"ᐱᓕᕆᐊᒃᑲ, ᑭᓱᓕᒫᑦ ᐃᓅᓯᓐᓂ ᒫᓐᓇ ᐱᓪᓚᕆᐅᓕᖅᑐᑦ," ᕼᐃᐊᓚᓐ ᐱᓚᑎᐊᐃ. ᐃᓚᒋᔭᐅᔪᖅ ᐄᒍᓪ ᒃᓛᓐᒧᑦ ᕗᐊᑦ ᐅᐃᓕᐊᒻ ᓄᓇᖃᖅᑳᖅᓯᒪᔪᓂᑦ ᐊᑎᑐᖃᖓᓗ ᖃᐅᓪᓗᖅᑕᖅ ᐊᒪᕈᖅ ᐊᕐᓇᖅ. ᑭᖑᓂᑦᑎᓐᓂ, ᐃᖅᑲᓇᐃᔭᓚᐅᖅᓯᒪᔪᖅ ᓯᓚᑦᑐᖅᓴᕐᕕᒡᔪᐊᒥ ᐊᒻᒪ ᐃᓕᖅᑯᓯᓕᕆᔨᒃᑯᓐᓂ ᐊᒻᒪ ᐱᙳᐊᖅᑐᓕᕆᔨᒃᑯᓐᓂ ᓄᓇᒥᓂ, ᒫᓐᓇ ᓴᓇᖃᑎᖃᓕᖅᑐᖅ ᑐᖅᓲᒃ ᐃᒥᕐᕕᖕᒥ, ᐅᑭᐅᖑᑎᓪᓗᒍ ᑐᖅᓲᒃ ᐃᒥᕋᓚᒡᕕᖕᒥ.

30 ᐊᕐᕌᒍᐃᑦ ᓈᓕᖅᑐᑦ, ᐃᖅᑲᓇᐃᔭᖅᑎᓪᓗᒍ ᕗᐊᑦ ᐅᐃᓕᐊᒻ ᒥᙳᐃᓯᕐᕕᒻᒥ ᑕᓐᑐ ᐸᐃᒥ, ᐋᓐᑎᐅᕆᐅᒥ, ᐊᖓᔪᖅᑳᖏᒃ ᐃᓕᓴᐃᓚᐅᖅᓯᒪᔪᑦ ᖃᓄᖅ ᐱᓕᕆᖃᑎᖃᕐᓂᕐᒥᒃ ᑐᖅᓲᒃ ᐃᒥᕋᓚᕝᕕᒻᒥ. ᐃᓕᑦᑎᓚᐅᖅᑐᖅ ᐃᒡᓗᓕᐅᕐᓂᕐᒥᒃ ᑕᐃᑲᙵᑦ, ᑕᐃᔭᐅᔪᑦ ᐅᐃᒡᒑᒻᔅ, ᑲᑎᖅᓱᐃᓂᕐᒥᒃ ᐱᖁᑎᓂᒃ ᕙᓯᒥ. ᓴᓇᓚᐅᕐᒥᔪᖅ ᐴᕐᓂᒃ ᐊᒻᒪᓗ ᓵᑦᑐᐱᐊᓂᒃ ᐊᖏᕐᕋᓄᑦ ᐊᒻᒪᓗ ᖃᔭᕆᐊᓄᑦ, ᐃᓕᓐᓂᐊᖅᑐᓂ ᐃᓄᐃᑦ ᐱᖅᑯᓯᑐᖃᖏᓐᓂᒃ Ojibway-ᒥᒃ ᐱᐅᓯᐅᔪᓂᒃ ᐃᓄᖁᑎᖏᑦᑕ ᐱᓕᕆᐊᕆᓯᒪᔭᖏᓐᓂᒃ ᐱᒋᐊᓚᐅᖅᓯᒪᒻᒪᓂᑦ. "ᐃᑉᐱᒍᓱᓚᐅᖅᑐᖓ ᐊᑕᖏᑦᑎᐊᖅᑐᒥᒃ ᐃᓂᖃᕈᓐᓃᕐᓂᕐᒥᒃ ᓄᓇᒥ ᑭᓇᐅᖕᒪᖔᕐᒪᓗ, ᑭᓇᐅᓂᕋ ᐊᓂᖅᓵᕐᓇᑉ ᐃᓅᓪᓗᖓ, ᑕᐃᑲᙵᓪᓗ, ᐱᔪᒃᓯᑦᑎᐊᓚᐅᖅᑐᖓ ᖃᐅᔨᓗᒋᑦ ᐃᓐᓇᑐᖃᐃᑦ, ᐃᓕᓴᐃᔨᑦ, ᐅᓂᒃᑳᖅᑐᐊᖅᑏᑦ ᐃᓕᑦᑎᑐᐃᓐᓇᕐᖢᖓᓗ. ᑕᐃᒪᐃᓚᐅᖅᑐᖓ ᐊᕐᕌᒍᓄᑦ 18-ᓄᑦ, ᐊᑯᓂᐅᓂᖅᓴᖃᐃ, ᐃᓕᓵᕋᒪ," ᐃᖅᑲᐅᒪᔪᖅ. ᐃᓕᑦᑎᓪᓗᓂ ᐃᓚᒋᔭᐅᓪᓗᓂ ᑲᑎᙵᔪᓄᑦ, ᖁᓱᙱᖦᖢᓂ ᐃᖕᒥᓂᒃ ᐱᓕᕆᔭᕆᐊᒃᓴᖅ.

2018−ᒥ, ᓯᓚᑦᑐᖅᓴᕐᕕᒡᔪᐊᒥ ᐃᖅᑲᓇᐃᔭᖅᑎᓪᓗᒍ, ᐅᑭᐅᒃᑯᑦ ᑐᖅᓲᖕᒥ ᑲᑎᖅᓱᐃᔪᓐᓇᖅᓯᓚᐅᖅᓯᒪᕗᖅ. ᐃᓱᒪᓚᐅᖅᑐᖅ ᖃᕋᓴᐅᔭᓂ ᕿᒪᒃᓯᔪᒪᓕᖅᖢᓂ ᖃᓂᒪᓐᓇᖅ ᓴᖅᑭᑉᐸᓪᓕᐊᓂᖓᓄᑦ ᐃᓱᒪᒥᒍᓪᓗ ᖃᓄᐃᖅᑰᔨᙱᖦᖢᓂ. ᐊᐅᓪᓚᖅᓯᒪᔭᕆᐊᖃᓚᐅᖅᑐᖅ ᐊᒻᒪᓗ ᓴᓇᖃᑦᑕᓚᐅᖅᑐᓂ ᑐᖅᓲᒻᒥᒃ, ᓴᓇᓪᓗᓂ ᐴᖅᓯᒪᔪᓂᒃ ᐃᑲᕐᕋᓄᑦ 12-ᓄᑦ ᐅᓪᓗᑕᒫᖅ ᑕᖅᑭᒐᓴᕐᓄᑦ. ᖁᕕᐊᒋᔭᖃᓕᓚᐅᖅᑐᖅ ᐊᒻᒪᓗ ᑐᓂᔭᐅᓕᓚᐅᖅᑐᖅ ᐃᓄᑑᓪᓗᓂ ᑕᑯᕋᓐᓈᖅᑎᑦᑎᓂᕐᒥᒃ ᑕᐃᑲᓂ ᑕᓐᑐ ᐸᐃᒥ ᓴᓈᓄᑦ ᑕᑯᔭᒐᖃᕐᕕᒻᒥ. ᑖᓐᓇ ᑕᑯᒃᓴᐅᑎᑕᐅᔪᖅ ᓯᕗᓪᓕᖅᐹᖑᓚᐅᖅᐳᖅ ᑕᐃᒪᓐᓇᐅᓚᐅᖅᓯᒪᙱᖦᖢᓂ, ᐱᑕᖃᓚᐅᖅᓯᒪᙱᖦᖢᓂ ᑐᖅᓲᖕᒥᒃ ᑕᑯᕋᓐᓈᖅᑎᑦᑎᓂᕐᒥᒃ.  

ᐃᓕᓐᓂᐊᕐᕕᓪᓗᐊᑕᕐᒧᐊᕋᒥ, ᖃᓪᓗᓈᑐᑦ ᐃᓕᓐᓂᐊᓚᐅᖅᑐᖅ ᓄᓇᖃᖅᑳᖅᓯᒪᙱᖦᖢᓂᓗ. "ᐃᒃᐱᒋᓚᐅᖅᑕᕋ ᖃᓄᐃᓕᐅᙱᖦᖢᖓ ᓱᓕᙱᖦᖢᖓ, ᖃᓄᐃᓕᐅᖅᐸᙱᖦᖢᖓᓗ. ᑭᓯᐊᓂ ᓴᓇᖃᑎᖃᕌᖓᒪ ᑐᖅᓲᖕᒥᒃ, ᖁᕕᐊᓱᑦᑎᐊᖅᐳᖓ. ᖁᕕᐊᓱᖕᓂᖅᓴᐅᓚᐅᖅᓯᒪᙱᑦᑐᖓ ᐃᓅᓯᓐᓂ, ᐊᒥᓱᓄᓪᓗ ᐅᐸᒍᔾᔭᐅᔾᔪᑎᒋᕙᒃᐸᕋ," ᓇᓗᓇᐃᖅᓯᓪᓗᓂ. ᐃᓕᖅᑯᓯᑐᖃᕐᒥᓂᒃ ᐱᓕᕆᐊᖃᖅᑎᓪᓗᒍ ᓄᑕᐅᙱᑦᑐᓂᒃ ᒥᑎᕐᓂᒃ, ᓴᓇᕙᒃᑭᕗᖅᑕᐅᖅ ᐅᓪᓗᒥᓯᐅᑎᓂᒃ ᐱᖁᑎᓂᒃ. ᒪᓐᑐᕆᐋᓪᒥ, ᐊᓯᖏᓪᓗ ᑐᖅᓲᒃ ᓯᕙᓛᙳᐊᖏᑦ, ᐊᒻᒪ ᓴᖅᑭᓛᖅᑐᒥᒃ ᐳᕆᑎᔅ ᑲᓚᒻᐱᐊᒥ ᑐᖅᓲᓕᐅᖅᑐᖅ.

ᐱᔪᒃᓯᑎᑦᑎᓂᒃᑯᑦ, ᐱᓚᑎᐅ ᓄᓇᓕᖓᓐᓃᙶᖅᑐᖅ ᐊᕙᑎᖓᓂᒡᓗ. ᐋᓐᑎᐅᕆᐅᒥ ᓄᓇᖃᖅᑐᖅ, ᑐᖅᓲᖃᑦᑎᐊᖅᑐᖅ. ᐱᕈᖅᓴᓚᐅᖅᑐᖅ ᓄᓇᒥ, ᐊᖓᔪᖅᑳᖏᑦ ᓂᑲᒍᓱᑦᑎᐊᓚᐅᖅᑐᑦ ᐊᐅᓪᓚᖅᑎᖦᖢᒍ. ᓄᓇᙳᐊᓕᐅᓲᖅ ᐊᒻᒪ ᑎᑎᕋᐅᔭᖅᓯᒪᔭᖏᑦ ᑎᑎᕋᐅᔭᖅᓯᒪᔭᖏᓪᓗ ᐱᔪᒃᓯᑎᑕᐅᑦᑎᐊᓲᖑᕗᑦ ᓄᓇᒧᑦ ᐊᒻᒪ ᑕᑯᕙᒃᑕᖏᓐᓂᒃ, ᓲᕐᓗ ᓄᓇᕋᕐᓂᒃ, ᐃᓅᓕᓴᐅᑎᓂᒃ, ᐱᕈᖅᑐᓂᒃ, ᓂᕐᔪᑎᓂᒃ. ᐅᑭᐅᖅᓯᐅᑎᖓ ᑐᖅᓲᒃ ᐃᒥᕐᕕᖓᓂ ᓯᐅᒻᒥᒑᓕᐅᓚᐅᖅᐳᖅ ᐊᒻᒪ ᓇᓴᓕᐅᖅᖢᓂ. ᖁᕕᐊᒋᔭᖃᓚᐅᖅᑐᖅ ᓄᑕᖅᑲᓂᒃ ᓴᓇᖃᑎᖃᖅᖢᓂ ᐅᑭᐅᖅᑕᖅᑐᒧᑦ ᐊᒃᑐᐊᖃᑦᑕᐅᑎᔪᓂᒃ ᐊᒻᒪ ᑕᕐᕆᔮᒃᓴᓂᒃ ᑐᓴᖅᑎᑦᑎᑲᑕᒃᖢᓂ ᑎᑭᒃᑕᒃᑯᑦ ᐊᖑᓇᓱᒍᓯᖏᓐᓂᒃ. ᖁᕕᐊᒋᔭᓕᒃ ᐱᓕᕆᐊᖃᕆᐊᒃᓴᖅ ᒥᑭᑦᑐᓂᒃ ᐱᓕᕆᐊᒃᓴᓂᒃ ᓄᑕᖅᑲᓄᑦ, ᐱᑎᖦᖢᒋᑦ ᐱᔭᕇᖅᓯᓂᕐᒥᒃ ᐱᓕᕆᒃᑲᓐᓂᕈᒪᓂᐊᕐᒪᑕ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ, ᑎᓕᐅᕆᓇᔭᖅᑐᖅ ᓇᖕᒥᓂᖅ ᐱᓕᕆᖁᓗᒍ ᓇᒡᓕᒋᔭᒥᓂᒃ. ᐱᕈᖅᓴᓪᓗᓂ 8-ᓂᒃ, ᑎᓕᐅᖅᑕᐅᓚᐅᖅᐳᖅ ᓯᓚᑦᑐᖅᓴᕐᕕᓕᐊᖁᔭᐅᓪᓗᓂ ᐃᖅᑲᓇᐃᔮᓂ ᓇᓂᓯᔭᖅᑐᖁᔭᐅᓪᓗᓂᓗ, ᑕᒪᓐᓇᓗ ᖁᕕᐊᒋᓚᐅᙱᑕᒥᓂᒃ. "ᖁᕕᐊᒋᓚᐅᙱᑕᕋ ᐱᓕᕆᐊᕆᓚᐅᖅᑕᒃᑲ, ᑭᓯᐊᓂ ᑐᖅᓲᖕᒥ ᐱᓕᕆᑎᓪᓗᖓ," ᐃᖅᑲᐅᒪᔪᖅ.

ᑕᐃᒪᓕ ᐊᒃᓱᕈᓗᐊᒧᑦ ᑎᑭᐅᑎᓇᓱᓕᕋᒥ, ᐱᓚᑎᐅ ᐅᖃᖅᐳᖅ "ᓄᓇᐅᖏᓐᓇᐅᔭᖅᑐᖅ." ᓄᓇᒧᐊᕐᓂᖅ ᐃᑲᔪᖅᐸᒃᐳᖅ ᕿᓄᐃᓵᕈᓐᓇᕐᓂᕐᒥᒃ. ᐃᓐᓇᕐᓂᒃ ᐊᒻᒪ ᐃᓄᖕᓂᒃ ᐅᖃᓪᓚᒃᑐᖃᓚᐅᕐᒥᔪᖅ. ᐃᓐᓇᐅᑉ ᐅᖃᐅᑎᓚᐅᖅᐹᖓ ᐴᓕᐅᖃᑦᑕᕐᓂᖅ ᒪᒥᓴᖅᐸᓪᓕᐊᖕᒪᑦ ᐃᓄᖁᑎᒥᓄᑦ ᓲᖃᐃᒻᒪ ᓇᐹᖅᑐᖃᕐᓂᖓᓄᑦ. "ᐱᓕᕆᑐᐃᓐᓇᖅᑐᑎᑦ ᐱᔭᕆᐊᖃᖅᑕᕐᓂᒃ," ᐅᖃᐅᔾᔭᐅᓪᓗᓂ, ᑐᑭᖃᑦᑎᐊᕐᖢᓂ ᑖᔅᓱᒧᖓ.

ᐅᖃᐅᔾᔪᐃᓂᖓ ᑭᓇᒧᒃᑭᐊᖅ ᐊᒃᑐᐊᓂᖃᖅᑰᔨᙱᑦᑐᒧᑦ ᒥᓂᕐᒧᑦ, ᐃᓐᓇᕐᓄᑦ ᐃᒻᒥᓄᓪᓘᓐᓃᑦ ᐅᕝᕙᓘᓐᓃᑦ ᐊᒃᓱᕉᑎᖃᖅᑐᓄᑦ ᐊᖅᑯᑎᖏᓐᓄᑦ ᓇᓂᓯᓇᓱᖕᓂᐅᕗᖅ ᖁᕕᐊᓱᖕᓂᕆᔭᒥᓂᒃ ᒫᓐᓇ ᐊᑐᖅᑎᓪᓗᒍ. "ᒫᓐᓇ ᐱᓕᕆᐊᕆᔪᓐᓇᖅᑕᓕᒫᕗᑦ," ᒪᓂᒪᑎᑦᑎᕗᖅ, ᐃᓱᒪᓪᓗᓂ ᐊᒃᓱᕈᕐᓇᖅᑐᓂᒃ ᑎᒍᐊᖅᑑᑉ ᐃᕐᓂᖓ ᐊᒃᓱᕈᕐᓇᖅᑐᒃᑰᖃᑦᑕᖅᓯᒪᓂᖓᓂᒃ. ᐅᔾᔨᕆᓯᒪᔭᖓ ᐅᐃᕆᓯᒪᔪᓕᕆᔨᑦ ᐃᓄᐃᑦ ᐃᓕᖅᑯᓯᕐᒥᓂᒃ, ᓄᓇᒥᒃ, ᐊᒻᒪ ᖃᑕᙳᑎᖏᓐᓂᒃ ᐊᒻᒪ ᐊᔪᕐᓇᖅᑐᒃᑰᕈᓐᓇᖅᖢᑎᒃ ᑎᑭᐅᑎᓇᓱᒋᐊᒃᓴᖅ.

ᒪᒃᑯᒃᑐᒥᒃ ᐊᖏᕐᕋᐅᔾᔨᔪᒪᔪᒥᒃ ᐃᓕᓐᓂᐊᕆᐊᕐᓗᓂ, ᐅᖃᐅᔾᔪᐃᓂᖓ, "ᐃᓄᖁᑎᑎᑦ ᓇᓂᓗᒋᑦ. ᕿᓚᒥᑯᓗᒃ ᐱᕕᖃᓕᖃᑦᑕᕋᑦᑕ ᐃᓅᓯᑦᑎᓐᓂ, ᑕᐃᒪᐃᓐᓂᖓᓄᓪᓗ ᐱᒻᒪᕆᐅᕗᖅ ᓇᓂᓯᓗᑎᑦ ᐱᐅᔪᒥᒃ ᐱᔪᒪᓕᕐᓇᖅᑐᒥᒃ." ᓇᓂᓯᓂᖅ ᐃᓄᖕᓂᒃ ᐊᒥᖅᑳᕈᑎᖃᖅᑐᓂᒃ ᐱᔪᒪᔭᖏᓐᓂᒃ ᐊᒻᒪ ᐱᐅᔪᓂᒃ ᖃᓂᒋᔭᖃᕆᐊᒃᓴᖅ ᐱᖁᔭᐅᔪᖅ.

ᐅᖃᐅᔾᔪᐃᔾᔪᑎᐅᔪᖅ ᐃᒻᒥᓂᒃ ᐱᓪᓗᓂ. "ᐱᓕᕆᖃᑎᖃᕐᓂᖅ ᑕᐃᒪᐃᑦᑐᓂᒃ ᐱᖁᑎᓂᒃ, ᓄᓇᓕᖃᕆᐊᖃᖅᑐᑎᑦ. ᑕᐅᕗᙵᕆᐊᖃᖅᑐᑎᑦ, ᐊᐱᖅᓱᕆᐊᖃᖅᑐᑎᑦ, ᐱᓕᕆᖃᑎᒌᒃᐸᓪᓕᐊᔭᕆᐊᖃᖅᑐᑎᑦ... ᐊᓂᓯᓈᐱᒥ, ᐊᐃᑉᐸᕇᒋᐊᖃᖅᑐᑎᑦ. ᖃᐅᔨᒪᓕᖅᐹᓪᓕᖁᓪᓗᑕ, ᑕᐃᒪᐃᓕᐅᖃᑦᑕᖅᐳᑎᑦ. ᓂᕆᐅᒋᑐᐃᓐᓇᕐᓇᒍ. ᐅᖃᐅᓯᐅᖏᓐᓇᐅᔭᖅᑐᖅ... ᓄᓇᓖᑦ ᐱᒻᒪᕆᐊᓘᕗᑦ. ᐅᐱᓐᓇᕋᓂ ᐅᕙᓐᓄᑦ, ᐊᐅᓪᓚᕋᐃᒐᒪ ᐊᒻᒪᓗ ᓄᐊᑦᑎᔭᕌᖓᒪ ᓱᓇᒃᑯᑖᓂᒃ, ᑕᐅᕗᙵᑐᐃᓐᓇᕈᓐᓇᖏᓐᓇᒪ ᐃᓄᑑᓗᖓᓗ, ᐅᐱᓐᓇᕋᓂ ᑲᒪᒋᖃᑦᑕᕋᒃᑯ... ᐱᖃᑎᖃᕆᐊᖃᕋᒪ. ᐱᒻᒪᕆᐅᖏᓐᓇᐅᔭᖅᑐᖅ ᐃᓄᐃᑦ ᐃᓕᔅᓯᓐᓂᒃ ᐱᖃᑎᖃᕐᓗᑎᒃ ᐃᑲᔪᐃᓐᓇᐅᔭᕐᓂᐊᖅᑐᓂᒃ, ᐃᔨᖅᓯᒪᒐᓗᐊᕈᑦᑕᓘᓐᓃᑦ ᐅᕝᕙᓘᓐᓃᑦ ᓄᓇᙳᐊᓕᐅᓕᕈᒪ, ᐅᕙᖓᑐᐊᖑᙱᑦᑐᖅ, ᑭᒃᑯᓕᒫᑦ. ᐃᓚᒌᖑᒻᒪᑕ ᐃᓄᐃᑦ. ᑖᓐᓇ ᐊᐃᑉᐸᖓ ᐅᖃᐅᓯᒃᓴᕋ: ᐱᓕᕆᖃᑎᒌᒃᐸᓪᓕᐊᓗᑎᒃ ᓄᓇᓕᖕᓂ ᐊᒻᒪ ᐃᓄᖕᓂᒃ."

ᖃᐅᔨᓚᐅᖅᑐᖅ ᐊᒃᑐᐊᓂᖓ ᓄᓇᓕᖕᒧᑦ ᖃᑕᙳᑎᖏᓐᓄᓪᓗ ᓴᙱᔫᓂᖓᓂᒃ ᑭᓇᐅᓂᕐᒧᑦ. ᕿᑐᕐᖓᖏᑦ ᑕᐃᒪᐃᓕᐅᖃᑎᒋᓚᐅᖅᖢᒋᒃ, ᐸᓂᖓ ᐅᖃᖅᖢᓂ, " ᕗᐊᑦ ᐅᐃᓕᐊᒻ ᓄᓇᖃᖅᑳᖅᓯᒪᔪᓃᙶᖅᑐᖓ, ᓄᓇᙳᐊᓕᐅᖅᐸᒃᖢᑕᓗ." ᐱᖅᑯᓯᒃᑯᑦ ᖃᓄᐃᓕᐅᕈᑎᑦ ᑐᓴᖅᑎᑦᑎᓪᓗᑎᒃ ᐸᓂᖓᑕ ᐃᓕᓐᓂᐊᕐᓂᖓᓂᒃ ᑲᔪᓰᓐᓇᕈᓐᓇᕐᓂᕐᒧᑦ.  

ᖃᕋᓴᐅᔭᖓᓄᐊᖅᐸᓪᓕᐊᓪᓗᓂ ᐊᒻᒪ ᑲᑉᐳᑎᓯᒪᔪᓐᓃᖅᖢᓂ ᓄᓇᒥᑦ ᖃᓄᐃᓕᐅᕈᑕᐅᔪᓄᑦ, ᐊᖑᓇᓱᖕᓂᖅ ᐊᒻᒪ ᓴᓇᖃᑎᖃᕐᓂᖅ ᑐᖅᓲᖕᒥᑦ ᐃᓚᒋᔭᐅᓯᒪᕗᖅ ᕼᐃᐊᓚᓐ ᐱᓚᑎᐅ ᐱᓕᕆᐊᖓᓄᑦ ᐃᓅᓯᖓᓄᓪᓗ ᐱᓪᓚᕆᐅᓪᓗᓂ. ᓄᓇ ᒪᒥᓴᖅᓯᒪᔪᖅ ᑖᔅᓱᒧᖓ ᐱᓕᕆᖃᑎᖃᕐᖢᓂᓗ ᑐᖅᓲᒃ ᐃᒥᕋᓚᒡᕕᖓᓂ, ᐃᓚᒋᓪᓗᓂᐅᒃ ᐃᓄᖁᑎᖏᑕ ᓇᐹᖅᑐᖃᕐᕕᖏᓐᓂ ᐃᓅᓯᖓᓂ, ᐊᓯᔾᔨᖅᓯᒪᔪᖅ ᐊᑐᕋᓱᒃᐸᒃᓗᓂ ᐊᕐᕌᒍᓄᑦ 30−ᑲᓴᖕᓄᑦ. ᑭᖑᕚᒃᓴᑦᑎᓐᓄᑦ ᑲᑎᙵᖃᑎᖃᖅᖢᓂ ᐅᑭᐅᖅᑕᖅᑐᒥ ᖁᕕᐊᓱᒃᑎᑦᑎᓯᒪᕗᖅ ᐊᒻᒪ ᐱᔪᒃᓯᑎᑦᑎᔪᓐᓇᖅᓯᓪᓗᓂ ᓯᓚᑐᓂᕐᒥᓂᒃ ᑐᓂᔭᐅᓪᓗᓂ, ᓄᑖᓂᒃ ᐃᖅᑲᐅᒪᔪᓐᓇᖅᑎᑦᑎᓪᓗᓂ ᐃᓕᓐᓂᐊᖅᑎᓂᒃ ᓲᕐᓗ ᑐᖅᓲᖕᒥ ᐱᓕᕆᓲᖑᓂᖓᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑦᓵᑦ ᑎᑎᕋᓚᐅᕋᕕᐅᒃ ᑖᓐᓇ ᑎᑎᕋᖅᓯᒪᔪᖅ.