ᑲᐃᑦ-ᓕᓐ ᓇᐸᓈᓄᑯᐊᑦ ᓴᑦᐳᕆᐅᑉ ᖃᓂᒋᔮᓂᙶᖅᓯᒪᔪᖅ, ᑭᓯᐊᓂ ᐱᓕᕆᐊᕆᕙᒃᑕᖏᑦ ᐃᑲᔪᖅᓯᒪᕗᑦ ᑕᑯᔪᓐᓇᕐᓂᕐᒥᒃ ᖁᕕᐊᒋᔭᖃᕐᓂᕐᒥᒡᓗ ᓇᒧᙵᐅᑲᑕᖕᓂᕐᒥᒃ ᓄᓇᕐᔪᐊᓕᒫᒥ. ᐊᓈᓇᖓ ᐊᓂᓯᓇᐱᐅᑉ ᐊᑖᑕᖓᓗ Serpent River-ᒥᐅᑕᐅᓪᓗᓂ. ᐱᕈᖅᓴᓪᓗᓂ, ᓇᒧᙵᕈᓘᔭᕈᓘᔭᖅᐸᓚᐅᖅᐳᖅ, ᐃᑲᔪᖅᐸᒃᖢᓂᐅᒃ ᓱᖏᐅᑎᕙᓪᓕᐊᓪᓗᓂ ᓄᑖᓄᑦ ᐊᕙᑎᓄᑦ ᐊᓯᔾᔨᕈᓐᓇᑦᑎᐊᖅᖢᓂᓗ ᐱᕙᒌᔭᖅᓯᒪᔭᒥᓄᑦ. ᒫᓐᓇᓕ, ᐃᖅᑲᓇᐃᔭᓕᖅᐳᖅ ᐱᔨᑦᑎᕋᕐᓂᕐᒧᑦ ᑐᑭᒧᐊᖅᑎᑦᑎᔨᐅᓪᓗᓂ ᐃᐅ ᑲᓇᑕᒃᑯᓐᓂ, ᑕᒪᓐᓇᓗ ᑐᑭᖃᖅᖢᓂ ᓯᕗᓕᖅᑎᒋᔭᐅᓪᓗᓂ ᖃᖓᑕᓲᒥ ᐱᔨᑲᑖᖑᓪᓗᓂ ᖃᖓᑕᓂᐅᔪᒥ.

ᑭᖑᒧᑦ ᑕᐅᑐᒃᖢᒍ ᐃᓕᓐᓂᐊᕐᓂᕆᓚᐅᖅᓯᒪᔭᖓ ᐊᒻᒪ ᐱᓕᕆᔨᒻᒪᕆᐅᓂᕐᒥᓄᑦ ᐊᑐᖅᓯᒪᔭᖓ, ᓇᐸᓈᓄᑯᐊᑦ ᒍᕇᑦ 11-ᒦᑎᓪᓗᒍ ᐱᐊᓂᒃᓯᓚᐅᖅᐳᖅ ᐅᖃᐅᓯᕐᒥᒃ ᑕᐅᖅᓰᖃᑎᖃᕐᓂᕐᒥᒃ ᔮᒪᓂᒥ ᐊᕐᕌᒍᓕᒫᒧᑦ, ᓄᒃᑕᕐᓂᕐᒧᑦ ᐱᐅᒃᓴᓕᕈᑎᒋᓕᖅᖢᓂᐅᒃ. ᓯᕗᓪᓕᖅᐹᑦᑎᐊᒥ ᖃᖓᑕᓲᒧᑦ ᐃᑭᒋᐅᓚᐅᖅᐳᖅ ᐊᒻᒪ ᔮᒪᓂᑐᒥ ᐅᖃᓪᓚᒍᓐᓇᙱᖦᖢᓂ. ᖃᐅᔨᒪᓚᐅᙱᑦᑐᖅ ᖃᑕᙳᑎᖏᓐᓂᒃ ᐃᒡᓗᒥᐅᖃᑎᖃᕐᓂᐊᖅᑕᒥᓂᒃ. ᐃᓱᓕᒃᑲᒥ ᐱᓕᕆᓂᕆᓚᐅᖅᑕᖓ, ᐅᑎᓚᐅᖅᐳᖅ ᔮᒪᓂᒥᑦ, ᐱᔭᕇᖅᓯᓪᓗᓂ ᖁᑦᑎᖕᓂᓕᖕᒥ 12-ᒥ ᓯᓚᑦᑐᖅᓴᕐᕕᒡᔪᐊᒧᐊᑲᐅᑎᒋᓪᓗᓂᓗ.  ᐃᓕᓐᓂᐊᓚᐅᖅᑐᖅ ᐅᖃᐅᓯᓕᕆᓂᕐᒥᒃ ᐊᒻᒪ ᐃᓱᒪᓕᕆᓂᕐᒥᒃ, ᐸᕐᓇᐃᓪᓗᓂ ᐃᓕᓴᐃᔨᐅᔪᒪᓪᓗᓂ ᑕᕆᐅᑉ ᐊᑭᐊᓂ. ᐱᖓᔪᒋᓕᖅᑕᖓᓂ ᐊᕐᕌᒍᖓᓂ, ᐃᖅᑲᓇᐃᔮᖅᑖᖅᑎᑕᐅᓚᐅᖅᐳᖅ Niagara District School Board−ᑯᓐᓄᑦ ᐃᑲᔪᖅᑎᐅᓪᓗᓂ ᐃᓕᓐᓂᐊᕐᕕᖕᒥ ᐃᓕᓴᐃᔨᐅᓪᓗᓂ, ᐱᓕᕆᖃᑎᖃᖅᖢᓂ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ.

ᓃᐸᓈᓄᑯᐊᑦ ᑕᐃᑲᓂ ᐃᖅᑲᓇᐃᔭᓚᐅᖅᐳᖅ ᐊᕐᕌᒍᓄᑦ ᑎᓴᒪᓄᑦ ᖃᐅᔨᓕᓚᐅᖅᐳᕐᓗ ᑕᕆᐅᑉ ᐊᑭᐊᓄᑦ ᐊᐅᓪᓚᑐᐃᓐᓇᕆᐊᖃᙱᓐᓂᖓᓂᒃ ᐃᓕᓴᐃᔨᐅᔭᖅᑐᕐᓗᓂ ᓲᖃᐃᒻᒪ ᐃᖢᕐᕆᑦᑎᐊᕋᒥ ᐊᒻᒪ ᑐᑭᖃᑦᑎᐊᖅᑐᓂᒃ ᐱᖃᓐᓇᕆᔭᖃᖅᖢᓂ. ᑕᐃᑲᓂᑦᑕᐃᓐᓇᖅ, ᓯᓚᑦᑐᖅᓴᕐᕕᒡᔪᐊᕐᒥ ᐊᓂᒍᐃᓚᐅᖅᐳᖅ ᐊᒻᒪ ᐃᓕᓐᓂᐊᖃᑕᐅᔪᓐᓇᐃᓪᓕᓪᓗᓂ. ᐅᑎᕈᒪᙱᖦᖢᓂ ᓴᑦᐳᕆᒧᑦ, ᐱᓇᔪᓚᐅᖅᐳᖅ ᐃᖅᑲᓇᐃᔮᒃᓴᓕᒫᓄᑦ ᐊᒻᒪ ᐃᐊ ᑲᓇᑕᒃᑯᑦ ᐃᓚᒋᔭᐅᓚᐅᖅᐳᖅ. ᐅᖄᓚᕕᐅᒃᑲᓐᓂᓚᐅᖅᐳᖅ, ᐊᐱᖅᓱᖅᑕᐅᓪᓗᓂ, ᐱᓕᒻᒪᒃᓴᖅᑎᑕᐅᓪᓗᓂ ᐊᒻᒪ ᖃᖓᑕᓲᒥ ᐱᔨᑲᑖᖑᓕᖅᖢᓂ.

ᖃᖓᑕᓲᒥ ᐱᔨᑲᑖᖑᓪᓗᓂ, ᓇᐸᓈᓄᑯᐊᑦ ᐊᐅᓪᓚᕈᓐᓇᖅᓯᓚᐅᖅᐳᖅ ᑎᐅᓪᕼᐃᒧᑦ, ᔮᒪᓂᒧᑦ, ᕗᕌᓐᔅᒧᑦ, ᓚᓐᑕᓐᒧᑦ, ᐊᒥᐊᓕᒐᐃᑦ ᓂᒋᐊᓄᑦ, ᐊᒥᐊᓕᑲᓄᑦ ᐊᒻᒪ ᑲᓇᑕᓕᒫᒧᑦ. ᐃᖅᑲᓇᐃᔮᒥᓂᒃ ᐊᑲᐅᓯᕚᓪᓕᓚᐅᖅᐳᖅ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᕐᕕᒋᔭᒥᓂ. ᖁᕕᐊᓱᑦᑎᐊᓚᐅᖅᐳᖅ ᐋᖅᑭᒃᓱᐃᓪᓗᓂᓗ ᐱᓕᕆᐊᒃᓴᒥᓂᒃ ᖁᕕᐊᒋᔭᒥᓂᒃ.

"ᑕᕝᕙᓂ ᐱᓕᕆᓂᐅᔪᒥ, ᑭᒃᑯᓕᒫᓄᑦ ᑐᕌᖓᔪᖃᖅᐳᖅ. ᕿᑐᕐᙵᖃᕈᕕᑦ ᐊᖏᕐᕋᕐᓂ, ᐅᓐᓄᐊᓕᒫᖅ ᐃᖅᑲᓇᐃᔭᕈᓐᓇᖅᑐᑎᑦ. ᐱᓇᓱᐊᕈᓯᐅᑉ ᓄᙳᐊᓂ ᐃᖅᑲᓇᐃᔭᕈᓐᓇᖅᐳᑎᑦ. ᐃᖅᑯᒻᒪᒃᓴᕋᐃᒃᑯᕕᑦ, ᐅᓪᓛᒃᑯᑦ ᖃᖓᑕᓲᖃᖅᐸᒃᐳᒍᑦ... ᓄᓇᕐᔪᐊᓕᒫᒥ ᓇᒧᙵᐅᕈᓘᔭᕈᒪᒍᕕᑦ, ᑕᐃᒪᐃᑦᑐᖃᕆᕗᒍᑦᑕᐅᖅ," ᐅᖃᓚᐅᖅᐳᖅ ᓇᐸᓈᓄᑯᑦ. ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ, ᐃᖅᑲᓇᐃᔭᕈᓐᓃᖅᑎᑕᐅᓚᐅᖅᐳᖅ ᐊᒻᒪ ᐃᖅᑲᓇᐃᔭᖅᖢᓂ ᓇᐅᑦᑎᖅᓱᖅᑎᐅᓪᓗᓂ ᐅᔭᕋᖕᓂᐊᕐᕕᖕᒥ ᑭᓯᐊᓂ ᐃᖅᑲᓇᐃᔭᖁᔭᐅᒃᑲᓐᓂᓕᓚᐅᖅᐳᖅ. ᐃᖅᑲᓇᐃᔭᓚᐅᖅᐳᖅ ᐊᕐᕌᒍᓕᒫᒥ ᖁᕝᕙᕆᐊᖅᑕᐅᓚᐅᙱᓐᓂᖓᓂ ᐱᔨᑦᑎᕋᕐᓂᕐᒧᑦ ᑐᑭᒧᐊᖅᑎᑦᑎᔨᐅᓂᕐᒧᑦ, ᐃᖅᑲᓇᐃᔮᕆᓯᒪᓕᖅᑕᖓ ᐊᕐᕌᒍᓄᑦ ᐱᖓᓱᓄᑦ.

ᓇᐸᓈᓄᑯᐊᑦ ᐅᖃᐅᔾᔨᒋᐊᕈᓐᓇᖅᐸᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᖏᕐᕋᒥᓂ ᐊᐅᓪᓚᕈᓐᓇᖅᑐᓄᑦ ᐃᒪᓐᓇᐅᓇᔭᖅᐳᖅ, "ᐊᑏ. ᐊᖏᕐᕋᒥ ᐱᒋᐊᕈᕕᑦ, ᓄᓇᕐᔪᐊᖅ ᐊᖏᔪᐊᓗᒃ ᑕᐅᑦᑐᖃᖅᐳᖅ. ᓇᒧᙵᐅᕙᓪᓕᐊᓕᕈᕕᑦ ᖃᐅᔨᕙᓪᓕᐊᓕᕈᕕᓪᓗ ᓄᑖᖑᓂᖅᓴᓂᒃ ᐃᓂᓂᒃ ᐊᔾᔨᒌᙱᑦᑐᓂᒡᓗ ᐃᓂᓂᒃ ᓇᒧᙵᐅᕙᓪᓕᐊᓂᕆᔭᕐᓂ, ᒥᑭᓐᓂᖅᓴᐅᖅᑰᔨᓇᔭᖅᐳᖅ ᑲᑉᐱᐊᓇᙱᓐᓂᖅᓴᐅᓗᓂᓗ. ᓄᑖᓂᒃ ᐱᖃᓐᓇᕆᔭᖅᑖᕐᓂᐊᖅᐳᑎᑦ, ᓄᑖᓂᒃ ᐃᓄᖕᓂᒃ ᑲᑎᖃᑎᖃᕐᓂᐊᖅᐳᑎᑦ, ᐃᓕᑦᑎᕙᓪᓕᐊᓂᐊᖅᐳᑎᓪᓗ ᓄᑖᒥ ᐃᓂᒋᓂᐊᓕᖅᑕᕐᓂᒃ. ᐊᑏ ᑕᐃᒪᐃᓕᐅᑐᐃᓐᓇᕆᑦ, ᓲᖃᐃᒻᒪ ᓄᓇᕐᔪᐊᖅ ᒥᑭᓐᓂᖅᓴᐅᓕᕐᓂᐊᕐᒪᑦ ᐊᒻᒪ ᐱᔪᒥᓇᕐᓂᖅᓴᐅᓕᕐᓗᓂ."

ᐊᓂᒍᖅᑎᑦᑎᓇᓱᒃᖢᓂ ᐊᔭᖅᑭᑦᑕᕈᑎᓂᒃ, ᓇᐸᓈᓄᑯᐃᑦ ᑕᐅᑐᒐᓱᒃᐸᒃᐳᖅ ᐊᑕᖏᕐᓗᒍ ᑕᐅᑐᒃᖢᒍ, ᑕᐅᑐᒃᖢᓂ ᑭᖑᓪᓕᖅᐹᖅᓯᐅᑎᒥᒃ ᖃᓄᐃᓕᖓᓂᐊᕐᓂᖓᓂᒃ ᐊᒻᒪ ᐱᕚᓪᓕᕈᑎᒃᓴᒥᒃ ᐅᑕᖅᑭᔪᒥᒃ. ᐊᑕᖏᖅᖢᒍ, ᐊᒃᓱᕈᕐᓇᖅᑐᑦ ᐊᒃᓱᕈᕐᓇᕈᓐᓇᕋᓗᐊᖅᑎᓪᓗᒋᑦ, ᐊᕕᒃᑐᖅᐸᒃᖢᓂᒋᑦ ᐱᓕᕆᐊᒃᓴᙳᖅᑎᖦᖢᓂᒋᑦ ᑭᓱᑐᐃᓐᓇᐃᑦ ᐊᐅᓚᑕᒃᓴᐅᓂᖅᓴᐅᖁᓪᓗᒋᑦ. "ᐊᕝᕕᐊᕈᑎᑕᖃᐃᓐᓇᐅᔭᕐᓂᐊᖅᑐᖅ ᐃᖏᕐᕋᓂᑦᑎᓐᓂ. ᑭᓱᑐᐃᓐᓇᕐᒥᒃ ᑕᑯᐃᓐᓇᐅᔭᕐᓂᐊᖅᐳᑎᑦ. ᑭᓱᑐᐃᓐᓇᖅ ᐃᖏᕐᕋᑦᑎᐊᖏᓐᓇᐅᔭᖅᐳᖅ, ᑐᑭᓕᐊᖅᑐᒥ ᐊᖅᑯᑎᖃᕐᓂᖅ ᑲᔪᓯᑦᑎᐊᕐᓂᕐᒧᑦ. ᖁᒻᒧᐊᑲᑕᖕᓂᐊᖅᐳᑎᑦ, ᐊᒻᒧᐊᑲᑕᒡᓗᑎᑦ ᓇᒧᙵᕈᓘᔭᑲᑕᒡᓗᑎᓪᓗ," ᐅᖃᓚᐅᖅᐳᖅ.

"ᐊᒥᓱᐊᓗᐃᑦ ᐃᓄᐃᑦ ᑕᖅᑳᓂ ᑕᑯᔪᒪᔪᑦ ᐃᓕᖕᓂᒃ ᑲᔪᓯᑦᑎᐊᕐᓂᕐᒥᒃ, ᑕᐃᒃᑯᐊᓗ ᑕᑯᔪᒪᙱᖦᖢᑎᒃ. ᓇᓂᓯᓗᑎᑦ ᑕᐃᒃᑯᓂᖓ ᐊᖅᑯᑎᒃᑰᕈᒪᔪᓂᒃ, ᐊᔾᔨᒌᓂᒃ ᐃᓱᒪᖃᖅᑐᓂᒃ ᐆᒻᒪᕆᖕᓂᖃᖅᑐᓂᒡᓗ ᐃᓚᒋᔭᐅᔪᒪᓇᔭᕐᓂᕐᓂᒃ. ᓇᓂᓂᐊᕋᕕᒋᑦ, ᐊᒻᒪ ᐱᔪᒥᒍᓱᖕᓂᐊᖅᑕᑎᑦ, ᐊᒻᒪ ᐃᓕᖕᓂᒃ ᐃᑲᔪᕐᓂᐊᖅᖢᑎᒃ ᐊᓂᒍᖅᑎᑦᑎᔪᓐᓇᕐᓂᕐᒥᒃ ᑕᒪᒃᑯᓂᖓ ᐊᔪᕐᓇᖅᑐᖅᓯᐅᕈᑕᐅᕙᒃᑐᓂᒃ," ᓃᐸᓈᓄᑯᐊᑦ ᐅᖃᕆᓪᓗᓂ.

ᓇᐸᓈᓄᑯᐊᑦ ᑐᓴᖅᑎᑦᑎᔪᓐᓇᖅᐸᑦ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᑎᑎᕋᕐᓗᒋᑦ ᐃᓱᒪᒋᔭᐅᔪᓕᒫᑦ, ᑐᕌᒐᓕᒫᑦ, ᑭᓱᓕᒫᑦᑎᐊᑦ ᐅᕙᓐᓂᒃ ᐱᔪᒪᓂᖃᖅᑐᑦ, ᐱᓕᕆᐊᕆᔪᒪᔭᒃᑲ ᐊᒻᒪ ᐱᐊᓂᒍᒪᔭᒃᑲ ᐃᓅᓯᑦᑎᓐᓂ, ᑕᐃᑲᙵᓪᓗ ᐱᒋᐊᓕᕐᓗᖓ." ᐊᑐᕈᒪᓇᔭᓚᐅᖅᑕᖏᑦ ᑖᒃᑯᐊ ᑎᑎᕋᖅᑕᕕᓂᖏᑦ ᖃᐅᔨᒪᔾᔪᑎᒋᓗᒋᑦ ᐊᓯᐅᓯᒪᓕᕌᖓᒥ ᐊᔪᕆᖅᓲᔾᔨᔪᒪᓂᕐᒧᑦ, ᑲᔪᖏᖅᓴᐃᓂᕐᒧᑦ ᐊᒻᒪ ᐃᓚᒋᐊᖅᓯᓂᕐᒧᑦ ᐱᔪᒪᓂᖃᓕᑐᐊᕋᒥ.

ᐃᓱᒪᒋᓪᓗᒍ ᖃᓄᐃᙱᑦᑎᐊᕐᓂᖓ ᖃᓄᐃᙱᑦᑎᐊᕐᓂᕐᓗ, ᓃᐸᓈᓄᑯᐊᑦ ᑕᐅᑐᒐᖃᓪᓗᐊᑕᖅᐸᒃᐳᖅ ᓇᖕᒥᓂᖅ ᐱᕕᒃᓴᒥᓂᒃ ᑕᖃᐃᖅᓯᑦᑎᐊᖅᐸᒃᖢᓂᓗ. ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑰᖅᐸᙱᖦᖢᓂ, ᑕᒪᓐᓇᓗ ᖃᐅᔨᕙᒃᖢᓂ ᓴᐃᓕᕚᓪᓕᕈᑎᒋᕙᒃᖢᓂᐅᒃ ᐃᓱᒪᒥᒍᑦ. ᖁᕕᐊᒋᔭᖃᖅᐳᖅ ᑲᑎᙵᔪᓐᓃᕈᓐᓇᕐᓂᕐᒥᒃ ᐃᖅᑲᓇᐃᔮᒥᓄᑦ ᑕᐃᒪᐃᑦᑕᕆᐊᖃᕌᖓᑦ "ᐃᖅᑲᓇᐃᔭᐃᓐᓇᕆᐊᖃᓕᕌᖓᒥ". ᑭᒡᓕᖃᑦᑎᐊᖅᐳᖅ ᑐᓴᐅᒪᖃᑎᒌᖕᓂᕐᒧᑦ ᐊᒻᒪ ᓯᕗᓪᓕᐅᔾᔨᕙᒃᖢᓂ ᓴᐃᓕᓂᕐᒥᒃ. ᒪᒥᓴᕆᐊᖅᐸᒃᐳᖅ ᐱᕙᒌᔭᖅᐸᒃᖢᓂᓗ ᐊᓯᔾᔨᖅᐸᓪᓕᐊᔪᓄᑦ ᓯᓚᒧᑦ ᐃᓅᓯᕆᔭᒥᓄᑦ.

ᐱᔪᒪᓕᑐᐊᕋᒥ, ᓃᐸᓈᓄᑯᐊᑦ ᕿᒥᕐᕈᐊᖅᐸᒃᐳᖅ ᐅᖃᓕᒫᒐᕐᓂᒃ ᓲᕐᓗ ᔮᒃ ᑳᓐᕕᐅᓪᑦ ᐅᖃᓕᒫᒐᓕᐊᕆᓯᒪᔭᖓᓂᒃ The Success Principles ᐊᒻᒪᓗ ᐊᓯᐊᓂᒃ ᐅᖃᓕᒫᒐᕐᒥᒃ ᑕᐃᔭᐅᔪᒥᒃ The Four Agreements. ᐹᑉ ᐳᕌᑦᑐ ᑐᙵᓱᒃᑎᑦᑎᓯᒪᕗᖅ ᓯᓚᑦᑐᖅᓴᕐᕕᒡᔪᐊᒦᑎᓪᓗᒍ. ᑖᒃᑯᐊ ᐱᕝᕕᐅᓯᒪᔪᑦ ᐋᖅᑭᒃᓯᓯᒪᕗᑦ ᐅᓪᓗᒥ ᐃᓅᓕᕐᓂᖓᓂᒃ.

ᓴᑦᐳᕆ ᓄᓇᒋᓚᐅᖅᓯᒪᔭᖓ, ᑭᓯᐊᓂ ᑲᐃᑦ-ᓕᓐ ᓇᐸᓈᓄᑯᐊᑦ ᑕᑯᔪᓐᓇᖅᓯᕙᒃᐳᖅ ᓄᓇᕐᔪᐊᕐᒥ ᐱᓕᕆᖃᑦᑕᕐᓂᖓᓄᑦ ᐱᔨᑦᑎᕋᕐᓂᕐᒧᑦ ᑐᑭᒧᐊᖅᑎᑦᑎᔨᐅᓪᓗᓂ ᐃᐅ ᑲᓇᑕᒃᑯᓐᓄᑦ. ᐃᓕᓴᐃᔨᐅᔪᒪᓚᐅᖅᓯᒪᕗᖅ ᑕᕆᐅᑉ ᐊᑭᐊᓄᑦ ᑭᓯᐊᓂ ᐸᕐᓇᒃᑕᖏᑦ ᐊᓯᔾᔨᓚᐅᖅᐳᑦ ᖃᖓᑕᓲᒥ ᐱᔨᑲᑖᖑᓕᖅᖢᓂ... ᐃᖅᑲᓇᐃᔮᖓ ᖁᕝᕙᖅᐸᓪᓕᐊᑐᐃᓐᓇᓚᐅᖅᐳᖅ ᑕᐃᑲᙵᑦ. ᐊᐅᓪᓚᕆᐅᓚᐅᖅᓯᒪᕗᖅ ᔮᒪᓂᒧᑦ ᒪᒃᑯᒃᑑᓪᓗᓂ ᒫᓐᓇᓗ ᓇᒧᙵᐅᔪᒪᒍᓂ ᓇᒧᙵᐅᔪᓐᓇᓕᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.