"ᐊᔪᕐᓇᓚᐅᖅᓯᒪᙱᑦᑐᖅ ᐱᖃᓐᓇᕆᔭᑎᑦ ᑕᑯᔭᕆᐊᒃᓴᖅ ᐊᒃᓱᕈᕐᓇᖅᑐᒃᑰᖅᑐᓂᒃ ᐃᑲᔪᕈᒪᓪᓗᒋᓪᓗ ᐃᓄᐃᑦ," ᐅᖃᖅᑐᖅ ᔮᓱᐊ ᓇᓄᖅ, ᐃᓱᒪᒋᔭᖃᕐᖢᓂ ᖃᓄᐃᒻᒪᑦ ᐱᔪᒪᖕᒪᖔᑦ ᐋᓐᓂᐊᕕᓯᐅᑎᓄᑦ ᐃᓕᓐᓂᐊᕐᓂᕐᒥᒃ. ᐃᓕᓐᓂᐊᖅᑎᐅᔪᖅ ᐱᙳᐊᖅᑎᐅᓪᓗᓂ ᐅᑯᓇᓐᖓᑦ Ochapowace First Nations-ᒥ ᓵᔅᑳᑦᓱᐊᓐᒥ ᕼᐋᑭᖃᑕᐅᓯᒪᔪᖅ AAA-ᒥ ᓴᔅᑳᑦᓱᐊᓐᒥ, ᐊᒻᒪᓗ ᓄᑲᖅᖡᑦ A ᐊᒻᒪᓗ ᓄᑲᖅᖡᑦ B. ᓇᓄᖅ ᐱᖓᔪᒋᓕᖅᑕᖓᓂᒃ ᐊᕐᕌᒍᒦᓕᖅᑐᖅ ᓯᓚᑦᑐᓴᕐᕕᒡᔪᐊᒥ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᖃᐅᔨᓴᕐᓂᕐᒧᑦ ᐆᒪᔪᓕᕆᓂᕐᒥᒃ. 

ᐃᓅᓕᓴᐅᑎᓂᒃ ᐱᔪᒪᓚᐅᖅᑐᖅ ᓲᖃᐃᒻᒪ ᐃᑲᔪᕆᐊᖃᓚᐅᕐᒪᑦ ᐱᓕᕆᖃᑎᖏᓐᓂᒃ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ ᐊᒻᒪ ᑕᐃᒪᐃᓐᓂᖓᓄᑦ ᓇᓗᓇᐃᒃᑯᑕᖃᓚᐅᖅᑐᖅ EMR−ᒧᑦ, ᓯᕗᕙᓯᖕᓂᖅᓴᒥᒃ ᐋᓐᓂᖅᑐᓕᕆᓂᕐᒥᒃ ᐱᓕᒻᒪᒃᓴᕐᓂᕐᒥᒃ. ᓇᓄᖅ ᓘᒃᑖᙳᕈᒪᖕᒪᑦ ᐱᓚᒃᑐᐃᔨᙳᕈᒪᖕᒪᑦᓗ ᐱᔨᑦᑎᕋᕐᓗᓂᓗ ᓄᓇᒥᓂᒃ ᐃᑲᔪᕐᓂᐊᕐᓗᓂ 45−ᒥᓂᑦᔅ−ᒥᑦ ᐃᑲᕐᕋᓕᒫᒧᑦ ᐋᓐᓂᐊᕕᖕᒥ ᑲᒪᒋᔭᐅᓂᕐᒧᑦ ᐊᒃᓱᕈᕐᓇᖅᓯᔪᒧᑦ ᓄᓇᓕᖕᒥᐅᑦ ᐅᑕᖅᑭᔅᓲᔭᓗᐊᕐᓂᖏᓐᓄᑦ ᑲᒪᒋᔭᐅᓂᕐᒥᒃ. 

ᐋᓐᓂᕐᓂᖅ ᐊᑦᑕᕐᓇᕈᑎᑐᐊᖑᙱᑦᑐᖅ ᕼᐋᑭᖃᑕᐅᑎᓪᓗᒍ;  ᓇᓄᐃᓪᓗ ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᖃᑦᑕᖅᓯᒪᒋᕗᑦ ᓯᑯᒥ ᐊᒻᒪ ᕿᓄᐃᓵᕈᓐᓇᑦᑎᐊᕐᓇᙱᖦᖢᓂ. "ᐱᕕᒃᓴᖃᙱᑦᑐᖓ ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᕐᒥᒃ. ᑕᒪᓐᓇ ᐱᙳᐊᕐᓂᕐᒨᖏᑦᑐᖅ, ᐊᒻᒪᓗ ᐅᑉᐱᕈᓱᑦᑐᖓ ᐊᐅᑦᑐᐃᓐᓇᐅᒐᑦᑕ ᐊᐅᐸᖅᑐᒥᑦ, ᐊᒻᒪᓗ ᐊᔾᔨᒌᑦᑐᐃᓐᓇᐅᓪᓗᑕ ᐊᒻᒪᓗ ᐊᔾᔨᒌᑦᑐᑕ," ᑕᑯᔅᓴᐅᑎᑦᑎᔪᖅ.

ᐃᖅᑲᐅᒪᔪᖅ ᓇᖏᖅᖢᓂ ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᕐᓂᕐᒧᑦ ᐃᓅᓱᒃᑑᓪᓗᓂ ᐊᒻᒪ ᖃᓄᑎᒋ ᐃᓱᒪᒥᓂᒃ ᐲᖅᑎᑦᑎᓚᐅᕐᒪᖔᑦ. "ᖃᐅᔨᒪᑦᑎᐊᓚᐅᙱᑦᑐᖓ ᖃᓄᖅ ᕿᓄᐃᓵᕆᐊᒃᓴᖅ ᑭᓯᐊᓂ ᐃᑲᔪᖅᑕᐅᓪᓗᖓ ᐃᓚᓐᓄᑦ, ᐱᖃᓐᓇᕆᔭᓐᓄᑦ ᓄᓇᓕᓐᓄᓪᓗ ᐊᒻᒪ ᖁᕕᐊᓲᑎᖃᖅᑎᓪᓗᒋᑦ, ᐅᕙᓐᓄᑦ ᐅᑎᐅᔾᔨᑦᑎᐊᓚᐅᖅᐳᑦ ᐅᐱᒍᓱᒃᑎᑦᑎᑦᑎᐊᖅᖢᑎᒡᓗ ᓄᓇᖃᖅᑳᖅᓯᒪᔪᓂᒃ. ᐅᐱᒍᓱᐃᓐᓇᐅᔭᕐᓂᐊᖅᑐᖓ ᐱᐅᓯᑐᖃᓐᓂᒃ," ᓇᓗᓇᐃᖅᓯᓪᓗᓂ. 

ᑖᓐᓇᓴᐃᓐᓇᖅ ᐃᑲᔪᖅᑐᖅᑕᐅᓂᖓ ᐊᒻᒪᓗ ᓴᐱᓕᖅᑕᐃᓕᓂᖓ ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᕐᓂᕐᒧᑦ ᐃᓕᓐᓂᐊᕐᕕᒻᒥ. ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᕐᓂᕐᒧᑦ "ᐊᒃᓱᕈᐃᓐᓇᕐᓂᖅ ᓴᐱᓕᓚᐅᖅᓯᒪᙱᖦᖢᓂᓗ ᓲᖃᐃᒻᒪ ᓈᒻᒪᙱᒻᒪᑦ, ᐅᖃᓪᓚᒃᐸᒃᖢᓂᓗ ᐱᓗᐊᓕᖅᐸᓪᓕᐊᑐᐃᓐᓇᖅᐸᑦ." ᐅᖃᐅᓯᖃᖅᑐᖅ ᐊᒃᓱᕈᕐᓇᕐᓂᖓᓂᒃ ᐱᙳᐊᕋᓱᒋᐊᒃᓴᖅ ᐃᓕᓐᓂᐊᕐᕕᖕᒥ ᐊᒻᒪ ᖃᓄᖅ ᐊᒃᓱᕈᕐᓇᕐᓂᖅᓴᓂᒃ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ ᐱᙳᐊᖅᑎᓂᒃ ᐱᓕᕆᔭᕆᐊᖃᕐᒪᖔᑕ ᐱᒻᒪᕆᐅᑎᑕᐅᓗᑎᒃ.

ᓇᓄᖅ ᐱᙳᐊᖃᑦᑕᓕᓚᐅᖅᑐᖅ ᐊᖅᑯᑎᒃᑯᑦ ᕼᐋᑭᖅᑐᓂᑦ ᒪᒃᑯᒃᑎᓪᓗᒍ ᓵᓚᖃᕋᓱᒃᓗᓂᓗ ᓵᓚᖃᕋᓱᒃᑐᓂᑦ ᖁᕕᐊᓱᒃᖢᑎᒃ ᐱᙳᐊᖃᑎᖏᓐᓂ ᑲᑕᖕᓂᖃᖅᑎᑦᑎᓪᓗᓂ ᐱᙳᐊᕐᓂᕐᒥᒃ. ᐅᖃᐅᔾᔨᔪᖅ ᐊᓯᖏᓐᓂᒃ ᐱᔪᒥᓇᖅᑐᓂᒃ ᓄᓇᖃᖅᑳᖅᓯᒪᔪᓂᒃ ᐱᙳᐊᖅᑎᓂᒃ ᐃᓱᒪᔪᓂᒃ ᕼᐋᑭᕐᓂᕐᒧᑦ, "ᐊᓃᕐᓗᑎᑦ ᐆᒃᑐᕐᓗᒍᓗ. ᕼᐋᑭᕐᓂᖅ ᐱᙳᐊᕐᓂᕆᙱᒃᑲᓗᐊᕐᓗᒍ, ᖃᓄᑐᐃᓐᓇᖅ ᐱᙳᐊᕐᓂᖅ ᐱᐅᖏᓐᓇᐅᔭᖅᑐᖅ." 

ᐱᕈᖅᓴᓚᐅᖅᑐᖅ ᐊᒥᓱᓂᒃ ᐱᙳᐊᖅᑎᑦᑎᓪᓗᓂ ᐊᒻᒪᓗ ᑎᓕᐅᕆᓪᓗᓂ ᐃᓅᓱᒃᑐᓂᒃ ᐱᙳᐊᑦᑎᐊᖁᔨᓪᓗᑎᒃ ᐊᒻᒪᓗ ᐃᓕᓐᓂᐊᕐᕕᒻᒥ.  ᐃᓕᓐᓂᐊᕆᐊᓚᐅᖅᑐᖅ ᐅᐃᓪᑳᒃᔅᒥ, ᓴᔅᑳᑦᓱᐋᓐᒥ ᒍᓚᐃᑦ 9-ᒥ ᐊᒻᒪᓗ ᖃᐅᔨᓪᓗᓂ ᐱᐅᒋᐊᖓᓂᒃ ᑭᓯᐊᓂ ᐱᔭᕆᐊᑐᔪᒥᒃ ᐊᑐᖅᓯᒪᓪᓗᓂ ᐊᖏᕐᕋᒥᓂᒃ. ᐱᓐᖑᐊᖃᑦᑕᓚᐅᖅᐳᖅ ᐊᔾᔨᒌᙱᑦᑐᓂᑦ ᕼᐋᑭᖅᑎᓪᓗᒋᑦ ᐊᒻᒪ ᖃᐅᔨᓪᓗᓂ ᐋᖅᑭᔅᓯᒪᓂᖓ ᐋᓐᓂᐊᕕᓕᐊᖅᑐᓄᑦ ᐃᓕᓴᕕᒃ ᐱᐅᓚᐅᕐᒪᑦ ᑖᔅᓱᒧᖓ ᐊᒻᒪ ᑐᕌᕋᓱᐊᖅᑕᖓ ᐋᙵᔮᕐᓇᖅᑐᓂᑦ ᐃᒥᐊᓗᒻᒥᓪᓗ ᓄᖅᑲᖓᑎᑦᑎᓪᓗᓂ.

ᕼᐋᑭᖅᑎᐅᖃᑕᐅᓚᐅᖅᑐᖅ ᓯᕗᓪᓕᖅᐸᐅᓪᓗᓂ ᓄᑲᖅᖡᑦ A-ᒥ ᐱᙳᐊᖃᑕᐅᓚᐅᖅᐳᖅ. ᐊᕐᕌᒍᑉ ᐱᖃᑖᓂ ᓄᑲᖅᖡᑦ ᐊᕐᕌᒍᒋᓕᖅᑖᓂ ᐊᓂᒍᓚᐅᖅᐳᖅ ᐅᖃᓗᒡᕕᐅᓪᓗᓂᓗ ᐱᙳᐊᖃᑎᖃᖁᔭᐅᓪᓗᓂ ᒥᐅᓪᕗᑦ ᒪᔅᑖᖕᔅ−ᓂᒃ. ᐊᑖᑕᖓ ᐊᑖᑕᖓᑕ ᐊᑖᑕᖓ ᖁᕕᐊᓱᓚᐅᖅᑐᖅ. ᓇᓄᐃᑦ ᐊᓕᐊᓇᐃᒋᓛᕆᓛᖓ ᒫᓐᓇᒧᑦ ᑎᑭᖦᖢᒍ ᐆᒃᑑᒪᔭᒍᑕᐅᓪᓗᓂ.

"ᖁᔭᓕᐃᓐᓇᕐᓂᐊᖅᑐᖓ ᑕᑯᔪᓐᓇᖅᓯᒐᒪ ᑭᓱᓂᒃ ᓴᓂᕐᕙᒃᑕᐅᓯᒪᔪᓂᒃ ᐊᒻᒪ ᐊᓯᓐᓄᑦ ᐅᖃᐅᑏᓐᓇᐅᔭᖅᖢᒍ. ᐱᑕᖃᐃᓐᓇᐅᔭᕐᒪᑦ ᑕᖅᑳᓂ ᐊᒻᒪᓗ ᐱᕕᒃᓴᖃᑦᑎᐊᖅᑐᑎᒃ ᑕᖅᑳᓂ. ᐅᕼᐊᐴᔅ ᐊᖏᕐᕋᕆᖃᑦᑕᕐᓂᐊᖅᑕᕋ. ᑖᓐᓇ ᐱᐅᒋᔭᕋ. ᑭᓯᐊᓂ ᐊᓕᐊᓇᐃᒋᑦᑎᐊᕐᒥᔭᕋ ᐃᓕᓐᓂᐊᕆᐊᕐᓂᖅ ᐊᒻᒪ ᐃᓕᖕᓂᒃ ᑕᖅᑲᐅᖓᖅᑎᑦᑎᑲᑕᒃᖢᖓ ᓄᓇᕐᔪᐊᕐᒥ ᓲᖃᐃᒻᒪ ᐱᐅᒋᒐᒃᑯ ᐃᖅᑭᓕᖕᓄᑦᑕᐅᖅ ᐱᐅᓇᓱᒋᓪᓗᒍ," ᓴᓚᐅᓪᓗᓂ.

ᐅᖃᐅᔾᔨᒋᐊᕈᓐᓇᕈᓂ ᒪᒃᑯᓐᓂᖅᓴᒧᑦ ᐅᖃᖅᑐᓂ, "ᑕᐃᒪᓕ, ᐃᒪᐃᒃᑲᔭᖅᑐᖅ: ᓱᒃᑲᐃᓪᓕᒋᐊᕐᓗᓂ. ᐃᓛᓐᓂᒃᑯᑦ ᓯᓚᕐᔪᐊᖅ ᓱᒃᑲᓕᔪᒻᒪᕆᒻᒥᑦ ᐱᖃᑦᑕᕐᒪᑦ, ᕼᐋᑭᖅᑐᓂ, ᐃᓕᓐᓂᐊᕈᓐᓃᖅᑐᓂ ᐊᒻᒪ ᐃᓕᓪᓚᕆᓚᐅᖅᑐᖓ ᓱᒃᑲᐃᓪᓕᒋᐊᑐᐃᓐᓇᖅᑐᖓ ᓇᓪᓕᐅᓂᖅᓯᐅᖅᑎᓪᓗᑕ. ᐃᓚᐅᖃᑦᑕᖅᓯᒪᕗᖓ ᐊᒥᓱᓂᒃ ᐊᐅᒪᔮᖅᑐᓂᒃ ᐃᒡᓗᕋᓛᓂᒃ ᖃᖓᑦᑎᐊᓵᕐᓗ ᒪᖁᒃᑯᑦ ᒧᒥᖅᑎᑦᑎᕙᒃᖢᖓ, ᑕᒪᓐᓇᓗ ᐃᓕᓐᓂᐊᑦᑎᐊᕐᓇᖅᖢᓂ ᐃᓕᑦᑎᕙᓪᓕᐊᑦᑎᐊᕐᓇᖅᖢᓂᓗ ᐅᕙᓐᓄᑦᑕᐅᖅ. ᑕᒪᓐᓇ ᐅᕙᓐᓄᑦ ᐅᑎᕈᑎᒋᓵᖅᑕᕋ, ᓱᒃᑲᐃᒡᓕᑎᖦᖢᓂᖓ ᐊᒻᒪ ᐅᕙᓐᓄᑦ ᐅᖃᖅᖢᓂ ᑕᐃᒪᓐᓇ ᑕᐅᑐᖅᑰᖅᑕᓐᓂᒃ ᐊᒻᒪ ᐊᔪᕆᖅᓲᔾᔨᓯᒪᓪᓗᖓ ᐱᔭᕆᐊᖃᖅᑕᓐᓂᒃ ᐅᕙᓐᓄᑦ ᐱᒻᒪᕆᐅᓪᓗᓂᓗ."

ᓇᓄᖅ ᖃᐅᔨᓚᐅᖅᑐᖅ ᐊᒃᓱᕈᕐᓇᕐᓂᖓᓂᒃ ᓄᓇᕐᔪᐊᒥ ᖃᓂᒻᒪᒍᑕᐅᕙᓪᓕᐊᔪᖅ ᐃᓅᓯᖓᓂ ᐊᒃᓱᕈᕐᓇᕐᓂᖓᓂᒃ. ᐃᖃᐃᓕᓴᖅᑐᒻᒪᕆᐅᓚᐅᖅᐳᖅ ᐃᓕᓐᓂᐊᖅᑎᑦᑎᓪᓗᓂᓗ ᓇᔭᒥᓂᒃ ᐃᓕᓐᓂᐊᖅᑎᐅᒋᓪᓗᑎᒃ ᐱᙳᐊᖅᑎᓂᒃ. ᐱᓕᕆᐊᒃᓴᖃᐃᓐᓇᓚᐅᖅᑐᖅ ᐃᓱᒪᒥᓂᒃ ᐅᐃᒻᒪᒃᑎᑦᑕᐃᓕᒪᓪᓗᓂ ᓇᓗᓇᖅᑐᒃᑰᖅᑎᓪᓗᒍ. ᐆᒻᒪᕆᖕᓂᖅ ᐃᓚᐅᕙᖕᓂᕐᓗ ᖃᓄᐃᙱᑦᑎᐊᖅᑐᓂᒃ ᐊᓕᐊᓇᐃᒋᔭᖃᖅᐸᖕᓂᕐᓂᒃ, ᑖᓐᓇ ᐊᓯᔾᔨᕐᓂᖃᓚᐅᖅᐳᖅ ᑖᔅᓱᒧᖓ. "ᐃᑉᐱᒍᓱᓲᖑᔪᖓ ᐃᖅᑲᓇᐃᔭᖅᑎᓪᓗᑎᑦ, ᐊᓂᑎᑕᐅᔪᓐᓇᕋᕕᑦ, ᐊᒻᒪᓗ ᑕᒪᒃᑯᐊ ᖃᓄᐃᖏᑎᐊᖅᑐᑦ ᐃᑲᔫᑎᐅᔪᑦ ᐆᒻᒪᕆᓐᓂᕐᒧᑦ. ᐆᒻᒪᕆᖕᓂᖅ ᐱᒻᒪᕆᐊᓘᕗᖅ ᑕᒪᒃᑯᐊ ᐊᑐᖅᑕᐅᕙᒃᑐᓕᒫᑦ ᑎᒥᒦᑎᖦᖢᒋᑦ ᖃᓄᐃᙱᑦᑎᐊᕐᓗᑎᒃ ᑭᓱᓕᒫᓂᒡᓗ," ᑕᐃᒪᓐᓇ ᐅᖃᖅᖢᓂ. Smudging with cedar ᐃᑲᔫᑎᖃᓚᐅᖅᑐᖅ ᓄᓇᓕᖓᓗ ᐊᒡᔭᖅᓯᓪᓗᑎᒃ ᐃᓅᓕᓴᐅᑎᓂᒃ ᐴᖅᓯᒪᔪᓂᒃ ᐊᑐᓂ ᐊᖏᕐᕋᖏᓐᓂ ᐃᑲᔪᕐᓗᒋᑦ ᐃᓄᐃᑦ ᑲᓲᑎᓯᒪᖅᑰᔨᓗᑎᒃ.

ᐊᒃᑐᐊᓂᖃᕐᓂᖅ ᐱᒻᒪᕆᐅᕗᖅ ᓇᓄᕐᒧᑦ, ᑭᓇᒧᒃᑭᐊᖅ ᐱᔪᒃᓯᑎᑦᑎᖃᑦᑕᕐᓂᖓᓄᑦ ᐱᔪᒃᓯᑎᑦᑎᕙᖕᓂᖓᓄᓪᓗ ᐊᖓᔪᖅᑳᒥᓂᒃ. 

ᐊᑖᑕᖓ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔫᓪᓗᓂ ᐊᒃᓱᕈᖅᖢᓂ ᐱᓕᕆᓚᐅᖅᑐᖅ ᐱᕕᖃᑦᑎᐊᖅᑎᑦᑎᓇᓱᒃᖢᓂ. ᐃᑲᔪᖅᓱᖅᑕᐅᓂᖓ ᓄᓇᓕᖓᑕ ᑲᔪᖏᖅᓴᐃᕗᖅ, ᐃᓚᒥᓂᓪᓗ, ᐱᖃᑕᐅᓪᓗᓂ ᐊᓂᖓ ᐱᓐᖑᐊᓚᐅᖅᑐᖅ ᐅᐊᓕᓂᕐᒥ ᕼᐋᑭᖅᑎᓂᑦ, ᐊᒻᒪ ᐱᔭᕇᕋᑖᓚᐅᖅᑐᖅ ᓯᓚᑦᑐᓴᕐᕕᕐᔪᐊᕐᒥᑦ. "ᑭᓇᑭᐊᖅ, ᕿᒥᕐᕈᓯᒪᕐᔪᐊᖅᑕᕋ, ᓲᖃᐃᒻᒪ ᐊᑐᖅᑕᐃᓐᓇᕆᓯᒪᖕᒪᒍ ᐅᖃᐅᑎᔪᓐᓇᕐᖢᓂᖓᓗ ᐃᒻᒪᖄ ᑕᑯᔪᓐᓇᙱᓐᓇᒃᑯ ᓯᓚᑖᓂ. ᑲᒪᓇᖅᑐᖅ. ᑕᐃᒪᐃᖏᓐᓇᐅᔭᖅᑐᖅ ᑕᐃᑲᓃᖏᓐᓇᐅᔭᕐᖢᓂᓗ ᐅᕙᓐᓄᑦ," ᖁᖓᖦᖢᓂ.

ᐃᓱᒪᓪᓗᓂ ᐊᓂᒍᐃᔪᓐᓇᕐᓂᕐᒥᓂᒃ ᖃᓄᕐᓗ ᐊᒃᓱᕈᖅᖢᓂ ᐱᓕᕆᓯᒪᖕᒪᖔᑦ, ᐅᖃᐅᓯᖃᖅᐳᖅ ᖃᓄᖅ ᐃᒃᐱᖕᓇᖅᑎᒋᖕᒪᖔᑦ. "ᐱᙳᐊᖃᑕᐅᔭᕆᐊᖃᕈᕕᑦ ᐃᓕᓐᓂᐊᕐᕕᖕᒥ, 10-ᖏᖅᓱᓪᓗᐊᖅᑐᒥᒃ ᓯᓚᑐᓂᖅᓴᐅᔭᕆᐊᖃᕈᕕᑦ, 10-ᖏᖅᓱᕐᓗᓂ ᐱᐅᓂᖅᓴᖅ ᑕᐃᔅᓱᒧᖓ ᐃᓄᖕᒧᑦ ᓂᖓᐅᑎᒋᔪᓐᓇᖅᑕᕐᓄᑦ ᑕᐃᒪᓐᓇᐅᔭᕆᐊᓕᒃ ᐃᓛᓐᓂᒃᑯᓪᓗ ᑕᐃᒪᓐᓇᐅᕗᖅ. ᐃᓅᓪᓗᓂ, ᐱᐅᖏᓐᓇᐅᔭᖅᑐᖅ ᐅᓇᑕᕈᓐᓇᖅᑎᓪᓗᑎᑦ ᐅᓇᑕᑦᑎᐊᕐᓂᕐᒥᑦ ᐊᓂᒍᐃᔪᓐᓇᕐᖢᓂᓗ ᑕᒪᒃᑯᓂᖓ ᐃᓅᓯᕐᓂᑦ," ᐊᔾᔨᖃᖅᑐᖅ.

ᓂᑲᒍᓱᒃᓯᒪᔪᖅ ᐃᓚᒥᓂᒃ ᓄᓇᖅᑲᑎᒥᓂᒡᓗ ᓇᒡᓕᒍᓱᖕᓂᕐᒥᒃ, ᓇᓄᖅ ᐊᒃᓱᕈᖅᖢᓂ ᐱᓕᕆᕗᖅ ᓯᓐᓇᒃᑑᒪᔭᒥᓂᒃ ᖁᑭᖅᓯᓇᓱᒃᖢᓂ. ᑐᕌᒐᖃᖅᑎᓪᓗᒋᑦ ᐱᐅᔪᓂᒃ ᐋᓐᓂᐊᖅᑐᓕᕆᓂᕐᒧᑦ ᑲᒪᒋᔭᐅᓂᕐᒥᒃ ᓄᓇᓕᖓᓄᑦ, ᑭᒃᑯᓕᒫᑦ ᓵᓚᖃᖃᑦᑕᖅᑐᑦ ᑕᐃᒪᐃᒐᐃᒐᒥ. ᓲᖃᐃᒻᒪ, ᑕᑯᓴᕋᐃᓐᓇᙱᑦᑐᖅ ᓄᓇᓕᖕᒥᓂ ᐊᒃᓱᕈᕐᓇᖅᑐᒃᑰᖅᑐᓂ, ᐊᒻᒪ ᔮᓱᐊ ᓇᓄᖅ ᐃᑲᔪᕈᒪᔪᖅ ᐃᓄᖕᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.