"ᒫᓐᓇᓕ ᐃᓯᒐᒐ ᐃᓯᖅᓯᒪᓕᖅᐳᖅ ᑭᒡᒐᖅᑐᐃᔨᐅᔪᓐᓇᓕᖅᖢᖓᓗ ᐃᓄᖁᑎᑦᑎᓐᓄᑦ," ᐅᓃᑕ ᐹᖕᒃᓚᓐ ᐅᖃᓚᐅᖅᐳᖅ. ᐊᒃᓚᕕᖕᒥᐅᒃᓴᔭᐅᔪᖅ ᑭᓯᐊᓂ ᒫᓐᓇ ᐃᓅᕕᖕᒥᐅᑕᐅᓕᖅᑐᖅ, ᓄᓇᑦᑎᐊᕐᒥ. ᐃᖅᑲᓇᐃᔭᖃᑦᑕᖅᓯᒪᕗᖅ ᐃᓐᓇᐃᑦ ᐅᓪᓗᒃᑯᑦ ᐱᓕᕆᐊᒃᓴᖏᓐᓄᑦ ᐊᐅᓚᑦᑎᔨᐅᓪᓗᓂ ᑭᖑᓂᐊᒍᓪᓗ ᐅᑭᐅᖅᑕᖅᑐᒥ ᒐᕙᒪᒋᔭᐅᔪᓄᑦ. ᐃᖅᑲᓇᐃᔭᕈᒪᓕᓚᐅᖅᐳᖅ ᓄᓇᖃᖅᑳᖅᑐᓄᑦ ᑲᑐᔾᔨᖃᑎᒌᓄᑦ ᓇᓂᓯᓪᓗᓂᓗ ᐱᓕᕆᐊᒃᓴᒥᒃ ᐃᑲᔪᕈᓐᓇᖅᑕᒥᓂᒃ ᓇᖕᒥᓂᖅ ᐃᓄᖁᑎᒥᓂᒃ.

20-ᓂᒃ ᐅᑭᐅᖃᓕᖅᑎᓪᓗᒍ, ᐹᖕᒃᓚᓐ ᐃᓕᓐᓂᐊᓚᐅᖅᓯᒪᔪᖅ ᐱᙳᐊᖅᑐᓕᕆᓂᕐᒧᑦ ᓯᕗᓕᖅᑎᐅᓂᕐᒧᑦ ᐃᓕᓐᓂᐊᒐᒃᓴᒥᒃ ᐊᕈᐊᕋ ᓯᓚᑦᑐᖅᓴᕐᕕᖓᓂ, ᐊᕐᕌᒎᖕᓄᑦ ᒪᕐᕉᖕᓄᑦ ᓇᓗᓇᐃᒃᑯᑕᖅᑖᕐᓂᕐᒧᑦ ᐃᓕᓐᓂᐊᒐᒃᓴᖅ. ᖁᕕᐊᒋᔭᖃᓚᐅᖅᑐᖅ ᐱᓕᕆᖃᑎᖃᕐᓂᕐᒥᒃ ᐃᓄᖕᓂᒃ, ᐃᑲᔪᕐᓂᕐᒥᒃ ᐃᓄᖕᓂᒃ ᐊᒻᒪᓗ ᐃᓚᐅᖃᑕᐅᓂᕐᒥᒃ ᖃᓄᐃᓕᐅᕐᓂᐅᔪᓂᒃ. ᑲᑎᒪᔭᖅᑐᖃᑕᐅᓚᐅᖅᖢᓂ ᐊᒻᒪᓗ ᐳᓚᕋᓚᐅᖅᖢᓂ ᐊᔾᔨᒌᙱᑦᑐᓄᑦ ᐃᓂᒋᔭᐅᔪᓄᑦ ᖃᓪᓗᓈᑦ ᓄᓇᖓᓐᓂ, ᐱᔪᒃᓯᓕᓚᐅᖅᑐᖅ ᐱᔨᑦᑎᕋᒃᑲᓐᓂᕐᓂᕐᒥᒃ ᐃᓐᓇᑐᖃᕐᓄᑦ ᐊᖏᕐᕋᖓᓂ ᒥᒃᖠᒋᐊᖅᑎᑦᑎᔪᒪᓪᓗᓂ ᓄᒃᑕᕐᓂᐅᔪᓂᒃ ᐊᒻᒪᓗ ᐅᑕᖅᑭᔭᕆᐊᖃᕐᓂᐅᔪᓂᒃ. ᐃᓐᓇᕐᓄᑦ ᐅᓪᓗᒃᑯᑦ ᐱᓕᕆᐊᒃᓴᓄᑦ ᐊᐅᓚᑦᑎᔨᙳᓚᐅᖅᑐᖅ ᐊᕕᒃᓯᒪᓂᕐᒥ ᐋᓐᓂᐊᕕᖕᒥ, ᐱᓕᕆᐊᒃᓴᖓ ᐃᖅᑲᐅᒪᑦᑎᐊᖅᑕᖓ ᐱᕕᒃᓴᖃᖅᑎᑕᐅᒐᒥ ᐳᓛᕆᐊᕈᓐᓇᕐᓂᕐᒥᒃ ᐊᒻᒪᓗ ᑲᒪᒋᔭᖃᕐᓂᕐᒥᒃ ᐃᓐᓇᕐᓂᒃ ᖃᐅᑕᒫᑦ.

ᑕᐃᒪᙵᓂ ᒪᕐᕉᖕᓂᒃ ᐃᓕᓐᓂᐊᒐᒃᓴᓂᒃ ᐱᐊᓂᒃᓯᓯᒪᓕᖅᐳᖅ ᐹᓐᕝ ᐃᓕᓐᓂᐊᕐᕕᖓᓂ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᐅᓂᕐᒧᑦ ᐊᒻᒪ ᐃᓕᑕᕆᔭᐅᔾᔪᑎᑖᕋᓱᒃᖢᓂ ᑕᐃᑲᙵᑦ. ᐹᖕᒃᓚᓐ ᐱᓚᐅᕆᕗᖅ ᓂᕿᓕᐅᕆᐅᖅᓴᓂᕐᒧᑦ ᐃᓕᑕᕆᔭᐅᔾᔪᑎᑖᖅᓯᒪᓪᓗᓂ NAIT−ᑯᓐᓂ, ᑮᓇᐅᔭᓕᐅᕈᓐᓇᕐᓂᖅᓴᐅᓕᖅᖢᓂ ᓂᕿᓕᐅᖅᑎᐅᓂᕐᒥᒃ ᐱᓕᕆᐊᕆᕙᒃᑕᖓᑕ ᓴᓂᕌᒍᑦ. ᖃᐅᔨᓯᒪᕗᖅ ᓂᕆᔭᖅᑐᕐᕕᒃᓴᖅᑕᖃᑦᑎᐊᙱᓐᓂᖓᓂᒃ ᓄᓇᓕᖓᓂ ᐊᒻᒪ ᓇᓗᓇᐃᖅᓯᒃᑲᓐᓂᖅᖢᓂ ᓂᕿᓕᐅᕈᓐᓇᑦᑎᐊᕐᓂᕐᒥᒃ ᓄᓇᒋᔭᒥᓂ. ᓄᓇᓕᖓᓂ, ᐃᑲᔪᕈᒪᑦᑎᐊᕆᕗᖅ ᑮᓇᐅᔭᓂᒃ ᐱᕈᖅᓴᐃᓇᓱᒃᖢᓂ ᓄᓇᓕᖕᓂ ᑲᑐᔾᔨᖃᑎᒌᓄᑦ ᐊᒻᒪ ᐃᕐᓂᖓᑕ ᐱᙳᐊᖅᑎᖏᓐᓄᑦ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᕿᓂᕆᐊᖅᑐᕐᓗᑎᒃ ᐱᕕᒃᓴᓂᒃ ᐃᒪᓐᓇᐅᕗᖅ, "ᑲᑉᐱᐊᓱᙱᓪᓗᓯ. ᐊᑏ!" ᓇᓗᓇᐃᖅᓯᑦᑎᐊᖅᐳᖅ ᖃᔅᓯᑦ ᐃᓄᖁᑎᖏᑦ ᓇᓂᔭᐅᔪᓐᓇᕐᒪᖔᑕ ᓄᓇᓕᖕᓂ ᓲᕐᓗ ᐃᐊᑦᒪᓐᑕᓐᒥ ᐊᒻᒪ ᑳᓪᒍᕆᒥ ᑕᑯᑎᑦᑎᓇᓱᒃᖢᓂ ᐃᓄᑑᓇᔭᙱᓐᓂᖏᓐᓂᒃ. ᐃᓕᕋᓇᕋᓗᐊᖅᑎᓪᓗᒍ ᐊᖏᕐᕋᕆᔭᒥᓂᒃ ᕿᒪᐃᓗᓂ, ᐹᖕᒃᓚᓐ ᐅᖃᓚᐅᖅᐳᖅ, "ᓄᑖᑦᑎᐊᒧᑦ ᓄᓇᕐᔪᐊᒧᑦ ᐃᓯᕐᓂᐊᖅᐳᑎᑦ ᐱᔭᒃᓴᖃᕐᔪᐊᕐᓇᖅᖢᓂᓗ! ᐱᕕᒃᓴᖅ ᓱᒃᑲᓕᓂᐊᕐᒪᑦ ᖃᐅᔨᕚᓪᓕᕐᓂᐊᖅᐳᓯᓗ." ᐃᖅᑲᐅᒪᕗᖅ ᓄᓇᓕᖕᓂ ᐊᒻᒪ ᐃᑲᔪᖅᓱᐃᓂᐅᔪᒥ ᓇᓂᓯᓚᐅᕐᓂᖓᓂ ᓄᓇᖃᖅᑳᖅᓯᒪᔪᓄᑦ ᐃᑲᔪᖅᓱᐃᓂᐅᔪᒥ NAIT−ᒥ ᐊᒻᒪ ᖃᐅᔨᒪᓪᓗᓂ ᑕᐃᒪᐃᑦᑐᓂ ᐃᑲᔪᕈᑎᒃᓴᓂ ᐊᑐᐃᓐᓇᐅᔪᓂ ᐊᒥᓱᓂ ᐃᓕᓐᓂᐊᕐᕕᖕᓂ ᐃᑲᔪᕐᓂᕐᒧᑦ ᐃᓄᑑᓗᐊᕐᓂᐅᔪᒥ ᐊᒻᒪ ᐊᖏᕐᕋᖅᓯᕐᓂᐅᔪᒥ.

ᐃᓱᒪᒋᓪᓗᒋᑦ ᐊᔪᕐᓇᖅᑐᖅᓯᐅᕈᑎᒋᕙᓚᐅᖅᑕᖏᑦ, ᐊᒃᓱᕉᑎᖃᓚᐅᖅᐳᖅ ᐊᓈᓇᐅᓪᓗᓂ ᒪᒃᑯᒃᑑᓪᓗᓂ ᓲᕐᓗ ᐸᐃᕆᔨᖃᕐᓂᕐᒧᑦ, ᑭᓯᐊᓂ ᓇᓂᓯᓚᐅᖅᐳᖅ ᑲᑐᔾᔨᖃᑎᒌᓂᒃ ᐃᑲᔪᕈᓐᓇᖅᑐᓂᒃ. ᐊᖏᕐᕋᒥ ᐃᓕᓐᓂᐊᕈᑎᒥᓂᒃ ᐱᓕᕆᓪᓗᓂ ᓂᕆᔭᒃᓴᓕᐅᖅᖢᓂ, ᐹᖕᒃᓚᓐ ᖃᐅᑕᒫᑦ ᐱᕕᒃᓴᖃᖅᑎᑦᑎᕙᓚᐅᖅᐳᖅ ᐃᓚᒌᑦ ᑲᑎᙵᖃᑎᒋᓚᐅᖅᖢᓂᒋᑦ. ᐃᓕᑦᑎᕙᓪᓕᐊᓪᓗᓂ ᑭᓱᑦ ᐃᖏᕐᕋᑦᑎᐊᓚᐅᕐᒪᖔᑕ ᐊᒻᒪ ᓇᓕᒧᒌᒃᑎᑦᑎᓇᓱᒃᖢᓂ ᑲᒪᒋᔭᒃᓴᖏᓐᓂᒃ ᐃᑲᔪᓚᐅᕆᕗᖅᑕᐅᖅ. ᑎᓕᐅᕆᕙᒃᐳᖅ ᐊᓯᒥᓂᒃ ᐊᔾᔨᑲᓴᖏᓐᓂᒃ ᐊᒃᓱᕈᕐᓇᖅᑐᒃᑰᖅᑐᓂᒃ ᐃᑲᔪᖅᑕᐅᔪᒪᖃᑦᑕᖁᔨᓪᓗᓂ ᐱᖃᓐᓇᕆᔭᒥᓄᑦ ᐃᓚᒥᓄᓪᓗ.

ᑮᓇᐅᔭᖃᖅᑎᑕᐅᓂᖅ ᐊᒃᓱᕉᑕᐅᓚᐅᕆᕗᖅ ᐹᖕᒃᓚᓐᒧᑦ. ᐃᓕᓐᓂᐊᖅᑎᑦ ᑮᓇᐅᔭᑎᒍᑦ ᐃᑲᔪᖅᑕᐅᕙᖕᓂᖏᑦ ᐊᔪᕐᓇᖅᑐᖅᓯᐅᖅᑎᓪᓗᒋᑦ ᐊᖑᒻᒪᑎᓇᓱᒋᐊᒃᓴᖅ ᐃᒡᓗᖃᖅᑎᑕᐅᓂᕐᒧᑦ, ᐃᒪᓐᓇᐅᖁᔨᕗᖅ, ᐱᕙᒌᔭᖅᓯᒪᕙᒌᖅᐸᒡᓗᑎᒃ ᐊᒻᒪ ᓄᐊᑦᑎᕙᒌᖅᐸᒡᓗᑎᒃ ᐊᒻᒪ ᐱᓇᔪᒃᐸᒡᓗᑎᒃ ᐅᓄᓛᓂᒃ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐃᓕᓐᓂᐊᕈᑎᒃᓴᓂᒃ ᐊᔪᕐᓇᙱᓐᓂᓕᒫᖓᓂ ᑲᔪᓯᑦᑎᐊᕈᓐᓇᖁᓪᓗᑎᑦ.

ᑭᖑᒧᑦ ᑕᐅᑐᒃᖢᒍ ᖃᓄᐃᓕᐅᕋᔭᓚᐅᕐᓂᕐᒥᓂᒃ ᒪᒃᑯᖕᓂᖅᓴᒥᓄᑦ, ᐹᖕᒃᓚᓐ ᐅᖃᓚᐅᖅᐳᖅ ᐊᖓᔪᖅᑳᒥᓂᒃ ᓈᓚᒍᒪᓚᐅᕐᓂᕐᒥᓂᒃ ᒪᑭᑉᐸᖕᓂᖏᓐᓂᒃ ᐊᒻᒪ ᐃᓕᓐᓂᐊᖅᑕᒥᓂᒃ ᐱᐊᓂᒃᓯᓵᓕᖃᑦᑕᕐᓂᕐᒥᒃ, ᖁᕕᐊᓱᓚᐅᙱᓐᓂᕐᒥᓂ ᐱᙳᐊᓚᐅᙱᓐᓂᕐᒥᓂᓗ. ᐅᖃᐅᔾᔭᐅᔪᒪᓇᔭᓚᐅᕐᒥᔪᖅ ᓄᐊᑦᑎᕙᓪᓕᐊᓕᕐᓗᓂ, ᓇᒧᙵᐅᑲᑕᖁᔭᐅᓪᓗᓂ ᓄᓇᕐᔪᐊᓕᒫᒧᑦ, ᐃᓕᓐᓂᐊᕐᓗᓂ ᐊᒻᒪ ᑭᓱᓕᒫᓂᒃ ᐱᓕᕆᖃᑦᑕᖁᔭᐅᓪᓗᓂ.

ᑲᔪᖏᖅᓴᐃᓪᓗᓂ ᖃᓄᐃᓕᐅᖃᑦᑕᖅᑕᒥᓂᒃ ᐃᓕᓐᓂᐊᕐᓂᕐᒥᓂ ᐊᒻᒪ ᐃᖅᑲᓇᐃᔮᒥᓂᒃ, ᐹᖕᒃᓚᓐ ᑎᒃᑯᐊᖅᓯᓪᓗᓂ ᐊᑖᑕᒥᓄᑦ. ᓂᐱᖅᑯᖅᑐᓪᓗᓂ ᑭᒡᒐᖅᑐᐃᔨᐅᓚᐅᖅᐳᖅ ᐃᓚᒋᔭᐅᓪᓗᓂ ᓄᓇᑖᕐᓂᕐᒧᑦ ᐋᔩᖃᑎᒌᖕᓂᐅᔪᒥ. "ᖃᐅᔨᒪᐃᓐᓇᐅᔭᓚᐅᖅᐳᖓ ᓂᐱᒋᔭᐅᕐᔪᐊᕈᒪᓪᓗᖓ ᑖᔅᓱᒥᖓᑎᑐᑦ ᖃᖓᑐᐃᓐᓇᖅ," ᖁᕕᐊᓱᒃᑐᖅ.

ᐃᑲᔪᖅᐸᒃᖢᓂ ᐃᓅᖃᑎᒥᓂᒃ ᖃᐅᑕᒫᑦ, ᐅᓃᑕ ᐹᓐᒃᓚᓐ ᖁᕕᐊᒋᔭᖃᖅᐳᖅ ᐃᖅᑲᓇᐃᔮᒥᓂᒃ ᖁᕕᐊᒋᔭᖃᖅᖢᓂᓗ ᐃᖅᑲᓇᐃᔭᕆᐊᒃᓴᖅ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂ. ᐊᒃᓱᕉᑎᖃᓚᐅᖅᖢᓂ ᐊᓈᓇᐅᓪᓗᓂ, ᓇᓂᓯᓚᐅᖅᐳᖅ ᐃᑲᔫᑎᒃᓴᓂᒃ ᐱᔭᕆᐊᖃᖅᑕᖏᓐᓂᒃ ᐱᕚᓪᓕᕈᑎᒃᓴᓂᒃ ᐊᒻᒪ ᓯᕗᒻᒧᐊᒃᐸᓪᓕᐊᓂᕐᒧᑦ ᐃᖅᑲᓇᐃᔮᒥᓄᑦ. ᒪᓕᒃᖢᓂ ᐊᑖᑕᖓᑕ ᑐᒥᖏᓐᓂᒃ, ᐱᓕᕆᑦᑎᐊᖏᓐᓇᖅᐳᖅ ᓄᓇᓕᖓᓂ ᐊᒻᒪ ᑭᒡᒐᖅᑐᐃᓪᓗᓂ ᕿᒪᒃᑕᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.