ᕿᑐᑦᑐᒐᐅᔭᐅᓪᓗᓂ, ᖁᐱᓯᖃᑦᑕᖅᑐᖅ ᐊᒡᒐᒥᓂᒃ. ᐸᓖᓯᐅᓪᓗᓂ, ᐱᕈᐃᓚᐅᖅᑐᖅ ᐱᐅᙱᑦᑐᒥᒃ. ᐊᓈᓇᐅᓪᓗᓂ, ᐃᓚᒥᓂᒃ ᐱᕈᖅᓴᐃᔪᖅ ᐃᓕᓐᓂᐊᖅᑎᐅᓪᓗᓂᓗ, ᖃᐅᔨᒪᓂᕆᔭᖓᑦ ᒪᒃᕼᐊᒃ ᐅᖃᐅᓯᖓᓂ. ᓴᐳᔾᔨᓚᐅᖅᑐᖅ ᓛᒃ ᓯᓪ ᓄᓇᓕᖓᓂᒃ, ᓱᕈᓰᑦ ᓄᓇᒋᔭᖓᓂ ᐊᒻᒪᓗ ᐅᓪᓗᒥᐅᓕᖅᑐᖅ ᓴᐳᔾᔨᔪᖅ ᓇᒻᒥᓂᖅ ᓄᑕᕋᒥᓂᒃ. ᐃᓕᓐᓂᐊᖏᓐᓇᖅᐳᖅ ᐱᔭᕇᖅᓯᓇᓱᐊᖅᖢᓂ ᐱᒋᐊᓚᐅᖅᑕᖓᓂ ᐱᔭᕇᕈᓯᐊᕐᒥᑦ ᐊᒻᒪ ᐃᓅᓯᖅᑖᖅᖢᓂ ᐊᖓᔪᖅᑳᖑᓕᖅᖢᓂ.

ᑲᐃᕋ ᒪᒃᓚᐅᑦ ᒧᕼᐊᒃ ᐊᕐᓇᐅᔪᖅ 6-ᓂᑦ ᓄᓇᓕᕐᔪᐊᓂᑦ ᒍᕌᓐ ᕆᕗᒥᑦ ᐊᒻᒪᓗ ᐊᕝᕙᕆᓪᓗᓂᐅᒃ ᐆᔨᐳᐃ.   ᐱᕈᖅᓴᐃᔪᖅ ᐃᓅᓵᖅᑐᒥᒃ ᐊᒻᒪᓗ ᐃᓕᓐᓂᐊᕆᐊᖅᓯᒪᓪᓗᓂ ᓯᓚᑦᑐᖅᓴᕐᕕᒡᔪᐊᒥ ᐅᓪᓘᑉ ᐃᓚᐃᓐᓇᖓᓄᑦ ᐱᔭᕇᕋᓱᒃᓗᓂ ᐃᓕᓐᓂᐊᕌᓂᒍᓯᐊᕐᒥᒃ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᕐᒥᒃ ᐅᑭᐅᑭᓗᐊᖅᑐᒥᒃ ᐃᓱᒪᓕᕆᓂᕐᒥ. ᐃᓕᓐᓂᐊᖅᑕᖓ ᓄᖅᑲᖓᑎᖦᖢᓂᐅᒃ ᐊᕐᕌᒍᓄᑦ 7-ᓄᑦ ᐃᖅᑲᓇᐃᔭᖅᑎᓪᓗᒍ ᓛᒃ ᓯᐅᓪ ᓄᓇᖃᖅᑳᖅᓯᒪᔪᓂᑦ ᐸᓖᓯᓕᕆᓪᓗᓂ, ᐃᑲᕐᕋᓄᑦ ᐊᕙᑎᓄᑦ ᓄᓇᒥᓂᒃ ᐅᖓᓯᒃᑎᒋᓪᓗᓂ.

ᐸᓖᓯᓕᕆᓂᖅ ᓂᕈᐊᕆᖅᑳᓚᐅᙱᖦᖢᓂᐅᒃ ᐃᖅᑲᓇᐃᔮᖓᓄᑦ, ᖃᐅᔨᒪᑐᐃᓐᓇᓚᐅᖅᑐᖅ ᐃᓚᐅᖃᑕᐅᔪᒪᓂᕐᒥᓂᒃ ᐃᑲᔪᕐᓗᓂᓗ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᐱᔪᒪᙱᖦᖢᓂᓗ 9-5 ᐃᖅᑲᓇᐃᔮᒃᓴᒥᒃ.  ᐊᓂᖓ ᐸᓖᓯᐅᓚᐅᖅᓯᒪᕗᖅ ᐃᖅᑲᓇᐃᔭᓯᒋᐊᓚᐅᕋᓂ ᓄᓇᒥ ᐊᒻᒪᓗ ᑐᓴᖅᑐᓂ ᒪᑐᐃᖅᑕᐅᓂᖓᓂ ᓛᒃ ᓯᓪ. ᐃᓚᖃᓚᐅᖅᑐᖅ ᓄᓇᓕᓐᓂ ᐋᓐᓂᐊᓯᐅᖅᑎᐅᓪᓗᓂ ᐊᒻᒪᓗ ᐊᓯᖏᑦ ᐃᓚᒋᔭᐅᔪᑦ ᑎᓕᐅᕆᓚᐅᖅᑐᑦ ᐱᓇᓱᐊᖁᔨᓪᓗᓂ. ᐊᖓᔪᖓᑕ ᖃᕋᓴᖓᓂᒃ ᓂᕈᐊᓚᐅᖅᑐᖅ ᐃᖅᑲᓇᐃᔮᖓᑕ ᒥᒃᓵᓄᑦ ᐊᒻᒪ ᐃᓕᑉᐸᓪᓕᐊᓂᖅᓴᐅᓪᓗᓂ, ᐱᓕᕆᔪᒪᓂᖅᓴᐅᓪᓗᓂ.

ᐃᖅᑲᓇᐃᔭᕐᖢᓂ ᓄᓇᓕᕋᓛᖑᓂᖅᓴᒥ, ᐃᖕᒥᓂᒃ ᐱᓕᕆᓪᓗᓂ ᐱᖓᔪᖓᓂ, ᐃᓕᕋᓇᕈᓐᓇᕐᖢᓂ. ᐸᓖᓯᐅᕕᓕᐊᓚᐅᖅᑐᖅ ᐃᓕᓐᓂᐊᖅᑎᑕᐅᔭᖅᑐᖅᑐᓂ ᐸᓖᓯᕈᕋᑖᖅᑐᒥᓂᐅᓪᓗᓂ ᑭᓯᐊᓂ ᐃᓕᓐᓂᐊᕐᓇᖅ ᐊᑐᐃᓐᓇᐅᓕᖅᐸᑦ.  ᖃᓄᐃᓕᐅᖃᑦᑕᖅᓯᒪᓂᖓ ᐃᓕᓐᓂᐊᖃᑎᒥᓄᑦ ᐊᒻᒪ ᐱᓕᕆᔨᒻᒪᕆᖕᓄᑦ ᕿᑐᑦᑐᒐᐅᔭᕐᒧᑦ ᐊᑐᐃᓐᓇᐅᓚᐅᖅᐳᖅ ᓈᒻᒪᒃᓯᓕᕈᑕᐅᓇᓱᒃᖢᓂ ᑎᒥᒃᑯᑦ ᐱᔭᐅᒋᐊᓕᖕᓄᑦ.

ᐊᖏᕐᕋᖅᑖᓚᐅᖅᑐᖅ ᐅᑎᖅᖢᓂᓗ, ᑭᓯᐊᓂ ᖁᕕᐊᒋᔭᖓ ᐃᖅᑲᓇᐃᔮᖓ. ᐸᓖᓯᓕᕆᔪᒪᒐᓗᐊᖅᐳᖅ ᐊᖏᕐᕋᒧᑦ ᖃᓂᓐᓂᖅᓴᐅᓗᓂ, ᑭᓯᐊᓂ ᐅᑎᕋᒥ ᑳᓐᑐᓛᒃᓯᓚᐅᖅᑐᖅ ᐊᕐᕌᒍᒧᑦ ᓄᑕᕋᕐᒧᑦ ᓴᐳᔾᔨᔾᔪᑎᒃᓴᒥᑦ ᒪᓕᒐᓕᕆᔨᒃᑯᖏᓐᓂᑦ. ᑳᓐᑐᕌᒃ ᐃᓱᓕᒻᒪᑦ, ᐃᓕᓐᓂᐊᕐᕕᖕᒧᑦ ᐅᑎᓚᐅᖅᑐᖅ. ᖃᐅᔨᒐᒥ ᓯᖓᐃᓂᖓᓂᒃ, ᐊᐅᔭᒃᑯᑦ ᐃᓕᓐᓂᐊᓚᐅᖅᑐᖅ ᑕᐅᑐᓪᓗᐊᑕᕐᓂᐊᕐᒪᑦ ᖃᑕᙳᑎᖏᓐᓂᒃ ᓄᑕᕋᓛᖓ ᑎᑭᒻᒪᑦ.

ᐃᓕᓐᓂᐊᕐᕕᕐᔪᐊᕐᒦᑎᓪᓗᒍ, ᒪᒃᓚᐅᑦ ᐃᓱᒪᓚᐅᖅᑐᖅ ᓄᑕᕋᐅᓂᖓᓂᒃ, ᐅᐸᑦᑎᐊᖅᐸᒃᖢᓂ ᐊᒻᒪ ᐃᓕᓐᓂᐊᑦᑎᐊᕐᓇᙱᖦᖢᓂ. ᖃᐅᔨᒐᒥ ᐃᖅᑲᓇᐃᔮᖃᕈᒪᓂᕐᒥᓂᒃ ᓯᓚᑦᑐᖅᓴᕐᕕᒡᔪᐊᓕᐊᕈᒪᓕᕐᖢᓂᓗ, ᐱᔪᒪᓕᕐᖢᓂ ᐃᓕᓐᓂᐊᕌᓂᒍᒪᓕᕐᖢᓂ ᐃᓱᓕᑦᑎᓗᓂᓗ, ᐃᓱᓕᖦᖢᓂ ᐅᐱᒋᔭᐅᓂᕐᒧᑦ ᑕᒪᒃᑮᓄᑦ ᐊᕐᕌᒍᓄᑦ ᐊᒻᒪ ᑏᓐ ᑎᑎᕋᖅᓯᒪᔭᖏᓐᓂ.

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᔪᓄᑦ ᓄᓇᒥᓂᒃ ᕿᒪᐃᔪᒪᓂᕐᒥᒃ ᐃᓕᓐᓂᐊᕋᓱᒍᒪᓪᓗᓂ ᐃᒪᓐᓇᐃᑦᑑᕗᖅ, "ᑕᐃᒪᐃᓪᓗᓂ, ᐱᓗᐊᙳᐊᖅᖢᓂ ᒪᒃᑯᒃᑎᓪᓗᑎᑦ. ᓄᓇᕐᔪᐊᖅ ᑕᑯᓗᒍ. ᖃᐅᔨᓗᒋᑦ ᓄᑖᑦ ᐱᕕᖃᙱᑐᐃᓐᓇᕆᐊᖃᖅᑕᑎᑦ ᐅᐊᑦᑎᐊᕈᒃᑲᓐᓂᖅ ᑖᒃᑯᓂᖓ ᑲᒪᒋᔭᒃᓴᖃᓕᕈᕕᑦ... ᐱᒻᒪᕆᐅᓱᒋᕙᕋᓕ ᓇᒻᒥᓂᖅ ᐱᓐᖏᑲᐃᓐᓇᕐᓗᓂ... ᐊᖏᕐᕋᐃᓐᓇᐅᔭᕈᓐᓇᖅᑐᑎᑦ. ᐊᖏᕐᕋᖅ ᑕᐃᑲᓃᓐᓂᐊᖅᑐᖅ ᑭᖑᓂᐊᒍᑦ."

ᑎᒥᓕᕆᓂᖅ ᓯᕗᓪᓕᖅᐹᖑᓪᓗᓂ ᐱᓕᕆᐊᕆᔪᒪᓕᓚᐅᖅᑕᖓ ᐃᓕᓐᓂᐊᕆᐊᕋᒥ, ᐱᙳᐊᖅᑎᐅᓚᐅᕐᒪᑦ ᐃᓅᓯᓕᒫᖓᓂ ᐊᒻᒪ ᐃᖃᐃᓕᓴᕐᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓗᓂ ᐃᓅᓂᕐᒧᑦ. ᖃᐅᔨᓴᖅᑐᓕᕆᓂᖅ ᓴᓐᖏᔫᓚᐅᓐᖏᓚᖅ ᐊᒻᒪᓗ ᐊᓯᔾᔩᔪᒪᓕᓚᐅᖅᑐᖅ ᐃᖅᑭᓖᑦ ᐃᓕᓐᓂᐊᕐᓂᖏᓐᓄᑦ, ᑕᒪᓐᓇ ᐊᐅᓚᓂᖃᑦᑎᐊᓚᐅᖅᑐᖅ ᑎᑎᕋᑦᑎᐊᕐᓂᖓᓄᑦ.

ᐃᓕᓐᓂᐊᖅᓯᒪᔪᖅ ᒧHᐋᒃ ᐅᖃᐅᓯᕐᒥᑦ ᐃᓚᐅᓕᕐᖢᓂᓗ ᐊᕐᕌᒍᒧᑦ ᓴᓂᕐᕙᒃᓯᒪᔭᖓᓄᑦ ᖁᕝᕙᕆᐊᕈᑎᓂᑦ ᐊᑐᖅᑕᐅᔪᓐᓇᖅᑐᓂᑦ ᐱᔭᕇᕈᓯᐊᖓᓄᑦ. ᐱᕈᖅᓴᓚᐅᙱᑦᑐᖅ ᐅᖃᓪᓚᒃᖢᓂ ᐅᖃᐅᓯᕐᒥᓂᒃ ᓲᖃᐃᒻᒪ ᐊᓈᓇᖓ ᐃᓕᑦᑎᓚᐅᙱᒻᒪᑦ ᐱᕈᖅᐸᓪᓕᐊᓂᕐᒥᒃ. ᐃᖅᑲᐅᒪᔪᓐᓇᕐᓂᓕᒫᒥᓂᒃ, ᒪᒃᓚᐅᑦ ᐱᒋᐊᕈᒪᓪᓚᕆᓚᐅᕐᒪᑦ ᐱᒋᐊᕐᕕᒋᓯᒪᔭᒥᓂᒃ.

ᐃᓱᒪᖅᓱᕐᖢᓂ, ᒪᒃᓚᐅᑦ ᐃᖃᐃᓕᓴᕐᕕᓕᐊᕐᖢᓂ ᐊᒃᓱᕈᕐᓇᖅᑐᒃᑰᓗᐊᕈᓐᓃᕐᖢᓂ ᐱᖓᓱᐃᕐᖢᓂ ᐱᓇᓱᐊᕈᓯᕐᒥ. ᐃᒐᖃᑦᑕᖅᑐᖅ ᐊᒻᒪᓗ ᓂᐅᕕᐊᒃᓴᖃᖃᑦᑕᖅᑐᖅ ᐱᐅᓴᖅᓯᒪᔪᓂᒃ ᑮᒃᓂᒃ ᓴᓂᐊᒍᑦ ᓇᖕᒥᓂᕆᔭᖓᑕ, 6-ᖑᔪᑦ Nations Cake-ᑯᑦ, ᖁᕕᐊᒋᔭᖓ ᐊᒻᒪᓗ ᐊᑭᓖᑉᓗᓂ ᑮᓇᐅᔭᓂᒃ. ᓇᒻᒥᓂᖃᓚᐅᖅᑐᖅ ᕿᑐᑦᑐᒐᐅᔭᓂᑦ ᐃᓅᑎᓪᓗᒍ ᓛᒃ ᓯᓪᒥ ᐊᒻᒪᓗ ᐃᓕᓐᓂᐊᑎᑦᑎᓪᓗᓂ ᐃᓄᓐᓂᑦ ᖃᓄᑐᐃᓐᓇᖅ ᐅᑭᐅᖃᖅᑐᓂᑦ ᖃᓄᖅ ᕿᑐᑦᑐᒐᐅᔭᕐᒥᑦ, ᓱᕈᓯᕐᓂᑦ ᐃᓄᓐᓄᑦ 1950-ᖏᓐᓂᑦ, ᐊᒥᓱᑦ ᐃᖅᑭᓖᑦ. ᒫᓐᓇ ᐃᓕᓴᐃᖃᑦᑕᓕᖅᑐᖅ ᕿᑐᑦᑐᒐᐅᔭᓂᒃ ᖃᕋᓴᐅᔭᒃᑯᑦ ᑲᓲᑎᓯᒪᓂᒃᑯᑦ ᐅᑭᐅᖅᑕᖅᑐᒥ.

ᕿᑐᑦᑐᒐᐅᔭᐅᓪᓗᓂ, ᒥᑕᐅᑎᖃᖅᑐᓂ ᐊᒻᒪᓗ ᐸᓖᓯᐅᓪᓗᓂ, ᐱᕈᐃᓚᐅᖅᑐᖅ ᐱᐅᖏᓐᓂᕋᐃᓪᓗᓂ. ᐊᓈᓇᐅᓪᓗᓂ, ᐃᓚᒥᓂᒃ ᐱᕈᖅᓴᐃᔪᖅ ᐃᓕᓐᓂᐊᖅᑎᐅᓪᓗᓂᓗ, ᖃᐅᔨᒪᓂᕆᔭᖓᑦ ᒪᒃᕼᐊᒃ ᐅᖃᐅᓯᖓᓂ. ᓴᐳᔾᔨᓚᐅᖅᑐᖅ ᓛᒃ ᓯᓪ ᓄᓇᓕᖓᓂᒃ ᐊᒻᒪᓗ ᓱᕈᓯᖏᓐᓂᒃ ᓄᓇᒋᔭᖓᓂ ᐊᒻᒪᓗ ᐅᓪᓗᒥᐅᓕᖅᑐᖅ ᓴᐳᔾᔨᔪᖅ ᓇᒻᒥᓂᖅ ᓄᑕᕋᒥᓂᒃ. ᐸᓖᓯᐅᓚᐅᖅᓯᒪᔪᖅ, ᕿᑐᑦᑐᒐᐅᔭᖅ, ᐱᖑᔭᕿ ᐊᒻᒪ ᐊᓈᓇᐅᔪᖅ, ᓴᐳᔾᔨᔪᖅ ᐊᒻᒪ ᐱᔨᑦᑎᖅᑐᓂ ᐱᐅᓴᖅᑐᓂᑦ ᑮᒃᓂᑦ ᐊᒻᒪ ᖁᕕᐊᒋᔭᖃᖅᑐᓂ ᓰᕐᓇᖅᑐᓂᑦ ᓯᕗᓂᔅᓴᑎᓐᓂᑦ ᖃᓂᑦᑐᒥᑦ ᐊᖏᕐᕋᒧᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.