"ᑕᐃᒪᓕ ᐆᒻᒪᑎᕗᑦ ᐃᓱᒪᕗᓪᓗ ᒪᑐᐃᕈᓐᓇᓕᕋᑦᑎᒍᑦ ᑲᑎᖃᑎᒌᒡᓗᑕ ᐊᒥᖅᑳᕈᑎᒋᓂᐊᕐᓗᒍ ᑕᒪᓐᓇ ᖃᐅᔨᒪᓂᕆᔭᕗᑦ, ᑕᐃᑲᓂ ᐃᓕᑦᑎᕙᓪᓕᐊᓕᕐᓂᐊᖅᐳᒍᑦ," ᐅᖃᓚᐅᖅᐳᖅ ᕗᕆᑦ ᕉᓚᓐ. ᐱᓕᕆᖃᑎᖃᖅᐸᒃᐳᖅ ᐊᔾᔨᒌᙱᑦᑐᓂ ᓯᓚᑦᑐᖅᓴᕐᕕᒡᔪᐊᓂ ᐃᓛᒃᑰᖅᑐᓂᒡᓗ ᐃᓕᓐᓂᐊᕐᕕᖕᓂ ᕚᓐᑰᕙᐅᑉ ᕿᑭᖅᑕᖓᓂ ᐊᓯᖏᓐᓂᒡᓗ ᐊᕕᒃᓯᒪᓂᕐᓂ ᐊᒥᖅᑳᖃᑎᖃᕈᒪᓪᓗᓂ ᓄᓇᖃᖅᑳᖅᑐᑦ ᖃᐅᔨᒪᓂᕆᔭᖏᓐᓂᒃ ᖃᓄᐃᓕᐅᖅᑕᐅᕙᓚᐅᖅᑐᓂᒡᓗ ᑲᓇᑕᒥ. ᑲᑎᑎᑦᑎᕙᒃᐳᖅ ᐃᓕᖅᑯᓯᑐᖃᒃᑯᑦ ᒫᓐᓇᓕᓴᕐᓂᓪᓗ ᖃᐅᔨᒪᓂᕆᔭᐅᔪᓂᒃ ᓂᔾᔭᐅᓯᔭᕐᓂᒃᑯᑦ ᓂᐱᒃᑯᓪᓗ. ᓯᓚᒥ ᐊᓐᓇᐅᒪᓇᓱᐊᕐᓂᕐᒥᒃ ᐃᓕᓐᓂᐊᖅᑎᑦᑎᕙᓚᐅᖅᐳᖅ ᒪᒃᑯᒃᑐᓄᑦ ᐱᓕᕆᐊᒃᓴᓄᑦ.

ᐅᖄᓚᐅᑎᕋᓛᑦ ᓴᖅᑭᑉᐸᓪᓕᐊᓕᖅᑎᓪᓗᒋᑦ, ᕉᓚᓐ ᖃᐅᔨᕗᖅ ᐊᒃᓱᕈᕐᓇᕐᓂᖓᓂᒃ ᐃᓄᐃᑦ ᖃᐅᔨᒪᓂᑐᖃᖏᓐᓂᒃ ᐃᓚᓕᐅᔾᔨᓇᓱᒃᖢᓂ ᒫᓐᓇᓕᓴᕐᓂᒃ ᐅᓚᕕᓴᖅᑕᐅᕙᒃᑐᓂᒃ. ᐃᓕᓐᓂᐊᖅᑎᑉᐸᒃᑕᖓ ᐃᓕᓐᓂᐊᖅᑎᓂᒃ ᐊᐱᖅᓱᖃᑦᑕᕐᓂᕐᒥᒃ ᓇᑭᙶᕐᓂᖏᓐᓂᒃ ᑐᑭᓯᒋᐊᕈᑎᒃᓴᑦ ᐃᓕᓐᓂᐊᖅᑎᑕᐅᔪᑦ. ᐃᓕᓐᓂᐊᖅᑎᖦᖢᓂᒋᓪᓗ ᐃᒻᒥᓂᒃ ᐋᖅᑭᑦᑎᐊᒃᑲᓐᓂᕐᓂᕐᒥᒃ ᓄᓇᒥ ᓇᓂᓯᒃᑲᓐᓂᖁᓪᓗᒋᑦ ᐃᓕᖅᑯᓯᕆᕙᒃᑕᒥᓂᒃ.

ᕉᓚᓐ ᖁᕕᐊᓲᑎᖃᕆᐊᖅᑐᕌᖓᒥ, ᐱᓇᓱᐊᕈᓯᓕᒫᒧᑦ ᖃᕆᑕᐅᔭᒃᑰᕈᑎᖃᙱᖦᖢᓂ. ᖃᐅᔨᓯᒪᒐᓗᐊᖅᖢᓂ ᓄᑖᙳᖅᐸᓪᓕᐊᔪᑦ ᑲᑎᙵᑎᑦᑎᔪᓐᓇᕐᓂᖏᓐᓂᒃ ᐃᓅᖃᑎᒌᓂᒃ ᑲᑎᙵᙱᓐᓂᖅᓴᐅᓕᖅᖢᑎᒃ, ᐃᓄᐃᑦ ᐅᖄᓚᑐᐃᓐᓇᖅᐸᒃᐳᑦ ᓴᖅᑭᑐᐃᓐᓇᖅᐸᒃᖢᑎᒡᓗ ᐱᔭᕆᐊᖃᓕᕌᖓᒥᒃ. ᑕᒪᒃᑯᐊ ᐅᖄᓚᐅᑎᕋᓛᑦ ᖃᐅᔨᓴᕈᓐᓇᕋᓗᐊᖅᑎᓪᓗᒋᑦ ᐆᒪᔪᑦ ᖃᓄᐃᓕᕙᓪᓕᐊᓂᖏᓐᓂᒃ, ᓇᖕᒥᓂᖅ ᐆᒻᒪᑎᒥᓂᒃ ᒪᓕᑦᑎᐊᖏᓐᓇᖅᐳᖅ.

ᐃᓚᖓᑦ ᐱᓕᕆᔾᔪᓯᖅ ᕉᓚᓐ ᐊᑐᖅᐸᒃᑕᖓ ᓂᐱᒧᑦ ᐅᕕᓂᖕᓂᐊᕐᓂᖅ, ᐊᔾᔨᒌᙱᑦᑐᑦ ᐱᓕᕆᔾᔪᑎᑦ ᐊᑐᖅᑕᐅᕙᒃᖢᑎᒃ ᐊᒃᑐᐃᓪᓗᑎᒃ ᑎᒥᒥᒃ ᐊᒻᒪ ᖃᐅᔨᓇᓱᒃᖢᑎᒃ ᖃᓄᖅ ᐊᐅᓚᔪᓐᓇᕐᓂᖓ ᖁᐊᖅᓵᖅᓯᒪᓂᐅᔪᖅ ᑎᒥᐅᑉ ᐃᓗᐊᓃᒻᒪᖔᑦ, ᐃᔭᕈᕙᐅᔭᐅᑉ ᐃᖅᑲᐅᒪᔭᖓᓂ. ᑕᒪᒃᑯᑎᒎᓇᖅ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ, ᐃᓄᐃᑦ ᐃᒻᒥᓂᒃ ᑲᒪᒋᔪᓐᓇᖅᓯᕙᒃᐳᑦ ᐊᔾᔨᒋᙱᑕᖓᒍᑦ. ᐃᓚᖓᑦ ᐃᖅᑲᐅᒪᔭᖓ ᓄᕕᖅᓴᕐᓂᖅ, ᐊᓈᓇᑦᑎᐊᖓᑕ ᐊᑐᖅᐸᓚᐅᖅᑕᖓ.

ᕉᓚᓐ ᑐᑭᓯᐊᙱᒃᑲᓗᐊᖅᑎᓪᓗᒍ ᐃᙱᐅᓯᕐᓂᒃ, ᐃᓕᑦᑎᓚᐅᖅᐳᖅ ᐃᙱᐅᓯᓕᐅᕐᓂᕐᒥᒃ ᐃᒃᓯᕚᖅᖢᓂ ᓇᐹᖅᑐᓕᖕᒥ ᐊᒻᒪ ᓇᐹᖅᑐᓂᒃ ᓈᓚᒃᖢᓂ. ᐃᖅᑲᐅᒪᕗᖅ ᖃᓄᖅ ᖃᓪᓗᓈᓄᑦ ᑎᑭᑕᐅᖃᑦᑕᖅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᐅᕙᓚᐅᕐᓂᖏᓐᓂᒃ ᐃᓄᑦᑎᐊᕙᐅᙱᓐᓂᖏᓐᓂᒃ ᐊᒻᒪ ᑕᐃᔭᐅᕙᒃᖢᑎᒃ ᖃᓄᑐᐃᓐᓇᑦᑎᐊᖅ ᐱᐅᙱᑦᑑᓂᖏᓐᓂᒃ ᑭᓯᐊᓂ ᓴᓇᔪᓐᓇᖅᖢᑎᒃ ᓂᔾᔭᐅᓯᔭᐅᑎᓂᒃ, ᓄᕕᖅᓴᕈᓐᓇᖅᖢᑎᒃ ᐱᑐᐃᓐᓇᐅᙱᑦᑐᓂᒃ ᐴᒃᓴᓂᒃ ᐊᒻᒪ ᐃᓕᖅᑯᓯᖃᖃᑎᒌᙱᑦᑐᓂᒃ. ᓄᑖᙳᖅᐸᓪᓕᐊᒐᓗᐊᖅᑎᓪᓗᒋᑦ, ᐊᐱᕆᔭᐅᓯᒪᕗᖅ ᐃᓕᓐᓂᐊᖅᑎᑦᑎᖁᔭᐅᓪᓗᓂ ᐃᓕᖅᑯᓯᓕᕆᓂᕐᒥᒃ ᖃᕆᑕᐅᔭᒃᑯᑦ ᑭᓯᐊᓂ ᓇᐃᔪᓐᓇᙱᖦᖢᓂ ᐊᒻᒪ ᑎᐱᖃᙱᖦᖢᓂ ᐱᕈᖅᑐᓂᒃ ᖃᕆᑕᐅᔭᒃᑯᑦ Zoom−ᑯᑦ, ᐅᖃᓚᐅᖅᐳᖅ ᑐᑭᓕᐅᕆᔪᓐᓇᙱᑐᐃᓐᓇᕐᓂᕋᖅᖢᓂᐅᒃ ᐊᑐᓚᐅᖅᑕᖓ ᖃᕆᑕᐅᔭᒃᑯᑦ.

ᐃᓚᖓᑦ ᐃᓕᓐᓂᐊᖅᑎᑦᑎᔾᔪᑎᐅᑉ ᕉᓚᓐ ᐅᖃᐅᓯᕆᕙᒃᑕᖓ ᓇᓗᓇᐃᖅᓯᓂᐅᕗᖅ ᑐᑭᖓᓂᒃ "ᑕᒪᕐᒥᑦᑎᐊᖅ ᐃᓚᒌᖕᓂᕆᔭᒃᑲ", ᖃᓄᖅ ᐊᒃᑐᐊᓂᖃᕐᓂᑦᑎᓐᓂᒃ ᑭᓱᓕᒫᓄᑦ ᐊᕙᑎᑦᑎᓐᓃᑦᑐᓄᑦ, ᖃᓄᖅ ᓄᓇᕐᔪᐊᖅ ᐊᓂᖅᓵᖅᑐᖅᐸᖕᒪᖔᑦ ᐅᕙᑦᑎᑐᑦ, ᖃᓄᖅ ᓇᐹᖅᑐᑦ ᐱᕈᖅᐸᖕᒪᖔᑕ ᐃᓚᒌᖑᔪᓂ ᑕᐃᒪᐃᑉᐸᒃᑎᓪᓗᑕ ᑐᙵᕕᒃᑯᑦ.

ᐃᓅᓯᖓ ᑕᑯᓪᓗᒍ, ᕉᓚᓐ ᐊᕐᕌᒍᒐᓴᖕᓂᒃ ᐃᖅᑲᓇᐃᔭᖃᑦᑕᓚᐅᖅᑐᖅ ᓴᓇᔨᐅᓂᕐᒥᒃ. ᐃᓕᓐᓂᐊᕐᕕᖕᒧᑦ ᐅᑎᕋᓱᒃᑲᓗᐊᖅᖢᓂ ᑭᓯᐊᓂ ᐃᓕᓐᓂᐊᕐᕕᐊᕈᓯᕐᒥ ᐃᒃᓯᕚᕈᓐᓇᐃᓪᓕᓚᐅᖅᐳᖅ, ᓯᓂᓕᖅᐸᒃᖢᓂ ᐊᒻᒪ ᖃᕆᓴᐅᔭᒃᑯᑦ ᐃᓕᓐᓂᐊᖁᔨᓕᑕᐃᓐᓇᓚᐅᖅᐳᑦ. ᐳᕉᒨᓚᐅᖅᐳᖅ. ᐅᑎᓚᐅᖅᐳᖅ ᐊᒻᒪ ᐅᓂᒃᑳᕆᐊᖅᑐᖅᖢᓂ ᐃᓕᓐᓂᐊᕐᕕᐊᓗᖕᒧᑦ ᖁᒃᓴᓱᒃᑐᒻᒪᕆᐅᓚᐅᖅᐳᖅ ᐃᓄᒋᐊᓗᐊᕐᓂᖏᓐᓄᑦ ᖁᙱᐊᕆᐊᖅᑐᖅᓯᒪᔪᑦ. ᐅᓂᒃᑲᐅᓯᖃᓚᐅᖅᐳᖅ ᐊᐅᓪᓚᖅᓯᒪᓂᕆᓚᐅᖅᑕᒥᓂᒃ ᐊᒻᒪ ᖃᓄᖅ ᐊᒃᓱᕈᕈᑎᖃᓚᐅᕐᓂᕐᒥᓂᒃ ᐃᓕᓐᓂᐊᕐᕕᖕᒥ ᐊᒻᒪ ᓈᓚᒃᑎᓂᒃ ᐱᒃᑯᒥᒍᓱᒃᑎᑦᑎᓪᓗᓂ. ᕉᓚᓐ ᐊᐅᓪᓚᕈᓐᓇᖅᓯᓯᒪᕗᖅ ᓂᒋᖅᐸᓯᐊᓄᑦ ᑕᕆᐅᑉ ᐊᑭᐊᓄᑦ, West Indies-ᒧᑦ, Amazon-ᒧᑦ, ᐊᐃᓴᒧᑦ ᐊᒻᒪ ᑕᕆᐅᑉ ᐊᑭᐊᓄᑦ.

ᐊᑕᐅᓯᐊᖅᖢᓂ ᕉᓚᓐ ᐅᖃᓪᓚᒋᐊᖅᑐᖅᑎᓪᓗᒍ ᕗᕌᖕᕘᑦᒥ ᐃᓕᓐᓂᐊᖅᑎ ᐊᐱᕆᓚᐅᖅᓯᒪᕗᖅ "ᐃᖅᑭᓕᓪᓚᑦᑖᖑᖕᒪᖔᑦ" ᓲᖃᐃᒻᒪ ᖃᐅᔨᒐᒥᒃ ᐃᖅᑭᓖᑦ ᐱᑕᖃᕈᓐᓃᓚᐅᕐᓂᖏᓐᓂᒃ 1950-ᖏᓐᓂ ᒐᕙᒪᒃᑯᑦ ᖃᓪᓗᓈᓄᑦ ᐊᑐᐊᒐᖃᕐᓂᖏᓐᓄᑦ. ᖁᐊᖅᓵᓚᐅᕐᑐᖅ ᔮᒪᓂᒥᐅᑦ ᐱᔪᒪᓂᖃᑦᑎᐊᕐᓂᖏᓐᓂᒃ ᐃᓕᑦᑎᔪᒪᓪᓗᑎᒃ ᓄᓇᖃᖅᑳᖅᑐᑦ ᐱᓕᕆᔾᔪᓯᖏᓐᓂᒃ, ᖃᓄᖅ ᐃᓄᐃᑦ ᐃᓕᑦᑎᓲᖑᓂᖏᓐᓂᒃ ᐊᓪᓚᐃᑦ ᐅᖃᐅᓯᖏᓐᓂᒃ ᐊᒻᒪ ᓄᐊᑦᑎᕙᒃᖢᑎᒃ ᐊᓐᓄᕌᓂᒃ. ᑕᐅᖅᓰᖃᑎᖃᖃᑕᐅᓚᐅᖅᑐᖅ ᔮᒪᓂᒥᐅᑕᓂᒃ ᐃᓕᓐᓂᐊᖅᑎᓂᒃ ᐊᒻᒪᓗ ᓄᓇᑦᓯᐊᕐᒨᖅᑎᑦᑐᓂᐅᒃ ᐊᒻᒪᓗ ᐅᑎᖃᑎᒋᓪᓗᓂᒋᑦ ᔮᒪᓂᒧᑦ.

"ᐃᓄᐃᑦ ᖃᐅᔨᕙᓪᓕᐊᑐᐃᓐᓇᕈᑎᒃ ᐅᕝᕙᓘᓐᓃᑦ ᖃᐅᔨᒪᓂᖅᓴᐅᒍᑎᒃ, ᑭᓱᑐᐃᓐᓇᓂᒃ ᐊᓯᔾᔩᔪᓐᓇᖅᐳᑦ."

ᑲᔪᖏᖅᓴᐃᓕᕌᖓᒥ, ᕉᓚᓐ ᐱᔪᒃᓯᑎᑕᐅᕙᒃᐳᖅ ᐃᓕᓐᓂᐊᖅᑎᓂᒃ ᑭᒃᑯᑐᐃᓐᓇᕐᓂᓪᓗ ᐱᔪᒪᓂᖃᖅᑐᓂᒃ ᐃᓕᓴᐃᔾᔪᑎᒋᔭᖏᓐᓂᒃ. "ᑕᒪᓐᓇ ᐊᒥᖅᑳᖃᑎᖃᕐᓂᖅ ᖃᐅᔨᒪᓂᕆᔭᐅᔪᒥᒃ ᐊᑐᖅᓯᒪᔭᒥᓂᒡᓗ ᒪᑐᐃᖅᑎᑦᑎᓂᐊᖅᐳᖅ ᐊᓯᖏᓐᓄᑦ ᐃᓄᖕᓄᑦ ᐊᒥᖅᑳᖃᑎᖃᕈᓐᓇᕐᓂᕐᒥᒃ ᖃᐅᔨᒪᓂᕆᔭᒥᓂᒃ ᐊᑐᖅᓯᒪᔭᒥᓂᒡᓗ," ᐅᓂᒃᑳᕆᓪᓗᓂ. ᐃᓄᖕᓂ ᑲᑎᑎᑦᑎᔪᒪᑦᑎᐊᖅᐳᖅ ᐊᒻᒪ ᒥᑭᓪᓕᑎᖅᓯᒪᓪᓗᓂ ᐊᒻᒪ ᐃᖅᑲᖅᑐᖅᑕᐅᙱᖦᖢᓂ.

ᐃᓱᓕᑉᐸᓪᓕᐊᓕᕐᓗᓂ, ᕉᓚᓐ ᐅᖃᐅᓯᖃᖅᐳᖅ ᖃᔅᓯᑦ ᐃᓄᐃᑦ ᖃᐃᖃᑦᑕᕐᓂᖏᓐᓂᒃ ᐅᖃᐅᓯᖃᖅᖢᑎᒡᓗ ᖃᓄᖅ ᖃᐅᔨᒪᓚᐅᙱᓐᓂᕐᒥᓂᒃ ᖃᓄᐃᓕᐅᓪᓚᕆᓚᐅᕐᓂᖏᓐᓂᒃ ᑲᓇᑕᒥ ᖃᓄᐃᓕᐅᖅᑕᐅᕙᓚᐅᖅᑐᓂᒃ. "ᓴᐃᒻᒪᖃᑎᒌᖕᓂᖅ ᒪᑐᐃᖅᑎᑦᑎᕗᖅ ᐅᖃᕐᓂᕐᒥᒃ, 'ᐄ, ᑕᒪᓐᓇ ᑕᐃᒪᐃᓚᐅᖅᐳᖅ. ᐄ, ᑕᒪᓐᓇ ᓱᓕᕗᖅ'," ᐅᖃᖅᑐᖅ. ᐊᒥᓱᐊᓗᐃᑦ ᐃᓄᐃᑦ ᐃᓕᑦᑎᔪᒪᑎᓪᓗᒋᑦ, ᐊᐱᕆᕙᒃᐳᖅ ᖃᓄᑎᒋ ᐃᓚᐅᔪᒪᖕᒪᖔᑕ ᐅᖃᖅᖢᓂᓗ, "ᐊᒥᓱᐊᓗᖕᓂᒃ ᕿᒥᕐᕈᔭᕆᐊᖃᕋᑦᑕ ᐊᓯᔾᔨᕐᓂᐊᕐᓗᒍ ᐊᕙᑎᕗᑦ ᐃᓅᕝᕕᒋᔭᕗᑦ."

ᓴᓇᔨᐅᓚᐅᖅᖢᓂ ᐃᓕᓐᓂᐊᖅᑎᑦᑎᕙᒃᖢᓂ ᓯᓚᑦᑐᖅᓴᕐᕕᒡᔪᐊᓂ, ᓇᖕᒥᓂᕆᔭᐅᔪᓂ ᐃᓕᓐᓂᐊᕐᕕᖕᓂ ᐊᒻᒪ ᐊᖓᔪᒃᖡᑦ ᐃᓕᓐᓂᐊᕐᕕᖏᓐᓂ, ᕗᕆᑦ ᕉᓚᓐ ᐱᓕᕆᕗᖅ ᓯᕗᒻᒧᐊᒃᑎᑦᑎᓇᓱᒃᖢᓂ ᓴᐃᒻᒪᖃᑎᒌᖕᓂᕐᒥᒃ ᓱᓕᔪᒥᒃ ᑐᓴᖅᑎᑦᑎᕙᒃᖢᓂ ᓈᓚᒍᒪᔪᓄᑦ. ᓇᒧᙵᐅᑲᑕᒃᖢᓂ ᓄᓇᕐᔪᐊᓕᒫᒥ ᐃᓕᖅᑯᓯᕐᒥᓂᒃ ᐊᑐᖅᖢᓂ, ᕉᓚᓐ ᑕᑯᔪᓐᓇᖅᓯᓚᐅᖅᐳᖅ ᓄᓇᓂᒃ ᑕᐅᑐᙳᐊᖏᓐᓇᐅᔭᖅᑕᒥᓂᒃ ᑐᙵᓱᒃᑎᑦᑎᕙᒃᖢᓂᓗ ᐃᓕᓐᓂᐊᖅᑎᓂᒃ ᓇᑭᙶᖅᓯᒪᓂᕐᒥᓄᑦ. ᐊᒃᓱᕉᑎᖃᓚᐅᖅᐳᖅ ᐃᓕᓐᓂᐊᕐᕕᖕᒥ ᓇᓂᓯᓚᐅᙱᓐᓂᕐᒥᓂ ᐅᖓᓯᒃᑐᒥ ᐃᓕᓐᓂᐊᕐᓂᕐᒥᒃ ᑭᓯᐊᓂ ᐃᓚᖏᑦ ᐱᒻᒪᕆᐅᓛᖑᔪᑦ ᐃᓕᓯᒪᔭᖏᑦ ᓇᐹᖅᑐᓕᖕᓂᑦ, ᐃᖅᑲᐅᒪᔭᒥᓂᑦ ᐊᒻᒪ ᐃᓐᓇᕆᔭᒥᓂᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.