ᖃᓄᐃᒻᒪᑦ ᓄᓇᕗᒻᒥ ᖃᐅᔨᓴᕐᓂᖅ ᐱᓕᕆᐊᖑᓪᓗᐊᖅᐸ ᐅᕝᕙᓘᓐᓃᑦ ᐃᓄᖕᓄᑦ? "ᓄᓇᕗᑦ ᖃᐅᔨᒪᓂᖅᓴᐅᒐᑦᑎᒍᑦ," ᒪᐃᑯ ᒥᐅᓪᑕᓐ ᐅᓂᒃᑳᖅᑐᖅ. ᐃᓅᓂᑰᓪᓗᓂ ᐃᖃᓗᖕᓂ ᑭᓯᐊᓂ ᐱᕈᖅᓴᓚᐅᖅᑐᖅ ᒥᑦᑎᒪᑕᓕᖕᒥ, ᐋᑐᕚᒥ ᓄᓇᖃᓚᐅᖅᑐᖅ ᐊᕐᕌᒍᓄᑦ ᑎᓴᒪᓄᑦ ᐅᑎᓵᓚᐅᖅᖢᓂᓗ ᐊᖏᕐᕋᒧᑦ. ᐊᖏᕐᕋᖅ ᐊᒻᒪ ᖃᐅᔨᒪᓪᓗᓂ ᐃᕐᖑᑕᖓ ᐃᓐᓇᕈᖅᐸᓪᓕᐊᒻᒪᑦ, ᐊᐅᓪᓚᓚᐅᖅᑐᖅ ᓄᓇᓕᐸᐅᔭᒃᑯᓐᓄᑦ ᐅᑎᖅᑐᓂ ᐊᓈᓇᖓᑕ ᐱᕈᖅᓴᕕᒋᓚᐅᖅᑕᖓᓄᑦ. ᐃᖅᑲᓇᐃᔭᖃᑦᑕᖅᑐᖅ ᑮᓇᐅᔭᓕᐅᕋᓱᐊᕋᓂ ᑕᐃᔭᐅᔪᖅ ᐃᑳᕐᕕᒃ, ᑭᐅᖃᑦᑕᖅᑐᖅ ᖃᐅᔨᓴᓂᕐᒧᑦ ᐊᑦᓱᕉᑕᐅᔪᓂᑦ ᐅᑭᐅᖅᑕᖅᑐᒥᑦ.

ᒥᐅᓪᑕᓐ ᐅᖃᐅᓯᖃᖅᑐᖅ ᑕᒪᑐᒥᖓ ᐊᒃᓱᕈᕐᓇᖅᑐᒥᒃ ᐅᖃᖅᖢᓂ, "ᖃᓂᒪᒐᑦᑕ ᐊᒻᒪ ᑕᖃᓯᒪᓪᓗᑕ ᖃᐅᔨᓴᖅᑎᓂᒃ ᖃᐅᔨᕙᓪᓕᐊᔪᓂᒃ ᐊᒻᒪ ᑐᑭᓯᒋᐊᕈᑎᒃᓴᓂᒃ ᐊᒻᒪ ᓱᓕᓂᐊᕐᓂᕋᖅᑐᓂᒃ ᑕᑯᑎᑦᑎᓪᓗᑎᒃ ᖃᓄᐃᓕᖓᓂᐊᕐᒪᖔᑕ ᑭᓯᐊᓂ ᐃᒪᓐᓇᐅᒐᔪᖕᓂᖅᓴᐅᓪᓗᓂ ᑕᐃᒃᑯᐊ ᐃᓄᐃᑦ ᐃᓚᐅᓚᐅᖅᑐᑦ ᐅᑎᖅᑎᑦᑎᓚᐅᖅᓯᒪᙱᖦᖢᑎᒃ ᖃᐅᔨᔭᐅᔪᓂᒃ." ᐃᑳᕐᕕᒃ ᐱᔾᔪᑕᐅᓪᓗᐊᑕᖅᑐᖅ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᓕᕆᖃᑎᒌᒋᐊᖃᕐᓂᕐᒧᓪᓗ.

ᐃᑳᕐᕕᒃ ᑐᑭᖃᖅᐳᖅ 'bridge' ᐊᒻᒪ ᐱᓕᕆᐊᒧᑦ ᐃᓂᐅᔪᑦ ᒪᒃᑯᒃᑐᓄᑦ ᐃᑳᕐᕕᐅᓗᑎᒃ ᖃᓪᓗᓈᑦ ᓄᓇᖓᓐᓂ ᖃᐅᔨᓴᖅᑎᓄᑦ ᐊᒻᒪ ᖃᐅᔨᓴᖅᑎᓄᑦ ᐊᒻᒪ ᐅᑭᐅᖅᑕᖅᑐᒥ ᓄᓇᓕᖕᓄᑦ. ᒪᒃᑯᒃᑐᑦ ᐱᕕᖃᖅᑐᑦ ᐃᓕᑦᑎᓂᕐᒥᒃ ᑭᒃᓕᓯᓂᐊᕈᑎᓂᒃ ᖃᐅᔨᓴᕐᓂᕐᓂᒃᓗ ᑭᓯᐊᓂ ᐃᓕᖅᑯᓯᒃᑰᖓᔪᓂᒃ ᐃᓗᓕᖃᖅᑐᑦ ᐱᕈᖅᓴᔭᐅᓯᒪᔪᓂᒃ ᓄᓇᓕᖕᒥ ᐃᓐᓇᑐᖃᕐᓄᑦ ᐊᖑᓇᓱᒃᑎᓄᓪᓗ ᓇᖕᒥᓂᖅ ᓄᓇᒥ ᐊᔪᙱᓐᓂᖃᖅᑐᑦ ᑕᐃᒪᓐᓇᓗ ᐱᓱᒍᓐᓇᕐᖢᑎᒃ ᑕᒪᒃᑮᓄᑦ ᓄᓇᕐᔪᐊᓄᑦ.

ᐱᓕᕆᐊᖅ ᑐᕌᒐᖃᖅᑐᖅ ᒪᒃᑯᑦᑐᐃᑦ ᓇᒻᒥᓂᖅ ᖃᐅᔨᓴᖁᓪᓗᒋᑦ ᓄᓇᓕᓐᓂᑦ ᑐᙵᕕᖃᕐᓗᑎᒃ ᓄᓇᓕᓐᓂᑦ ᓯᕗᓪᓕᐅᔾᔭᐅᒋᐊᓕᓐᓂᑦ. ᐃᓚᐅᖃᑕᐅᓕᓚᐅᖅᑐᖅ ᖃᐅᔨᓴᐃᓂᕐᒧᑦ ᐃᑲᔪᖅᑎᐅᓂᕐᒧᑦ ᐃᒪᐅᑉ ᖃᓄᐃᓐᓂᖓᓄᑦ ᐱᓕᕆᐊᒧᑦ ᐱᒋᐊᓵᖅᖢᓂ ᒪᒃᑯᒃᑐᓄᑦ ᐃᓚᐅᖃᑕᐅᔪᖅ ᐊᒻᒪᓗ ᒫᓐᓇᐅᔪᖅ ᑭᒡᒐᖅᑐᐃᓕᖅᑐᖅ ᐃᓄᖕᓂᒃ ᐃᓚᐅᖃᑕᐅᓂᕐᒧᑦ ᖃᐅᔨᓴᐃᓂᕐᒥᒃ ᐊᒻᒪᓗ ᑐᓂᓯᑉᓗᓂ ᐱᕕᖃᕐᓂᐅᔪᓂᒃ ᓄᓇᓕᖕᓂᑦ ᖃᐅᔨᓴᐃᓂᕐᒥᒃ. ᑮᓇᐅᔭᖃᖅᑎᑕᐅᖏᓐᓇᙱᖦᖢᑎᒃ, ᐱᓕᕆᐊᒃᓴᖃᕐᔪᐊᖅᑐᑦ ᑭᓯᐊᓂ ᐃᓄᑑᓪᓗᑎᒃ ᐱᓕᕆᐊᒃᓴᑦ ᐅᑕᖅᑭᑎᓪᓗᒋᑦ ᑮᓇᐅᔭᓂᒃ ᐃᓯᕈᑎᒃᓴᓂᒃ.

ᓇᒻᒥᓂᖅ ᐃᓕᓐᓂᐊᖅᓯᒪᓕᖅᑎᓪᓗᒍ, ᐊᓈᓇᖓ ᓄᑲᖅᖡᑦ ᐃᓕᓐᓂᐊᕐᕕᖓᑕ ᐃᓕᓴᐃᔨᒋᓚᐅᖅᑕᖓ ᐊᒻᒪᓗ ᐃᓕᓐᓂᐊᑎᐊᓚᐅᖅᑐᖅ ᐃᓕᓐᓂᐊᑎᐊᖅᑐᓂ ᐅᖃᐅᓯᖃᕈᒪᑎᓪᓗᒍ. ᖃᐅᔨᔪᒪᐃᓐᓇᖅᐸᓚᐅᖅᑐᖅ ᐊᐅᓪᓚᖃᑦᑕᕐᓂᐅᑉ ᒥᒃᓵᓄᑦ ᐊᒻᒪᓗ ᓄᓇᕐᔪᐊᕐᒧᑦ ᓄᓇᖏᑕ ᓯᓚᑖᓄᑦ. ᒥᐅᓪᑕᓐ ᐱᓇᔪᓚᐅᖅᐳᖅ ᐃᓕᓐᓂᐊᖅᑎᓄᑦ ᓯᑯᒥ ᐱᓕᕆᐊᖑᔪᒧᑦ ᐊᖏᖅᑕᐅᓚᐅᖅᖢᓂᓗ ᐊᐅᔭᒃᑯᓪᓗ ᐅᓛᓴᒃᑯᓐᓂ ᖃᐅᔨᓴᖃᑕᐅᓚᐅᖅᓯᒪᓪᓗᓂ. ᐊᑯᑭᑦᑐᓅᓚᐅᖅᑐᖅ ᐊᒻᒪᓗ ᑲᑎᖃᑎᖃᕆᐊᖅᑐᖅᑐᓂ ᓴᓂᓪᓕᒥᓂᒃ ᑕᐃᑲᙵᑦ. ᐃᔨᖏᑦ ᐅᒃᑯᐃᖓᓚᐅᖅᑐᑦ ᐳᓚᕋᖅᑐᓕᕆᓂᕐᒧᑦ, ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᐅᔨᓴᐃᓂᕐᒧᑦ. ᑎᑕᒃᑎᓂᒃ, ᖃᐅᔨᓴᖅᑎᓂᒃ ᑲᑎᖃᑎᖃᓚᐅᖅᐳᖅ, ᐊᒻᒪ ᖃᐅᔨᔪᓐᓇᖅᓯᓪᓗᓂ ᖃᐅᔨᖃᑦᑕᖅᓯᒪᔭᖏᓐᓂᒃ.

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᓚᐅᖅᑎᓪᓗᒍ ᓄᓇᕗᑦ ᓯᕗᓂᒃᓴᕗᖕᒧᐊᓚᐅᖅᓯᒪᕗᖅ ᐃᓄᖕᓂᒃ ᑕᑯᑲᑕᖕᓂᖅᓴᐅᓪᓗᓂ, ᖃᐅᔨᑦᑎᐊᑲᑕᖕᓂᖅᓴᐅᓪᓗᓂ ᑭᓯᐊᓂ ᐃᖅᑲᐅᒪᓪᓗᓂ ᐃᒃᓯᕚᕆᐊᒃᓴᖅ ᐃᓕᑦᑎᔪᒪᙱᖦᖢᓂᓗ. ᐱᔭᕇᖅᓯᓚᐅᖅᑐᖅ ᐃᓕᓐᓂᐊᖅᑕᒥᓂᒃ ᑭᓯᐊᓂ ᐃᓕᓐᓂᐊᕈᓐᓃᓚᐅᖅᑐᖅ ᐅᑎᕋᒥ ᒥᑦᑎᒪᑕᓕᖕᒧᑦ, ᐃᖅᑲᓇᐃᔮᒥᓂᒃ ᓅᖦᖢᓂ ᑭᓯᐊᓂ ᐃᑲᔪᖅᑎᙳᖅᖢᓂ ᐱᕙᓪᓕᐊᔪᓕᕆᔨᒧᑦ ᕼᐋᒻᒪᓚᒃᑯᓐᓂᑦ.

ᐃᖅᑲᓇᐃᔭᖅᑎᓪᓗᒍ ᐃᒪᕐᒥᐅᑕᓄᑦ ᐅᐸᒐᕐᓄᑦ ᐊᑦᑕᕐᓇᖅᑐᒦᑎᑦᑎᑕᐃᓕᔨ ᐊᐅᔭᒧᑦ, ᒥᐅᓪᑕᓐ ᑲᑎᖃᑎᖃᕐᖢᓂ ᐃᓄᖕᓂᒃ ᑲᓲᑎᓪᓗᓂ ᐱᕕᖃᕐᖢᓂ ᐳᓚᕋᖅᑏᑦ ᐅᒥᐊᕐᔪᐊᖏᓐᓂ ᐱᓕᒻᒪᒃᓴᓂᕐᒥᒃ ᑕᐃᑰᓇ ᒥᕐᙳᐃᖅᓯᕖᑦ ᑲᓇᑕᒥ ᐊᒻᒪ ᐊᑦᕙᓐᓱ ᑲᓇᑕᒃᑯᑦ ᖃᖓᑕᓪᓗᓂᓗ ᑲᓛᖦᖡᑦ ᓄᓈᓐᓄᑦ ᐃᓚᐅᖃᑕᐅᓚᐅᖅᑎᓪᓗᒍ ᐱᕙᓪᓕᐊᔪᓕᕆᔨ ᑲᑎᒪᕕᒃᔪᐊᕐᓂᕐᒥ ᑐᕌᓐᑐᒥ. ᐊᒃᓱᑲᓪᓚᒃ, ᐃᓅᓯᖓ ᐱᕕᖃᑦᑎᐊᓕᖅᑎᓪᓗᒍ, ᐊᓈᓇᒥᓂᒃ ᐊᓯᐅᔨᓚᐅᖅᑐᖅ ᐋᖓᔮᖅᖢᓂ ᐊᖁᑎᒧᑦ.

"ᐃᖅᑲᓇᐃᔮᖅ ᐱᐅᓗᐊᙱᑦᑐᖅ ᖃᓄᐃᓕᐅᕈᒪᒍᕕᑦ."

ᐃᖅᑲᓇᐃᔭᖅᑎᓪᓗᒍ ᐃᓚᐅᖃᑦᑕᖅᓯᒪᔪᖅ ᖃᔅᓯᒐᓚᖕᓂ ᐱᓕᒻᒪᒃᓴᕐᓂᕐᓂ ᐃᓚᐅᓪᓗᓂ ᓇᖕᒥᓂᖃᕐᓂᕐᒥᒃ ᐱᓕᒻᒪᒃᓴᓂᕐᒥ Inspire Nunavut−ᑯᑎᒍᑦ ᐊᒻᒪ ᐃᓚᒃᑲᓐᓂᖏᓐᓂ ᐳᓚᕋᖅᑏᑦ ᐅᒥᐊᕐᔪᐊᖏᓐᓂ ᐱᓕᒻᒪᒃᓴᓂᕐᒥ ᐃᖃᓗᖕᓂ. ᐃᓕᑦᑎᕚᓪᓕᖃᑦᑕᕐᒥᔪᖅ ᖃᕋᓴᐅᔭᒃᑯᑦ ᐊᐱᖅᓱᑲᑕᒃᖢᓂᓗ ᐃᓄᖕᓂᒃ. ᐊᑕᐅᓯᖅ ᐱᕕᒃᓴᖅ ᑐᕌᖅᑎᑦᑎᓪᓗᓂ ᐊᓯᐊᓄᑦ, ᐃᒪᕐᒥᐅᑕᓄᑦ ᓴᐳᒻᒦᔨᒧᑦ, ᑐᙵᓱᒃᑎᑦᑎᓂᖅ ᐳᓚᕋᖅᑏᑦ ᐅᒥᐊᕐᔪᐊᖏᓐᓂ, ᐃᖅᑲᓇᐃᔭᕈᒪᑎᑦᑎᓪᓗᓂᓗ ᐳᓚᕋᖅᑏᑦ ᐅᒥᐊᕐᔪᐊᖏᓐᓂ. ᒥᐅᓪᑕᓐ ᐃᑲᔪᕈᓐᓇᖃᑦᑕᖅᓯᒪᕗᖅ ᐅᖃᐅᔾᔨᒋᐊᕈᑎᓄᑦ ᖃᐅᔨᓴᕐᓂᕐᒧᑦ ᐊᑐᐊᒐᕐᓂᒃ ᖃᓪᓗᓈᑦ ᓄᓇᖓᓐᓄᑦ ᖃᐅᔨᓴᖅᑎᓄᑦ ᓄᓇᕗᒻᒨᖅᐸᓪᓕᐊᔪᓄᑦ ᐊᒻᒪ ᐃᑲᔪᖅᑐᑎᒃ ᐊᓯᖏᓐᓂᑦ ᓄᓇᓕᓐᓂᑦ ᓇᒻᒥᓂᖅ ᐱᓕᕆᐊᖃᖁᓪᓗᒋᑦ ᓲᕐᓗ ᐃᑳᕐᕕᒃ. ᑕᐃᒪᐃᓕᐅᖅᖢᓂ, ᐃᓚᒥᓂᒃ ᑲᑎᖃᑎᖃᕈᓐᓇᓚᐅᖅᐳᖅ ᑲᑎᓚᐅᖅᓯᒪᙱᑕᒥᓂᒃ. ᐊᐅᓪᓚᕈᓐᓇᖅᓯᓚᐅᖕᒥᔪᖅ ᓄᓇᕗᒻᒥᑦ ᐃᑦᑕᕐᓂᓴᓂᑦ ᐸᐸᑦᑎᔩᑦ ᐃᓕᓐᓂᐊᑲᐃᓐᓇᖅᑎᓪᓗᒋᑦ ᐅᐃᓂᐸᐃᒡᒥᑦ.

ᐊᐅᓚᓐᓂᐊᕐᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᒥᐅᓪᑕᓐ ᐅᖃᓕᒫᕐᖢᓂ ᐃᖃᐃᓕᓴᕐᖢᓂᓗ ᓲᕐᓗ squats, ᐊᔭᐅᕐᓂᖅ ᐃᒃᓯᕚᕐᓗᓂᓗ ᑕᖃᖓᓕᕋᓱᖕᓂᖓᓂ. ᐃᖃᐃᓕᓴᒐᔪᙱᖦᖢᓂ, ᐊᑐᖃᑦᑕᖅᑐᖅ ᐃᖃᐃᓕᓴᕐᓂᕐᒥᒃ ᐊᑐᒐᒃᓴᐅᓪᓗᓂ ᐊᐅᓚᓪᓗᒍ ᓂᙵᖕᓂᖅ ᒫᓐᓇ. ᑎᒥᓂᑦᑕᐅᖅ ᐊᐅᓚᔾᔭᒃᑎᑉᐸᒃᖢᓂᐅᒃ ᓂᐅᖓ ᐊᐅᓚᔾᔭᒃᖢᓂᐅᒃ, ᐊᒡᒐᓂ ᐱᙳᐊᖃᑎᖃᖅᖢᓂ ᐅᕝᕙᓘᓐᓃᑦ ᐊᒡᒐᒥᓂᒃ ᐱᙳᐊᖅᖢᓂ. ᑕᐃᑲᓃᖏᓐᓇᕋᓱᒃᓗᓂ ADHD−ᖓᓂᒃ ᓯᕘᕋᓗᓂᓗ, ᐃᒃᐱᒋᓇᓱᖃᑦᑕᖅᑕᖓ ᐊᕙᑎᖏᑦ, ᑯᕕᓯᓂᖅ ᐊᐅᓚᑲᑕᖕᓂᕐᓘᓐᓃᑦ.

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ, ᒥᐅᓪᑕᓐ ᐅᖃᕋᔭᖅᑐᖅ, "ᐱᓇᓱᐊᕐᓂᐊᖅᑰᔨᒃᐸᑦ, ᐊᒻᒪᓗ ᐱᐅᒋᙱᒃᑯᕕᐅᒃ, ᑕᐃᒪᐃᓕᒋᑦ." ᑭᖑᒧᑦ ᑕᑯᒋᐊᖅᑐᓂ ᐱᔭᕇᖅᓯᒪᙱᑦᑐᓂᒃ ᐱᓕᕆᐊᓂᒃ ᐊᒻᒪᓗ ᐱᕕᒃᓴᖃᕈᓐᓃᖅᑐᓂ, ᐃᓂᖅᑎᕆᒋᐊᖁᔨᕗᖅ ᒪᓕᒃᑲᓐᓂᖁᔨᓪᓗᓂ.

ᒥᐅᓪᑕᓐ ᐊᐅᓚᑕᐅᕗᖅ ᐃᓄᓐᓄᑦ ᐊᕙᑎᖏᓐᓃᑦᑐᓄᑦ ᐊᒻᒪ ᐅᓂᒃᑳᖏᓐᓄᑦ ᖃᓄᐃᓕᐅᖅᓯᒪᓂᖏᓐᓂᑦ. ᐱᔪᒃᓯᑎᑦᑎᕗᖅ ᑲᑎᖃᑎᖃᖅᖢᓂ ᓄᑖᓂᒃ ᐃᓄᖕᓂᒃ, ᐃᓅᖃᑎᒌᒃᐸᓪᓕᐊᑎᑦᑎᓪᓗᓂ ᐊᒻᒪ ᑕᐅᑐᖅᑰᖅᑕᒥᓂᒃ ᐊᓂᒍᐃᕙᓪᓕᐊᓪᓗᓂ ᐊᑕᐅᑦᑎᒃᑯᑦ. ᐊᒥᓱᓂᒃ ᐱᕕᒃᓴᖃᓕᖅᐸᓪᓕᐊᓪᓗᓂ, ᐃᓄᖕᓂᒃ ᑐᓂᓯᔭᕆᐊᒃᓴᖅ ᖁᕕᐊᒋᔭᖃᖅᐳᖅ ᓇᖕᒥᓂᖅ ᓈᒻᒪᒋᙱᑕᒥᓂᒃ. "ᐱᐅᓇᓱᖃᑦᑕᖅᑐᖓ ᑭᒃᑯᓕᒫᓄᑦ ᓲᖃᐃᒻᒪ ᐃᓅᓯᑦᑎᐊᕆᓚᐅᙱᓐᓇᒪ ᖃᐅᔨᒪᓪᓗᖓᓗ, ᑭᒃᑯᓕᒫᑦᑕᐅᖅ ᑕᐃᒪᐃᓚᐅᙱᒻᒥᔪᑦ. ᑕᒪᑦᑕ ᓇᖕᒥᓂᖅ ᐊᔾᔨᒌᙱᕈᓘᔭᖅᐳᒍᑦ ᐊᒃᓱᕈᖅᐸᒃᖢᑕᓗ ᑕᐃᒪᐃᓐᓂᖓᓄᓪᓗ ᐱᐅᓛᖑᕗᖅ ᐃᓄᖕᓄᑦ ᐱᐅᓪᓗᓂ," ᑕᐃᒪᓐᓇ ᐅᖃᖅᖢᓂ.

ᐅᑉᐱᕈᓱᑦᑎᐊᕋᓗᐊᖅᑎᓪᓗᒍ ᐅᖃᐅᓯᕆᔭᒥᓂᒃ, ᐊᑐᖅᑎᐊᖅᓯᒪᒻᒪᑦ ᓯᕘᕋᓪᓗᓂ. ᓈᓚᒃᑎᐅᓪᓗᓂ ᓇᖕᒥᓂᖅ−ᓇᓗᓇᐃᖅᓯᔨᐅᓪᓗᓂ ᐅᑭᐅᖅᑕᖅᑐᒥ, ᐃᓇᖐᓯᒪᓚᐅᖅᑐᖅ ᐊᓯᐊᓄᑦ ᓈᓚᒃᑎᒧᑦ ᐅᐸᒍᑎᔪᓐᓇᙱᖦᖢᓂ ᐊᐅᓪᓚᑲᑕᙱᓗᐊᒧᑦ. ᒥᐅᓪᑕᓐ ᐃᓱᒫᓗᓕᓚᐅᖅᑐᖅ ᑕᑯᔭᕆᐊᒃᓴᖅ ᐱᕕᒃᓴᐅᓂᖓᓂᒃ ᐊᔪᕈᓐᓃᖅᓴᕐᓂᕐᒥᒃ ᐃᓄᒋᐊᒃᑐᓂ ᐅᖃᐅᓯᖃᕐᓗᓂᓗ ᑲᑐᔾᔨᖃᑎᒌᖓᑕ ᒥᒃᓵᓄᑦ ᖃᐅᔨᓴᕐᓂᖓᓂᒡᓗ ᐱᓕᕆᐊᖃᕐᓂᖓᓄᑦ ᐊᐅᓪᓚᖅᑎᑦᑎᓂᕐᒧᑦ ᐊᒃᑐᖅᓯᓂᕆᕙᒃᑕᖏᓐᓂᒃ ᒥᑭᑦᑐᓂᒡᓗ ᐊᐅᒃᑕᔫᓂᒃ. ᐃᓱᐊᓂᑦ, ᐅᖃᐅᓯᕆᓚᐅᖅᑕᖓ ᐱᒻᒪᕆᐅᓂᖓᓂ ᐃᓄᐃᑦ ᖃᐅᔨᓴᖕᓂᖏᑦ ᐃᓚᐅᑦᑎᐊᓚᐅᖅᑐᑦ ᖁᓱᔪᓐᓃᖅᐹᓪᓕᖅᖢᓂᓗ. ᑐᓴᖅᑎᑦᑎᔾᔪᑎᐅᔪᖅ ᐃᖃᓗᒃᑑᑦᑎᐊᕐᒧᐊᕈᓐᓇᓚᐅᕐᒪᑦ ᐊᒻᒪᓗ ᖁᕕᐊᓱᒃᓯᒪᓪᓗᓂ ᓯᐊᒻᒪᒃᑎᕆᔭᕆᐊᒃᓴᖅ ᑕᒪᒃᑯᓂᖓ ᐱᒻᒪᕆᐅᔪᓂᒃ ᐃᓱᒪᒋᔭᐅᔪᓂᒃ ᓄᓇᕐᔪᐊᓕᒫᒥ.

ᑭᒡᒐᖅᑐᐃᓂᖅ ᐃᓄᐃᑦ ᓄᓇᓕᖕᓃᑦᑐᓂᒃ ᖃᐅᔨᓴᕐᓂᕐᒥᒃ, ᐱᔪᓐᓇᖅᑎᑦᑎᓗᓂ ᐅᑭᐅᖅᑕᖅᑐᒥ ᒪᒃᑯᒃᑐᓂᒃ ᑲᑎᖃᑎᖃᕐᓂᕐᓗ ᐃᓄᖕᓂᒃ ᓄᓇᕐᔪᐊᓕᒫᒥ, ᒪᐃᑯ ᒥᐅᓪᑕᓐ ᒪᓕᒃᐳᖅ ᖁᕕᐊᒋᔭᖏᓐᓂ ᓯᕗᓕᖅᑕᖓᓂ. ᓅᑉᐸᓪᓕᐊᓪᓗᓂ ᐲᖅᓯᓂᕐᒥᒃ ᓴᙱᓂᖅᑖᖅᑎᑦᑎᓂᕐᒧᑦ ᐊᑐᕐᓂᕐᓗᒃᓯᓂᕐᒧᓪᓗ ᐱᐅᓯᒋᐊᖅᑎᑦᑎᔪᒪᓪᓗᓂ, ᓴᖅᑭᑎᑦᑎᕗᖅ ᐊᓯᔾᔨᖅᓯᓂᕐᒥᒃ ᖃᐅᔨᒪᓂᐅᔪᓂᒃ ᐱᕕᒃᓴᓂᒡᓗ ᓴᖅᑭᑎᑦᑎᓂᕐᒥᒃ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥᒃ. ᖃᐅᔨᓴᖅᑐᓕᕆᓂᖅ, ᒪᒃᑯᒃᑐᑦ, ᐃᓕᖅᑯᓯᓕᕆᓂᖅ ᐊᒻᒪ ᐅᑭᐅᖅᑕᖅᑐᒥ ᓄᓇᓖᑦ, ᓇᓂᓯᓚᐅᖅᐳᖅ ᐃᓄᖕᓂᒃ ᑲᑎᑎᑦᑎᓪᓗᓂ ᐱᐅᔪᒥᒃ ᐊᒻᒪ ᓯᕗᓂᒃᓴᑦᑎᐊᕙᖕᒥᒃ.  

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.