᒃᓴᓄᑦ. ᓕᐱᓐ ᖃᐅᔨᓚᐅᖅᐳᖅ ᐊᒃᑐᐊᓂᖃᕐᓂᖅᓴᐅᓂᖓᓂ ᓈᓴᐅᓯᕆᓂᕐᒧᑦ ᐊᒻᒪ ᐋᖅᑭᒃᓯᓂᕐᒧᑦ ᐊᑲᐅᙱᓕᐅᕈᑕᐅᔪᓂ, ᓄᑖᙳᖅᐸᓪᓕᐊᔪᓄᑦ ᐊᒻᒪ ᖃᕋᓴᐅᔭᒃᑰᕈᓐᓇᕐᓂᐅᔪᓄᑦ, ᑕᐃᒪᐃᓐᓂᖓᓄᑦ ᐆᒃᑐᓚᐅᖅᐳᖅ ᐱᓕᕆᐊᒃᓴᓕᕆᓂᕐᒧᑦ ᐃᓕᓐᓂᐊᒐᒃᓴᓂᑦ. ᑕᒪᒃᑯᓂᖓ ᐃᓕᓐᓂᐊᓚᐅᖅᓯᒪᙱᖦᖢᓂ ᐃᓕᓐᓂᐊᕐᕕᖕᒥ, ᓯᓚᑦᑐᖅᓴᕐᕕᒡᔪᐊᖅ ᓯᕗᓪᓕᖅᐹᑦᑎᐊᖑᓚᐅᖅᐳᖅ. ᑲᑎᙵᖃᑎᖃᓚᐅᖅᐳᖅ ᐊᔪᕈᓐᓃᖅᓴᒐᒃᓴᓄᑦ ᐃᓚᐅᓕᓚᐅᖅᖢᓂᓗ ᐱᓕᕆᐊᖑᔪᒧᑦ ᐊᐃᑉᐸᖓᓂ ᐊᕐᕌᒍᒋᔭᒥᓂ.
ᓕᐱᓐ ᐃᓕᓐᓂᐊᕐᓂᕆᓯᒪᔭᖓ ᐊᔾᔨᐅᓚᐅᙱᓚᖅ, ᐊᖏᕐᕋᒥ ᐃᓕᓐᓂᐊᖃᑦᑕᖅᓯᒪᓪᓗᓂ ᖁᑦᑎᖕᓂᓕᖕᓄᑦ 6−ᒧᑦ ᑎᑭᖦᖢᒍ. ᐃᓕᓐᓂᐊᕐᕕᖕᒧᑦ ᐃᓕᓐᓂᐊᕆᐊᓕᓚᐅᖅᓯᒪᕗᖅ ᐱᓕᕆᐊᒧᑦ ᐊᒻᒪ ᓄᓇᓕᖕᓂ ᑐᙵᕕᓕᖕᒧᑦ ᖁᕝᕙᖅᓴᐃᓪᓗᓂ ᐃᒃᐱᒋᔭᒥᓂᒃ ᖃᐅᔨᒪᔪᓐᓇᕐᓂᕐᒥᒃ ᐊᔪᙱᓐᓂᓕᖕᓄᑦ 9-ᒧᑦ ᑎᑭᖦᖢᒍ. ᐱᒃᑯᒋᔭᖃᖅᐳᖅ ᐃᓕᓐᓂᐊᕐᕕᖕᒥ ᐃᒃᐱᒋᔭᖃᑦᑎᐊᕐᓂᖓᓄᑦ ᐃᒃᐱᒋᔭᖃᑦᑎᐊᕈᓐᓇᕐᓂᖓᓄᓪᓗ ᐊᒻᒪᓗᑦᑕᐅᖅ ᐱᓇᔪᖕᓂᕆᔭᖓᓄᑦ ᓇᖕᒥᓂᖃᕐᓂᕐᒧᑦ ᓇᖕᒥᓂᖃᕐᓂᕐᒧᓪᓗ. ᖁᑦᑎᖕᓂᓕᖕᓂ 9-ᒥᑦ 12-ᒧᑦ ᐃᓕᓐᓂᐊᕆᐊᓚᐅᖅᓯᒪᕗᖅ ᐃᓕᖅᑯᓯᑐᖃᒃᑯᑦ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᓅᖦᖢᓂᓗ ᓯᓚᑦᑐᖅᓴᕐᕕᒡᔪᐊᒧᑦ ᐋᓪᐴᑕᒥ.
ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᓗᑎᒃ ᓄᓇᓕᖏᓐᓂ ᐃᓕᓐᓂᐊᕆᐊᕐᓗᑎᒃ ᑲᑎᖃᑎᖃᕐᓗᑎᒃ ᓄᓇᖃᖅᑳᖅᓯᒪᔪᓂᒃ ᑲᑎᙵᔪᓂᒃ ᓯᓚᑦᑐᖅᓴᕐᕕᖕᒦᑦᑐᓂᒃ, ᐃᓕᕋᓇᕋᓗᐊᖅᑎᓪᓗᒍ ᓯᕗᓪᓕᕐᒥ. ᑲᑎᙵᓂᖅᑕᖃᖅᐸᒌᙱᒃᑯᓂ, ᓕᐱᓐ ᐅᖃᓚᐅᖅᐳᖅ ᑭᒡᒐᖅᑐᐃᓗᓂ ᑖᒃᑯᓂᖓ ᓴᖅᑭᑕᐅᖁᓪᓗᒋᑦ ᐊᒻᒪ ᓯᓚᑦᑐᖅᓴᕐᕕᒡᔪᐊᑦ ᓴᖅᑭᑎᑦᑎᓗᑎᒃ ᐱᔭᐅᔭᕆᐊᓕᖕᓂᒃ ᐃᑲᔫᑎᒃᓴᓂᒃ ᐊᒻᒪ ᐃᓱᒪᒋᔭᖃᕐᓗᑎᒃ ᐱᔭᐅᔭᕆᐊᓕᖕᓂᒃ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᑐᙵᕕᖃᕐᓗᑎᒃ ᓯᕗᓕᕕᓂᖏᓐᓂᒃ. ᐊᒃᓱᕈᕐᓇᖅᑑᙱᓚᖅ ᓇᖕᒥᓂᖅ, ᓄᓇᓕᐸᐅᔭᒦᙶᖅᓯᒪᓪᓗᓂ, ᑭᓯᐊᓂ ᐅᖃᐅᔾᔨᒋᐊᕈᑎᖏᑦ ᑐᙵᕕᖃᖅᐳᑦ ᖃᓄᖅ ᐃᒃᐱᒋᓚᐅᕐᒪᖔᕐᒥᓂᒃ ᐃᓕᓐᓂᐊᕆᐊᓕᓵᕋᒥ ᐊᒻᒪ ᖃᓄᖅ ᓄᓇᓕᖕᓂ ᓇᖕᒥᓂᖅ ᐋᖅᑭᒃᓯᓚᐅᕐᒪᖔᑦ.
ᐊᑕᐅᓯᖅ ᐊᕝᕕᐊᕈᑕᐅᔪᖅ ᓕᐱᓐ ᓵᙵᔭᖃᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᒥ ᐃᓕᓐᓂᐊᕆᐊᖅᐸᖕᓂᖅ ᐊᑐᖅᑕᐅᒐᔪᓚᐅᙱᓐᓂᖓᓂ ᖃᑕᙳᑎᖏᑕ ᐃᓅᖃᑎᒌᒃᐸᖕᓂᖏᓐᓂ, ᑕᐃᒪᐃᓐᓂᖓᓄᓪᓗ ᖃᐅᔨᒪᓗᐊᓚᐅᙱᓚᖅ. ᖁᕕᐊᓱᓚᐅᖅᐳᖅ ᐱᖃᓐᓇᕆᔭᖃᕋᒥ ᐱᕈᖅᓴᓚᐅᖅᑐᓂᒃ ᐃᓕᖅᑯᓯᑐᖃᒃᑯᑦ ᐃᓕᓐᓂᐊᕐᓂᓕᕆᓂᕐᒥᒃ ᖃᐅᔨᒪᓂᖅᓴᐅᓪᓗᑎᒃ ᐱᓇᔪᖕᓂᕐᒧᑦ ᑲᔪᓯᓂᕆᔭᐅᕙᒃᑐᒥᒃ. ᖃᑕᙳᑎᒌᑦ ᐊᕐᕕᓂᓕᖕᓂᙶᖅᖢᑎᒃ, ᐊᖓᔪᖅᑳᒥᓂᒃ ᑐᙵᕕᖃᕈᓐᓇᓚᐅᙱᓚᖅ ᐃᓕᓐᓂᐊᖅᑕᒥᓂᒃ ᑮᓇᐅᔭᖃᖅᑎᓐᓂᐊᕐᓗᓂᒋᑦ, ᐃᖅᑲᓇᐃᔮᒃᓴᖅᓯᐅᓚᐅᖅᐳᖅ ᐊᑭᓖᔪᓐᓇᕐᓂᖅᓴᐅᓇᔭᖅᑐᒥᒃ ᐃᓕᓐᓂᐊᖅᑎᓄᑦ ᐊᑐᖅᑐᐊᖅᑕᒥᓂᒃ ᓇᖕᒥᓂᖅ ᕿᑐᕐᖏᐅᕈᑎᐅᙱᖔᖅᑐᒥᒃ. ᖃᐅᔨᓴᓚᐅᖅᐳᖅ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᒃ ᐊᒻᒪ ᓇᓖᕌᕈᑎᒃᓴᓂᒃ ᑮᓇᐅᔭᖃᖅᑎᓐᓂᐊᕐᓗᓂᒋᑦ ᐃᓕᓐᓂᐊᖅᑕᒥᓄᑦ. ᐱᓇᔪᒃᖢᓂ ᐱᑎᑕᐅᕙᒃᖢᓂᓗ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᐃᑲᔪᓚᐅᖅᐳᖅ ᐊᓂᒍᐃᑎᑦᑎᓪᓗᓂ ᑮᓇᐅᔭᑎᒍᑦ ᐊᒃᓱᕈᕐᓇᖅᑐᓂᒃ. ᓴᒃᑯᐃᓪᓗᓂ ᑲᑉᐱᐊᓱᖕᓂᐅᔪᒥ ᐊᒻᒪ ᓯᕘᕋᓂᐅᔪᒥ ᓄᑖᖑᔪᒥ ᓯᓚᑦᑐᖅᓴᕐᕕᒡᔪᐊᒥ ᐊᒻᒪ ᐊᖏᑐᐃᓐᓇᖅᖢᓂ ᐃᓂᒋᔪᒪᔭᖓᓂ ᐊᒻᒪ ᐱᓇᓱᐊᕐᓂᐊᖅᑕᖓᓂ ᐃᑲᔫᑎᖃᓚᐅᕆᕗᖅ.
ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᐃᒪᓐᓇᐅᓇᔭᖅᐳᖅ, ᐃᓱᒪᒋᙱᓪᓗᒍ ᓯᕗᓂᒃᓴᖅ ᓯᕘᕋᓇᖅᑑᓂᖓᓂᒃ ᑐᐊᕕᕈᑎᒋᙱᓪᓗᒍᓗ. ᓖᐱᓐ ᐃᒻᒥᓂᒃ ᐊᔭᐅᕆᖃᑦᑕᓚᐅᖅᐳᖅ ᓱᒃᑲᐃᒡᓕᒋᐊᕐᓗᓂ ᐃᓱᒪᒃᓴᖅᓯᐅᑦᑎᐊᕐᓗᓂᓗ ᓱᖁᑎᒋᙱᖔᕐᓗᒍ ᐊᒻᒪ ᕿᒪᕉᑎᙱᖔᕐᓗᒍ ᐊᒃᓱᕈᕐᓇᖅᑐᑦ, ᓱᖁᑎᒋᙱᖦᖢᓂᒋᑦ ᐊᔪᕐᓇᖅᑐᖅᓯᐅᕈᑕᐅᔪᑦ. ᐸᕐᓇᐃᖔᕈᒪᓇᔭᓚᐅᕐᑐᖅ ᑭᓱᒥᒃ ᐱᔪᒪᖕᒪᖔᕐᒥᓂᒃ ᐊᒻᒪ ᐃᓱᒪᒃᓴᕐᓯᐅᕈᑎᒋᓗᓂᒋᑦ ᖃᓄᐃᓕᐅᕈᓐᓇᕐᒪᖔᕐᒥᓂᒃ.
ᐃᓱᒪᒋᓪᓗᒍ ᐱᔭᕆᐊᖃᕐᓂᖓ ᓇᓕᒧᒌᒃᑎᑦᑎᓂᕐᒥᒃ ᖃᓄᐃᙱᑦᑎᐊᕈᒪᓂᕐᒥᒡᓗ, ᐱᓕᕆᔾᔪᑕᐅᕙᒃᑐᑦ ᖃᓄᐃᓕᐅᖅᑕᐅᕙᓪᓕᐊᔪᒪᔪᓪᓗ ᓕᐱᓐ ᐊᑐᖅᐸᒃᑕᖏᑦ ᓇᓕᒧᒌᒃᑎᑦᑎᔪᒪᓪᓗᓂ ᐃᓕᓐᓂᐊᕐᓂᕆᔭᒥᓂᒃ, ᐃᓕᓐᓂᐊᒃᑲᓐᓂᕐᓂᕐᒧᑦ ᐃᖅᑲᓇᐃᔮᓄᓪᓗ, ᐊᐅᓚᑦᑎᓇᓱᒃᖢᓂ ᓇᑭᙶᕐᓂᕆᔭᖏᓐᓂᒃ ᑮᓇᐅᔭᓕᐅᕐᓂᕆᕙᒃᑕᖏᓐᓂᒡᓘᓐᓃᑦ ᐱᕕᒃᓴᖃᖅᑎᑦᑎᕙᒃᖢᓂᓗ ᐃᖃᐃᓕᓴᖅᐸᖕᓂᕐᒥᒃ ᖃᖓᙳᕌᖓᑦ, ᐱᓱᑐᐃᓐᓇᕋᓗᐊᕈᓂᓘᓐᓃᑦ. "ᐃᓕᖕᓂᒃ ᐊᒃᓱᕈᐃᓐᓇᕐᓂᖅ ᐊᖏᒡᓕᕚᓪᓕᖅᑎᑦᑎᔾᔮᙱᓚᖅ ᐱᓕᕆᓂᕆᔭᕐᓂᒃ ᐊᒻᒪᓗ ᐱᕕᒃᓴᖃᖅᑎᑐᐃᓐᓇᕐᓗᒍ ᑕᖃᐃᖅᓯᒃᑲᓐᓂᕐᓂᕐᒥᒃ, ᐊᒻᒪᓗᑦᑕᐅᖅ ᐱᕕᒃᓴᖃᖅᑎᑦᑎᓗᓂ ᑭᐱᙳᐃᔭᐅᑎᓂᒃ," ᓚᐱᓐ ᐅᖃᖅᑐᖅ. ᓂᔾᔭᐅᓯᔭᕐᓂᖅ ᖁᕕᐊᒋᕙᐅᒃ, ᓴᓇᕙᒃᖢᓂ ᐃᓕᑦᑎᕙᓪᓕᐊᕙᒃᖢᓂᓘᓐᓃᑦ. ᐃᓕᓐᓂᐊᖅᖢᓂ ᑭᖑᓪᓕᖅᐹᖅᓯᐅᑎᓂᒃ, ᓄᖅᑲᖓᓚᐅᑲᒃᐸᒃᖢᓂ ᑯᒃᑭᑕᐹᖅᐸᒃᖢᓂ. ᐊᓯᐊᑦᑕᐅᖅ ᖃᓄᐃᓕᐅᖅᑕᐅᕙᓪᓕᐊᔪᒪᔪᖅ ᐊᑐᖅᐸᒃᑕᖓ ᐊᔭᐅᖅᓯᕙᙱᖦᖢᓂ ᐊᔾᔨᖃᖅᑎᑉᐸᙱᖦᖢᒍᓘᓐᓃᑦ ᐊᓯᒥᓄᑦ ᐃᓱᒪᒋᔭᒥᓂᒃ ᐃᒻᒥᓂᒃ ᐱᓇᔪᒐᓱᒋᔭᒥᓂᒃ ᐱᓕᕆᐊᖃᖅᐸᒃᖢᓂᓗ.
ᐅᖃᐅᔾᔨᒋᐊᕈᑎᒋᔭᖓ ᑭᓇᑐᐃᓐᓇᕐᒧᑦ ᐊᒃᓱᕉᓴᒃᑐᒧᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐅᕝᕙᓘᓐᓃᑦ ᒪᑭᑕᑦᑎᐊᕈᓐᓇᕐᓂᕐᒧᑦ ᐃᓕᓴᖅᓯᓗᓂ ᖃᓄᐃᓕᖓᓂᕆᔭᖓ ᐊᔾᔨᐅᙱᓐᓂᖓᓂᒃ ᐊᒻᒪᓗ ᐊᒃᓱᕈᖅᑎᑕᐅᙱᓪᓗᓂ ᐊᓯᖏᑕ ᐃᓱᒪᒋᔭᖏᓐᓂᒃ ᖃᓄᐃᓕᐅᕆᐊᖃᕋᓱᒋᔭᖏᓐᓂᒃ ᐅᕝᕙᓘᓐᓃᑦ ᐃᒃᐱᒋᔭᖃᕐᓗᑎᒃ ᖃᓄᖅ ᐊᓯᖏᑕ ᐃᓄᐃᑦ ᐃᓱᒪᖕᒪᖔᑕ ᐃᒃᐱᒋᔭᕆᐊᖃᖅᑕᖏᓐᓂᒃ. ᓖᐱᓐ ᑎᓕᐅᕆᕙᒃᐳᖅ ᖃᐅᔨᓇᓱᖁᓪᓗᒋᑦ ᑭᓱᓂᒃ ᐱᔭᕆᐊᖃᕐᒪᖔᑕ ᒫᓐᓇᒃᑯᑦ, ᐅᓪᓗᓄᑦ ᐊᒡᒋᖅᑐᓄᑦ, ᐱᓇᓱᐊᕈᓯᕐᓄᑦ ᑕᖅᑭᓄᓪᓗ, ᓇᓂᓯᓗᑎᒃ ᑭᓱᑦ ᐃᖕᒥᖕᓄᑦ ᐱᐅᓛᖑᖕᒪᖔᑕ ᐃᒻᒥᓄᓪᓗ ᖃᐅᔨᒋᐊᕐᓗᑎᒃ.
ᐱᔪᒃᓯᑎᑦᑎᓇᓱᓕᕌᖓᒥ, ᓕᐱᓐ ᐃᒻᒥᓄᑦ ᐊᔾᔨᐅᙱᑦᑑᓇᓱᒃᐸᒃᐳᖅ ᐊᓯᒥᓂᒃ ᑕᐅᑐᒐᖃᙱᖔᖅᖢᓂ ᐅᕝᕙᓘᓐᓃᑦ ᐊᓯᒥᓂᒃ ᐊᔾᔨᖃᖅᑎᙱᖔᖅᖢᓂᐅᒃ. ᑭᖑᒧᑦ ᐃᓱᒪᓇᓱᒃᐸᒃᐳᖅ ᐊᒻᒪ ᑭᖑᒧᑦ ᑕᐅᑐᒃᖢᓂ ᐃᓅᓯᕆᓚᐅᖅᑕᒥᓂᒃ ᐊᒻᒪ ᐱᓕᕆᕙᒃᖢᓂ ᐃᔾᔪᐊᒐᒃᓴᑦᑎᐊᕙᐅᓇᓱᒃᖢᓂ ᑕᐃᒃᑯᓄᖓ ᖃᓂᒋᔭᒥᓄᑦ. ᑲᔪᖏᖅᓴᐃᔪᒪᕗᖅ ᐊᒻᒪ ᖃᐅᔨᓴᕈᒪᓪᓗᓂ ᐱᕈᖅᐸᓪᓕᐊᓂᖓᓂ ᐃᓅᓯᖓᓂ ᐊᒻᒪ ᖃᐅᔨᒪᓪᓗᓂ ᑲᔪᓯᓂᐊᕐᓂᖓᓂ.
ᐃᓕᓐᓂᐊᖅᑕᖓ ᐱᒋᐊᓚᐅᖅᐳᖅ ᐃᓱᒪᒃᑯᑦ ᑭᓯᐊᓂ ᓈᓴᐅᓯᕆᓂᕐᒧᑦ ᐊᓯᐊᓄᐊᖅᑕᐅᓕᓚᐅᖅᐳᖅ, ᖃᕋᓴᐅᔭᓕᕆᓂᕐᒧᑦ ᐊᒻᒪ ᖃᕋᓴᐅᔭᓕᕆᔾᔪᑎᓄᑦ. ᑮᓇᐅᔭᑎᒍᑦ ᑐᓗᖅᑕᕈᑕᐅᕙᒃᑐᓂᒃ ᐊᓂᒍᐃᔪᒪᓪᓚᕆᒃᖢᓂ, ᓛᓐᑎᔅ ᓕᐱᓐ ᐱᓇᔪᓚᐅᖅᐳᖅ ᓵᓚᒃᓴᐅᓯᐊᖅᖢᓂᓗ ᐃᓕᓐᓂᐊᒃᑲᓐᓂᕈᑎᒃᓴᓂᒃ. ᐃᓕᓐᓂᐊᓚᐅᖅᓯᒪᙱᖦᖢᓂ, ᑭᓯᐊᓂ ᑕᑯᓚᐅᖅᐸᖓ ᐃᑲᔫᑎᖃᕐᓂᖓᓂᒃ ᑐᓗᖅᑕᕈᑕᐅᙱᖔᖅᖢᓂ. ᐅᓪᓗᓕᒫᖅ ᐃᓕᓐᓂᐊᖅᑎᐅᓪᓗᓂ, ᐃᓕᓴᐃᔨᐅᓪᓗᓂ, ᐊᖓᔪᖅᑳᑉ ᑐᒡᓕᐊ ᓄᓇᖃᖅᑳᖅᑐᓄᑦ STEM ᐃᓕᓐᓂᐊᖅᑎᓄᑦ ᑲᑐᔾᔨᖃᑎᒌᓄᑦ, ᓇᒧᙵᐅᕈᓘᔭᐃᓐᓇᐅᔭᖅᑐᖅ ᐊᒃᓱᕈᖅᖢᓂᓗ, ᐃᓕᑦᑎᕙᓪᓕᐊᖏᓐᓇᐅᔭᖅᑐᖅ ᓇᒧᙵᐅᕙᓪᓕᐊᖏᓐᓇᐅᔭᖅᖢᓂᓗ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.
