"ᐊᒥᓱᐊᓗᖕᓂᒃ ᐃᓕᑦᑎᔪᓐᓇᖅᐳᒍᑦ ᓄᓇᒥᑦ," ᐅᖃᓚᐅᖅᐳᖅ ᐃᓴᐱᐅᓪ ᓵᐸᑑ, ᐸᖕᓂᖅᑑᒥᐅᑕᖅ, ᓄᓇᕗᒻᒥ. ᐊᓈᓇᖓᑕ ᖃᑕᙳᑎᖏᑦ ᓄᓇᕗᒻᒥᐅᑕᐅᕗᑦ ᐊᑖᑕᖓᑕ ᖃᑕᙳᑎᖏᑦ ᑯᐸᐃᒃᒥᐅᑕᐅᓪᓗᑎᒃ ᐱᕈᖅᓴᓚᐅᖅᓯᒪᖕᒥᔪᖅ 2017−ᒧᑦ ᑎᑭᖦᖢᒍ ᐃᖃᓗᖕᓄᑦ ᓅᓚᐅᖅᓯᒪᓪᓗᓂ. ᓲᖃᐃᒻᒪ ᐱᕈᖅᓴᓚᐅᙱᓐᓂᖓᓄᑦ ᐃᓄᐃᑦ ᐃᓕᖅᑯᓯᖓᓐᓂ, ᐃᓕᑦᑎᕙᓪᓕᐊᓂᖅ ᖁᕕᐊᒋᔭᖓᑕ ᐃᓚᒋᕙᐅᒃ. ᒥᖅᓱᕆᐅᖅᓴᔪᖅ ᖁᓕᑦᑕᐅᔭᓂᒃ ᐊᒻᒪ ᓂᕿᓕᐅᕆᐅᖅᓴᓪᓗᓂ ᐆᓚᐅᖅᓯᒪᙱᑕᒥᓂᒃ. ᐊᖑᓇᓱᖕᓂᕐᒥᒃ ᐃᖃᓗᒐᓱᖕᓂᕐᒥᒡᓗ ᐃᓕᑦᑎᕙᓪᓕᐊᒋᕗᖅ. ᐅᖃᖅᑐᖅ. ᐃᓕᑦᑎᕙᓪᓕᐊᕗᖅ ᓄᑖᓂᒃ ᐊᔪᕈᓐᓃᖅᑕᐅᕙᒃᑐᓂᒃ ᐃᒻᒥᓄᓪᓗ ᐊᒃᓱᕈᕋᓗᐊᖅᖢᓂ, ᐃᓕᑦᑎᓯᒪᕐᔪᐊᖅᐳᖅ ᐊᕐᕌᒎᖕᓂ ᒪᕐᕉᖕᓂ ᑕᐃᒪᙵᑦ ᓅᓚᐅᕐᓂᕐᒥᓂ ᓄᓇᓕᒋᔭᒥᓄᑦ. 

ᐊᓕᐊᓇᐃᒍᓱᒃᐳᖅ ᑲᔪᖏᖅᓴᐃᔨᖃᕆᐊᒃᓴᖅ ᐊᔪᙱᑦᑎᐊᖅᑐᓂᒃ ᐊᒻᒪ ᖃᐅᔨᒪᓂᓕᖕᓂᒃ ᐊᒥᖅᑳᕈᑎᒋᔪᓐᓇᖅᑕᖏᓐᓂᒃ ᐊᒻᒪ ᑐᙵᓇᑦᑎᐊᖅᑐᓂᒃ, ᑐᙵᓇᖅᑐᓂᒃ ᐃᓄᖕᓂ ᓄᓇᒋᔭᒥᓂ. ᐊᒥᓱᐊᓗᐃᑦ ᓴᓇᙳᐊᖅᑏᑦ ᐱᔪᒪᓂᖃᑦᑎᐊᖅᑐᑦ ᐊᒥᖅᑳᖃᑎᖃᕐᓂᕐᒥᒃ ᐊᔪᙱᓐᓂᕐᒥᓂᒃ ᑎᑭᑉᐸᓪᓕᐊᓕᓵᖅᑐᓄᑦ. ᒪᒃᑯᒃᑐᑦ ᐃᓐᓇᐃᓪᓗ ᐃᑲᔪᖅᐳᑦ ᐃᓕᑦᑎᒃᑲᓐᓂᕐᓂᕐᒥᒃ ᐃᓄᐃᑦ ᐃᓕᖅᑯᓯᖏᓐᓂᒃ. 

ᐃᖅᑲᓇᐃᔮᒥᓄᑦ ᐃᓅᓯᖓᓄᓪᓕ, ᓴᐹᑑ ᐃᓕᓐᓂᐊᖅᑎᓂᒃ ᐃᑲᔪᖅᑎᐅᕗᖅ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ. ᒪᒃᑯᒃᑐᓂᒃ ᐱᓕᕆᖃᑎᖃᕆᐊᒃᓴᖅ ᖁᕕᐊᒋᔭᖃᖅᐳᖅ. ᐃᖅᑲᓇᐃᔮᖓ ᐆᒻᒪᕆᒃᓯᓐᓇᖅᐳᖅ. ᐱᓕᕆᓲᖑᖕᒥᔪᖅ ᖃᕋᓴᐅᔭᒃᑯᑦ ᐃᓚᐅᓪᓗᓂ ᐃᓅᖃᑎᒌᓄᑦ ᒪᓕᒐᓕᕆᓂᒃᑯᑦ ᐅᖃᖃᑎᖃᕐᓂᖅ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᙱᑦᑐᓂᒡᓗ ᐃᓄᖕᓂᒃ. ᒪᒃᑯᒃᑐᓂᒃ ᐱᓕᕆᖃᑎᖃᖅᐸᒃᖢᓂ, ᐃᓱᒪᒋᔭᖏᓐᓂᒃ ᐃᓱᒪᖃᐃᓐᓇᐅᔭᖅᐳᖅ. ᐃᓕᓴᐃᔨᙳᕈᒪᔪᖅ ᖃᖓᑭᐊᖅ.

ᐃᓱᒪᖅᓱᓕᕌᖓᒥ, ᓵᐸᑑ ᓯᐅᒻᒥᐅᑕᓕᐅᖅᐸᒃᐳᖅ ᖁᕕᐊᓱᒍᑎᒋᓂᐊᕋᒥᐅᒃ. ᐊᓈᓇᒋᔭᐅᓪᓗᓂ ᒪᕐᕉᖕᓄᑦ, ᐃᓄᑑᓗᐊᖅᐸᙱᓚᖅ ᑭᓯᐊᓂ ᓯᓂᓕᕌᖓᒥᒃ ᓴᓇᙳᐊᖅᐸᒃᐳᖅ ᖁᕕᐊᓱᒡᕕᖕᒥ ᓂᐅᕕᐊᒃᓴᖃᖅᑎᓪᓗᒋᑦ ᓄᓇᓕᖕᓂ. ᐃᖕᒥᓂᒃ ᐊᒃᓱᕈᓗᐊᕋᓱᒃᐸᙱᖦᖢᓂ ᓲᖃᐃᒻᒪ ᐃᖅᑲᓇᐃᔮᖑᓗᐊᖁᙱᖦᖢᓂᐅᒃ ᖁᕕᐊᓇᕈᓐᓃᕐᓗᓂᓗ. ᖁᕕᐊᒋᔭᖃᖅᑐᖅ ᐃᓕᑦᑎᕙᓪᓕᐊᓂᕐᒥᒃ ᓄᑖᓂᒃ ᐊᔪᕈᓐᓃᖅᑕᐅᕙᒃᑐᓂᒃ ᐊᒻᒪᓗ ᓴᓇᕈᓘᔭᕈᓐᓇᕐᓂᕐᒥᒃ, ᓯᐅᒻᒥᐅᑕᓕᐅᑐᐃᓐᓇᖅᐸᙱᖦᖢᓂ. ᐃᓛᓐᓂᒃᑯᑦ ᐊᑭᓐᓇᕐᒥᐅᑕᓕᐅᖅᐸᒃᐳᖅ ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᑎᑎᕋᐅᔭᖅᐸᒃᖢᓂ. ᐃᓕᓐᓂᐊᖅᑎᑦᑎᕙᑦᑐᖅ ᓴᐸᖓᓕᕆᓂᕐᒥᒃ ᒪᒃᑯᑦᑐᓄᑦ ᐃᓕᓐᓂᐊᓯᓐᓈᖅᑐᓂ ᕿᓯᓕᕆᓂᕐᒥᒃ.  

ᖃᖓᙳᕌᖓᑦ, ᓵᐹᑑ ᐋᑐᕚᒧᑦ ᓅᓚᐅᖅᓯᒪᕗᖅ ᐃᓕᓐᓂᐊᕆᐊᖅᖢᓂ ᓄᓇᕗᑦ ᓯᕗᓂᒃᓴᕗᒻᒧᑦ, ᐃᓕᓐᓂᐊᕐᕕᖕᒥ ᐃᓄᐃᑦ ᐃᓕᑦᑎᕙᒃᖢᑎᒃ ᐃᓕᖅᑯᓯᕐᒥᓂᒃ ᐊᒻᒪ ᐱᐅᓯᕆᔭᐅᕙᓚᐅᖅᑐᓂᒃ. ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᓅᑉᐸᓪᓕᐊᔪᓄᑦ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᐃᒪᓐᓇᐅᕗᖅ, "ᐅᐸᒋᐊᖃᖅᐳᑎᑦ ᐱᔪᒪᒍᕕᑦ, ᑲᑉᐱᐊᓇᕋᓗᐊᖅᐸᑦ". ᐊᑐᖅᓯᒪᔭᖓ ᓅᓐᓂᕆᓚᐅᖅᑕᖓ ᐱᐅᓚᐅᖅᐳᖅ ᓲᖃᐃᒻᒪ ᑲᑎᖃᑎᖃᓚᐅᕐᓂᖓᓄᑦ ᐊᒥᓱᓂᒃ ᐃᓄᑦᑎᐊᕙᖕᓂᒃ ᓱᓕ ᑲᑎᙵᖃᑎᒋᕙᒃᑕᖏᓐᓂᒃ. ᐃᓕᑦᑎᕚᓪᓕᕐᔪᐊᓚᐅᕆᕗᖅ ᑖᒃᑯᓇᙵᑦ. 

ᐅᖃᐅᔾᔨᕗᖅ ᓇᓂᓯᓂᕐᒥ ᓄᓇᓕᒋᔭᕐᓂ, ᐃᓄᖕᓂ ᐃᕝᕕᑦᑎᑐᑦ, ᑭᓯᐊᓂᓗᑦᑕᐅᖅ ᒪᑐᐃᙶᕐᓗᑎᑦ ᐊᓯᖏᓐᓄᑦ ᐃᓕᖅᑯᓯᕆᔭᐅᔪᓄᑦ. ᖃᐅᔨᓕᓚᐅᖅᐳᖅ ᑲᙳᓱᙱᓐᓂᖅᓴᐅᓕᕐᓂᕐᒥᓂᒃ ᓅᓚᐅᖅᖢᓂ. ᓇᓂᓯᓂᖅ ᐊᑦᑕᕐᓇᙱᑦᑐᒥᒃ ᐃᓂᒃᓴᒥᒃ ᐊᑐᖁᕙᐅᒃ ᖃᓂᒋᔭᖃᕐᓗᓂᓗ ᐃᓄᖕᓂᒃ ᐃᑲᔪᕈᓐᓇᖅᑐᓂᒃ. ᐅᑎᕐᓂᖅ ᐊᒃᓱᕈᕐᓇᕈᓐᓇᖅᐳᖅ ᐃᒡᓗᓕᕆᓂᕐᒧᑦ ᑕᐅᑐᒃᖢᒍ ᑭᓯᐊᓂ ᐃᓱᒪᔪᖅ ᓄᖅᑲᖓᑎᑦᑎᔭᕆᐊᖃᙱᓐᓂᖓᓂᒃ ᑭᓇᑐᐃᓐᓇᕐᒥᒃ ᑕᑯᔪᓐᓇᕐᓂᕐᒥᒃ ᓄᓇᕐᔪᐊᒥᒃ ᐃᓕᑦᑎᕙᓪᓕᐊᓗᓂᓗ ᐊᓯᒥᓂᒃ. 

ᑐᓗᖅᑕᕈᑕᐅᕙᒃᑐᓄᑦ, ᓵᐸᑑ ᐊᒃᓱᕈᕈᑎᖃᖅᓯᒪᕗᖅ ᐃᒡᓗᓕᕆᓂᕐᒥᒃ ᐊᒻᒪ ᓂᕿᒃᓴᖃᑦᑎᐊᕐᓂᕐᒥᒃ ᐊᒥᓱᑎᑐᑦ ᐅᑭᐅᖅᑕᖅᑐᒥᐅᑎᑐᑦ. ᐊᔪᕐᓇᖅᑐᖅᓯᐅᖅᐸᒃᑭᕗᖅ ᓴᓇᙳᐊᒐᒃᓴᓂᑦ ᑭᓯᐊᓂ ᑎᑭᓴᐃᕙᒃᐳᖅ ᖃᕋᓴᐅᔭᒃᑯᑦ ᐃᓄᖕᓄᓪᓘᓐᓃᑦ ᓇᒃᓯᐅᔾᔨᕙᒃᖢᓂ ᖃᖓᑕᓲᒃᑯᑦ. ᐊᒃᓱᕈᖅᖢᓂ ᐱᓕᕆᖃᑦᑕᖅᓯᒪᕗᖅ ᑲᑎᙵᖃᑎᖃᓕᕋᓱᒃᖢᓂ ᖁᐊᖅᓵᕐᓇᖅᑐᒦᖅᑰᔨᒍᓂ ᓇᒧᙵᐅᔪᓐᓇᕐᓂᐊᕐᒪᑦ. ᓯᓚ ᑕᒃᓯᖅᑎᓪᓗᒍ, ᐊᒃᓱᕈᕐᓇᓲᖑᒻᒪᑦ ᖃᖓᑕᓲᑦ ᓂᕿᖃᖅᑐᑎᒃ ᒥᒐᓱᐊᖅᑐᑎᒃ ᐊᒻᒪᓗ ᕿᓄᐃᓵᕈᓐᓇᕆᐊᖃᖅᑐᑎᒃ. ᒪᑯᐊ ᓲᕐᓗ ᑎᑎᖅᑲᕐᓂᐊᕐᕕᒃᑯᑦ ᓄᖅᑲᖓᔪᑦ ᐊᖏᔪᐊᓗᖕᒥᒃ ᐊᒃᑐᐃᓂᖃᕈᓐᓇᕐᒪᑕ ᓄᓇᓕᖏᓐᓂᒃ ᐅᑕᖅᑭᔭᕆᐊᖃᑐᐃᓐᓇᓕᕐᖢᑎᒃᓗ. 

ᐃᓱᒪᒋᓪᓗᒍ ᐃᓱᒪᒥᒍᑦ ᖃᓄᐃᙱᑦᑎᐊᕐᓂᖓ, ᓵᐸᑑ ᐃᒃᐱᒋᔭᖃᖅᐳᖅ ᐃᒃᐱᒋᔭᖃᑦᑎᐊᖅᖢᓂᓗ. ᐊᓯᒥᓂᒃ ᐃᒃᐱᒋᔭᒥᓂᒃ ᑎᒍᓯᕙᒃᐳᖅ ᐊᓂᔭᕆᐊᖃᓕᖅᐸᒃᖢᓂ ᐊᖏᕐᕋᖅᓯᒪᒍᓂ ᐅᓪᓘᒃ ᒪᕐᕉᒃ ᐅᖓᑖᓄᑦ, ᐱᓱᕋᔭᑐᐃᓐᓇᕋᓗᐊᕈᓂ. ᓄᓇᒨᖃᑦᑕᖅᖢᓂ ᐃᒻᒥᓂᒃ ᐋᖅᑭᒃᐸᓪᓕᐊᔾᔪᑎᒋᕙᐅᒃ. ᐅᒥᐊᖅᑐᕐᓂᖅ ᐃᖃᓪᓕᐊᕐᓂᕐᓘᓐᓃᑦ ᐱᕚᓪᓕᕈᑎᖃᕐᔪᐊᖅᐳᖅ ᖃᓄᐃᙱᑦᑎᐊᕐᓂᖓᓄᑦ. ᐅᖃᓪᓚᖃᑎᖃᖅᐸᒃᖢᓂ ᐱᖃᓐᓇᕆᔭᒥᓄᑦ ᐃᑲᔪᖅᐸᒃᑭᕗᖅᑕᐅᖅ. ᑖᖅᑎᓪᓗᒍ ᐅᑭᐅᒃᑯᑦ ᐊᒃᓱᕈᕐᓇᕈᓐᓇᖅᐳᖅ ᑭᓯᐊᓂ ᐅᓄᖅᑐᓂᒃ ᐱᓕᕆᐊᒃᓴᖅᑕᖃᐅᖅᐳᖅ ᓄᓇᓕᖓᓂ ᐱᐅᔪᓐᓇᖅᖢᓂ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᐊᒃᓱᕈᕐᓇᖅᑐᒃᑰᖅᑎᓪᓗᒍ. ᓄᓇᓕᖓᓂ, ᐃᑲᔪᖅᑎᒌᑦᑎᐊᓲᖑᕗᖅ ᐃᖅᑲᖅᑐᖅᑕᐅᓇᓱᒋᙱᖦᖢᓂᓗ ᐱᐅᔫᓪᓗᓂ ᐊᒃᓱᕈᕐᓇᖅᑐᒃᑰᓕᕌᖓᒥ. 

ᐱᔪᒃᓯᑎᑦᑎᓂᒃᑯᓪᓕ, ᓴᐹᑑ ᐃᓄᖕᓂ ᑕᐅᑐᒃᐸᒃᐳᖅ ᓄᓇᓕᖓᓂ. ᑕᑯᖃᑦᑕᕐᒪᑦ ᐊᒥᓱᐊᓗᓐᓂᒃ ᐃᓄᓐᓂᒃ ᐃᑲᔪᖅᑐᐃᔪᓂᒃ ᐃᓄᓐᓂᒃ ᖃᐅᑕᒫᑦ ᐃᓅᓯᖏᓐᓂᒃ, ᕼᐋᒻᓚᒃᑯᓐᓂ ᐃᖅᑲᓇᐃᔭᖅᑐᓂᒃ, ᐃᓄᑦᑎᑐᑦ ᐱᓕᕆᔪᓂᒃ, ᓰᐲᓰᒃᑯᓐᓂ, ᐃᓄᐃᑦ ᓇᒻᒥᓂᖁᑎᖏᓐᓂᒃ ᐊᒻᒪᓗ ᓈᓚᐅᑎᒃᑯᑦ ᐃᖅᑲᓇᐃᔭᖅᑐᓂᒃ.  "ᐊᑕᐅᓯᑐᐊᑯᓗᖕᒥᒃ ᑕᐃᓯᔪᓐᓇᙱᑦᑐᖓ, ᓲᖃᐃᒻᒪ ᐃᓅᓯᒪ ᐃᓚᒋᖕᒪᒍ, ᐊᒻᒪ ᑕᑯᖃᑦᑕᖅᑕᒃᑲ ᐱᓇᔪᖕᓂᕆᔭᖏᑦ ᖃᐅᑕᒫᑦ ᐃᖅᑯᒻᒪᑐᐃᓐᓇᖅᖢᑎᒃ ᐊᒻᒪ ᐃᖅᑲᓇᐃᔮᒥᓄᑦ ᐱᓕᕆᓪᓗᑎᒃ ᐊᓯᔾᔨᖅᓯᕐᔪᐊᓲᖑᖕᒪᑕ ᓄᓇᓕᖕᓂ," ᖁᕕᐊᓱᒃᑐᖅ.  

ᐃᓱᓕᑉᐸᓪᓕᐊᓕᕐᓗᓂ, ᓴᐹᑑ ᑎᓕᐅᕆᕗᖅ ᒪᒃᑯᒃᑐᓂᒃ ᐃᓚᐅᖃᑦᑕᖁᔨᓪᓗᓂ, ᐅᖃᓪᓚᖃᑎᖃᖃᑦᑕᕐᓗᓂ ᐊᓯᒥᓂᒃ ᐊᒻᒪ ᐊᐅᓪᓚᖃᑦᑕᕐᓗᓂ. ᑲᔪᖏᖅᓴᐃᕙᒃᑭᕗᖅ ᒪᒃᑯᑦᑐᓂᑦ ᓄᓇᒨᖃᑦᑕᖁᔨᓪᓗᓂ. "ᐱᒻᒪᕆᐊᓘᖕᒪᑦ ᓇᓕᒧᒌᒃᑎᑦᑎᓇᓱᒃᖢᓂ ᖃᕋᓴᐅᔭᒃᑯᑦ, ᒥᑭᑦᑐᑯᓘᔪᓐᓇᕐᒪᑦ ᖃᕋᓴᐅᔭᒃᑰᑐᐃᓐᓇᕈᕕᑦ. ᖃᕋᓴᐅᔭᒃᑰᒐᔪᒃᐳᖓ, ᖃᕋᓴᐅᔭᒃᑯᑦ, ᑭᓯᐊᓂ ᐃᓂᒃᓴᓕᐅᖅᐸᒃᐳᖓ ᐅᕙᓐᓄᑦ, ᖃᕋᓴᐅᔭᒃᑰᓗᐊᕈᒪᙱᖦᖢᖓ, ᐊᒻᒪ ᓇᓕᒧᒌᒃᑎᓐᓇᓱᒃᖢᒍ ᐊᓂᑲᑕᒃᖢᖓ ᐱᖃᓐᓇᕆᔭᖅᑖᖅᐸᒃᖢᖓᓗ."

ᓄᓇᒥ ᐃᓕᑦᑎᔾᔪᑎᒃᓴᖃᕐᔪᐊᖅᖢᓂ ᓄᓇᖅᑲᑎᒥᓂᒡᓗ, ᐃᓴᐱᐅᓪ ᓴᐹᑑ ᐃᓚᐅᓕᖅᐸᓪᓕᐊᕗᖅ ᐃᓄᐃᑦ ᐃᓕᖅᑯᓯᖏᓐᓂᒃ ᖃᐅᔨᒪᔭᒥᓂᒡᓗ ᑐᓴᖅᑎᑦᑎᕙᒃᖢᓂ ᑕᐅᖅᓰᖃᑎᖃᖅᐸᒃᖢᓂ. ᐱᔪᒃᓯᑎᑕᐅᓪᓗᓂ ᓄᓇᓕᖓᓂ, ᓇᓂᓯᕙᒃᐳᖅ ᐃᑲᔪᖅᓱᐃᓂᕐᒥᒃ ᐊᔭᐅᕆᓂᕐᒥᒡᓗ ᐊᒃᓱᕈᕐᓇᖅᑐᒃᑰᖅᑎᓪᓗᑕ ᐃᓕᑦᑎᓯᒪᓪᓗᓂᓗ ᐊᓂᒍᖅᑎᑦᑎᓂᕐᒥᒃ ᐊᔭᖅᑭᑦᑕᕈᑕᐅᕙᒃᑐᓂᒃ ᐅᑭᐅᖅᑕᖅᑐᒥ ᐃᓅᓂᕐᒧᑦ. ᐱᓕᕆᓪᓗᓂ ᐃᓕᓐᓂᐊᖅᑎᓄᑦ ᐃᑲᔪᖅᑕᐅᒃᑲᓐᓂᕆᐊᖃᖅᑐᓕᕆᔨᐅᓪᓗᓂ, ᓯᕗᓂᒃᓴᖃᑦᑎᐊᖅᐳᖅ ᐃᓕᓴᐃᔨᐅᓂᕐᒧᑦ ᐊᒻᒪ ᕿᑐᕐᖓᒥᓂᒃ ᐱᕈᖅᓴᐃᓪᓗᓂ ᐃᓕᖅᑯᓯᕐᒥ ᐱᕈᖅᓴᕝᕕᒋᔪᓐᓇᓚᐅᙱᑕᖓᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.