ᐱᔪᒃᓯᑎᑕᐅᓪᓗᓂ ᓴᓇᙳᐊᖅᑎᓂᒃ ᖃᑕᙳᑎᖏᓐᓂᒃ ᐊᒻᒪ ᑕᑯᓪᓗᓂ ᖃᔅᓰᓐᓇᑯᓗᐃᑦ ᐃᓄᐃᑦ ᓄᓇᓕᖓᓂ ᓴᓇᖃᑦᑕᕐᓂᖏᓐᓂᒃ ᓴᓇᔪᒪᔭᒥᓂᒃ, ᐅᖅᓱᖅᑑᕐᒥᐅᑕᖅ ᕌᐳᑦ ᐳᐊᑕ ᐃᓱᒪᓕᓚᐅᖅᐳᖅ ᑎᑎᕋᐅᔭᖃᑦᑕᕈᒪᓪᓗᓂ ᐊᒻᒪ ᐃᓱᒪᒃᓴᖅᓯᐅᕈᑎᒋᔪᒪᓪᓗᓂᐅᒃ ᑎᑎᕋᐅᔭᕈᒪᔭᒥᓂᒃ. ᐊᑐᖅᐸᒃᐳᖅ ᐃᔾᔪᔪᐊᓗᖕᒥᒃ, ᐊᓕᓚᔪᒻᒪᕆᖕᒥᒃ ᐊᒻᒪᓗ ᐊᔾᔨᐅᙱᑦᑐᒥᒃ ᑎᑎᕋᐅᑎᒥᒃ, ᕚᐳ-ᑳᔅᑐᓪ, ᓴᓇᙳᐊᖅᐸᒃᖢᓂ ᓴᓇᙳᐊᖅᐸᒃᑕᒥᓂᒃ ᐊᒻᒪᓗ ᑎᑎᕋᐅᔭᖅᐸᒃᖢᓂ ᐊᕐᕌᒍᓂᒃ ᑎᓴᒪᓂᒃ. ᐊᑎᖃᙱᓚᖅ ᐃᓕᖅᑯᓯᕆᔭᒥᓄᑦ ᑭᓯᐊᓂ ᑕᒪᓐᓇ ᐱᓕᕆᓂᐅᔪᖅ ᐊᑯᓂᐊᓗᒃ ᐱᓕᕆᐊᖑᔭᕆᐊᖃᖅᐸᒃᐳᖅ ᑕᐅᑐᒐᖃᓪᓗᐊᑕᖅᐸᒃᖢᓂᓗ. ᑐᑭᓯᒋᐊᒃᑲᓐᓂᕈᒪᓕᕋᒥ, ᑮᓇᓂ ᖃᒡᓕᒋᐊᒃᑲᓐᓂᖅᐸᒃᐳᖅ ᐱᕙᓪᓕᐊᔪᓄᑦ. 

ᐳᐊᑕ ᑎᑎᖅᑐᒐᖅᑎᒻᒪᕆᐅᔪᒪᓕᓚᐅᖅᐳᖅ ᓲᖃᐃᒻᒪ ᓄᓇᒥᓂ ᐊᒥᓱᐊᓘᖕᒪᑕ ᓴᓇᙳᐊᖅᑏᑦ ᒥᖅᓱᖅᑎᑦ ᐊᒻᒪ ᓴᓇᙳᐊᖅᑏᑦ ᑭᓯᐊᓂ ᐊᒥᓲᙱᒻᒪᑕ ᑎᑎᕋᐅᔭᖅᐸᒃᑐᑦ. ᐊᕐᕌᒍᐃᑦ 8 ᐊᓂᒍᖅᓯᒪᓕᖅᑐᑦ, ᐃᓱᒪᓕᓚᐅᖅᓯᒪᕗᖅ ᑎᑎᖅᑐᒐᕐᓂᕐᒥᒃ, ᐅᓐᓄᐊᒃᑯᑦ ᐃᖅᑲᓇᐃᔭᖅᐸᒃᖢᓂ ᓇᐅᑦᑎᖅᓱᖅᑎᐅᓪᓗᓂ ᐋᓐᓂᐊᕕᖕᒥ ᐱᔭᒃᓴᖃᓗᐊᙱᖦᖢᓂ. ᑎᑎᕋᐅᔭᖃᑦᑕᓕᓚᐅᖅᐳᖅ ᐱᕕᒃᓴᖃᖅᑎᑦᑐᒪᓪᓗᓂᐅᒃ ᐃᕿᐊᙳᓗᐊᕈᓐᓃᖅᑎᖦᖢᒍᓗ, ᑎᑎᕋᐅᔭᖅᐸᒃᖢᓂ ᖃᔅᓯᐊᕐᔪᖕᓂᒃ ᐊᔾᔨᙳᐊᓂᒃ ᓯᕗᓪᓕᕐᒥ ᑭᖑᓂᐊᒍᓪᓗ ᐅᓂᒃᑳᖅᑐᐊᓂᒃ ᐃᓚᓯᕙᒃᖢᓂ ᓴᓇᙳᐊᖅᑕᒥᓄᑦ. 

ᐃᓚᖓᑦ ᑐᓗᖅᑕᕈᑕᐅᕙᒃᑐᖅ ᐳᐊᑕ ᓴᓇᙳᐊᖅᑎᐅᓪᓗᓂ ᐅᑭᐅᖅᑕᖅᑐᒥ ᐱᑕᖃᙱᓗᐊᕐᓂᖓᓄᑦ ᐱᖁᑎᓂᒃ ᐊᑐᐃᓐᓇᐅᔪᓂᒃ ᓄᓇᓕᖕᓂ. ᑎᑎᕋᐅᑎᖃᕈᓐᓃᕋᐃᒐᒥ ᐸᐃᑉᐹᓂᓪᓘᓐᓃᑦ, ᑎᑭᓴᐃᒋᐊᖃᓲᖑᒻᒪᑦ ᐅᕝᕙᓘᓐᓃᑦ ᐊᐃᔅᓯᑲᓐᓂᕆᐊᖃᖅᑐᓂ ᖃᓪᓗᓈᓅᕋᐃᒻᒪᑦ. ᓴᓇᙳᐊᒐᖅᑖᒃᑲᓐᓂᕋᓱᒃᖢᓂ ᐱᓇᓱᐊᕈᓯᒐᓴᖕᓄᑦ ᓄᖑᕈᑎᓕᕈᓐᓇᖅᐳᖅ. ᐅᓯᔭᐅᔾᔪᑎᖏᑦ ᐊᑭᑐᔪᐊᓘᔪᓐᓇᕐᒥᔪᑦ, ᐊᑭᖃᖅᑐᑎᒃ $20 ᐅᕝᕙᓘᓐᓃᑦ $30.00 ᒥᑭᔫᒐᓗᐊᒧᑦ. 

ᐃᓱᒪᒥᒍᑦ ᖃᓄᐃᖏᑦᑎᐊᕋᓱᒃᖢᓂ, ᐳᐊᑕ ᖁᕕᐊᒋᔭᖃᖅᐳᖅ ᑎᓴᒪᓕᒃᑯᑦ ᐃᖏᕐᕋᔭᒋᐊᒃᓴᖅ ᓄᓇᒥ ᐊᖑᓇᓱᒋᐊᕐᓗᓂᓗ. ᐊᐃᑦᑖᖑᒐᓗᐊᖅ, ᑎᓴᒪᖓ ᐊᔪᓕᕐᒪᑦ, ᓴᓇᔭᐅᔭᕆᐊᖃᖅᖢᓂᓗ, ᐊᒻᒪ ᓴᓇᓇᓱᒃᖢᓂᐅᒃ ᑭᓯᐊᓂ ᓴᓇᕐᕈᑎᑖᕆᐊᖃᖅᐳᖅ ᐱᕕᒃᓴᖓ ᐃᖏᕐᕋᑦᑎᐊᒃᑲᓐᓂᖁᓪᓗᒍ. ᐅᖄᓚᕝᕕᐅᔪᓐᓇᕐᒥᔪᖅ ᑕᐃᔭᐅᔪᖅ ᒪᒥᓴᕐᓂᖅ ᐅᖃᓪᓚᖕᓂᒃᑯᑦ ᐃᑲᔪᓲᖅ ᐃᓄᖕᓂᒃ ᐊᒃᓱᕉᓴᒃᑐᓂᒃ ᐃᓱᒪᒥᒍᑦ ᐊᔪᕈᑎᓕᖕᓂᒃ. ᐳᐊᑕ ᐅᖃᖃᑎᖃᖁᔨᕗᖅ ᐱᓕᒻᒪᒃᓴᐃᔨᒧᑦ ᐊᒃᓱᕉᑎᖃᕈᕕᑦ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ. 

ᐳᐊᑕ ᖃᐅᔨᒪᔪᖅ ᐃᓚᖏᑦ ᒪᒃᑯᒃᑐᑦ ᐃᓄᐃᑦ ᐅᒃᐱᕈᓱᖕᒪᑕ ᒪᒥᓴᕐᓂᖅ ᐃᓱᒪᑦᑎᐊᖏᑦᑐᓄᑐᐊᖅ ᑐᕌᖓᓂᖓᓂᒃ ᑭᓯᐊᓂ ᓇᓗᓇᐃᖅᓯᒃᑲᓐᓂᖅᑐᖅ ᑕᐃᒪᐃᙱᓐᓂᖓᓂᒃ, ᐃᑲᔫᑎᖃᕐᓂᖓᓂᒃ ᖃᓄᑐᐃᓐᓇᖅ ᐱᔾᔪᑕᐅᔪᓄᑦ ᐃᓅᑉ ᑲᒪᒋᔭᖓᓄᑦ. ᓇᓗᓇᐃᖅᓯᒃᑲᓐᓂᖅᐳᖅ ᐱᔨᑦᑎᕋᕐᓂᐅᔪᑦ ᑲᙳᓇᖅᑑᓂᖏᓐᓂᒃ ᐊᒻᒪ ᐃᓄᖕᒥᒃ ᑐᑭᖃᙱᑎᑦᑎᙱᖦᖢᓂ ᐅᕝᕙᓘᓐᓃᑦ ᐃᓄᑦᑎᐊᕙᐅᙱᑎᑦᑎᙱᖦᖢᓂ. ᖃᐅᔨᓯᒪᕗᖅ ᐃᑲᔪᕐᓂᖓᓂ ᐊᒃᓱᕈᓗᐊᕈᓐᓃᖅᑎᑦᑎᓂᕐᒥᓂ, ᓯᕘᕋᓂᕐᒥᓂ ᐊᒻᒪ ᐊᑐᖅᓯᒪᔭᖏᓐᓂ. ᒪᒥᓴᕐᓂᖅ ᐅᖃᓪᓚᖕᓂᒃᑯᑦ ᐅᖄᓚᕕᐅᔪᓐᓇᖅᑐᖅ ᐅᕗᖓ 867-975-5367.

ᐳᐊᑕᐅᑉ ᐅᖃᐅᔾᔨᒋᐊᕈᑎᒋᔭᖓ ᓴᓇᙳᐊᖅᑎᙳᕈᒪᔪᓄᑦ ᐃᒪᓐᓇᐅᕗᖅ, "ᑎᑎᕋᐅᔭᖃᑦᑕᓕᕆᑦ. ᐅᔾᔨᖅᓱᑦᑎᐊᕐᓗᒋᑦ ᐃᓗᓕᓕᒫᖏᑦ ᑕᐅᑐᒃᑕᑎᑦ ᑎᑎᕋᐅᔭᖅᑕᐅᓯᒪᔪᑎᒍᑦ, ᐃᓱᒪᒋᓗᒍᓗ ᖃᓄᑎᒋ ᑕᐃᒪᐃᓕᐅᕈᒪᖕᒪᖔᖅᐱᑦ, ᐃᓱᒪᒋᓗᒍᓗ ᑭᓲᖕᒪᖔᖅᐱᑦ? ᖃᓄᖅ ᐃᓱᒪᒋᔭᖃᖅᐱᑦ ᑎᑎᕋᐅᔭᒐᓕᐅᕐᓂᕐᒧᑦ?" ᐊᔾᔨᒌᙱᑦᑑᑎᐅᒻᒪᑕ ᑎᑎᖅᑐᒐᕐᓂᕐᒧᑦ ᐊᒻᒪᓗ ᐳᐊᑕ ᓇᒻᒥᓂᖅ ᑐᙵᓱᑦᑎᑦᑎᓯᒪᕗᖅ ᐃᓄᐃᑦ ᑎᑎᖅᑐᒐᖏᓐᓂᑦ, ᓇᒻᒥᓂᖅ ᑎᑎᖅᑐᒐᕐᒥᓂᑦ ᐃᓚᓯᓪᓗᓂ. 

"ᓱᒃᑲᐃᒡᓕᒋᐊᕐᓗᒍ, ᐊᒻᒪ ᐱᕙᓪᓕᐊᑐᐃᓐᓇᕐᓂᐊᖅᑐᖅ ᖃᖓᙳᖅᐸᓪᓕᐊᑎᓪᓗᒍ. ᐃᓚᐅᓕᕈᕕᑦ, ᐊᒻᒪᓗ ᐃᒃᐱᒋᓕᕈᕕᑦ ᖃᓄᐃᑦᑐᒥᒃ ᐃᓕᖅᑯᓯᖃᕐᓂᕐᒥᒃ ᓴᖅᑭᑦᑐᒪᔭᕐᓂᒃ, ᑕᒪᓐᓇ ᑲᔪᓯᑎᑐᐃᓐᓇᕈᓐᓇᖅᐸᐃᑦ ᐃᓕᑦᑎᕙᓪᓕᐊᖏᓐᓇᕐᓗᑎᓪᓗ, ᐊᐱᖅᓱᖃᑦᑕᐃᓐᓇᕐᓗᑎᑦ ᑭᓱᑐᐃᓐᓇᓂᒃ ᐃᓱᒪᒋᔭᕐᓂᒃ ᐃᑲᔫᑎᖃᕋᔭᖅᑐᓂᒃ ᐃᙱᖅᑎᙳᖅᐸᓪᓕᐊᓂᕐᓄᑦ," ᐅᖃᕆᓪᓗᓂ. 

"ᐱᔪᒃᓯᑎᑦᑎᔪᓐᓇᕐᓂᓕᒫᕐᓂᒃ ᓇᓂᓯᓗᑎᑦ. ᐊᐱᕆᓗᒋᑦ ᓇᓕᐊᑐᐃᓐᓇᖅ ᓴᓇᙳᐊᖅᑎᑦ ᐃᓕᖕᓂᒃ ᐅᖃᐅᔾᔨᔪᓐᓇᕐᒪᖔᑕ ᖃᓄᐃᑦᑐᒥᒃ ᓴᓇᙳᐊᕈᒪᖕᒪᖔᖅᐱᑦ... ᐊᒥᓱᐊᓗᖕᓂᒃ ᐊᔾᔨᒌᙱᑦᑐᓂᒃ ᐃᓕᖅᑯᓯᖅᑕᖃᐅᕐᒪᑦ ᖃᐅᔨᓴᕈᓐᓇᖅᑕᕐᓂᒃ ᐅᕝᕙᓘᓐᓃᑦ ᐆᒃᑐᕈᓐᓇᖅᑕᕐᓂᒃ, ᐊᒻᒪᓗ ᐊᒥᓱᐊᓗᖕᓂᒃ ᐱᑐᐃᓐᓇᕐᓗᑎᑦ, ᐊᒻᒪᓗ ᓇᓕᐊᑐᐃᓐᓇᖅ ᐊᒃᑐᐊᓂᖃᕐᓂᖅᓴᐅᓇᓱᒋᒍᕕᐅᒃ, ᐊᑐᐃᓐᓇᕈᓐᓇᖅᑕᐃᑦ ᑖᓐᓇ ᐃᓕᖅᑯᓯᖅ ᐊᒻᒪᓗ ᐃᓕᑦᑎᕙᓪᓕᐊᖏᓐᓇᕐᓗᑎᑦ. ᐊᒻᒪᓗ ᐱᑕᖃᑦᑎᐊᖅᑐᒻᒪᕆᐅᓪᓗᓂ ᖃᓄᐃᓕᐅᖅᑕᐅᕙᓚᐅᖅᑐᓂᒃ ᓴᓇᙳᐊᖅᑕᐅᕙᓚᐅᖅᑐᓂᒃ ᓄᓇᖃᖅᑳᖅᑐᓄᑦ ᑕᐃᒪᐃᓐᓂᖓᓄᓪᓗ ᐱᔪᒃᓯᓕᕐᓇᖅᑐᖃᒻᒪᕆᒃᐳᖅ ᑕᖅᑳᓂ ᑕᑯᔪᓐᓇᖅᑕᕐᓂᒃ ᐃᑭᐊᖅᑭᕕᒃᑯᑦ... ᓇᓕᐊᖕᓄᑐᐃᓐᓇᖅ ᐊᒃᑐᐊᓂᖃᕐᓂᖅᐹᕆᔭᕐᓄᑦ, ᐱᔪᒪᓕᕈᓐᓇᖅᐳᑎᑦ ᑕᐃᔅᓱᒪᙵᑦ ᐃᓕᖅᑯᓯᕐᒥᒃ ᐊᒻᒪᓗ ᓇᖕᒥᓂᖅ ᓴᓇᓗᑎᑦ ᐊᒻᒪᓗ ᓄᑖᙳᕆᐊᕐᓗᒍ..." ᐃᓱᓕᑉᐳᖅ.

ᐱᔪᒃᓯᓕᕋᓱᓕᕌᖓᒥ, ᐳᐊᑕ ᑕᐅᑐᒃᐸᒃᐳᖅ ᐊᑖᑕᑦᑎᐊᒥᓄᑦ ᓴᓇᙳᐊᖅᑎᑦᑎᐊᕙᐅᓚᐅᖅᑐᒥᒃ. ᑕᐅᑐᒃᐸᒃᖢᓂᐅᒃ ᐊᑖᑕᑦᑎᐊᖓ ᓴᓇᙳᐊᖅᑎᓪᓗᒍ ᐱᐅᒃᓴᖅᐸᒃᖢᓂᓗ ᐱᕙᓪᓕᐊᓂᖓᓂᒃ ᑮᓇᐅᔭᓕᐅᕐᓂᖏᓐᓂᒡᓗ. ᐊᓈᓇᑦᑎᐊᖓ ᒥᖅᓱᖅᑎᐅᓚᐅᖅᐳᖅ ᐊᒻᒪ ᐱᒃᑯᒥᒍᓱᒃᓯᒪᓪᓗᓂ ᑕᐅᑐᖃᑦᑕᖅᑕᒥᓂᒃ ᒥᖅᓱᖅᑎᓪᓗᒍ ᐃᓄᐃᑦ ᐊᓐᓄᕌᖏᓐᓂᒃ ᐊᒻᒪ ᐊᑭᓐᓇᕐᒥᐅᑕᓕᐅᖅᖢᓂ. ᐃᑦᑐᒃᑯᖏᑦ ᐊᑖᑕᑦᑎᐊᒃᑯᖏᒃ ᓴᓇᙳᐊᖅᑎᙳᕈᒪᓕᓚᐅᖅᓯᒪᕗᖅ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᐳᐊᑕ ᐅᖃᕋᔭᖅᐳᖅ, "ᑭᓇᑐᐃᓐᓇᕐᒥᒃ ᑕᑎᖃᕆᐊᖃᙱᑦᑐᑎᑦ ᓯᕗᓂᒃᓴᖃᑦᑎᐊᕐᓂᖅᓴᐅᓂᐊᕈᕕᑦ. ᑕᒪᓐᓇ ᐃᓅᓯᕆᒐᕕᐅᒃ. ᐅᑯᐊ ᐃᓱᒪᖅᓲᑎᒋᕙᑎᑦ. ᐅᑕᖅᑭᖃᑦᑕᖏᓪᓗᑎᑦ ᐱᖃᓐᓇᕆᔭᕐᓂᑦ ᐃᓚᓐᓂᓪᓘᓐᓃᑦ ᖃᓪᓗᓈᓅᕐᓂᐊᕐᓗᑎᑦ ᐃᓕᓐᓂᐊᑦᑎᐊᒃᑲᓐᓂᕐᓂᕐᒧᑦ. ᓯᕗᓂᒃᓴᐃᑦ ᐃᓕᖕᓂᒃ ᑐᙵᕕᖃᖅᐳᖅ, ᑭᓇᑐᐃᓐᓇᕐᓗ ᐃᓕᖕᓂᒃ ᓂᕈᐊᕈᓐᓇᙱᖦᖢᓂ ᑭᓯᐊᓂ ᐃᕝᕕᑦ."

ᐅᓄᙱᑦᑐᑯᓗᖕᓂ ᐃᓄᖕᓂ ᓄᓇᓕᖓᓂ ᑎᑎᖅᑐᒐᖃᑦᑕᖅᑎᓪᓗᒋᑦ ᐊᒻᒪ ᑐᙵᓱᒃᑎᑕᐅᓪᓗᑎᒃ ᓴᓇᙳᐊᖅᑎᓄᑦ ᖃᑕᙳᑎᖏᓐᓄᑦ, ᕌᐳᑦ ᐳᐊᑕ ᑎᑎᕋᐅᔭᖃᑦᑕᕈᒪᓕᓚᐅᖅᐳᖅ ᐊᒻᒪ ᐃᓱᒪᒃᓴᖅᓯᐅᕈᑎᒋᔪᒪᓪᓗᓂᐅᒃ ᑎᑎᕋᐅᔭᒐᒃᓴᓂᒃ. ᐅᓐᓄᐊᒃᑯᑦ ᐃᖅᑲᓇᐃᔭᖅᐸᒃᖢᓂ ᐋᓐᓂᐊᕕᖕᒥ, ᐃᓱᒪᖓ ᓇᒧᙵᐅᕈᓘᔭᖅᐸᒃᖢᓂ ᐃᓱᒪᕈᓘᔭᖅᐸᒃᖢᓂᓗ ᓴᖅᑭᑎᑦᑎᕙᒃᖢᓂ ᐃᓱᒪᒃᓴᖅᓯᐅᕈᑎᒋᔭᒥᓂᒃ, ᑎᑎᕋᐅᔭᖅᐸᒃᖢᓂ ᑐᙵᕕᓕᖕᓂᒃ ᐃᓄᐃᑦ ᑕᖅᓴᖏᓐᓂᒃ. ᐊᑐᖅᖢᓂ ᐱᓕᕆᓂᐅᔪᒥ ᐊᑯᓂᐅᔪᒥ ᐊᒻᒪ ᑕᐅᑐᒐᖃᑦᑎᐊᕐᓂᐅᔪᒥ, ᓴᖅᑭᑎᑦᑎᕙᒃᐳᖅ ᐱᓕᕆᐊᒃᓴᓂ ᐅᐱᒋᔭᖏᓐᓂ ᖃᐅᑕᒫᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.