ᔭᐃᑦ ᕌᐳᑦᔅ ᐃᓕᓴᐃᔨᐅᔪᖅ, ᑎᑎᖅᑐᒐᖅᑎ, ᐊᒻᒪᓗ podcaster-ᖑᔪᖅ Lac La Ronge Indian-ᑯᓐᓂᑦ ᑕᐃᑲᓂ Northern Saskatchewan-ᒥ. ᐊᐱᖅᓱᑲᑕᒃᖢᓂ ᐊᑖᑕᖓᑕ ᐊᕐᕌᒍᖏᓐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ, ᔭᐃᑦ ᖃᐅᔨᓴᓲᖑᕗᖅ ᐱᐅᓯᕆᔭᐅᕙᓚᐅᖅᑐᓂᒃ, ᐱᓕᕆᐊᒃᓴᕆᔭᐅᔪᓂᒃ, ᐊᒻᒪ ᐊᒃᑐᐃᔾᔪᑕᐅᓲᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᐱᖅᓱᕐᓂᒃᑯᑦ ᐊᓂᒍᐃᓯᒪᔪᓂᒃ podcast−ᒥ "ᓱᓕ ᒫᓂ, ᓱᓕ ᒪᒥᓴᕐᓂᖅ".2

ᔭᐃᑦ ᖃᐅᔨᔪᒪᓂᖓ ᐊᒻᒪ ᓯᓚᑐᓂᖓ ᐃᑲᔪᓚᐅᖅᑐᖅ ᐃᓕᓐᓂᐊᑦᑎᐊᕐᓂᖓᓄᑦ, ᑭᓯᐊᓂ ᑲᑕᒃᓯᒪᓚᐅᖅᑐᖅ ᐃᓕᓐᓂᐊᓕᓵᖅᑎᓪᓗᒋᑦ: "ᐱᔭᕇᖅᓯᓚᐅᖅᑐᖓ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥᑦ ᐊᕐᕌᒍ ᐱᒋᐊᓵᖅᑎᓪᓗᒍ, 16-ᑐᐃᓐᓇᐅᓚᐅᖅᑐᖓ ᐊᓂᒍᐃᑎᓪᓗᖓ. ᐊᒻᒪᓗ ᐸᕐᓇᒍᑎᖃᓗᐊᓚᐅᖏᑦᑐᖓ; ᖃᐅᔨᒪᓚᐅᙱᓐᓇᒪ ᖃᓄᐃᓕᐅᕈᒪᖕᒪᖔᕐᒪ ᐃᓅᓯᓐᓂ. … ᒪᒃᑯᒃᑐᑯᓘᖅᑰᔨᓚᐅᖅᑐᖓ ᐊᒻᒪ ᐅᕙᓐᓂᒃ ᓂᕈᐊᕈᓐᓇᖅᑰᔨᓚᐅᙱᑦᑐᖓ."

ᐃᒻᒥᓂᒃ ᐱᕈᕈᓐᓇᖅᑎᖦᖢᒍ ᕿᒥᕐᕈᔪᓐᓇᖅᑎᖦᖢᒍᓗ ᓄᓇᕐᔪᐊᖅ, ᔭᐃᑦ ᐊᕐᕌᒎᓂᐊᖅᑑᖕᓂ ᒪᕐᕉᖕᓂ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᒃᓴᓂᒃ ᐱᓕᕆᓚᐅᖅᐳᖅ "ᖃᐅᔨᔪᒪᓪᓗᖓ ᖃᓄᐃᓕᐅᕈᒪᖕᒪᖔᕐᒪ." ᖃᐅᔨᓚᐅᖅᑕᖓ ᐱᓕᕆᖃᑎᖃᕈᒪᑦᑎᐊᕐᓂᖓᓂᒃ ᒪᒃᑯᒃᑐᓂᒃ. "[ᖁᕕᐊᓱᒻᒪᕆᓚᐅᖅᑐᖓ ᐅᕙᓐᓄᑦ. ᖁᕕᐊᓱᓪᓚᕆᓚᐅᖅᑐᖓ....ᑕᐃᒫᒃ ᐃᓕᓐᓂᐊᕆᐊᕈᒪᓕᖅᑎᓪᓗᖓ." 18−ᖑᑎᓪᓗᒍ, ᔭᐃᑦ ᐱᓇᔪᓚᐅᖅᐳᖅ ᐊᖏᖅᑕᐅᓪᓗᓂᓗ ᓯᓚᑦᑐᖅᓴᕐᕕᒡᔪᐊᒧᑦ ᓵᔅᑳᑦᓱᐊᓐᒥ.

ᔭᐃᑦ ᑲᑉᐱᐊᓱᓚᐅᖅᑐᖅ ᓅᑉᐸᓪᓕᐊᓂᕐᒥᑦ ᓂᐸᐃᑦᑐᒥᑦ ᐃᓅᓯᖓᓂᑦ ᒥᑭᔪᒥᑦ ᓄᓇᓕᓐᓂᑦ ᖃᐅᔨᒪᓗᐊᖏᑦᑐᒧᑦ ᓯᓚᑦᑐᓴᕐᕕᔾᔪᐊᕐᒥᑦ ᓄᓇᓕᐸᐅᔭᖓᓂᑦ ᓵᔅᑲᑑᓐᒥᑦ. "ᐃᑲᕐᕋᓄᑦ ᑎᓴᒪᓄᑦ ᓅᓚᐅᖅᑐᖓ, ᑭᓯᐊᓂ ᐃᑲᕐᕋᑦ ᑎᓴᒪᑦ ᐃᓗᐊᓂ ᐊᖅᑯᑎᑯᑖᒃᑯᑦ, ᐊᔾᔨᒋᙱᑦᑎᐊᖅᑕᖓ ᓄᓇᕐᔪᐊᖅ." ᐊᕐᕌᒍᓄᑦ ᑎᓴᒪᓄᑦ ᐃᖅᑭᓖᑦ ᐃᓕᓴᐃᔨᕈᖅᓴᓂᕐᒧᑦ ᐃᓕᓐᓂᐊᓚᐅᖅᑐᖅ.

ᑕᐃᒃᑯᐊ ᐊᕐᕌᒍᐃᑦ ᖃᖓᑕᓚᐅᖅᑐᑦ ᔭᐃᑦᒧᑦ, ᓱᖏᐅᑎᑲᐅᖅᑐᕋᒥ ᐊᕙᑎᒋᓕᓵᖅᑕᒥᓄᑦ, ᐱᖃᓐᓇᕆᔭᖅᑖᖅᖢᓂ, ᑐᑭᖏᓐᓂᒡᓗ ᖃᐅᔨᓇᓱᒃᖢᓂ ᐃᓕᓐᓂᐊᖅᑕᒥᓂᒃ. "ᐱᐅᓛᖑᓚᐅᖅᑐᖅ ᓂᕈᐊᕆᓚᐅᖅᑕᕋ ᐅᕙᓐᓄᑦ... ᐃᓅᓯᓐᓄᑦ ᐊᓯᔾᔨᕈᑕᐅᓚᐅᖅᑐᖅ ᐅᕙᓐᓄᑦ. ᑲᒪᓇᑦᑎᐊᖅᑐᖅ ᐱᓕᕆᐊᒃᓴᖅᑕᖃᕐᓂᖓᓂᒃ ᑕᐅᑐᓪᓗᐊᑕᖅᑐᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓂ....ᖃᐅᔨᔾᔪᑎᒋᑦᑎᐊᓚᐅᖅᑕᕋ ᖃᐅᔨᓇᓱᒃᓗᖓ ᑭᓇᐅᓂᓐᓂᒃ ᐃᓕᖅᑯᓯᓐᓂᓗ ᐃᓕᑦᑎᓗᖓᓗ ᐅᖃᐅᓯᓐᓂᒃ."

ᔭᐃᑦ ᐱᔪᒃᓯᑎᑕᐅᓚᐅᖅᐳᖅ ᕿᓂᖁᔭᐅᓪᓗᓂ ᐱᑕᖃᑦᑎᐊᕐᓂᖓᓂᒃ ᓄᓇᖃᖅᑳᖅᑐᑦ ᐱᐅᓯᑐᖃᖏᓐᓂᒃ ᐃᑲᔪᕈᒪᓂᕐᒧᓪᓗ ᑭᖑᕚᒃᓴᑦᑎᓐᓄᑦ ᑕᐃᒪᐃᓕᐅᖃᑕᐅᖁᓪᓗᒋᑦᑕᐅᖅ. ᐱᔭᕇᓚᐅᖅᑎᓪᓗᒋᑦ ᐃᓕᓴᐃᔨᐅᓂᕐᒧᑦ ᐱᔭᕇᕈᓯᐊᕐᒥᒃ, ᔭᐃᑦ ᐃᓕᓴᐃᓕᓚᐅᖅᑐᖅ ᐅᖃᐅᓯᓕᕆᓂᕐᒥᑦ ᐃᓕᖅᑯᓯᕐᒥᓪᓗ (ᐊᒻᒪᓗ ᓴᓇᐅᒐᕐᓂᑦ ᐊᒻᒪ ᑎᒥᓂᑦ). ᐊᓕᐊᓇᐃᒋᓚᐅᖅᐸᐅᒃ ᐃᓕᓴᐃᔨᐅᓪᓗᓂ, ᐃᒃᐱᒍᓱᓚᐅᖅᑐᖅ ᑭᓱᒥᑭᐊᖅ ᐱᑕᖃᙱᓐᓂᕋᐃᓪᓗᓂ. ᓇᖕᒥᓂᖅ ᐅᖃᖅᖢᓂ, "ᓂᐱᓕᐅᕆᑦᑎᐊᓚᐅᖅᑐᖅ ᕿᓕᖅᓯᔭᕆᐊᖃᖅᑐᒥᒃ."

ᒪᒃᑯᒃᖢᓂ, ᔭᐃᑦ ᐃᒃᐱᒍᓱᓚᐅᖅᑐᖅ ᒪᓕᒋᐊᖃᕋᓱᒋᓪᓗᓂ ᐊᔾᔨᖓᓂᒃ ᐊᖅᑯᑎᒥᒃ ᐊᓯᒥᑎᑐᑦ. "ᐊᒃᓱᕉᑎᒋᖃᑦᑕᓚᐅᖅᑕᕋ ᒪᒃᑯᒃᑑᓪᓗᖓ: ᐆᑮ, ᑭᒃᑯᓕᒫᑦᑎᐊᑦ, ᐃᓚᒋᔭᐅᔭᕆᐊᖃᖅᑰᖅᑐᖓ. ᑭᒃᑯᓕᒫᑦ ᐱᖃᓐᓈᖃᖅᑐᐃᓐᓇᐅᕗᑦ, ᐱᖃᓐᓈᖃᖅᑐᒃᓴᐅᔪᖓ." ᑭᓯᐊᓂ, ᐊᕐᕌᒍᖏᑦ ᓯᓚᑦᑐᖅᓴᕐᕕᔾᔪᐊᕐᒥ ᓄᖅᑲᕈᓐᓇᖅᑎᖦᖢᓂᒋᑦ ᐅᖁᖕᒥᑦ ᒪᓕᒃᖢᓂᐅᒡᓗ ᓇᖕᒥᓂᖅ ᐊᖅᑯᑎᖓᓂ.

"ᐃᓱᒪᒋᔭᕋ ᐊᖏᔪᒥᒃ ᑐᓴᖅᑎᑦᑎᔪᒪᓪᓗᖓ ᒪᒃᑯᒃᑐᒥᒃ ᖃᓄᐃᙱᓐᓂᖓᓂᒃ ᒪᓕᒋᐊᒃᓴᖅ ᐃᓄᒋᐊᓂᒃ....ᖃᓄᐃᙱᑦᑐᖅ ᓇᖕᒥᓂᖅ ᐱᓕᕆᔭᕆᐊᒃᓴᖅ." ᔭᐃᑦ ᓅᑎᖦᖢᓂᐅᒃ ᐃᓕᓐᓂᐊᕐᓂᖓ ᐅᓪᓘᑉ ᐃᓚᐃᓐᓇᖓᓄᑦ ᐃᓇᖐᓪᓗᓂ ᐃᓕᓴᐃᔨᒥᒃ, ᐱᕕᖃᖅᑎᑦᑎᓪᓗᓂ ᐃᓱᒪᖅᓱᕈᓐᓇᕐᓂᕐᒥᒃ ᐱᓇᓱᒃᓗᓂ ᓇᖕᒥᓂᖅ ᓴᓇᑐᔪᓂᒃ ᐱᓕᕆᐊᒃᓴᓂᑦ, ᓲᕐᓗ ᓴᓇᐅᒐᖏᑦ, ᑎᑎᕋᖅᑕᖏᑦ, ᐊᒻᒪ ᓲᖃᐃᒻᒪ podcast.

ᔭᐃᑦ ᐃᒻᒥᓂᒃ ᐃᓕᓴᐃᓚᐅᖅᑐᖅ podcasting-ᒥᒃ, ᖃᓄᖅ ᑎᑎᕋᕆᐊᖃᕐᓂᕐᒥᒃ, ᖃᕋᓴᐅᔭᕐᒧᐊᖅᑎᕆᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ, ᐊᒻᒪᓗ ᐅᖃᖅᖢᓂ, "ᓱᓕ ᐃᓕᑦᑎᕙᓪᓕᐊᔪᖓ ᐃᖏᕐᕋᑎᓪᓗᖓ." ᐊᐱᖅᓱᕐᓂᒃᑯᑦ, ᑭᐅᔪᓐᓇᖃᑦᑕᖅᑐᖅ ᐊᐱᖅᑯᑎᓂᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᒻᒪᓗ ᐊᑖᑕᖓᑕ ᐊᑐᖅᓯᒪᔭᖏᓐᓂᑦ. "2008-ᒥ ᒪᒥᐊᓪᓚᕆᓚᐅᖅᑐᒍᑦ ᐃᓄᐃᓪᓗ ᐅᖃᓪᓚᒃᐸᓪᓕᐊᓕᖅᖢᑎᒃ [ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ]. ᑕᐃᔅᓱᒪᓂ, ᐃᓕᑉᐸᓪᓕᐊᓚᐅᖅᓯᒪᒐᒪ ᐊᒻᒪᓗ ᐊᐱᖅᓱᕆᐊᖅᑐᖅᑐᖃᕈᓐᓇᓚᐅᕐᓇᖓ ᐊᑖᑕᒐ ᐃᓅᔪᓐᓃᓚᐅᕐᒪᑦ. ᑭᓯᐊᓂ ᖃᐅᔨᔪᒪᖅᑲᐅᒐᒪ. ᐊᒥᓱᓂᒃ ᐊᐱᖅᑯᑎᒃᓴᖃᓚᐅᖅᑐᖓ."

ᔭᐃᑦ ᑲᑉᐱᐊᑦᑕᐃᑦᑑᓂᖓ ᓇᖕᒥᓂᖅ ᐊᖅᑯᑎᒋᓂᐊᖅᑕᒥᓄᑦ, ᑭᐅᔭᐅᔪᒪᓪᓗᓂᓗ ᐊᔪᕐᓇᖅᑐᓄᑦ ᐊᐱᖅᑯᑎᓄᑦ, ᐅᓄᖅᑐᓂᒃ ᑐᓐᓂᖅᑯᓯᐊᖅᑎᑦᑎᖃᑦᑕᖅᓯᒪᕗᖅ, ᐅᑯᓂᖓᓗ ᐃᓱᒪᒃᓴᖅᓯᐅᕈᓐᓇᑦᑎᐊᖅᑐᓂᒃ, ᓄᑖᓂᒃ ᐃᖅᑲᓇᐃᔮᕆᓛᕈᒪᔭᖏᓐᓂᒃ, ᐊᒻᒪ ᐱᐅᓯᒋᐊᖅᑎᑦᑎᓪᓗᓂ ᓇᖕᒥᓂᖅ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ ᐊᒻᒪ ᖃᓄᐃᙱᑦᑎᐊᕐᓂᕐᒥᒃ. "ᓄᓇᕐᔪᐊᖅ ᒫᓐᓇ ᐃᓂᑦᑎᐊᕙᐅᖕᒪᑦ, ᖃᐅᔨᓇᓱᒃᑐᐃᓐᓇᐅᖅᑰᖅᖢᑕᓗ ᖃᓄᖅ ᐋᖅᑭᒋᐊᕈᓐᓇᕐᒪᖔᑦ ᐊᒻᒪ ᓱᖏᐅᑎᔪᓐᓇᕐᒪᖔᑦ ᐊᓯᔾᔨᖅᐸᓪᓕᐊᔪᓄᑦ... ᒫᓐᓇ ᐱᕕᖃᕐᓂᖅ ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᕐᒥᑦ ᐆᒃᑐᕐᓂᕐᓗ ᓄᑖᓂᒃ ᐃᓱᒪᒐ ᖃᓄᐃᙱᑦᑎᐊᕐᓂᖓᓂᒃ ᖃᐅᔨᒋᐊᕐᓗᓂ."

ᑲᒪᓇᙱᖦᖢᓂ, ᔭᐃᑦ ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐅᖃᐅᔾᔪᐃᕗᖅ ᐃᓅᓯᖓᓂᒃ ᐃᒪᐃᓕᐅᖅᖢᓂ: "ᐅᖃᐅᔾᔨᒋᐊᕈᑎᒐ ᑲᑉᐱᐊᓱᙱᑐᐃᓐᓇᕋᔭᖅᐳᖅ. ᓄᓇᓕᓯ ᑕᐃᑲᓃᖏᓐᓇᐅᔭᕐᓂᐊᖅᑐᖅ ᐅᑎᕈᒪᒍᕕᑦ; ᓇᒧᓐᖓᐸᓪᓕᐊᖏᒻᒪᑦ. ᑲᑉᐱᐊᓱᙱᓪᓗᑎᑦ ᐱᕕᖃᕐᓗᑎᓪᓗ....ᐱᑐᐃᓐᓇᕆᐊᖃᕋᕕᑦ, ᐃᓄᑑᑐᐃᓐᓇᕆᐊᖃᖅᑐᑎᑦ, ᑭᓯᐊᓂ ᓇᓂᓯᓂᐊᖅᑐᑎᑦ ᑭᓇᒥᒃ ᓇᓂᓯᔭᕆᐊᖃᕐᒪᖔᖅᐱᑦ ᐊᒻᒪ ᓇᖕᒥᓂᖅ ᓄᓇᓕᓯ ᓇᓃᓕᕐᒪᖔᖅᐱᑦ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.