"ᐃᓕᓐᓂᐊᕐᓂᖅ ᐱᕕᖃᕐᓇᕐᒪᑦ ᕿᓄᐃᓵᕐᓇᖅᖢᓂᓗ," ᐅᖃᖅᑐᖅ ᑕᐃᒪᓐ ᓄᕗᐊ, ᐃᓚᒋᔭᐅᔪᖅ ᐅᒥᖕᒪᖕᓄᑦ ᓄᓇᖃᖅᑳᖅᓯᒪᔪᓄᑦ ᐃᓅᓂᑯ ᕚᓐᑰᕙᒥ ᒫᓐᓇᓗ ᓄᓇᖃᓕᖅᑐᖅ ᖃᓂᒋᔭᖓᓂ ᓛᑦᓄ. ᐃᖅᑲᓇᐃᔭᖅᑐᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᓕᕆᓂᕐᒧᑦ ᑐᑭᒧᐊᑦᑎᑦᓯᔨᐅᑦᓱᓂ ᖁᑦᓯᓂᖅᓴᓄᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᑎᑦᓯᔨᐅᑦᓱᓂ ᕚᓐᑰᕙᒥ-ᑐᙵᕕᖃᖅᓱᓂ ᐃᒻᒥᒃᑰᖅᑐᓂᑦ ᐃᓕᓐᓂᐊᕐᕕᒻᒥᑦ ᑕᐃᔭᐅᔪᖅ West Point Grey Academy. 

ᐃᓕᓐᓂᐊᖅᑎᑦᑎᖃᑦᑕᖅᐳᖅ ᐃᓄᓕᕆᓂᕐᒥᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑕᐅᔪᓂᒃ. ᐃᓕᓐᓂᐊᓕᓚᐅᖅᑐᖅ ᓴᓇᐅᒐᖏᑦ ᓴᖅᑭᔮᖅᑎᑕᐅᖅᑳᓚᐅᖅᑎᓪᓗᒋᑦ ᑕᑯᔭᒐᖃᕐᕕᖕᒥᑦ ᐋᓐᑐᕉᑉ ᒥᒃᓵᓄᑦ ᐃᓕᓐᓂᐊᕐᕕᒡᓗ ᐃᑲᔪᖅᑕᐅᔪᒪᓪᓗᓂ ᐃᑲᔪᖅᑐᐃᔪᒪᓪᓗᓂ ᓴᓇᐅᒐᓕᕆᓂᖕᒧᑦ ᐃᓕᓴᐃᔨᒥᑦ. ᑕᐃᔅᓱᒪᓂ ᓇᖕᒥᓂᖅ ᑕᑯᔭᕆᐅᓚᐅᖅᓯᒪᕗᖅ ᐃᓕᓴᐃᔨᐅᓪᓗᓂ ᐱᓇᔪᓚᐅᖅᓯᒪᓪᓗᓂᓗ ᓄᓇᖃᖅᑳᖅᓯᒪᔪᑦ ᐃᓕᓴᐃᔨᙳᕆᐅᖅᓴᔪᓄᑦ UBC−ᑯᓐᓂ. 

"ᑐᕌᒐᕆᓪᓗᐊᑕᖅᑕᕋ ᓯᕗᒻᒧᐊᒃᑎᑦᑎᔪᒪᓂᐅᕗᖅ ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑕᐅᕙᖕᓂᖏᓐᓄᑦ. ᖃᐅᔨᕗᖓ ᓴᓇᐅᒐᒃᑲ ᐊᒻᒪ ᐃᓕᓐᓂᐊᖅᑐᓕᕆᔨᖁᑎᒃᑲ ᐊᒃᑐᐊᖃᑦᑕᐅᑎᑦᑎᐊᓲᖑᓂᖏᓐᓂ ᐊᒻᒪ ᖃᓪᓕᖅᓯᖃᑦᑕᐅᑎᓪᓗᑎᒃ." 

ᐱᔭᕇᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᒻᒥ, ᕗᕆᑎᔅ ᑲᓚᒻᐱᐊᓕᐊᓚᐅᖅᑐᖅ ᓴᓇᖑᐊᕐᓂᕐᒧᑦ ᐃᓕᓐᓂᐊᖅᑐᓂ, ᑕᑯᔭᒐᖃᕐᕕᒻᒥ ᑲᒪᔨᐅᒍᒪᓪᓗᓂ, ᓴᐅᓂᓕᕆᓂᕐᒥᒃ ᐃᓕᓐᓂᐊᖅᑐᓂ, ᐊᒻᒪᓗ ᐃᖅᑭᓖᑦ ᐃᓕᓐᓂᐊᖅᑐᑎᒃ. ᐊᔪᕐᓇᖅᑐᒃᑰᖅᖢᓂ ᐃᓅᖃᑎᖃᖅᐸᖕᓂᕆᔭᖓᑦ ᑐᔾᔭᖅᓯᑦᑎᐊᕈᓐᓇᐃᓪᓕᓚᐅᖅᐳᖅ ᐃᓕᓐᓂᐊᕐᓂᕆᔭᒥᓂᒃ, ᐱᕕᒃᓴᖃᖅᖢᓂᓗ ᓇᖕᒥᓂᖅ ᖃᐅᔨᒃᑲᓐᓂᕆᐊᒃᓴᖅ ᐊᓂᒐᒥ. ᐃᖅᑲᓇᐃᔭᖅᑎᓪᓗᒍ, ᑮᓇᐅᔭᓂᒃ ᐊᑐᙱᓐᓂᖅᓴᐅᓪᓗᓂ, ᓴᓇᙳᐊᖅᖢᓂ, ᐊᐃᑉᐸᖅᑖᓚᐅᖅᐳᖅ ᐊᒻᒪ ᓄᑕᕋᖃᓕᖅᖢᓂ. ᐅᑎᓚᐅᖅᑐᖅ ᐃᓕᓐᓂᐊᒃᑲᓐᓂᕐᓂᕐᒧᑦ ᐊᓈᓇᐅᓪᓗᓂ ᐃᓐᓇᕈᖅᓯᒪᓪᓗᓂᓗ ᐃᓕᓐᓂᐊᖅᑎᐅᓪᓗᓂ. 

"ᐃᓕᓐᓂᐊᖅᑎᑦᑎᐊᕙᐅᓂᖅᓴᐅᓕᖅᑐᖓ ᒫᓐᓇ ᐊᖓᔪᖅᑳᖑᓪᓗᖓ," ᐊᒃᑐᐊᓂᖃᖅᑐᖅ. ᐃᓱᒪᓚᐅᖅᑐᖅ ᓯᓚᑦᑐᖅᓴᕐᕕᔾᔪᐊᓕᐊᑲᐅᑎᒋᖁᔭᐅᓪᓗᓂ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥ ᖃᐅᔨᒪᖁᓪᓗᒍᓗ ᖃᓄᐃᓕᐅᕈᒪᖕᒪᖔᑦ ᐃᓅᓯᖓᓂ, ᑭᓯᐊᓂ ᐱᕕᖃᕆᐊᖃᓚᐅᖅᑐᖅ ᖃᐅᔨᓗᓂ ᐃᖕᒥᓂᒃ. ᐅᑎᕋᒥ ᐃᓕᓐᓂᐊᕐᕕᖕᒧᑦ, ᑕᐃᒪᐃᓚᐅᖅᑐᖅ ᐃᓐᓇᕈᖅᓯᒪᓂᖅᓴᐅᓪᓗᓂ. ᖃᐅᔨᒪᓚᐅᖅᑐᖅ ᖃᓄᐃᓕᐅᕈᒪᖕᒪᖔᑦ ᐃᓅᓯᖓᓂᑦ ᓄᑕᕋᖃᕐᖢᓂᓗ ᐱᔪᒃᓯᐃᓐᓇᖁᓪᓗᒍ.  

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᓱᒪᒋᔭᖃᖅᖢᓂ ᓯᓚᑦᑐᖅᓴᕐᕕᒡᔪᐊᒥᑦ ᖃᐅᔨᒪᓕᖁᓪᓗᒋᑦ ᐱᓕᕆᕝᕕᐅᔪᓂᑦ ᐱᔨᑦᑎᕋᐅᑎᓂᒡᓗ ᓴᓇᔭᐅᔪᓂᑦ ᓴᖅᑭᑦᑎᓂᖕᓂᑦ ᓄᓇᖃᖅᑳᖅᓯᒪᔪᓂᑦ ᓄᓇᓕᖕᓂᑦ, ᓇᓗᓇᐃᕐᓯᓪᓗᓂ "ᐃᒃᐱᒋᒐᒃᑭᑦ ᑖᒃᑯᐊ ᐃᑲᔪᖅᑐᐃᓃᑦ ᐊᖏᕐᕋᒧᑦ ᐊᖏᕐᕋᒧᑦ ᕿᒪᒃᓯᑐᐃᓐᓇᓲᑦ." ᖃᐅᔨᓚᐅᖅᑐᖅ ᕿᓂᙱᖦᖢᓂ ᑕᐃᒃᑯᓂᖓ ᐱᕕᒃᓴᓂᑦ ᓲᖃᐃᒻᒪ ᓄᓇᖃᕋᒥ ᓄᓇᓕᖕᒥᓂ ᑭᓯᐊᓂ ᓇᓂᓯᓪᓗᓂ ᑲᑎᙵᓂᕐᒥᒃ ᓄᓇᖃᖅᑳᖅᓯᒪᔪᑦ ᑕᐅᑐᓪᓗᐊᑕᖅᑕᖓᓄᑦ ᐱᓕᕆᐊᒃᓴᒥ, ᐱᕈᖅᐸᓪᓕᐊᑎᑦᑎᓪᓗᓂ ᐱᓕᕆᖃᑎᒌᒍᑎᒥᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᖃᑕᙳᑎᖏᓐᓂᒃᓗ, ᑲᑎᖃᑎᖃᕐᖢᓂᓗ ᐱᖃᓐᓇᕆᔭᖓᓂᒃ. 

ᖁᕕᐊᒋᑦᑎᐊᖅᑕᖓ ᖃᓄᐃᓕᐅᖃᑦᑕᕐᓂᕆᔭᖓ ᑭᓯᐊᓂ ᐊᒃᓱᕈᕐᓇᖅᑐᖃᖃᑦᑕᓚᐅᕐᒪᑦ. "ᐃᓛᓐᓂᒃᑯᑦ... ᖃᐅᔨᓂᐊᖅᐳᑎᑦ ᐱᒻᒪᕆᐅᒋᔭᕐᓂᒃ ᑎᒍᒥᐊᖅᑕᕐᓂᒃ ᓄᓇᖃᖅᑳᖅᓯᒪᑎᓪᓗᑎᑦ ᐊᒃᓱᕈᕐᓇᖅᓯᑲᓴᖕᓂᐊᖅᐳᖅ ᒐᕙᒪᓕᕆᓂᕐᒥᒃ, ᐃᓕᓐᓂᐊᖅᓯᒪᒐᓗᐊᕈᕕᑦ ᐊᓯᐊᓂᒡᓘᓐᓃᑦ ᑭᒃᑯᑐᐃᓐᓇᓄᑦ ᐱᓕᕆᕝᕕᖃᕈᕕᑦ, ᐊᒃᓱᕈᕐᓇᕈᓐᓇᖅᖢᓂᓗ ᐃᒃᐱᒋᔭᒃᑯᓪᓗ ᐃᖅᑲᓇᐃᔭᕐᓂᕐᒥᒃ, ᐃᓱᒪᒃᑯᑦ ᑕᖃᓂᕐᒥᒃ, ᐊᔪᕐᓇᕈᔪᒃᐸᒃᖢᓂᓗ," ᑕᐃᒪᓐᓇ ᐅᖃᐅᓯᖃᖅᖢᓂ. 

"ᓄᑖᒥᒃ ᐃᖅᑲᓇᐃᔮᖃᓕᖅᑎᓪᓗᑎᑦ, ᐃᓛᓐᓂᒃᑯᑦ ᓱᓗᖏᓐᓂᒃ ᓂᐸᓱᒍᒪᖃᑦᑕᙱᓪᓗᑎᑦ, ᑭᓇᑐᐃᓐᓇᕐᒥᒃ ᐊᑭᓴᖅᑐᕈᒪᕙᙱᓚᑎᑦ ᐅᕝᕙᓘᓐᓃᑦ ᐃᓕᖕᓂᒃ ᐅᔾᔨᕆᑎᑦᑎᓗᑎᑦ. ᑭᓯᐊᓂ ᖃᐅᔨᕙᓪᓕᐊᓕᕋᒪ ᓴᙱᔪᒻᒪᕆᐊᓗᓐᓂᒃ ᓂᐱᖃᕋᑦᑕ. ᖃᐅᔨᒪᔪᒍᑦ ᑭᓱᑦ ᐱᕈᖅᐸᓪᓕᐊᓂᐊᕐᒪᖔᑕ ᓄᓇᓕᕗᑦ, ᖃᐅᔨᒪᓂᕗᑦ, ᐃᓱᒪᒋᔭᕗᓪᓗ. ᖃᓄᐃᓕᐅᖅᑐᖃᙱᑉᐸᑦ ᑕᐃᒪᐃᑦᑕᕆᐊᖃᕐᓂᖓᓂᒃ, ᑲᑉᐱᐊᓱᙱᓪᓗᑎᑦ ᐅᖃᐅᓯᕆᔭᕆᐊᒃᓴᖅ, ᐅᖃᑐᐃᓐᓇᕐᓗᑎᓪᓗ 'ᐋᒃᑲ, ᑕᐃᒪᐃᓕᐅᔾᔮᙱᑦᑐᒍᑦ,"" ᑲᔪᓰᓐᓇᖅᐳᖅ. 

ᑕᐃᒪᓕ ᑲᔪᖏᕐᓴᐃᓪᓗᓂ ᐱᓕᕆᓇᓱᐊᖅᐸᒻᒪᑦ, ᐊᑖᑕᑦᑎᐊᖓ, ᔭᐃᒥᓯ ᓄᕗᐊ, ᐊᒃᓱᐊᓗᒃ ᐊᒃᑐᐊᓂᖃᖅᑐᒋᓪᓗᓂᐅᒃ. ᒧᔅᑯᕌᒻ ᓯᕗᓕᖅᑎᐅᓚᐅᖅᑐᖅ ᐊᒻᒪᓗ ᐃᑦᑕᕐᓂᓴᓕᕆᔨᐅᓪᓗᓂ ᐊᒻᒪᓗ ᐊᒃᓱᕉᑎᖃᑦᑎᐊᖅᑐᓂ ᐅᐊᑦᑎᐊᕈᓐᓂᓴᕐᓂᒃ. ᑕᐃᒪᐃᒻᒪᑦ ᐃᓄᓕᕆᓂᕐᒧᑦ ᐃᓕᓴᐃᔨᐅᔪᒪᓚᐅᖅᐳᖅ ᖃᓄᐃᒻᒪᓪᓗ ᑕᑯᒃᓴᐅᑎᑦᑎᖕᒪᖔᑦ ᐃᓚᐅᖃᑦᑕᕐᓂᕐᒥᒃ ᐱᐅᓯᕆᔭᐅᕙᓚᐅᖅᑐᓂᒃ ᐃᖅᑲᐅᒪᔾᔪᑎᐅᑉ ᐅᖓᑖᓄᑦ. 

"ᖃᔅᓯᑲᓪᓚᖕᓂᒃ ᐊᔾᔨᒌᙱᑦᑐᓂᒃ ᐃᓕᔪᓐᓇᖅᑕᕐᓂᒃ, ᐊᒃᑐᐊᓂᖃᕈᓐᓇᕋᕕᑦ ᐊᒻᒪ ᑐᓴᐅᒪᑎᑦᑎᔪᓐᓇᖅᖢᑎᑦ ᐱᐅᓯᕆᔭᐅᕙᓚᐅᖅᑐᓂᒃ. ᐃᓄᖁᑎᕗᑦ ᐊᔾᔨᐅᖏᑦᑐᒥᒃ ᐃᓕᖅᑯᓯᖃᕐᒪᑕ ᑕᐃᒪᐃᓕᐅᖅᑐᑎᒃ. ᑕᒪᓐᓇ ᐱᐅᒋᓯᒪᓪᓚᕆᑦᑕᕋ ᐊᓪᓛᑦ ᓴᓇᐅᒐᒪ ᐃᓗᐊᓂ ᐊᒻᒪᓗ ᓴᓇᐅᒐᕋ. ᑕᒪᓐᓇ ᐅᑎᕐᕕᒋᓐᓇᐅᔭᕋᒃᑯ ᖃᓄᖅ ᑐᑭᖃᕐᒪᖔᑦ ᐅᒥᖕᒪᖕᓂᒃ ᐅᕝᕙᓘᓐᓃᑦ ᑕᑯᒃᓴᐅᔪᓂᒃ ᑐᓴᐅᒪᖃᑎᒌᖕᓂᕐᒥᒃ? ᖃᓄᕐᓕ ᖃᐅᔨᔪᓐᓇᖅᐱᑕ ᐱᐅᓯᕆᔭᐅᕙᓚᐅᖅᑐᓂᒃ ᐊᔾᔨᒋᔭᐅᙱᑦᑐᒃᑯᑦ?" ᐅᓂᒃᑳᖅᐳᖅ. 

ᑭᖑᒧᑦ ᑕᑯᓪᓗᓂ, ᓈᓚᖁᔨᔪᖅ ᑲᔪᖏᖅᓴᐃᔨᓂᑦ ᓱᒃᑲᐃᓪᓕᒋᐊᖁᔨᔪᓂᑦ. ᓯᕘᕋᓕᖅᐸᒃᖢᓂ, ᐊᒃᓱᕈᓗᐊᖅᐸᒃᖢᓂ ᑐᐊᕕᓕᖅᐸᒃᖢᓂᓗ, ᐃᒻᒥᓂᒃ ᒪᑭᑉᐸᓪᓕᐊᓪᓗᓂ ᖃᓄᐃᓕᐅᑲᐅᖅᑐᖅᐸᙱᖦᖢᓂ. ᐃᓕᓴᐃᖃᑦᑕᓕᖅᑎᓪᓗᒍ, ᑐᐊᕕᕐᓇᖅᓯᑎᑦᑎᓇᓱᖃᑦᑕᖅᐳᖅ ᐅᑎᖅᖢᓂᓗ ᓯᕗᓪᓕᕐᓄᑦ ᐃᓄᐃᑦ ᑐᙵᕕᖏᓐᓄᑦ ᐃᓕᑦᑎᓂᕐᒧᑦ. 

ᑕᐃᒪᓐ ᑕᐃᒪᓐ ᖃᐅᔨᒪᓕᖅᑐᖅ ᐃᓕᑉᐸᓪᓕᐊᓂᖅ ᐊᑯᓂᐅᒻᒪᑦ ᐊᒻᒪᓗ ᐅᑕᖅᑭᑎᐊᖅᑐᓂ ᐊᒻᒪᓗ ᐃᓕᓐᓂᐊᖅᑎᒍᒪᓪᓗᓂᐅᒃ ᐃᓕᓐᓂᐊᖅᑎᓄᑦ ᐱᓕᕆᓂᕆᕙᑦᑕᒥᓂᒃ. ᐃᓄᑑᓪᓗᓂ ᐃᓚᒥᓂᒃ ᐊᒻᒪ ᐃᓕᖅᑯᓯᒃᑯᑦ ᐃᓕᓴᕐᓇᐅᑎᒥᒃ, ᑎᑎᕋᐅᔭᓲᖅ ᑭᓇᒧᑦ ᑎᑭᐅᑎᔪᒪᖕᒪᖔᑦ ᑕᐃᑯᙵᐅᔪᒪᔭᒥᓄᑦ. ᐃᓕᓯᒪᔪᖅ ᑭᖑᓂᑦᑎᓐᓂᑦ ᐃᓕᓐᓂᐊᖅᑎᑦᑎᖃᑦᑕᕐᓂᐊᕐᒪᑦ ᓯᕗᓂᔅᓴᖅᑎᓐᓄᑦ ᐊᒻᒪ ᖃᐅᔨᒪᓪᓗᓂ ᓱᒃᑲᐃᓪᓕᒋᐊᖅᑐᓂ, ᐱᐅᔪᑦ ᓴᖅᑭᖃᑦᑕᕐᒪᑕ.. ᐊᒻᒪᓗ ᐱᐅᔪᑦ ᖃᐅᑕᒫᑦ ᐱᕙᓪᓕᐊᒻᒪᑕ ᐃᓕᓐᓂᐊᕐᕕᒻᒥ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.