ᓈᓴᐅᑎᓂᑦ ᖁᕕᐊᒋᔭᖃᓚᐅᖅᑐᖅ ᐊᒻᒪ ᓈᓴᐅᓯᕆᓂᕐᒥᑦ ᐊᒻᒪ ᑕᒪᓐᓇ ᐃᓚᓕᐅᑎᓯᒪᔪᖅ ᐃᖅᑲᓇᐃᔮᕆᓛᖅᑕᖏᓐᓄᑦ. ᒥᓚᓂ ᐋᔅᓯᐅᕗᐃ, ᐅᐃᒃᐅᐃᒥᑰᒡ-ᒥᐅᑕᖅ, ᑖᓐᓇ Lake Huron-ᒥ. ᐊᓂᓰᓇᐱ ᐊᒻᒪ ᐱᓕᕆᖃᑦᑕᖅᑐᖅ ᑐᑭᒧᐊᖅᑎᑦᑎᔨᐅᓪᓗᓂ ᐱᔪᓐᓇᕐᓂᖅᑖᖅᐸᓪᓕᐊᓂᕐᒧᑦ, ᐊᑲᐅᓂᖅᓴᒃᑰᕆᐊᖅᑎᑦᑎᓇᓱᓐᓂᕐᒧᑦ ᐊᒻᒪ ᐱᑦᑕᐃᓕᑎᑦᑎᓂᕐᒧᑦ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᔩᑦ ᑲᑎᒪᔨᖏᓐᓄᑦ. ᑲᑐᔾᔨᖃᑎᒌᒡᕕᖕᒥ ᐃᖅᑲᓇᐃᔭᖅᓯᒪᓕᖅᑐᖅ ᐊᕐᕌᒍᓄᑦ 7−ᑲᓴᖕᓄᑦ, ᐱᒋᐊᓚᐅᖅᓯᒪᓪᓗᓂ ᐊᔪᙱᓐᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ ᐊᐅᓚᑦᑎᔨᐅᓪᓗᓂ ᐊᒻᒪ ᓯᕗᒻᒧᐊᒃᓯᒪᓪᓗᓂ ᐱᓯᑎᐅᓂᖅᓴᓄᑦ ᐱᕙᓪᓕᐊᑎᑦᑎᓂᕐᒧᑦ ᐊᐅᓚᑦᑎᔨᒧᑦ ᒫᓐᓇ ᐃᖅᑲᓇᐃᔮᖓᓄᑦ ᑎᑭᓚᐅᙱᑎᓪᓗᒍ. ᐃᑲᔪᖅᑐᐃᔪᖅ ᓄᓇᖃᖅᑳᖅᓯᒪᔪᑦ ᐊᐅᓚᑦᑎᔨᖏᓐᓂᒃ ᐊᑐᓕᖅᑎᑦᑎᑎᓪᓗᒋᑦ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᒪᓕᒐᕐᒥᒃ, ᓴᖅᑮᔪᒥᒃ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᑎᐊᕐᓂᕐᒥᒃ, ᐃᓗᐊᓂ ᐊᐅᓚᑦᑎᓂᕐᒥᒃ, ᐊᒻᒪᓗ ᐊᑐᓕᖅᑎᑦᑎᓪᓗᓂ ᐊᑐᐊᒐᕐᓂᒃ ᐊᒻᒪᓗ ᐱᓕᕆᐊᖑᕙᑦᑐᓂᒃ ᐱᕕᖃᑦᑎᑦᑎᔪᓂᒃ ᐊᔾᔨᒌᑎᑦᑎᓂᕐᒥᒃ, ᐱᑦᔪᑎᖃᑦᑎᐊᓂᕐᒥᒃ ᐊᒻᒪᓗ ᑭᐅᑦᑕᖃᑦᑕᕈᓐᓇᓂᕐᒥᒃ.

ᐋᔅᓯᐅᕗ ᐊᑭᓕᖅᑕᐅᓯᒪᔪᖅ ᑮᓇᐅᔭᓕᕆᔨᒻᒪᕆᐅᓪᓗᓂ. ᐱᔪᒃᓯᑦᑎᐊᓚᐅᖅᑐᖅ ᒪᓕᒍᒪᓪᓗᓂ ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ ᐃᖅᑲᓇᐃᔮᒥᒃ ᑕᑯᒃᓴᐅᑎᑦᑎᔭᖅᑐᖅᖢᓂ ᑲᑎᖃᑎᖃᖅᖢᓂᓗ ᐃᓄᓕᕆᔨᑐᖃᒃᑯᓐᓂᒃ. ᐱᕈᖅᐸᓪᓕᐊᓪᓗᓂ, ᑐᓴᖅᑐᒻᒪᕆᐅᓚᐅᖅᐳᖅ ᐅᖃᐅᓯᐅᕈᓘᔭᖅᑐᓂᒃ ᓄᓇᖃᖅᑳᖅᓯᒪᔪᑦ ᐊᐅᓚᑦᑎᔨᖏᓐᓂᒃ ᐊᒻᒪ ᑮᓇᐅᔭᓕᕆᔾᔪᑎᖏᓐᓂᒃ. ᐊᐱᕆᓚᐅᕐᒪᒋᑦ ᖃᓄᐃᑦᑐᓂᒃ ᐃᓕᓐᓂᐊᖅᓯᒪᓂᖃᕐᒪᖔᑕ ᐊᒻᒪᓗ ᐅᖃᐅᑎᓪᓗᓂᒋᑦ ᐱᔪᒪᓂᕋᖅᑐᑎᒃ ᑮᓇᐅᔭᓕᕆᔨᓂᒃ.

"ᐃᖅᑲᓇᐃᔭᕆᐊᖅᑐᕈᒪᓚᐅᖅᑐᖓ ᐃᓄᓕᕆᔨᑐᖃᒃᑯᓐᓄᑦ ᐊᓯᔾᔩᔭᖅᑐᕐᓗᖓᓗ, ᑭᖑᓂᐊᒍᓪᓗ, ᐃᑲᔪᕐᓗᒋᑦ ᐃᓄᖁᑎᒃᑲ. ᐊᒻᒪᓗ ᐅᖃᕋᐃᒐᒪ ᐃᑲᔪᕐᓂᕋᖅᑐᖓ ᐃᓄᖁᑎᓐᓂᒃ, ᐃᓛᒃ ᐊᓂᓰᓇᐱᑐᐃᓐᓇᐅᖏᑦᑐᖅ, ᐅᖃᖅᑐᖓ ᓯᔾᔭᒥ ᓯᔾᔭᒧᑦ ᐅᐱᓐᓇᕋᓂ ᑕᐃᒫᒃ ᐱᕈᖅᓴᓚᐅᕋᒪ. ᐃᖅᑲᐅᒪᙱᑦᑐᖓ ᖃᓄᖅ ᐅᖃᕆᐊᔅᓴᖅ ᐅᖃᐅᓯᕐᒥᒃ, ᑭᓯᐊᓂ ᐱᕈᖅᓴᓪᓗᖓ, ᐃᑲᔪᖏᒃᑯᒃᑭᑦ ᐃᓄᖁᑎᒃᑲ, ᐋᓐᓂᕋᒪ ᐃᓄᖁᑎᓐᓂᒃ. ᐃᖅᑲᓇᐃᔮᓐᓂ, ᖃᐅᔨᒪᑦᑎᐊᕋᓱᐃᓐᓇᐅᔭᖅᑐᖓ ᑐᓂᓯᒐᓗᐊᕐᒪᖔᕐᒪ ᓄᓇᓕᓐᓄᑦ ᖃᓄᑭᐊᖅ," ᓇᓗᓇᐃᖅᓯᓪᓗᓂ.

ᐃᓕᓐᓂᐊᓕᕋᒥ, ᐋᔅᓯᐅ ᐱᒋᐊᓕᓚᐅᖅᑐᖅ ᐃᖏᕐᕋᑎᓪᓗᒍ. ᐱᔭᕇᓚᐅᙱᑦᑐᖅ ᐃᓕᓐᓂᐊᕐᕕᐊᓗᒻᒥᒃ, ᑲᑎᑎᑕᐅᖔᖅᑐᓂ ᐊᒻᒪᓗ ᑎᓴᒪᓂᒃ ᕿᑐᕐᖓᖃᑦᑐᓂ. GED-ᑖᓚᐅᖅᑐᖅ, ᖃᐅᔨᒪᔪᒪᓪᓗᓂ ᕿᑐᕐᖓᒥᓂᒃ ᑲᒪᑦᑎᐊᕈᓐᓇᐃᓐᓇᕋᓗᐊᕐᒪᖔᑦ. ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒧᑦ ᐃᓕᓴᕆᔭᐅᔾᔪᑎᑖᓚᐅᖅᑐᖅ, ᐊᓂᒍᐃᓪᓗᓂ ᐅᐱᒋᔭᐅᓪᓗᓂ ᑲᔪᓯᓪᓗᓂᓗ ᐃᓕᑕᕆᔭᐅᔾᔪᑎᑖᖅᖢᓂ ᐊᔾᔨᐅᙱᑦᑐᒥᒃ ᐊᖏᖃᑎᒌᒍᑎᒃᑯᑦ ᓯᓚᑦᑐᖅᓴᕐᕕᖕᒥ ᐊᒻᒪ ᓯᓚᑦᑐᖅᓴᕐᕕᒡᔪᐊᕐᒥ, ᐃᓕᑕᕆᔭᐅᔾᔪᑎᑖᖅᖢᓂ ᐅᑭᐅᒃ ᒪᕐᕉᒃ ᐃᓗᐊᓂ ᑎᓴᒪᐅᙱᖦᖢᓂ. ᐃᓕᓐᓂᐊᖏᓐᓇᓚᐅᖅᑐᖅ ᑮᓇᐅᔭᓕᕆᔨᙳᕋᓱᒃᖢᓂ ᕿᑐᕐᖓᖏᑦᑕ ᐊᑖᑕᖓ ᕿᒪᓚᐅᖅᖢᓂᐅᒃ, ᑎᑭᐅᑎᓪᓗᓂ 11-ᓄᑦ ᐊᕐᕌᒍᓄᑦ ᐱᒋᐊᓚᐅᖅᑎᓪᓗᒍ.

‍

"ᑕᐃᒪᓕ, ᓴᐱᓕᓚᐅᙱᑦᑐᖓ. ᓇᓗᓇᐃᖅᓯᔪᒪᖅᑲᐅᒐᒪ ᐊᖏᑐᐃᓐᓇᕈᒪᓚᐅᙱᑦᑐᖓ, ᑭᓯᐊᓂ ᓇᓗᓇᐃᖅᓯᔪᒪᖅᑲᐅᒐᒪ ᐸᓂᓐᓄᑦ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᕕᒃᓴᖃᕐᒪᑕ ᑕᖅᑳᓂ, ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᕕᒃᓴᖃᐅᖅᑐᓂᒃ. ᑭᖑᕚᕇᑦᑕᐅᖅ ᓄᖅᑲᐅᒥᖃᑦᑕᕈᒪᖅᑲᐅᒻᒥᒐᒪᑦᑕᐅᖅ. ᐱᐅᓂᖅᓴᒥᑦ ᓴᖅᑭᑦᑎᔪᒪᓚᐅᖅᑐᖓ ᐃᓚᓐᓄᑦ," ᐃᖅᑲᐅᒪᔪᖅ.

‍

ᐊᖏᓛᖅ ᐊᓂᒍᖅᑎᓐᓇᓱᒋᐊᖃᖅᑕᖓ ᐅᓪᓗᒥ ᐱᓱᒃᖢᓂ ᑕᒪᐃᓐᓂᒃ ᓄᓇᕐᔪᐊᕐᒥᐅᓂᒃ ᐃᒃᐱᒋᔭᖃᖅᖢᓂᓗ ᖃᐅᔨᑎᑦᑎᔭᕆᐊᖃᕐᓂᕐᒥᓂᒃ ᓈᒻᒪᖕᓂᖓᓂᒃ ᑭᐳᒦᖃᑕᐅᔭᕆᐊᒃᓴᖅ. ᓄᓇᓕᒻᒦᔅᓲᔭᖅᓯᒪᓪᓗᓂ, ᐊᓰᓂ ᐃᓛᓐᓂᒃᑯᑦ ᐃᓄᐃᑦ ᐅᔾᔨᕈᓱᖃᑦᑕᙱᒻᒪᑕ ᖃᐅᔨᒪᓂᕐᒥᓂᒃ ᖃᓄᐃᑦᑑᖕᒪᖔᑦ ᓄᓇᖃᕆᐊᒃᓴᖅ ᓄᓇᓕᖕᓂ.  "ᑕᑯᒃᓴᐅᑎᑦᑎᓂᐅᖕᒪᑦ ᐊᑑᑎᖃᒻᒪᕆᒃᐳᖓ ᓇᓕᐊᒃᑯᑐᐃᓐᓇᖅ ᓵᒦᖃᑕᐅᔭᕆᐊᒃᓴᖅ ᐊᑕᐅᑦᑎᒃᑯᓪᓗ ᐱᐅᓛᒃᑰᖅᑎᑦᑎᓗᖓ ᑕᒪᐃᓐᓂᒃ ᓄᓇᕐᔪᐊᓂᒃ ᐃᑲᔪᓪᓚᕆᒍᒪᓂᕐᒧᑦ ᑲᓇᑕᒥᒃ ᓇᒧᙵᐅᕙᓪᓕᐊᓂᕆᔭᐅᔪᒧᑦ ᖃᓄᑐᐃᓐᓇᖅ ᑕᑯᔭᒥᓄᑦ ᑲᔪᓯᓂᖃᑦᑎᐊᕐᓂᕐᒥᒃ," ᑕᐃᒪᓐᓇ ᑕᑯᒃᓴᐅᑎᑦᑎᕗᖅ.

ᐅᖃᐅᔾᔨᒋᐊᕐᓂᖓ ᒪᒃᑯᑦᑐᓄᑦ ᐃᓐᓇᕐᓄᑦ ᐊᖅᑯᑎᓕᐅᕈᒪᑐᐃᓐᓇᕆᐊᖃᖅᑐᓄᑦ ᓲᕐᓗ "ᐱᔭᕆᐊᖃᖅᑐᒻᒪᕆᐅᒻᒪᑕ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᑦ ᑮᓇᐅᔭᑎᒍᑦ, ᑲᓱᖅᑕᐅᒋᐊᖃᕐᒪᑕ." ᐊᓰᓂ ᑎᓕᐅᕆᕗᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᑮᓇᐅᔭᓕᕆᖁᓪᓗᒋᑦ ᓲᖃᐃᒻᒪ, "ᐊᑐᕆᐊᖃᕋᑦᑎᒍᑦ ᐱᓕᕆᔾᔪᑎᒋᓗᑎᒍᑦ ᐊᑐᖅᑕᐅᖁᔭᐅᓚᐅᕐᓂᖓᓄᑦ. ᑕᒪᒃᑯᐊ ᐃᓕᒋᐊᖃᖅᐸᕗᑦ ᓵᒦᒍᓐᓇᖁᓪᓗᑕ. ᐃᓕᑦᑕᕆᐊᖃᖅᑕᕗᑦ ᑖᒃᑯᐊ ᐊᑐᐊᒐᐃᑦ, ᐱᕙᓪᓕᐊᓂᐅᔪᑦ ᐊᒻᒪᓗ ᐃᓅᖃᑎᒌᓪᓗᐊᑕᐃᑦ ᐱᑎᑦᑎᔪᓐᓇᕐᓂᐊᕋᑦᑕ ᓯᕗᓕᖅᓯᓂᕐᒥᒃ, ᐱᑎᑦᑎᓗᑕ ᐱᔪᒪᓕᕈᑎᓂᒃ, ᐱᑎᑦᑎᓗᑕᓗ ᐊᖅᑯᑎᒥᒃ ᑲᔪᓯᑦᑎᐊᕐᓂᕐᒧᑦ."

ᐅᖃᐅᑎᓚᐅᖅᐹ ᐸᓂᓂ ᐆᒃᑐᖁᓪᓗᓂᐅᒃ ᑕᑯᓇᓱᒃᖢᓂᐅᒡᓗ ᐱᐅᒋᖕᒪᖔᒍ. ᖃᐅᔨᓚᐅᖅᑐᖅ ᖁᕕᐊᒋᔭᖃᕐᓂᕐᒥᓂᒃ ᐃᖅᑲᓇᐃᔭᕐᓂᕐᒥᒃ ᓄᓇᓕᖕᒥ ᐃᑲᔪᕐᖢᓂᓗ, ᐊᑐᕐᖢᓂ ᖃᐅᔨᒪᓂᕐᓂ ᐊᑐᕐᓂᑯᓂᒃᓗ ᓇᖕᒥᓂᕆᔭᖓᑕ ᑎᑎᕋᕐᕕᖕᒥᐅᑕᓕᕆᔾᔪᑎᖏᓐᓂ ᑮᓇᐅᔭᓕᕆᓂᕐᒧᑦ ᐱᔭᕇᕈᓯᐊᕐᒥᒃ. ᑕᐃᒪᓕ ᖃᐅᔨᓯᒪᔪᖅ ᐃᑲᔪᕈᓐᓇᕆᐊᖓᓂᒃ ᓄᓇᓕᐅᔪᓂᒃ ᐊᖅᑯᑎᖃᕐᓗᓂ ᑮᓇᐅᔭᑎᒍᑦ ᐊᒃᓱᕈᕈᑎᐅᔪᓂᒃ ᑮᓇᐅᔭᑎᒍᑦ ᐊᐅᓚᑦᑎᓂᒃᑯᑦ ᐱᔾᔪᑎᒋᓪᓗᒍ ᐃᑲᔪᕈᓐᓇᕐᒪᑦ ᐸᕐᓇᑎᕆᑎᓪᓗᒋᑦ ᐊᒻᒪᓗ ᑮᓇᐅᔭᓂᒃ ᓴᓂᕐᕙᐃᔪᓐᓇᖅᑐᓂ ᐊᒃᓱᕈᕐᓇᖅᑐᓄᑦ.

ᐃᓱᒪᖓᓅᖅᑎᓪᓗᒍ, ᐋᔅᓯᓂ ᑕᐅᑐᓪᓗᐊᑕᓲᖅ ᑕᕐᓂᖓᒍᑦ ᖃᓄᐃᙱᑦᑎᐊᕐᓂᕐᒥᒃ ᖃᐅᔨᒪᐃᓐᓇᕋᓱᒃᓗᓂ, ᐅᖃᐅᔾᔭᐅᓚᐅᕐᒪᑦ ᐃᓐᓇᑐᖃᖓᓄᑦ. ᑎᑎᕋᖃᑦᑕᖅᑐᖅ, ᕿᒻᒥᒥᓂᒃ ᐱᓱᔪᒃᖢᓂ, ᐸᓯᒧᑦ, ᐃᖃᓪᓕᐊᖅᖢᓂ ᐅᒥᐊᖅᑐᖅᖢᓂᓗ, ᒥᑎᑲᑕᒃᖢᓂ, ᐃᑲᔪᖅᑕᐅᔪᒪᓪᓗᓂᓗ ᓴᙱᙱᖔᖅᑐᖅ. ᒫᓐᓇᕋᑖᖅ, ᐅᓪᓗᒐᓴᓐᓂᑦ ᐸᓯᒦᓚᐅᖅᑐᖅ ᑲᓱᖅᓯᒐᓱᐊᖅᓱᓂ.

ᑲᔪᖏᖅᓴᐃᓂᕐᒧᑦ, ᓇᒡᓕᒍᓱᖅᑰᔨᔪᖅ ᐃᒃᐱᒍᓱᑦᑎᐊᕐᖢᓂᓗ ᐱᕈᖅᓴᓪᓗᓂ ᐊᑦᑕᖏᓐᓂ, ᐊᒃᑲᖏᓐᓂ, ᐊᑖᑕᑦᑎᐊᖓᓂᒃᓗ ᐊᒻᒪ 7−ᓂᒃ ᐃᑦᑐᖓᑕ ᐃᓕᓴᐃᔾᔪᑎᖏᓐᓂ. ᐊᓰᓂ ᐱᔪᒃᓯᑎᑕᐅᓚᐅᕐᒥᔪᖅ ᐱᓕᕆᐊᒧᑦ ᐊᐅᓚᑦᑎᔨᖓᓄᑦ ᑎᓕᐅᕆᓪᓗᓂ ᑖᔅᓱᒥᖓ ᑎᒃᑯᐊᖅᓯᓪᓗᓂᓗ ᑐᕌᑦᑎᐊᕐᓂᕐᒥᓂᒃ ᐊᒃᓱᕈᖅᑎᓪᓗᒍ ᐃᓕᓐᓂᐊᕐᓂᕐᒥᓂ, ᐱᕈᖅᓴᐃᓪᓗᓂ ᑎᓴᒪᓂᒃ ᓄᑕᖅᑲᓂᒃ ᐃᖅᑲᓇᐃᔭᕐᖢᓂᓗ ᑮᓇᐅᔭᙳᖅᑎᑦᑎᔨᐅᓪᓗᓂ ᐅᐊᓪᒫᑦᒥ. ᐅᖃᖃᑎᒌᒍᑎᒋᓚᐅᖅᑕᖓ ᐅᑎᕐᖢᓂ ᐊᖅᑯᑎᑦᑎᐊᕙᖕᒧᑦ ᐊᒃᓱᕈᕐᓇᖅᑐᒃᑰᖅᑎᓪᓗᒍ.

ᐅᖃᐅᓯᖃᕈᓐᓇᕈᓂ ᑎᓕᐅᕆᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᒪᒃᑯᑦᑐᓂᑦ ᑕᑯᓐᓇᕐᓂᕐᒥᑦ ᐃᒪᐃᓐᓇᔭᖅᑐᖅ, "ᓴᐱᓕᖅᑕᐃᓕᒋᑦ." ᐅᖃᕐᖢᓂ ᐃᓛᓐᓂᒃᑯᑦ ᓇᓪᓚᖓᔪᒪᑐᐃᓐᓇᕆᐊᖃᕐᓂᕐᓂᒃ ᐊᖅᑯᑎᖕᓂ ᑭᓇᒧᓪᓗ ᐃᑲᔪᕋᔭᕐᖢᓂᑎᑦ ᐅᑎᕐᓗᑎᒃ ᑭᓯᐊᓂ ᐃᓱᒪᖅᓲᑎᒋᕙᑎᑦ ᐊᑐᓂ ᐃᓄᐃᑦ ᓇᖕᒥᓂᖅ ᓇᓂᓯᓇᓱᒃᓗᑎᒃ ᖃᓄᕐᓗ ᐃᖏᕐᕋᑎᖃᑦᑕᕐᒪᖔᒋᑦ ᑲᔪᓯᑎᓪᓗᒋᑦ. ᐊᓰᓂᒧᑦ, ᕿᑐᕐᖓᕆᓚᐅᕐᒪᒋᑦ ᐊᒻᒪᓗ ᑕᐃᒃᑯᐊ ᐅᖃᖅᑐᑎᒃ ᑕᒻᒪᕈᓐᓇᖏᓐᓂᕋᖅᑐᑎᒃ. ᐊᒃᓱᕈᖅᖢᓂ ᑎᔅᓯᓈᕿᖃᑕᐅᓚᐅᖅᐳᖅ "ᐱᐅᓂᖅᓴᐅᙱᑦᑐᖓ ᑭᓇᑐᐃᓐᓇᕐᒥᑦ. ᐅᕙᓐᓂ ᐱᐅᓂᖅᓴᖅᑕᖃᙱᑦᑐᖅ." ᑎᓕᐅᕆᓚᐅᕐᒥᔪᖅᑕᐅᖅ ᓇᖕᒥᓂᖅ, ᑕᐅᑐᒐᖃᓪᓗᐊᑕᖅᖢᓂ ᐱᓕᕆᐊᒃᓴᒥᒃ ᐊᑐᐃᓐᓇᖅᖢᓂ ᑲᔪᓰᓐᓇᖅᖢᓂᓗ.

ᓇᒡᓕᒍᓱᖕᓂᖅ ᓈᓴᐅᑎᓂᑦ ᓈᓴᐅᓯᕆᓂᕐᓗ ᐊᒥᓱᕈᕆᐊᖅᑎᑦᑎᓪᓗᓂ ᐃᖅᑲᓇᐃᔮᖓᓄᑦ ᓈᒻᒪᒋᔭᖏᓐᓂ ᐱᑎᖦᖢᒍᓗ ᒥᓚᓂ ᐊᓰᓂ ᐱᕕᖃᖅᑎᖦᖢᒍ ᐅᑎᖅᑎᓪᓗᒍ. ᐱᓱᒍᓐᓇᖏᒃᑲᓗᐊᖅᑎᓪᓗᒍ ᒪᕐᕉᓐᓂᒃ ᓄᓇᕐᔪᐊᓂᒃ, ᓇᖏᖅᑐᖅ ᓇᖏᖅᑐᓂ ᑎᑭᒻᒪᑦ ᑐᕌᒐᖏᓐᓄᑦ ᐊᒻᒪᓗ ᑕᑯᑎᑦᑐᓂᒋᑦ ᕿᑐᕐᖓᖏᑦ ᑭᓱᑦ ᐊᔪᕐᓇᓐᖏᒻᒪᖔᑕ ᐊᒃᓱᕈᖅᑐᑎᒃ ᐱᓕᕆᓪᓗᑎᒃ ᐊᒻᒪᓗ ᐱᔪᒪᓂᖃᖅᑐᑎᒃ. ᑮᓇᐅᔭᓕᕆᔨᒻᒪᕆᐅᓪᓗᓂ, ᐃᑲᔪᖃᑦᑕᖅᑐᖅ ᓄᓇᓕᖕᓂᑦ ᐱᔪᓐᓇᖕᓂᓕᖕᓂᑦ ᓄᓇᖃᖅᑳᖅᓯᒪᔪᓂᑦ ᓄᓇᓕᖕᓂᑦ ᐱᓕᕆᖃᑎᖃᖅᐸᒃᖢᓂᓗ ᓴᖅᑭᑦᑎᓂᖕᓂᑦ ᓇᖕᒥᓂᖅ ᑐᑭᖏᓐᓂᑦ ᑲᔪᓯᑦᑎᐊᖕᓂᖕᒧᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑎᑎᕋᕋᕕᑦ ᑖᔅᓱᒥᖓ.