ᒍᕇᔅ ᑑᕝ ᕚᓐᑰᕗᒥᙶᖅᖢᓂ ᐱᙳᐊᖅᑎᐅᕗᖅ, Canim Lake-ᒥᙶᖅᖢᓂ, 100 Mile House ᖃᓂᒋᔮᓂ, ᐳᕆᑎᔅ ᑲᓚᒻᐱᐊᒥ, Secwepemc-ᒥ. ᐃᒻᒪᖃ ᖃᐅᔨᒪᔭᐅᓛᖑᔪᖅ ᐱᓕᕆᓯᒪᓂᖓᓄᑦ ᑕᕐᕆᔭᓕᐅᖅᑐᓂ, ᓕᐊᓄ ᑎᑳᐳᕆᐅ, ᒍᕇᔅ ᑑᕝ ᐱᓕᕆᒍᒪᓂᖓ ᐱᒋᐊᓚᐅᖅᓯᒪᔪᖅ ᒪᒃᑯᑦᑐᒻᒪᕆᐅᓪᓗᓂ.

"ᐱᒋᐊᖅᑰᓚᐅᖅᑐᖅ, ᒪᒃᑯᒃᑎᓪᓗᖓ. ᐊᑲᐅᒋᔭᒻᒪᕆᐊᓗᒋᖃᑦᑕᓚᐅᖅᑕᕋ ᐊᔾᔨᓕᐅᕈᑎᐅᑉ ᓵᑦᑎᐊᖓᓂ. ᐊᑖᑕᒐ ᐊᔾᔨᓕᐅᕈᑎᖃᐃᓐᓇᐅᔭᓚᐅᕐᒪᑦ ᐊᒻᒪᓗ ᑕᕐᕆᔭᓕᐅᖅᐸᒃᖢᑕ ᐊᐅᔭᒃᑯᑦ ᐊᐅᓪᓚᕐᓯᒪᓂᓕᒫᑦᑎᓐᓂᒃ, ᐊᒻᒪᓗ ᐅᕙᖓᐅᖏᓐᓇᖅᐸᓚᐅᖅᑐᖓ. ᑕᕝᕙᓂᓕ ᑕᒪᓐᓇ ᓴᖅᑭᓪᓚᕆᑉᐸᓪᓚᐃᔪᖅ."

ᐱᓕᕆᓂᖓ ᐊᔾᔨᓕᐅᕈᑎᐅᑉ ᓵᖓᓂ ᐱᒋᐊᓚᐅᖅᓯᒪᔪᖅ ᓱᕈᓰᑦ ᑕᓚᕖᓴᒃᑰᖅᑎᑦᑎᖃᑦᑕᓕᖅᑎᓪᓗᒋᑦ ᐳᕆᓐᔅ ᔪᐊᔾᒥ 10-ᓂᒃ ᐅᑭᐅᖃᑐᐃᓐᓇᖅᑎᓪᓗᒍ, ᑕᕐᕆᔭᓕᐅᕈᓐᓇᖅᓯᓚᐅᖅᑐᖅ. ᑭᓯᐊᓂ ᐃᓇᖐᓯᒪᔪᒪᓕᕋᓗᐊᖅᑎᓪᓗᒍ, ᖃᐅᔨᒪᓪᓗᓂᓗ ᐃᖅᑲᓇᐃᔮᖃᕈᒪᓂᖓᓂᒃ, ᒍᕇᔅ ᐊᑯᓂᐊᓗᒃ ᐃᖏᕐᕋᓂᖃᓚᐅᖅᑐᖅ ᐱᓕᕆᐊᒃᓴᖃᕐᔪᐊᖅᖢᓂᓗ ᐱᓪᓚᑦᑖᖑᓕᖅᑎᑦᑐᒪᓪᓗᒍ.

"ᐅᔾᔨᕈᓱᓚᐅᖅᑐᖓ ᖃᐅᔨᒪᓚᐅᙱᓐᓇᒪ ᖃᓄᐃᓕᐅᓚᐅᖕᒪᖔᑦ ᑕᕐᕆᔭᖅᑎᐅᓕᖅᖢᖓ. ᐊᒥᓲᕗᑦ ᖃᓄᐃᓕᐅᕆᐊᖃᖅᑕᑎᑦ ᖃᐅᔨᓴᕆᐊᕈᓐᓇᖅᓯᓂᐊᕈᕕᑦ. ᖃᓄᖅ ᐱᓕᕆᔨᑖᕈᓐᓇᕐᒪᖔᖅ ᐊᒻᒪᓗ ᖃᓄᖅ ᐃᓪᓗᕈᓯᕐᒨᕈᓐᓇᕐᒪᖔᖅ ᐊᒻᒪᓗ ᖃᐅᔨᓴᕆᐊᖅᑐᕐᓗᓂ ᐊᒻᒪᓗ ᐱᔭᕆᐊᑐᓂᖓ. ᑕᐃᒪᐃᒻᒪᑦ ᖃᐅᔨᒪᓚᐅᖅᑐᖓ ᐃᓕᓐᓂᐊᕆᐊᕆᐊᖃᕐᓂᓐᓂᒃ. ᐃᓕᓐᓂᐊᕆᐊᖅᓯᒪᕗᖓ ᒪᕐᕉᓐᓂᒃ ᐊᕐᕌᒎᓐᓂᒃ ᑕᐃᑲᓂᓗ ᐃᓕᓚᐅᖅᑐᖓ ᖃᓄᐃᓕᐅᕆᐊᖃᕐᒪᖔᕐᒪ ᑕᒪᓐᓇ ᓴᖅᑭᖁᓪᓗᒍ. ᑲᒪᓇᖅᑐᒻᒪᕆᐅᓚᐅᖅᐳᖅ. ᐃᓇᖐᓯᒪᓚᐅᑲᓲᑦ, ᐃᒃᐱᖕᓂᐊᓂᒃᑯᑦ ᐱᓕᕆᓪᓗᑎᒃ, ᐃᓕᑦᑎᓗᑎᑦ ᖃᓄᖅ ᐃᒃᐱᖕᓂᐊᓂᒃᑯᑦ ᐱᕙᒌᔭᕆᐊᒃᓴᖅ, ᖃᓄᖅ ᐱᕙᒌᔭᕈᓐᓇᕐᒪᖔᑦ ᑎᒥᖕᓂ, ᖃᓄᖅ ᐱᕙᒌᔭᕈᓐᓇᕐᒪᖔᑦ ᓂᐱᑦ, ᑎᒥᒃᑯᑦ ᐃᓕᓐᓂᐊᕐᓗᑎᑦ, ᓂᐱᒃᑯᑦ ᐃᓕᓐᓂᐊᕐᓗᑎᑦ, ᐊᔾᔨᓕᐅᕈᑎᒃᑯᑦ ᐃᓕᓐᓂᐊᕐᓗᑎᑦ, ᐊᒻᒪ ᐱᓯᓂᓯᒥᒃ ᐃᓕᓐᓂᐊᕐᓗᑎᑦ ᐃᓕᑦᑎᓗᑎᑦ ᓴᓂᐊᒍᑦ. ᐱᕙᒌᔭᖅᓯᒪᓇᓱᓪᓚᕆᓲᑦ ᓇᐅᒃᑯᓕᒫᖅ."

ᐊᒻᒪ ᐊᕐᕌᒍᒐᓵᓗᓐᓂᑦ ᐃᖅᑲᓇᐃᔭᖃᑦᑕᖅᓯᒪᒐᓗᐊᖅᑎᓪᓗᒍ, ᐊᑐᐃᓐᓇᕈᖅᑎᕆᓂᕐᒥᑦ, ᐊᒻᒪ ᐱᓕᒻᒪᒃᓴᓂᕐᒥᑦ, ᒍᕇᔅ ᓱᓕ ᓯᕘᕋᓂᕐᒥᑦ ᑲᒪᖃᑦᑕᖅᑐᖅ. ᐊᐱᕆᔭᐅᒑᖓᒥ ᖃᖓᑐᐃᓐᓇᖅ ᑲᙳᓱᖕᒪᖔᑦ ᖁᓱᖕᒪᖔᓪᓘᓐᓃᑦ ᑕᒻᒪᖅᓯᒪᔪᖅᓯᐅᖅᑕᐅᑎᓪᓗᒍ, ᒍᕋᐃᔅ ᑭᐅᓪᓗᓂ:

"ᐄ. ᐅᖃᕋᔪᒃᑐᖓ (ᖃᖓᒃᑯᑦ). ᑕᒪᓚᐅᕗᑦ. ᓲᕐᓗ ᑕᒻᒪᖅᓯᒪᔪᖅᓯᐅᕐᓂᖅ, ᐃᓘᓇᑎᒃ, ᐃᖅᑲᓇᐃᔮᒧᑦ ᐊᐱᖅᓱᖅᑕᐅᓂᐊᖅᑑᔮᕋᕕᑦ. ᑕᒪᓐᓇ ᐊᑐᖅᑕᐅᕙᒻᒪᑦ ᐋᒡᒑᖅᑕᐅᓂᕐᒧᑦ. ᐊᒻᒪᓗ ᖃᐅᔨᓴᖃᑦᑕᖅᑐᖓ ᕼᐊᓐᓇᓚᒐᓵᓗᓐᓂᒃ ᐊᕐᕌᒍᑕᒫᑦ ᐊᒻᒪᓗ ᓄᑖᒥᒃ ᐃᓕᑦᑐᖃᕋᐃᒻᒪᑦ ᐊᒻᒪᓗ ᑕᒪᒃᑯᐊ ᖁᕝᕙᓯᑦᑐᒻᒪᕆᐅᓪᓗᑎᒃ. ᐅᖃᕋᔭᖅᑐᖓ ᐊᑯᓂᐊᓘᓕᕐᒪᑦ, ᑕᒪᓐᓇ ᐅᕙᓐᓄᑦ ᑎᑭᒐᓱᐊᕐᓂᖓᓂ ᑕᒫᓂ ᐊᕐᕌᒍᒥ ᐊᐅᓚᒐᓱᐊᖅᑐᒍ ᑕᒪᒃᑯᐊ ᐊᒃᓱᕈᕈᑎᒋᓂᖅᐹᕆᓯᒪᒐᒃᑭᑦ ᓇᒻᒥᓂᖅ ᐊᒻᒪᓗ ᐅᕙᓐᓂᒃ ᓯᕗᕙᐸᓪᓕᐊᓇᖓ ᐊᒻᒪᓗ ᐊᒃᓱᕈᖅᑎᑐᐃᓐᓇᖅᑐᒋᑦ ᐊᒻᒪᓗ ᐃᓱᒪᑐᓂᖏᑦ ᐃᓱᒪᑐᓕᖃᑦᑕᕐᒪᑕ. ᑕᒪᓐᓇ ᐊᑯᓂᐊᓘᕐᒪᑦ ᖃᐅᔨᓇᓱᐊᖅᑐᒍ. ᐃᓱᒪᕗᖓᓗ ᑖᓐᓇ ᓯᕗᓪᓕᖅᐹᖑᓂᖓᓂᒃ ᐊᕐᕌᒍ ᐃᒡᓗᕈᓯᕐᒧᐊᓕᑕᐃᓐᓇᖅᑐᖓ ᐊᐅᓚᑦᑐᓐᓇᓕᖅᖢᒍᓗ ᐃᒃᐱᒋᔭᒃᑲ."

ᐊᐅᓚᑦᑎᓂᖅ ᑕᖃᓇᖅᑐᒥᒃ, ᐊᐅᓚᑦᑎᓂᕐᓗ "ᐃᓗᒃᑯᑦ ᓂᐱᖕᓂᒃ," ᐱᓪᓗᐊᑕᐅᕗᖅ. "ᓇᖕᒥᓂᖅ−ᐅᖃᐅᓯᕆᖃᑦᑕᖅᑕᑎᑦ ᐱᐅᙱᑦᑐᐊᓘᒃᐸᑦ ᐅᕝᕙᓘᓐᓃᑦ ᐃᓕᖕᓂᒃ ᓴᐱᓕᕈᕕᑦ − ᑕᐃᒪᐃᓕᐅᖅᓯᒪᕗᖓ − ᐃᒡᓗᕈᓯᕐᒦᓐᓂᐊᖅᐳᖓ ᐊᒻᒪ ᑐᑭᓕᐊᖅᓯᒍᒪ, ᖃᓄᐃᓕᐅᕋᔭᓚᐅᕋᓗᐊᖅᑐᖓ ᑭᖑᓂᑦᑎᓐᓂ, 'ᐆ, ᐃᓛᒃ, ᑕᒻᒪᖅᐳᖓ,' ᓴᐱᓕᕐᓗᖓᓗ. ᖃᐅᔨᒪᓪᓗᒍᓗ ᖃᓄᐃᙱᓐᓂᖓᓂᒃ, ᐅᕙᖓᐅᔭᕆᐊᖃᕋᒪ 100%-ᒦᓪᓚᕆᒡᓗᖓ."

ᐊᐅᓚᑦᑎᓂᖅ ᓇᖕᒥᓂᖅ ᓂᕆᐅᒋᔭᕐᓂᒃ ᐃᓕᖕᓂᒃ ᐱᒻᒪᕆᐅᒋᕗᖅ. ᐊᐱᕆᔭᐅᒐᒥ ᐅᖃᐅᔾᔨᒋᐊᕈᑎᑕᖃᕐᒪᖔᖅ ᒪᒃᑯᓐᓂᖅᓴᒧᑦ, ᒍᕇᔅ ᐅᖃᖅᑐᓂ, "ᐊᖏᓂᖅᐹᖅ ᐱᓕᕆᐊᕆᔭᕋ ᐅᓪᓗᒥ ᖃᓄᖅ ᓂᕆᐅᓐᓂᖅᑕᖃᓗᐊᓐᖏᒻᒪᖔᖅ ᐅᕝᕙᓘᓐᓃᑦ ᐃᓱᒪᒋᔭᐅᔪᓂᒃ ᖃᖓᒃᑯᑦ ᓴᖅᑭᓂᐊᕐᒪᖔᑕ ᐃᖅᑲᓇᐃᔮᓐᓂ, ᐅᕝᕙᓘᓐᓃᑦ ᖃᓄᖅ ᑕᐃᒪᐃᓐᓂᐊᕐᒪᖔᖅ, ᐱᔾᔪᑎᒋᓪᓗᒍ ᐊᒥᓲᒻᒪᑕ ᖃᐅᔨᒪᔭᐅᖏᑦᑐᑦ ᐱᑦᔪᑎᐅᔪᑦ. ᐱᒻᒪᕆᐅᕗᖅ ᐋᖅᑭᒃᓯᓂᐊᕐᓗᓂ ᑐᕌᕆᔭᐅᔪᓂᒃ, ᖃᐅᔨᒪᓇᔭᙱᒃᑯᕕᑦ ᓇᓕᐊᖕᓄᑦ ᑐᕌᖅᐸᓪᓕᐊᕐᒪᖔᖅᐱᑦ. ᑭᓯᐊᓂ ᐃᖅᑲᐅᒪᖕᒥᔪᖓ ᐊᐃᑦᑖᕈᓱᒃᖢᖓ ᐊᕐᕌᒍᑦ ᖃᔅᓯᐊᕐᔪᐃᑦ ᐊᓂᒍᖅᑎᓪᓗᒋᑦ ᓲᕐᓗ, 'ᐆ, ᓇᓃᑦᑐᒪᙱᑦᑐᖓ.' 'ᐆ, ᐃᓐᓇᕈᖅᐸᓪᓕᐊᔪᖓ.' ᐃᓱᒪᐃᓐᓇᓲᖑᒐᒪ ᓱᕈᓯᕐᓂᒃ ᑕᑯᑎᑦᓯᔪᖃᕇᕆᐊᖓ ᒫᓐᓇ, ᑕᒪᓐᓇ ᐊᒻᒪᓗ ᑕᒪᓐᓇ. ᐊᒃᓱᕈᓗᐊᕆᐊᖃᙱᑦᑐᑎᑦ ᐊᔪᕐᓇᙱᓐᓂᖅᓴᐅᒃᐸᑦ ᐃᒃᐱᒋᓗᒍ."

ᒍᕇᔅ ᐊᕐᕌᒍᒐᓴᖕᓂᑦ ᐃᖅᑲᓇᐃᔭᓚᐅᖅᑐᖅ ᐃᓱᓕᓐᓇᓱᒃᓗᓂ, ᐃᖅᑲᓇᐃᔭᕐᖢᓂ ᓂᕆᕝᕕᖕᓂᑦ ᓈᓚᐅᑎᒃᑯᓪᓗ ᓴᖅᑭᔮᖅᑎᑦᑎᓂᖕᓂᑦ. ᑕᐃᒪᓕ ᑲᔪᓯᑦᑎᐊᖅᑐᖃᕋᐃᒻᒪᑦ, ᑕᒪᓐᓇ ᐊᒃᓱᐊᓗᒃ ᐊᒃᓱᕈᕐᓇᕐᒪᑦ ᓵᓚᒋᓇᓱᐊᖅᑐᒍ. "ᐃᖅᑲᐅᒪᔪᖓ ᐅᖄᓚᕕᐅᔭᕌᖓᒪ, ᐅᕝᕙᓘᓐᓃᑦ ᓇᐃᓕᒐᓗᐊᕈᒪ, ᐆᒻᒪᑎᒐ ᓱᒃᑲᓕᔪᐊᓘᓕᓲᖑᒻᒪᑦ ᖁᕕᐊᓱᓕᓲᖑᓪᓗᖓᓗ. ᐃᓂᔅᓴᓕᐅᕋᒪ, ᐃᖅᑲᐅᒪᑦᑎᐊᕋᒪ ᓇᒦᓪᓚᕆᒻᒪᖔᕐᒪ. ᐅᖄᓚᕕᐅᒐᒪ ᐊᒻᒪᓗ ᕿᒡᒋᓕᓚᐅᖅᑐᖓ ᐊᒻᒪᓗ ᑕᐅᓄᖓᓗ ᐊᒻᒪᓗ ᕿᐊᓪᓗᖓ. ᑖᓐᓇ ᓯᕗᓪᓕᖅᐹᖑᓪᓗᓂ ᐃᓂᔅᓴᓕᐅᓚᐅᖅᑕᕋ. ᐃᓅᓯᓐᓂ ᐱᒻᒪᕆᐅᓛᖑᖃᑕᐅᓚᐅᖅᑐᖅ."

ᒍᕇᔅ ᐱᓕᕆᓂᖓ ᐱᙳᐊᖅᑎᐅᓪᓗᓂ ᓄᓇᕐᔪᐊᓕᒫᒥᑦ, ᑭᓯᐊᓂ ᖃᐅᔨᒪᔪᖅ ᖃᓄᖅ ᐊᒃᓱᕈᕐᓇᖅᑎᒋᔪᓐᓇᕐᒪᖔᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐊᖏᕐᕋᐅᓗᑎᒃ, ᖃᐅᔨᓇᓱᒃᑲᓗᐊᕐᓗᑎᒃ ᐃᖅᑲᓇᐃᔮᖏᓐᓂ ᐃᓅᓯᕐᒧᓪᓗ ᐱᕕᒃᓴᓂᑦ, ᑭᓯᐊᓂ ᐅᖃᖅᑐᖅ ᐊᑑᑎᖃᕐᓂᖓᓂᒃ. "ᐃᓱᒪᒋᔭᕋᓕ ᓄᓇᔅᓯᓐᓄᑦ ᐅᑎᕋᓗᐊᕈᕕᑦ, ᑕᒪᓐᓇ ᐱᐅᔪᒻᒪᕆᐅᕗᖅ. ᖃᓄᐃᖏᑦᑐᖅ ᓄᓇᔅᓯᓐᓂᐅᑕᐅᔪᒪᒍᑦᓯ ᐃᓚᔅᓯᓐᓂ ᐊᒻᒪ ᓄᓇᕘᒥ, ᑭᓯᐊᓂ ᖃᐅᔨᒪᓪᓚᑦᑖᙱᓐᓇᔅᓯ ᑭᓱᑕᖃᕐᒪᖔᑦ ᑭᓯᐊᓂ ᐆᒃᑐᓚᐅᖅᑎᓪᓗᓯ. ᐊᒻᒪᓗ ᑕᒪᓐᓇ ᐱᐅᔪᒻᒪᕆᐅᓱᒋᕙᕋ ᒪᒃᑯᑦᑐᓄᑦ ᐃᓕᓐᓂᐊᕆᐊᕆᐊᖓ ᓇᒥᑭᐊᖅ, ᖃᐅᔨᒋᐊᕆᐊᖅᑐᕐᓗᓂ ᑭᓱᑕᖃᕐᒪᖔᖅ ᑕᖅᑳᓂ ᐱᓪᓗᒍ ᖃᐅᔨᒪᙱᑐᐃᓐᓇᕋᕕᑦ. ᐅᕙᓐᓄᓪᓕ, ᑐᓴᕈᒥᓇᖅᐳᖅ ᐱᓪᓗᒍ ᓱᒃᑲᐃᑦᑐᒥᒃ ᑕᐅᓄᙵᖃᑦᑕᕋᒪ ᐊᕐᕌᒍᑕᒫᑦ ᑕᐃᑲᓃᓐᓂᖅᓴᐅᕙᑦᑐᖓᓗ. ᐃᓱᒪᐃᓐᓇᓲᖑᒐᒪ ᑕᐃᑲᓂᒥᐅᑕᐅᔪᒪᓪᓗᖓ ᐊᒻᒪᓗ ᑕᒪᓐᓇ ᓯᓐᓇᑦᑑᒪᒋᔭᐅᓚᐅᖅᑐᓂ. ᑭᓯᐊᓂᓕ ᑕᐃᑲᓃᓪᓚᕆᑦᑎᓪᓗᖓ, ᐊᑦᔨᒌᖏᑦᑐᓂᒃ ᐊᒃᓱᕈᕈᑎᖃᑉᐸᒻᒪᑦ. ᑕᐃᑯᙵᕌᖓᒪ ᐃᓱᒪᑦᑎᐊᓂᖅᓴᐅᖃᑦᑕᖅᑐᖓ ᐊᓕᐊᓇᐃᒋᑦᑎᐊᖅᐸᒃᖢᒍᓗ ᓄᓇᑦᑎᓐᓂ ᐊᒻᒪ ᐊᖏᕐᕋᓐᓂ."

ᐊᖏᕐᕋᖅᓯᒪᙱᒃᑲᓗᐊᖅᖢᓂ, ᒍᕋᐃᔅ ᐊᑲᐅᒃᓴᓕᓲᖅ ᓄᓇᓕᖕᓂ, ᐱᓗᐊᖅᑐᒥᒃ LA-ᑎᑐᑦ. "ᓇᖕᒥᓂᖅ ᐱᐅᔪᐊᓘᔪᖓ. ᐅᕙᓐᓂᒃ ᐱᐅᒃᓴᖅᑐᖓ. ᐆᒃᑐᕐᓂᐊᖅᐳᖓ ᓄᑖᓂᒃ ᔫᒐᓕᐅᕐᕕᖕᓂᒃ ᐊᒻᒪᓗ ᓄᑖᓂᒃ ᐃᖃᐃᓕᓴᕐᕕᖕᓂᒃ. ᑲᒪᓇᕐᑐᖅ ᐱᓕᕆᖃᑎᖃᑦᑎᐊᕋᒪ ᐊᓯᖏᓐᓂᑦ ᓄᓇᖃᖅᑳᖅᓯᒪᔪᓂᑦ ᓴᓇᙳᐊᖅᑎᓂᑦ. ᓇᓂᓇᓱᑐᐃᓐᓇᑕᒃᑲ. ᐊᒥᓱᓂᒃ ᐱᖃᓐᓂᕆᔭᖃᖅᑐᖓ ᓂᔾᔭᐅᓯᔭᖅᑎᐅᔪᓂᒃ, ᑕᕐᕆᔭᓕᐅᖅᑎᐅᔪᓂᒃ, ᑕᐃᒃᑯᐊ ᓯᕐᓈᖅᑎᐅᓪᓗᑎᒃ. ᓄᓇᖃᖅᑳᖅᓯᒪᔪᑦ ᐱᖃᓐᓇᕆᔭᖏᑦ ᐃᑲᔪᖅᑖᖓ ᑐᙵᑦᑎᐊᕐᓂᕐᒥᑦ ᐊᒻᒪ ᑲᑎᙵᖃᑎᖃᕐᓂᕐᒥᑦ."

ᖁᔭᓐᓇᒦᑦᑎᐊᕐᒥᔭᕋ ᑮᑦ ᑳᓕᐊᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.