"ᐅᖃᐅᔾᔨᖏᓐᓇᐅᔭᖅᑐᖓ ᐃᓄᖕᓂᒃ, ᐱᕈᖅᓯᐊᒃᓴᑎᑦ ᐱᕈᖅᑎᑦᑕᕆᐊᖃᖅᑕᑎᑦ ᐱᕈᖅᑎᓪᓗᒋᓪᓗ. ᐃᓛᓐᓂᒃᑯᑦ ᑕᑯᓐᓇᖃᑦᑕᕋᕕᑦ ᐊᓯᖏᓐᓂᒃ ᐃᓄᓐᓂᒃ ᐱᕈᖅᐸᓪᓕᐊᔪᓂᒃ ᐊᒻᒪᓗ ᑲᒪᓇᖅᑐᒻᒪᕆᐅᓪᓗᓂ. ᑲᒪᓇᖅᐳᖅ ᐅᖃᐅᓯᖅᐳᑦ ᐆᒪᓗᐊᕐᓂᖓᓂᒃ," ᐅᖃᖅᐳᖅ ᐊᐃᓖᓐ ᐲᕗᕐ ᕗᐊᑦ−ᒦᓐᑑᑉ ᐱᖁᔨᕗᖔᕈᑎᖓᓂ ᓄᓇᑦᑎᐊᒥ. ᐃᓕᓐᓂᐊᕆᐊᖅᐸᓚᐅᖅᑐᖅ ᕗᐊᑦ ᓯᒥᑦ-ᒥ, ᐅᐃᒥᓂᒃ ᑲᑎᖃᑎᖃᓚᐅᖅᑐᖅ ᐊᒻᒪᓗ 7-ᓂᒃ ᕿᑐᕐᖓᖃᑦᑐᓂ, ᐱᖓᓱᑦ ᐃᓅᒍᓐᓃᖅᓯᒪᔪᑦ, ᑭᓯᐊᓂᓕ ᑖᒃᑯᐊᑑᖏᑦᑐᑦ ᓱᕈᓯᖏᑦ ᐱᕈᖅᓴᓚᐅᖅᑕᖏᑦ.

ᐊᖓᔪᖅᑳᙳᐊᖑᓯᒪᔪᖅ ᐊᒻᒪᓗ ᐃᓕᓐᓂᐊᖅᑎᑕᐅᓯᒪᓪᓗᓂ ᐃᓅᓯᕐᒥ ᐊᔪᕈᓐᓂᕐᓴᓂᕐᒧᑦ ᐅᕕᒃᑲᕐᓄᑦ, ᑎᓕᐅᖃᑦᑕᖅᑐᒋᑦ ᐃᓕᓐᓂᐊᑲᓐᓂᖁᓪᓗᒋᑦ ᖃᐅᔨᒪᓗᑎᒃ ᑭᓇᐅᓂᕐᒥᓂᒃ ᐊᒻᒪᓗ ᓇᑭᙶᕐᓯᒪᒻᒪᖔᑕ. ᐃᓕᓴᐃᖃᑦᑕᓚᐅᖅᐳᖅ ᐅᖃᐅᓯᕐᒥᒃ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐅᑭᐅᓄᑦ 11-ᓄᑦ ᓄᖅᑲᓚᐅᙱᑎᓪᓗᒍ ᐃᖅᑲᓇᐃᔭᕐᓂᕐᒥᒃ, ᑭᓯᐊᓂ ᐃᓕᖅᑯᓯᕐᒥᓂᒃ ᐅᖃᐅᓯᖃᙱᖦᖢᓂ. 

"ᐃᓕᓐᓂᐊᕐᓂᖅ ᐱᒻᒪᕆᐊᓘᕗᖅ, ᐱᓪᓗᐊᑕᐅᕗᖅ ᐊᒥᓱᓄᑦ ᐃᖅᑲᓇᐃᔮᓄᑦ ᑲᔪᓯᓂᖃᑦᑎᐊᕈᓐᓇᕐᓂᕐᒧᓪᓗ."

"ᐅᑎᐃᓐᓇᐅᔭᖅᑐᖓ ᖁᕝᕙᕆᐊᖅᑎᓪᓗᒍ ᑎᓕᐅᕆᓗᖓᓗ ᐃᓄᖕᓂᒃ ᐊᑐᖁᓪᓗᒋᑦ ᐅᖃᐅᓯᖅᑕᖏᓐᓂ, ᓴᙱᓗᑎᒃ ᐃᓕᖅᑯᓯᖏᓐᓂ ᐆᒻᒪᑎᖏᓐᓂ ᖃᐅᔨᒪᓗᑎᒃᓗ ᑭᓇᐅᓂᖏᓐᓂᒃ ᓇᖕᒥᓂᖅ ᖁᓱᔪᓐᓃᕐᓗᑎᒃ," ᐱᐊᕗᕐ ᓇᓗᓇᐃᔭᕐᓗᓂ. ᐃᓕᓴᐃᓚᐅᖅᑐᖅ ᖃᓂᐅᔮᖅᐸᐃᑐᑦ, ᐃᓕᖅᑯᓯᓕᕆᓂᕐᒧᑦ ᖃᓄᐃᓕᐅᕈᑎᓂᒃ, ᐊᐅᓪᓛᖅᓯᒪᓂᕐᒥᒃ ᓄᓇᒥ, ᖃᔭᕆᐊᖅᑐᕐᓂᕐᒥᒃ ᐊᒻᒪ ᒥᑭᒋᐊᕐᓂᐊᕐᓂᕐᒥᒃ ᐊᒻᒪ ᐃᖏᕐᕋᓂᕐᒥᒃ ᐃᓕᓐᓂᐊᕈᑎᓕᖕᓂᒃ 7-ᓂᒃ ᐃᓕᓐᓂᐊᖅᑎᓂᒃ ᐃᑲᔪᕋᓱᒃᖢᑎᒃ ᖁᓱᔪᓐᓃᖅᐸᓪᓕᐊᓂᕐᒥᒃ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓪᓗᒋᑦ ᓄᓇᒥ ᐊᔪᕈᓐᓃᖅᓴᐅᓯᕐᓂᒃ ᐅᕝᕙᓘᓐᓃᑦ ᑐᒃᑐᓕᐊᕆᐅᖅᓴᔪᓂᒃ ᐊᖓᔪᒃᖠᐅᓂᖅᓴᓂᒃ ᒪᒃᑯᒃᑐᓂᒃ.  

ᐊᕐᕌᒍᓄᑦ 7-ᓄᑦ, ᕿᑐᕐᖓᒥᓂᒃ ᐱᕈᖅᑎᑦᑎᓚᐅᖅᑐᖅ ᒥᑭᒋᐊᕐᓂᐊᕐᓂᕐᒧᑦ ᐊᒻᒪᓗ ᐃᒃᐱᒍᓱᓪᓚᕆᓚᐅᖅᑐᖅ ᕿᑐᕐᖓᖏᑦ ᐃᓕᖅᑯᓯᒧᑦ ᑐᙵᕕᖃᕆᐊᖃᕐᓂᖏᓐᓂᒃ ᓇᖕᒥᓂᖅ ᐱᕈᖅᓴᓚᐅᖅᑎᓪᓗᒍ ᐊᒃᓱᕈᖃᑦᑕᖅᑎᓪᓗᒍ ᖃᑕᙳᑎᖏᓐᓄᑦ ᐊᔪᓕᕈᑎᖃᖃᑦᑕᖅᑐᓄᑦ. ᐊᖏᕐᕋᒥᓂᒃ ᐃᓕᓐᓂᐊᓚᐅᖅᑐᖅ ᕿᑐᕐᖓᒥᓂᒃ ᑭᓯᐊᓂ ᐃᓱᒪᓕᕋᒥ ᐃᓅᓯᖃᕐᓂᖅᓴᐅᔭᕆᐊᖃᓕᕐᓂᕐᒥᓂᒃ ᐊᒻᒪᓗ ᓅᖦᖢᑎᒃ ᓄᓇᓕᖕᓄᑦ. 

ᐊᐅᔭᒃᑯᑦ, ᖃᑕᙳᑎᖏᑦ ᐃᓕᓐᓂᐊᖅᑎᑦᑎᖃᑦᑕᓚᐅᖅᐳᑦ ᐊᒻᒪ ᐊᐅᔭᒃᑯᑦ ᐊᐅᓪᓛᖅᑎᑦᑎᕙᒃᖢᑎᒃ ᑮᓇᐅᔭᖃᖅᑎᑕᐅᓪᓗᑎᒃ ᓄᓇᓕᖕᓂ ᐃᓄᓕᕆᔨᒃᑯᑦ ᑲᑐᔾᔨᖃᑎᒌᓄᑦ. ᐊᐅᓪᓛᖅᓯᒪᑎᓪᓗᒋᑦ, ᐃᓚᐅᔪᑦ ᓇᓗᓇᐃᒃᑯᑕᖅᑖᓚᐅᖅᐳᑦ ᐃᒪᕐᒥᒃ ᐊᑦᑕᕐᓇᖅᑕᐃᓕᒪᓂᕐᒥᒃ, ᐋᓐᓂᖅᑐᓕᕆᓂᕐᒥᒃ ᐊᒻᒪ ᖁᑭᐅᓯᕆᓂᕐᒥᒃ ᐊᒻᒪ ᐳᐃᔾᔪᕌᖅᓯᒪᓚᐅᑲᒃᖢᑎᒃ, ᐊᓇᐅᓯᑲᑕᒃᐸᒃᖢᑎᒃ, ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᓐᓂᐊᖅᖢᑎᒃ, ᐱᓱᔪᒃᖢᑎᒃ ᐊᒻᒪ ᐊᓛᓯᓂᒃ ᐊᓛᓯᓂᒃ.

ᐅᖓᑖᓄᑦ ᐊᔪᙱᓐᓂᕐᓂ, ᐊᐅᓪᓛᖅᓯᒪᔪᑦ ᐱᓕᕆᖃᑎᒌᒃᑎᑦᑎᓪᓗᑎᒃ. ᓄᓇᓕᓐᓂ ᐸᓖᓯᐅᔪᖅ ᑯᕇ ᑎᑭᓚᐅᖅᑐᖅ ᓄᓇᓕᕋᓛᒧᑦ ᐊᒻᒪᓗ ᐅᓂᒃᑳᖅᑐᓂ ᐱᕈᑉᐸᓪᓕᐊᓂᕐᒥᓂᒃ ᐊᒻᒪᓗ ᐊᒃᓱᕈᕈᑎᒋᖃᑦᑕᓚᐅᖅᑕᖓ ᐸᓖᓯᕈᕋᓱᐊᖅᑐᓂ. ᐊᐅᒪᔮᖃᑎᖃᓚᐅᖅᑐᖅ ᐃᓚᐅᖃᑕᐅᔪᓂᒃ ᐊᒻᒪᓗ ᑲᑎᓐᓂᕆᓚᐅᖅᑕᖓᑦ ᑐᑭᖃᓚᐅᖅᑐᖅ ᓱᕈᓰᑦ ᐃᓚᐅᖃᑕᐅᔪᒪᓂᖅᓴᐅᓚᐅᖅᑐᑦ ᓄᓇᓕᓐᓂ ᐱᓕᕆᐊᖑᔪᓂᒃ ᐱᖃᓯᐅᔾᔨᔪᓂᒃ ᐸᓖᓯᓂᒃ ᓯᕗᓂᑦᑎᓐᓂ. ᐃᓚᖓᑦ ᐊᐅᓪᓛᖅᓯᒪᔪᖅ ᐱᕈᖅᓴᓚᐅᖅᓯᒪᕗᖅ ᓇᖕᒥᓂᖅ ᐊᐅᓪᓛᖅᓯᒪᓕᖅᖢᓂ ᐊᐱᕆᓪᓗᓂᓗ ᖃᑕᙳᑎᒥᓂᒃ ᐊᕐᕌᒍ ᖃᐃᖁᓪᓗᒍ. 

ᐅᖃᐅᓯᓕᕆᓂᕐᒥ ᐃᓕᓐᓂᐊᕐᓂᖅ ᐊᔪᖖᒋᓐᓂᐅᔪᖅ ᑐᑭᓯᔾᔪᑕᐅᓪᓗᓂ ᐱᒻᒪᕆᐅᓂᖓᓂᒃ ᐃᓅᓯᖓᓂ. "ᖃᓄᑐᐃᓐᓇᖅ ᐅᖃᓪᓚᒃᑲᓗᐊᕈᕕᑦ.. ᐱᒻᒪᕆᐊᓘᓚᐅᖅᑐᖅ ᐃᓕᖅᑯᓯᑦᑎᓐᓂ ᓲᖃᐃᒻᒪ ᒪᑐᐃᙶᖅᑐᒥᒃ ᒪᑐᐃᖅᓯᔾᔪᑕᐅᓚᐅᕐᒪᑦ. ᐃᒻᒥᓂᒃ ᖁᓱᔪᓐᓃᖅᐸᓪᓕᐊᓂᖅ, ᖃᐅᔨᒪᖕᒪᑕ ᑭᓇᐅᓂᕐᒥᓂᒃ, ᑲᙳᓱᙱᖦᖢᑎᒡᓗ ᑭᓇᐅᓂᕐᒥᓂᒃ," ᑕᐃᒪᓐᓇ ᐅᖃᖅᖢᓂ. ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᓄᓇᑐᖃᕆᙱᑕᒥᓄᑦ ᓄᓇᑖᖅᑎᑕᐅᓯᒪᔪᑦ, ᑲᙳᓇᖅᑐᒻᒪᕆᐅᓚᐅᖅᐳᖅ ᐊᒻᒪ ᑲᙳᓱᖕᓇᖅᖢᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ ᐅᖃᓪᓚᒃᖢᑎᒃ. ᐱᐊᕗᕐ ᑕᑯᓚᐅᖅᑐᖅ ᖃᓄᖅ ᐃᓕᓐᓂᐊᖅᑏᑦ ᐊᔪᓚᐅᖅᑐᑦ ᐃᓕᑦᑎᓪᓗᑎᒃ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐱᓱᒋᐊᒃᓴᖅ ᒪᕐᕉᖕᓄᑦ ᓄᓇᕐᔪᐊᓄᑦ, ᐃᓕᑦᑎᓗᑎᒃ ᐃᓐᓇᑐᖃᕐᓂᑦ ᐃᓕᑦᑎᕙᓪᓕᐊᓂᕐᓗ ᖃᓪᓗᓈᑦ ᐱᐅᓯᖏᓐᓂᑦ.  

"ᑖᒃᑯᐊ ᒪᒃᑯᒃᑐᑦ ᓇᖕᒥᓂᖅ ᓴᙱᓂᖃᓚᐅᖅᑐᑦ ᐃᓕᑦᑎᔪᒪᓪᓗᑎᒃ ᐅᖃᐅᓯᕐᒥᒃ. ᐃᓕᑦᑎᒃᑲᓐᓂᕈᒪᓚᐅᖅᑐᑦ ᐃᓕᖅᑯᓯᕐᒥᓂᒃ."

ᐃᓕᓐᓂᐊᕈᑕᐅᖃᑦᑕᖅᓯᒪᔪᑦ ᐲᕗᕐ ᐊᒻᒪ ᐅᐃᖓ ᐃᖅᑭᓖᑦ ᓱᕈᓯᖏᓄᑐᐊᖑᙱᑦᑐᖅ, ᑭᓇᑐᐃᓐᓇᑦᑎᐊᒧᑦ ᒪᑐᐃᖓᓚᐅᖅᑐᑦ. ᐊᑕᐅᓯᖅ ᐊᒃᓱᕈᕐᓇᖅᑐᖅ ᐊᑐᕐᓂᑯᖓ ᐲᕗᕐ ᐃᓕᓴᐃᓪᓗᓂ ᐅᖃᐅᓯᖅᑕᒥᒃ ᐃᓕᖅᑯᓯᕐᒥᒃᓗ ᐃᓕᓐᓂᐊᕐᕕᐊᕈᓯᕐᒥ ᐃᓚᖓ ᓄᑕᖅᑲᑦ ᐱᕈᖅᓴᓪᓗᓂ ᐅᒃᐱᕈᓱᒃᓗᓂ ᐃᓕᓴᐃᓂᖓᓂᒃ ᓂᑲᒍᓱᖕᓂᕐᒥ ᐱᐅᙱᑦᑐᒥᒃᓗ. ᐊᐃᕙᔪᒻᒪᕆᐅᓚᐅᖅᐳᖅ ᐊᒻᒪ ᖁᕕᐊᓱᙱᑦᑐᒻᒪᕆᐅᓪᓗᓂ ᖃᓄᖅ ᐃᓕᓐᓂᐊᕐᒪᖔᑕ ᐃᓕᓐᓂᐊᕐᕕᓐᓂᑦ. ᐊᐱᕆᓚᐅᖅᑐᖅ ᐊᓈᓇᒥᓂᒃ ᐃᒃᓯᕚᕈᒪᖕᒪᖔᑦ ᑭᓯᐊᓂ ᓴᐱᕐᓇᖅᑑᓚᐅᖅᑐᖅ ᐃᓚᐅᖃᑕᐅᓂᕐᒥᓂᒃ, ᐊᖏᓚᐅᙱᒃᑲᓗᐊᖅᖢᓂ ᕿᓚᐅᔾᔭᕐᓂᕐᒥᒃ. ᒫᓐᓇᓕ, ᐊᕐᓇᖅ ᐅᖃᐅᓯᖃᓕᖅᑐᖅ ᐃᓕᖅᑯᓯᕐᒥᓂᒃ ᐊᑐᕐᓂᕋᖅᖢᓂ, ᐊᑯᓂᐊᓗᒃ ᐅᒃᐱᕆᔭᒥᓂᒃ ᐊᑐᖅᖢᓂ ᐃᓕᖅᑯᓯᓕᕆᓂᕐᒥᒃ. 

"ᓄᓇᕗᑦ ᐃᓕᓐᓂᐊᖅᑎᑦᑎᕗᖅ ᐅᖃᐅᓯᑦᑎᓐᓂᒃ. ᐃᓕᖅᑯᓯᕗᑦ ᐃᓕᓐᓂᐊᖅᑎᑦᑎᕗᖅ ᐅᖃᐅᓯᑦᑎᓐᓂᒃ. ᐅᐱᒋᔭᕆᐊᖃᖅᐸᕗᑦ. ᐆᒻᒪᑎᕗᑦ ᓴᙱᑎᑦᑎᐊᕆᐊᖃᖅᑕᕗᑦ, ᐃᓱᒪᕗᓪᓗ ᓴᙱᔫᑎᒋᐊᖃᖅᖢᑎᒍᑦ."

ᐊᓯᐊᒍᓪᓕ, ᓄᑲᑉᐱᐊᑯᓗᒃ ᐊᓈᓇᑦᑎᐊᒥᓂᒃ ᐅᖃᖅᐸᓚᐅᖅᑐᖅ ᐅᓂᒃᑳᒥᓂᒃ ᑐᓴᖅᑕᒥᓂᒃ ᐃᓕᓐᓂᐊᕐᕕᖕᒥ ᐊᒻᒪᓗ ᐆᒻᒪᑎᖓ ᑕᑕᖦᖢᓂ ᖁᕕᐊᓱᒃᖢᓂ ᖃᐅᔨᒪᓪᓗᓂ ᐃᕐᖑᑕᖓ ᐃᓕᓐᓂᐊᖅᑎᑕᐅᖃᑦᑕᕐᓂᖓᓂᒃ ᑕᒪᒃᑯᓂᖓ. ᑕᑯᓯᒪᕗᖅ ᓄᓇᓕᖕᒥᐅᓂᒃ ᐅᑎᖅᑐᓂᒃ ᐃᓕᖅᑯᓯᑐᖃᕐᓄᑦ, ᐃᕿᑦᑎᓪᓗᓂᓗ ᐃᒥᖅᐸᖕᓂᕐᒥᓂᒃ ᒥᑭᒡᓕᒋᐊᖅᑎᑦᑎᓂᕐᒥᒡᓘᓐᓃᑦ, ᑕᒪᒃᑯᐊᓗ ᐃᓕᑦᑎᕙᒃᑐᑦ ᐅᓂᒃᑲᐅᓯᕐᓂᒃ ᐃᓕᓴᐃᓂᕐᒥᒡᓗ ᐊᒥᖅᑳᖃᑎᖃᕈᓐᓇᖅᐸᒃᐳᑦ ᐊᓯᒥᓄᑦ, ᐃᓕᖅᑯᓯᑐᖃᒥᓂᒡᓗ ᑲᔪᓰᓐᓇᖅᑎᑦᑎᓪᓗᑎᒃ. 

ᑭᓱᑭᐊᖅ ᖁᕕᐊᒋᔭᖓ ᐃᓕᖅᑯᓯᖓᑕ ᐃᒡᓚᕐᓂᓕᒫᖓ. "ᐃᓄᐃᑦ, ᐃᒡᓚᕌᖓᑕ, ᐃᔩᒃ ᖃᐅᒪᑐᐃᓐᓇᓲᑦ ᐃᒡᓚᓕᕌᖓᒥᒃᓗ. ᖃᓄᑎᒋ ᓄᓇᕐᔪᐊᖅ ᓂᑲᒍᓱᒃᑲᓗᐊᕈᓂ ᑲᑕᒃᓯᒪᒐᓗᐊᕈᓂᓘᓐᓃᑦ, ᖀᖅᓱᓕᓲᑦ," ᖀᖅᓱᖅᖢᓂ. ᐅᓂᒃᑳᕐᓂᖅ ᐃᒡᓚᕐᓇᕋᔪᒃᐳᖅ ᐅᓂᒃᑳᖅᑎᓄᑦ ᐊᒻᒪ ᖁᙱᐊᕆᐊᖅᓯᒪᔪᓄᑦ ᖁᕕᐊᓱᖕᓇᖅᑐᒻᒪᕆᐅᓪᓗᓂᓗ. 

ᐊᐃᑉᐸᖓᑦᑕᐅᖅ ᖁᕕᐊᒋᑦᑎᐊᖅᑕᖓ ᐅᖃᐅᓯᖅ. "ᐅᖃᐅᓯᕗᑦ ᐱᐅᔪᐊᓘᕗᖅ. ᐱᐅᔪᐊᓘᒻᒪᑦ. ᑕᐃᒪᓐᓇ ᐅᖃᐅᓯᖃᖅᑐᖓ ᐃᒪᓐᓇ, "ᑖᓐᓇ ᓴᖅᑭᒃᑯᑦᑎᒍᑦ ᕿᑐᕐᖓᕗᓪᓗ ᐊᖏᕐᕋᐅᑎᓗᒋᑦ, ᐃᓄᐃᑦ ᓄᓇᓕᖕᓂ ᐊᑐᓯᒋᐊᕐᓂᐊᖅᑐᑦ," ᐅᖃᙳᐊᖅᑐᖅ. ᑕᑯᓚᐅᖅᑐᖅ ᐃᓚᐅᖃᑕᐅᔪᓂᒃ ᐃᓕᓐᓂᐊᕐᕕᐊᕈᓯᖏᓐᓂ ᕿᓂᖅᖢᑎᒃ ᖃᓄᖅ ᐃᓚᐅᖃᑕᐅᔪᓐᓇᕐᒪᖔᑦ ᐅᖃᐅᓯᕐᒧᑦ ᐃᓕᖅᑯᓯᕐᒧᓪᓗ ᐱᓕᕆᓂᕐᒥ ᑭᖑᓂᐊᒍᑦ ᐃᓅᓯᖓᓂ ᐱᑎᑦᑎᓪᓗᓂᓗ ᓂᕆᐅᖕᓂᖓᓂᒃ ᐊᒃᑐᐃᔪᓂᒃ ᐃᓕᓴᐃᔾᔪᑎᒋᔭᖏᓐᓂ.  

ᐊᐃᓖᓐ ᐲᕗ ᐅᖃᐅᔾᔨᖏᓐᓇᐅᔭᖅᑐᖅ ᐃᓄᖕᓂᒃ, "ᐱᕈᖅᓯᐊᕆᔭᕆᐊᖃᖅᑕᑎᑦ ᐱᕈᖅᓯᐊᒃᓴᑎᑦ ᐱᕈᖅᑎᓪᓗᒋᓪᓗ. ᐃᓛᓐᓂᒃᑯᑦ ᑕᑯᓐᓇᖃᑦᑕᕋᕕᑦ ᐊᓯᖏᓐᓂᒃ ᐃᓄᓐᓂᒃ ᐱᕈᖅᐸᓪᓕᐊᔪᓂᒃ ᐊᒻᒪᓗ ᑲᒪᓇᖅᑐᒻᒪᕆᐅᓪᓗᓂ. ᑲᒪᓇᖅᐳᖅ ᐅᖃᐅᓯᖅᐳᑦ ᐆᒪᔫᓂᖓᓂᒃ." ᐊᒥᓱᓂᒃ ᐱᕈᖅᓯᐊᖃᓚᐅᖅᑐᖅ ᐊᒻᒪᓗ ᑕᑯᓪᓗᓂ ᐅᖃᐅᓯᕐᒥᓂᒃ ᐊᒻᒪᓗ ᐃᓕᖅᑯᓯᕐᒥᓂᒃ ᑯᒃᑭᖐᔭᕐᓂᕐᒥᒃ, ᓲᕐᓗ ᐅᑉᐱᕈᓱᓐᓂᖓ ᐃᓅᓱᒃᑐᐃᑦ ᐃᓕᓴᐃᔾᔪᓯᖏᓐᓂᒃ. ᓄᓇᒥ ᐊᒻᒪ ᓄᓇᓕᖓᓂ, ᐃᓂᖃᑦᑎᐊᓕᖅᑐᖅ ᐃᓕᓐᓂᐊᕐᓂᕐᒧᑦ ᐊᒻᒪ ᑲᑎᙵᓂᕐᒧᑦ ᐃᓄᖁᑎᖏᑦ ᐱᕙᓪᓕᐊᖁᓪᓗᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.