Empty Red Dresses, ᐊᑕᖏᖅᖢᓂ ᐆᒻᒪᑎᒧᑦ: ᔭᐃᒥ ᐸᓛᒃ ᓴᖅᑭᑦᑎᕗᖅ ᑭᒃᑯᑐᐃᓐᓇᓄᑦ ᓴᓇᐅᒐᕐᓂᒃ ᐊᒃᑐᐃᔪᓂᒃ
"ᓴᓇᙳᐊᖅᑎᐅᓯᒪᕗᖓ ᐆᒻᒪᑎᒃᑯᑦ ᑕᐃᒪᙵᑦ ᑎᑎᕋᕈᓐᓇᖅᓯᓚᐅᕋᒪ," ᔭᐃᒥ ᐸᓛᒃ, ᒫᓂᑑᐸᒥᙶᖅᑐᖅ ᒥᑎᔅ, ᐊᓂᔅᓈᐱ, ᑯᕇ ᐊᒻᒪ ᑕᕆᐅᑉ ᐊᑭᐊᓂᙶᖅᑐᖅ ᑎᑎᖅᑐᒐᖅᑎ. ᐱᓕᕆᐊᖃᖅᓯᒪᔪᖅ Red Dress Project-ᒥᑦ ᐊᒻᒪᓗ ᐊᓯᐅᓯᒪᔪᓂᑦ ᐃᓄᐊᖅᑕᐅᓯᒪᔪᓂᒡᓗ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᓂᕕᐊᖅᓯᐊᓂᓪᓗ ᐊᕐᕌᒍᒐᓴᖕᓂᑦ. ᐱᓕᕆᐊᖅ ᐱᔪᒃᓯᓕᖅᑎᑕᐅᓯᒪᕗᖅ ᖃᓪᓗᓈᖑᖃᑎᒌᙱᑦᑐᓄᑦ ᐋᓐᓂᖅᓯᕆᓂᐅᖃᑦᑕᖅᑐᒧᑦ ᐊᑐᖅᑕᐅᖃᑦᑕᖅᓯᒪᔪᓄᑦ ᓄᓇᖃᖅᑳᖅᑐᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐃᓚᖏᓪᓗ ᐋᓐᓂᖅᓯᕆᓂᐅᕙᒃᑐᓄᑦ ᐃᓚᖏᓐᓄᑦ ᐱᓕᕆᐊᖑᖃᑦᑕᖅᓯᒪᔪᓄᑦ. ᑲᔪᖏᖅᓴᖅᑕᐅᓚᐅᕐᒥᔪᖅ ᐅᖃᓕᒫᒐᕐᒧᑦ ᔭᓯᑲᒧᑦ, ᐅᖃᓕᒫᒐᐅᔪᖅ ᑎᑎᕋᖅᑕᐅᓚᐅᖅᑐᖅ ᒪᕆᐊ ᑳᒻᐳᒧᑦ ᐃᓗᓕᖃᓚᐅᖅᑐᖅ ᐃᓗᓕᖃᙱᑦᑐᒥᒃ ᐊᐅᐸᖅᑐᒥᒃ ᐊᓐᓄᕌᒥᒃ.
"ᐊᒃᑐᐃᓂᖃᕈᒪᓪᓚᕆᓚᐅᖅᑐᖓ ᓂᕆᐅᒃᐳᖓᓗ ᐊᓯᔾᔩᔪᒪᓪᓗᖓ, ᐊᑦᑕᖕᓇᙱᓐᓂᕐᓴᐅᓗᓂᓗ ᐊᕐᓇᓄᑦ ᓴᓇᐅᒐᒃᑯᑦ"
ᐱᓕᕆᐊᖅ ᐱᒋᐊᓚᐅᖅᑐᖅ ᓯᕗᓪᓕᖅᐹᒥᑦ ᐃᓕᓯᓪᓗᑎᒃ ᐊᐅᐸᖅᑐᓂᑦ ᐊᓐᓄᕌᓂᑦ, 6−ᓂᑦ 7−ᓂᒡᓘᓐᓃᑦ ᓂᐅᕕᖅᖢᑎᒃ ᓂᐅᕕᕐᕕᕋᓛᒥᑦ ᐃᓄᒋᐊᒃᑐᒃᑯᕕᖕᓂᑦ. ᑕᐃᑲᙵᑦ, ᕿᕐᓂᖅᑕᖅ ᖃᐃᖁᔭᐅᓚᐅᖅᑐᖅ ᑕᑯᕐᕈᔾᔨᖁᔭᐅᓪᓗᓂ ᒥᑭᔪᒥᒃ ᑲᑎᑦᑕᕐᕕᖕᒥ ᐊᒻᒪᓗ ᐱᓕᕆᐊᖑᔪᖅ ᐱᕈᓚᐅᖅᑐᖅ ᑭᓯᐊᓂ ᓯᓚᒃᑐᓴᕐᕕᒡᔪᐊᖓ ᐅᐊᓂᐸᐃᒡᒥ ᓄᐊᑦᑎᑎᓪᓗᒋᑦ 100 ᐅᖓᑖᓂ ᐊᓐᓄᕌᓂᒃ ᐊᒻᒪᓗ ᑕᑯᒃᓴᐅᑎᓪᓗᒋᑦ ᓯᓚᑦᑐᕐᓴᖅᕕᒻᒥ. ᑖᓐᓇ ᐱᓕᕆᐊᖑᔪᖅ 100-ᖑᓗᐊᖅᑐᓄᑦ ᐊᔾᔨᒌᙱᑦᑐᓄᑦ ᐃᓂᐅᔪᓄᑦ ᑲᓇᑕᒥ ᐊᕐᕌᒍᑦ 12 ᐅᖓᑖᓂ ᐊᒻᒪᓗ ᒫᓐᓇ ᓄᓇᖃᖅᑐᑦ ᓇᖕᒥᓂᖅ ᐃᓕᓯᓯᒪᓕᖅᑐᑦ ᐊᒻᒪᓗ ᓇᓗᓇᐃᒃᑯᑕᐅᔪᖅ ᓴᖅᑭᔮᓕᖅᑐᓂ ᐊᔾᔨᙳᐊᓂ, ᐊᒥᐊᕆᓂᐅᔪᓂ, ᐊᓐᓄᕌᓂᒃ ᓴᓇᓯᒪᓂᖏᓐᓂ. "ᖃᔅᓯᑲᓪᓚᖕᓂ ᐊᔾᔨᒌᙱᑦᑐᑎᒍᑦ ᑕᒪᓐᓇ ᐱᓕᕆᐊᖑᔪᖅ ᐱᕈᖅᓯᒪᓕᖅᐳᖅ ᓴᓇᑐᓂᒃᑯᑦ ᖃᓄᖅ ᐊᓯᖏᑦ ᓴᓇᙳᐊᖅᑎᑦ ᑕᑯᕙᒃᑭᓪᓗᑎᒃᑕᐅᖅ," ᕿᕐᓂᖅᑐᖅ ᐊᒃᑐᐊᓂᖃᖅᐳᖅ.
ᐊᑕᐅᓯᖅ ᐊᑐᒐᒃᓴᖅ ᐱᓕᕆᐊᒃᓴᖅ ᐊᓯᔾᔩᔪᓐᓇᖅᑐᖅ ᓴᖅᑭᔮᖅᑎᑦᑎᓂᕐᒥᒃ ᐊᑕᐅᓯᐅᖃᑎᒌᖕᓂᕐᒥᒃ. "ᐃᑲᔪᕈᓐᓇᖅᑐᖅ ᖃᑕᙳᑎᒌᓂᒃ ᐃᓄᑑᖅᑰᔨᙱᖦᖢᑎᒃ. ᐃᓚᒌᑦ ᐃᓚᐃᓐᓈᖅᑕᐅᖃᑦᑕᕐᒪᑕ ᑕᖅᑲᒃᑯᓄᖓ, ᑭᓯᐊᓂᑦᑕᐅᖅ ᐸᓖᓯᒃᑯᓐᓂᑦ, ᑕᒪᒃᑯᓂᖓ ᐃᑲᔪᖃᑦᑕᕆᐊᖃᖅᑐᑎᒃ. ᐊᐅᐸᖅᑐᒥᒃ ᐊᓐᓄᕌᖅᓯᒪᑐᐃᓐᓇᕐᓂᖅ ᑕᑯᑎᑦᑎᑐᐃᓐᓇᖅᐳᖅ ᐃᓄᑑᙱᓐᓂᖏᓐᓂᒃ ᑕᒪᑐᒧᖓ ᐊᒃᓱᕈᕐᓇᖅᑐᒧᑦ, ᓇᖏᕐᓂᑦᑎᓐᓂᒃ ᓴᓂᑦᑎᐊᑦᑎᓐᓂ ᐊᒻᒪᓗ ᖃᓄᖅ ᐊᔪᕐᓇᙱᒻᒪᖔᑦᑕ, ᒪᑐᐃᙶᖅᖢᑕᓗ ᓈᓚᒍᓐᓇᕐᓂᕐᒥᒃ ᐃᑲᔪᕐᓂᕐᒥᒡᓗ," ᕿᕐᓂᖅᑐᖅ ᓇᓗᓇᐃᔭᐃᕗᖅ.
ᕿᕐᓂᖅᑕᐅᑉ ᐱᓕᕆᐊᖏᑦ ᐃᑲᔪᖅᓱᐃᑎᓪᓗᒋᑦ ᖃᑕᙳᑎᒌᓂᒃ, ᓇᖕᒥᓂᖅ ᖃᑕᙳᑎᖏᑦ ᐱᔪᒃᓯᓗᐊᓚᐅᙱᑦᑐᑦ ᐃᖅᑲᓇᐃᔮᖃᕈᒪᓂᕐᒥᒃ ᓴᓇᙳᐊᖅᑎᐅᓂᕐᒧᑦ, ᐃᓱᒫᓘᑎᖃᕐᖢᓂ ᖃᓄᖅ ᐊᔪᕐᓇᕋᔭᙱᒻᒪᖔᖅ. ᐊᖅᑯᑎᒥᓂᒃ ᒪᓕᑲᑕᐃᓐᓇᖅᖢᓂ. ᐱᓇᓱᐊᓚᐅᕋᓂ ᓴᓇᐅᒐᓕᕆᓂᕐᓄ ᐅᓪᓗᓕᒫᖅ, ᐃᓕᓴᐃᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᐊᒻᒪ ᖃᓪᓗᓈᑎᑐᑦ ᐱᔭᕇᕈᓯᐊᖅᑐᓂ ᓯᓚᑦᑐᓴᕐᕕᔾᔪᐊᖓᓂ ᒫᓂᑑᕙᐅᑉ. ᖃᐅᔨᓴᓚᐅᖅᑐᖅ ᐊᐅᓪᓚᖅᖢᓂᓗ ᑭᓯᐊᓂ ᐃᑦᑐᖓ ᐃᓅᔪᓐᓃᕐᒪᑦ ᐅᑎᖅᖢᓂᓗ ᑭᓇᒧᒃ ᖁᕕᐊᓱᒃᖢᓂ ᐅᓂᒃᑳᖅᖢᓂᓗ ᓯᕗᒻᒧᑦ. "ᑕᐃᒪᓕ ᓴᖅᑭᓚᐅᖅᓯᒪᕗᖓ ᐊᐅᐸᖅᑐᒥᒃ ᐊᓐᓄᕌᓕᐅᕐᓂᕐᒥᒃ ᐊᒻᒪᓗ ᐃᓱᒪᓕᐅᓕᓚᐅᖅᑐᖓ ᖃᓄᐃᓕᐅᕐᓂᐊᕐᒪᖔᕐᒪ, ᐊᑐᕐᓂᐊᕐᕋᒪ ᑐᓂᕐᕈᑎᓐᓂᒃ ᐃᑲᔪᕐᓂᐊᕐᓗᒋᑦ ᐊᓯᒃᑲ, ᐱᓗᐊᖅᑐᒥᒃ. ᐃᓱᒪᓕᐊᖑᓚᐅᖅᑐᖅ ᐊᔭᐅᖅᑐᐃᔾᔪᑕᐅᑐᐃᓐᓇᓚᐅᖅᑐᖅ ᑭᖑᓂᐊᒍᑦ," ᐃᖅᑲᐅᒪᔪᖅ.
ᑮᓇᐅᔭᑎᒍᑦ ᓇᓗᓇᕈᔪᒃᐸᖕᓂᖓ ᓴᓇᙳᐊᕐᓂᕐᒧᑦ ᐃᓅᓯᖅ ᐊᒃᓱᕈᕐᓇᐃᓐᓇᖅᐳᖅ, ᐱᕈᖅᓴᓚᐅᕋᓗᐊᖅᑎᓪᓗᒍ ᓈᒻᒪᒃᑐᒥᒃ ᐱᕕᒃᓴᖃᖅᖢᓂ ᖁᐊᖅᓵᕐᓇᖅᑐᒧᐊᕈᓐᓇᖅᖢᓂ, ᐃᓚᖃᖅᖢᓂ ᐃᑲᔪᖅᑐᐃᔪᓐᓇᕐᓂᕐᒥᒃ ᑐᐊᕕᕐᓇᖅᑐᖅᑕᖃᓕᖅᑎᓪᓗᒍ. ᐃᓄᑑᓪᓗᓂ ᐊᖓᔪᖅᑳᖑᓪᓗᓂ, ᐊᒃᓱᕈᐃᓐᓇᐅᔭᖅᑐᖅ ᐱᓕᕆᔭᕆᐊᒃᓴᖅ ᐆᒻᒪᑎᒥᓂᒃ ᐱᓕᕆᔪᓐᓇᕐᓂᐊᕐᒪᑦ. "ᐃᒃᐱᒋᑐᐃᓐᓇᖅᑕᕋ ᐃᓅᓯᕋ, ᐱᐅᔪᐊᓘᓪᓗᓂ," ᐱᙳᐊᖅᑐᖅ. ᕿᕐᓂᖅᑐᖅ ᐃᒃᐱᒍᓱᒃᑐᖅ ᓴᓇᐅᒐᖓ ᒥᑎᐅᑉ ᖃᑕᙳᑎᖏᓐᓃᙶᕐᓂᖓᓂᒃ, ᐊᑖᑕᑦᑎᐊᖓ ᐊᓈᓇᖓᓗ ᓴᓇᑐᔫᓪᓗᑎᒃ ᓇᒃᓴᑦᑎᐊᕐᖢᑎᒃᓗ ᐊᓐᓄᕋᐃᖦᖢᑎᒃ.
ᓴᓇᐅᒐᖅ ᕿᕐᓂᖅᑕᐅᓪᓗᓂ ᐃᒻᒥᓂᒃ ᐅᒃᑯᐃᖅᓯᒪᓕᖅᐳᖅ ᓄᓇᕐᔪᐊᕐᒧᑦ, ᐋᓐᓂᖅᓯᒪᕐᔪᐊᖅᑐᖅ ᑲᙳᓱᒃᖢᓂ. "ᖃᐅᔨᓚᐅᙱᓐᓇᒪ ᑭᓯᐊᓂ ᐃᒃᐱᒍᓱᑦᑎᐊᕐᓂᕈᒪ ᐅᖃᐅᓯᕆᔭᓐᓂᒃ ᐃᓄᐃᑦ ᓵᑦᑎᐊᖓᓂ, ᐃᑲᕐᕋᒐᓴᖕᓂᒃ ᐅᖃᓪᓚᒍᓐᓇᖅᑐᖓ, ᑕᐃᒪᓕ ᑕᒪᒃᑯᓂᖓ ᐅᖃᐅᓯᖃᓕᖅᑎᓪᓗᖓ, ᑲᑉᐱᐊᓱᓕᓚᐅᖅᐳᖓ," ᐃᖅᑲᐅᒪᔪᖅ.
ᐃᓐᓇᐅᔪᖅ ᐃᓕᓐᓂᐊᖅᑎᑕᐅᓚᐅᖅᑐᖅ ᐃᓄᐃᑦ ᑲᒪᒋᔭᖃᕆᐊᖃᕐᓂᖏᓐᓂᒃ ᑐᓂᕐᕈᓯᖏᓐᓂᒃ ᐅᖃᐅᓯᖃᕐᓂᕐᒥᒃ ᐊᒻᒪᓗ ᑕᒪᓐᓇ ᐃᓕᑕᐅᔪᖅ ᐊᓯᔾᔩᓪᓗᓂ ᐃᓱᒪᒋᔭᒥᓂᒃ, ᐊᖏᓪᓕᒋᐊᖅᑎᑦᑎᓪᓗᓂ ᐊᖏᓂᖓᓂᒃ ᑖᔅᓱᒪ ᐊᒻᒪᓗ ᑲᑉᐱᐊᒋᔭᖏᓐᓂᒃ ᐊᖏᓂᖅᓴᒧᑦ. ᐃᓕᑦᑎᓪᓗᓂ ᐋᐳᒥᒃ ᐊᒃᑑᑎᔪᒥᒃ ᐊᒥᖅᑳᕈᑎᖃᕐᓂᕐᒥᒃ ᑐᓐᓂᖅᑯᓯᐊᓂᒃ ᐅᓪᓗᑕᒫᓪᓗ ᖃᐅᔨᑎᑦᑎᔾᔪᑎᓂᒃ ᖃᓄᖅ ᐃᓅᓯᖅ ᖃᓄᐃᑦᑑᔪᓐᓇᕐᒪᖔᑦ ᑭᒃᑯᓕᒫᑦ ᐊᒥᖅᑳᕈᑎᖃᕈᓐᓇᖅᐸᑕ ᑐᓐᓂᖅᑯᓯᐊᖏᓐᓂᒃ ᖃᐅᑕᒫᑦ. ᐊᓯᑎᑦ ᑐᓂᕐᕈᓯᐊᒥᓂᒃ ᑐᓴᖅᑎᑦᑎᖁᓗᒋᑦ ᓯᕗᒻᒧᐊᒃᐸᓪᓕᐊᑎᓪᓗᒍ, ᓴᖅᑭᑦᑎᕗᖅ ᐊᒃᓱᕈᕐᓇᕐᓂᖓᓂᒃ ᐃᓄᑑᓪᓗᓂ ᐱᓕᕆᑎᓪᓗᒍ ᐊᒻᒪ ᐱᓕᕆᐊᒃᓴᖅ ᐃᓗᐃᑦᑑᓗᓂ ᓴᙱᒃᑎᑉᐹᓪᓕᕈᑕᐅᔪᓐᓇᖅᖢᓂ.
ᐊᐅᐸᖅᑐᒥᑦ ᐊᓐᓄᕌᓄᑦ ᐱᓕᕆᐊᖅ ᐃᓕᔭᐅᓂᖓ ᐊᐅᓪᓚᖃᑦᑕᖅᑐᑦ ᒥᐊᓕᒐᐃᑦ ᓄᓇᖓᓐᓂᑦ, ᓯᓚᑦᑐᖅᓴᕐᕕᔾᔪᐊᕐᒦᒐᔪᑦᑐᑦ ᓴᓂᐊᓂᓪᓗ ᑖᑦᓱᒪ ᐱᓕᕆᐊᑉ, ᕿᕐᓂᖅᑕᖅ ᑕᑯᑦᓴᐅᑎᑦᓯᔪᖅ ᖃᓄᖅ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐱᔪᓐᓇᕐᓂᖏᓐᓂᑦ ᓇᖏᖃᑎᒌᓪᓗᑎᓪᓗ ᐱᔪᓐᓇᕐᓂᖏᓐᓂᑦ ᐊᑭᕋᖅᑐᕐᓂᕐᒧᑦ. "ᐃᓱᒪᔪᖓ ᒫᓐᓇ ᐊᑐᕋᓱᒃᑕᓐᓂᒃ, ᓇᓃᓕᖅᐱᑕ ᒪᒥᓴᕐᓂᕐᒥᒃ? ᖃᓄᖅ ᒪᒥᓴᖃᑎᒌᒃᐱᑕ? ᖃᓄᕐᓕ ᐱᑕᖃᖅᐱᑕ ᐅᐸᒍᑎᙱᖔᕐᓗᑕ?" ᐅᖃᙳᐊᖅᑐᖅ. ᐃᖅᑲᐅᒪᔪᖅ ᑐᓴᖅᑐᓂ ᐊᕐᓇᓂᒃ ᐃᖅᑲᐅᒪᑦᑎᔨᐅᒋᐊᖓᓂᒃ ᐊᒻᒪᓗ ᑕᐃᓐᓇ ᐊᔪᖅᓯᐅᖅᑲᓪᓗᓂ. "ᖃᓄᖅ ᐃᒃᐱᖕᓇᖅᑎᒋᖕᒪᖔᑦ. ᐅᑎᕆᐊᖅᑐᒍᑦ ᑭᖑᓂᑦᑎᓐᓂᑦ ᐊᒻᒪᓗ ᑎᒍᓯᕙᓪᓕᐊᓪᓗᑕ ᐊᒻᒪᓗ ᐅᑎᖅᑎᑦᑎᓇᓱᐊᖅᑐᒍᑦ ᑕᑯᓐᓇᖑᐊᒐᕐᒥᒃ ᓯᕗᓂᑦᑎᓐᓄᑦ ᑐᙵᕕᖃᑦᑐᑕ ᑖᒃᑯᓂᖓ ᐱᒻᒪᕆᐅᒋᔭᐅᔪᓂᒃ ᐊᒻᒪᓗ ᐊᒃᑐᐊᖃᑎᒌᓐᓂᕗᑦ ᐊᒻᒪᓗ ᓇᓕᒧᒃᓲᑎᓂᖅ ᓄᓇᓕᐅᓪᓗᑕ," ᑲᔪᓯᖏᓐᓇᖅᑐᖅ. ᐱᓕᕆᐊᖃᖅᑎᓪᓗᒍ, ᐅᖃᐅᓯᖃᕆᐊᖃᖅᐳᖅ ᒪᒥᓴᕐᓂᕐᒥᒃ ᐊᒻᒪ ᐱᕈᖅᐸᓪᓕᐊᑎᑦᑎᓂᕐᒥᒃ ᓄᓇᖃᖅᑳᖅᓯᒪᔪᑦ ᓯᕗᓂᒃᓴᖏᓐᓂᒃ.
"ᐊᒃᓱᕈᕐᓇᖅᑐᒃᑰᙱᑦᑐᒍᑦ. ᑕᒪᓐᓇ ᓇᓗᓇᐃᖅᓯᙱᓚᖅ ᑭᓇᐅᓂᑦᑎᓐᓂᑦ. ᑕᐃᒪᓐᓇᐅᖏᑦᑐᖅ."
ᐃᓱᒪᒋᓪᓗᒍ ᒪᒃᑯᒃᑐᑦ ᓄᓇᒥᓂᒃ ᐊᐅᓪᓚᖅᑐᑦ ᐃᖅᑲᓇᐃᔭᕆᐊᕐᓗᑎᒃ ᐃᓕᓐᓂᐊᕐᓗᑎᒃᓘᓐᓃᑦ, ᕿᕐᓂᖅᑐᖅ ᐅᖃᕐᖢᓂ, "ᐃᒃᐱᒋᑦᑎᐊᖏᓐᓇᐅᔭᖅᑕᕋ ᖃᓄᖅ ᐊᔪᕐᓇᖅᑎᒋᓇᔭᕐᒪᖔᑦ ᐊᐅᓪᓚᕐᓗᓂ ᓄᓇᓕᔅᓯᓐᓂ ᕿᒪᒃᓗᒋᓪᓗ ᐊᒃᑐᐊᔭᓕᒫᑎᑦ ᐃᓕᓐᓂᐊᕋᓱᒃᓗᑎᒃ." ᐊᐅᓪᓚᕆᐊᒃᓴᖅ ᖁᕕᐊᒋᔭᖃᖅᖢᓂ ᐊᑦᑕᕐᓇᖅᑐᓂᒡᓗ ᑎᒍᓯᔨᐅᓪᓗᓂ, ᕿᕐᓂᖅᑐᖅ ᓅᓚᐅᖅᐳᖅ ᑐᐊᓚᓐᒧᑦ ᑕᖅᑭᓄᑦ ᑎᓴᒪᓄᑦ 20-ᖑᓕᓵᖅᑎᓪᓗᒍ. ᑕᐃᒃᑯᓄᖓ ᖁᕕᐊᒋᔭᖃᙱᓐᓂᖅᓴᓄᑦ ᕿᒡᒋᖅᑕᕐᓂᕐᒥᒃ ᑕᒪᒃᑮᓄᑦ ᐃᓯᒐᖏᓐᓄᑦ ᓇᖕᒥᓂᖅ, ᕿᕐᓂᖅᑕᖅ ᐱᖁᔨᔪᖅ ᑭᐳᒃᑎᖃᑦᑕᐅᑎᓗᑎᒃ ᐱᓕᕆᐊᒃᓴᓂᑦ ᐊᐅᓪᓚᕐᓗᑎᒃᓗ ᑲᑎᙵᔪᓄᑦ ᐃᑲᔪᖃᑦᑕᐅᑎᔪᓐᓇᕐᓗᓯ ᑕᑯᓗᑎᓪᓗ ᐃᓂᒃᑲᓐᓂᕐᓂ ᐃᓛᓐᓂᒃᑯᑦ ᑮᓇᐅᔭᑭᓐᓂᕐᓴᐅᓗᑎᒃ ᐊᑦᑕᕐᓇᙱᓐᓂᖅᓴᐅᓗᓂᓗ.
ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᑎᓪᓗᒍ, ᕿᕐᓂᖅᑐᖅ ᖁᔭᓕᓕᓚᐅᖅᓯᒪᕗᖅ ᓄᓇᕐᔪᐊᕐᒥ ᖃᓂᓐᓂᖅᓴᐅᓕᕐᓂᖏᓐᓂᒃ ᐊᖏᕐᕋᒧᑦ. ᓱᒃᑲᐃᓪᓕᒋᐊᓚᐅᖅᑐᖅ ᐊᒻᒪᓗ ᑲᑎᒃᑲᓐᓂᖅᑐᓂ ᐊᖏᕐᕋᒧᑦ ᐊᒻᒪᓗ ᖃᓂᒋᔭᖏᓐᓄᑦ ᓄᓇᓕᖓᑕ. "ᐃᓱᒪᒋᔭᕋ ᑲᑎᒃᑲᓐᓂᕐᓂᖅ ᑭᓱᓕᒫᓄᑦ ᖃᓂᒋᔭᑦᑎᓐᓄᑦ ᓲᕐᓗ ᐊᐅᓪᓚᑲᑕᖕᓂᐅᔪᓐᓇᖅᑐᖅ ᑕᐃᒃᑯᓄᖓ ᐃᓕᑦᑎᕙᓪᓕᐊᔪᓄᑦ ᐃᓕᓴᐃᔾᔪᑎᓄᓪᓗ. ᐱᑕᖃᓗᐊᖅᑐᐊᓘᖕᒪᑦ ᑐᓴᕈᒥᓇᖅᑐᓂᒃ," ᑕᓯᕋᔭᐃᑦ.
ᓴᓇᙳᐊᖅᑎᐅᓪᓗᓂ ᐆᒻᒪᑎᒥᒍᑦ ᑕᐃᒪᙵᑦ ᑎᑎᕋᐅᑎᒥᒃ ᑎᒍᒥᐊᕈᓐᓇᓚᐅᕐᒪᑦ, ᔭᐃᒥ ᐸᓛᒃ ᑐᓂᕐᕈᓯᐊᒥᓂᒃ ᑐᓂᓯᑲᑕᒃᐳᖅ ᓄᓇᕐᔪᐊᕐᒥᐅᓄᑦ ᐊᓯᒥᓂᒡᓗ ᑕᐃᒪᐃᓕᐅᖁᔨᓪᓗᓂ. ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᖅ ᐃᓄᐊᖅᑕᐅᓯᒪᔪᓂᒃ ᐊᓯᐅᓯᒪᔪᓂᒡᓗ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᓂᕕᐊᖅᓵᓂᒡᓗ ᐊᐅᐸᖅᑐᒥᒃ ᐊᓐᓄᕌᖅᓯᒪᔪᑦ ᐱᓕᕆᐊᒃᓴᓕᖕᓂᒃ, ᓴᖅᑭᑦᑎᔪᖅ ᐊᒃᑐᐃᔪᓂᒃ ᐊᒻᒪ ᐊᑦᑕᕐᓇᙱᓐᓂᖅᓴᓂᒃ ᐃᓂᒃᓴᓂᒃ ᓴᓇᙳᐊᕐᓂᒃᑯᑦ. ᐊᓯᔾᔨᕋᓱᒃᑎᓪᓗᒍ ᓯᓐᓇᑦᑑᒪᒋᔪᒪᔭᒥᓂᒃ ᐃᓅᔪᒪᑎᓪᓗᒍ ᐅᓪᓗᓕᒫᖅ ᓴᓇᙳᐊᖅᑎᐅᓗᓂ, ᐃᓄᑑᓪᓗᓂ ᐊᓈᓇᐅᔪᖅ ᑕᐅᑐᙳᐊᖅᖢᓂ ᓄᓇᓕᖕᓂ ᐅᓂᒃᑳᕐᓗᓂᓗ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
