"ᐊᒃᓱᕈᕐᓇᖅᑐᒃᑰᖅᑎᓪᓗᑎᑦ, ᐃᓕᖕᓂᒃ ᐅᑎᖅᑎᑦᑕᕆᐊᖃᖅᑐᑎᑦ ᐃᖅᑲᐃᓯᓗᑎᑦ ᑭᓇᐅᖕᒪᖔᖅᐱᑦ ᐅᒃᐱᕆᓗᑎᓪᓗ," ᔮᑭ ᐸᓛᒃ ᐅᖃᖅᖢᓂ ᐃᓱᒪᑦᑎᐊᕐᓂᒃᑯᑦ. ᐃᓅᓚᐅᖅᑐᖅ ᐱᕈᖅᓴᓪᓗᓂᓗ ᐅᐃᓂᐹᒡᒥ, ᓄᓇᓕᐸᐅᔭᕐᒥ ᐊᕐᓇᖅ ᑎᑎᕋᖅᑎᓗ ᓇᒡᓕᒍᓱᒃᖢᓂ ᖃᑕᙳᑎᖏᓐᓂ.  ᑎᑎᕋᖃᑦᑕᓕᓚᐅᖅᑐᖅ ᓇᐃᑦᑐᓂᒃ ᐅᓂᒃᑳᓂᒃ ᒪᒃᑯᒃᑑᓪᓗᓂ ᐃᓕᓐᓂᐊᕐᕕᖕᒥ, ᑭᓯᐊᓂ ᑭᖑᓂᐊᒍᑦ ᐱᕋᔭᒃᐸᒃᖢᓂ ᐱᓕᕆᓚᐅᖅᓯᒪᓪᓗᓂᓗ ᐊᕐᕌᒍᓄᑦ ᑕᓪᓕᒪᓄᑦ ᑎᒍᔭᐅᓯᒪᔪᓕᕆᔨᐅᓪᓗᓂ. 

"ᐅᓄᖅᑐᒻᒪᕆᐊᓗᖕᓂᒃ ᐊᔾᔨᒌᙱᑦᑐᓂᒃ ᐱᕕᒃᓴᖅᑕᖃᖅᐳᖅ ᐊᖅᑯᑎᒋᔪᓐᓇᖅᑕᔅᓯᓐᓂᒡᓗ ᐊᖅᑯᓯᓂᕆᔭᕐᓂ, ᐃᖅᑲᓇᐃᔮᑦ ᐱᔾᔪᑎᒋᓪᓗᒋᑦ. ᑭᓯᐊᓂ ᐅᑎᐃᓐᓇᓲᖑᒐᒪ ᑎᑎᕋᖅᑐᖓ, ᑐᓂᕐᕈᓯᐊᕆᕙᓪᓚᐃᓚᐅᖅᑕᕋ. ᑐᓂᕐᕈᓯᐊᖅᓯᒪᔪᐃᓐᓇᐅᕙᓪᓚᐃᔪᓯ ᐊᒻᒪᓗ ᑕᒪᓐᓇ ᐅᑎᕐᕕᒋᓐᓇᓲᕆᒐᒃᑯ. ᐃᖏᕐᕋᓂᓕᒫᓐᓄᑦ ᐃᖅᑲᓇᐃᔮᕆᓛᕈᒪᔭᓐᓄᑦ ᐅᓪᓗᒥᑦ ᑎᑭᖦᖢᒍ," ᐅᖃᖅᖢᓂ. 

ᐃᓱᒪᓕᐅᕐᔪᐊᓚᐅᖅᑐᖅ ᕿᒪᒃᓯᔪᒪᓪᓗᓂ ᑎᒍᔭᐅᒪᕕᖕᓂᑦ ᑎᑎᕋᕋᓱᒃᖢᓂᓗ, ᐃᓚᐅᓪᓗᓂ Red River ᓯᓚᑦᑐᖅᓴᕐᕕᖕᒥᑦ ᐃᓱᒪᒃᓴᖅᓯᐅᑦᑎᐊᕐᓯᒪᓪᓗᓂ ᑐᓴᐅᒪᔪᓕᕆᓂᖕᓂᑦ. ᐹᓐᕝ-ᒨᓚᐅᕐᒥᔪᖅ ᓴᓇᖑᐊᖅᑎᓄᑦ, "ᐊᒡᒐᐃᑦ ᓴᖅᑭᑐᐃᓐᓇᖅᑑᔮᖅᐸᒻᒪᑕ, ᑭᖑᓂᐊᒍᑦ ᒨᓴᓕᐅᕇᕋᒪ ᑕᐃᒪᐃᓕᐅᕈᒪᓂᕋᖅᑐᖓ ᐊᒻᒪᓗ ᑕᐃᒪᐃᓕᐅᕋᓱᐊᖅᑐᖓ. ᐅᖃᕋᔭᓐᖏᑦᑐᖓ, ᐅᐱᓐᓇᕋᓂ ᐊᖅᑯᑎᑕᖃᖅᐸᓪᓚᐃᒻᒪᑦ ᐊᒻᒪᓗ ᑲᔪᓯᑐᐃᓐᓇᖅᑐᓂ ᐊᒻᒪᓗ ᑲᔪᓯᓪᓗᓂ. ᑕᒪᓐᓇ ᐅᕙᓐᓄᑦ ᐱᓕᕆᐊᖑᕗᖅ ᐅᓪᓗᒥ ᓱᓕ ᐃᓅᓪᓗᖓ," ᐃᖅᑲᐅᒪᔪᖅ. 

ᐅᒃᐱᕈᓱᒃᑐᖅ ᑎᑎᕋᕐᓗᓂ ᓂᕈᐊᕐᖢᓂ, ᐃᓅᓪᓗᓂ ᑎᑎᕋᖅᑎᒥᒃ ᑕᐃᑲᓃᖏᓐᓇᕋᔭᕐᖢᓂᓗ. "ᐅᖃᐅᓯᕆᔪᓐᓇᑦᑎᐊᕋᒃᑯ ᐱᔪᓐᓇᕐᓂᕋ ᓴᐃᒻᒪᖅᑎᑕᐅᑦᑎᐊᖅᓯᒪᔪᖅ ᓄᓇᕐᔪᐊᓕᒫᒥᑦ, ᐊᒥᓱᓂᒡᓗ ᐃᓄᖕᓂᒃ ᑕᑯᖃᑦᑕᖅᓯᒪᓪᓗᖓ," ᕿᕐᓂᖅᑐᖅ. ᐅᖓᓯᒋᒐᓗᐊᕈᓂᐅᒃ, ᐅᐃᓂᐸᒡᒧᑦ ᐅᑎᖏᓐᓇᓚᐅᖅᑐᖅ. 

ᐱᕈᖅᓴᔭᐅᓪᓗᓂ ᓴᙱᔪᒧᑦ ᐃᓄᑑᔪᒧᑦ ᐊᓈᓇᒧᑦ ᓯᕗᓪᓕᖅᐸᐅᓪᓗᓂ ᓄᓇᖃᖅᑳᖅᓯᒪᔪᖅ ᐊᕐᓇᖅ ᑲᓇᑕᒥ ᐃᓕᓴᐃᓂᕐᒧᑦ ᐱᔭᕇᕈᓯᐊᖅᑖᕐᖢᓂ, ᖁᕕᐊᒋᑦᑎᐊᖅᑕᖓ ᐅᑎᕐᓂᖓ ᖃᑕᙳᑎᖏᑕ. ᕿᕐᓂᖅᑕᖅ ᓯᓚᑦᑐᓴᕐᕕᕐᔪᐊᕐᒨᖅᐸᓚᐅᖅᐳᖅ ᒫᓂᑑᕙᒥ ᐊᓈᓇᒥᓂᒃ ᐱᖃᑎᖃᖅᑐᓂ ᐊᒻᒪ ᓱᓪᓗᑯᑖᒦᑉᐸᑦᑐᓂ, ᐊᕙᓗᔭᐅᓯᒪᓪᓗᓂ ᐱᐅᔪᓄᑦ ᐊᒻᒪ ᐃᓄᓐᓄᑦ ᓇᓪᓕᒋᔭᖏᓐᓄᑦ. 

ᖃᐅᔨᓚᐅᖅᑐᖅ ᓅᑉᐸᓪᓕᐊᓂᖅ ᓄᓇᕐᔪᐊᕐᒧᑦ ᐊᒃᓱᕈᕐᓇᖅᑐᒧᑦ. ᕿᕐᓂᖅᑕᖅ ᐃᒻᒥᓂᒃ−ᐱᔪᓐᓇᕋᓱᒋᔪᖅ ᐊᒻᒪ ᓈᒻᒪᒍᓱᙱᖦᖢᓂ ᑐᓗᖅᑕᕈᑕᐅᓪᓗᐊᑕᖅᑐᓂᒃ ᐃᓄᖕᓄᑦ, ᓇᖕᒥᓂᖅ ᐃᓚᓕᐅᔾᔭᐅᓪᓗᓂ. ᐅᒃᐱᕈᓱᒃᐳᖅ ᑖᒃᑯᐊ ᑐᓗᖅᑕᕈᑏᑦ ᐊᓂᒍᖅᑕᐅᔪᓐᓇᕐᓂᖏᓐᓂᒃ ᑕᐅᑐᖅᑰᖅᑕᐅᔪᑦ ᑐᕌᒐᖏᓪᓗ ᑕᐅᑐᓪᓗᐊᑕᕐᓗᒋᑦ. "ᐊᒃᓱᕈᕐᓇᖅᑐᑦ ᐊᔾᔨᒌᖏᑦᑐᓂᒃ ᐋᖅᑭᒃᓯᒪᓲᑦ ᐊᔾᔨᒌᖏᑦᑐᓄᑦ ᐃᓄᖕᓄᑦ, ᑭᓯᐊᓂ ᐃᓱᒪᐃᓐᓇᐅᔭᖅᑐᖓ ᐊᑐᒐᒃᓴᖅᑕᖃᕐᓂᖓᓂᒃ ᐊᐅᓚᔾᔭᒃᓗᒋᑦ ᓇᒧᙵᐅᔪᒪᔭᕐᓄᑦ," ᐅᖃᖅᑐᖅ.

ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᑎᓪᓗᒍ ᐸᓛᒃ ᐃᓱᒪᒥᒍᑦ ᖃᓄᐃᙱᑦᑎᐊᖏᓐᓇᓚᐅᖅᐳᖅ ᐃᓚᒥᓄᑦ ᐱᖃᓐᓇᕆᔭᒥᓄᓪᓗ ᐅᖄᓚᖃᑎᖃᖅᖢᓂ, Zoom, facee Time ᐊᒻᒪ Facebook−ᑯᑦ. "ᐅᓄᖅᑐᐊᓘᖕᒪᑕ ᐃᓄᖕᓄᑦ ᐱᕕᒃᓴᑦ ᓱᓕ ᐊᑐᕈᓐᓇᖅᑕᑎᑦ, ᑭᓯᐊᓂ ᖃᐅᔨᒪᔪᖓ ᐊᔾᔨᒋᙱᒻᒪᒍ, ᑭᓯᐊᓂ ᖃᐅᔨᒪᖕᒥᔪᖓ ᑕᐅᕗᖓᓕᒫᙱᑦᑐᖅ, ᐱᓕᕆᐊᕆᖃᑦᑕᖅᑕᕋ ᓱᓕ," ᐅᖃᐅᓯᕆᓵᖅᑕᖓ. 

ᐊᐅᓚᑦᑎᔨᐅᓪᓗᓂ ᓄᓇᖃᖅᑳᖅᓯᒪᔪᑦ ᓂᔾᔭᐅᓯᔭᕐᓂᕐᒧᑦ ᑐᓐᓂᖅᑯᓯᐊᖏᓐᓄᑦ, ᐱᓕᕆᐊᖓ ᓄᖅᑲᔾᔮᖏᑦᑐᖅ. ᓱᓕ ᖃᐅᑕᒫᑦ ᐱᔭᒃᓴᖅᑕᖃᖅᐳᖅ ᐊᓕᐊᓇᐃᒋᔭᖃᖅᑎᓪᓗᒍᓗ ᐱᓕᕆᐊᕆᔭᒥᓂᒃ, ᓱᓕ ᐱᕕᒃᓴᖃᖅᑎᖦᖢᒍ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ, ᓯᓚᒧᐊᕐᓂᕐᒥᒃ, ᐊᓂᖅᓵᖅᑐᑦᑎᐊᕐᓇᖅᑐᒥᒃ ᐅᕝᕙᓘᓐᓃᑦ ᑕᕐᕆᔭᖅᑎᑦᑎᕙᒃᖢᓂ. ᐊᑯᓂᐊᓗᒃ ᐱᓕᕆᓇᓱᐊᖅᑎᓪᓗᒍ, ᖃᐅᔨᒪᔪᖅ ᑕᒪᓐᓇ ᐊᒥᓱᓄᑦ ᖃᓂᒻᒪᓐᓇᐅᔪᖅ ᐊᔅᓱᕉᑕᐅᓗᐊᔾᔮᓐᖏᒻᒪᑦ ᐊᒻᒪᓗ ᑕᑯᓛᖅᑐᓂ ᐃᓄᓐᓂᒃ ᑕᑯᖃᑦᑕᕐᓂᐊᖅᑐᓂᒃ ᒫᓐᓇᒫᕈᓗᒃ. ᐃᓚᖏᓐᓂᒃ, ᑭᓯᐊᓂ ᐃᓕᓴᖅᓯᔪᖅ ᑭᓇᒥᑭᐊᖅ ᐱᐅᔪᐊᓘᓂᖓᓂᒃ. 

ᑭᖑᓂᖃᓈᖅᓯᑎᓪᓗᒍ ᐃᓅᖃᑎᒌᓂᑦ ᑲᓲᒪᓂᕐᒥᑦ, ᑕᑯᖃᑦᑕᖅᑐᖅ ᓴᓇᑐᓂᕐᒥᑦ ᐃᒻᒥᒃᑰᕈᓐᓇᖅᑐᒥᑦ. "ᐃᓱᒪᒋᔭᐃᑦ ᐊᖏᔪᐊᓘᖕᒪᑦ ᑭᒡᓕᖃᙱᖦᖢᓂᓗ, ᑭᓱᑐᐃᓐᓇᑦᑎᐊᓂᒃ ᐃᓱᒪᒋᔭᖃᕈᓐᓇᖅᖢᑎᑦ ᐱᔪᒪᔭᕐᓂᒃ. ᑎᑎᕋᖅᑎᐅᒍᕕᑦ, ᓂᔾᔭᐅᓯᔭᕈᕕᑦ, ᐊᒥᐊᕆᒍᕕᑦ, ᐃᓱᒪᒋᔭᐃᑦ ᐱᐅᓛᖑᖃᑕᐅᕗᖅ ᑭᓇᑐᐃᓐᓇᕐᒧᑦ ᐱᔭᕆᐊᖃᙱᑕᕐᓄᑦ, ᓇᖕᒥᓂᖅ ᑕᐃᒪᐃᓕᐅᕈᓐᓇᖅᑐᑎᑦ." 

ᓴᓇᙳᐊᖅᑕᐅᕙᒃᑐᑦ, ᓇᖕᒥᓂᖅ−ᐃᒃᐱᒋᑦᑎᐊᖅᖢᓂᒋᑦ, ᓴᐱᓕᖅᓴᕋᐃᙱᖦᖢᓂ ᐊᒻᒪ ᐃᒻᒥᓂᒃ ᐅᒃᐱᕆᓪᓗᓂ. ᕿᕐᓂᖅᑐᖅ ᖁᔭᓕᔪᖅ ᐱᓕᕆᐊᖓᓄᑦ, ᖁᕕᐊᓱᖕᓂᕋᕐᖢᓂ, ᑭᓯᐊᓂ ᐃᓕᓴᖅᓯᔪᖅ ᐊᑯᓂᐅᓂᖓᓂᒃ ᑐᓂᓯᒪᑦᑎᐊᕐᓂᖓᓂᒡᓗ. "ᖁᕕᐊᓱᒃᑎᑕᐅᑦᑎᐊᓵᕋᒪ ᐱᓕᕆᐊᓕᒫᓐᓄᑦ, ᖃᓄᐃᓕᐅᕐᓇᓄᑦ ᐊᒻᒪ ᐃᓱᒪᑐᔫᓪᓗᖓ ᐅᕙᓐᓄᑦ ᑐᓂᔭᐅᓚᐅᖅᑐᓄᑦ, ᓱᓕ ᐃᓄᖕᓂᒃ ᑲᑎᖃᑎᖃᕈᓐᓇᐃᓐᓇᕈᓐᓇᕋᒪ, ᓄᒃᑕᕈᓐᓇᖅᖢᖓ, ᐱᕈᖅᐸᓪᓕᐊᖏᓐᓇᕈᒪᓪᓗᖓ. ᑕᒪᓐᓇ ᐱᒻᒪᕆᐊᓘᕗᖅ ᑭᒃᑯᑐᐃᓐᓇᓄᑦ, ᐊᖏᒡᓕᕙᓪᓕᐊᖏᓐᓇᕐᓂᐊᕐᓗᓂ," ᒪᓂᒪᑎᑉᐸᒃᑕᖓ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐅᓪᓗᒥ ᐆᒻᒪᑎᒃᑯᑦ ᐅᓇᑕᕐᓂᐅᕗᖅ: "ᒪᒃᑯᒃᑐᑦ ᐃᖅᑲᐅᒪᖁᑐᐃᓐᓇᖅᑕᒃᑲ ᓯᓐᓇᒃᑑᒪᔭᑎᑦ ᐱᒻᒪᕆᐅᖕᒪᑕ ᓇᓃᒃᑲᓗᐊᕈᕕᑦ. ᓄᓇᓕᓐᓃᒃᑯᕕᑦ, ᓄᓇᓕᐸᐅᔭᕐᒨᕈᕕᑦ, ᓴᐱᕐᓇᖅᑐᒻᒪᕆᐅᕗᖅ. ᐃᖅᑲᐅᒪᑐᐃᓐᓇᕐᓗᑎᑦ ᐱᒻᒪᕆᐅᒐᕕᑦ ᐊᒻᒪ ᓯᓐᓇᒃᑑᒪᔭᑎᑦ ᐱᒻᒪᕆᐅᖕᒪᑕ." 

ᑐᓗᖅᑕᕈᑎᓂᒃ ᐊᑐᖅᖢᓂ, ᔮᑭ ᐸᓛᒃ ᐃᒻᒥᓂᒃ ᐅᒃᐱᕆᔪᖅ ᐊᒻᒪ ᐃᖅᑲᐅᒪᓪᓗᓂ ᑭᓇᐅᓂᕐᒥᓂᒃ: ᓄᓇᖃᖅᑳᖅᑐᖅ ᐊᕐᓇᖅ ᐱᓕᕆᔨᒻᒪᕆᐅᓪᓗᓂ ᓂᕈᐊᓚᐅᖅᑐᖅ ᓇᒡᓕᒍᓱᒃᖢᓂᓗ ᖃᑕᙳᑎᒥᓂᒃ ᐃᑲᔪᖅᑐᐃᕙᒃᖢᓂ ᓇᐅᒃᑯᓕᒫᖅ. ᐃᓱᒪᑐᓂᒃᑯᑦ, ᑲᓲᒪᓂᒃᑯᑦ ᐊᒻᒪᓗ ᐊᖏᖅᓯᒪᓂᒃᑯᑦ, ᑎᑎᕋᖅᑐᖅ ᓇᒻᒥᓂᖅ ᐅᓂᒃᑳᒥᓂᒃ ᐊᒻᒪᓗ ᖃᐅᔨᒪᒋᐊᖅᑐᓂ ᐱᐅᒐᓗᐊᕐᒪᖔᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.