ᐃᓕᓯᐊ ᒪᓐᕈ-ᓴᑐᓚᓐ ᐃᓱᒪᒥᓂᒃ ᐃᓱᒪᒥᓂᒃ ᐅᖃᐅᓯᖃᖅᑎᓪᓗᒍ, ᑕᑯᓕᒪᓇᙱᑦᑐᒻᒪᕆᐅᕗᖅ. ᒪᓐᕈ−ᓴᑐᓚᓐ ᓃᔮᓇᐱ ᒥᑎᔅ ᐊᕐᓇᖅ 6-ᒥᙶᖅᑐᖅ ᓄᓇᕗᒻᒥ, ᑭᓯᐊᓂ ᐃᓅᓚᐅᖅᓯᒪᔪᖅ ᐊᒻᒪ ᐃᓅᓯᕆᓪᓗᐊᑕᖅᖢᓂᐅᒃ ᓵᔅᑲᑑᓐ, ᓴᔅᑳᑦᓱᐋᓐᒥ.

ᐱᔭᕇᕋᑖᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐃᓄᓕᕆᔨᐅᓂᕐᒧᑦ ᐱᔭᕇᕈᓯᐊᕐᒥᑦ ᐊᒻᒪ ᐃᓕᓴᕆᔭᐅᔾᔪᑎᑖᖅᑐᓂ ᐋᕿᒋᐊᕈᑎᖃᕐᓂᕐᒧᑦ ᐃᓕᓐᓂᐊᓂᕐᒥᑦ, ᑕᒪᒃᑮᓐᓂᑦ ᓄᓇᖃᖅᑳᖅᓯᒪᔪᑦ ᓯᓚᑦᑐᓴᕐᕕᔾᔪᐊᖓᓂᑦ ᑲᓇᑕᒥ. ᑕᒪᑐᒪ ᖄᖓᒍᑦ, ᓇᖕᒥᓂᖃᕐᒥᔪᖅ ᐊᔾᔨᓕᐅᕆᓂᕐᒥᒃ ᐊᒻᒪ ᑕᕐᕆᔭᐅᓯᐅᕐᓂᕐᒥᒃ ᐊᓈᓇᐅᓪᓗᓂ ᒪᕐᕉᖕᓄᑦ ᐸᓃᖕᓄᑦ.

ᐱᔪᒃᓯᓂᖓ ᐃᖅᑲᓇᐃᔮᕆᓛᕈᒪᔭᒥᓄᑦ ᐱᒋᐊᓚᐅᖅᐳᖅ ᐅᖃᖅᖢᓂ ᓇᒡᓕᒋᓂᕋᖅᖢᓂᐅᒃ ᐃᓅᖃᑎᒥᓄᑦ.

"ᑕᑯᔪᖓ ᐱᐅᓂᖓᓂᒃ ᓴᙱᓂᖃᕐᓂᖓᓂᒃᓗ ᐃᓅᖃᑎᒪ ᓴᐱᓕᖅᓴᕋᐃᙱᓐᓂᖓᓂ, ᓇᖕᒥᓂᖅ ᐅᓂᒃᑳᖏᓐᓂ, ᐃᓅᓯᖏᓐᓂᒃᓗ. ᐱᔪᒃᓯᑎᑦᑎᓪᓚᕆᒃᐳᖓ ᐅᕙᓐᓂ ᐊᒻᒪᓗ ᐃᒃᐱᒍᓱᒃᑐᖓ ᑕᐃᒪᓐᓇᐅᓇᓱᒋᓪᓗᒍ," ᐅᖃᖅᑐᖅ ᒪᓐᕈ−ᓴᑐᓚᓐ.

ᐱᔭᕇᕋᑖᖅᑎᓪᓗᒍ ᐃᖅᑭᓖᑦ ᓯᓚᑦᑐᓴᕐᕕᕐᔪᐊᖓᓂ ᑲᓇᑕᒥ, ᒪᓐᕈ-ᓴᑐᓚᓐ ᐅᖃᖅᑐᓂ ᐊᖏᓂᖅᐹᖅ ᓯᓐᓇᑦᑑᒪᒋᓂᖅᐹᖓ ᑕᕐᕆᔭᓕᐅᕐᓂᕐᒧᑦ ᐃᓕᓐᓂᐊᕐᕕᓕᐊᕐᓗᓂ ᓯᕗᓂᑦᑎᓐᓂ ᑐᑭᒧᐊᑦᑎᑦᓯᔨᕈᕐᓗᓂ.

"ᐃᑉᐱᒍᓱᓚᐅᖅᑐᖓ ᐅᑎᕆᐊᖃᕐᓂᓐᓂᒃ ᐊᒻᒪᓗ ᐊᑐᕈᓐᓇᕋᔭᖅᑕᓐᓂᒃ ᓯᕗᓂᑦᑎᓐᓂ ᐃᑲᔪᕐᓂᐊᕐᓗᒋᑦ ᐃᖅᑲᓇᐃᔮᓐᓂ ᖃᐅᑕᒫᑦ ᐃᓅᓯᓐᓂ ᐊᒻᒪᓗ ᐃᑲᔪᕐᓗᒋᑦ ᐊᓯᒃᑲ ᐊᒻᒪᓗ ᐅᓂᒃᑳᖃᑦᑕᕐᓗᖓ ᐃᓄᖁᑎᓐᓄᑦ," ᐅᖃᖅᑐᖅ ᒪᓐᕈ-ᓴᑐᓚᓐ.

ᑭᓯᐊᓂ ᓲᖃᐃᒻᒪ ᑎᑭᐅᑎᕙᓪᓕᐊᓕᕐᖢᓂ ᒫᓐᓇ ᐊᔪᕐᓇᙱᑦᑐᑯᓘᙱᖦᖢᓂ ᐊᓇᖓᒎᕐᖢᓂ ᑐᓗᕈᑎᒃᑰᕐᖢᓂᓗ.

Munro-Sutherland-ᒧᑦ, ᐊᖏᓛᑦ ᑐᓗᖅᑕᕈᑏᑦ ᐊᒃᓱᕈᕐᓇᕈᑕᐅᓚᐅᖅᐳᑦ ᑭᓇᐅᓂᕐᒧᑦ ᐅᐃᕆᓯᒪᓂᕐᒧᓪᓗ. ᐅᖃᕐᖢᓂ ᐱᒋᐊᓵᖅᑎᓪᓗᒍ ᐃᓅᓯᖓᓂ, ᐊᒃᓱᕈᕐᓇᖅᑐᒃᑰᕐᖢᓂ ᖃᐅᔨᓇᓱᒃᖢᓂᓗ ᖃᓄᖅ 'ᐱᓱᒍᓐᓇᕐᒪᖔᑦ ᒪᕐᕉᖕᓄᑦ ᓄᓇᕐᔪᐊᓄᑦ' ᓇᓕᒧᒌᒃᑎᓐᓇᓱᒃᖢᒋᓪᓗ ᑕᒪᒃᑮ.

ᐅᖃᖅᑐᓂ ᑕᒪᓐᓇ ᐊᓂᒍᖅᑐᒥᓂᐅᓂᕋᖅᑐᓂᐅᒃ, ᐊᒻᒪᓗ 7-ᐸᓂᒃ ᐊᕐᕌᒍᓂᒃ ᐊᓂᒍᓛᖅᑐᓂ ᑕᒫᓂ ᐊᕐᕌᒍᒥ. ᐊᓈᓇᐅᓪᓗᓂ ᐊᖏᔪᒥᒃ ᐊᒃᑐᐃᓂᖃᓚᐅᕐᒥᔪᖅ ᑖᔅᓱᒧᖓ.

"[ᐊᓈᓇᐅᓂᖅ] ᐊᓯᔾᔩᕐᔪᐊᓚᐅᖅᑐᖅ ᐃᓱᒪᒋᔭᓐᓂᒃ. ᑕᐃᒪᓕ ᓱᓕᑦᑎᐊᓕᖅᖢᖓ ᐃᓅᔪᒪᓕᓚᐅᖅᑐᖓ ᐊᒻᒪᓗ ᓱᓕᑦᑎᐊᕐᓗᖓ ᐃᓅᓕᕐᓗᖓ ᐃᓅᓇᓱᐃᓐᓇᐅᔭᖅᑐᖓ," ᐅᖃᖅᑐᖅ ᒪᓐᕈ−ᓴᑐᓚᓐ.

ᐅᖃᕐᖢᓂ ᐊᓱᐃᓛᒃ ᑕᐅᑐᒍᒪᓕᕐᖢᓂᐅᒃ ᐃᓱᒪᒥᓂᒃ ᓇᓂᓯᓕᕐᖢᓂᓗ "ᒪᒥᓴᕐᓂᕐᒥᒃ" ᐃᓗᐊᓂ, ᑕᐃᒪᐃᖦᖢᓂᓗ ᓱᕋᒃᓯᓪᓗᓂ ᐊᑐᖅᑐᒥᒃ ᑭᖑᕚᕇᓄᑦ ᐊᒃᓱᕈᕐᓇᖅᑐᒃᑰᕐᓂᕐᒥᒃ.

"ᐃᓱᒪᓕᐅᖅᑎᓪᓗᑕ ᐱᐅᙱᑦᑐᓂᒃ ᐊᑐᕐᓂᕐᓗᒍᑕᐅᓲᓂᒃ ᖃᐅᔨᒪᓚᐅᖅᑕᒃᑲ ᓄᑕᕋᐅᑎᓪᓗᖓ ᓄᖅᑲᕋᔭᕐᓂᖏᓐᓂᒃ ᐅᕙᓐᓄᑦ. ᐊᓈᓇᐅᖅᑰᔨᔪᖓ, ᑲᒪᒋᔭᒃᓴᕆᒐᒃᑯ ᐸᓂᒃᑲ ᐃᓅᓯᖏᓐᓂᒃ ᐱᔭᕆᐊᖃᕐᓂᖏᓐᓂᒃ ᐊᒻᒪ ᐊᔾᔪᒥᓇᑦᑎᐊᕐᓗᑎᒃ ᐃᓄᖁᑎᓐᓄᑦ, ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᑭᖑᕚᒃᓴᑦᑎᓐᓄᑦ ᐊᒡᒋᖅᑐᓄᑦ," ᐅᖃᓚᐅᖅᐳᖅ ᒪᓐᕈ−ᓴᑐᓚᓐ.

ᐅᖃᐅᔾᔪᐃᓂᕐᒧᑦ ᐃᓄᖕᓄᑦ ᐃᓱᒪᔪᓄᑦ ᕿᒪᐃᔪᒪᓪᓗᑎᒃ ᓄᓇᒥᓂᒃ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᖅᑲᓇᐃᔭᕐᓂᕐᒧᓪᓘᓐᓃᑦ, Munro-Sutherland−ᑯᑦ ᐅᖃᖅᐳᑦ ᑲᑉᐱᐊᓱᙱᓐᓂᕐᒥᓂᒃ ᐊᓯᔾᔨᕐᓂᕐᓂᒃ ᓇᓗᙱᑦᑎᐊᕈᒪᓂᕐᒧᓪᓗ ᐋᖅᑭᒃᓱᐃᕙᓪᓕᐊᒐᓗᐊᕐᒪᖔᑕ ᐃᑲᔪᖅᑐᐃᓂᕐᒧᑦ ᐊᑐᖅᑕᐅᕙᒃᑐᒥᒃ.

ᐅᖃᕆᓪᓗᓂᓗ ᐊᑐᖃᑦᑕᕐᓂᕋᖅᖢᓂ ᐊᑐᒐᒃᓴᓂᒃ ᐱᓕᕆᐊᒃᓴᓂᒡᓗ ᑕᐃᑲᓂ "ᑲᔪᓯᑦᑎᐊᖁᓪᓗᑎᑦ," ᐃᓚᐅᖃᑕᐅᓕᕐᓗᑎᓪᓗ ᓄᓇᓕᖕᒥ ᐱᒋᐊᕐᓗᑎᒃᓗ ᑲᓲᑎᓂᕐᒥᒃ.

"ᐃᓘᓐᓇᑎᒃ ᐱᔾᔪᑎᖃᖅᑐᐃᓐᓇᐅᖅᑰᔨᖕᒪᑕ. ᑭᒃᑯᓕᒫᑦᑎᐊᑦ ᐊᑑᑎᖃᖅᐳᑦ ᐊᒻᒪᓗ ᐱᓕᕆᑦᑎᐊᕋᓱᒋᐊᖃᖅᖢᑎᑦ ᓄᓇᕐᔪᐊᓕᒫᒥᑦ," ᒪᓐᕈ−ᓴᑐᓚᓐ ᐅᖃᖅᑐᖅ.

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.

ᔫᓂ 2022−ᒥ ᓄᑖᙳᕆᐊᖅᓯᒪᔪᖅ: ᒫᓐᓇ, ᐃᓕᓯᐊ ᐃᓕᓐᓂᐊᖅᑐᖅ ᐊᐃᑉᐸᖓᓂ ᐃᓕᑕᕆᔭᐅᔾᔪᑎᑖᖅᖢᓂ (BEd) ᐊᓪᓚᐃᑦ ᐃᓕᓴᐃᔨᙳᕆᐅᖅᓴᔪᑦ ᓯᓚᑦᑐᖅᓴᕐᕕᒡᔪᐊᕐᒥ ᓴᔅᑳᑦᓱᐋᓐᒥ ᐅᐱᒍᓱᒃᖢᑎᒡᓗ ᐅᑭᐅᓄᑦ 8-ᓄᑦ 2022-ᒥ ᐱᒋᐊᖅᖢᓂ.