"ᓴᓇᙳᐊᖃᑦᑕᓚᐅᖅᑐᖓ ᐃᖅᑲᐅᒪᔭᓕᒫᓐᓄᑦ. ᑭᓯᐊᓂ ᓇᖕᒥᓂᖅ ᓴᓇᙳᐊᖅᑎᐅᓂᕋᓚᐅᖅᓯᒪᙱᑦᑐᖓ."

"ᓴᓇᙳᐊᖃᑦᑕᓚᐅᖅᑐᖓ ᐃᖅᑲᐅᒪᔭᓕᒫᓐᓄᑦ. ᑭᓯᐊᓂ ᐅᕙᓐᓄᑦ ᓴᓇᙳᐊᖅᑎᐅᓂᕋᓚᐅᖅᓯᒪᙱᑦᑐᖓ," ᐅᖃᖅᑐᖅ ᔭᐃᓴᓐ ᓯᑰᒃ, ᐃᓄᒃ ᑎᑎᖅᑐᒐᖅᑎ ᕆᒍᓚᑦ, ᓄᓇᑦᓯᐊᕗᑦ, ᐅᐊᓐᓇᖓᓂ ᓛᐸᑐᐊᑉ, ᖃᓪᓗᓈᓃᓛᖅ ᐃᓄᐃᑦ ᓄᓇᓕᖓᑦ ᓄᓇᕐᔪᐊᒥ. ᓯᑲᒃ ᖃᑕᙳᑎᖏᑕ ᐊᑎᖓ ᐊᓯᔾᔨᖅᑕᐅᓚᐅᖅᓯᒪᔪᖅ ᐊᑲᐅᒋᔭᐅᖁᓪᓗᒍ ᓄᓇᖃᖅᑳᖅᓯᒪᙱᑦᑐᓄᑦ ᐅᖃᕈᓐᓇᙱᑦᑐᓄᑦ ᐅᕝᕙᓘᓐᓃᑦ ᑎᑎᕋᕈᓐᓇᙱᑦᑐᓄᑦ. ᐊᑎᕐᒥᓂᒃ ᐅᑎᖅᑎᑦᑎᓚᐅᖅᑐᑦ ᒪᓕᒐᑎᒍᑦ ᐃᓅᓯᖅ ᐊᑐᐊᓪᓚᓚᐅᖅᑎᓪᓗᒍ ᓲᕐᓗ ᐊᖕᒪᓗᖅᑐᒥᒃ ᐊᑎᕐᒥᒃ ᐊᑐᓚᐅᖅᑕᖓᑦ ᓈᒻᒪᓚᐅᙱᒻᒪᑦ. ᐊᑭᑐᔪᒻᒪᕆᐅᓚᐅᖅᐳᖅ ᑭᓯᐊᓂ ᐱᓇᓱᐊᑦᑎᐊᖅᑰᔨᓚᐅᖅᐳᑦ. 

ᐅᓪᓗᒥᐅᓕᖅᑐᖅ, ᓯᑰᒃ ᒪᓐᑐᕆᐋᓪᒥ ᓄᓇᖃᓕᖅᑐᖅ, ᐊᓂᒍᐃᓯᒪᓪᓗᓂ ᐊᔾᔨᐅᙱᑦᑐᒥᒃ Concordia ᓯᓚᑦᑐᖅᓴᕐᕕᒡᔪᐊᕐᒥ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓴᓇᐅᒐᓕᕆᓂᕐᒥᒃ, ᒪᕐᕈᐃᖅᓱᖅᖢᓂ ᓴᓇᙳᐊᖅᑕᐅᕙᓚᐅᖅᓯᒪᔪᓂᒃ ᐊᒻᒪ ᓴᓇᙳᐊᖅᑕᐅᖃᑦᑕᕐᓂᑯᓂᒃ. ᓯᓚᑦᑐᖅᓴᕐᕕᔾᔪᐊᕐᒥ ᐸᐃᑉᐹᖁᑎᖓᑦ ᐊᑎᕐᒥᓂᒃ ᐅᑎᖅᑎᑦᑎᓚᐅᖅᑐᑦ, ᐅᐱᒍᓲᑎᖃᕐᓂᕋᖅᑐᑎᒃ. ᐃᓅᓯᓕᒫᖅ ᓴᓇᙳᐊᕐᓂᕐᒧᑦ ᐃᓕᓐᓂᐊᕆᐊᕈᒪᓕᓚᐅᖅᓯᒪᒻᒪᑕ, ᐊᕐᕌᒍᑦ ᑕᓪᓕᒪᑦ ᐊᓂᒍᖅᓯᒪᓕᖅᑐᑦ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓱᒪᒋᔭᒃᓴᐃᑦ ᑖᒃᑯᓂᖓ ᓴᖅᑭᑎᑦᑎᓕᓚᐅᖅᐳᑦ ᐃᖅᑲᓇᐃᔭᕐᕕᒋᒐᔪᒃᑕᒥᓂᒃ, ᓴᖅᑭᑎᑦᑎᓪᓗᑎᒃ ᐱᕕᒃᓴᒥᒃ ᐃᓂᒥᒡᓗ ᑕᐅᑐᒐᖃᓪᓗᐊᑕᕈᒪᓪᓗᑎᒃ ᓴᖅᑭᑎᑦᑎᓂᕐᒥᒃ ᓴᓇᙳᐊᖅᑕᐅᕙᒃᑐᓂᒃ, ᑕᒪᓐᓇᓗ ᐃᓱᒪᒋᔭᐅᓚᐅᖅᖢᓂ ᖁᕕᐊᒋᓪᓗᒍ ᑭᖑᓂᑦᑎᓐᓂ. ᖀᖅᓱᕐᓂᖅ ᒫᓐᓇ ᖁᕕᐊᒋᔭᖓ. 

ᑎᑎᖅᑐᒐᖅᑐᖃᓚᐅᖅᑎᓐᓇᒍ, ᓯᑰᒃ ᐃᖅᑲᓇᐃᔭᓚᐅᖅᑐᖅ ᐸᐃᕆᕕᒻᒥ ᐃᓕᓴᐃᔨᐅᓪᓗᓂ, ᐱᙳᐊᖅᑐᓕᕆᓂᕐᒧᑦ ᑐᑭᒧᐊᖅᑎᐅᓪᓗᓂ, ᐊᒻᒪᓗ ᐊᓪᓛᑦ ᐅᖅᓱᐊᓗᓕᕆᕕᒻᒥ. ᓯᕗᓪᓕᕐᒥ, ᐃᓱᒫᓘᑎᖃᕐᒪᑕ ᐊᖑᒻᒪᑎᔪᓐᓇᕐᓂᕐᒥᓂᒃ ᐃᓕᓐᓂᐊᒐᒃᓴᓂᒃ ᐊᒻᒪ ᒪᒃᑯᖕᓂᖅᓴᓂᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᖃᑕᐅᔪᓂᒃ. ᒫᓐᓇ 50−ᐅᓕᖅᑐᑦ, ᐃᓱᒪᓂᖅᓴᐅᖅᑰᔨᔪᑦ ᐃᓱᒪᒥᒍᑦ, ᑭᓯᐊᓂ ᑎᒥᖏᑦ ᐊᖏᖃᑎᖃᐃᓐᓇᕈᓐᓇᙱᑦᑐᑦ.  "ᐃᓱᒪᒋᔭᕋ ᐃᓅᓯᓐᓂ ᐊᑐᖅᓯᒪᔭᕋ ᒫᓐᓇᒧᑦ ᑎᑭᖦᖢᒍ ᐃᑲᔪᖅᓯᒪᔪᖅ ᐅᕙᓐᓂᒃ ᖃᓄᑐᐃᓐᓇᖅ ᐊᑐᕋᓱᒃᑕᓐᓂᒃ ᐃᓅᓯᓐᓂᓗ," ᓯᑰᒃ ᐅᕕᖓ. 

ᒫᓐᓇ ᐃᓅᓵᖅᑎᓪᓗᒍ ᖃᐅᔨᔭᐅᓪᓗᓂ ᐃᓄᒃ ADHD−ᖃᖅᑐᖅ, ᓯᑰᒃ ᐃᖅᑲᐅᒪᔪᖅ ᖃᓄᖅ ᐊᔪᕐᓇᖅᑎᒋᓚᐅᕐᒪᖔᑦ ᑕᐅᑐᓪᓗᐊᑕᕆᐊᒃᓴᖅ ᐃᓕᓐᓂᐊᕐᕕᖕᒥ ᐃᓕᑦᑎᓗᓂᓗ ᐋᖅᑭᒃᓯᓂᕐᒥᒃ ᐃᓕᓐᓂᐊᕈᑎᒃᓴᓂᒃ ᐱᕈᖅᐸᓪᓕᐊᔪᓂᒃ. ᑎᑎᕋᐅᔭᕐᓂᖅ ᑎᑎᕋᐅᔭᖅᓯᒪᔪᓂᒃ ᕿᒥᕐᕈᐊᒐᕐᓂᒃ, ᐅᓪᓗᑕᒫᖅᓯᐅᑎᒥᒃ ᑕᐅᑐᒃᖢᓂ ᐃᒐᓛᕐᒥᒃ ᐃᓕᓐᓂᐊᖃᑎᒌᒃᓗᑎᒃᓗ, ᓇᓗᓚᐅᖅᑐᑦ ᐊᔪᙱᓐᓂᖏᓐᓂᒃ ᑲᔪᓯᑦᑎᐊᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ, ᑲᑉᐱᐊᓱᖕᓂᖅ ᖃᐅᔨᔭᐅᙱᖦᖢᓂ. Concordia−ᑯᑦ ᐃᓕᓐᓂᐊᕐᕕᐅᓕᓚᐅᖅᓯᒪᕗᑦ ᐊᑐᖁᓇᔭᖅᑕᒥᓂᒃ.

"ᒪᐅᙵᑐᐊᕋᒪ, ᖃᐅᔨᓚᐅᖅᑐᖓ ᐃᓕᑦᑎᔪᓐᓇᕐᓂᓐᓂᒃ ᓇᖕᒥᓂᖅ ᐃᖏᕐᕋᓂᓐᓂ ᐃᓕᑦᑎᓯᒪᓪᓗᖓᓗ ᐃᓚᖏᓐᓂᒃ ᐊᑐᒐᒃᓴᓂᑦ ᐊᕐᕌᒎᓵᖅᑐᓂ ᐃᑲᔪᕐᓗᖓ ᐃᓕᑦᑎᒃᑲᓐᓂᕐᓗᖓ. ᓯᓚᑦᑐᖅᓴᕐᕕᔾᔪᐊᖅ ᐃᓅᓯᓐᓂ ᐊᑐᕈᒥᓇᕐᓂᖅᐹᖑᖃᑕᐅᓚᐅᖅᐳᖅ," ᐃᖅᑲᐅᒪᕗᑦ, ᑕᑯᒃᓴᐅᑎᑦᑎᓪᓗᑎᒃ ᖃᓄᖅ ᐊᔾᔨᒌᙱᑦᑐᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑕᐅᔪᑦ ᓄᑲᖅᖡᑦ ᐊᒻᒪ ᐊᖓᔪᒃᖡᑦ ᐃᓕᓐᓂᐊᕐᕕᖕᒥᙶᖅᑐᑦ. ᐱᔭᕇᖅᓯᓂᕐᒧᑦ ᐱᓕᕆᐊᒃᓴᓂᒃ, ᓯᑯᐊᒃ ᐃᓱᒪᑖᓚᐅᖅᑐᖅ ᓇᖕᒥᓂᖅ ᐃᓄᐃᑦ ᑕᐅᑐᒃᑕᖏᓐᓂᒃ ᑐᓂᓯᓂᕐᒧᑦ ᓲᖃᐃᒻᒪ ᐃᓕᓴᐃᔨᖏᑦ ᑐᑭᓯᓚᐅᕐᒪᑕ ᐊᔾᔨᒋᙱᑕᖓᓂᒃ ᐅᓂᒃᑳᖃᓚᐅᕐᒪᑕ. 

"ᐃᓅᓯᖃᖅᓯᒪᕗᖓ ᐊᒥᓱᓂᒃ, ᐅᓄᖅᑐᓂᒃ ᐃᓅᓯᕐᓂᒃ ᐊᒻᒪ ᑭᖑᓪᓕᖅᐹᒥ, ᐃᓅᓯᕆᓇᓱᖅᑰᓕᓚᐅᖅᑕᕋ ᐊᑯᓂᐊᓗᒃ ᓯᕗᓕᖅᑎᐅᓂᐊᓕᖅᖢᖓ, ᑐᑭᓯᓇᖅᐸᑦ," ᓯᑲᒃ ᑲᔪᓯᓗᓂ. ᒪᓐᑐᕆᐋᓪᒧᑦ ᓅᓐᓂᖅ ᐊᑯᓂᐊᓗᒃ ᐃᓱᒪᒋᔭᐅᓚᐅᖅᑐᖅ ᑭᓯᐊᓂ ᓅᑦᑐᒪᙱᖦᖢᓂ ᓄᓇᓕᐸᐅᔭᕐᒧᑦ ᐅᖃᐅᓯᕐᒧᑦ ᑐᓗᖅᑕᕈᑎᖃᕐᓗᓂ. ᒫᓐᓇᓕ ᐊᖏᕐᕋᖅᓯᒪᖅᑰᔨᓕᖅᐳᑦ ᓇᓃᑦᑕᕆᐊᖃᖅᖢᑎᒡᓗ, ᐱᔭᒃᓴᓕᒻᒪᕆᐊᓘᓪᓗᑎᒃ, ᒥᑭᑦᑐᑦ ᓄᓇᓕᖕᓂ ᑲᑎᙵᔪᑦ ᐊᒻᒪ ᐱᖃᓐᓇᕆᔭᑦᑎᐊᕙᐃᑦ.

ᐅᖃᐅᔾᔪᐃᓂᖏᑦ ᐃᓕᓐᓂᐊᖅᑎᓄᑦ ᐃᓱᒪᑐᐃᓐᓇᕆᐊᓕᖕᓄᑦ ᓄᓇᒥᓂᒃ ᐊᐅᓪᓚᕈᒪᓪᓗᑎᒃ ᐃᓕᓐᓂᐊᕆᐊᕐᓗᑎᒃ ᑲᓇᑕᐅᑉ ᓯᓚᑖᓄᑦ ᐅᕝᕙᓘᓐᓃᑦ ᐊᐅᓪᓚᕐᓗᑎᒃ ᖃᐅᔨᓴᖅᑳᕐᓗᑎᒃ ᐊᐅᓪᓚᕐᓗᑎᒃ ᑐᙵᓇᖅᑐᓂᒃ ᐃᓂᒃᓴᓂᒃ ᐊᒻᒪ ᑲᑎᖃᑎᖃᕐᓗᑎᒃ ᓄᓇᓕᖕᓂ ᓄᓇᖃᖅᑳᖅᓯᒪᔪᑦ ᓄᓇᓕᖕᓂ ᖃᕆᑕᐅᔭᒃᑯᑦ. ᐅᖃᓚᐅᖅᐳᑦ ᖃᐅᔨᒋᐊᖁᔨᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓂᒃ ᓯᓚᑦᑐᖅᓴᕐᕕᒡᔪᐊᕐᒥ, ᐃᒻᒥᓂᒃ ᐃᑲᔫᑎᖃᑦᑎᐊᓚᐅᖅᑐᑦ. "ᑕᑯᓪᓗᓂ ᐊᒥᓱᓂᑦ ᓄᓇᖃᖅᑳᖅᓯᒪᔪᓂᑦ ᐃᓄᓐᓂᑦ ᓯᓚᑦᑐᓴᕐᕕᓐᓂᑦ ᐃᓕᓐᓂᐊᕐᓂᕐᒧᑦ ᐃᑲᔪᖃᑦᑕᐅᑎᓂᕐᒧᓪᓗ ᐊᓯᔾᔩᓂᖃᓪᓚᕆᓚᐅᖅᑐᖅ. ᑖᒃᑯᐊᖑᙱᑉᐸᑕ, ᑕᐃᒪᐃᓐᓇᔭᓚᐅᖅᑰᓚᐅᙱᑦᑐᖓ," ᐱᙱᖦᖢᑎᒃ.  

ADHD ᐅᖓᑖᓄᑦ, ᓯᑰᒃ ᑲᔪᓯᔭᕆᐊᖃᖅᓯᒪᖕᒥᔪᖅ ᓂᑲᓪᓗᖓᕐᔪᐊᕐᓂᕐᒥᒃ ᐃᓅᓯᓕᒫᖏᓐᓄᑦ. ᑕᐃᒃᑯᓄᖓ ᐊᒃᓱᕈᖅᑐᓄᑦ ᓂᑲᓪᓗᖓᓂᕐᒧᑦ ᓲᕐᓗ, ᐱᖁᔨᓲᑦ ᒪᒥᓴᕐᓂᕐᒥᒃ, ᐅᖃᖃᑎᖃᕐᓗᑎᒃ ᓘᒃᑖᒧᑦ, ᓇᓂᓯᓗᑎᒃ ᐃᓅᓕᓴᐅᑎᓂᒃ ᐃᑲᔪᖅᑐᓂᒃ ᓵᙵᔪᓂᒃᓗ ᐊᒃᓱᕈᕐᓇᖅᑐᓄᑦ ᓂᐊᖁᒃᑯᑦ. ᐅᖃᐅᓯᖃᕐᓂᖅ ADHD−ᒥᒃ ᓂᑲᓪᓗᖓᓂᕐᒥᒡᓗ ᐃᓄᑑᓪᓗᓂ ᐊᑐᖅᑕᐅᓚᐅᖅᐳᖅ ᑭᓯᐊᓂ ᓇᓂᓯᓚᐅᖅᐳᑦ ᐱᖃᓐᓇᕆᔭᒥᓂᒃ ᐃᑲᔪᕈᓐᓇᖅᑐᒻᒪᕆᐅᓂᖏᓐᓂᒃ, ᐊᑦᑕᑕᖅᓯᒪᒐᓗᐊᕈᑎᒃ ᖃᕆᑕᐅᔭᓂᒃ. ᐊᖏᕐᕋᖃᙱᓐᓂᖅ ᐊᕝᕕᐊᕈᑎᒃᑲᓐᓂᐅᓚᐅᕆᕗᖅ ᐱᖃᓐᓇᕆᔭᖏᓐᓄᑦ ᐃᓚᒥᓄᓪᓗ ᐃᑲᔪᖅᑕᐅᓪᓗᑎᒃ. 

ᑲᑭᖅᑯᐊᑦ ᑲᑭᖅᑯᐊᖏᑦ ᐃᖅᑲᐃᓯᓗᒋᑦ ᐱᒻᒪᕆᐅᔪᒥᒃ ᐃᓕᓐᓂᐊᕈᑎᒥᒃ, ᐅᖃᐅᓯᖅᑕᖏᑦ "ᐅᖁᒻᒥᐊᖅᑐᑦ" ᐅᕕᓂᖕᒥᓂ. "ᓄᑕᐅᙱᖦᖢᓂ ᐅᒥᐊᖅᑐᕈᑎᑐᖃᐅᖕᒪᑦ ᑕᕆᐅᖅ ᐱᖅᓯᖅᑎᓪᓗᒍ ᒪᓂᕋᐅᓗᓂᓗ, ᑎᒍᒥᐊᕐᓗᑎᑦ ᑭᓱᒥᑭᐊᖅ, ᑎᒍᒥᐊᕐᓗᑎᑦ ᓱᒃᑲᓕᔪᒥᒃ, ᓱᑲᖓᓗᑎᑦ. ᑕᐃᒪᓕ ᑭᓱᑐᐃᓐᓇᐃᑦ ᒪᓂᕋᐅᓕᕋᐃᒻᒪᑕ, ᑕᑯᑐᐃᓐᓇᖃᑦᑕᕋᒃᑭᑦ ᑲᑭᖅᑯᐊᒃᑲ ᐊᒻᒪᓗ [ᐃᓚᒋᔭᐅᔪᖅ] ᑕᒪᓐᓇ ᐱᖅᓯᖅᑐᐊᓘᒻᒪᑦ, ᓄᓇᕐᔪᐊᖅ ᐃᓱᒋᙱᒻᒪᒍ. ᑕᒪᓐᓇ ᐊᓂᒍᖅᑎᑦᑐᓐᓇᖅᑕᑦ. ᑐᐊᕕᕐᓗᑎᑦ," ᓇᓗᓇᐃᖅᐳᖅ. 

ᑖᒃᑯᐊ ᑕᕝᕙᑐᐊᖅ ᑲᑭᑕᐅᑐᐃᓐᓇᖏᑦᑐᑦ. ᓯᑲᐅᒃ ᓇᓗᓇᐃᒃᑯᑕᓂᒃ ᐱᔪᒪᔫᒐᓗᐊᖅ ᑭᓯᐊᓂ ᐃᓄᐃᑦ ᐃᓕᖅᑯᓯᖓᒍᑦ, ᑕᑯᔭᐅᒐᔪᓲᑦ ᐊᕐᓇᓄᑦ. ᐃᓅᓪᓗᓂ, ᓇᓗᓚᐅᖅᑐᑦ ᖃᓄᐃᒃᑲᔭᙱᒻᒪᖔᖅ ᐱᒍᑦᑎᒍ ᑭᓯᐊᓂ ᐃᓐᓇᑐᖃᖅ ᐅᖃᐅᔾᔭᐅᑉᐸᑦ ᖃᓄᐃᓐᖏᓐᓂᕋᖅᑕᐅᓪᓗᓂ ᐃᓅᒻᒪᑕ. ᐊᒻᒪ ᓱᓕ ᑲᑭᑕᐅᓪᓗᑎᒃ ᖃᖅᖢᐃᑦ, ᐱᖓᓱᑦ ᕿᑐᕐᖓᐅᔭᑦ ᑲᑎᙵᓪᓗᑎᒃ, ᓇᓗᓇᐃᒃᑯᑦᑎᖅᓯᓪᓗᑎᒃ ᐅᓂᒃᑳᖅᑐᐊᒥᓂᒃ ᑲᔪᓯᓂᖏᓐᓂᒃ.  

ᐋᖅᑭᒃᓯᒪᐃᓐᓇᖅᑎᓪᓗᒍ ᐃᓱᒪᖓ, ᓯᑰᒃ ᐅᒃᐱᕈᓱᒃᑐᖅ ᒪᒥᓴᐃᓂᕐᒥ ᐊᒻᒪ "ᖁᕕᐊᓱᖕᓂᖅ" ᐋᖅᑭᒃᓯᒪᓗᓂ ᐊᓂᑲᐅᖅᑐᕐᓂᖅ ᓲᕐᓗ ᑕᐅᑐᖕᓂᖅ. "ᒫᓐᓇ ᑕᓗᕈᒃᑯᑎᓗᐊᓕᕐᒪᑕ ᐃᓄᐃᑦ ᖃᓄᐃᓕᐅᓪᓚᑦᑖᖅᖢᑎᒃ ᖁᕕᐊᓱᒃᖢᑎᒃ. ᐸᓯᔭᒃᓴᐅᓇᓱᒋᒐᑦᑕ ᑕᒪᑐᒧᖓ ᐊᒻᒪᓗ ᑕᐃᒪᐃᑦᑕᕆᐊᖃᕋᓂ. ᑕᒪᓐᓇ ᕿᒥᕐᕈᓂᐊᕈᑦᑎᒍ ᓯᕗᓂᐊᒍᑦ ᐊᑭᑐᔪᓕᕆᔨᐅᔪᑦ, ᐃᓱᒪᒋᔭᑦᑎᓐᓂᒃ ᐲᕆᐊᖃᖅᑕᕗᑦ," ᑕᒪᒃᑯᐊ ᑕᐃᒪᐃᑐᐃᓐᓇᕐᓗᑎᒃ. ᑎᒍᓯᓂᖅ ᓄᑖᒥᒃ ᖁᕕᐊᒋᔭᒥᒃ ᓲᕐᓗ ᐅᖃᓕᒫᕐᓂᖅ ᐱᖁᔭᐅᔪᖅ, ᒥᑭᑦᑐᒥᒃᓘᓐᓃᑦ ᐱᓕᕆᓗᓂ ᖁᕕᐊᓱᒃᑎᑦᑎᔪᒥᒃ ᐊᒃᓱᕈᖅᑎᓪᓗᑎᑦ ᓂᑲᓪᓗᖓᓂᕐᒥᒃ. 

ᑲᔪᖏᖅᓴᐃᔭᕆᐊᖃᓕᕌᖓᑕ, ᓯᑰᒃ ᐅᓂᒃᑳᓕᖃᑦᑕᖅᐳᑦ ᐃᓄᖁᑎᒥᓄᑦ, ᐸᐃᑉᐹᒃᑯᑦ ᑐᓴᖅᑎᑦᑎᓪᓗᑎᒃ ᐊᑐᖅᓯᒪᔭᒥᓂᒃ ᐊᒻᒪ ᐃᓄᖕᓂᒃ ᐃᓕᓐᓂᐊᖅᑎᑦᑎᓪᓗᑎᒃ. ᐊᔾᔨᙳᐊᓂᒃ ᑕᑯᓪᓗᓂ ᖃᕋᓴᐅᔭᒃᑯᑦ ᐊᖏᕐᕋᖅᓯᒪᙱᖦᖢᓂ ᐃᑲᔫᑕᐅᔪᓐᓇᕆᕗᖅ ᐱᔪᒃᓯᓐᓇᖅᑐᓂᒃ ᐊᒻᒪ ᖃᐅᔨᖃᑦᑕᖅᓯᒪᔭᖏᓐᓂᒃ ᓲᕐᓗ ᓰᕐᓇᖅᑐᓂᒃ ᓰᕐᓇᖅᑐᓂᒃ ᐊᐃᒃᖠᕐᓂᖅ ᕿᑲᕆᐊᖅᓯᒪᑎᓪᓗᑕ ᒥᑕᐅᑎᒃᓴᓂᒃ ᐅᕝᕙᓘᓐᓃᑦ ᐃᖃᓗᒐᓱᖕᓂᕐᒥᒃ. ᖃᐅᑕᒫᑦ ᐃᓅᓯᕐᒥ ᐱᔪᒃᓯᑎᑦᑎᕙᒃᐳᖅ ᓯᑰᒃ−ᒥᒃ, ᐊᓪᓚᑦ urban−ᒥ.  

ᐊᓯᖕᓂᒃ ᑲᔪᖏᖅᓴᐃᔪᒪᒍᕕᑦ, ᓯᑰᒃ ᐊᑐᓕᖁᔨᕗᖅ, "ᐱᓇᓱᐊᑦᑎᐊᕋᓱᒡᓗᑎᑦ. ᓯᕗᓪᓕᖅᐹᒥ ᐋᖅᑭᒍᓐᓇᖏᑉᐸᑦ, ᖃᓄᐃᖏᑦᑐᖅ. ᑲᔪᓯᖏᓐᓇᕈᕕᑦ, ᑕᐃᑯᙵᓛᖅᑐᑎᑦ. ᖃᓄᐃᓕᔪᖃᑲᐅᑎᒋᔾᔮᖏᓚᖅ ᑭᒃᑯᓕᒫᓄᑦ." ᑲᑉᐱᐊᓱᖕᓂᖅ ᑲᔪᓯᙲᓐᓇᕐᓂᕐᒧᑦ ᐃᓕᑦᑎᔭᕆᐊᖃᓚᐅᖅᑐᑦ ᐊᓂᒍᐃᓂᕐᒥᒃ ᑭᓇᒥᑭᐊᖅ ADHD−ᖃᖅᑐᖅ. "ᐅᕙᖓ ᐅᖃᐃᓐᓇᓲᖑᔪᖓ ᐱᑲᐅᑎᒋᙱᒃᑯᒃᑯ, ᖃᓄᐃᙱᑦᑐᖅ. ᑕᒪᓐᓇ ᐃᓕᑉᐸᓪᓕᐊᓂᐅᒻᒪᑦ ᐊᒻᒪᓗ ᐃᓕᓐᓂᐊᖏᓐᓇᕆᑦ. ᐃᓕᑦᑎᕙᓪᓕᐊᖏᓐᓇᕆᑦ," ᐃᓱᓕᑉᐳᑦ. 

ᔭᐃᓴᓐ ᓯᑰᒃ ᓴᓇᐅᒐᓕᐅᓚᐅᖅᑐᖅ ᐃᖅᑲᐅᒪᔪᓐᓇᖅᑕᓕᒫᒥᓂᒃ ᑭᓯᐊᓂ ᐃᒻᒥᓂᒃ ᓴᓇᙳᐊᖅᑎᐅᓂᕋᓚᐅᖅᓯᒪᙱᖦᖢᓂ. ᖃᐅᔨᓚᐅᖅᖢᖓ ᐃᓅᓯᓕᒫᒧᑦ ᓯᓐᓇᑦᑑᒪᒋᔭᐅᔪᒥᒃ ᓴᓇᙳᐊᕐᓂᕐᒧᑦ ᐃᓕᓐᓂᐊᕐᕕᓕᐊᕈᒪᓂᕐᒥᒃ, ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓴᓇᙳᐊᕐᓂᕐᒧᑦ Concordia ᓯᓚᑦᑐᖅᓴᕐᕕᒡᔪᐊᕐᒥᙶᖅᑐᑦ ᐊᑎᕐᒥᓂᒃ ᓂᕕᖓᑎᑦᑎᓪᓗᑎᒃ ᐊᑭᓐᓇᒥ ᓲᕐᓗ ᓴᓇᙳᐊᖅᑕᐅᕙᒃᑐᑦ.  ᐊᓂᒍᐃᓂᖅ ᐊᔭᖅᑭᑦᑕᕈᑎᓂᒃ ᓇᖕᒥᓂᖅ ᐃᓱᒪᖏᓐᓂ ᓄᓇᕐᔪᐊᒥᓗ, ᐃᓕᑦᑎᓯᒪᔪᑦ ᓱᒃᑲᔪᒥᒃ ᐱᔪᒪᔭᖏᓐᓂ, ᓴᓇᐅᒐᖏᓐᓄᑦ ᓄᓇᓕᖕᓄᓪᓗ ᐃᑲᔪᖅᑐᓄᑦ ᓴᙱᔫᖏᓐᓇᕐᓂᕐᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.