"ᖁᕕᐊᓇᑦᑎᐊᖅᑐᖅ, ᑕᐅᓄᙵᖅᐸᓪᓕᐊᓪᓗᓂ ᐃᓕᓐᓂᐊᕐᓂᓕᕆᓂᕐᒥ," ᓈᓴᐃᒃᑲᓐᓂᖅᐳᖅ ᔭᐃᓴᓐ ᔫᓐᔅᒥᒃ, Ojibwe ᐅᖃᐅᓯᖅᑕᒥᒃ ᐃᓕᓐᓂᐊᖅᑎ ᐊᒻᒪ ᐃᓕᓴᐃᔨ ᕗᐊᑦ ᕗᕌᓐᓯᔅ ᐃᓕᓐᓂᐊᕐᕕᐊᓗᐊᓂ. ᓕᓐᒃᔅ ᒃᓛᓐᒥᐅᑕᐅᔪᖅ ᐊᒻᒪᓗ ᓄᓇᓕᕋᓛᕐᒥᐅᑕᒃᓴᔭᐅᓪᓗᓂ ᕋᐃᓂ ᑕᓯᕐᒥ. ᔫᓐᔅ ᐃᓕᓐᓂᐊᕈᑎᒃᓴᓄᑦ ᐊᐅᓚᑦᑎᔨᐅᔪᖅ, ᐱᓕᕆᖃᑎᖃᖅᖢᓂ TakingItGlobal−ᒥᑦ. ᐃᓱᒪᓕᕆᔨᐅᖃᑦᑕᖅᓯᒪᓪᓗᓂ ᐊᒻᒪ 20-ᓂᒃ ᐃᓐᓇᕐᓂᒃ ᐊᐱᖅᓱᓚᐅᖅᖢᓂ, ᐃᓕᓐᓂᐊᕐᕕᐊᕈᓯᕐᒥ ᐊᔾᔨᒌᙱᑦᑐᓂᒃ ᑕᐅᑐᖅᑰᖅᑕᒥᓂᒃ ᓴᖅᑭᑎᑦᑎᕗᖅ.

ᐊᓯᐊᓂᓪᓕ ᐃᓱᒪᒥᓂᒃ ᓴᖑᑎᑦᑎᓚᐅᖅᑐᖅ ᓄᓇᓯᐅᑎᒃᑯᑦ ᐱᕐᕈᓗᐊᕿᓪᓗᓂ ᐱᓱᒍᓐᓇᙱᖦᖢᓂ ᑕᖅᑭᒧᑦ 19-ᖑᖅᑎᓪᓗᒍ. "ᐅᓪᓗᑦ 30−ᓂᒃ ᐃᓱᒪᔭᕆᐊᖃᓚᐅᖅᑐᖓ ᐃᓱᒪᓕᕐᐳᖓᓗ, 'ᐃᓅᓯᕋ ᐱᓪᓚᑦᑖᖑᖁᒐᒃᑯ. ᑕᒪᓐᓇ ᑐᑭᖃᖁᔭᕋ. ᐱᓕᕆᔪᒪᒐᒪ ᑐᑭᖃᑦᑎᐊᖅᑐᒥᒃ," ᐃᖅᑲᐅᒪᔪᖅ. ᖃᐅᔨᒪᓚᐅᙱᒻᒪᑦ ᖃᓄᐃᓕᐅᕈᒪᓂᕐᒥᓂᒃ ᑕᐃᒪᓕ ᐃᓱᒪᓕᓚᐅᖅᑐᖅ ᖁᕕᐊᒋᔭᒥᓂᒃ.

ᐃᓕᓐᓂᐊᕐᕕᐊᓗᒻᒥ, ᕚᓕᐹᖅᑎᓂᑦ ᐊᖏᔪᖅᑳᕆᔭᐅᓚᐅᖅᑐᖅ ᐊᒻᒪᓗ ᓯᓚᑦᑐᓴᕐᕕᕐᔪᐊᕐᒥᑦ ᐃᓕᓐᓂᐊᕈᓯᐊᖅᑎᑕᐅᓪᓗᓂ ᐱᓐᖑᐊᖏᓐᓇᕈᓐᓇᖅᑐᓂ. ᐱᙳᐊᖅᑎᐅᓪᓗᓂ, ᐃᓕᑦᑎᓚᐅᖅᑐᖅ ᐊᒃᓱᕈᖅᖢᓂ ᐱᓕᕆᓂᕐᒥᒃ. ᔫᓐᔅ ᐃᓕᓐᓂᐊᓚᐅᖕᒥᔪᖅ ᓄᑲᓂ ᓄᑲᒥᓂᒃ ᓂᐸᓱᒍᓐᓇᓚᐅᖅᑐᖅ ᓵᓚᒋᔪᓐᓇᖅᖢᓂᐅᒡᓗ ᓱᒃᑲᓴᐅᔾᔪᐊᖅᑐᓕᒫᓂᑦ. ᐊᒃᓱᕈᖅᖢᓂ ᐱᓕᕆᓪᓗᓂ ᐃᑲᔪᓚᐅᖅᐳᖅ ᐊᑭᒻᒪᑎᖃᑕᐅᓪᓗᓂ.

ᐃᓐᓇᕆᔭᖏᑕ ᐃᓕᓴᐃᔾᔪᑎᒋᖃᑦᑕᖅᑕᖏᓐᓂᒃ ᖃᐅᔨᔪᓐᓇᖅᑎᑕᐅᓪᓗᓂ ᐃᓅᓯᕐᒥᓂ ᐱᔾᔪᑎᖃᖅᑐᒥᒃ ᐊᒻᒪ ᐱᓕᕆᔪᒪᓪᓗᓂ ᐱᓕᕆᐊᕆᔪᒪᙱᑕᒥᓂᒃ, ᓇᖕᒥᓂᖅ ᐱᓕᕆᓪᓚᕆᒍᒪᓚᐅᖅᑐᖅ ᐃᓕᓐᓂᐊᖅᑕᒥᓂᒃ ᐱᔪᒃᓯᑎᑦᑎᔪᓐᓇᕐᓗᓂ ᒪᒃᑯᒃᑐᓂᒃ ᐃᑲᔪᕐᓗᒋᓪᓗ. ᐊᖓᔪᖅᑳᖏᒃ Ojibwe-ᒥ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᐅᓚᐅᖅᐳᑦ ᑭᓯᐊᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ, ᐊᖏᕐᕋᒥᓂᒃ ᐅᖃᓪᓚᖃᑦᑕᓚᐅᙱᑦᑐᑦ. ᑕᐃᒫᒃ ᖃᐅᔨᓚᐅᓐᖏᓚᖅ ᐃᓕᓐᓂᐊᖅᑐᓂ ᐅᖃᐅᓯᕐᒥᑦ ᐱᕈᖅᐸᓪᓕᐊᓂᕐᒥᑦ, ᐱᕈᖅᓴᔭᐅᓚᐅᕋᓗᐊᖅᑎᓪᓗᒍ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᓄᑦ.

"ᐱᒻᒪᕆᐅᓂᖃᓪᓚᕆᑦᑐᖅ ᐃᓗᐊᓂ ᐅᖃᐅᓯᐅᑉ ᐃᓕᖅᑯᓯᐅᓪᓗ. ᑐᑭᓯᑲᐅᑎᒋᔾᔮᖅᑰᙱᑕᑦ, ᑭᓯᐊᓂ ᐊᑕᖏᕋᓱᒃᓗᒍ ᐃᖅᑲᐅᒪᓗᒍᓗ."

ᐅᖃᐅᓯᕐᒥ ᐃᓕᑦᑎᕙᓪᓕᐊᓂᕆᔭᖓ ᐃᓕᓐᓂᐊᖅᑎᖦᖢᓂᐅᒃ ᐅᖃᐅᓯᕐᓂᐅᙱᖦᖢᓂ. "ᓯᕗᕚᕗᑦ ᐃᓱᒪᓚᐅᖅᑐᑦ 7-ᓂᒃ ᑭᖑᕚᕇᓂᒃ, ᐊᒻᒪᓗ ᐅᖃᐅᓯᑦᑎᓐᓂᒃ ᑲᑎᑎᑦᑎᓪᓗᑎᒃ ᐊᒥᓱᓂᒃ ᐃᓕᓴᐃᓪᓗᑎᒃ ᐊᒻᒪᓗ ᖃᓄᕈᓘᔮᓗᒃ ᐃᓕᑦᑎᔪᓐᓇᖅᖢᑕ. ᕿᒪᐃᓪᓗᑎᒃ ᑐᓐᓂᖅᑯᓯᐊᒥᒃ ᐅᕙᑦᑎᓐᓄᑦ," ᐊᓕᐊᓇᔅ. "ᐃᓱᒪᒋᔭᕋ ᐊᔾᔨᒋᙱᑦᑎᐊᓕᕐᒪᒍ ᒫᓐᓇ, ᐅᖃᐅᓯᑐᐃᓐᓇᕐᒥᑦ ᐃᓕᑦᑎᕙᓪᓕᐊᓪᓗᓂ," ᔫᓐᔅ ᑲᔪᓯᔪᖅ. ᐱᒻᒪᕆᐅᒋᔭᖏᑦ ᓅᖦᖢᑎᒃ ᐱᖁᑎᖏᓐᓂ ᓄᓇᓕᖕᒥ ᑲᒪᓂᕐᒥ ᐃᑲᔪᕐᓂᕐᓗ ᐊᓯᖏᓐᓂᒃ ᐃᓕᑦᑎᕝᕕᒋᔭᖏᓐᓂ.

ᐱᒋᐊᓕᖅᑎᓪᓗᒍ ᐅᖃᐅᓯᕐᒥᒍᑦ ᐃᖏᕐᕋᓂᕆᔭᖓ, ᖃᐅᔨᒪᙱᖦᖢᓂ ᖃᓄᐃᓕᐅᕈᒪᖕᒪᖔᑦ ᐃᓅᓯᖓᓂ ᐊᐱᕆᓪᓗᓂᓗ ᐊᑖᑕᒥᓂᒃ ᐅᖃᐅᔾᔭᐅᔪᒪᓪᓗᓂ. ᐱᓕᕆᖃᑎᖃᕈᒪᓚᐅᖅᑐᖅ ᐃᓅᓱᒃᑐᓂᒃ ᐊᒻᒪᓗ ᐃᓕᓐᓂᐊᕐᓗᓂ ᐅᖃᐅᓯᕐᒥᓂᒃ ᐊᒻᒪᓗ ᐊᓯᒥᓄᑦ ᐅᖃᐅᓯᕆᕙᓪᓗᓂᐅᒃ.  ᐊᑖᑕᖓ ᐅᖃᖅᖢᓂ ᐃᓕᓐᓂᐊᖅᑎᑦᑎᖃᑦᑕᖁᔨᓪᓗᓂ Ojibwe−ᒥᒃ ᓄᑲᖅᖡᑦ ᐃᓕᓐᓂᐊᕐᕕᖕᒥ ᐊᒻᒪ ᔫᓐᔅ ᐱᔪᒃᓯᑦᑎᐊᓕᖅᖢᓂ, ᑐᕌᒐᖃᕐᓂᖅᓴᐅᓪᓗᓂ ᐃᓕᓐᓂᐊᒃᑲᓐᓂᕈᒪᓪᓗᓂ ᐅᖃᐅᓯᕐᒥᓂᒃ.

"ᐊᒃᓱᕈᕐᓗᑎᑦ ᐃᖅᑲᓇᐃᔭᕈᕕᑦ, ᐃᖅᑲᓇᐃᔮᒃᓴᖅᓯᐅᕆᐊᖃᙱᑦᑐᑎᑦ ᓲᖃᐃᒻᒪ ᐃᖅᑲᓇᐃᔮᒃᓴᑦ ᐃᓕᖕᓄᑦ ᕿᓂᕐᓂᐊᕐᒪᑕ. ᑕᒪᓐᓇ ᖃᐅᔨᒪᔭᐅᒃᐸᑦ ᐊᒃᓱᕈᖅᖢᓂ ᐃᖅᑲᓇᐃᔭᖅᑎᐅᓂᕐᓄᑦ, ᐃᓄᐃᑦ ᐃᓕᖕᓂᒃ ᕿᓂᓕᕋᔭᖅᐳᑦ ᐃᖅᑲᓇᐃᔭᖅᑎᑦᑎᓕᕈᒪᓗᑎᒃ."

25-ᖑᑎᓪᓗᒍ, ᐃᖅᑲᓇᐃᔭᖅᑎᑕᐅᓚᐅᖅᑐᖅ ᐅᓪᓘᑉ ᐊᕝᕙᐃᓐᓇᖓᓂ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᐅᓪᓗᓂ ᐊᒻᒪᓗ ᓇᒻᒥᓂᖅ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕈᑎᓕᐅᖅᑐᓂ. ᑕᐃᒃᓱᒪᓂ, ᐱᑕᖃᓗᐊᓚᐅᖏᒻᒪᑦ ᐊᑐᐃᓐᓇᐅᔪᓂᒃ. ᐊᕐᕌᒍᒐᓵᓗᖕᓄᑦ ᔫᓐᔅ ᐊᒃᓱᕈᖅᖢᓂ ᐱᓕᕆᓚᐅᖅᐳᖅ ᓴᖅᑭᑎᑦᑎᓪᓗᓂ ᐃᓕᓐᓂᐊᕈᑕᐅᖃᑦᑕᕐᓂᐊᖅᑐᓂᒃ ᑭᓯᐊᓂ ᑕᖃᓕᕋᒥ. ᐃᓕᑦᑎᓚᐅᖅᑐᖅ ᐊᒃᓱᕈᖅᖢᓂ ᐃᓕᑦᑎᓂᕐᒥᒃ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ.

ᐅᓪᓗᒥ ᐃᓕᓴᐃᔨᐅᓪᓗᓂ, ᐱᔪᒃᓯᑎᑦᑎᑦᑎᐊᓲᖅ ᒪᒃᑯᒃᑐᓂᒃ ᐅᖃᐅᓯᕐᒥᒃ ᐃᓕᑦᑎᒃᑲᓐᓂᕈᒪᔪᓂᒃ, ᐊᐅᓚᑕᐅᓪᓗᓂ ᐊᒃᑐᐃᔾᔪᑕᐅᔪᓂᒃ ᑕᑯᔪᓐᓇᖅᑕᒥᓂᒃ ᐊᒻᒪ ᓄᓇᓕᖕᓂ ᐱᕙᓪᓕᐊᓂᕆᔭᐅᔪᖅ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕋᓱᒃᑐᑦ. ᐱᓗᐊᖅᑐᒥᑦ, ᐱᔪᒃᓯᑎᑦᑎᕗᖅ ᐱᓕᕆᖃᑎᖃᖅᖢᓂ ᐊᓯᖏᓐᓂᑦ ᐅᖃᐅᓯᓕᕆᔪᓂᑦ. "ᐱᔪᒪᖃᑦᑕᐅᑎᖏᓐᓇᐅᔭᖅᑐᒍᑦ, ᖁᕝᕙᖅᑎᖃᑦᑕᐅᑎᓪᓗᑕᓗ. ᑕᐃᒪᓐᓇ ᐱᐅᒋᔭᕋ ᑭᖑᕚᒃᓴᕗᑦ," ᓇᓗᓇᐃᖅᓯᓪᓗᓂ.

ᖃᐅᔨᒪᔪᖅ ᐃᓕᑦᑎᓂᖅ ᓄᑖᓂᒃ ᐊᔪᕐᓇᕈᓐᓇᖅᑐᖅ, ᐃᖅᑲᐅᒪᓗᓂ ᓯᕘᕋᑎᓪᓗᒍ ᓅᑦᑐᒪᓪᓗᓂ ᒪᓂᑑᓕᓐ ᕿᑭᖅᑕᖓᓄᑦ ᐱᕕᖃᕐᓂᕐᒧᑦ ᑐᓴᕐᖢᓂ Ojibwe ᕿᒥᕐᕈᐊᒐᕐᒥ: ᐊᑭᓕᖅᑕᐅᓂᖅ ᐃᓕᑦᑎᓗᓂ ᐱᖅᑯᓯᑐᖃᒃᑯᑦ ᐃᓅᓕᓴᐅᑎᓂᒃ. ᐊᕐᕌᒍᒧᑦ, ᐊᖏᕐᕋᒥᓂᒃ ᐊᐅᓪᓚᖅᓯᒪᓚᐅᖅᑐᖅ, ᐃᓐᓇᕐᓂᒃ ᐃᓕᓐᓂᐊᖅᖢᓂ, ᐃᓅᓕᓴᐅᑎᓂᒃ ᐊᐃᒃᖠᖅᖢᓂ ᐊᒻᒪ ᐃᓄᖕᓂᒃ ᐃᑲᔪᖅᖢᓂ. "ᑕᕝᕙᓂ ᐃᓕᑦᑎᓚᐅᖅᑐᖓ ᐃᑲᔪᖃᑦᑕᕐᓂᖅ ᐃᓄᖕᓂᒃ ᐱᓕᕆᐊᕆᔪᒪᓚᐅᖅᑕᕋ. ᖁᕕᐊᓱᒃᑎᑦᑎᖃᑦᑕᖅᑐᖅ ᐅᕙᓐᓂᒃ," ᓂᑲᒍᓱᒃᑐᖅ.

ᐃᓱᒪᒋᓪᓗᒋᑦ ᒪᒃᑯᒃᑐᑦ ᓄᓇᕐᔪᐊᕐᒧᐊᕈᒪᖕᒥᔪᑦ ᐃᓕᑦᑎᔭᖅᑐᕐᓗᑎᒃ ᑭᓯᐊᓂ ᖁᓱᖕᒪᑕ, ᐃᖅᑲᐅᒪᔪᖅ ᖃᓄᖅ ᑲᙳᓱᖕᒪᖔᑦ ᖃᓄᑎᒋᓗ ᐊᒃᓱᕈᖅᓯᒪᖕᒪᖔᑦ. ᔫᓐᔅ ᑎᓕᐅᕆᕗᖅ ᒪᒃᑯᒃᑐᓂᑦ ᐃᖕᒥᖕᓂᒃ, ᐱᔾᔪᑎᒥᓂᒃ ᓇᓂᓯᓗᑎᒃ ᕿᓂᕐᓗᑎᒡᓗ ᐱᕈᖅᐸᓪᓕᐊᓂᖕᒧᑦ ᐱᕕᒃᓴᓂᑦ, ᐃᓛᓐᓂᒃᑯᑦ ᐊᑲᐅᓇᔭᙱᑦᑐᖅ. "ᐃᓕᑦᑐᓐᓇᑦᑎᐊᖅᐳᑎᑦ ᐃᓕᖕᓂᒃ ᐃᓅᓯᕐᓂᒃ ᐊᑐᖅᐸᓪᓕᐊᓕᖅᑎᓪᓗᑎᑦ ᐊᒻᒪ ᐊᓯᐊᓄᑦ ᓄᓇᒧᐊᖅᐸᓪᓕᐊᑎᓪᓗᑎᑦ," ᐅᖃᖅᖢᓂ, ᐊᖏᕐᕋᖅᓯᖃᑦᑕᕐᓂᖅ ᐊᒃᓱᕈᕐᓇᕈᓐᓇᖅᐳᖅ ᑭᓯᐊᓂ ᖁᕕᐊᓇᖅᐳᖅ ᖁᕕᐊᓱᓕᖅᑎᓪᓗᑎᑦ.

ᖁᕕᐊᓱᓕᕐᖢᓂ ᐃᖕᒥᓂᒃ, ᑕᒻᒪᕈᑎᒥᓂᒃ ᐊᑐᕐᖢᓂ ᐃᓕᑦᑎᓪᓗᓂᓗ ᐱᕕᒃᓴᕆᑐᐃᓐᓇᖅᑕᖏᓐᓂᒃ ᐃᓕᑦᑎᓂᕐᒥᒃ. ᐅᖃᐅᓯᖅᑕᖓ ᐃᓕᑦᑐᒪᓪᓗᓂᐅᒃ, ᖃᐅᔨᓚᐅᖅᐳᖅ ᖃᔅᓯᐊᕐᔪᐃᑦ ᐃᓄᐃᑦ ᐱᔪᒃᓯᑦᑎᐊᖃᑦᑕᓚᐅᕐᓂᖏᓐᓂᒃ ᐊᒻᒪ ᐃᒻᒥᓂᒃ ᑕᑯᔪᓐᓇᖅᓯᓚᐅᖅᖢᓂ ᑲᓕᒎᑎᒥᒃ, ᓇᖕᒥᓂᖅ ᐱᓕᕆᓪᓗᓂ ᖁᕕᐊᓱᒃᑎᑦᑎᓚᐅᕐᓂᖓᓄᑦ, ᓂᕐᓕᕐᓇᙱᖦᖢᓂ.

ᐃᓅᖃᑎᒥᒃ ᓯᕘᕋᓂᖅ ᐊᒃᓱᕉᑎᒋᓚᐅᕐᒥᔭᖓ, ᐊᒻᒪᓗ ᑕᖃᖓᓪᓗᓂ ᓂᑲᓪᓗᖓᓪᓗᓂᓗ. ᐅᑎᕐᓗᓂ ᐱᖅᑯᓯᑐᖃᒃᑯᑦ ᓇᖕᒥᓂᖅ ᑲᒪᒋᑦᑎᐊᕐᓂᕐᒥ ᐃᓱᒪᒧᓪᓗ ᖃᓄᐃᙱᑦᑎᐊᕐᓂᕐᒥ ᐃᑲᔫᑎᖃᓚᐅᖅᑐᖅ ᒪᒥᓴᕐᓂᖓᓄᑦ ᓇᓂᓯᓪᓗᓂᓗ ᐊᑐᒐᒃᓴᓂᒃ ᐃᖅᑲᓇᐃᔭᓗᐊᙱᓪᓗᓂ ᓇᖕᒥᓂᖅ. ᑕᒪᓐᓇ ᖃᐅᔨᒪᓂᐅᑎᓪᓗᒍ, ᐃᓕᓐᓂᐊᖅᑎᒥᓂᒃ ᐃᑲᔪᕈᓐᓇᕐᓂᖅᓴᐅᕗᖅ ᐅᓂᒃᑳᕐᓗᓂ ᐊᒻᒪ ᐃᓕᑕᖏᓐᓂᒃ.

ᐃᓕᓴᐃᔨᐅᒐᓗᐊᖅᑐᓂ, ᐃᓕᑉᐸᓪᓕᐊᖏᓐᓇᕐᒪᑦ. ᑕᐃᒪᐃᒻᒪᑦ ᐃᒻᒥᓂᒃ ᓇᓗᓇᐃᖅᐳᖅ ᑕᒪᒃᑮᓄᑦ Ojibwe ᐃᓕᓴᐃᔨᐅᓪᓗᓂ ᐊᒻᒪ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᖅᑎᐅᓪᓗᓂ. "ᐅᖃᕈᒪ ᐅᕙᓐᓂᒃ ᐃᓕᓐᓂᐊᖅᑎᓯᒪᓂᕋᕐᓗᖓ, ᑐᑭᖃᖅᑐᖅ ᐃᓱᐊᓃᓕᖅᑐᖓ, ᐃᓱᐊᓃᙱᒻᒪᕆᒃᖢᖓᓘᓐᓃᑦ. ᐱᒋᐊᓕᖅᑎᓪᓗᖓᓕ, ᐃᓛᒃ. ᑕᐃᒪᓐᓇ ᐱᔪᓐᓇᖅᑎᑦᑎᔪᖅ ᑲᔪᓯᓗᓂ ᐃᑲᔪᐃᓐᓇᕐᓗᓂᓗ," ᐊᔾᔨᖃᖅᑐᖅ.

ᑐᓴᖅᑎᑦᑎᒍᓐᓇᕈᓂ ᓄᑲᖅᑎᐅᓂᖅᓴᒥᒃ ᓇᒻᒥᓂᖅ ᐃᒻᒥᓂᐅᒐᔭᕐᖓᑦ ᐊᒻᒪᓗ ᒪᓕᒋᐊᖃᕈᓐᓃᕐᓗᓂ ᑭᒃᑯᓕᒫᑦ ᖃᓄᐃᓕᐅᕐᓂᖏᓐᓂᒃ. ᐅᖃᐅᑎᓇᔭᖅᑕᖓ ᒪᒃᑯᖕᓂᖅᓴᖅ ᓇᓂᓯᓇᓱᒃᓗᓂ ᑭᓱ ᖁᕕᐊᓱᒃᑎᑦᑎᖕᒪᖔᑦ ᐃᓕᑦᑎᓵᓕᓂᐊᕐᒪᑦ. ᐅᐸᒍᑎᓪᓗᓂ ᐊᐅᒪᔮᕐᓂᕐᓂ, ᐊᖁᓪᓗᓂ ᐸᓯᒥ, ᓯᓚᒦᓪᓗᓂ, ᐃᖅᑲᐅᒪᓂᕐᓗ ᖃᓄᖅ ᓴᓇᔭᐅᓚᐅᕐᒪᖔᑦ Creator−ᒧᑦ ᑭᓱᑐᐃᓐᓇᑦᑎᐊᑦ ᖃᓄᐃᑦᑑᓂᖏᓐᓂ ᑭᓱᑐᐃᓐᓇᑦᑎᐊᑦ ᖁᕕᐊᓱᒍᑎᒋᕙᒃᐸᖏᑦ. ᓄᓇᒥᐅᑕᐅᔭᕆᐊᒃᓴᖅ ᐊᓕᐊᓇᐃᒋᔭᓕᒃ, ᓂᕆᑦᑎᐊᓲᖅ, ᐃᓐᓇᕐᓂ ᐱᖃᑎᖃᖅᖢᓂ ᖁᕕᐊᓱᐃᓐᓇᖅᖢᓂᓗ.

ᐃᖏᕐᕋᑎᓪᓗᒍ ᖁᕕᐊᓱᒃᖢᓂ, ᔭᐃᓴᓐ ᔫᓐᔅ ᐃᖏᕐᕋᑦᑎᐊᖅᑐᒻᒪᕆᐊᓗᒃ ᐃᓕᓐᓂᐊᕆᐊᖅᐸᓪᓕᐊᓪᓗᓂ. ᐅᖃᐅᓯᓕᕆᓪᓗᓂ ᐃᓕᓴᐃᔨᐅᔪᖅ ᐅᖃᐅᓯᕐᓂ ᐃᓕᑦᑎᕚᓪᓕᖅᓯᒪᔪᖅ, ᐃᑲᔪᖅᑎᐅᓪᓗᓂ ᐆᒻᒪᑎᒥᒍᓪᓗ ᖁᕕᐊᓱᒃᑐᓂ, ᐊᒻᒪᓗ ᒪᒃᑯᒃᑐᓄᑦ ᓴᙱᓂᖅᑖᖅᑎᑦᑎᓂᕐᒧᑦ ᐃᓕᑦᑎᓂᕐᒧᑦ ᐅᖃᐅᓯᕐᒥᑦ ᐃᓕᖅᑯᓯᕐᒥᓪᓗ. ᐃᓗᒥᒍᑦ ᑕᑯᓪᓗᓂ ᑭᓱ ᖁᕕᐊᓱᒃᑎᑕᐅᖕᒪᖔᑦ, ᐊᓯᖏᓪᓗ ᐃᓕᑦᑎᔪᓐᓇᖅᓯᓪᓗᑎᒃ ᖃᓄᖅ ᓴᔪᖃᑦᑕᕐᒪᖔᕐᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.