ᑐᓴᐅᒪᔪᓕᕆᔪᓐᓇᕐᓂᖅ ᐊᒻᒪ ᓇᐹᖅᑐᓕᖕᒥ ᓴᓇᙳᐊᕐᓂᖅ ᐊᔪᙱᑕᖏᑦ ᐊᒻᒪ ᐱᕚᓪᓕᖅᓯᒪᓪᓗᓂ ᓇᑭᙶᖅᓯᒪᓂᕐᒥᓂ. ᔭᓯᓐᑕ ᐳᕆᓴᓐ ᐱᕈᖅᓴᓚᐅᖅᑐᖅ ᕋᑦ ᓚᐃᒃ, ᐋᓐᑎᐅᕆᐅᒥ ᓱᓕ ᓄᓇᒋᓪᓗᓂᐅᒃ. ᓄᓇᓕᖕᓂ ᐊᒃᑐᐊᓂᕆᔭᖏᑦ Constance Lake ᓄᓇᖃᖅᑳᖅᓯᒪᔪᓄᑦ.

ᐳᕆᓴᓐ ᓴᓇᙳᐊᖅᑎᐅᕗᖅ Woodland-ᒥ ᓴᓇᙳᐊᖃᑦᑕᖅᓯᒪᓪᓗᓂ ᐊᕐᕌᒍᓂ ᖁᓕᓂ ᐃᓕᓐᓂᐊᕐᕕᐊᓗᖕᒥ ᐱᒋᐊᓚᐅᖅᑎᓪᓗᒍ. ᓴᓇᙳᐊᕐᓂᕐᒥᒃ ᖁᕕᐊᒋᔭᖃᐃᓐᓇᐅᔭᖅᐳᖅ ᒥᑭᑦᑐᑯᓘᓂᕐᒥᓂ ᐊᒻᒪ ᐃᓕᖅᑯᓯᕐᒥᓂᒃ ᓇᓗᓇᐃᖅᓯᑦᑎᐊᓚᐅᖅᐳᖅ ᐃᓐᓇᕈᖅᐸᓪᓕᐊᓕᕋᒥ. ᓴᓇᙳᐊᕐᓂᐅᑉ ᓯᓚᑖᒍᑦ, ᑐᓴᐅᒪᔪᓕᕆᔨᒻᒪᕆᐅᕗᖅ. ᓴᓇᕈᓘᔭᖅᐸᒃᐳᖅ ᑎᑎᕋᐅᔭᖅᓯᒪᔪᓂᒃ ᐊᒻᒪ ᖃᕆᓴᐅᔭᒃᑯᑦ ᑎᑎᕋᐅᔭᖅᐸᒃᖢᓂ.

ᑲᔪᖏᖅᓴᐃᓯᒪᕗᖅ ᐊᖅᑯᑖᓂ ᐳᕆᓴᓐ ᖃᑕᙳᑎᖏᑦ. ᐃᓚᖏᑦ ᓴᓇᙳᐊᖃᑦᑕᖁᔨᙱᖦᖢᑎᒃ ᐅᖃᖅᖢᑎᒃ ᑮᓇᐅᔭᓕᐅᕐᓇᓗᐊᙱᓐᓂᖓᓂᒃ, ᐊᖓᔪᖅᑳᖏᒃ ᓴᓂᐊᓃᖏᓐᓇᖅᐳᑦ. ᐃᑲᔪᖅᑐᖅᐸᒃᖢᓂᐅᒃ ᐱᐊᓂᒃᓯᑎᓪᓗᒍ ᐱᓕᕆᐊᒃᓴᓂᒃ, ᐳᓛᕆᐊᖅᐸᒃᖢᓂᐅᒃ ᓴᓇᙳᐊᓕᕌᖓᒥ, ᐱᐅᒋᓂᖅᐹᕆᕚᖏᑦ.

ᐃᓕᓐᓂᐊᕐᓂᓕᕆᓂᒃᑯᓪᓕ, ᐳᕆᓴᓐ ᐱᔭᕇᖅᓯᓚᐅᖅᐳᖅ Bachelor of Arts−ᒥᒃ, ᐱᔭᕇᖅᓯᓪᓗᓂ ᒪᕐᕉᖕᓂᒃ ᐃᓕᓐᓂᐊᖅᑕᒥᓂᒃ ᑕᑯᒃᓴᐅᔪᒃᑯᑦ ᓴᓇᙳᐊᕐᓂᕐᒧᑦ ᓄᓇᖃᖅᑳᖅᑐᓄᓪᓗ ᖃᐅᔨᓴᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ ᐅᐊᓕᓂᖅᐸᓯᐊᓂ ᐋᓐᑎᐅᕆᐅᒥ. ᓴᓇᙳᐊᕐᓂᖅ ᐃᓕᓐᓂᐊᕐᕕᖕᒥ ᐊᒃᓱᕈᕐᓇᓚᐅᖅᐳᖅ, ᑭᓯᐊᓂ ᐃᓕᑦᑎᓚᐅᖅᐳᖅ ᑐᙵᕕᖏᓐᓂᒃ ᐊᒻᒪ ᐱᓪᓗᐊᑕᕐᓂᒃ ᐊᖏᕐᕋᖅᖢᓂᓗ ᐱᔪᒃᓯᑦᑎᐊᖅᖢᓂ ᐱᐅᓯᕚᓪᓕᖅᖢᓂᓗ. "ᐃᓱᒪᔪᖓ ᐱᕈᕐᐸᓪᓕᐊᓕᕐᑐᐊᓗᓐᓂᒃ ᑕᒪᐅᖓ ᓄᓇᒧᑦ, ᓄᓇᒧᑦ," ᐃᖅᑲᐅᒪᔪᖅ.

ᐃᓱᒪᒋᓪᓗᒍ ᐊᑐᓚᐅᖅᓯᒪᔭᖓ ᐃᓕᓐᓂᐊᕆᐊᖅᓯᒪᓪᓗᓂ ᐊᖏᕐᕋᖓᑕ ᐊᓯᐊᓂ, ᐅᖃᖅᑐᖅ, "ᓇᖕᒥᓂᖅ ᖁᕕᐊᒋᔭᕐᓂᙶᖅᑐᖅ. ᑕᐃᒪᐃᓕᐅᕈᒪᓪᓚᕆᒃᑯᕕᑦ, ᑲᔪᓰᓐᓇᕆᐊᖃᖅᐳᑎᑦ ᐱᐊᓂᒍᒪᓪᓚᕆᒃᖢᒍᓗ. ᐱᔪᒪᓂᖃᑦᑎᐊᓚᐅᖅᐳᖓ. ᐊᔪᕐᓇᕋᓗᐊᖅᑎᓪᓗᒍ, ᓇᓂᓯᑐᐃᓐᓇᕈᓐᓇᖅᐳᑎᑦ ᓈᒻᒪᒃᑐᓂᒃ ᐃᓄᖕᓂᒃ ᐃᓕᖕᓂᒃ ᐃᑲᔪᖅᑐᐃᔪᓐᓇᖅᑐᓂᒃ, ᐊᒻᒪ ᑲᑎᙵᖃᑎᖃᕈᓐᓇᖅᑐᓂᒃ ᐊᖏᕐᕋᕐᓂ, ᐃᖅᑲᐃᑎᑕᐅᔪᒪᑐᐃᓐᓇᖅᖢᑎᑦ ᓱᓕ ᐃᑲᔪᖅᑎᖃᕋᕕᑦ ᐊᒻᒪ ᐃᑲᔫᑎᖃᖅᖢᓂ."

ᑐᓗᖅᑕᕈᑎᑕᖃᓕᕌᖓᒥ, ᐳᕆᓴᓐ ᓄᖅᑲᖔᓕᖅᐸᒃᐳᖅ ᐊᒻᒪ ᓇᖕᒥᓂᖅ ᐱᓕᕆᓇᓱᒃᐸᒃᖢᓂ ᑭᓯᐊᓂ ᐃᓕᑦᑎᓯᒪᕗᖅ ᐊᒥᖅᑳᖃᑎᖃᕐᓂᖅ ᐱᐅᓂᖅᓴᐅᒐᔪᖕᓂᖓᓂ ᑲᒪᒋᔭᖃᕆᐊᒃᓴᖅ. ᐃᓱᒪᒋᔭᒥᓂᒃ ᐃᒃᐱᒋᔭᒥᓂᒡᓗ ᓴᖅᑭᑎᑦᑎᕙᒃᖢᓂ ᓴᓇᙳᐊᖅᐸᒃᑕᒥᒍᑦ ᐃᑲᔪᖅᓯᒪᕗᖅ ᐱᓕᕆᔾᔪᑕᐅᔪᓐᓇᖅᖢᓂ. "ᐊᒃᓱᕈᕐᓇᖅᑐᑦ ᐃᒃᐱᖕᓂᐊᓃᑦ, ᑭᓯᐊᓂᑦᑕᐅᖅ ᐱᐅᔪᑦ ᐃᒃᐱᖕᓂᐊᓂᐅᔪᑦ, ᓲᕐᓗ ᓇᒡᓕᖕᓂᖅ, ᐃᓛᓐᓂᒃᑯᑦ ᐊᔪᕐᓇᖅᑐᒻᒪᕆᐊᓘᕙᒃᐳᖅ ᐊᒥᖅᑳᕈᑎᒋᓇᓱᒋᐊᒃᓴᖅ. ᐱᐅᔫᕗᖅ, ᓴᓇᙳᐊᕐᓂᒃᑯᑦ, ᑕᒪᒃᑯᐊ ᐃᒃᐱᒋᔭᑎᑦ ᐃᓚᓕᐅᑎᔪᓐᓇᕋᕕᒋᑦ ᑭᓱᑐᐃᓐᓇᕐᒧᑦ ᓴᓇᔭᕐᓄᑦ, ᑕᒪᓐᓇᓗ ᑕᑯᒃᓴᐅᑎᑦᑐᓐᓇᖅᖢᓂᐅᒃ," ᐅᓂᒃᑳᕆᓪᓗᓂ. ᐊᓪᓛᑦ ᐱᐅᓯᐅᕙᒃᑐᖅ ᓂᙵᐅᒪᓪᓗᓂ ᐅᕝᕙᓘᓐᓃᑦ ᑕᑭᔪᐊᓗᖕᒥᒃ ᒥᖑᐊᖅᓯᓂᖅ ᓴᐃᓕᑎᓪᓗᒍ ᓴᖅᑭᑎᑦᑎᔪᓐᓇᖅᐳᖅ ᐃᒃᐱᒋᔭᒥᓂᒃ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᓕᓐᓂᐊᕐᕕᖕᒦᓐᓂᕐᒥᓂ, ᐱᕈᖅᐸᓪᓕᐊᑎᓪᓗᒍ. ᐅᖃᖅᐸᓚᐅᖅᐳᖅ, "ᒫᓐᓇ ᐊᒃᓱᕈᕐᓇᖅᐳᖅ, ᑭᓯᐊᓂ ᑲᔪᓰᓐᓇᕆᐊᖃᖅᐳᑎᑦ ᓇᓂᓯᓗᑎᓪᓗ ᐃᓄᖕᓂᒃ ᐃᓕᖕᓂᒃ ᐃᑲᔪᖅᑐᐃᓂᐊᖅᑐᓂᒃ, ᖃᓂᒌᓐᓇᕐᓗᒋᓪᓗ ᐃᓕᖕᓄᑦ. ᑕᐃᒪ, ᑲᔪᓰᓐᓇᕆᐊᖃᖅᐳᑎᑦ ᐃᑲᔪᖅᑕᐅᔪᒪᓗᑎᑦ. ᑕᒪᓐᓇ ᐊᓂᒍᑐᐊᕈᕕᐅᒃ, ᐃᒡᓗᐊᒍᑦ, ᐱᕈᖅᐹᓪᓕᕐᔪᐊᕐᓂᐊᖅᐳᑎᑦ, ᐊᒻᒪ ᐊᒥᓱᐊᓗᖕᓂ ᑕᑯᔪᓐᓇᖅᑕᕐᓂᒃ."

ᐃᓱᒪᓪᓗᓂ ᐃᓱᒪᒃᑯᑦ ᖃᓄᐃᙱᑦᑎᐊᕈᒪᓂᕐᒥᓂᒃ, ᐳᕆᓴᓐ ᓄᖅᑲᖓᓚᐅᑲᒃᐸᒃᐳᖅ ᑕᐃᒪᐃᑦᑕᕆᐊᖃᕌᖓᒥ, ᐃᓕᓴᖅᓯᕙᒃᖢᓂᓗ ᖃᓄᐃᙱᑦᑕᕌᖓᒥ. ᖃᐅᔨᒪᔪᖅ ᐃᓛᓐᓂᒃᑯᑦ ᐊᖏᔪᐊᓗᐃᑦ ᐃᒃᐱᖕᓂᐊᓂᐅᔪᑦ ᐱᕈᖅᐸᓪᓕᐊᔪᓐᓇᕐᒪᑕ ᕿᓚᒥᑯᓗᒃ ᐅᕝᕙᓘᓐᓃᑦ ᐃᓛᓐᓂᒃᑯᑦ ᐊᑕᐅᑦᑎᒃᑯᐊᓗᒃ ᐊᒃᑐᖅᓯᕙᒃᖢᑎᒃ. ᓄᖃᖓᓚᐅᑲᒃᐸᒃᐳᖅ ᓴᓇᙳᐊᖅᐸᒃᑕᒥᓂᒃ ᑕᖅᑭᓄᑦ 6−ᓄᑦ ᐊᕐᕌᒍᓕᒫᒧᑦ ᒪᓕᒃᖢᓂ ᐃᓅᓯᖓᑕ ᖃᓄᐃᓕᖓᓂᖓᓂᒃ. ᑎᓕᐅᕆᕙᒃᐳᖅ ᐅᖃᖃᑎᖃᕐᓂᕐᒥᒃ ᐃᓄᖕᓂᒃ ᐊᒃᓱᕈᕐᓇᖅᑐᓂᒃ ᐃᒃᐱᖕᓂᐊᓂᐅᔪᓂᒃ. ᖃᐅᔨᒪᔪᖅ ᐃᖕᒥᓂᒃ ᐊᒃᓱᕈᕈᓐᓇᕐᓂᕐᒥᓂᒃ ᑭᓯᐊᓂ ᐊᓯᒥᓄᑦ ᐃᑲᔪᖅᑐᖅᑕᐅᑦᑎᐊᓲᖅ.

ᐃᓚᖓᑦ ᐊᓕᐊᓇᐃᒋᓂᖅᐹᖓ ᓴᓇᔭᕆᐊᒃᓴᖅ ᑐᒃᑐᕙᒃ. ᐊᖏᓂᖏᑦ ᐊᒻᒪ ᓇᒡᔪᖏᑦ, ᐆᒪᔪᑦᑎᐊᕙᒻᒪᕆᐊᓗᐃᑦ ᐳᕆᓴᓐᒧᑦ. ᓄᓇᒋᔭᖓᓂ, ᑐᒃᑐᕙᒃᑕᓕᒃ ᓇᒥᓕᒫᖅ ᐊᖑᓇᓱᒃᐸᒃᖢᑎᒡᓗ ᓂᕆᕙᒃᖢᑎᒡᓗ ᑐᒃᑐᕙᐅᑉ ᖃᔪᓕᐊᕆᓯᒪᔪᒥᒃ. ᑐᒃᑐᕙᙳᐊᓂᒃ ᑎᑎᕋᐅᔭᕈᒪᑦᑎᐊᖅᑐᖅ, ᑭᓯᐊᓂ ᓴᓇᙳᐊᕈᒪᓲᖑᖕᒥᔪᖅ ᖃᓄᐃᑦᑐᑐᐃᓐᓇᕐᓂᒃ ᐱᕈᖅᑐᓂᒃ, ᓂᕐᔪᑎᓂᒃ, ᑕᓯᕐᓂᒃ, ᐊᒻᒪ ᑎᖕᒥᐊᓂᒃ.  

ᐱᓕᕆᑦᑎᐊᖅᑐᖅ ᓇᐹᖅᑐᒥ ᓴᓇᙳᐊᖅᑎᐅᓪᓗᓂ ᐊᒻᒪ ᑐᓴᐅᒪᔪᓕᕆᔨᒻᒪᕆᐅᓪᓗᓂ, ᔭᓯᓐᑕ ᐳᕆᓴᓐ ᖃᐅᒪᑦᑎᐊᖅᑐᖅ ᐊᖏᕐᕋᖓᓂ ᕋᑦ ᓚᐃᒃ, ᐋᓐᑎᐅᕆᐅᒥ. ᐃᓕᓐᓂᐊᕆᐊᖅᓯᒪᑎᓪᓗᒍ ᐊᖏᕐᕋᖓᑕ ᐊᓯᐊᓂ, ᑐᙵᓱᒃᑎᑦᑎᔪᓐᓇᖅᓯᒪᕗᖅ ᓴᓇᙳᐊᖅᑕᒥᓂᒃ ᓄᓇᒋᔭᒥᓂ. ᖃᑕᙳᑎᖏᓐᓄᑦ ᐃᑲᔪᖅᑐᖅᑕᐅᓪᓗᓂ, ᑲᔪᓰᓐᓇᖅᐳᖅ ᓴᓇᙳᐊᖃᑦᑕᖅᑕᒥᓂᒃ ᐊᕐᕌᒍᐃᑦ ᖁᓕᑦ ᐊᓂᒍᖅᓯᒪᓕᖅᑎᓪᓗᒋᑦ ᐱᒋᐊᓕᓵᖅᑎᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.