ᐱᓇᔪᖕᓂᖅ ᖁᕕᐊᒋᔭᖃᕐᓂᕐᒥᒃ: ᒍᕋᕼᐋᒻ ᑳᓐᔅᑕᓐ ᓴᓇᖃᑦᑕᖅᑐᖅ ᐃᖅᑲᓇᐃᔮᒥᒃ ᐊᒻᒪᓗ ᓯᐊᕐᕆᔭᐅᑎᑯᑖᓂᒃ ᓇᓪᓕᒋᔭᖏᓐᓂᒃ
"ᖁᕕᐊᒋᖃᑦᑕᖅᑕᑎᑦ ᐃᖅᑲᓇᐃᔮᕐᓄᑦ," ᑎᓕᐅᕆᕗᖅ ᒍᕋᕼᐋᒻ ᑳᓐᔅᑕᓐᑦ, ᐅᐃᓂᐹᒡᒥᐅᑕᖅ ᐅᐃᓂᐹᒡᒥ ᓄᓇᖃᖅᑐᖅ ᐊᒃᓱᕉᑎᖃᖅᖢᓂ ᓇᖕᒥᓂᖅ−ᐃᖅᑲᓇᐃᔭᖅᖢᓂ ᑎᑎᕋᐅᔭᖅᑎᐅᓪᓗᓂ ᐊᒻᒪ ᑕᕐᕆᔭᐅᓯᐅᖅᑎᐅᓪᓗᓂ. ᓯᕗᓪᓕᖅᐹᒥ ᐃᖅᑲᓇᐃᔭᓚᐅᖅᑐᖅ ᓂᖅᑎᐅᖅᑎᐅᓪᓗᓂ ᑭᓯᐊᓂ ᐃᓯᒐᖓ ᐃᓯᕋᒥ, ᐃᖅᑲᓇᐃᔭᕈᓐᓇᖅᓯᓯᒪᔪᖅ. ᑎᑎᖅᑐᒐᖅᑎᐅᓚᐅᖅᑐᖅ, ᑕᕐᕆᔮᔅᓴᓕᐅᖅᑐᓂ, ᖃᕋᓴᐅᔭᒃᑯᑦ ᑎᑎᖅᑐᒐᕐᓂᕐᒥᑦ, ᐊᒻᒪ ᓂᐅᖅᑯᑎᖃᕋᓱᐊᕐᓂᕐᒥᑦ ᖁᓕᐅᓕᖅᑐᓂᒃ ᐊᕐᕌᒍᓂᑦ ᓇᒻᒥᓂᖁᑎᒥᓂᒃ ᐱᒋᐊᓚᐅᕋᓂ ᒪᕐᕉᒃ ᐊᕐᕌᒎᒃ ᓈᓕᖅᑑᒃ. ᒫᓐᓇᒧᑦ ᑎᑭᖦᖢᒍ ᓇᖕᒥᓂᖃᕐᕖᑦ ᓱᕐᕌᓗᐊᖃᑦᑕᖅᓯᒪᙱᑦᑎᐊᖅᑐᑦ ᑲᑕᒋᐊᖅᐸᒃᖢᑎᒡᓗ. ᐊᐃᑉᐸᖓᓗ ᑎᑎᖅᑐᒐᐅᔭᖅᑐᖅ ᐊᑎᖃᖅᑐᖅ 33-ᓂᒃ, ᐊᐅᓚᑦᑎᓪᓗᓂ ᐃᓕᒌᓂᒃ, ᐃᓗᓕᖏᓐᓂᒃ ᓴᖅᑮᓂᕐᒥᒃ ᐊᒻᒪᓗ ᑎᑎᖅᑐᒐᕐᓂᕐᒧᑦ ᑐᑭᒧᐊᒍᑎᓂᒃ.
ᓄᑕᕋᐅᑎᓪᓗᒋᑦ, ᑎᑎᖅᑐᒐᕈᒪᓯᒪᔪᖅ, ᑎᑎᕋᐅᔭᕐᓗᓂ ᓄᖅᑲᕈᓐᓇᖏᑦᑐᖅ ᓱᕈᓯᐅᓪᓗᓂ ᖁᑭᕆᐊᓯᑦᑕᖅᑯᖅ ᐊᒻᒪᓗ ᐋᖅᑭᒋᐊᖅᓯᓪᓗᓂ ᓯᐊᕐᕆᔭᐅᑎᑯᑖᓂᒃ ᑕᕐᕆᔮᔅᓴᓂᒃ ᐃᓐᓇᕈᑉᐸᓪᓕᐊᑎᓪᓗᒍ. ᑕᐃᑲᖓᑦ, ᖃᕋᓴᐅᔭᒃᑯᑦ ᑐᑭᓯᒋᐊᖅᕕᓕᐅᖃᑦᑕᓕᓚᐅᖅᑐᖅ ᐊᒻᒪᓗ ᓴᖅᑭᔮᖅᑎᑦᑎᓪᓗᓂ ᐃᓗᓕᖏᓐᓂᒃ. ᐱᔭᕇᕋᒥ, ᐊᕐᕌᒍᒥᒃ ᐊᑕᐅᓯᕐᒥ ᐃᓱᒪᓕᐅᓚᐅᖅᑐᖅ ᖃᓄᐃᓕᐅᕈᒪᓂᕐᒥᓂᒃ ᐊᒻᒪᓗ ᓇᒧᙵᕈᒪᒻᒪᖔᕐᒥ. ᒥᖦᖢᓂ ᐅᐃᓂᐹᒡᒥ ᖃᕋᓴᐅᔭᒃᑯᑦ ᑐᓴᒐᒃᓴᓕᕆᓪᓗᓂ ᑕᕐᕆᔮᒃᓴᓕᐅᖅᖢᓂ, ᑎᑎᖅᑐᒐᖅᖢᓂ, ᑎᑎᕋᐅᔭᖅᖢᓂ, ᐊᒻᒪ ᐃᑭᐊᖅᑭᕕᒃᑯᑦ ᐱᕙᓪᓕᐊᑎᑦᑎᓪᓗᓂ.
ᐊᔪᙱᓐᓂᕆᔭᖏᑦ ᐱᕈᖅᐹᓪᓕᓚᐅᖅᐳᑦ ᑕᒪᐃᓐᓂᒃ ᐃᓕᓐᓂᐊᕐᕕᐊᕈᓯᕐᒥ ᐊᓂᕙᓪᓕᐊᔪᓂᒡᓗ. "ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᓯᒪᕗᖓ ᐃᓕᑕᕆᔭᐅᔾᔪᑎᑖᓚᐅᖅᑐᖓᓗ. ᑭᓯᐊᓂ ᐃᓕᒃᑲᓐᓂᖅᑰᔨᔪᖓ ᐃᖅᑲᓇᐃᔮᓪᓚᑦᑖᓐᓂᒃ ᓲᖃᐃᒻᒪ ᓴᓇᕝᕕᒐ ᖃᕆᑕᐅᔭᐅᖕᒪᑦ ᐊᒻᒪ ᐱᓕᕆᔾᔪᑎᓄᑦ ᑐᙵᕕᖃᕐᒪᑦ. ᐊᒥᓱᑦ ᐱᓕᕆᔾᔪᑎᑦ ᐊᒻᒪ ᐱᓕᕆᔾᔪᓯᑦ ᐊᑐᖅᐸᒃᑕᕗᑦ ᐃᓕᓐᓂᐊᕐᕕᖕᒥ, ᓄᑕᐅᙱᓗᐊᓕᕐᒪᑕ ᐊᖑᒻᒪᑎᔭᕆᐊᖃᓕᖅᐳᑦ ᒫᓐᓇ ᒪᓕᒃᑕᐅᕙᒃᑐᓂᒃ ᐊᒻᒪ ᓱᖏᐅᓴᕐᓗᒋᑦ ᐊᓯᔾᔨᕆᐊᓖᑦ," ᑕᑯᒃᓴᐅᑎᑦᑎᔪᖅ.
ᐱᓕᕆᔾᔪᑎᖏᑦ ᐊᓯᔾᔨᕋᔪᒃᑎᓪᓗᒋᑦ, ᐊᕿᑦᑐᑦ ᐊᔪᖅᑕᐅᙱᑦᑐᑦ ᓱᓕ ᐱᒻᒪᕆᐅᖏᓐᓇᖅᐳᖅ. "ᐱᓕᕆᖃᑦᑕᖅᓯᒪᓂᑰᓂᖅ ᐃᓕᓐᓂᐊᖅᑎᑦᑎᕙᒃᐳᖅ ᐅᕙᑦᑎᓐᓂᒃ ᓲᕐᓗ ᑐᓴᐅᒪᑎᑦᑎᔪᓐᓇᕐᓂᕐᒥᒃ, ᐱᓕᕆᖃᑎᒌᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ, ᐱᓕᕆᖃᑎᒌᖕᓂᕐᒥᒃ ᐱᓕᕆᖃᑎᒌᖕᓂᕐᒥᒃ, ᑕᐃᒪᐃᑦᑐᕈᔪᖕᓂᒃ. ᖃᐅᔨᓚᐅᖅᑐᖓ ᐱᕕᔾᔪᐊᖑᒋᐊᖓᓂᑦ ᐃᓕᓐᓂᐊᕐᓂᕐᒥᑦ ᓇᒻᒥᓂᖃᖅᑎᐅᓪᓗᖓ," ᑲᔪᓯᖏᓐᓇᖅᑐᖅ.
ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᓄᓇᒥᓂᒃ ᕿᒪᐃᔪᒪᓪᓗᑎᒃ ᐱᕙᒌᔭᑦᑎᐊᕈᒪᓪᓗᑎᒃ ᐊᒻᒪ ᑭᓱᑐᐃᓐᓇᒥᒃ ᐱᒋᐊᑐᐃᓐᓇᖁᙱᖦᖢᒋᑦ ᐱᑐᐃᓐᓇᕆᐊᖃᙱᖦᖢᑎᒃ. "ᖃᐅᔨᒪᑦᑎᐊᓚᐅᖅᑐᖓ ᖃᓄᐃᓕᐅᕈᒪᖕᒪᖔᕐᒪ. ᐊᑐᐃᓐᓇᐅᓚᐅᙱᓐᓇᒪᓕ ᐊᓯᔾᔨᖅᑕᐅᓂᖏᓐᓄᑦ ᓄᑦᑎᖅᑕᐅᓂᖏᓐᓄᑦ ᓴᓂᕐᕙᖅᑕᐅᓯᒪᔪᓂᑦ ᓄᓇᓕᐸᐅᔭᒃᑯᓐᓄᑦ. ᐅᐃᓂᐸᒡᒧᑦ ᓅᓚᐅᖅᓯᒪᕗᖓ ᖃᐅᔨᒪᙱᖦᖢᖓ ᕙᓯᓕᕆᓂᕐᒥᒃ, ᖃᖓᒃᑰᕋᔭᕐᒪᖔᕐᒥ, ᓇᒧᙵᐅᔭᕆᐊᖃᕐᓂᕐᒥᒃ, ᖃᓄᖅ ᑭᖑᕙᙱᓪᓗᖓ, ᖃᓄᖅ ᑮᓇᐅᔭᓂᒃ ᐊᑐᖅᑐᒃᓴᓂᒃ ᓂᕆᑎᑦᑎᔪᓐᓇᕐᓂᕐᒥᒃ, ᐃᓕᓐᓂᐊᕐᕕᖕᒥ ᐱᖁᑎᓂᒃ, ᐊᒻᒪ ᐊᑐᖅᑐᐊᕈᑎᓂᒃ, ᑭᐱᙳᐃᔭᐅᑎᓂᒃ, ᑲᑎᒪᓂᐅᑉ ᐃᓱᓕᕝᕕᒃᓴᖏᓐᓂᒃ. ᑲᑎᖦᖢᒋᑦ ᓯᕗᓪᓕᖅᐹᒥ ᐊᕐᕌᒍᒥ ᐃᓕᑦᑎᔭᕆᐊᖃᓚᐅᕋᒪ ᓄᓇᓕᐸᐅᔭᕐᒥ ᓄᓇᖃᕆᐊᒃᓴᖅ ᐃᓕᓐᓂᐊᖅᖢᖓ ᐱᐅᓯᒋᐊᖅᓯᒪᔪᓂᒃ ᐱᓕᕆᔾᔪᑎᓄᑦ ᐱᓕᕆᐊᓂᒃ ᓲᕐᓗ 3d ᑎᑎᖅᑐᒐᕐᓂᒃ ᐅᕝᕙᓘᓐᓃᑦ ᔮᕙᓯᓂᒃ," ᐃᖅᑲᐅᒪᔪᖅ.
ᐸᕐᓇᐅᑎᖃᑦᑎᐊᓂᖅᓴᐅᑎᓪᓗᒍ ᐊᒻᒪᓗ ᖃᐅᔨᒪᓂᖅᓴᐅᓪᓗᓂ ᐊᑑᑎᖃᕐᓂᖓᓂᒃ ᓄᓇᓕᐸᐅᔭᐅᑉ ᐃᓅᓯᖓᑕ, ᑕᐅᑐᒐᖃᕈᓐᓇᓚᐅᖅᑐᖅ ᐃᓕᓐᓂᐊᖅᑕᒥᓂᒃ ᐊᒻᒪᓗ ᐃᓕᓐᓂᐊᑲᓐᓂᖅᑐᓂ ᑲᔪᓯᓐᓂᖏᑦᑐᓂᒃ. ᓯᓚᑖᓂ ᐸᕐᓇᐃᑦᑎᐊᕐᓂᐅᑉ, ᐱᒋᐊᓪᓚᒃᑲᓐᓂᖅᑎᑦᑎᓲᖅ ᐱᔭᕆᐊᖃᕐᓂᕐᒥᒃ ᐃᑲᔪᖅᑕᐅᔪᒪᓂᕐᒥᒃ ᐊᓯᒥᓄᑦ ᐃᑲᔪᖅᑕᐅᔪᒪᓗᓂᓗ. "ᐱᖃᓐᓇᕆᔭᑎᑦ ᖃᑕᙳᑎᑎᓪᓗ ᑕᐃᑲᓃᑉᐳᑦ ᐱᔾᔪᑎᖃᖅᖢᑎᒃ. ᐊᒃᓱᕈᕈᕕᑦ, ᐅᖃᐅᔾᔪᖅᑕᐅᔭᕆᐊᖃᕈᕕᓪᓘᓐᓃᑦ, ᐊᐱᕆᔭᕆᐊᒃᓴᖅ ᑲᑉᐱᐊᓱᙱᓪᓗᑎᑦ. ᑐᑭᓯᙱᒃᑯᕕᑦ, ᐊᐱᕆᓗᑎᑦ ᒪᕐᕈᐃᕐᓗᑎᑦ. ᐃᓕᑦᑎᓗᑎᑦ ᐅᖃᓪᓚᖃᑎᖃᕐᓂᕐᒥᒃ ᐊᓯᖕᓂᒃ ᓇᓗᓇᙱᑦᑎᐊᕐᓗᓂ, ᐊᒥᓱᓂᒡᓗ ᐱᖃᓐᓇᕆᔭᖅᑖᖃᑦᑕᕐᓂᐊᖅᖢᑎᑦ ᐃᓕᓐᓂᐊᕐᕕᒃᑯᑦ. ᐃᓚᖏᑦ ᑖᒃᑯᐊ ᐱᖃᓐᓇᕆᔭᐅᔪᑦ ᐃᓅᓯᓕᒫᒧᑦ ᐱᖃᓐᓇᕆᔭᐅᓂᐊᕐᒪᑕ ᐃᓅᖃᑎᒌᓂᑦ ᐅᕝᕙᓘᓐᓃᑦ ᓴᓇᕝᕕᔅᓯᓐᓂ. ᓴᓇᕝᕕᕗᑦ ᒥᑭᑦᑐᑯᓘᖕᒪᑦ ᐱᕕᒃᓴᖃᓕᕈᓐᓇᕐᓂᐊᕐᒪᑦ, "ᐊᑐᓕᖁᔨᕗᖅ.
ᐊᖓᔪᒃᖡᑦ ᐃᓕᓐᓂᐊᕐᕕᖓᑦ ᐱᕕᖃᕈᑕᐅᔪᓐᓃᓚᐅᖅᑎᓪᓗᒍ ᖃᐅᔨᔾᔪᑎᒃᓴᓂᒃ ᑲᓇᑕᒥ ᖃᓪᓗᓈᖑᖃᑎᒌᙱᑦᑐᑦ ᐱᐅᓯᕆᕙᓚᐅᖅᑕᖏᓐᓂᒃ ᐱᔾᔪᑎᒋᓪᓗᒋᑦ ᐊᓪᓚᐃᑦ ᐱᖁᔭᖓ, ᐊᓪᓚᓄᑦ ᐋᓐᓂᐊᕖᑦ, ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, 60−ᖏᓐᓂ Scoop, ᐊᓯᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᓂᕕᐊᖅᓵᓪᓗ, ᐃᓕᑉᐸᓚᐅᖅᑕᖏᑦ ᐃᖅᑲᓇᐃᔭᖅᑎᐅᑎᓪᓗᒍ. ᐃᓕᓐᓂᐊᖅᓯᒪᙱᖦᖢᓂ ᐃᓕᖅᑯᓯᖓᓂ ᐊᑐᕐᓂᑯᖏᓐᓂᒃᓗ, ᐃᒃᐱᒍᓱᓚᐅᖅᑐᖅ ᐊᓯᐅᔨᓂᕐᒥᒃ ᐃᓚᐅᖃᑕᐅᓂᕐᒧᑦ ᐱᒻᒪᕆᐅᔪᓂ ᐅᖃᖃᑎᒌᒍᑎᓂᒃ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ ᐊᒻᒪ ᖃᓪᓗᓈᖑᖃᑎᒌᖏᓐᓂᕐᒥᒃ. "ᐃᓅᓱᒃᑑᒍᕕᑦ ᓄᓇᖃᖅᑳᖅᓯᒪᔪᓂᑦ, ᐃᓕᑦᑎᒃᑲᓐᓂᕐᓗᑎᑦ ᐃᓕᖅᑯᓯᖕᓂᑦ, ᐅᖃᐅᓯᖕᓂᑦ, ᓇᑭᙶᖕᒪᖔᖅᐱᑦ, ᖃᓄᕐᓗ ᑖᓐᓇ ᑲᓇᑕ ᐊᓯᔾᔨᖅᓯᒪᖕᒪᖔᑦ ᖃᖓᙳᖅᐸᓪᓕᐊᓂᖓᓄᑦ, ᓲᖃᐃᒻᒪ ᑐᑭᓯᕚᓪᓕᕈᑎᒋᓂᐊᕋᕕᐅᒃ ᐊᒥᓱᓂᑦ ᐃᓗᐊᓂᑦ ᐃᖅᑲᓇᐃᔭᖅᑐᓂᑦ ᓄᓇᕐᔪᐊᒥᑦ ᐅᓪᓗᒥ ᐃᓅᑎᓪᓗᑕ," ᐅᖃᖅᐳᖅ.
ᐃᓕᓐᓂᐊᕆᐊᕐᓂᖅ ᓄᓇᖃᖅᑳᖅᓯᒪᔫᓗᓂ ᐊᑦᓱᕈᕐᓇᖅᑐᒃᑰᕈᓐᓇᖅᑐᖅ, ᐊᒻᒪᓗ ᑕᐃᒪᐃᖏᓐᓇᖅᑐᖅ ᖃᐅᔨᒪᔾᔪᑎᑦᓴᖃᕈᓐᓇᖅᑐᖅ ᓇᐅᒃᑰᕆᐊᖃᕐᓂᕐᒥᑦ ᐊᑦᓱᕈᓐᓇᖅᑐᓂᑦ. "ᐊᑐᕈᕕᑦ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ ᐃᓕᓐᓂᐊᕐᕕᔅᓯᓐᓂ, ᓇᓗᓇᐃᖅᑎᖅᓯᒪᔪᒥᒃ ᐅᓂᒃᑳᓕᐅᕐᓗᑎᑦ ᓲᖃᐃᒻᒪ ᐱᐅᓂᖅᓴᐅᖕᒪᑦ ᐱᑎᑐᐃᓐᓇᙱᖦᖢᒍ ᑲᔪᓯᑎᓪᓗᒍᓗ ᐃᓗᐊᓂ ᐃᓕᓐᓂᐊᕐᕕᖕᒥ ᐃᓕᓐᓂᐊᕋᓱᒃᑕᕐᓂ. ᐃᖅᑲᓇᐃᔭᖅᑎᓃᙶᕋᓗᐊᕈᓂ ᐃᓕᓐᓂᐊᖅᑎᓂᙶᕋᓗᐊᕈᓂᓘᓐᓃᑦ, ᓈᒻᒪᒋᔭᐅᔭᕆᐊᖃᙱᑦᑐᖅ, ᐱᓗᐊᖅᑐᒥᒃ ᐅᓪᓗᒥ ᖃᐅᔨᒪᔭᑦᑎᓐᓄᑦ, ᖃᓄᖅ ᑲᓇᑕ ᐱᒋᐊᖅᑎᑕᐅᓚᐅᕐᒪᖔᑦ," ᒪᓂᒪᑎᑕᖓ.
ᐱᕈᖅᐸᓪᓕᐊᓪᓗᓂ, ᐊᒃᓱᕈᐃᓐᓇᕐᖢᓂ ᑕᐅᑐᑦᑎᐊᕐᖢᓂ ᐃᓱᒪᓪᓗᓂᓗ ᖃᐅᔨᔭᐅᓯᒪᙱᖦᖢᓂ ADHD, ᑕᐃᒪᐃᓐᓂᖓᓄᑦ ᓂᕈᐊᕐᖢᓂ ᐊᔪᙱᖦᖢᓂᓗ ᓯᐊᕐᕆᔮᕐᓂᕐᒥ. ᓯᐊᕐᕆᔮᕈᓐᓇᕐᓗᓂ ᖃᖓᑐᐃᓐᓇᖅ ᓇᒥᑐᐃᓐᓇᕐᓘᓐᓃᑦ, ᐸᓂᑐᐊᖅᐸᑦ ᐊᒻᒪᓗ ᐊᐳᑎᖃᖏᑐᐊᖅᐸᑦ, ᐊᔪᐃᓐᓇᑲᓐᓂᓚᐅᖅᑐᖅ ᐊᒻᒪᓗ ᐊᔪᓐᖏᓐᓂᖏᑦ ᐱᐅᓯᕚᓕᖅᑐᑎᒃ. ᓵᓚᒃᓴᓚᐅᖅᑐᖅ ᐊᒻᒪᓗ ᐊᐅᓪᓚᖅᑐᓂ ᐊᒃᓱᐊᓗᒃ ᐱᑦᑎᐊᓚᐅᕐᒪᑦ. ᐃᓕᓐᓂᐊᖏᓐᓇᕈᓐᓇᓚᐅᖅᑐᖅ ᑭᓱᓂᒃ ᐃᓚᐅᑎᑦᑎᕙᖕᒪᖔᑦ, ᑭᓯᐊᓂ ᐊᒃᓱᕉᑎᖃᓚᐅᖅᑐᖅ ᐃᓕᓐᓂᐊᕐᕕᖕᒦᖏᓐᓇᕆᐊᒃᓴᖅ ᐃᓕᓴᐃᔨᒥᒃ ᓇᓂᓯᓇᓱᖕᓂᖓᓄᑦ ᐊᒃᑐᐊᓂᖃᑦᑎᐊᕐᓂᖅᓴᐅᓂᖓᓂᒃ.
ᑲᔪᖏᖅᓴᐃᔭᕆᐊᖃᖅᑎᓪᓗᒍ, ᑕᑯᐃᓐᓇᓲᖅ ᐊᑐᕐᓂᑯᓕᒫᖏᓐᓂ ᐱᓕᕆᓂᕐᒥ ᓄᑖᒥᒃ, ᐊᐅᓪᓚᕐᓂᕐᒥ, ᓂᕿᓕᐅᕐᓂᕐᒥ ᓴᓇᓗᓂ, ᓄᑖᖑᒐᓗᐊᖅᐸᑦ ᐱᓕᕆᐊᒃᓴᖅ, ᐊᓐᓄᕌᑦ, ᑲᑎᒪᔨᓪᓘᓐᓃᑦ. "ᐃᓱᒪᒋᔭᖃᕐᓂᖅ ᓴᖅᑭᑎᑦᑎᓇᔭᕐᓂᕐᒥᒃ ᑭᓱᒥᑭᐊᖅ ᓄᑖᒥᒃ ᐅᕙᓐᓄᑦ ᐃᖅᑲᐃᓐᓇᐅᔭᖅᐳᖅ," ᐊᓕᐊᓇᐅᔭᖅᑐᖅ. ᐊᑕᐅᓯᖅ ᑕᐃᒪᐃᓕᐅᖅᑐᖅ, 14 ᒥᓂᑦᒥᒃ ᑕᕐᕆᔮᒃᓴᓕᐅᖅᖢᓂ ᐃᑲᕐᕋᒐᓴᖕᓂᒃ, ᐱᔪᒃᓯᑎᖦᖢᒍ ᐊᓯᐊᓂᒃ ᓄᑖᒥᒃ ᓴᓇᔪᒪᓕᖅᖢᓂ ᓲᖃᐃᒻᒪ ᖃᓄᖅ ᐱᐅᑎᒋᓚᐅᕐᒪᖔᑦ ᐊᒻᒪ ᖃᓄᖅ ᓈᒻᒪᒋᔭᐅᖕᒪᖔᑦ ᑭᖑᓪᓕᖅᐹᒥ ᑕᑯᔭᕆᐊᒃᓴᖅ. ᖁᕕᐊᒋᔭᖃᖅᑐᖅ ᖃᐅᔨᓇᓱᐊᕐᓂᕐᒥᑦ ᐊᔾᔨᒌᖏᑦᑐᓂᑦ ᐃᓕᖅᑯᓯᕐᓂᑦ, ᓄᓇᓕᐸᐅᔭᕐᓂᑦ, ᓄᓇᓕᓐᓂᑦ, ᓂᕿᓂᓪᓗ.
ᐱᓪᓗᐊᑕᐅᓂᖓ ᒍᕋᕼᐋᒻ ᑳᓐᔅᑕᓐᑦ ᐱᓇᓱᐊᖅᑐᖅ ᖁᕕᐊᒋᔭᒥᓂᒃ. "ᓇᓂᓯᔪᓐᓇᕈᕕᑦ ᖁᕕᐊᒋᔭᕐᓂᒃ ᖁᕕᐊᒋᑦᑎᐊᖅᑕᕐᓂᒃ, ᐱᓇᔪᒍᓐᓇᖅᑕᐃᓪᓗ ᐃᖅᑲᓇᐃᔭᕐᕕᖕᒧᑦ, ᑕᐃᒪᓕ ᐃᒃᐱᒍᓱᓗᐊᕋᔭᙱᖦᖢᓂ ᐱᓕᕆᔭᕆᐊᒃᓴᖅ ᐃᑲᔪᖅᖢᓂᓗ ᐱᓕᕆᑦᑎᐊᕈᓐᓇᕐᓂᕐᒥᒃ ᐃᑲᔪᕐᓗᓂᓗ ᖁᕕᐊᒋᑦᑎᐊᖅᑕᕐᓂᒃ ᐱᓕᕆᐊᕆᔭᕐᓂᒃ. ᑕᒪᓐᓇ ᐃᑲᔫᑎᖃᓪᓚᕆᒐᓱᒋᔭᕋ ᑭᓇᑐᐃᓐᓇᕐᒧᑦ ᐃᖅᑲᓇᐃᔮᖅᑖᕋᓱᐊᖅᑐᓄᑦ ᖃᓄᐃᑦᑐᑐᐃᓐᓇᕐᒥᑦ," ᐅᖃᐅᔾᔨᔪᖅ. ᓇᒻᒥᓂᖅ ᐅᖃᐅᔾᔨᒋᐊᕈᑎᒥᓂᒃ ᒪᓕᓚᐅᖅᑐᖅ, ᐊᑐᖅᑐᓂ ᐃᓚᖏᓐᓂᑦ ᖁᕕᐊᒋᔭᖏᓐᓂᑦ ᐃᖅᑲᓇᐃᔮᖓᓄᑦ ᐊᒻᒪ ᒫᓐᓇ ᐅᑎᒧᑦ ᑕᑯᒋᐊᑐᐃᓐᓇᓕᕆᕗᖅ ᓅᒐᓱᐊᕐᓂᖅᐸᑦ ᓯᐊᕐᕆᔭᐅᑎᑯᑖᖓᓄᑦ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
ᒪᐃ 2024−ᒥ ᓄᑖᙳᕆᐊᖅᓯᒪᔪᑦ: ᒍᕋᕼᐋᒻ ᓂᕈᐊᖅᑕᐅᓚᐅᖅᐳᖅ ᐊᖓᔪᖅᑳᖅ ᒫᓂᑑᐸᒥ ᓯᐊᕐᕆᔮᖅᑎᓄᑦ ᑲᑐᔾᔨᖃᑎᒌᓄᑦ ᐃᑲᕐᕋᒐᓴᖕᓄᓪᓗ ᐊᔾᔨᒌᙱᑦᑐᓄᑦ ᐱᓕᕆᔪᓐᓇᖅᑎᑕᐅᔪᓄᑦ ᐃᑲᔫᑕᐅᓇᓱᒃᖢᓂ ᒪᒃᐱᖅᑕᐅᑎᓪᓗᒍ ᓄᑖᖅ ᐃᒡᓘᑉ ᐃᓗᐊᓂ ᒥᕐᖑᐃᖅᓯᕐᕕᒃ ᐅᐃᓂᐹᒡ, ᐱᑎᒃᐅᐃᒃ ᔅᑲᐃᑦᐹᒃᒥ. ᓇᓗᓇᐃᒃᑯᑕᓕᐅᓚᐅᖕᒥᔪᖅ ᐊᑦᑎᖅᑕᐅᓪᓗᓂᓗ ᒥᕐᖑᐃᕐᓯᕐᕕᒃ. "ᐱᑦᑭᕗ" ᐅᖃᐅᓯᖅ ᑐᑭᖃᖅᑐᖅ "ᐅᐸᒍᑎᔪᖅ" ᑐᙵᓇᖅᑑᓪᓗᓂ ᐳᓛᖅᑎᓂᑦ ᐊᖏᕐᕋᕐᓄᑦ ᐃᓂᖕᓄᓪᓘᓐᓃᑦ. ᑕᕐᕆᔭᓕᐅᖃᑕᐅᖕᒥᔪᖅ ᓯᐊᕐᕆᔮᕐᕕᖕᒥ ᓄᓇᓕᖕᓂ ᓂᕆᐅᖕᓂᐊᖅᐳᑎᑦ ᑕᕐᕆᔮᒃᓴᒃᑲᓐᓂᕐᒥᒃ ᑕᕐᕆᔭᖅᑕᐅᒃᑲᓐᓂᕐᓂᐊᖅᑐᒥᒃ ᐊᓯᖏᓐᓂᒡᓗ ᖁᕕᐊᓇᖅᑐᓂᒃ ᐱᓕᕆᐊᒃᓴᓂᒃ! ᒍᕋᕼᐋᒻ ᓱᓕ ᓇᖕᒥᓂᖅ ᐊᐅᓚᑦᑎᕗᖅ ᐊᒻᒪ ᓄᓇᖃᖅᑳᖅᓯᒪᔪᓂᒃ ᑕᕐᕆᔮᒃᓴᓕᐅᖅᑎᖃᕆᐊᖃᕈᕕᑦ ᐅᕝᕙᓘᓐᓃᑦ ᑕᕐᕆᔭᐅᓯᐅᖅᑎᒥᒃ, www.grahamconstant.com-ᒧᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ.
