"ᑕᐅᑐᙳᐊᓚᐅᙱᓐᓇᒪ ᖃᐅᔨᓴᕐᓂᕐᒥᒃ ᖁᐱᕐᕈᓂᒃ. ᑕᐅᑐᙳᐊᓚᐅᖅᑕᕋ ᖃᐅᔨᓴᖅᑐᓕᕆᓂᖅ ᐊᑑᑎᖃᖅᑐᒃᑯᑦ, ᐃᓄᖕᓄᑦ ᐊᑑᑎᖃᖅᑐᒃᑯᑦ, ᐊᒻᒪ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᓯᕗᓪᓕᐅᑎᔪᒪᓪᓗᒋᑦ. ᐱᓕᕆᔾᔪᓯᕋ ᐃᖅᑲᓇᐃᔮᓐᓂ ᐅᒃᐱᕆᔭᐅᔪᓂᒃ ᑐᙵᕕᖃᖅᐳᖅ," ᐅᓂᒃᑳᓚᐅᖅᐳᖅ ᑖᓂᐊᓪ ᓇᐅᓵᑦ, ᐃᖅᑲᐅᒪᓪᓗᓂ PhD-ᑖᕈᒪᓚᐅᙱᓐᓂᕐᒥᓂᒃ. ᓄᓇᓕᖕᒥᐅᑦ ᐊᐱᕆᓚᐅᖅᓯᒪᔭᖓ ᖃᐅᔨᓴᖁᔨᓪᓗᓂ ᖁᐱᕐᕈᓂᒃ ᑭᐅᓚᐅᖅᖢᓂᓗ.

ᓇᐅᓴᑦ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᖃᑕᐅᕗᖅ ᓯᓚᑦᑐᖅᓴᕐᕕᒡᔪᐊᒥ ᑳᓪᒍᕆᒥ. ᕋᑦ ᕆᕗ ᐊᓪᓚᖓᔪᖅ ᒫᓂᑑᐸᒥᐅᑕᖅ ᐊᓈᓇᖓᑕ ᓴᓂᐊᓂ ᐊᒻᒪ ᔮᒪᓂᒥᐅᑕᖅ ᓄᓇᑖᖅᓯᒪᓪᓗᓂ ᐊᑖᑕᒥᓄᑦ. ᐃᓱᒪᖅᓱᓕᕌᖓᒥ ᓴᓇᙳᐊᖅᑎᐅᕗᖅ, ᓴᐸᖓᓕᐅᖅᐸᒃᖢᓂ ᐊᒻᒪ ᐆᒪᔪᓂᒃ ᐊᔾᔨᓕᐅᕆᕙᒃᖢᓂ. ᖁᕕᐊᒋᔭᖃᖅᑐᖅ ᑎᖕᒥᐊᖅᓯᐅᕐᓂᕐᒥᒃ, ᐊᐅᓪᓛᖅᓯᒪᓂᕐᒥᒃ, ᐱᕈᖅᓰᓂᕐᒥᒃ, ᐊᐳᒻᒧᑦ ᑲᒥᓪᓛᕈᑎᙳᐊᓂᒃ ᐊᒻᒪ ᕿᒻᒥᒥᓂᒃ ᐱᓱᑲᑕᖕᓂᕐᒥᒃ.

ᐱᓕᕆᔨᒻᒪᕆᐅᓂᕐᒥᒍᑦ, ᓘᒃᑖᖑᓂᕐᒧᑦ ᐱᓕᕆᓂᕆᕙᒃᑕᖓ ᖃᐅᔨᓴᖅᓯᕙᒃᐳᖅ ᖃᓄᐃᓕᐅᖅᐸᖕᓂᖏᓐᓂᒃ ᖁᐱᕐᕈᐃᑦ ᐋᓐᓂᐊᕆᔭᐅᓕᖅᐸᒃᑐᓂᒃ ᐊᐃᑦᑐᕐᓗᐃᕙᓪᓕᐊᕙᖕᓂᖏᓐᓄᑦ ᑐᒃᑐᓄᑦ. ᓄᓇᕗᒻᒧᙵᐅᒐᔪᒃᐳᖅ ᑲᑎᖃᑎᖃᖅᐸᒃᖢᓂᓗ ᐃᓄᐃᑦ ᓄᓇᓕᖏᓐᓂᒃ. ᐱᓕᕆᐊᖏᑦ ᐊᔾᔨᒌᖃᑦᑕᙱᑦᑐᑦ ᐊᕐᕌᒍᑉ ᐃᓚᐃᓐᓇᖓᓂ. ᐊᐅᔭᒃᑯᑦ, ᐃᖅᑲᓇᐃᔭᖅᑎᑦᑎᕙᒃᐳᖅ ᐊᔪᕈᓐᓃᖅᓴᖅᑎᑦᑎᕙᒃᖢᓂᓗ ᐃᓄᖕᓂᒃ ᒪᒃᑯᒃᑐᓂᒃ ᑲᑎᖅᓱᐃᔪᓐᓇᕐᓂᕐᒥᒃ ᖁᐱᕐᕈᓂᒃ ᓄᓇᒥ. ᐅᑭᐊᒃᓵᒃᑯᑦ, ᑎᑎᕋᖅᐸᒃᐳᖅ ᐅᓂᒃᑲᐅᓯᕐᓂᒃ, ᖃᐅᔨᓴᖅᓯᕙᒃᖢᓂ ᑎᑎᕋᖅᓯᒪᔪᓂᒃ, ᐅᖃᐅᓯᖃᖅᐸᒃᖢᓂ ᐱᓕᕆᐊᕆᓯᒪᔭᒥᓂᒃ ᑲᓇᑕᓕᒫᒥ ᓄᓇᕐᔪᐊᓕᒫᒥᓗ. ᐅᑭᐅᖑᓕᖅᐸᑦ, ᑳᓪᒍᕆᒥ ᖃᐅᔨᓴᕐᕕᖕᒦᓕᖅᐳᖅ ᓄᓇᕗᒻᒥᓗ ᓄᓇᓕᖕᒥᐅᓂᒃ ᐱᖃᑎᖃᖅᖢᓂ. ᐊᔾᔨᒌᙱᑦᑑᑎᓂᒃ ᖁᕕᐊᒋᔭᖃᖅᐳᖅ.

ᐃᓕᓐᓂᐊᕐᓂᖓᓄᓪᓕ, ᓯᓚᑦᑐᖅᓴᕐᕕᒡᔪᐊᕐᒥ ᐱᒋᐊᓚᐅᖅᓯᒪᔪᖅ 2013-ᒥ ᐅᐃᓂᐸᐃᒡ ᓯᓚᑦᑐᖅᓴᕐᕕᒡᔪᐊᖓᓂ, ᐅᒃᐱᕈᓱᓕᖅᖢᓂ ᓴᓇᙳᐊᕐᓂᕐᒧᑦ ᓇᓗᓇᐃᒃᑯᑕᖅᑖᕈᒪᓪᓗᓂ ᐊᒻᒪ ᖃᐅᔨᓴᖅᑐᓕᕆᓂᖅ ᐊᔪᕐᓇᓗᐊᕐᓂᖓᓂᒃ ᑖᔅᓱᒧᖓ. ᐊᕐᕌᒍᓂ ᐊᕐᕕᓂᓕᖕᓂ ᐱᐊᓂᒃᓯᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᒥᓂᒃ, ᖃᐅᔨᓴᖅᑐᓕᕆᓂᕐᒧᑦ, ᐊᕐᓇᓄᑦ ᐃᓕᓴᐃᔨᓄᑦ ᐃᓕᓐᓂᐊᕐᕕᖓᓂ ᐊᔭᐅᖅᑐᖅᑕᐅᓚᐅᖅᑎᓪᓗᒍ ᐊᒻᒪ ᐱᕕᒃᓴᖃᓕᖅᖢᓂ ᐃᖅᑲᓇᐃᔭᕈᓐᓇᕐᓂᕐᒥᒃ ᐅᑭᐅᖅᑕᖅᑐᒥ.

ᐃᖅᑲᓇᐃᔭᓚᐅᖅᑐᖅ ᑰᒡᔪᐊᕌᓗᖕᒥ, ᒫᓂᑑᐸᒥ ᑕᖅᑭᓄᑦ ᑎᓴᒪᓄᑦ ᖃᐅᔨᓴᖅᑎᐅᓪᓗᓂ, ᐱᕕᒃᓴᐅᔪᖅ ᐃᓱᒪᒃᑯᑦ ᐱᕙᒌᔭᖅᓯᒪᓚᐅᙱᓚᖅ. ᓇᐅᓴᑦ ᖁᕕᐊᒋᔭᖃᒻᒪᕆᓕᓚᐅᖅᐳᖅ ᐱᓕᕆᐊᕆᓯᒪᔭᒥᓂᒃ 12 ᐅᖓᑖᓂ ᐊᔾᔨᒌᙱᑦᑐᓂᒃ ᖃᐅᔨᓴᖅᓯᓂᕐᒧᑦ ᐱᓕᕆᐊᖑᔪᓂᒃ, ᑲᑎᖅᓱᐃᓪᓗᓂ ᑎᑎᕋᖅᓯᒪᔪᓂᒃ ᓄᓇᒥ. ᐅᒃᐱᕈᓱᓕᒃᑲᓐᓂᓚᐅᖅᐳᖅ ᐊᔪᙱᓐᓂᕆᔭᒥᓂᒃ ᐊᓂᒍᐃᓂᕐᒧᑦ ᐃᓕᓐᓂᐊᖅᑕᒥᓂᒃ ᖁᕕᐊᒋᔭᖃᕐᓂᖅᓴᐅᓕᖅᖢᓂᓗ ᑕᐃᒪᐃᓕᐅᕆᐊᒃᓴᖅ ᐅᑭᐅᖅᑕᖅᑐᒥ ᐃᒃᐱᒋᔭᖃᖅᖢᓂ ᓴᙱᔪᒥᒃ ᐊᒃᑐᐊᓂᖃᕐᓂᕐᒥᒃ ᓄᓇᒧᑦ.  

ᓇᐅᓴᑦ ᐱᓇᔪᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᒥ ᓯᓚᑦᑐᖅᓴᕐᕕᒡᔪᐊᒥ ᒍᐃᐅᓪᕝᒥ ᐋᓐᑎᐅᕆᐅᒥ ᓂᕆᐅᖕᓂᖃᖅᖢᓂ ᐅᑭᐅᖅᑕᖅᑐᒧᑦ ᐅᑎᓛᕈᒪᓪᓗᓂ ᐊᒻᒪ ᐋᓐᓂᐊᕕᒡᔪᐊᕐᓇᖅ ᓴᖅᑭᓚᐅᖅᑎᓪᓗᒍ, ᑭᓱᓕᒫᑦᑎᐊᓂᒃ ᐱᓕᕆᔪᒪᔭᒥᓂᒃ ᓄᖅᑲᖅᑎᑦᑎᓪᓗᓂ ᖃᐅᔨᓴᕐᕕᖕᒥ ᐊᐅᓪᓚᑲᑕᖕᓂᕐᒧᑦ. ᐅᖃᐅᔾᔨᒋᐊᖅᑎᖓ ᖃᐅᔨᒋᐊᓚᐅᖅᐳᖅ ᐊᐱᕆᓪᓗᓂᓗ PhD−ᑖᕈᒪᖕᒪᖔᑦ ᐊᒻᒪ ᐃᓕᓐᓂᐊᒃᑲᓐᓂᕈᒪᓕᓚᐅᖅᐳᖅ. ᖁᕝᕙᓯᖕᓂᖓ ᐱᐅᒋᑦᑎᐊᓚᐅᖅᑕᖓ, ᐊᒃᓱᕈᕐᓇᕋᓗᐊᖅᑎᓪᓗᒍ, ᐊᒃᓱᕈᕐᓇᖅᖢᓂ, ᑲᑉᐱᐊᓇᖅᖢᓂ ᐃᓄᑑᓐᓇᖅᖢᓂᓗ. ᑭᖑᓂᐊᒍᑦ, ᐋᖅᑭᒃᓯᓚᐅᖅᐳᖅ ᐅᑭᐅᖅᑕᖅᑐᒥ ᖁᐱᕐᕈᓂᒃ ᓇᐅᑦᑎᖅᓱᖅᓯᓂᕐᒧᑦ ᐱᓕᕆᐊᖑᕙᒃᑐᒥᒃ ᐱᓕᕆᖃᑎᖃᑦᑎᐊᒃᑲᓐᓂᓕᖅᖢᓂᓗ ᐃᓄᖕᓂᒃ ᐱᓕᕆᖃᑎᒋᕙᒃᑕᒥᓂᒃ, ᐋᖅᑭᒃᓱᐃᓕᖅᖢᓂ ᓇᖕᒥᓂᖅ ᓯᕗᓂᒃᓴᒥ ᐱᓕᕆᓂᐅᓇᔭᖅᑐᒧᑦ. ᑭᖑᓂᐊᒍᑦ, ᐊᑑᑎᖃᓚᐅᖅᐳᖅ, ᑭᓯᐊᓂ ᐊᒃᓱᕈᕐᓇᖅᑐᒻᒪᕆᐅᓚᐅᖅᐳᖅ

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᖕᒧᑦ ᐅᑎᕐᓂᐊᖅᑐᓄᑦ ᓄᖅᑲᖓᓚᐅᑲᓚᐅᕐᓗᑎᒃ ᐊᕐᕌᒎᒃ ᒪᕐᕉᒃ ᐃᓕᓐᓂᐊᕇᖅᓯᒪᓕᖅᑎᓪᓗᒋᑦ ᐊᑐᕐᓗᒋᑦ ᐅᓄᖅᑐᑦ ᐃᑲᔫᑎᒃᓴᑦ ᐊᑐᖅᑕᐅᙱᓗᐊᖅᑐᑦ ᐃᓕᓐᓂᐊᖅᑎᓄᑦ ᓲᕐᓗ ᐊᑭᖃᙱᑦᑐᒥᒃ ᐃᓕᓐᓂᐊᕈᑎᒥᒃ ᐃᑲᔪᖅᑕᐅᓂᖅ ᐊᒻᒪ ᑮᓇᐅᔭᑎᒍᑦ ᐃᑲᔪᖅᑕᐅᓂᖅ. ᐱᖓᓱᓂᑦ ᐃᖅᑲᓇᐃᔮᓂᑦ ᐊᑦᑎᒃᓯᕚᓪᓕᕈᓐᓇᓚᐅᖅᐳᖅ ᐃᑲᔪᖅᑕᐅᓂᖓᓄᑦ.

ᓇᐅᓴᑦ ᐅᖃᐅᔾᔨᒋᕗᖅ "ᐃᓅᓯᕐᓂ ᐊᑐᖅᓯᒪᔭᓕᒫᑎᑦ ᑲᑎᑦᑐᓐᓇᖅᐳᑦ ᐃᓕᖕᓂᒃ ᐃᑲᔪᕐᓂᐊᕐᓗᑎᒃ ᐃᓕᓐᓂᐊᖅᑕᕐᓂᒃ ᐊᒻᒪ ᓯᕗᓂᒃᓴᒥ ᐃᖅᑲᓇᐃᔮᕆᔪᒪᔭᕐᓂᒃ. ᐱᙳᐊᕋᓱᒃᐸᒡᓗᓯ. ᐱᓇᔪᒃᐸᒡᓗᑎᑦ ᖃᓄᑐᐃᓐᓇᖅ ᖁᕕᐊᒋᔭᕐᓂᒃ, GPA−ᒋᔭᐃᓪᓗ ᐃᓕᖕᓂᒃ ᓇᓗᓇᐃᖅᓯᑎᑦᑕᐃᓕᓗᒍ ᐃᓅᓂᕐᓂᒃ.... ᐊᖏᓂᖅᓴᒻᒪᕆᐅᕗᑎᑦ ᑖᔅᓱᒥᖓ. ᖃᐅᔨᒪᑐᐃᓐᓇᕆᑦ ᐊᒃᓱᕈᕐᓇᖅᑐᓂᒃ ᐊᓂᒍᐃᔪᓐᓇᕋᕕᑦ ᐊᒻᒪ ᐊᓂᒎᑎᔪᓐᓇᕋᕕᑦ ᓱᓕ ᑲᔪᓯᑦᑎᐊᕈᓐᓇᖅᖢᑎᑦ.

ᑐᓗᖅᑕᕈᑕᐅᕙᒃᑐᓄᓪᓕ, ᓇᐅᓴᑦ ᐃᖅᑲᐅᒪᕗᖅ ᐃᓚᖏᓐᓂᒃ ᐊᒃᓱᕈᕐᓇᖅᑐᒻᒪᕆᐊᓗᖕᓂᒃ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᖅᑕᒥᓂᒃ ᐊᓂᒍᐃᑲᓴᑦᑎᐊᓚᐅᙱᓐᓂᕐᒥᓂᒃ. ᐊᑦᑎᒃᑐᒥ GPA−ᖃᕋᓗᐊᖅᑎᓪᓗᒍ, ᐃᑲᔪᖅᑕᐅᓪᓗᓂ ᐃᓕᓐᓂᐊᕌᓂᖕᓂᕐᒧᑦ ᐊᔪᕈᓐᓃᖅᓴᕐᓂᕐᒧᑦ ᐅᖃᐅᔾᔪᐃᔨᒧᑦ, ᑐᒃᓯᕋᓚᐅᖅᐳᖅ ᐊᖏᖅᑕᐅᔪᒪᓪᓗᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒧᑦ. ᓯᓚᑦᑐᖅᓴᕐᕕᒡᔪᐊᕐᒥ ᐃᑲᔪᖅᑕᐅᒃᑲᓐᓂᓚᐅᕆᕗᖅ ᐃᓱᒪᒥᒍᑦ ᐊᔪᕈᑎᓕᖕᓄᑦ. ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᐃᑲᔪᕐᔪᐊᓚᐅᕆᕗᖅᑕᐅᖅ, ᐃᑲᔪᖅᐸᒃᖢᓂ ᐊᓂᒍᐃᔪᓐᓇᐃᓪᓕᓪᓗᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᔪᓐᓇᐃᓪᓕᓚᐅᖅᖢᓂ. "ᐱᔾᔪᑎᖃᓗᐊᖅᐳᖅ ᓴᐱᓕᖅᓴᕋᐃᙱᓐᓂᕐᒥᒃ ᐊᒻᒪ ᐊᓯᔾᔨᕈᓐᓇᕐᓂᕐᒥᒃ. ᖃᓄᐃᓕᐅᖅᑐᖃᐃᓐᓇᐅᔭᕐᓂᐊᖅᐳᖅ, ᖃᖓᐅᒐᓗᐊᖅᐸᑦ ᓇᓂᐅᒐᓗᐊᖅᐸᓪᓘᓐᓃᑦ, ᖃᐅᔨᒪᔭᕆᐊᖃᑐᐃᓐᓇᖅᖢᑕᓗ ᑭᓱᑦ ᐊᑐᐃᓐᓇᐅᖕᒪᖔᑕ, ᑭᓱᑦ ᑕᖅᑳᓃᑦᑐᑦ, ᐊᑐᑦᑎᐊᖅᐸᒡᓗᒋᓪᓗ," ᐅᖃᖅᑐᖅ.

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᕐᒥᒡᓗ, ᓇᐅᓴᑦ ᐊᑐᖅᐸᒃᐳᖅ ᓴᙱᔪᓂᒃ ᑭᒡᓕᒋᔭᐅᔪᓂᒃ ᐃᖅᑲᓇᐃᔮᒥᓄᑦ ᐃᓅᓯᕐᒧᑦ ᓇᓕᒧᒌᒃᑎᑦᑎᔪᒪᓂᕐᒥᓄᑦ. "ᓴᙱᓂᖃᕐᔪᐊᖅᐳᖅ ᐅᖃᐅᓯᖅ 'ᐋᒃᑳᕐᓂᖅ' ᑕᐃᒪᐃᑦᑕᕆᐊᖃᕈᕕᑦ," ᐅᖃᖅᑐᖅ, ᐃᓱᒪᓪᓗᓂ ᖃᓄᖅ ᐃᓚᐅᓗᐊᖃᑦᑕᙱᓐᓂᕐᒥᓂᒃ ᑕᖃᐃᖅᓯᕈᒪᓪᓗᓂ. ᐃᖅᑲᓇᐃᔭᒃᑲᓐᓂᓕᕌᖓᒥ ᐃᑲᕐᕋᓂᒃ ᓯᓚᒥ, ᐱᕕᒃᓴᖃᖅᑎᑉᐸᒃᑕᖓ ᐱᓕᕆᐊᕆᔪᒪᔭᒥᓂᒃ ᐱᓕᕆᔪᓐᓇᕐᓂᐊᕐᒪᑦ ᑕᖃᐃᖅᓯᕐᓗᓂᓗ ᓄᖅᑲᖓᓐᓇᐅᑎᓪᓗᒍ. ᖁᕕᐊᒋᔭᖏᑦ ᓲᕐᓗ ᐊᐅᓪᓛᖅᓯᒪᓂᖅ, ᐱᕈᖅᓰᓂᖅ, ᖃᑦᑖᕐᔪᓛᓕᕆᓂᖅ ᐊᒻᒪ ᐱᐅᖅᓱᐊᕐᓂᖅ ᐱᖃᓐᓇᕆᔭᒥᓃᖃᑎᖃᕐᓂᖅ ᐊᒻᒪ ᐃᓚᒥᓃᖃᑎᖃᕐᓂᖅ, ᑕᒪᕐᒥᑦᑎᐊᖅ ᐃᑲᔪᖅᐸᒃᐳᑦ ᐃᓱᒪᖃᑦᑎᐊᕐᓂᕐᒥᒃ ᐊᒃᓱᕈᕐᓇᕋᓗᐊᖅᑎᓪᓗᒍ ᐃᖅᑲᓇᐃᔮᖓ. "ᐃᓱᒪᑐᐃᓐᓇᖅᐳᖓ ᐱᒻᒪᕆᐊᓗᖕᒥᒃ ᓇᓕᒧᒌᒃᑎᑦᑎᓂᖅᑕᖃᕐᓂᖓᓂᒃ ᖃᓄᖅ ᐊᒃᓱᕈᕐᓇᖅᑎᒋᔪᓐᓇᕐᓂᖓᓂᒃ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔮᕆᔭᐅᓗᓂ," ᐅᖃᓚᐅᖅᐳᖅ.

ᐱᔪᒃᓯᑎᑦᑎᓂᒃᑯᓪᓕ, ᓇᐅᓴᑦ ᐱᔪᒃᓯᑎᑕᐅᕙᒃᐳᖅ ᐊᔪᙱᑦᑐᒻᒪᕆᖕᓂᒃ ᒪᒃᑯᒃᑐᓂᒃ ᓄᓇᓕᖕᓂᓗ ᐱᓕᕆᖃᑎᒋᕙᒃᑕᒥᓂᒃ. ᑲᒪᑦᑎᐊᖅᐳᖅ ᓄᓇᖃᖅᑳᖅᓯᒪᔪᑦ ᐱᓕᕆᐊᖏᓐᓂᒃ, ᐊᖅᑯᓯᐅᑦᑎᐊᖅᖢᑎᒃ ᓯᓚᑐᓂᖏᓐᓄᑦ ᐊᒻᒪ ᐃᓱᒪᑦᑎᐊᕆᖕᓂᖏᓐᓄᑦ. "ᓄᓇ ᐱᐅᒋᑦᑎᐊᕐᒥᔭᕋ. ᑕᒪᓐᓇ ᐱᔭᕆᐊᑭᑦᑐᑯᓘᖅᑰᔨᔪᖅ, ᑭᓯᐊᓂ ᑐᑭᓯᔪᒪᒐᒃᑯ, ᐃᑲᔪᕈᒪᓪᓗᒍᓗ," ᓂᐱᖅᑯᖅᑐᓪᓗᓂ ᐅᖃᖅᑐᖅ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᓇᐅᓴᑦ ᐅᖃᓚᐅᖅᐳᖅ, "ᐊᒥᓱᐊᓗᖕᓂ ᐊᔾᔨᒌᙱᑦᑐᓂ ᐊᖅᑯᑎᑕᖃᖅᐳᖅ ᑲᔪᓯᑦᑎᐊᕐᓂᕐᒧᑦ. ᐃᓚᖏᓐᓄᑦ ᐃᓄᖕᓄᑦ, ᐃᓕᓐᓂᐊᕐᕕᐅᕗᖅ. ᐊᓯᖏᓐᓄᑦ, ᑕᐃᒪᐃᙱᓚᖅ ᐃᓱᒪᕗᖓᓗ ᐃᓕᖕᓂᒃ ᑲᑕᒃᓴᙱᓪᓗᓂ ᐱᐅᑦᑎᐊᙱᓐᓂᕐᒧᑦ ᑕᐃᒪᙵᓕᒫᖅ ᐱᒻᒪᕆᐊᓘᕗᖅ. ᐊᒃᓱᕉᓴᖕᓂᖃᕐᔪᐊᖅᐳᒍᑦ ᐊᔾᔨᒌᙱᕈᓘᔭᖅᑐᓂ ᑕᐅᑐᒃᑕᑦᑎᓐᓂ. ᐊᒻᒪ ᑭᖑᓂᐊᒍᑦ, ᐃᓱᒪᕗᖓ ᐃᓕᖕᓄᑦ ᓈᒻᒪᒋᔭᕐᓂᒃ ᐱᓕᕆᔭᕆᐊᖃᖅᐳᑎᑦ, ᓴᙱᔫᓗᓯᓗ, ᖃᐅᔨᔪᒪᑦᑎᐊᕐᓗᑎᑦ, ᐱᔪᒃᓯᑦᑎᐊᕐᓗᑎᑦ, ᐊᒻᒪ ᐃᓱᒪᔪᖓ, ᐃᓕᓴᐃᔨᖃᕐᓗᑎᑦ ᐊᒻᒪ ᐃᓄᖕᓂ ᐃᑲᔪᖅᑎᖃᕐᓗᑎᑦ ᐃᓕᖕᓂᒃ."

ᖃᐅᔨᓴᖅᑐᓕᕆᓂᕐᒥᒃ ᐱᓕᕆᓪᓗᓂ ᐱᒻᒪᕆᐅᒋᔭᐅᔪᓂᒃ ᐃᓄᖕᓄᑦ, ᐊᒻᒪ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᓯᕗᓪᓕᐅᑎᑦᑎᕙᒃᖢᓂ, ᑖᓂᐊᓪ ᓇᐅᓵᑦ ᐱᓕᕆᐊᖃᖅᐳᖅ ᐃᖅᑲᓇᐃᔮᒥᓂᒃ ᒪᓕᒃᖢᓂ ᐱᒻᒪᕆᐅᒋᔭᖏᓐᓂᒃ. ᓯᕗᓪᓕᕐᒥ, ᐃᓱᒪᓚᐅᖅᐳᖅ ᖃᐅᔨᓴᖅᑐᓕᕆᓂᖅ ᐊᔪᕐᓇᓗᐊᕋᔭᕐᓂᖓᓂᒃ, ᑭᓯᐊᓂ ᓈᒻᒪᒃᑐᓂᒃ ᐊᔪᕈᓐᓃᖅᓴᖅᑎᑦᑎᔨᖃᖅᖢᓂ, ᓇᓂᓯᓚᐅᖅᐳᖅ ᐊᖅᑯᑎᒋᓂᐊᖅᑕᒥᓂᒃ ᐊᔪᙱᑦᑎᐊᓕᖅᖢᓂ. ᖁᐱᕐᕈᐃᑦ ᖁᐱᕐᕈᐃᑦ ᑕᐅᑐᙳᐊᕈᑎᒋᔪᒪᙱᖦᖢᓂᒋᑦ, ᑭᓯᐊᓂ ᓄᓇᓕᖕᒥᐅᑦ ᐅᖄᓚᒐᒥᒃ, ᑭᐅᓚᐅᖅᐳᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.