"ᓴᓇᙳᐊᖅᑎᐅᖏᓐᓇᐅᔭᕋᒪ, ᐊᒻᒪ ᐃᓕᖅᑯᓯᕆᙱᖦᖢᒍ ᑕᐃᒪᓐᓇ ᓴᖅᑭᑦᑕᕆᐊᒃᓴᖅ," ᐅᖃᓚᐅᖅᐳᖅ ᐃᐅᕆᑲ ᔮᒃ, ᐃᓅᓪᓗᓂ ᓴᓇᙳᐊᖅᑎ ᐴᔅᕕᐅᓪ, ᓄᓇᑦᓯᐊᕗᒻᒥ. ᐃᓕᓐᓂᐊᖅᑐᖅ ᐱᕈᕐᕕᐅᑉ ᐃᓕᓐᓂᐊᕐᕕᖓᓂ ᐃᖃᓗᖕᓂ ᐊᐅᕐᓂᐊᕐᕕᖕᒥ ᐃᓕᓐᓂᐊᖅᖢᓂ, ᐃᓄᒃᑎᑐᑦ ᐊᐃᑉᐸᕆᓪᓗᓂᐅᒃ ᐅᖃᐅᓯᖅᑕᕆᓪᓗᓂᐅᒃ. ᐃᖃᓗᖕᒥᐅᑕᐅᓕᖅᑐᖅ ᐅᑭᐅᓂᒃ ᐱᖓᓱᓂᒃ ᑕᐃᑲᓂᓗ ᓴᓇᙳᐊᖅᑎᐅᓂᖓ ᐱᕈᖅᐹᓪᓕᖅᓯᒪᓪᓗᓂ.

ᐊᑐᕈᒪᔭᖓ ᖃᓪᓗᓈᖅᑕᓂᒃ ᓴᓇᙳᐊᕐᓂᖅ: ᑕᖅᓯᖅᓱᖅᓯᒪᔪᑦ ᓯᐅᒻᒥᐅᑕᐃᑦ. ᐃᓕᓐᓂᐊᕐᕕᐊᓗᖕᒥ ᐱᒋᐊᓚᐅᖅᓯᒪᔪᖅ ᐃᓕᓐᓂᐊᓚᐅᖅᖢᓂ ᐃᓅᓯᕐᒥ ᐊᔪᕈᓐᓃᖅᑕᐅᕙᒃᑐᓂᒃ. ᓄᓇᒥᙶᖅᑐᓂᒃ ᐊᔾᔨᙳᐊᓕᐅᖅᐸᒃᖢᓂ ᓲᕐᓗ ᐱᕈᖅᓯᐊᓂᒃ, ᑭᖑᓂᐊᒍᓪᓗ ᑲᑉᐱᐊᓇᖅᑐᓂᒃ ᑕᕐᕆᔭᒐᒃᓴᓂᒃ ᕼᐊᓗᕖᓐᒧᑦ ᐊᒻᒪ ᐋᓪᓚᓄᑦ. ᑭᖑᓂᐊᒍᑦ ᐃᓚᓕᐅᔾᔨᓕᓚᐅᖅᓯᒪᕗᖅ ᐃᓄᐃᑦ ᓴᓇᙳᐊᕈᓯᑐᖃᖏᓐᓂᒃ ᒫᓐᓇᓗ ᐃᓕᖅᑯᓯᑐᖃᒃᑯᑦ ᐊᔾᔨᙳᐊᓂᒃ. ᓴᐸᖓᓕᖅᓯᒪᔪᓂᒃ ᓯᐅᒻᒥᐅᑕᓂᒃ ᓴᓇᓯᒪᕗᖅ ᐊᒻᒪ ᐊᒥᐊᖅᓯᒪᔪᓂᒃ ᐸᓂᖅᑎᓯᒪᔪᑎᑐᑦ ᐃᖃᓗᙳᐊᓂᒃ ᐊᒻᒪ ᓯᐅᒻᒥᐅᑕᓂᒃ ᐋᓪᓚᐅᖅᑰᔨᔪᓂᒃ.

ᐱᖅᑯᓯᑐᖃᖅᑎᒍᑦ ᑐᓐᓂᓕᖅᓱᐃᕙᒃᑭᕗᖅ, ᕿᔪᐊᕐᔪᖕᓂᒃ ᐊᒻᒪ ᑐᓐᓂᓕᖅᓱᐃᕙᒃᖢᓂ, ᐃᓕᓚᐅᖅᑕᖓ ᒪᕐᕉᖕᓂ ᐱᓇᓱᐊᕈᓰᖕᓂ ᐃᓕᓐᓂᐊᕐᓂᕐᒥ. ᓱᓕᒃᑲᓐᓂᖅ, ᐊᒥᐊᕆᓲᖑᕗᖅ ᐃᒪᕐᒧᑦ ᐊᒥᐊᕆᓂᕐᒥᒃ ᐊᒻᒪ ᐊcrylic-ᒥᒃ ᐊᒻᒪ ᐃᒻᒥᓂᒃ ᐃᓕᓐᓂᐊᖅᑎᑦᑎᕙᒃᖢᓂ ᑎᑎᖅᑐᒐᐅᔭᕐᓂᕐᒥᒃ. ᓴᓇᓯᒪᖕᒥᔪᖅ ᐱᖓᓱᓂᒃ ᐊᑎᒋᓂᒃ (ᖁᓕᑦᑕᐅᔭᓂᒃ) ᒫᓐᓇᒧᑦ ᑎᑭᖦᖢᒍ.

ᐊᑎᓕᐅᕆᐊᙵᕋᒥ ᐃᓕᓐᓂᐊᒐᒃᓴᒧᑦ ᐃᓄᐃᑦ ᑐᓐᓂᓕᖅᓱᐃᓂᕐᒥᒃ ᖃᐅᔨᒪᓚᐅᙱᑦᑐᖅ ᐃᓕᑦᑎᕙᓪᓕᐊᓂᖓᓂᒃ ᑐᓐᓂᓕᖅᓱᐃᓂᕐᒥᒃ, ᐃᓱᒪᓚᐅᖅᑐᖅ ᐃᓕᑦᑎᕙᓪᓕᐊᓂᖅ ᑐᓐᓂᓕᖅᓱᐃᓂᕐᒥᒃ ᐊᔪᕈᓐᓃᖅᓴᐅᑎᐅᓗᓂ. "ᐃᓄᐃᑦ ᐅᕙᓐᓂᒃ ᐅᒃᐱᕆᔭᖃᕌᖓᒥᒃ ᓇᓗᓇᐃᒃᑯᑦᑎᖅᓱᐃᖁᔭᐅᓪᓗᖓ, ᐱᓗᐊᙳᐊᖅᑐᒥᒃ ᓯᕗᓪᓕᖅᐹᕆᒍᓂᐅᒃ, ᐱᒃᑯᒋᔭᖃᓪᓚᕆᒃᐸᒃᐳᖓ, ᓲᖃᐃᒻᒪ ᐃᓚᒋᔭᐅᑦᑎᐊᓕᒃᑲᓐᓂᕐᓇᕐᒪᑦ, ᐊᒻᒪᓗ ᐃᑲᔪᖅᐸᒃᖢᓂ ᐊᓯᓐᓄᑦ ᐃᓄᖕᓄᑦ," ᐅᓂᒃᑳᕆᓪᓗᓂ.

ᑖᓐᓇ ᐆᑦᑐᕋᐅᑕᐅᓚᐅᖅᑐᖅ ᐊᒻᒪᓗ 8-ᖑᔪᑦ ᐃᓄᐃᑦ ᐆᑦᑐᓚᐅᖅᑐᑎᒃ. ᓄᓇᓕᖕᒥᐅᑕᓂᒃ ᑐᓐᓂᓕᖅᓯᓪᓗᑎᒃ ᐃᓱᐊᓂ ᑕᐃᒪᙵᓪᓗ ᑖᒃᑯᓂᖓᑦᑕᐃᓐᓇᖅ ᑐᓐᓂᓕᖅᓱᐃᒃᑲᓐᓂᓕᖅᖢᓂ. ᐃᓕᑕᕆᔭᐅᔾᔪᑎᑖᓚᐅᖅᑑᒃ ᐊᒻᒪ ᐊᐅᒃᑯᑦ ᐊᐃᑦᑐᕐᓗᐃᔪᓐᓇᕐᓂᕐᒧᑦ ᓇᓗᓇᐃᒃᑯᑕᖅᑖᖅᑎᑕᐅᓪᓗᑎᒃ ᐊᔪᙱᑦᑎᐊᕐᓂᕐᒥᓂᒃ ᑕᑯᑎᑦᑎᓇᓱᒃᖢᑎᒃ.

ᐊᓯᐊᑦᑕᐅᖅ ᕿᒥᕐᕈᖃᑦᑕᖅᓯᒪᖕᒥᔭᖓ ᖃᕆᑕᐅᔭᒃᑯᑦ ᓴᓇᙳᐊᕐᓂᖅ, ᐱᓕᕆᐊᖃᖅᐸᒃᖢᓂ ᐅᖃᓕᒫᒐᒃᓴᓂᒃ, ᐊᒻᒪ ᓂᐅᕕᐊᒃᓴᓂᒃ ᓴᖅᑭᑎᑦᑎᕙᒃᖢᓂ. ᓇᒡᓕᒍᓱᖕᓂᕐᒧᑦ ᐸᑦᑕᑯᓗᖕᓂᒃ ᓴᓇᓯᒪᕗᖅ, ᑳᐱ ᐃᕐᙳᓯᓂᒃ ᐊᒻᒪ ᐴᒃᓴᓂᒃ. ᐃᓕᖅᑯᓯᑐᖃᒃᑯᑦ ᓴᓇᙳᐊᖅᑎᐅᓪᓗᓂ, ᓴᓇᙳᐊᖅᑎᐅᕙᒃᐳᖅ ᐃᖅᑲᓇᐃᔭᖅᑎᑕᐅᓪᓗᓂ ᑎᑎᕋᐅᔭᒐᓕᐅᖅᐸᒃᖢᓂ ᓴᓇᙳᐊᖅᐸᒃᖢᓂᓗ. ᓯᕗᓪᓕᕐᒥ ᖁᒃᓴᓱᖕᓇᕆᕚ ᑭᓯᐊᓂ ᐃᓱᐊᓂ ᐊᓂᒍᐃᑦᑎᐊᖅᐳᖅ.

ᐊᒥᐊᕆᓂᕐᒥᒃ ᖁᕕᐊᒋᔭᖃᕐᓂᖓ ᓴᓇᙳᐊᖅᑎᓂᒃ ᑕᒪᐃᓐᓂᒃ ᖃᑕᙳᑎᖏᓐᓂᒃ ᖃᐅᑕᒫᑦ ᓴᓇᙳᐊᖅᐸᒃᖢᑎᒃ ᖁᕕᐊᒋᔭᖃᖅᖢᑎᒃ ᓴᓇᙳᐊᕐᓂᕐᒥᒃ. "ᐊᒥᐊᕆᓂᖅ ᐊᔪᕐᓇᙱᑦᑎᐊᖅᐳᖅ.... ᐃᕐᖐᓐᓇᖅ. ᑕᖅᓯᖅᓱᐃᓂᖅ ᐱᐅᒋᑦᑎᐊᖅᑕᕋ, ᑭᓯᐊᓂ ᐊᑯᓂᐊᓗᒃ ᐱᓕᕆᐊᖑᓲᖑᖕᒪᑦ, ᐊᒻᒪᓗ ᐱᔪᒪᓂᖃᑦᑎᐊᕆᐊᖃᕐᓇᖅᖢᓂ. ᐊᒥᐊᕆᓂᖅ, ᐱᖁᑎᖃᕈᓐᓇᕋᕕᑦ ᐅᓪᓘᑉ ᓄᙳᐊᓂ, ᐊᒻᒪᓗ ᐊᓯᐊᒍᑦ ᐊᐅᓚᑦᑐᓐᓇᕐᒥᔭᐃᑦ, ᐱᐅᒋᙱᒃᑯᕕᐅᒃ ᓇᒧᙵᐅᕙᓪᓕᐊᓂᖓ," ᐅᖃᖅᑐᖅ. ᐊᒥᐊᕆᓚᐅᖅᐳᖅ ᐊᑭᓐᓇᕐᒥᐅᑕᒥᒃ ᕿᑎᐊᓃᑦᑐᓄᑦ ᐃᓕᓐᓂᐊᕐᕕᖕᒥ ᐱᓕᕆᖃᑎᖃᖅᖢᓂ ᐊᓂᒥᓂᒃ ᐃᑲᔪᓚᐅᖅᖢᓂᐅᒃ ᖃᕆᑕᐅᔭᒃᑯᑦ ᑎᑎᕋᐅᔭᕐᓂᕐᒥᒃ ᓴᓇᑎᓪᓗᒍ ᐊᖏᑎᒋᔪᒥᒃ. ᓴᖅᑭᑦᑎᓚᐅᕐᒥᔪᖅ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᒥᓕᐊᓂᒃ ᓵᓚᒃᓴᐅᓯᐊᒃᓴᒥᒃ.

ᓴᓇᓯᒪᒋᕗᖅ ᐊᔾᔨᙳᐊᓂᒃ, ᑕᒪᓐᓇᓗ ᐱᐅᒋᒻᒪᕆᒃᐸᒃᖢᓂᐅᒃ ᐊᖏᕐᕋᕆᔭᒥᓄᑦ. ᐱᐅᒃᓴᑦᑎᐊᖅᐳᖅ ᐊᖏᕐᕋᒥ ᐱᐅᓴᐅᑎᓂᒃ ᐊᒻᒪ ᐃᓄᐃᑦ ᓴᖅᑭᔮᖅᑎᑕᖏᓐᓂᒃ. ᖁᕕᐊᒋᔭᖃᖅᑐᖅ ᑲᑎᙵᔪᓂᒃ ᓴᓇᙳᐊᒐᕐᓂᒃ ᑕᑯᔭᒃᓴᐅᔪᓂᒃ ᐊᒻᒪᓗ ᐊᒃᑐᒐᒃᓴᐅᔪᓂᒃ.

ᑭᖑᓂᑦᑎᓐᓂ, ᓂᐅᕕᐊᒃᓴᖃᖃᑦᑕᖅᓯᒪᕗᖅ ᓴᓇᐅᒐᕐᓂᒃ ᑮᓇᐅᔭᓂᒃ ᐱᕈᖅᓴᐃᓇᓱᒃᖢᓂ ᐃᒃᐱᒋᑦᑎᐊᖅᑕᒥᓄᑦ ᓲᕐᓗ ᐃᒪᖅ ᐃᓅᓯᐅᕗᖅ ᐊᒻᒪ ᓂᐅᕕᖅᐸᒃᖢᓂ ᓴᓗᒪᔾᔪᑎᒃᓴᓂᒃ ᐊᕐᓇᓄᑦ ᕿᒫᕝᕕᖕᒥ ᓇᐃᓐᒥ. ᒫᓐᓇ ᐃᒻᒥᓂᒃ ᒪᑭᑕᔭᕆᐊᖃᓕᕋᓗᐊᖅᖢᓂ, ᓂᕆᐅᒃᐳᖅ ᑮᓇᐅᔭᓂᒃ ᐱᕈᖅᓴᐃᒃᑲᓐᓂᓛᕈᒪᓪᓗᓂ ᓯᕗᓂᒃᓴᑦᑎᓐᓂ.

ᐊᓯᐊᑦᑕᐅᖅ ᖁᕕᐊᓇᑦᑎᐊᖅᑐᖅ ᐱᓕᕆᐊᒃᓴᖅ ᔮᒃ ᐱᓕᕆᐊᕆᓯᒪᖕᒥᔭᖓ ᐃᓄᒃᑎᑐᑦ ᐅᖃᐅᓯᕐᒧᑦ ᖃᕆᑕᐅᔭᒃᑰᕈᑎ, ᑲᑎᙵᑎᑦᑎᓪᓗᓂ ᐃᓐᓇᕐᓂᒃ ᒪᒃᑯᒃᑐᓂᒡᓗ ᐃᓗᓕᒃᓴᓕᐅᕐᓗᑎᒃ. ᓂᕆᐅᒃᐳᖅ ᑖᓐᓇ ᖃᕆᑕᐅᔭᒃᑰᕈᑎ ᐃᑲᔪᕐᓂᐊᕐᓂᖓᓂᒃ ᐅᖃᐅᓯᖅᑕᖅ ᓈᒻᒪᒃᓯᓕᕐᓗᓂ ᐃᓄᖕᓄᑦ ᐅᓪᓗᒥ.

ᐃᓕᓐᓂᐊᕐᓂᓕᕆᓂᕐᒨᖓᓕᕌᖓᑦ, ᔮᒃ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑦᑕᖅᓯᒪᕗᖅ ᖃᕆᑕᐅᔭᒃᑯᑦ ᑭᓯᐊᓂ ᐃᓕᓐᓂᐊᕈᒪᓂᖅᓴᐅᕙᒃᐳᖅ ᑕᐅᑐᒐᖃᓪᓗᐊᑕᖅᖢᓂ ᐃᓄᖕᓂᒃ ᐃᓅᖃᑎᖃᖅᐸᖕᓂᕐᒥᒡᓗ. "ᓇᓂᑐᐃᓐᓇᖅ ᐃᓕᑦᑎᔪᓐᓇᖅᐳᑎᑦ. ᓯᓚᑦᑐᕐᓴᖅᕕᒻᒦᒋᐊᑐᖏᑦᑐᖅ ᐅᕝᕙᓘᓐᓃᑦ ᓯᓚᑦᑐᓴᕐᕕᔾᔪᐊᒥ. ᑲᑐᔾᔨᖃᑎᒌᓃᒍᓐᓇᖅᑐᖅ ᓄᓇᑦᓯᓐᓂᑦ... ᐱᐅᔪᐊᓗᖕᓂᒃ ᐱᖁᑎᖃᐃᓐᓇᐅᔭᕐᒪᑕ, ᐊᑏ ᐊᑲᕐᕉᑎᒋᕙᒡᓗᒋᑦ," ᑎᓕᐅᕆᕗᖅ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᕿᒪᐃᔪᒪᖕᒪᖔᕐᒥ ᐋᒃᑲᓘᓐᓃᑦ ᓄᓇᒋᔭᒥᓂᑦ ᐃᒪᓐᓇᐅᕗᖅ, "ᐊᖏᕐᕋᕆᔭᕐᓂ ᕿᒪᐃᔭᕆᐊᖃᙱᑦᑐᑎᑦ ᐃᓕᖕᓄᑦ ᑐᕌᖓᙱᒃᑯᓂ. ᑭᓯᐊᓂ ᐃᓱᒪᔪᖓ ᐊᑑᑎᖃᕐᓂᖓᓂᒃ. ᐃᓛᓐᓂᒃᑯᑦ ᐃᓗᐊᕆᔭᕐᓂ ᓯᓚᑖᓅᕆᐊᖃᕐᓇᖅᐸᒃᐳᖅ ᐊᑐᕐᓂᐊᕐᓗᓂ ᓄᑖᓂᒃ ᑭᓱᑐᐃᓐᓇᓂᒃ, ᑲᑉᐱᐊᓇᖅᖢᓂᓗ, ᑭᓯᐊᓂ ᐃᓕᖕᓂᒃ ᐃᑲᔪᕋᔭᖅᑰᖅᐳᖅ ᐃᓕᖕᓂᒃ ᐃᖅᑲᐃᑎᑦᑎᓗᓂ ᐱᑕᖃᕐᓂᐊᕐᓂᖓᓂᒃ ᐃᓄᖕᓂᒃ ᓇᒡᓕᒍᓱᒃᑐᓂᒃ ᓇᒧᙵᐅᒐᓗᐊᕈᕕᑦ, ᑕᐃᒪᓐᓇ ᓇᓂᓯᓂᐊᖅᐳᑎᑦ ᐊᒃᑐᐊᓂᕆᔭᕐᓂᒃ ᓇᓂᑐᐃᓐᓇᑦᑎᐊᖅ." ᐃᓕᓴᖅᓯᔪᖅ ᐊᖏᔫᓂᖓᓂᒃ, ᐃᓕᕋᓇᖅᑑᓪᓗᓂ ᓂᕈᐊᕐᓂᖅ ᐊᒻᒪᓗ ᕿᒪᐃᔭᕆᐊᖃᖅᑰᔨᓪᓗᓂ ᑲᔪᓯᑦᑎᐊᕐᓂᐊᕈᕕᑦ ᑭᓯᐊᓂ ᐅᖃᖅᑐᖅ ᐃᓄᐃᑦ ᐱᓕᕆᑦᑎᐊᖅᑐᐊᓘᖕᒪᑕ ᐊᖏᕐᕋᒥᓂ.

ᑐᓗᖅᑕᕈᑎᓄᓪᓕ, ᔮᒃ ᐅᖃᖅᑐᖅ, "ᑕᒪᕐᒥᑲᓴᒃ ᐊᕝᕕᐊᕈᑎᒃᑲ ᐃᓱᒪᓐᓃᙶᖅᑐᑦ... ᐃᓱᒪᕗᖓ ᐊᒥᓱᐊᓗᖕᓂᒃ ᐃᒃᐱᒋᔭᖃᖅᐸᒃᐳᖓ ᓴᓇᙳᐊᕐᓂᕐᒧᑦ ᐃᓕᖅᑯᓯᕆᔭᐅᕙᒃᑐᒥᒃ... ᐊᒻᒪ ᑕᒪᒃᑯᐊ ᐃᒃᐱᖕᓂᐊᓂᑐᐃᓐᓇᐅᕗᑦ ᑎᑭᓐᓂᐊᕐᓂᖏᓐᓂ, ᑭᓯᐊᓂ ᐊᐅᓪᓚᕐᓂᐊᖅᐳᑦ, ᐊᒻᒪ ᑲᑎᖃᑎᖃᕐᓂᐊᖅᐳᑎᑦ ᐃᓄᖕᓂ ᐃᑲᔪᕐᓂᐊᖅᑐᓂ ᐊᖅᑯᑎᒋᔭᕐᓂ ᕿᒪᕉᑎᓇᓱᒡᓗᓂ ᐃᓱᒪᒥᒍᑦ."

ᐃᓱᒪᒋᓪᓗᒍ ᖃᓄᖅ ᐊᐅᓚᑦᑎᕙᖕᒪᖔᑦ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᖃᓄᐃᙱᑦᑎᐊᕈᓐᓇᕐᓂᕐᒥᓂᒡᓗ, ᔮᒃ ᐅᖃᓚᐅᖅᐳᖅ, "ᐃᓱᒪᓐᓃᑐᐃᓐᓇᕆᐊᖃᖅᐳᑎᑦ ᐊᓯᖕᓄᑦ ᐅᖃᓪᓚᖃᑎᖃᓕᕐᓗᑎᑦ." ᐃᑲᔪᖅᐸᒃᐳᖅ ᐃᒃᐱᒋᔭᒥᓂᒃ ᐊᓯᒥᓄᑦ ᐃᒃᐱᒋᔭᒥᓂᒃ ᓴᖑᑎᑦᑎᕙᒃᖢᓂ ᐊᒻᒪᓗ ᐃᒻᒥᓂᒃ ᐱᔭᒃᓴᖃᐃᓐᓇᖅᐸᒃᖢᓂ. ᓴᓇᙳᐊᖅᐸᒃᑕᖏᑦ ᐱᒃᑯᒍᓱᒃᑎᑦᑎᒋᕗᖅᑕᐅᖅ.

"ᓴᓇᙳᐊᕐᓂᖅ ᓴᖅᑭᑐᐃᓐᓇᓲᖑᕗᖅ."

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐃᓱᒪᒋᔭᐃᑦ ᐊᑑᑎᖃᕋᓱᒋᙱᖦᖢᒍ, ᑭᓯᐊᓂ ᑕᐃᒪᐃᑉᐳᖅ. ᐃᓄᖕᓂ ᑐᙵᓱᒃᑎᑦᑎᔪᖃᖃᑦᑕᕐᓂᐊᖅᐳᖅ ᑕᒪᑐᒥᖓ. ᖃᐅᔨᒪᓇᙱᓚᖅ ᑭᓇ ᑕᐅᑐᖕᒪᖔᑦ."

ᑲᔪᖏᖅᓴᐃᓕᕌᖓᒥ, ᔮᒃ ᕿᓂᖅᐸᒃᐳᖅ ᐊᑐᖅᑕᐅᒐᔪᒃᐸᒃᑐᓂᒃ ᐊᒃᑐᐊᓂᓕᖕᓂᒡᓗ ᑭᓱᑐᐃᓐᓇᓂᒃ, ᐱᓗᐊᙳᐊᖅᖢᓂ ᓄᓇᒥ.

"ᐃᓱᒪᔪᖓᓕ ᓯᓚ ᑭᓱᓕᒫᓂᒃ ᐱᔭᕆᐊᖃᖅᑕᑦᑎᓐᓂᒃ ᐱᑕᖃᖅᑎᑦᑎᕙᒃᐳᖅ, ᐊᒻᒪᓗ ᑕᐃᑲᙵᑦ ᐱᕝᕕᒋᔪᓐᓇᕐᒥᔭᕗᑦ ᐱᐅᔪᐊᓗᖕᓂᒃ ᓴᓇᙳᐊᖅᑕᐅᔪᓐᓇᖅᑐᓂᒃᑕᐅᖅ," ᐅᖃᖅᑐᖅ.

ᐅᖃᐅᔾᔨᒋᐊᕈᑎᒋᔭᖓ ᓴᓇᙳᐊᖅᑎᙳᕈᒪᔪᓄᑦ, ᔮᒃ ᐅᖃᓚᐅᖅᐳᖅ, "ᐱᒋᐊᑐᐃᓐᓇᕐᓗᑎᑦ ᐊᒻᒪ ᖃᐅᔨᒪᙱᒃᑯᕕᑦ ᐱᐅᖕᒪᖔᑦ ᐱᐅᙱᒻᒪᖔᕐᓘᓐᓃᑦ, ᑲᔪᓰᓐᓇᕆᐊᖃᖅᐳᑎᑦ. ᐱᐅᒃᓴᐃᓐᓇᔾᔮᙱᑦᑐᑎᑦ ᓴᓇᔭᕐᓂᒃ, ᑭᓯᐊᓂ ᓴᓇᒍᕕᑦ ᐱᐅᒋᔭᕐᓂᒃ, ᐊᑑᑎᖃᑦᑎᐊᖅᑐᖅ. ᑮᓇᐅᔭᓕᐅᕆᐊᖃᙱᑦᑐᑎᑦ ᓴᓇᙳᐊᖅᑕᕐᓄᑦ ᐊᑑᑎᖃᕐᓂᐊᖅᐸᑦ. ᐊᙳᑎᓗᐊᕋᓱᒃᐸᙱᖦᖢᖓ ᑭᓱᓕᒫᑦᑎᐊᓂᒃ ᐱᓕᕆᓇᓱᒃᖢᖓ, ᐱᓕᕆᑐᐃᓐᓇᖅᖢᖓ ᖁᕕᐊᒋᑐᐃᓐᓇᖅᖢᒍ ᐱᕚᓪᓕᕐᓇᕆᕗᖅᑕᐅᖅ."

ᓴᓇᙳᐊᖅᑎᐅᖏᓐᓇᐅᔭᖅᓯᒪᓪᓗᓂ, ᐃᐅᕆᑲ ᔮᒃ ᑕᐃᒪᓐᓇ ᐅᖃᐅᓯᖃᕈᓐᓇᑦᑎᐊᖅᐳᖅ. ᑕᖅᓯᖅᓱᖅᓯᒪᔪᓂᒃ ᓯᐅᒻᒥᐅᑕᓂᒃ ᖃᕆᑕᐅᔭᒃᑯᑦ ᑎᑎᕋᐅᔭᖅᓯᒪᔪᓂᒃ ᒥᖑᐊᖅᓯᒪᔪᓂᒃ ᐊᒻᒪ ᕿᔪᐊᕐᔪᖕᓂᒃ ᐊᒻᒪ ᑕᖅᓴᓕᖕᓂᒃ, ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᐸᒃᐳᖅ. ᐊᓂᒍᐃᓯᒪᓪᓗᓂ ᐊᔪᕆᖅᓲᔾᔨᕙᙱᖦᖢᓂ ᓴᓇᙳᐊᖏᓐᓇᕈᒪᓪᓗᓂ, ᑲᔪᓰᓐᓇᖅᐸᒃᐳᖅ ᓴᓇᙳᐊᖅᐸᒃᖢᓂᓗ ᐃᒻᒥᓄᑦ ᐊᓯᒥᓄᓪᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.