"ᐱᕈᖅᓴᐃᓂᖅ ᑐᑭᓯᐅᒪᓕᓚᐅᖅᑕᕋ ᐃᓚᑦᑎᓐᓄᑦ ᐃᓚᒋᔭᐅᓚᐅᖅᑐᖅ, ᐊᒻᒪᓗ ᐅᕙᓐᓄᑦ ᐱᔪᒪᐃᓐᓇᐅᔭᖅᑐᖅ," ᑕᐃᒥᓐ ᐃᑯᐊᓚ ᐅᓂᒃᑳᖅᑐᖅ. ᐃᓅᓂᑰᓪᓗᓂ ᐱᕈᖅᓴᓚᐅᖅᓯᒪᓪᓗᓂᓗ ᕚᓐᑰᕙᒥ, ᐳᕆᑎᔅ ᑲᓚᒻᐱᐊᒥ, ᑕᐃᑲᓂ ᓄᓇᖃᓚᐅᖅᓯᒪᔪᖅ ᐊᕐᕌᒍᓄᑦ 17-ᓄᑦ ᑭᓯᐊᓂ ᔫ ᐅᖅᓱᖅᑑᓕᐊᕋᒥ, ᓄᓇᕗᒻᒥ ᐃᓚᒥᓂᒃ ᑲᑎᖃᑎᖃᕆᐊᖅᑐᖅᖢᓂ. ᑕᐃᑲᓃᓕᓚᐅᖅᑐᖅ ᐊᕐᕌᒍᓄᑦ ᖃᔅᓯᐊᕐᔪᖕᓄᑦ ᐊᒻᒪᓗ ᐃᓕᓐᓂᐊᖅᖢᓂ ᓴᓇᙳᐊᕐᓂᕐᒥᒃ ᓅᓚᐅᕋᓂ ᐃᖃᓗᒃᑑᑦᓯᐊᕐᒧᑦ, ᑕᐃᑲᓂ ᓄᓇᖃᓚᐅᖅᓯᒪᓪᓗᓂ ᐊᕐᕌᒍᓄᑦ 15-ᓄᑦ. ᐃᖃᓗᖕᓄᑦ ᓅᑦᑐᒪᓕᓚᐅᖅᑐᖅ ᐃᓕᓐᓂᐊᕆᐊᕐᓗᓂ ᐊᕐᕌᒎᖕᓄᑦ ᒪᕐᕉᖕᓄᑦ ᐋᑐᕚᒧᑦ ᓅᓚᐅᕋᓂ. ᖀᓕᑲᑕᐃᓐᓇᕐᒪᑦ ᐅᑭᐅᖅᑕᖅᑐᒧᑦ ᐊᒃᑐᐊᖃᑦᑕᐅᑎᓂᒃᑯᑦ, ᓂᐅᖓ ᓱᕋᒃᓯᒪᔪᖅ ᓱᒃᑲᐃᒡᓕᕚᓪᓕᖅᓯᒪᒐᓗᐊᖅᖢᓂ ᑕᖅᑭᓄᑦ ᐱᖓᓱᓄᑦ.

ᐃᑯᐊᓚ ᐃᓕᓐᓂᐊᓕᕋᑖᖅᑎᓪᓗᒍ ᓴᓇᙳᐊᕐᓂᕐᒥᑦ, ᐃᓪᓗᐊᕐᔪᖓ ᓴᓇᙳᐊᖃᑦᑕᖅᓯᒪᔪᖅ ᒪᒃᑯᒃᓯᑎᓪᓗᒍ ᐃᓕᓐᓂᐊᖅᑎᖃᑦᑕᓚᐅᖅᑕᖓ. ᐳᓛᕆᐊᖅᑐᓂ ᐃᓪᓗᐊᕐᔪᒥᓄᑦ, ᕿᒥᕐᕈᓚᐅᖅᑐᑦ ᓴᓇᙳᐊᒐᕐᒥᓂᒃ, ᐃᓪᓗᐊᕐᔪᒥᓂᒃ ᐊᐱᖅᓱᖅᑐᓂ ᐊᒻᒪᓗ ᐅᖃᐅᓯᖃᖅᑐᓂ ᐃᓪᓗᖓᑕ ᐊᑐᕋᒃᓴᖏᓐᓂᒃ ᐊᒻᒪᓗ ᑐᓂᓯᓪᓗᓂ ᓱᓇᒃᑯᑖᓂᒃ ᐱᒋᐊᕈᑎᒃᓴᓂᒃ.

ᐃᑯᐊᓚ ᐊᕐᕌᒍᒥᒃ ᐊᑕᐅᓯᕐᒥᒃ ᐃᓕᓐᓂᐊᓚᐅᖅᑐᖅ, ᐊᕙᑎᓕᕆᓂᕐᒧᑦ ᐃᓕᓐᓂᐊᓚᐅᖅᑐᖅ ᐊᕐᕌᒍᒧᑦ ᐊᑕᐅᓯᕐᒧᑦ, ᐊᒻᒪᓗ ᒫᓐᓇ ᐊᕐᕌᒍᒥᒃ ᓄᖅᑲᖓᓕᖅᑐᖅ ᐋᑐᕚᒦᑎᓪᓗᒍ. ᐃᓕᓐᓂᐊᓚᐅᖅᑐᖅ ᐊᕙᑎᓕᕆᓂᕐᒧᑦ ᒪᓕᒐᕐᓂᒃ ᒪᓕᒐᓕᕆᔨᓪᓚᑦᑖᓂᒃ ᐊᒻᒪᓗ ᐊᑐᐊᒐᓕᐅᖅᑎᐅᔪᓂᒃ, ᐃᓕᓐᓂᐊᖅᑐᓂ ᓄᓇᕗᒻᒥ ᐊᖏᕈᑎᓂᒃ ᐊᒻᒪᓗ ᐆᒪᔪᓕᕆᓂᕐᒧᑦ ᐊᑐᐊᒐᕐᓂᒃ ᐊᒻᒪᓗ ᐊᓯᖏᓐᓂᒃ ᖁᕕᐊᒋᔭᖏᓐᓂᒃ.

ᐊᐱᕆᔭᐅᒐᒥ ᐅᖃᐅᔾᔭᐅᒋᐊᖁᔭᐅᓪᓗᓂ ᒪᒃᑯᑦᑐᒧᑦ ᓄᓇᖃᖅᑳᖅᓯᒪᔪᒧᑦ ᓴᓇᙳᐊᕈᒪᔪᒧᑦ, ᐃᑯᐊᓚ ᐅᖃᓚᐅᖅᑐᖅ, "ᓴᓇᙳᐊᕐᓂᖅ ᐃᑲᔫᑎᖃᖅᑐᒻᒪᕆᐅᓱᒋᕙᕋ, ᐃᑲᔪᖅᓱᕈᑕᐅᒻᒪᑦ ᑭᓇᑐᐃᓐᓇᕐᒧᑦ, ᐱᓪᓗᒍ ᐃᑲᔪᖅᓱᖅᑕᐅᔪᒻᒪᕆᐅᒻᒪᑕ ᓄᓇᕗᒻᒥ ᑕᐃᒪᐃᑦᑐᓄᑦ. ᐊᒻᒪᓗ ᐱᓇᓱᐊᖅᑐᖃᒻᒪᕆᑉᐳᖅ ᐆᒻᒪᖅᑎᒃᑲᓐᓂᕋᓱᐊᖅᑐᒋᑦ ᓴᓇᐅᒐᐃᑦ ᓄᓇᓕᓐᓂ. ᑕᒪᓐᓇ ᐱᕕᒃᓴᑦᑎᐊᕙᐅᕗᖅ, ᐊᒻᒪᓗ ᑮᓇᐅᔭᓕᐅᕈᑕᐅᔪᓐᓇᕆᓪᓗᓂ ᐃᓄᖕᓄᑦ, ᐊᒻᒪᓗ ᐃᓱᒪᑦᑎᐊᕐᓇᖅᖢᓂ ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᕐᓄᑦ, ᐱᓕᕆᖃᑎᖃᕐᓂᒃᑯᑦ ᐊᒡᒐᖕᓂᒃ ᐊᒻᒪᓗ ᐋᖅᑭᒃᓯᓇᓱᐊᖅᖢᓂ ᐊᑲᐅᙱᓕᐅᕈᑎᓂᒃ ᐊᒻᒪᓗ ᐋᖅᑭᒃᓯᓇᓱᐊᖅᖢᓂ ᐱᔭᕇᖅᓯᒪᔪᒥᒃ ᐱᖁᑎᒥᒃ. ᐱᓕᕆᑦᑎᐊᕐᓇᑦᑎᐊᖅᑐᖅ ᐱᕕᒃᓴᖃᖅᑎᓪᓗᑎᑦ, ᐊᓕᐊᓇᐃᓐᓇᕈᓐᓇᖅᖢᓂᓗ ᑕᐃᒪᐃᑦᑐᒦᒃᑯᕕᑦ, ᐊᒻᒪ ᐊᖏᓂᖅᓴᒥᑦ ᓄᓇᓕᖕᓂ ᑲᑎᖃᑎᖃᕈᓐᓇᖅᖢᑎᑦ ᐊᑐᒐᔪᒃᑕᕐᓂᑦ ᐊᖏᕐᕋᔅᓯᓐᓂ. ᒪᑐᐃᙶᖅᑎᑦᑎᕗᖅ ᐊᒥᓱᓂᒃ ᐹᓂᒃ ᐃᓄᖕᓄᑦ."

ᐅᖃᐅᔾᔨᒋᐊᕈᑎᖏᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑏᑦ ᐃᓱᒪᔪᑦ ᓯᓚᑦᑐᓴᕐᕕᓐᓂᑦ, ᐃᑯᐊᓚ ᑎᓕᐅᕆᔪᖅ ᓯᓚᑦᑐᓴᕐᕕᒻᒥᑦ ᐃᓕᓐᓂᐊᕇᕋᐃᒻᒪᑦ ᐱᔭᕇᓚᐅᖏᓐᓂᖓᓄᑦ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ ᐱᓇᓱᐊᓚᐅᕋᓂᓗ ᓯᓚᑦᑐᓴᕐᕕᒻᒥᑦ ᑭᓯᐊᓂ 15 ᐊᕐᕌᒍᐃᑦ ᑭᖑᓂᖓᒍᑦ. ᑕᐃᑯᖓ ᑎᑭᒻᒪᑦ, ᐃᓱᒪᓕᓚᐅᖅᑐᖅ "ᑕᐃᒪᓕ ᐊᑐᓵᕈᒪᓇᔭᓚᐅᖅᑕᕋ ᐃᓅᓯᓐᓂ, ᓲᖃᐃᒻᒪ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᐃᑲᔪᖅᑐᐃᓂᖃᒻᒪᕆᖕᒪᑦ ᐃᓚᐅᑎᑦᑎᓂᕐᒥᒃ ᐃᓄᖕᓂᒃ ᐊᔾᔨᒌᖏᑦᑐᓂᒃ ᓄᓇᓕᖕᓂ ᐃᓱᒪᔮᖅᑐᓂᒃ ᐱᓇᓱᖕᓂᕐᓂᒃᓗ ᐊᔾᔨᖓᓂᒃ ᑐᕌᒐᒃᓴᒥᒃ ᐃᕝᕕᑎᑐᑦ... ᐊᒥᓲᕗᑦ ᐊᑐᖅᑕᐅᔪᓐᓇᖅᑐᑦ ᐊᑐᐃᓐᓇᐅᔪᑦ ᐃᓕᓐᓂᐊᖅᑎᓄᑦ. ᐄ, ᑖᒃᑯᐊ ᓂᕈᐊᑦᑎᐊᖃᑦᑕᖅᑐᑦ ᐃᓕᓐᓂᐊᕈᑕᐅᒍᓐᓇᖅᑐᓂᒃ ᐊᒻᒪᓗ ᐃᖅᑲᓇᐃᔮᖅᑖᕈᓐᓇᑎᐊᖅᑐᑎᒃ. ᐊᒥᓱᑦ ᑕᒪᒃᑯᐊ ᐃᓕᓐᓂᐊᕋᔅᓴᐃᑦ ᒪᑐᐃᙶᕐᒥᔪᑦ ᐃᓕᓐᓂᐊᑲᓐᓂᕐᓂᕐᒧᑦ, ᑕᒫᓂ, ᐅᓪᓗᒥᐅᓕᖅᑐᖅ, ᑕᒪᓐᓇ ᐱᓂᖅᓴᐅᕙᓪᓕᐊᒻᒪᑦ ᐊᒻᒪᓗ ᐱᔭᕆᐊᖃᕐᓂᖅᓴᐅᓪᓗᓂ, ᐊᒻᒪᓗ ᐃᓕᓐᓂᐊᑲᓐᓂᕈᓐᓇᖅᑐᑎᑦ, ᐱᐅᓂᖅᓴᒥᑦ ᐃᓅᓯᖃᕈᓐᓇᕐᓗᑎᑦ." ᐅᑭᐅᖅᑕᖅᑐᒥ ᐃᓅᓇᓱᐊᕐᓂᖅ ᐊᑭᑐᑎᓪᓗᒍ, Iqualla−ᑯᑦ ᑎᓕᐅᕆᒃᑲᓐᓂᖅᐳᑦ ᐃᓕᓐᓂᐊᖅᑎᑦᑎᒃᑲᓐᓂᖁᔨᓪᓗᑎᒃ ᐊᔪᖅᓴᓗᐊᖅᑕᐃᓕᒪᓂᕐᒥᒃ.

ᐃᑯᐊᓚ ᐅᖃᐅᔾᔨᒋᐊᕈᓐᓇᕈᓂ ᒪᒃᑯᓐᓂᖅᓴᒧᑦ, "ᐅᔾᔨᖅᓱᑦᑎᐊᕆᑦ ᐊᒻᒪᓗ ᓱᓕᓗᑎᑦ ᐃᓕᓐᓄᑦ, ᑭᓯᐊᓂ ᐊᑐᐃᓐᓇᐅᓂᖅᓴᐅᓗᑎᑦ ᐊᖏᓂᖅᓴᒧᑦ ᓄᓇᓕᓐᓄᑦ, ᖃᐅᔨᒪᓚᐅᖅᓯᒪᖏᓐᓇᕕᑦ ᑭᓇ ᑕᖅᑳᓃᒻᒪᖔᖅ ᐊᒻᒪᓗ ᑭᓇ ᐃᑲᔪᖅᑐᐃᓇᓱᐊᓪᓚᕆᒻᒪᖔᖅ ᐃᓕᓐᓂᒃ. ᖃᐅᔨᒪᕙᙱᓚᓯ ᓇᒧᙵᓂᐊᕐᒪᖔᑕ. ᐃᓕᖕᓂᒃ ᕿᓂᕐᓗᑎᑦ, ᑭᓯᐊᓂ ᑭᒡᓕᖃᓗᐊᙱᓪᓗᑎᑦ." ᐊᑕᐅᑦᑎᒃᑯᓪᓗ, ᐊᓯᔾᔨᓗᐊᕋᔭᓚᐅᙱᑦᑐᖅ ᐃᖏᕐᕋᓂᕆᔭᖓᑕ ᒥᒃᓵᓄᑦ. ᕿᒥᕐᕈᓚᐅᖅᑐᖅ, ᐊᐅᓪᓚᖃᑦᑕᖅᑐᓂ ᐊᒻᒪ ᐆᑦᑐᖅᑐᓂ ᓄᑖᓂᑦ. ᓴᓇᓚᐅᖅᑐᖅ ᐊᒥᓱᓂᒃ ᐱᓕᕆᓪᓗᓂ ᐊᒥᓲᖏᑐᓂᒃ ᐱᓕᕆᔾᔪᑎᖃᑦᑐᓂ ᐊᒻᒪᓗ ᐃᓅᓪᓗᓂ ᐊᒻᒪᓗ ᓇᓗᓇᐃᖅᑕᐅᓪᓗᓂ. ᐱᓕᕆᖃᑎᖃᓚᐅᖅᑐᖅ ᐊᒻᒪᓗ ᓇᓂᓯᓪᓗᓂ ᐃᑲᔪᖅᑐᐃᔪᓂᒃ ᐃᓄᖕᓂᒃ.

ᓴᓇᙳᐊᒐᖏᑦ ᐱᔾᔪᑎᒋᓪᓗᒋᑦ, ᐃᑯᐊᓚ ᐊᑐᓚᐅᖅᑐᖅ pyroxene ᐅᔭᖅᑲᓂᒃ, ᐊᔾᔨᐸᓗᖏᑦ ᓴᓇᙳᐊᒐᐃᑦ, ᐊᒻᒪᓗ ᓇᒡᔪᐃᑦ, ᕿᓚᓗᒐᐅᑉ ᓴᐅᓂᖏᑦ, ᐊᓪᓚᕈᑎᐅᑉ ᓴᐅᓂᖏᑦ, ᑭᓱᑐᐃᓐᓇᖅ ᓇᓂᔪᓐᓇᖅᑕᖓ. ᐊᑖᑕᑦᓯᐊᖓᑕ ᐱᐅᓯᖓ ᐊᒻᒪᓗ ᓴᓇᐅᒐᓕᐅᖃᑦᑕᓕᓚᐅᖅᓯᒪᔪᖅ ᑕᑯᕙᓚᐅᖅᑕᒥᓂᒃ ᕚᓐᑰᕗᒥ ᓴᓇᐅᒐᕐᓂᒃ ᑕᑯᔭᒐᖃᕐᕕᒻᒥ ᐱᕈᑉᐸᓪᓕᐊᓪᓗᓂ. ᑐᙵᕕᖃᓚᐅᖅᑐᖅ ᓴᓇᙳᐊᒐᕐᒥᓂᒃ ᐃᓕᖅᑯᓯᑐᖃᖅᑎᒍᑦ ᐅᓂᒃᑳᖅᑐᐊᓂᒃ. ᓯᕗᓪᓕᖅᐹᒥ ᓴᓇᙳᐊᒐᖓ ᐊᐃᕕᕐᒧᑦ ᐊᖓᒃᑯᒧᑦ ᕿᓚᐅᔾᔭᓚᐅᖅᑐᖅ. ᓴᖑᑎᓕᕐᖢᓂᐅᒃ ᐱᐅᓯᖓ ᐱᔪᒥᓇᕐᓂᖅᓴᐅᓪᓗᓂ, ᓴᓇᙳᐊᕐᓂᖅ ᐱᐅᓯᒋᐊᖅᓯᒪᓂᖅᓴᓂᒃ ᑎᒥᓂᒃ ᓂᕐᔪᑎᓂᒡᓗ. ᐅᒥᖕᒪᖕᓂᒃ ᓴᓇᙳᐊᕐᓂᕐᒥᒃ ᐱᐅᒃᓴᓚᐅᖅᑐᖅ, ᕿᓚᓗᒐᕐᓂᒃ ᐊᒻᒪ ᑐᒃᑐᓂᒃ. ᑕᑯᓐᓇᓚᐅᖅᐳᖅ ᐃᓄᐃᑦ ᓴᓈᖏᓐᓂᑦ ᐊᒻᒪ ᓴᖅᑮᓪᓗᓂ ᐱᐅᒋᔭᐅᓂᖅᓴᐅᔪᓂᒃ ᐊᒻᒪ ᐱᒡᒐᓇᙱᓂᖅᓴᐅᔪᓂᒃ ᓂᐅᖅᑯᑎᖃᕆᐊᖓ.

ᐃᓱᒪᒋᓪᓗᒍ ᐱᔪᒃᓯᑎᑦᑎᓂᖓ, ᐃᑯᐊᓚ ᐅᖃᖅᐳᖅ, "ᐃᓱᒪᒋᔭᕋ ᐱᔪᒃᓯᓂᕆᔭᕋ ᓴᖅᑭᑎᑦᑐᒪᓂᑐᐃᓐᓇᖅᖢᓂᐅᒃ ᐱᐅᔪᓂᒃ ᓴᓇᙳᐊᖅᑕᐅᔪᓐᓇᖅᑐᓂᒃ, ᐃᓱᒪᑐᔫᖏᓐᓇᕈᒪᓂᖅ ᐊᔭᐅᕆᓂᕐᓗ ᐅᕙᓐᓂᒃ. ᑕᕝᕙᓂ, ᐃᑲᔪᖅᓯᑎᒋᐊᖃᕋᕕᑦ. ᐱᐅᖏᓐᓇᐅᔭᖅᑐᖅ ᓄᑖᓂᒃ ᐆᒃᑐᕐᓗᓂ, ᓲᖃᐃᒻᒪ ᐃᓱᒪᐃᑦ ᐆᒻᒪᕆᖕᓇᕐᒪᑦ ᐊᒻᒪᓗ ᖁᕕᐊᒋᐃᓐᓇᐅᔭᖅᖢᒍ, ᐊᒃᓱᕈᕐᓇᕐᓇᖅᑑᓪᓗᓂ. ᐃᖅᑲᐃᓐᓇᐅᔭᖅᑐᖅ ᐅᕙᓐᓄᑦ ᐱᒋᐊᕆᐊᒃᓴᖅ ᓄᑖᒥᒃ, ᐅᕝᕙᓘᓐᓃᑦ ᐱᓕᕆᐊᖃᕐᓗᖓ ᓄᑖᒥᒃ ᐱᖁᑎᒥᒃ, ᐅᕝᕙᓘᓐᓃᑦ ᓴᖅᑭᑦᑎᑐᐃᓐᓇᕐᓗᖓ ᐃᓱᒪᒋᔭᕐᓂᒃ ᐱᐅᔪᒥᒃ ᐊᒃᑐᐃᓂᖃᕐᓂᐊᕐᓂᖓᓂᒃ ᓴᓇᙳᐊᖅᑕᐅᔫᑉ ᒥᒃᓵᓄᑦ. ᑕᐃᒪᓐᓇ ᐱᔪᒃᓯᑎᑦᑎᖏᓐᓇᐅᔭᖅᑐᖓ ᐃᓐᓇᐅᓪᓗᖓ ᓴᓇᙳᐊᖅᑎᐅᓪᓗᖓ, ᓴᖅᑭᑦᑎᔪᓐᓇᐃᓐᓇᐅᔭᖅᖢᖓ ᓄᑖᓂᒃ ᐱᓕᕆᐊᒃᓴᓂᒃ ᐱᔪᒥᓇᖅᑐᓂᒃ ᐊᒻᒪ ᐃᓱᒪᓚᐅᖅᑐᖓ ᐱᐅᓇᓱᒋᓪᓗᒋᑦ, ᑕᒪᓐᓇᓗ ᐅᕙᓐᓄᑦ ᐱᐅᖅᑰᔨᒋᓚᐅᖅᖢᒍ ᓴᓇᙳᐊᒐᓕᐅᕆᐊᒃᓴᖅ."

ᐃᓱᒪᓕᐅᕋᒥ ᓅᒍᒪᓪᓗᓂ ᐅᑭᐅᖅᑕᖅᑐᒧᑦ ᑲᔪᓯᖁᓪᓗᒍ ᐃᓚᒌᑦ ᐱᖅᑯᓯᖓ ᓴᓇᙳᐊᕐᓂᕐᒧᑦ, ᑖᒥᓐ ᐃᖁᓚ ᐃᖅᑲᓇᐃᔮᖃᓕᓚᐅᖅᑐᖅ ᖁᕕᐊᒋᔭᒥᓂᒃ. ᖃᓪᓗᓈᑦ ᓄᓇᖓᓐᓅᒃᑲᓐᓂᓚᐅᖅᑎᓪᓗᒍ, ᒪᒃᑯᒃᑐᓂᒃ ᐊᔪᙱᑕᒥᓂᒃ ᑐᓴᖅᑎᑦᑎᕗᖅ ᑲᑎᙵᖃᑎᖃᖅᖢᓂ ᐅᑭᐅᖅᑕᖅᑐᒥ ᖃᕋᓴᐅᔭᒃᑯᑦ ᐊᒻᒪ ᑲᔪᖏᖅᓴᐃᓪᓗᓂ ᓄᑖᓂᒃ ᑭᖑᕚᒃᓴᒥᓂᒃ ᓴᓇᙳᐊᖅᑎᓂᒃ. ᓴᓇᙳᐊᒐᕐᓂᑦ ᓂᐅᕐᕈᑎᖃᓚᐅᖅᑎᓪᓗᒍ ᐊᒻᒪ ᓴᓇᐅᒐᕐᓂᑦ ᓴᓇᖃᑦᑕᓚᐅᖅᑎᓪᓗᒍ, ᓴᓇᖃᑦᑕᖅᑐᖅ ᑕᑯᒥᓇᖅᑐᓂᑦ ᐊᒻᒪ ᐅᐱᒍᓱᑦᑐᓂ ᑲᔪᓯᔪᓐᓇᖅᓯᓂᕐᒥᑦ ᐃᖅᑲᐅᒪᔭᒥᓂᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.