ᑕᐃᓇ ᑳᓐ (ᔭᕗᕆ) ᑎᑎᖅᑐᒐᖅᑎᐅᔪᖅ ᓄᖅᑲᖅᓯᒪᖏᑦᑐᖅ ᐃᖅᑲᓇᐃᔭᕐᓂᖓᓄᑦ, ᓴᖅᑭᔮᖃᑦᑕᖅᑐᖅ ᐊᒥᓱᒐᓚᓐᓂᑦ ᑕᓚᕖᓴᒃᑯᑦ ᑕᑯᔅᓴᐅᑎᑦᑎᔪᓂᑦ, ᓂᐅᖅᑯᑎᖃᕋᓱᐊᖅᑐᓂᑦ, ᐊᒻᒪ ᒧᒥᖅᑐᓂᑦ.

ᒌᓂᔅ ᐊᒻᒪᓗ ᐅᔨᐳᐃ ᓯᑰᒃ, ᒫᓂᑑᕙᒥᐅᑕᖅ, ᑭᓯᐊᓂᓕ ᒫᓐᓇ ᒥᓯᓵᒐᒥᐅᑕᐅᓕᖅᑐᖅ, ᐋᓐᑎᐅᕆᐅᒥ, ᐊᒻᒪᓗ ᐱᓕᕆᖃᑦᑕᖅᓯᒪᓪᓗᓂ ᑎᑎᖅᑐᒐᖅᑎᐅᓪᓗᓂ ᑕᒪᒃᑮᓐᓂᒃ ᐃᓇᖐᓯᒪᑲᐃᓐᓇᖅᑐᓂ ᐊᒻᒪᓗ ᒧᒥᖅᑐᓂ. ᒪᒃᑯᑦᑐᓄᑦ ᐊᐅᓚᑦᑎᔨᐅᒻᒥᔪᖅ ᑎᒥᐅᔪᒧᑦ ᑕᐃᔭᐅᔪᖅ ᑐᕌᓐᑐᒥ ᑲᑎᒪᔩᑦ ᐃᑯᐊᓚᓂᕐᒧᑦ ᐱᖅᑯᓯᓕᕆᕕᒃ, ᐊᒻᒪᓗ ᐊᐅᓚᑦᓯᔨᐅᔪᖅ ᓯᕗᓪᓕᖅᐹᒥ ᖃᑦᑎᕆᓂᕐᒧᑦ.

ᑕᐃᓇ ᐅᖃᖅᐳᖅ ᐃᓅᓯᖓᑕ ᐃᓚᖓ ᐱᒋᐊᓚᐅᖅᓯᒪᓂᖓᓂᒃ ᓯᕗᓪᓕᖅᐹᒥ ᐃᑯᐊᓪᓚᒃᑐᓕᕆᓂᕐᒧᑦ ᒧᒥᕆᐅᖅᓴᓂᕐᒥᒃ ᑲᑎᒪᔩᑦ ᐃᑭᑦᑐᖃᖅᑎᓪᓗᒍ, ᑖᓐᓇ ᐱᓕᕆᐊᒃᓴᖅ ᐊᕐᕌᒍᓕᖕᓄᑦ 7-ᓄᑦ ᑎᑭᖦᖢᒍ ᐃᓐᓇᕈᓕᓵᖅᑐᓄᑦ ᐊᔾᔨᒌᙱᑦᑐᓂᒃ ᒧᒥᕆᐅᖅᓴᑎᑦᑎᓪᓗᓂ.

"ᐅᓂᒃᑳᖃᑦᑕᖅᑐᒍᑦ ᐊᐅᓚᓂᑦᑎᒍᑦ ᑕᐃᒫᒃ ᐅᖃᕋᓱᐊᖅᐳᖓ. ᐅᖃᐅᓯᖃᓚᐅᖅᑐᒍᑦ ᐊᓯᐅᓯᒪᔪᓂᒃ ᐃᓄᐊᖅᑕᐅᓯᒪᔪᓂᒡᓗ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ. ᐅᖃᐅᓯᖃᖅᓯᒪᕗᒍᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ, ᖃᓄᖅ ᑐᑭᖃᕐᒪᖔᑦ ᐅᑎᖅᑎᑦᑎᓂᖅ ᐃᓕᖅᑯᓯᑦᑎᓐᓂᒃ ᑖᓂᓯᕐᓂᒃᑯᑦ," ᐅᖃᖅᑐᖅ ᑕᐃᓇ.

ᒧᒥᕆᐅᖅᓴᑎᑦᑎᖃᑕᐅᓪᓗᓂ, ᑕᓚᕖᓴᒃᑰᓚᐅᖅᑐᖅ ᓲᕐᓗ ᐋᓐ E−ᒥᑦ ᐃᙱᖅᖢᓂᓗ ᓂᔾᔭᐅᓯᔭᖅᖢᓂ ᑎᑕᒃᑎᓄᑦ ᑕᐃᔭᐅᓪᓗᓂ ᑯᐃᓐ ᓄᓇᖁᑎᖏᑦ.

"ᐱᙳᐊᖅᑎᐅᓂᖅ ᒪᑐᐃᖅᓯᓯᒪᔪᖅ ᐊᒥᓱᓂᑦ ᒪᑐᓂᑦ, ᐃᓇᖐᓯᒪᑦᓱᓂ ᒧᒥᕐᓂᕐᒥᓪᓗ ᐃᓕᓐᓂᐊᑎᑦᓯᓂᕐᒥᓪᓗ, ᐅᕙᓐᓂᑦ ᑐᕌᖅᑎᑦᓯᓯᒪᔪᖅ ᐊᔾᔨᒌᖏᑦᑐᓂᑦ."

ᑕᐃᓇᐅᑉ ᐃᖏᕐᕋᓂᕆᔭᖓ ᖁᙱᐊᖅᑕᐅᓂᕐᒧᑦ ᐃᒪᓐᓇ ᐅᖃᖅᐸᓚᐅᖅᐳᖅ, "ᓇᕿᖦᖢᓂᐅᒃ" ᒧᒥᐃᓐᓇᐅᔭᖅᖢᓂᓗ, ᐃᙱᕈᒪᐃᓐᓇᐅᔭᖅᖢᓂ, ᓇᒡᓕᒍᓱᒃᖢᓂᓗ ᐅᓂᒃᑳᕐᓂᕐᒥᒃ.

"ᐃᒪᓐᓇᐅᖅᑰᔨᔪᖓ ᐊᐅᓐᓃᑐᐃᓐᓇᖅᖢᖓ ᐃᓚᒋᔭᐅᓪᓗᓂᓗ ᓄᓇᖃᖅᑳᖅᓯᒪᔪᑦ ᐃᓅᓪᓗᑕ, ᐅᓂᒃᑳᖅᑐᐊᖅᑎᐅᒐᑦᑕ. ᑕᐃᒪᐃᒻᒪᑦ ᐊᓯᔾᔨᖅᐸᓪᓕᐊᑐᐃᓐᓇᓚᐅᖅᑐᖅ," ᑕᐃᓇ ᐅᖃᖅᐳᖅ.

ᐅᖃᕆᓪᓗᓂᓗ ᒧᒥᕐᓂᖅ ᐊᒻᒪ ᐱᙳᐊᕐᓂᖅ ᐃᑲᔪᓚᐅᖅᑐᖅ "ᐱᓗᐊᖅᑐᒥᑦ, ᑖᖅᑐᒻᒪᕆᒻᒥᑦ" ᐃᓅᓯᖓᓂᑦ ᐊᒻᒪ ᐅᖃᖅᑐᓂ ᒪᒥᓴᕈᑎᑦᑎᐊᕙᐅᓂᕋᑦᑐᓂᐅᒃ ᐊᒻᒪ ᐃᒻᒥᓂᒃ ᐅᖃᐅᓯᕆᓪᓗᓂ ᐅᖃᐅᓯᒃᑯᑦ ᐱᓕᕆᒋᐊᖃᕐᓇᓂ.

ᒧᒥᕐᓂᖅ ᐊᒻᒪ ᐱᙳᐊᕐᓂᖅ ᓈᒻᒪᑦᑎᐊᓚᐅᕋᓗᐊᖅᑎᓪᓗᒍ ᑖᔅᓱᒧᖓ, ᑕᐃᓇ ᓱᓕ ᐃᓕᓐᓂᐊᕆᐊᓚᐅᖅᑐᖅ ᐅᖄᓚᓪᓗᓂᓗ ᐃᖏᕐᕋᓂᕆᓚᐅᖅᑕᖓᓄᑦ ᑕᒪᐃᓐᓂᒃ ᐃᓕᓴᕆᔭᐅᓪᓚᑦᑖᖅᖢᓂ ᐊᒻᒪ ᐱᓪᓚᕆᒃᖢᓂ.

ᒧᒥᖃᑦᑕᓕᓚᐅᖅᑐᖅ ᕈᐃᐅᓪ ᐅᐃᓂᐹᒡ ᕚᓪᓚᑦ ᐃᓕᓐᓂᐊᕐᕕᖓᓅᖅᑐᓂ ᐊᒻᒪᓗ ᔪᐊᒃ ᓯᓚᑦᑐᓴᕐᕕᕐᔪᐊᖓᓅᖅᑐᓂ ᑎᑎᖅᑐᒐᕐᓂᕐᒧᑦ ᐸᐃᑉᐹᖃᓚᐅᖅᑐᓂ ᒧᒥᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᑐᓂ ᐊᖅᓴᒥᒃ, ᐅᓪᓗᒥᓕᓴᕐᓂᒃ, ᐅᓪᓗᒥᓯᐅᑎᓂᒃ jazz-ᒥᒃ, ᐊᒻᒪᓗ ᐊᓯᒃᑲᓐᓂᖏᓐᓂᒃ.

ᑕᐃᓐᓇᓕ ᐃᓇᖐᓯᒪᔪᖅ, ᐅᖃᖅᑐᓂ "ᑕᐃᒪᐃᓪᓚᑦᑖᖏᑦᑐᖅ".

"ᓯᕗᓪᓕᖅ, ᑕᕐᕆᔭᑐᐃᓐᓇᓚᐅᖅᑐᑦ, ᐱᔪᒃᓯᓕᕐᖢᑎᒃ, ᑕᓚᕖᓴᒃᑰᖅᖢᑎᒃ. ᓱᓕᓪᓗᖓ, ᒪᒃᑯᖕᓂᖅᓴᐅᑎᓪᓗᖓ, ᑕᑯᓇᔭᖅᑕᒃᑲ ᑎᑎᕋᖅᓯᒪᔪᑦ ᐊᔪᕈᓐᓃᖅᓴᖅᐸᒃᖢᒋᑦ ᑕᕐᕋᖅᑑᑎᒃᑯᑦ," ᐅᖃᖅᑐᖅ ᑕᐃᓇ.

ᑭᓯᐊᓂ ᐱᓕᕆᔪᒪᓚᐅᕈᓂ ᐃᙱᖅᑎᐅᓗᓂ, ᐊᖏᕐᕋᖓᓂ ᐊᐅᓪᓚᕆᐊᖃᓚᐅᖅᑐᖅ ᒫᓂᑑᕙᒥ ᐊᒻᒪ ᓄᓇᓕᐸᐅᔭᕐᒧᑦ ᓅᓪᓗᓂ ᐊᓯᐊᓄᑦ ᐊᕕᒃᑐᖅᓯᒪᓂᕐᒧᑦ. ᐅᖃᕐᖢᓂ "ᐊᒃᓱᕈᕐᓇᖅᑐᖅ, ᐊᒃᓱᕈᕐᓇᖅᑐᖅ" ᑭᓯᐊᓂ ᑭᓱ ᐃᑲᔪᓚᐅᖅᐸ ᓅᑉᐸᓪᓕᐊᓂᕐᒧᑦ ᑲᑎᙵᖃᑎᖃᐃᓐᓇᕐᖢᓂ ᐱᖃᓐᓇᕆᔭᖏᓐᓂ ᐊᖏᕐᕋᒧᑦ ᐃᓚᐅᖃᑕᐅᓪᓗᓂᓗ ᑲᑎᙵᔪᓄᑦ ᑲᑎᖃᑎᖃᕐᖢᓂᓗ ᐃᓄᖕᓂᒃ ᐊᔾᔨᕐᓚᖏᓐᓂᒃ ᐱᔪᒪᔪᓂᒃ.

ᑕᐃᓇ ᐊᓯᖏᓐᓂᒃ ᑐᓗᖅᑕᕈᑎᖃᖃᑦᑕᖅᓯᒪᔪᖅ ᐃᖅᑲᓇᐃᔮᖓᓂ. ᐱᙳᐊᖅᑎᐅᓪᓗᓂ, ᐅᖃᖅᐳᖅ ᕿᐱᓗᐃᓐᓇᖃᑦᑕᕐᓂᕋᖅᖢᓂ ᐊᒻᒪ ᐃᒻᒥᓂᒃ−ᐱᔪᓐᓇᙱᖦᖢᓂ ᐱᙳᐊᖅᑎᐅᒍᓂ.

"ᑭᓱᒥ ᐃᑲᔪᕐᔪᐊᓚᐅᖅᑐᖓ ᖃᐅᔨᒪᓪᓗᖓ, ᓴᓇᙳᐊᖅᑎᐅᓗᓂ, ᓲᖃᐃᒻᒪᓕ ᑭᓇᒧᒃᑭᐊᖅ ᐊᖏᖅᑐᖃᖅᐸᑦ ᑭᓇᒧᒃᑭᐊᖅ ᐅᖃᐅᔾᔭᐅᒍᕕᑦ ᐱᐅᓂᕐᓂᒃ. ᑕᒪᓐᓇ ᐱᓕᕆᐊᖑᕙᓪᓕᐊᓂᕐᒨᖓᕗᖅ; ᓇᒡᓕᒍᓱᖕᓂᕐᒧᐊᖓᔪᖅ. ᓴᓇᙳᐊᖅᑕᐃᑦ ᖁᕕᐊᒋᒍᕕᐅᒃ, ᑕᐃᒪᓕ ᐊᖅᑯᑎᑦᑎᐊᕙᒃᑰᖅᐳᑎᑦ."

ᐊᓪᓛᑦ, ᐱᓕᕆᔾᔪᓯᖓ ᑕᑯᑦᓴᐅᑎᑦᓯᓂᕐᒥᑦ "ᐋᓐ E"-ᒥᑦ ᐱᕕᖃᓚᐅᖅᑐᖅ. ᑕᐃᓇ ᐊᒥᓱᐊᖅᑎᖅᑐᓂ ᖃᐅᔨᓴᖃᑦᑕᓚᐅᖅᑐᖅ ᐊᒻᒪᓗ ᐅᖃᐅᔾᔭᐅᓪᓗᓂ ᐋᒡᒑᖅᑕᐅᓪᓗᓂ, ᐅᖄᓚᓪᓗᓂ ᑕᒻᒪᖅᓯᒪᔪᖅᓯᐅᖁᔭᐅᓪᓗᓂ ᐊᒻᒪᓗ ᐃᓱᒪᓗᐊᕋᓂ ᑐᓴᖃᑦᑕᕋᒥ ᐊᒥᓱᐊᖅᑎᖅᑐᓂ...

ᐅᖄᓚᕕᐅᒃᑲᓐᓂᓕᓚᐅᖅᑐᖅ, ᐊᒻᒪᓗ ᐊᒥᓱᓂᒃ ᖃᐅᔨᓴᕆᐊᖃᓚᐅᖅᑐᖅ ᑕᐃᓪᓗᓂᐅᒃ "ᑕᒻᒪᖅᓯᒪᔪᖅᓯᐅᕐᓂᖅ" ᐊᒻᒪᓗ ᖃᐅᔨᒪᒐᓂ ᑲᔪᓯᓂᐊᕐᒪᖔᖅ.

"ᐃᖅᑲᓇᐃᔮᖅᑖᕋᒪ, ᐅᖃᓗᒡᕕᐅᓚᐅᖅᑐᖓ, ᑕᖅᑭᐅᑉ ᐅᖓᑎᑦᑎᐊᖓᓅᓚᐅᖅᑐᖓ. ᐃᒪᓐᓇᐃᑦᑑᓚᐅᖅᐳᖓ, "ᑭᓱ? ᑕᒪᓐᓇ ᑲᒪᓇᓪᓚᕆᑦᑐᖅ." ᐋᓐ E−ᖃᖅᖢᓂ ᐅᓂᒃᑳᑦᑎᐊᕐᓇᖅᑐᒻᒪᕆᐅᓚᐅᖅᐳᖅ ᐊᒃᑐᖅᓯᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᑐᖅᑕᐅᕙᒃᑐᒧᑦ, ᑕᒪᓐᓇᓗ ᑕᑯᒃᓴᐅᑎᑕᐅᓪᓚᕆᓚᐅᖅᖢᓂ ᓱᓕᑦᑎᐊᖅᑐᒃᑯᑦ, ᑕᒪᓐᓇᓗ ᐱᐅᔪᒻᒪᕆᐊᓘᓚᐅᖅᖢᓂ ᐊᑐᖅᑕᐅᓪᓚᕆᒃᖢᓂ," ᑕᐃᒪᓐᓇ ᑕᐃᓇ ᐅᖃᖅᖢᓂ.

ᐱᙳᐊᖅᑎᓪᓗᒋᑦ, ᓄᓇᓖᑦ ᐱᔪᒃᓯᑎᑦᑎᓲᖑᕗᑦ ᐊᒻᒪ "ᐃᓄᖁᑎᑦᑎᓐᓂᒃ ᑕᑯᓪᓗᓂ" ᐅᑎᖅᑎᑦᑎᓂᕐᒥᒃ ᐅᖃᐅᓯᕐᒥᒃ ᐊᒻᒪ ᐃᓕᖅᑯᓯᑦᑎᓐᓂᒃ, ᑭᓯᐊᓂᑦᑕᐅᖅ ᐱᔪᒃᓯᓕᖅᑎᑕᐅᒋᓪᓗᓂ ᑕᐃᒃᑯᓄᖓ ᖃᐃᓚᐅᖅᑐᓄᑦ ᐅᓪᓗᒥᒧᑦ ᑎᑭᖦᖢᒍ.

"ᑕᐃᒪᓕ ᑕᑯᔭᕌᖓᒪ ᐱᙳᐊᖅᑎᓂᒃ ᑕᓚᕖᓴᒃᑯᑦ, ᓲᕐᓗ ᒪᐃᑯ ᒍᕆᔅ, ᐅᖃᖅᐳᖓ, 'ᑭᓇ,' ᐱᔪᒃᓯᑦᑎᐊᓕᓲᖑᔪᖓ, ᑕᐃᒪᓐᓇ ᐱᔪᒃᓯᑎᑦᑎᑦᑎᐊᕋᒪ ᐊᒻᒪ ᑕᐃᒪᐃᑦᑐᓐᓇᖅᐸᑦ, ᐃᒻᒪᖄ ᑕᐃᒪᐃᓕᐅᕈᓐᓇᖅᐳᖓ," ᑕᐃᓇ ᐅᖃᖅᑐᖅ.

"ᑕᑯᖅᑰᔨᔪᖅ ᐃᓄᖕᓂᒃ ᖁᐊᖅᑕᖅᑐᓂᒃ ᐊᒻᒪ ᖃᐅᔨᒪᓕᖅᖢᖓ ᐃᒻᒪᖄ ᐃᖏᕐᕋᓂᕆᔭᕋ ᐊᓯᓐᓄᑦ ᐊᖅᑯᓵᖅᐸᓪᓕᐊᖕᒪᑦ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.