"ᐃᓄᑐᐃᓐᓇᐅᒐᒪ, ᐊᒃᓱᒻᒪᕆᐊᓗᒃ, ᑐᓴᕐᓈᒐᒃᓴᓂᒃ ᐱᐅᒃᓴᓕᓚᐅᖅᓯᒪᕗᖓ ᐊᒻᒪ ᐱᓇᔪᒃᖢᖓ," ᐅᖃᓚᐅᖅᐳᖅ ᑕᐃᕕᑦ ᓚᕉᓐ. ᑕᓯᖅ ᑎᒪᒐᒥᒥᐅᑕᖅ ᐋᓐᑎᐅᕆᐅ ᐅᐊᖕᓇᖓᓂ ᐱᕈᖅᓴᓚᐅᖅᓯᒪᓪᓗᓂ ᐊᖏᕐᕋᕆᔭᐅᔪᒥ ᐃᒪᖃᙱᑦᑐᒥ ᑕᓯᕐᒥ. ᑕᐃᑲᓂᑦᑕᐅᖅ ᑐᓴᕆᐅᓚᐅᖅᓯᒪᕗᖅ ᑐᓴᕐᓈᒐᒃᓴᓂᒃ ᐊᒻᒪ ᐱᔪᒃᓯᓕᓚᐅᖅᓯᒪᓪᓗᓂ. ᐃᓚᒋᔭᐅᔪᖅ ᑏᒥ-ᐊᐅᒐᒪ ᐊᓂᔅᓇᐸᐃ ᐃᓄᖏᓐᓄᑦ. ᐃᓱᒪᖅᓱᓕᕌᖓᒥ, ᐅᒥᐊᖅᑐᕈᒪᑦᑎᐊᖅᐳᖅ ᐊᒻᒪ ᓯᓚᒦᑲᑕᒋᐊᒃᓴᖅ. 

ᓚᕉᓐ ᑐᓴᕐᓈᒐᒃᓴᓂᒃ ᖁᕕᐊᒋᔭᖃᕐᓂᖓ ᐱᒋᐊᓚᐅᖅᓯᒪᕗᖅ ᑕᓪᓕᒪᓂᒃ ᐅᑭᐅᖃᑐᐃᓐᓇᖅᖢᓂ ᑐᓴᕋᓐᓈᖅᖢᓂ ᓈᓚᐅᑎᒃᑯᑦ. ᐊᖓᔪᖅᑳᖏᒃ ᐃᙱᓚᐅᕆᕗᑦ ᑯᒃᑭᑕᐹᖅᐸᒃᖢᑎᒡᓗ, ᐃᖅᑲᐅᒪᓇᑦᑎᐊᖅᑐᓂᒃ ᓴᖅᑭᑎᑦᑎᕙᒃᖢᑎᒃ. ᓇᔭᖓ ᐊᖏᕐᕋᐅᔾᔨᓚᐅᖅᐳᖅ ᐹᑉ ᑎᓚᓐ ᓂᔾᔭᐅᓯᔭᐅᑎᓂᒃ ᐃᓕᓐᓂᐊᕐᕕᐊᓗᖕᒥ ᐊᒻᒪ ᐱᙳᐊᕈᒪᓪᓗᓂ ᑖᔅᓱᒥᖓᔅᓴᐃᓐᓇᖅ. ᐊᑖᑕᖓᑕ ᐊᖏᕐᕋᐅᔾᔨᓚᐅᖅᓯᒪᔭᖓ ᑯᒃᑭᑕᐹᒥᒃ 14-ᓂᒃ ᐅᑭᐅᖃᖅᑎᓪᓗᒍ ᐊᒻᒪᓗ ᐃᖃᐃᓕᓴᖅᐸᒃᖢᓂ ᐃᑲᕐᕋᒐᓴᖕᓄᑦ ᖃᐅᑕᒫᑦ ᓄᑲᕐᒥᓄᑦ. 

ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕇᕋᒥ, ᓚᕉᓐᑦ ᐃᓕᓐᓂᐊᓚᐅᖅᓯᒪᔪᖅ ᓄᓇᓕᕆᓂᕐᒥᒃ, ᐊᐅᓚᐅᓯᕆᔨᐅᓂᕐᒧᑦ ᐱᓕᕆᔾᔪᑎᓂᒃ ᐊᒻᒪᓗ ᐱᓕᕆᓚᐅᖅᓯᒪᓪᓗᓂ ᐊᕐᕌᒍᒐᓴᖕᓄᑦ ᑭᓯᐊᓂ ᕚᓐᑰᕙᒧᑦ ᐊᖅᑯᑎᒃᑰᕈᒪᓕᕋᒥ ᐊᒻᒪᓗ ᑮᓇᐅᔭᓕᐅᕈᒪᓕᖅᖢᓂ ᓂᔾᔭᐅᓯᔭᖅᑎᐅᓂᕐᒧᑦ. ᐱᙳᐊᖃᑕᐅᕙᒃᖢᓂ ᐃᒥᕋᓚᒡᕕᖕᓂ ᐊᒻᒪ ᐃᓕᓐᓂᐊᖅᐸᒃᖢᓂ, ᐱᔪᓐᓇᕐᓂᓕᒫᒥᓂᒃ ᐱᓕᕆᓚᐅᖅᐳᖅ ᑭᓯᐊᓂ ᓴᖅᑭᑦᑐᖃᓚᐅᙱᓚᖅ ᐅᑎᓕᓚᐅᖅᐳᖅ ᐃᖅᑲᓇᐃᔮᒥᓄᑦ ᓄᓇᓕᕆᓂᕐᒥᒃ, ᖃᐅᔨᒪᔨᑕᕆᔭᐅᓪᓗᓂ ᐊᕐᕌᒍᒐᓴᖕᓄᑦ ᓂᔾᔭᐅᓯᔭᕐᓂᕐᒧᑦ ᐆᒃᑐᒃᑲᓐᓂᓚᐅᙱᓐᓂᕐᒥᓂ. 

ᑭᖑᓂᐊᒍᑦ, ᑎᑎᕋᖅᐸᓪᓕᐊᓕᓚᐅᖅᐳᖅ ᓂᐱᓕᐅᕆᓪᓗᓂᓗ, ᓴᖅᑭᑎᑦᑎᓪᓗᓂ ᐱᖓᓱᓂᒃ ᓂᐱᓕᐅᖅᓯᒪᔪᓂᒃ ᖁᕕᐊᒋᔭᐅᑦᑎᐊᖅᑐᓂᒃ ᖁᙱᐊᖅᐸᒃᑐᓄᑦ. "ᑐᓐᓂᖅᑯᓯᐊᑦ ᐊᒥᖅᑳᕈᑕᐅᔭᕆᐊᖃᕐᒪᑕ, ᑕᐃᒪᐃᓐᓂᖓᓄᑦ ᐱᐅᔫᕗᖅ ᑐᓂᕐᕈᓯᐊᒃᑲ ᐊᒥᖅᑳᕈᑎᒋᓗᒋᑦ," ᐅᖃᖅᑐᖅ. ᐃᒻᒥᓂᒃ ᐃᓱᒪᔪᖅ folk rock ᓂᔾᔭᐅᓯᔭᖅᑎᐅᓂᖓᓂᒃ ᑭᓯᐊᓂ ᐱᓕᕆᐊᖏᑦ ᐊᔾᔨᒌᙱᑦᑑᑎᓂᒃ ᓂᐱᖃᕐᒪᑕ ᐃᙱᐅᓯᖏᑦ ᐊᔾᔨᒌᙱᑦᑑᑕᐅᓪᓗᑎᒃ. 

ᓚᕉᓐ ᐃᓚᐅᖃᑦᑕᕈᓐᓃᕋᓗᐊᖅᑎᓪᓗᒍ ᓄᓇᓕᕆᓂᕐᒧᑦ ᐱᓕᕆᓂᐅᕙᒃᑐᓄᑦ, ᑭᖑᓂᖃᖅᐸᒃᐳᖅ ᓄᓇᑐᐃᓐᓇᕐᒦᑦᑕᕆᐊᒃᓴᖅ ᑕᐃᒪᐃᓐᓂᖓᓄᓪᓗ ᖃᔅᓯᐊᕐᔪᖕᓂ ᐱᓇᓱᐊᕈᓯᕐᓂ ᐊᕐᕌᒍᒥ ᐱᓕᕆᕙᒃᐳᖅ. ᑲᓇᑕᓕᒫᒧᑦ ᐊᐅᓪᓚᖃᑦᑕᕈᓐᓇᖅᓯᓚᐅᖅᓯᒪᕗᖅ ᐃᓚᒋᔭᐅᓪᓗᓂ ᐱᓕᕆᐊᒥᓄᑦ ᖁᕕᐊᒋᔭᖃᓚᐅᖅᖢᓂᓗ ᑲᑎᖃᑎᖃᕆᐊᒃᓴᖅ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᐊᓯᖏᓐᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ. ᖃᐅᔨᒪᓪᓚᕆᙱᑦᑐᖅ ᑭᓱᒧᑦ ᐊᓯᔾᔨᖅᓯᓚᐅᕐᒪᖔᑦ ᑐᓴᕐᓈᒐᒃᓴᓂᒃ, ᐱᔪᒃᓯᓕᑐᐃᓐᓇᓚᐅᖅᐳᖅ. "ᓂᐱᑐᐃᓐᓇᖓ ᐅᕙᓐᓄᑦ ᐃᒃᐱᒋᔭᖃᖅᐳᖅ, ᑕᕐᓂᓐᓂᓪᓗ ᐆᒪᑎᑦᑎᓪᓗᓂ, ᐅᖃᕋᔭᖅᐳᑎᑦ. ᓯᓐᓇᒃᑑᒪᑐᐃᓐᓇᓕᓚᐅᖅᐳᖓ, ᓯᓐᓇᒃᑑᒪᓪᓗᖓ rock star-ᖑᔪᒪᓪᓗᖓ, folk star-ᖑᓗᖓ... ᐊᒻᒪ ᑕᒪᓐᓇ ᐱᓯᒪᐃᓐᓇᐅᔭᖅᑕᕋ," ᐃᖅᑲᐅᒪᔪᖅ. 

"ᐱᒻᒪᕆᐅᕗᖅ ᓯᓐᓇᒃᑑᒪᔭᖃᕐᓗᓂ, ᐊᒻᒪ ᐃᑲᔪᕐᔪᐊᓲᖑᓪᓗᓂ ᓇᒧᙵᐅᖕᒪᖔᖅᐱᑦ ᖃᐅᔨᒪᙱᖦᖢᓂ, ᐊᖅᑯᑎᒥᒃ ᑕᑯᔪᓐᓇᙱᖦᖢᓂ, ᓴᖑᑲᑕᒃᑐᓕᒫᓂᒃ, ᖃᐅᔨᒪᙱᖦᖢᓂ ᓇᒧᙵᐅᖕᒪᖔᑦ, ᑭᓯᐊᓂ ᖃᐅᔨᒪᓇᖅᖢᓂ ᖁᕕᐊᓇᕐᓂᖓᓂᒃ. ᐊᒃᓱᕈᕐᓗᑎᑦ ᐱᓕᕆᖃᑦᑕᕈᕕᑦ ᑲᔪᓰᓐᓇᕐᓗᑎᓪᓗ, ᑎᑭᐅᑎᔪᓐᓇᖅᐳᑎᑦ ᐅᐸᒍᒪᔭᕐᓄᑦ. ᐃᓛᓐᓂᒃᑯᑦ ᐊᒃᓱᕈᕐᓇᖅᓯᖃᑦᑕᕐᒪᑦ. ᐊᒥᓱᐊᓗᖕᓂᒃ ᐱᔾᔪᑎᑕᖃᖅᐳᖅ ᓄᖅᑲᕈᒪᓕᕐᓇᖅᑐᓂᒃ.... ᑕᐅᑐᙳᐊᕈᒪᔭᕐᓂᒃ ᐱᓯᒪᓪᓚᕆᒃᑯᕕᑦ ᑕᐅᑐᒐᖃᓪᓗᐊᑕᕐᓗᑎᓪᓗ ᐱᔪᒪᔭᕐᓂᒃ, ᐱᓇᔪᖕᓂᐊᖅᐳᑎᑦ, ᖃᓄᑐᐃᓐᓇᑦᑎᐊᖅ," ᑎᓕᐅᕆᕗᖅ.

ᐅᖃᐅᔾᔨᒋᐊᕈᑎᒋᔭᖓ ᓂᔾᔭᐅᓯᔭᖅᑎᙳᕈᒪᔪᓄᑦ ᐊᔪᕈᓐᓃᖅᓴᖃᑦᑕᕐᓗᑎᒃ ᐱᙳᐊᕈᓐᓇᑦᑎᐊᓕᕐᓗᑎᒃ. ᑯᒃᑭᑕᐹᒥᒃ ᐊᑐᖁᔨᕗᖅ ᖃᓄᑐᐃᓐᓈᕈᓐᓇᕐᓂᖓᓄᑦ. ᐃᑲᕐᕋᓄᑦ ᑎᓴᒪᓄᑦ ᐃᖃᐃᓕᓴᖅᐸᓚᐅᕋᓗᐊᖅᖢᓂ ᐅᓪᓗᑕᒫᑦ, ᒫᓐᓇᓕ ᐃᑲᕐᕋᐅᑉ ᓇᑉᐸᖓᓄᑦ ᑎᑭᓯᒪᓕᖅᐳᖅ ᐊᒻᒪ ᐃᙱᐅᓯᓕᐅᑐᐃᓐᓇᖅᐸᒃᖢᓂ. "ᐱᕕᒃᓴᖃᖅᑎᑦᑎᔭᕆᐊᖃᖅᐳᑎᑦ ᐊᒻᒪ ᐱᙳᐊᖏᓐᓇᕐᓗᑎᑦ ᐱᖃᓐᓇᕆᔭᑎᑦ ᐊᓯᐊᓂᒃ ᐱᓕᕆᑎᓪᓗᒋᑦ, ᐱᙳᐊᖃᑕᐅᔭᕆᐊᖃᖅᐳᑎᑦ ᐱᙳᐊᕈᑎᒋᔭᕐᓂᒃ ᐊᒻᒪ ᐱᓕᕆᓗᑎᑦ ᐱᓕᕆᐊᕆᔪᒪᔭᕐᓂᒃ ᐃᓕᖕᓄᑦ ᐱᒻᒪᕆᐅᓂᖅᓴᓂᒃ. ᑕᐃᒪᓐᓇᓕ ᖁᔭᓈᖅᓯᓯᒪᔭᕆᐊᖃᕐᓇᖅᐳᖅ ᑕᐃᒪᓐᓇ," ᓚᕉᓐ ᐅᖃᓚᐅᖅᐳᖅ. 

"ᐅᖃᕋᔭᖅᐳᖓ ᑕᐅᑐᙳᐊᖅᑕᐃᑦ ᐆᒪᑏᓐᓇᕐᓗᒍ ᐊᒻᒪ ᐊᖏᔪᒥᒃ ᑕᐅᑐᙳᐊᖅᐸᒡᓗᒍ. ᖃᐅᔨᒪᓚᐅᙱᑦᑎᐊᖅᑐᖓ ᓂᔾᔭᐅᓯᔭᕐᓂᖅ ᐅᕙᓐᓄᑦ ᐱᕚᓪᓕᕈᑎᖃᕐᓂᐊᕐᓂᖓᓂᒃ, ᐊᑕᐅᓯᐅᓈᖅᑎᖦᖢᒍ," ᐅᖃᕆᓪᓗᓂ, ᐃᖅᑲᐅᒪᓪᓗᓂ ᐱᕚᓪᓕᖅᐸᓪᓕᐊᓂᕆᓚᐅᖅᑕᖓᓂᒃ ᐊᕐᕌᒍᒐᓴᖕᓄᑦ. 

ᐊᕝᕕᐊᕈᑎᖃᓕᕌᖓᒥ, ᓚᕉᓐᑎ ᓵᙵᔭᖃᓚᐅᖅᐳᖅ ᐃᓄᖕᓂ ᐃᓱᒪᓚᐅᙱᑦᑐᓂ ᑲᔪᓯᑦᑎᐊᕈᓐᓇᕋᓱᒋᙱᖦᖢᓂ ᓂᔾᔭᐅᓯᔭᕐᓂᒃᑯᑦ. ᑕᑯᓪᓗᓂ ᐃᙱᐅᓯᖏᑦ ᐊᒃᑐᐃᓂᕆᕙᒃᑕᖏᓐᓂᒃ ᐊᓯᒥᓄᑦ ᑲᔪᓯᑎᖦᖢᓂᐅᒃ. ᐃᓄᖕᓂᒃ ᑲᑎᖃᑎᖃᖃᑦᑕᐃᓐᓇᕐᓂᖅ ᐃᑲᔫᑎᖃᑦᑎᐊᓚᐅᖅᐳᖅ. 

"ᑕᐅᑐᙳᐊᕐᓂᖃᕈᕕᑦ ᐊᒻᒪ ᓯᕗᒻᒧᐊᒃᐸᓪᓕᐊᒍᕕᑦ ᓇᒧᙵᐅᔪᒪᖕᒪᖔᖅᐱᑦ, ᐃᓱᒪᕗᖓ ᑕᒪᑐᒧᙵ ᐱᓕᕆᕙᓪᓕᐊᓂᐊᖅᐳᑎᑦ, ᐊᒻᒪ ᐅᔾᔨᕈᓱᔾᔮᙱᒻᒪᕆᒃᑐᑎᑦ ᐊᒃᓱᕈᖅᖢᑎᑦ ᐱᓕᕆᓂᕆᔭᕐᓂᒃ," ᐅᖃᖅᑐᖅ. 

ᐃᓱᒪᒥᒍᑦ ᖃᓄᐃᖏᑦᑎᐊᖁᓪᓗᓂᐅᒃ, ᓚᕉᓐ ᐆᒻᒪᕆᐃᓐᓇᐅᔭᖅᐳᖅ. "ᑎᒦᑦ ᐊᐅᓚᑎᒑᖓᕕᐅᒃ, ᓴᖅᑭᑎᑦᑎᓲᖑᕗᑎᑦ ᓈᒻᒪᒃᑐᓂᒃ ᑎᒥᐅᑉ ᐊᐅᓚᔾᔭᐃᔾᔪᑎᖏᓐᓂᒃ ᖃᓄᐃᙱᑦᑎᐊᕐᓂᕐᒧᑦ ᑕᒪᓐᓇᓗ ᐱᒻᒪᕆᐊᓘᓪᓗᓂ," ᐅᓂᒃᑳᕆᓪᓗᓂ. ᐃᓱᒪᖃᑦᑕᖁᔨᕗᖅ ᑐᓴᕐᓈᒐᒃᓴᓂᒃ ᐃᖃᐃᓕᓴᖅᑎᓪᓗᑎᑦ ᐃᖃᐃᓕᓴᖅᑎᓪᓗᒋᓪᓘᓐᓃᑦ ᑐᓴᕐᓈᒐᒃᓴᓂᒃ. ᐃᓱᒪᒃᓴᖅᓯᐅᕈᓐᓇᕐᓂᖅ ᐱᒻᒪᕆᐅᒋᕙᐅᒃ ᐱᖁᔨᙱᖦᖢᓂᓗ ᑭᓱᑐᐃᓐᓇᓂᒃ ᐋᓐᓂᕈᑕᐅᔪᓐᓇᖅᑐᓂᒃ ᑎᒥᒧᑦ. ᐊᓈᓇᖓᑕ ᐃᓕᓐᓂᐊᖅᑎᓚᐅᖅᓯᒪᔭᖓ ᐱᒻᒪᕆᐅᓂᖓᓂᒃ ᓴᓗᒪᔪᒥᒃ ᐃᓅᓯᖃᕐᓂᕐᒥᒃ ᐊᒻᒪᓗ ᑕᒪᓐᓇ ᐱᒻᒪᕆᒋᔭᐅᓪᓗᓂ ᐱᓯᒪᐃᓐᓇᖅᖢᓂᐅᒃ. 

ᑲᔪᖏᖅᓴᐃᓂᕐᒧᑦ, ᓚᕉᓐᑦ ᐱᔪᒃᓯᑎᑕᐅᓯᒪᕗᖅ ᐹᑉ ᑎᓕᓐᒧᑦ, ᐹᓪ ᓴᐃᒪᓐᒧᑦ ᐊᓯᖏᓐᓄᓪᓗ ᐊᔪᙱᑦᑐᕐᔪᐊᓄᑦ. ᐃᙱᐅᓯᖏᓐᓂᒃ ᐊᕕᒃᑐᐃᔪᒪᑦᑎᐊᖅᑐᖅ. ᐱᔪᒃᓯᓕᖅᐸᒃᑭᕗᖅ ᓂᐱᖏᓐᓂᒃ ᓂᔾᔭᐅᓯᔭᐅᑎᓂᒃ. ᐃᙱᐅᓯᓕᐊᕆᖃᑦᑕᖅᑕᖏᑦ ᐱᔪᒥᓇᖅᓯᒑᖓᒥ ᓇᓂᔭᐅᔪᓐᓇᖅᐳᑦ Amazon, Spotify, Apple ᐊᒻᒪ SoundCloud−ᑯᓐᓂ ᐊᒻᒪ ᓂᕆᐅᒃᑐᖅ ᐊᓯᐊᓂᒃ ᑐᓴᕐᓈᒐᒃᓴᒥᒃ ᓴᖅᑭᑦᑎᓛᕈᒪᓪᓗᓂ ᐊᕐᕌᒍ ᐊᓂᒍᓚᐅᙱᓐᓂᖓᓂ. 

ᐃᓱᓕᑉᐸᓪᓕᐊᓕᕐᓗᓂ, ᓚᕉᓐ ᐅᒃᐱᕈᓱᒃᐳᖅ ᐊᔪᙱᒃᑯᓂ, ᒪᒃᑯᒃᑐᑦ ᑕᐃᒪᐃᒍᓐᓇᕐᒥᔪᑦ. ᑎᓕᐅᕆᕙᒃᐳᖅ ᐊᒃᓱᕈᕐᓗᓂ ᐱᓕᕆᖃᑦᑕᕐᓂᕐᒥᒃ ᑕᑯᔪᓐᓇᙱᒃᑲᓗᐊᖅᑎᓪᓗᑎᑦ ᓇᒧᙵᕐᓂᐊᕐᒪᖔᖅᐱᑦ ᓴᙱᒃᑎᒋᐊᖅᑎᑦᑎᓪᓗᓂᓗ ᐱᒻᒪᕆᐅᓂᖓᓂᒃ ᑕᐅᑐᙳᐊᖅᑕᕐᓂᒃ. "ᑕᒪᓐᓇ ᐱᒻᒪᕆᐅᕗᖅ ᓯᓐᓇᒃᑑᒪᒋᔭᖃᕐᓂᖅ ᑲᔪᓯᑎᑦᑏᓐᓇᕈᓐᓇᖅᑐᒥᒃ ᖁᕕᐊᓇᙱᑦᑐᒃᑰᕐᓂᕐᓂᒃ ᖁᕕᐊᓇᖅᑐᓂᒡᓗ ᐊᒻᒪ ᐱᕚᓪᓕᕈᑎᒃᓴᓂᒃ ᐊᖅᑯᑖᓂ," ᐅᓂᒃᑳᖅᑐᖅ. ᐃᒪᓐᓇᐅᖁᔨᕗᖅ, ᐃᓕᓐᓂᐊᕐᓗᓂ ᓂᔾᔭᐅᓯᔭᕐᓂᕐᒧᑦ ᐃᓱᒪᒋᔭᐅᔪᓂᒃ ᐱᒋᐊᖅᐸᓪᓕᐊᓂᐊᕐᓗᓂ, ᑕᐃᒪᐃᖁᓇᔭᖅᑕᖓᓗ. 

ᐃᓄᑐᐃᓐᓇᐅᓚᐅᕐᑐᖅ ᑐᓴᕐᓈᒐᒃᓴᓂᒃ ᖁᕕᐊᒋᔭᖃᒻᒪᕆᓕᕐᖢᓂ ᐊᒻᒪ ᐱᓇᓱᓕᕐᖢᓂᐅᒃ ᒫᓐᓇᓕ ᑕᐃᕕᑦ ᓚᕉᓐ folk rock ᐃᙱᖅᑎᐅᓕᕐᑐᖅ ᐱᖓᓱᓂᒃ ᓂᔾᔭᐅᓯᔭᖅᑎᓂᒃ ᐊᒻᒪ ᐊᑕᐅᓯᒃᑲᓐᓂᕐᒥᒃ ᐊᒡᒋᖅᐸᓪᓕᐊᓪᓗᓂ. ᐃᓕᓐᓂᐊᓚᐅᖅᖢᓂ ᐅᔭᖅᑲᓂᒃ folk rock ᐃᙱᐅᓯᓕᐅᖃᑦᑕᓕᓚᐅᖅᐳᖅ ᐅᒃᐱᕈᓱᖕᓂᕋᒥ ᑕᐅᑐᙳᐊᖅᑕᒥᓂᒃ ᐊᒃᓱᕈᕈᒪᑦᑎᐊᖅᖢᓂᓗ. ᐱᔪᒃᓯᑎᑕᐅᓪᓗᓂ ᓂᔾᔭᐅᓯᔭᖅᑎᓂᒃ ᐱᐅᒋᔭᒥᓂᒃ ᓈᓚᐅᑎᒃᑯᑦ ᐊᖏᕐᕋᒥᓂᓗ, ᐊᔪᕈᓐᓃᖅᓴᖃᑦᑕᓚᐅᖅᑐᖅ ᐊᒻᒪᓗ ᖁᔭᓈᖅᓯᓯᒪᓪᓗᓂ ᑕᐅᑐᙳᐊᕈᒪᔭᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.