"ᖃᐅᔨᒪᐃᓐᓇᐅᔭᖅᑐᖓ ᑎᑎᕋᖅᑎᐅᓂᐊᕐᓂᓐᓂᒃ. ᖃᐅᔨᒪᓚᐅᖏᑦᑐᖓ ᖃᓄᐃᓕᖓᓂᐊᕐᒪᖔᖅ," ᒨᓯ ᐃᒪᓕ ᓗᐊᕋᓐᑦ ᕼᐃᐊᓐᑐᓴᓐ, ᐊᑯᑭᑦᑐᕐᒥ ᐃᓄᒃ ᑎᑎᕋᖅᑎᐅᔪᖅ, ᐱᕙᓪᓕᐊᔪᓕᕆᔨ ᐊᒻᒪᓗ ᐃᓕᖅᑯᓯᓕᕆᔨ ᑐᕌᓐᑐᒦᑦᑐᖅ. ᐱᓕᕆᖃᑎᖃᖃᑦᑕᖅᓯᒪᕗᖅ ᓴᓇᙳᐊᕐᓂᕐᒧᑦ ᑭᒡᒐᖅᑐᐃᓂᕐᒧᑦ ᑲᑐᔾᔨᖃᑎᒌᓂᒃ ᐃᖅᑲᓇᐃᔭᖅᑎᓪᓗᒍ ᑭᓯᐊᓂ ᐃᒻᒥᓂᒃ ᐃᓱᒪᒋᔭᖃᖅᖢᓂ ᓯᕗᓪᓕᖅᐸᐅᓪᓗᓂ ᑎᑎᕋᖅᑎᐅᓯᒪᓪᓗᓂᓗ. ᐊᑕᐅᓯᐊᕐᖢᓂ, ᓂᔾᔭᐅᑎᑖᕐᖢᓂ ᓂᔾᔭᐅᑎᖦᖢᓂᓗ ᑕᐅᑐᒃᓗᓂ ᓴᓇᙳᐊᕐᓂᕐᒥᒃ. ᐊᑖᑕᖓ ᓴᓇᙳᐊᖅᑎᐅᔪᖅ ᐊᒻᒪᓗ ᑕᑯᒥᓴᐅᑎᓂᒃ ᓴᓇᓯᒪᔪᖅ ᐊᒻᒪᓗ ᓴᓇᐅᒐᖏᑦ ᐃᓅᓯᖓᑕ ᐃᓚᒋᒻᒪᒋᑦ.

ᕼᐃᐊᓐᑐᓴᓐ ᑎᑎᕋᖃᑦᑕᖅᓯᒪᔪᖅ ᒪᒃᑯᒃᑑᓚᐅᖅᑎᓪᓗᒍ ᐊᒻᒪᓗ ᐃᖅᑲᓇᐃᔮᖅᑖᖅᐸᓪᓕᐊᓕᖅᖢᓂ ᐊᕐᕌᓂ UBC-ᑯᓐᓂ.  ᐃᓕᖅᑯᓯᓕᕆᔨ, ᐃᓕᖅᑯᓯᓕᕆᔨᑦ ᐃᓕᓐᓂᐊᖅᑎᑦ ᑲᑐᔾᔨᖃᑎᒌᑦ ᐃᓕᓐᓂᐊᖅᑕᐅᔪᓂᒃ ᐅᖃᓕᒫᒐᒃᓴᖏᓐᓂᒃ, ᕼᐃᐊᓐᑐᓴᓐ ᐋᖅᑭᒃᓱᐃᔨᐅᓚᐅᖅᐳᖅ ᐊᒻᒪ ᑎᑎᕋᖅᖢᓂ. ᐱᓇᓱᐊᖃᑕᐅᓚᐅᖅᑐᖅ ᑎᑎᕋᖅᑎᐅᓂᕐᒧᑦ ᐃᓄᐃᑦ ᓴᓇᐅᒐᖏᓐᓂᑦ ᐊᕐᕌᒍ ᑎᓴᒪᐃᕋᕐᓗᒍ, ᑕᐃᑲᓂᓗ ᐃᖅᑲᓇᐃᔭᖃᑦᑕᖅᓯᒪᓪᓗᓂ ᐃᓕᓐᓂᐊᖅᑎᐅᓪᓗᓂ, ᐊᐱᖅᓱᖅᑐᓂ ᓴᓇᙳᐊᖅᑎᓂᑦ ᐊᒻᒪ ᐱᓕᕆᖃᑎᖃᖅᑐᓂ ᐱᓕᕆᓕᒪᔪᓂᑦ ᑎᑎᕋᖅᑎᓂᑦ. ᒫᓐᓇ, ᐱᓕᕆᖃᑎᖃᖅᐸᓕᖅᑐᖅ ᓄᓇᖃᖅᑳᖅᓯᒪᔪᑦ ᐃᓕᓴᕐᕕᖓᓂ ᑲᑐᔾᔨᖃᑎᒌᓂᑦ, ᐱᔨᑦᑎᖅᑐᖅ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᑦ, ᓴᓇᙳᐊᖅᑎᓂᑦ ᐊᒻᒪ ᓴᓇᙳᐊᖅᑎᓂᑦ ᑲᓇᑕᓕᒫᒥᑦ ᐃᓛᒃᑰᖓᓪᓗᓂ ᑎᑎᕋᕈᓐᓇᓂᕐᒥᑦ.

"ᖃᐅᔨᐃᓐᓇᐅᔭᖅᑐᖓ ᑎᑎᕋᕐᓂᖅ ᓴᙱᓛᖑᓂᖓᓂᒃ ᐅᕙᓐᓂᒃ ᐅᖃᐅᓯᕆᔪᓐᓇᖅᑕᓐᓂᒃ ᐅᖃᐅᓯᕆᓗᖓᓗ."

ᓇᖕᒥᓂᖅ, ᕼᐃᐊᓐᑐᓴᓐ ᐃᓚᐅᖃᑕᐅᔪᖅ ᓴᓇᑐᓂᕐᒥᒃ ᑎᑎᕋᕐᓂᕐᒥᒃ ᐊᒻᒪᓗ ᑎᑎᖅᑐᒐᕐᓂᕐᒥᒃ ᐱᓕᕆᔨᒻᒪᕆᐅᓪᓗᓂ ᑎᑎᕋᖃᑦᑕᖅᑎᓪᓗᒍ ᓴᓇᙳᐊᕐᓂᕐᒥᒃ ᐊᒻᒪᓗ ᐃᓕᖅᑯᓯᓕᕆᓂᕐᒥᒃ, ᐊᐱᖅᓱᕐᓂᕐᒥᒃ ᐊᒻᒪᓗ ᐅᖃᑦᑎᐊᕈᓐᓇᕐᓂᕐᒥᒃ. "ᑕᒪᓐᓇ ᐅᖃᐅᓯᕆᓪᓚᕆᓚᐅᖅᑕᕋ. ᑎᑎᕋᖅᑐᖓ ᐱᓗᐊᖅᑐᒥᒃ ᓴᓇᙳᐊᖅᑎᓂᒃ, ᐊᒻᒪᓗ ᓴᓇᐅᒐᕐᓂᒃ, ᓄᓇᖃᖅᑳᖅᓯᒪᔪᑦ ᓴᓇᐅᒐᖏᑦ, ᐅᓪᓗᒥᓕᓴᐅᔪᑦ ᓄᓇᖃᖅᑳᖅᓯᒪᔪᑦ ᓴᓇᓯᒪᔭᖏᑦ, ᑕᒪᓐᓇ ᐃᓱᒪᒋᒐᒃᑯ ᐱᕈᖅᓯᒪᑦᑎᐊᕋᒪ ᐱᕈᖅᓴᓪᓗᖓ ᐊᒻᒪᓗ ᖁᕕᐊᒋᓪᓚᕆᑦᑕᓐᓂᒃ, ᓇᒻᒥᓂᖅ ᖃᐅᔨᒪᓂᒃᑯᑦ ᐊᒻᒪᓗ ᐃᓅᓯᒃᑯᑦ, ᑲᑎᑐᐃᓐᓇᐸᒻᒪᑕ ᐱᐅᔪᐊᓘᓪᓗᑎᒃ," ᒪᓂᒪᑎᑦᓯᔪᖅ.

ᐱᔭᕇᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑕᖓ ᖃᓪᓗᓈᑦ ᓄᓇᖓᓐᓂ ᐳᕆᑎᔅ ᑲᓚᒻᐱᐊᒥ, ᕼᐃᐊᓐᑐᓴᓐ UBC-ᒨᓚᐅᖅᑐᖅ. ᐊᕐᕌᒍᓄᑦ ᑕᓪᓕᒪᓄᑦ ᐊᕝᕙᖓᓄᓪᓗ ᐱᔭᕇᖅᓯᓇᓱᓚᐅᖅᑐᖅ ᐃᓕᓐᓂᐊᕇᖅᓯᒪᓂᕐᒧᑦ ᐃᓕᓐᓂᐊᕌᓂᒍᓯᐊᕐᒥᑦ, ᓄᖅᑲᖓᓪᓗᓂ ᓇᖕᒥᓂᖅ ᐱᔾᔪᑎᓄᑦ ᐊᓯᔾᔨᖅᖢᒍᓗ ᐃᓱᒪᖓ ᖃᓄᐃᓕᐅᕈᒪᖕᒪᖔᑦ. ᓯᕗᓪᓕᕐᒥ, ᐃᓱᒪᓚᐅᖅᑐᖅ ᑎᑕᒃᑎᐅᓂᐊᕋᓱᒋᓪᓗᓂ ᐃᓕᓐᓂᐊᖅᑎᓪᓗᒍ ᓂᐱᒥᒃ ᐱᕈᖅᐸᓪᓕᐊᓪᓗᓂ. ᐊᒃᓱᕈᓚᐅᖅᑐᖅ ᓯᕗᓪᓕᖅᐹᒥ ᐊᕐᕌᒍᒥ ᓯᓚᑦᑐᖅᓴᕐᕕᒡᔪᐊᒥ ᐊᒻᒪᓗ ᐊᐅᓪᓚᑲᓴᒃᖢᓂ ᑭᓯᐊᓂ ᓴᐅᓂᓕᕆᔨᙳᖔᓕᓚᐅᖅᑐᖅ. ᓅᑎᑕᒃᓴᐅᔪᑦ ᐊᔪᙱᓐᓂᕐᓂ ᐱᒻᒪᕆᐅᓚᐅᖅᑐᑦ ᐃᓕᓐᓂᐊᕐᕕᖓᑕᓗ ᐊᑐᕐᓂᑯᖏᓐᓂ ᐋᖅᑭᒃᓯᓪᓗᓂ.

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᒪᓐᓇᐅᔪᖅ, "ᑲᑉᐱᐊᓱᒃᑕᐃᓕᒋᑦ ᐊᕕᒃᑐᐃᔭᕆᐊᒃᓴᖅ ᐆᒃᑐᕐᓗᓂᓗ, ᓈᒻᒪᓗᐊᖅᑰᔨᙱᒃᑲᓗᐊᖅᐸᑕ ᖃᓄᐃᓕᐅᕈᒪᔭᕐᓄᑦ, ᐅᕝᕙᓘᓐᓃᑦ ᖃᓄᐃᓕᐅᕈᒪᖕᒪᖔᖅᐱᑦ."

ᕼᐃᐊᓐᑐᓴᓐ ᖁᕕᐊᒋᔭᖃᓚᐅᖅᑐᖅ ᓂᔾᔭᐅᓯᔭᕐᓂᕐᒥᑦ, ᓯᕗᓕᖅᑎᐅᓪᓗᓂ UBC−ᑯᑦ ᐃᓕᖅᑯᓯᖃᖃᑎᒌᙱᑦᑐᓄᑦ ᐃᓕᓐᓂᐊᖅᑎᓄᑦ ᑲᑐᔾᔨᖃᑎᒌᓄᑦ, ᓄᓇᖃᖅᑳᖅᑐᓄᑦ ᓯᕗᓕᖅᑎᐅᓂᕐᒧᑦ ᑲᑐᔾᔨᖃᑎᒌᓐᓂᕐᒧᑦ, podcasing, ballroom ᒧᒥᕐᓂᖅ, ᐊᒻᒪᓗ ᐱᓕᕆᖃᑎᒌᓐᓂᕐᒥᑦ. ᐃᖅᑲᓇᐃᔭᓚᐅᖅᓯᒪᔪᖅ ᑕᑯᔭᒐᖃᕐᕕᖕᒥ ᐃᑦᑕᕐᓂᓴᓕᕆᔨᓄᑦ ᑕᑯᔭᒐᖃᕐᕕᖕᒥ ᐃᑲᔪᖅᑎᐅᓪᓗᓂ ᐊᒻᒪ ᐃᖅᑲᖅᑐᐃᕕᒃᑰᖅᑎᑕᐅᓪᓗᓂ ᓄᓇᖃᖅᑳᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥᐅᓂᒃ. ᐱᕕᒃᓴᒃᑲᓐᓂᕐᓗ ᕼᐃᐊᓐᑐᓴᓐ ᐃᓚᐅᖃᑕᐅᓚᐅᕐᒥᔪᖅ Concordia ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᐅᔪᓂᒃ ᑕᐃᔭᐅᓪᓗᓂ ᐃᓄᐃᑦ ᓯᕗᓂᒃᓴᖏᑦ ᓴᓇᐅᒐᕐᓂᒃ ᓯᕗᓕᖅᑎᐅᓂᕐᒥᒃ, ᐊᐅᓚᑕᐅᓪᓗᓂ ᐃᓄᒃᑐᑦ ᓴᓇᐅᒐᕐᓂᒃ ᐃᓕᓴᐃᔨᒻᒪᕆᖕᒧᑦ ᓘᒃᑖᖅ ᕼᐃᐊᑐ ᐃᒡᓗᓕᐊᑦ ᐃᓕᓐᓂᐊᖅᑎᑕᐅᓪᓗᓂ, Venice-ᒧᑦ ᐊᐅᓪᓚᖅᖢᓂ, ᑎᑎᕋᖅᖢᓂᓗ ᐃᓄᐃᑦ ᓴᓇᐅᒐᖏᓐᓂᒃ ᐊᕐᕌᒍᒥ ᑎᓴᒪᐃᖅᓱᖅᖢᓂ.

ᐃᓕᓐᓂᐊᖅᑏᑦ ᐃᓱᒪᒃᐸᑕ ᓄᓇᒥᓂᒃ ᐊᐅᓪᓚᕈᒪᓪᓗᑎᒃ, Hᐊᓐᑐᓴᓐ ᖃᐅᔨᓴᖁᔨᕗᖅ ᓄᓇᓕᖕᓂ ᐃᓂᒋᔭᐅᓂᐊᖅᑐᓂᒃ ᓯᕗᓂᐊᒍᑦ. ᓅᓐᓂᖅ ᓄᓇᓕᕋᓛᖑᔪᒥᑦ ᓄᓇᓕᐸᐅᔭᕐᒧᑦ ᖁᐊᖅᓵᓇᒻᒪᕆᓚᐅᖅᑐᖅ, ᖃᐅᔨᒪᓐᓇᓂ ᖃᓄᖅ ᐃᖏᕐᕋᒍᓐᓇᓂᕐᒥᑦ ᐅᕝᕙᓘᓐᓃᑦ ᖃᓄᖅ ᐃᖏᕐᕋᒍᓐᓇᓂᕐᒥᑦ ᓄᓇᓕᐸᐅᔭᒥᑦ. ᐃᓚᒥᓂᒃ ᐱᖃᓐᓇᕆᔭᒥᓂᒡᓗ ᕿᒪᒃᓯᓪᓗᓂ, ᐊᒃᓱᕈᓚᐅᖅᑐᖅ. ᑐᕌᓐᑐᒧᑦ ᓅᒻᒪᑦ, ᖃᐅᔨᓴᓚᐅᖅᑐᖅ ᐊᒻᒪᓗ ᑕᒪᓐᓇ ᐊᒃᓱᐊᓗᒃ ᐃᑲᔪᕐᓂᖃᓚᐅᖅᑐᖅ. ᑲᑎᒪᔨᐅᖃᑕᐅᔪᖅ ᑐᕌᓐᑐ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᓴᓐᖏᔪᒥᒃ ᐃᓕᖅᑯᓯᓕᕆᓂᕐᒧᑦ ᓄᓇᖃᖅᑐᓂ ᐃᓚᒋᔭᐅᖃᑕᐅᓪᓗᓂ.

ᐃᓱᒪᓪᓗᓂ ᑐᓗᖅᑕᕈᑎᓂᒃ ᓵᑦᑎᐊᕐᒥᐅᑕᕆᖃᑦᑕᓚᐅᖅᑕᖓᓂᒃ, ᕼᐃᐊᓐᑐᓴᓐ ᐊᒃᓱᕈᖅᖢᓂ ᐃᓕᓐᓂᐊᖅᖢᓂ ᓄᑕᐅᙱᓗᐊᓕᖅᑐᓂᒃ ᐃᓕᖅᑯᓯᖃᖅᖢᓂ ᐃᓕᓐᓂᐊᖃᑎᒥᓂᒃ ᐃᓕᓴᐃᔨᓂᒡᓗ. ᐃᓛᓐᓂᒃᑯᑦ, ᐃᓱᒫᓘᑎᖃᖃᑦᑕᖅᑐᖅ ᓈᒻᒪᑦᓯᖏᓐᓂᕐᒥᑦ ᓯᑯᒥᑦ ᑕᕆᐅᕐᒥᑦ ᐊᕕᑦᑐᖅᓯᒪᔪᓂᑦ ᐃᓚᖏᓪᓗ ᐃᓗᓕᖏᑦ ᖃᐅᔨᓯᒪᔭᖏᑦ ᐃᓕᖅᑯᓯᓕᕆᓂᕐᒥᑦ ᐊᑲᐅᑦᓴᖃᑦᑕᖏᓐᓂᕐᒥᑦ. ᐃᓚᖏᑦ ᐱᓕᕆᓪᓗᒋᑦ ᐊᒃᓱᕈᕐᓇᓚᐅᖅᐳᖅ, ᐊᓯᔾᔨᖅᑕᖅᑐᓂᒃ ᑲᒪᒋᔭᖃᖅᖢᓂ ᐊᒻᒪ ᐊᔪᕐᓇᖅᑐᖅᓯᐅᕐᓇᖅᖢᓂ ᐃᓕᓐᓂᐊᖅᑎᐅᓪᓗᓂ. ᐃᓕᑉᐸᓪᓕᐊᓂᖅ ᐱᔭᕆᐊᑐᓚᐅᖅᑐᖅ ᐅᐱᓐᓇᕋᓂ ᐃᒻᒥᓐᓅᖓᔪᑦ.

ᑭᖑᒧᑦ ᑕᑯᓪᓗᓂ ᐊᑐᖅᓯᒪᔭᒥᓂᒃ Hᐊᓐᑐᓴᓐᒥᒃ ᐊᒃᑐᐊᓂᖃᖅᐳᖅ, "ᓂᕆᐅᒋᔭᖃᕐᕕᐅᕗᖅ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᓄᓇᖃᖅᑳᖅᑐᓄᓪᓗ ᐃᖅᑲᓇᐃᔭᖅᑎᓄᑦ ᖄᒃᑲᓐᓂᐊᒎᕐᓗᑎᒃ ᐅᖓᑖᓄᓪᓗ, ᑭᓱᓂᒃ ᖃᐅᔨᒪᓂᕆᔭᑦᑎᓐᓂᒃ ᐱᑎᑦᑎᕙᖕᒪᖔᑦᑕ, ᖃᓄᕐᓗ ᐃᒃᐱᒋᔭᖃᕐᓂᕐᒧᑦ ᐃᖅᑲᓇᐃᔭᖅᑎᖃᖅᐸᖕᒪᖔᑦᑕ. ᐊᒻᒪᓗ ᐅᖃᐃᓐᓇᖃᑦᑕᖅᑐᖓ, ᐊᒻᒪᓗ ᐃᓅᓱᒃᑐᐃᑦ ᖃᐅᔨᒪᑦᑎᐊᖁᕙᒃᑲ ᐊᒻᒪᓗ ᖃᐅᔨᒪᖁᓪᓗᒋᑦ ᐃᖅᑲᓇᐃᔮᕆᙱᓐᓇᕕᐅᒃ, ᒥᑭᓪᓕᑎᕆᓂᖅ ᑭᓇᑐᐃᓐᓇᐅᑉ ᐱᓕᕆᕕᖓᓂᒃ." ᐃᖅᑲᐅᒪᔪᖅ ᐊᐱᕆᔭᐅᓪᓗᓂ ᐅᖃᓪᓚᖁᔭᐅᓪᓗᓂ ᖃᓄᑐᐃᓐᓇᖅ ᓯᓚᑖᓃᓪᓗᓂ ᐊᔪᙱᓐᓂᖓᑕ, ᓵᖓᓗᓂ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ ᑕᐅᑐᒃᑕᐅᓪᓗᓂᓗ ᓄᓇᖃᖅᑳᖅᓯᒪᔪᑦ ᑕᐅᑐᒃᑕᖓᒍᑦ. ᐅᖃᐅᓯᖃᖅᑐᖅ ᒪᒃᑯᒃᑐᓂᑦ, "ᐱᓕᕆᐊᕆᙱᑕᐃᑦ ᐅᖃᓪᓚᒃᑎᐅᓗᑎᑦ, ᓄᓇᖃᖅᑳᖅᓯᒪᔪᑐᐊᓄᑦ ᓂᐱᑐᐊᖑᓗᓂ, ᓄᓇᖃᖅᑳᖅᓯᒪᔪᑐᐊᓄᑦ ᑕᐅᑐᒃᑕᐅᓗᓂ. ᓂᐱᒃᑭᐅᒐᑦᑕ. ᓂᕆᐅᒋᔭᐅᔪᓐᓇᑐᐃᓐᓇᖅᑐᑎᑦ ᐅᓂᒃᑳᕐᓂᐊᖅᑎᓪᓗᑎᑦ ᓇᖕᒥᓂᖅ. ᓈᒻᒪᙱᒻᒪᑦ ᐃᓕᖕᓂ ᓂᕆᐅᒋᐊᒃᓴᖅ ᐅᓂᒃᑳᕆᐊᒃᓴᖅ ᐃᓄᓕᒫᓄᑦ."

Hᐊᓐᑐᓴᓐ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᖕᒥᓂᒃ, "ᑲᑉᐱᐊᓱᒃᑕᐃᓕᒋᑦ ᕿᓂᕆᐊᒃᓴᖅ ᑲᔪᖏᖅᓴᐃᔨᒃᓴᓂᑦ." ᓇᓂᓯᓪᓗᓂ ᑲᔪᖏᖅᓴᐃᔪᓕᕆᓂᕐᒥᑦ ᐃᖅᑲᓇᐃᔭᓕᓵᖅᑎᓪᓗᒍ ᐊᒻᒪ ᓯᓚᑦᑐᖅᓴᕐᕕᖕᒥ ᐊᓯᔾᔨᕈᓐᓇᕐᓂᖓᓄᑦ. ᑎᓕᐅᕆᓇᔭᕐᒥᔪᖅ ᐃᖕᒥᓂᒃ ᒪᓕᖁᙱᖦᖢᒍ ᖃᓄᑐᐃᓐᓇᖅ ᖃᖓᒃᑰᕐᓂᐊᕐᓂᖏᓐᓂᒃ ᐃᓕᓐᓂᐊᕐᓂᕐᒧᑦ ᐃᖅᑲᓇᐃᔮᒧᓪᓗ. ᕿᒥᕐᕈᓂᖅ ᐊᔾᔨᒌᖏᑦᑐᓂᒃ ᐃᖅᑲᓇᐃᔭᕐᕕᖕᓂ ᐱᓕᕆᖃᑎᒌᓂᒡᓗ ᑕᑯᑎᓪᓗᒍ ᐊᔪᕐᓇᙱᑐᐃᓐᓇᕆᐊᓕᖕᓂᒃ. ᓴᓇᙳᐊᕐᓂᕐᒧᑦ ᑭᒡᒐᖅᑐᐃᓂᖅ, ᐃᓱᒪᖅᓱᕐᓗᓂ ᑎᑎᕋᕐᓂᖅ, ᐊᒻᒪ ᓴᓇᙳᐊᕐᓂᕐᒧᑦ ᓯᕗᓕᖅᑎᐅᓂᖅ, ᐱᕈᖅᐸᓪᓕᐊᑎᑦᑎᔪᖅ ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ ᖁᕕᐊᓱᒍᑎᒋᔭᒥᓂᒃ ᐊᒻᒪ ᖃᐅᔨᒪᓇᔭᙱᖦᖢᓂ ᒪᒃᑯᖕᓂᖅᓴᐅᓂᖓᓂᒃ. ᐅᖃᖅᖢᓂ ᒪᒃᑯᒃᑐᑦ ᕿᓂᖃᑦᑕᖁᔨᓪᓗᑎᒃ ᐱᓕᕆᔨᒻᒪᕆᖕᓂᑦ ᖃᓄᐃᓕᐅᕈᒪᖕᒪᖔᖏᓐᓂᑦ ᖃᐅᔨᓇᓱᒡᓗᑎᒡᓗ ᖃᓄᖅ ᑕᐅᕗᙵᓚᐅᖕᒪᖔᖏᓐᓂᑦ. ᐱᓗᐊᖅᑐᒥᑦ, ᐅᒃᑯᐃᖓᖁᔨᕗᖅ ᕿᓂᕐᓗᓂᓗ ᐊᔪᕐᓇᙱᑐᐃᓐᓇᕆᐊᓕᖕᓂᑦ.  

ᓄᓇᓕᖕᓂ ᐱᕈᖅᐸᓪᓕᐊᔪᖃᖅᐸᓪᓕᐊᑎᓪᓗᒍ, ᐅᓪᓗᕆᓕᓵᖅᑕᖏᓐᓂ ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᑎᓪᓗᒍ ᐊᒃᓱᕈᕐᓇᖅᑐᒻᒪᕆᐅᓚᐅᖅᐳᖅ ᑖᔅᓱᒧᖓ, ᑭᓯᐊᓂ Hᐊᓐᑐᓴᓐ ᐊᒃᑐᐊᓂᖃᐃᓐᓇᓚᐅᖅᐳᖅ ᖃᕆᑕᐅᔭᒃᑯᑦ. ᑎᑎᕋᓚᐅᖅᑐᖅ ᐃᓄᑑᓪᓗᓂ ᐋᖅᑭᒃᓯᓪᓗᓂᓗ ᐃᓱᒪᒃᓴᖅᓯᐅᕈᓐᓇᑦᑎᐊᖅᑐᓄᑦ ᐱᓕᕆᐊᒃᓴᓄᑦ. ᓯᓚᒦᖃᑦᑕᕐᖢᓂ ᖃᐅᔨᒪᐃᓐᓇᕐᖢᓂᓗ ᐃᒃᐱᖕᓂᐊᓂᖏᓐᓂ ᕿᐊᑲᑕᖕᓂᕐᓂ ᐱᔭᕆᐊᖃᕌᖓᒥ.

ᑲᔪᖏᖅᓴᐃᓂᕐᒧᑦ, ᕼᐃᐊᓐᑐᓴᓐ ᑕᐅᑐᑦᑐᖅ ᐱᓕᕆᖃᑎᒌᓐᓂᕐᒥᑦ ᓴᓇᙳᐊᕐᓂᕐᒧᑦ ᐱᓕᕆᔨᒻᒪᕆᓐᓂᑦ ᑲᓇᑕᒥ, ᐱᖃᓐᓂᕆᓛᖓᓄᑦ ᓄᓇᓕᓐᓂᑦ ᐃᓄᓐᓄᓪᓗ ᐃᓅᓯᖓᓂᑦ ᐃᓱᒪᒋᔭᖏᓐᓂᑦ. ᓯᕗᓕᕕᓂᒥᓄᑦ ᐱᔪᒃᓯᑎᑕᐅᑦᑎᐊᖅᓯᒪᔪᖅ ᐊᒻᒪ ᑭᖑᕚᒃᓴᑦᑎᓐᓄᑦ. "ᑕᒪᕐᒥᑦᑎᐊᖅ ᐃᓄᖕᓄᑦ ᐃᓕᖅᑯᓯᕐᓄᓪᓗ ᑎᑭᑉᐸᒃᐳᖅ ᐱᕙᒌᔭᖅᖢᓂᓗ ᓯᕗᓂᒃᓴᒧᑦ ᐱᐅᔪᒻᒪᕆᒃᑯᑦ, ᐃᓱᒪᒥᐅᑕᖃᕐᓂᕐᒧᓪᓗ ᖃᓄᐃᓕᐅᒃᑲᓐᓂᕐᓂᐊᓕᕐᓂᕐᒥᓂᒃ," ᑕᐃᒪᓐᓇ ᐱᙳᐊᖅᑎᑦᑎᓕᖅᐸᒃᐳᖅ.

ᒪᑐᕙᓪᓕᐊᓕᖅᑎᓪᓗᒍ Hᐊᓐᑐᓴᓐ ᐅᖃᐅᓯᖃᖅᑐᖅ ᖃᓄᖅ ᐅᖃᕐᒪᖔᕐᒥ, "ᐊᔾᔨᐅᖏᑦᑐᒥᒃ ᐃᓅᓯᖃᕐᓂᖅ ᐊᔾᔨᐅᖏᑦᑐᒥᒃ ᐊᐅᓚᓂᖃᕆᐊᖃᒻᒪᑦ ᐊᒻᒪᓗ ᐅᕙᑦᑎᓐᓂᒃ ᐅᑉᐱᕐᓂᖃᕆᐊᖃᑦᑐᓂ." ᑭᖑᒧᑦ ᑕᑯᓪᓗᓂ 7-ᓂᒃ ᐊᕐᕌᒍᓂᒃ ᐃᓕᓐᓂᐊᕐᕕᕐᔪᐊᕐᒥᑦ, ᑕᐸᐃᖅᓯᒪᔪᖅ. ᐅᒃᐱᕆᓪᓗᒍ ᐱᕙᓪᓕᐊᓂᖓ ᓇᓗᓇᖅᑐᒃᑰᖅᑎᓪᓗᑕ ᓴᖅᑭᑎᑦᑎᓯᒪᔪᖅ ᐊᑐᕐᓂᑯᖏᓐᓂ, ᓇᓂᓯᓪᓗᓂ ᓴᙱᓂᖓᓂᒃ, ᓂᐱᖓᓂᒃ ᐱᔪᓐᓇᕐᓂᖓᓂᒃᓗ ᐋᖅᑭᒃᓯᒪᐃᓐᓇᖅᑎᓪᓗᒍ ᑕᐅᑐᒃᑕᖓ. ᐃᓕᑦᑎᓃᑦ ᐊᓐᓇᒍᓐᓇᕐᓂᕐᒥᒃ, ᒪᓂᖅᑲᒥ ᑎᒍᒥᐊᕐᓂᖅ, ᖁᕕᐊᓲᑎᖃᕐᓂᖅ, ᖁᕕᐊᓱᖕᓂᖅ, ᓄᓇᓕᒃ ᐊᒻᒪ ᐊᐃᑉᐸᕇᖕᓂᖅ ᖃᐅᔨᓪᓗᓂ ᐅᓄᖅᑐᓂᒃ ᐊᒃᓱᕈᕐᓇᖅᑐᓂᒃ.

ᖃᐅᔨᒪᐃᓐᓇᖅᐸᓚᐅᖅᑐᖅ ᑎᑎᕋᖅᑎᐅᓂᐊᕐᓂᕐᒥᓂᒃ, ᑭᓯᐊᓂ ᖃᐅᔨᒪᓚᐅᙱᒻᒪᑦ ᖃᓄᖅ ᑕᐅᑦᑐᖃᕐᓂᐊᕐᒪᖔᖅ. ᐃᒪᓕ ᕼᐃᐊᓐᑐᓴᓐ ᑎᑎᕋᖃᑦᑕᓕᓚᐅᖅᑐᖅ ᐊᕐᓇᑯᓘᓪᓗᓂ ᓄᖅᑲᓚᐅᖅᓯᒪᙱᖦᖢᓂᓗ, ᑎᑎᕋᖅᖢᓂ ᐃᓅᓯᕆᔪᒪᔭᒥᓄᑦ. ᐱᕈᖅᓴᔭᐅᓪᓗᓂ ᓴᓇᐅᒐᕐᓄᑦ, ᐱᕈᖅᐸᓪᓕᐊᔪᖅ ᐃᓚᒋᔭᐅᓪᓗᓂ ᓴᓇᙳᐊᖅᑎᓄᑦ ᓄᓇᓕᖕᓂ ᓇᓂᓯᓪᓗᓂᓗ ᐃᓂᒋᓂᐊᖅᑕᖓᓂᒃ ᑐᑭᓕᐊᖓᔪᒃᑯᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕋᕕᑦ ᑖᔅᓱᒥᖓ ᑎᑎᕋᖅᓯᒪᔪᒥᑦ!