ᖃᐅᔨᒪᔭᐅᔪᒻᒪᕆᒃ ᕌᔾᔪᔅ ᐅᖃᖅᑐᓂ "ᐃᑲᔪᖅᑎᓄᑦ" ᑕᐃᕙᑦ ᓛᕕᐊᓪᑦ ᐊᓲᓯ... ᐃᑲᔪᖅᑎᐅᔪᖅ ᓄᓇᓕᖓᓂ. ᐃᓚᒋᔭᐅᔪᖅ ᒧᔅᑭᒡ ᑕᓯᕐᒥ ᑯᕇᓴᒥ ᓴᔅᑳᑦᓱᐋᓐᒥ ᐊᒻᒪᓗ ᐊᑖᑕᖓ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ ᑲᓇᑕᒥ ᐅᓇᑕᖅᑐᒃᓴᓄᑦ. ᓇᖕᒥᓂᖅ−ᐅᖃᐅᓯᐅᓪᓗᓂ "Army brat", Laviolette ᓅᕐᔪᐊᓚᐅᖅᐳᖅ, ᓄᓇᖃᖅᖢᓂ ᑕᒪᐃᓐᓂᑲᓴᑦᑎᐊᖅ ᑲᓇᑕᒥ ᐊᕕᒃᑐᖅᓯᒪᔪᓂ ᑲᓇᑕᒥ ᐊᒻᒪᓗ ᑕᕆᐅᑉ ᐊᑭᐊᓂ. ᐊᑖᑕᖓ ᓄᖅᑲᓚᐅᖅᑐᖅ ᐃᓕᓐᓂᐊᕐᕕᐊᓗᒻᒦᑎᓪᓗᒍ ᐊᒻᒪᓗ ᐃᓚᖏᑦ ᓅᑦᑐᑎᒃ ᐅᐊᓐᓇᖓᓄᑦ ᐋᓐᑎᐅᕆᔫᑉ, ᐊᑖᑕᖓ ᐃᓕᓐᓂᐊᖅᑎᑦᑎᓪᓗᓂ ᐃᑭᑦᑕᐃᓕᓂᕐᒥᒃ ᐃᖅᑭᓖᑦ ᓄᓇᓕᖏᓐᓂ.

ᓛᕕᐊᓪᑦ ᓯᓚᑦᑐᖅᓴᕐᕕᓕᐊᓚᐅᖅᑐᖅ ᑕᓐᑐ ᐸᐃᒥ, ᐸᓖᓯᑦ ᑐᙵᕕᖏᓐᓂᒃ, ᐃᓚᐅᓕᓚᐅᖅᖢᓂᓗ Weagamow Lake ᐸᓖᓯᓂᒃ, ᖃᖓᑕᖃᑕᐅᓪᓗᑎᒃ Ojibwe-ᑯᓐᓄᑦ ᐊᕐᕌᒍᓄᑦ ᑕᓪᓕᒪᓄᑦ. ᑕᐃᑲᙵᑦ, ᐃᓚᒋᔭᐅᓕᓚᐅᖅᑐᖅ ᐱᖓᓱᓄᑦ ᐸᓖᓯᓄᑦ ᐊᕐᕌᒍᒐᓚᓐᓄᑦ. 2015-ᒥ, ᐱᓕᕆᖃᑎᖃᓕᓚᐅᖅᓯᒪᕗᖅ ᐊᓐᑎᐅᕆᐅᒥ ᐸᓖᓯᓂᒃ ᐊᕐᕌᒍᓄᑦ ᑕᓪᓕᒪᓄᑦ ᓯᐅᒃᔅ−ᒥ, ᑖᓐᓇ ᓄᓇᓕᖕᓂ ᐅᖃᐅᓯᐅᓪᓗᓂ ᑐᖅᑲᖅᑕᕐᕕᐅᓂᖓᓂᒃ ᐅᑭᐅᖅᑕᖅᑐᒥ, ᑕᐃᒪᐃᔾᔪᑎᖃᖅᖢᓂ ᐱᔨᑦᑎᕋᖅᐸᖕᓂᖓᓂᒃ ᐊᒥᓱᓂᒃ ᖃᖓᑕᔪᓂᒃ ᓄᓇᓕᖕᓂ.  ᑭᖑᓪᓕᕐᒥ, ᐋᓐᑎᐅᕆᐅ ᑲᓇᖕᓇᖓᓄᑦ ᓅᓚᐅᖅᓯᒪᕗᖅ ᐋᑐᕚᑉ ᓯᓚᑖᓂ, ᒪᓕᒐᓕᕆᔨᐅᓪᓗᓂ ᐊᒻᒪ ᐃᒪᕐᒥᐅᑕᓕᕆᔨᐅᓪᓗᓂ. ᐊᕐᕌᒎᒃ ᒪᕐᕉᒃ ᐊᓂᒍᖅᓯᒪᓕᖅᑑᒃ, ᖁᕝᕙᕆᐊᖅᑎᑕᐅᓚᐅᖅᓯᒪᔪᖅ OPP−ᑯᑦ ᓄᓇᖃᖅᑳᖅᓯᒪᔪᑦ ᐸᓖᓯᖃᕐᕕᖓᓄᑦ, ᖃᐅᔨᒪᔭᐅᖕᒥᔪᖅ ᑲᓇᑕᒥ ᐊᕕᒃᑐᖅᓯᒪᔪᓂ ᑐᓴᐅᒪᑎᑦᑎᔨᓂᒃ.

ᒪᓕᒐᕐᓂᒃ ᐊᑐᓕᖅᑎᑦᑎᔨᑦ ᐱᔪᒪᓚᐅᖅᐳᑦ ᓲᖃᐃᒻᒪ ᖃᑕᙳᑎᖏᑦ ᐅᓇᑕᖅᑐᒃᓴᓄᑦ ᐱᔨᑦᑎᕋᖃᑦᑕᖅᓯᒪᓂᖏᓐᓄᑦ ᑲᔪᓯᔪᒪᙱᖦᖢᓂ. ᐊᑖᑕᑦᓯᐊᖓ, ᐊᑖᑕᖓ, ᐊᓂᖓᓗ ᐱᔨᑦᓯᖅᑐᐃᓐᓇᐅᑦᓱᓂ ᑕᐃᒪᐃᒍᒪᒐᓂᓗ. ᐃᑲᔪᕈᒪᓚᐅᖅᑐᖅ ᐃᓄᓐᓂᒃ ᐊᒻᒪᓗ ᐃᓚᖏᑦ ᕼᐋᑭᖅᑏᑦ ᑲᒪᔨᖏᑦ ᐸᓖᓯᐅᓚᐅᕐᒪᑕ ᐊᑦᑐᐃᓂᖃᓚᐅᖅᑐᑦ ᐃᓅᓯᖓᓂᒃ. ᓛᕕᓚᑦ ᓱᓕ ᕼᐋᑭᖅᑐᖅ, ᖁᕕᐊᓱᑐᐃᓐᓇᖅᑐᓂ.

ᑖᓐᓇᑑᖏᑦᑐᖅ ᐃᓚᒌᓄᑦ ᐸᓖᓯᓕᕆᓪᓗᓂ. ᓛᕕᐊᓪᑦ ᓇᔭᖓ ᐸᓖᓯᒻᒪᕆᐅᕗᖅ ᐋᓐᑎᐅᕆᐅᒥ ᐸᓖᓯᓂᑦ ᓯᐅᕉᔅ ᑯᓘᑦᔅᒥ, ᐊᐅᓚᑦᑎᓪᓗᓂ ᐃᖅᑲᖅᑐᐃᕕᓐᓂᑦ ᐊᒻᒪ ᑲᑎᖃᑎᖃᖅᑐᓂ ᓄᓕᐊᖓᓂᒃ ᐸᓖᓯᒃᑯᑦ ᓯᓚᑦᑐᓴᕐᕕᖓᓐᓂᑦ. ᐃᖅᑲᓇᐃᔭᕐᒥᔪᖅ OPP-ᑯᓐᓄᑦ ᒫᓐᓇ. ᐃᓪᓗᖓ ᐃᖅᑲᓇᐃᔭᖃᑎᖃᖅᐸᑦᑐᖅ ᕆᔭᐃᓇ ᐸᓖᓯᒃᑯᓐᓂᒃ, ᑕᐃᒪᐃᒻᒪᑦ ᐊᒥᓱᓂᒃ ᐃᓚᖃᐅᖅᑐᖅ ᑐᑭᓯᐊᔪᓂᒃ ᐃᖅᑲᓇᐃᔮᒥᓂᒃ.

ᐃᓕᓐᓂᐊᕐᕕᕐᔪᐊᕐᒦᑎᓪᓗᒍ, ᓛᕕᐊᓚᑦ ᐸᓖᓯᓕᕆᔪᒪᓚᐅᖅᓯᒪᙱᑦᑐᖅ. 18-ᕈᕐᓂᐊᓕᖅᑎᓪᓗᒍ, ᐃᓱᒪᓕᓚᐅᖅᑐᖅ ᖃᓄᐃᓕᐅᕈᒪᓂᕐᒥᓂᒃ ᐃᓅᓯᖓᓂ ᐊᒻᒪᓗ ᕿᓚᒥᕈᓗᒃ ᐃᓱᒪᓪᓗᓂ ᐊᒃᓱᕈᕐᓇᕐᓂᖓᓂᒃ. ᐃᓕᓐᓂᐊᕐᕕᐊᓗᒻᒥ ᓱᕈᓯᐅᓚᐅᖅᐳᖅ ᐊᒻᒪ ᐃᑲᔪᖅᑎᖏᑦ ᐅᖃᐅᔾᔨᒋᐊᓚᐅᖅᐳᑦ ᖃᓄᖅ ᐱᓕᕆᐊᖃᕆᐊᖓ ᐃᖅᑲᓇᐃᔮᔅᓴᓂᒃ ᐸᕐᓇᐃᓂᕐᒥᑦ ᐊᒻᒪ ᐱᕕᔅᓴᖃᖅᑎᑕᐅᓗᑎᒃ ᐊᑭᓕᖅᓱᖅᑕᐅᒐᑎᒃ ᐃᑲᔪᖃᑦᑕᖅᑐᓄᑦ. ᐸᑦᑕᑯᓗᖕᓂ ᐱᙳᐊᖃᑎᖃᖃᑦᑕᓚᐅᖅᐳᖅ ᐃᓐᓇᕐᓂᒃ ᓄᓇᓕᖕᓂ ᐃᓐᓇᐅᓗᐊᓕᕐᓂᕐᒧᑦ ᐃᖅᑲᓇᐃᔭᕈᓐᓃᖅᑐᓄᑦ ᐊᖏᕐᕋᖏᓐᓂ ᐃᑲᔪᖃᑦᑕᖅᓯᒪᓪᓗᓂᓗ ᐊᔪᙱᓐᓂᓕᒫᒥᓂᒃ ᓄᓇᓕᖕᓂ, ᖃᔅᓯᑲᓪᓚᖕᓂᒃ ᐃᖅᑲᓇᐃᔮᖃᖅᐸᒃᖢᓂ ᐊᑲᐅᙱᓕᐅᕈᑎᖃᙱᖦᖢᓂ.

ᐅᖃᐅᔾᔨᒋᐊᕐᓂᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᓪᓗᑎᒃ ᓄᓇᒥᓐᓂᒃ ᐊᐅᓪᓚᕐᓗᑎᒃ ᐅᕝᕙᓘᓐᓃᑦ ᐃᓕᓐᓂᐊᕐᓗᑎᒃ ᑲᓇᑕᐅᑉ ᓯᓚᑖᓄᑦ ᑮᓇᐅᔭᓂᒃ ᐊᑐᓐᖏᓂᖅᓴᐅᖁᓪᓗᒋᑦ ᐊᑭᑦᑐᐸᓪᓕᐊᑐᐃᓐᓇᕐᓂᖏᓐᓄᑦ. ᐃᓕᓐᓂᐊᕐᕕᐊᓗᒻᒨᓚᐅᖅᑐᖅ ᐃᖅᑲᓇᐃᔭᖅᑐᓂ ᑮᓇᐅᔭᒥᓂᒃ ᐊᑐᓐᖏᓂᖅᓴᐅᓪᓗᓂ. ᓲᖃᐃᒻᒪ ᐊᔪᖅᓴᖏᑦᑐᓃᙶᓚᐅᙱᒻᒪᑦ, ᑕᑯᔭᖅᑐᕈᓐᓇᖅᓯᓚᐅᖅᑐᖅ ᑲᑭᐱᓐ ᕿᑭᖅᑕᖏᓐᓂᑦ ᐊᒻᒪ ᑕᕆᐅᑉ ᐊᑭᐊᓂᑦ. ᐊᑖᑕᖓ ᐊᔭᐅᕐᖢᓂᐅᒃ ᐃᓕᑦᑎᓇᓱᒃᖢᓂ ᐊᑑᑎᖃᕐᓂᖓᓂᒃ ᑮᓇᐅᔭᖅ ᐃᖅᑲᓇᐃᔭᕐᓂᒃᑯᑦ ᓯᕗᓪᓕᖅᐹᒥᓗ ᐃᖅᑲᓇᐃᔮᖃᕐᖢᓂ ᐅᑭᐅᖃᕐᖢᓂ 11−ᓂᒃ ᐱᑎᑦᑎᓪᓗᓂ ᐱᕙᓪᓕᐊᔪᓄᑦ ᐅᖃᓕᒫᒐᓂᑦ ᓂᒡᓚᓱᒃᑎᓪᓗᒍ 50 ᓯᓚ.

ᐊᓯᖏᑦ ᐃᖅᑲᓇᐃᔮᑦ ᓛᕕᐊᓪᑦ ᐃᓚᐅᓯᒪᔪᑦ ᑐᓚᒃᑕᕐᕕᖕᒥᑦ ᐃᖃᓗᒐᓱᒡᕕᖕᒥᑦ, ᓴᓗᒻᒪᖅᓴᐃᓪᓗᑎᒃ ᐃᖃᓗᖕᓂᑦ, ᓴᓇᓪᓗᑎᒃ ᐊᓕᓚᔪᖕᒥᓪᓗ ᐊᐅᔭᒃᑯᑦ ᓯᓚᑦᑐᖅᓴᕐᕕᖕᒦᑎᓪᓗᒋᑦ. ᑕᐃᒃᓱᒪᓂᐅᑎᓪᓗᒍ ᐸᐃᒃᐹᓂ ᐊᑭᓖᕙᓚᐅᕐᒪᑦ ᐃᓕᓐᓂᐊᕐᓂᖓᓄᑦ ᑕᐃᒪᓕ ᐲᕆᐊᖃᓚᐅᙱᓚᖅ ᐃᓕᓐᓂᐊᖅᑎᓄᑦ ᐊᑐᖅᑐᐊᖅᑕᒥᓂᒃ.

ᖁᖓᔮᖏᓐᓇᖅᐸᓚᐅᙱᑦᑐᖅ, ᑭᓯᐊᓂ ᖃᐅᔨᓚᐅᖅᑐᖅ ᐃᖅᑲᓇᐃᔮᒥᓄᑦ ᖁᕕᐊᒋᔭᒥᓂᒃ. "ᐃᓱᒪᖃᑦᑎᐊᖅᖢᖓ, ᐊᒃᓱᕈᖅᖢᖓ ᐱᓕᕆᓇᓱᐃᓐᓇᓲᖑᔪᖓ ᑕᑯᑎᓐᓇᓱᒃᖢᒋᓪᓗ ᐃᓄᐃᑦ ᐱᖁᑎᒃᑲ. ᐃᓛᓐᓂᒃᑯᑦ ᖃᒥᑕᐅᓚᐅᕋᒪ, ᐃᖅᑲᓇᐃᔭᖅᑎᑖᑦᑕᐅᑎᒋᓚᐅᙱᓐᓇᒪ. ᐸᓖᓯᓕᕆᓪᓗᓂ, ᒪᕐᕉᓐᓂᒃ ᐱᓇᓱᐊᕐᓂᖃᓚᐅᖅᑐᖓ. ᓴᐱᓕᓚᐅᖅᓯᒪᙱᑦᑐᖓ. ᐱᓇᔪᐃᓐᓇᖃᑦᑕᓚᐅᖅᑐᖓ ᐱᓇᔪᐃᓐᓇᕐᐸᒃᖢᖓᓗ ᐱᓕᑕᐃᓐᓇᕋᒃᑯ," ᐃᖅᑲᐅᒪᔪᖅ. ᑎᓕᐅᕆᔪᖅ ᒪᒃᑯᑦᑐᓂᑦ ᓴᐱᓕᖁᔨᒐᓂ ᐅᖃᐅᓯᖃᖁᔨᒐᓂᓗ ᖃᓄᖅ ᓯᑕᒪᐃᕋᖅᓱᓂ ᐱᒐᓱᐊᕐᓂᖓᓂᑦ ᐅᐸᒍᒪᔭᒥᓂᑦ.

ᐃᖅᑲᓇᐃᔭᖅᑎᓪᓗᒍ, ᖁᕝᕙᕆᐊᖅᑎᑕᐅᖏᓐᓇᖅᐸᓚᐅᙱᑦᑐᖅ ᓂᕆᐅᒃᑲᓗᐊᖅᑐᓂ ᐊᒻᒪᓗ ᓇᓂᓯᓪᓗᓂ ᐃᖅᑲᓇᐃᔭᖅᑎᑖᕐᓂᕐᒥᒃ ᖁᕝᕙᐸᓪᓕᐊᑎᑦᑎᓂᒃᑯᑦ. ᖃᐅᔨᓴᕐᓂᖅᑕᖃᓚᐅᖅᑐᖅ ᐊᒻᒪᓗ ᓯᑕᒪᓂᒃ ᐃᓄᓐᓂᒃ ᐊᐱᖅᓱᖅᑎᖃᑦᑐᓂ ᐊᒻᒪᓗ ᐊᐱᕆᓪᓗᓂ ᐊᐱᖅᓱᕈᒪᓪᓗᓂ ᐊᒻᒪᓗ ᐅᖃᐅᔾᔭᐅᒋᐊᕈᒪᓪᓗᓂ ᐃᓄᓐᓂᒃ ᑲᔪᓯᑦᑎᐊᖅᓯᒪᔪᓂᒃ. "ᐃᓄᑦᑕᖃᐃᓐᓇᐅᔭᖅᑐᖅ ᐃᑲᔪᕈᒪᔪᓂᒃ ᕿᓂᕆᐊᖃᑐᐃᓐᓇᕐᓗᒋᓪᓗ," ᑎᓕᐅᕆᔪᖅ.

ᖁᐊᖅᓵᖅᓯᒪᑎᓪᓗᒍ ᒥᒍᓐᓇᑎᓐᓇᒍ ᐃᖅᑲᓇᐃᔮᒧᑦ ᐅᕝᕙᓘᓐᓃᑦ ᑐᓂᔭᐅᒐᒥ ᖁᕝᕙᕆᐊᖅᑎᑕᐅᓂᕐᒧᑦ, ᐱᓇᓱᐊᖏᓐᓇᓚᐅᖅᑐᖅ ᐊᒻᒪ ᐃᑲᔪᕐᓱᐃᓪᓗᓂ ᐃᓚᒥᓂᑦ, ᐱᖃᓐᓇᕆᔭᖏᓐᓂ ᐊᒻᒪ ᐃᖅᑲᓇᐃᔭᖃᑎᖏᓐᓂ. ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ, ᕿᓂᕋᔭᖅᐳᖅ ᐃᑲᔪᖅᑐᖅᑕᐅᓂᕐᒥᒃ ᓄᓇᓕᖕᓂᑦ, ᐱᖃᓐᓇᕆᔭᖏᓐᓂᑦ ᐃᓚᖏᓐᓂᒡᓗ. ᓛᕕᐊᓚᑦ ᒪᒃᑯᓐᓂᖅᓴᐅᑎᓪᓗᒍ, ᐊᒥᓱᓂᒃ ᐊᒫᒪᑦᑎᑦᓯᕙᓚᐅᖅᑐᖅ ᐊᒻᒪᓗ ᐅᖃᐅᑎᒍᒪᑦᓱᓂᐅᒃ ᓄᑲᖅᑎᖅ ᐃᒻᒥᓂᒃ ᑕᐃᒪᐃᖁᙱᑦᓱᓂᐅᒃ ᐅᐱᓐᓇᕋᓂ ᐃᓄᐃᑦ ᐃᑲᔪᕈᓐᓇᕐᒪᑕ.

ᑕᐅᓇᓂ, ᓛᕕᐊᓚᑦ ᐃᖃᐃᓕᓴᕐᕕᒻᒥ ᐃᖅᑲᓇᐃᔭᖃᑦᑕᖅᑐᖅ, ᐅᓪᓚᑦᑐᓂ, ᐃᖃᓪᓕᐊᖅᑐᓂ ᐊᒻᒪᓗ ᐊᖑᓇᓱᒋᐊᖅᑐᓂ ᐊᒻᒪᓗ ᐃᓪᓗᒦᑉᐸᑦᑐᓂ ᐱᔪᓐᓇᕋᐃᒐᒥ. ᐱᖓᓱᓂᒃ ᕿᑐᕐᖓᓕᒃ ᐊᒻᒪᓗ ᑲᒪᔨᖃᑦᑐᓂ ᕼᐋᑭᕐᓂᕐᒥᒃ, ᓯᑯᒦᖃᑦᑕᖅᑐᒻᒪᕆᐅᓪᓗᓂ ᕼᐋᑭᕐᓇᐅᑎᓪᓗᒍ. ᐃᓚᒥᓂᒃ ᐱᓕᕆᓪᓗᓂ ᐃᓱᒪᒥᓂᒃ ᐱᓕᕆᔪᓐᓃᕐᓇᖅᐳᖅ, ᐊᒃᓱᕈᕐᓇᕈᓐᓇᖅᖢᓂ ᐃᖅᑲᓇᐃᔭᕐᕕᖕᒥᓂ ᐅᖄᓚᐅᓯᕆᔨᖏᑦ ᖃᑕᙳᑎᒥᓂᒃ ᐅᓚᕕᓴᐃᒐᔪᒃᑳᖓᑦ. ᐃᓛᓐᓂᒃᑯᑦ ᐃᖅᑲᓇᐃᔭᖃᑎᖏᑦ ᒪᑐᓯᓲᑦ ᓄᖅᑲᖓᑲᐃᓐᓇᕈᓐᓇᕐᓂᐊᕐᒪᑦ ᐃᓚᒌᑦ ᐱᕕᖃᕆᐊᖃᓪᓚᕆᖕᒪᑕ.

ᐱᔪᒃᓯᑎᓪᓗᒍ ᐱᓕᕆᐊᕆᔪᒪᓪᓗᓂᐅᒃ ᐱᕕᒃᓴᖃᕐᕕᒋᕙᒃᐸᐅᒃ ᑭᐅᓯᓂᐊᕐᓗᓂ ᖃᐅᔨᒪᓂᕆᔭᐅᔪᓂᒃ ᐱᑕᖃᙱᓐᓂᕆᔭᖏᓐᓂᒃ ᓲᕐᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᓄᓇᖃᖅᑳᖅᑐᓄᓪᓗ ᖃᓄᐃᓕᐅᖅᑕᐅᕙᓚᐅᖅᑐᓄᑦ. "ᐃᓕᓐᓂᐊᖅᑎᑦᑎᔪᒪᓲᖑᔪᖓ ᐃᓄᖕᓂᒃ ᐱᔨᑦᑎᕋᖅᑕᓐᓂᒃ ᐊᒻᒪ ᐃᓕᖅᑯᓯᕐᒪ ᒥᒃᓵᓄᑦ. ᑕᐃᒪᓐᓇ ᐱᓕᕆᓕᓲᖑᕗᖓ," ᐅᖃᐅᓯᕆᕙᐃᑦ.

ᒪᒃᑯᒃᑐᑦ ᑲᔪᖏᖅᓴᕐᓗᒋᑦ, ᐅᖃᕈᒪᔪᖅ, "ᐊᑏ ᓴᐱᓕᖅᑕᐃᓕᒋᑦ. ᐊᒃᓱᕈᕐᓗᑎᑦ ᐱᓕᕆᓗᑎᑦ. ᐃᓅᓯᖅ ᐊᔪᕐᓇᖅᑑᕗᖅ. ᓴᐱᓕᖅᑕᐃᓕᒋᑦ ᐱᓇᓱᐊᑐᐃᓐᓇᕐᓗᑎᓪᓗ. ᐃᓄᑦᑕᖃᐅᖅᑐᖅ ᑕᖅᑳᓂ ᐃᑲᔪᕈᓐᓇᖅᑐᓂᒃ ᐃᓕᓐᓂᒃ, ᓄᓇᓕᑦᓯᓐᓂᑑᖏᑦᑐᖅ, ᐃᓄᐃᑦ ᓯᓚᑖᓃᑦᑐᑦ ᓄᓇᓖᑦ ᐃᑲᔪᕈᒪᔪᓂᒃ. ᐃᓄᖕᓂᒃ ᑕᖅᑳᓂ ᐃᑲᔪᕈᓐᓇᖅᑐᓂᒃ ᐱᑕᖃᐃᓐᓇᐅᔭᖅᑐᖅ." ᑕᐃᕕᑦ ᓛᕕᐊᓚᑦ ᐅᖃᐅᔾᔨᒋᐊᕈᑎᖓ ᓲᕐᓗ ᒥᔅᑐ ᕌᔪᔅᑎᑐᑦ, ᐊᒻᒪ ᐃᓄᐃᑦ ᕿᓂᓕᕋᐃᒻᒪᑕ ᐃᑲᔪᖅᑎᔅᓴᓂᒃ ᓄᓇᓕᖓᓐᓂᑦ, ᑕᐃᕕᑎ ᓇᓂᓂᐊᖅᑕᖓ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.