ᐃᖅᑲᓇᐃᔭᓯᒋᐊᓚᐅᖅᑐᖅ ᐅᔭᕋᖕᓂᐊᖕᓂᖕᒥᑦ ᒫᓐᓇᓗ ᐊᒃᓱᕈᒻᒪᕆᓕᕐᖢᓂ ᖁᕕᐊᒋᔭᒥᓄᑦ ᐃᓕᓐᓂᐊᖕᓂᖕᒥᑦ. ᑲᐃᓚ ᕉᔅᑎᔅᑭ-ᒥᐅᕋᔅᑎ ᑯᕇ ᐊᒻᒪ ᐊᓪᓚᑎᔅ ᐊᓈᓇᖓ ᒪᕐᕉᒃ. ᐱᕈᖅᓴᓚᐅᖅᓯᒪᔪᖅ Pinehouse Lake-ᒥ, ᓴᔅᑳᑦᓱᐊᓐᒥ, 500 ᑭᓚᒦᑕᓂᒃ ᓴᔅᑲᑑᓐ ᐅᐊᖕᓇᖓᓂ ᓅᓚᐅᖅᓯᒪᔪᖅ ᐊᕐᕌᒍᑦ 7 ᐊᓂᒍᖅᓯᒪᓕᖅᑐᑦ ᓯᓚᑦᑐᖅᓴᕐᕕᒡᔪᐊᓕᐊᖅᖢᓂ. ᐃᖅᑲᓇᐃᔭᖅᑐᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᒪᔨᐅᓪᓗᓂ ᐊᒃᑐᐊᓂᓕᖕᓄᑦ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ TakingITGlobal−ᒥ, ᐱᓕᕆᖃᑎᖃᖅᖢᓂ ᐊᕐᕕᓂᓕᖕᓂᒃ ᓄᓇᕗᒻᒥ−ᑐᙵᕕᓕᖕᓂ ᐃᓕᓐᓂᐊᕐᕕᖕᓂ. ᐃᓕᓴᐃᔨᒥᓂᒃ ᑲᑎᖃᑎᖃᓲᖅ, ᐃᓕᓐᓂᐊᕐᕕᖕᒥ ᐊᖓᔪᖅᑳᓂᒃ ᐊᒻᒪ ᐃᓕᓐᓂᐊᖅᑎᓂᒃ ᖃᐅᔨᓇᓱᒃᖢᑎᒃ ᑭᓱᓂᒃ ᐃᓕᑦᑎᕙᓪᓕᐊᖕᒪᖔᑕ ᐃᓱᒪᓕᐅᕆᔪᓐᓇᕐᓂᐊᕐᒪᑦ ᐃᓕᓐᓂᐊᖅᑕᒥᓂᒃ ᐱᐅᓇᔭᖅᑐᓂᒃ ᐃᓕᓐᓂᐊᖅᑕᖏᓐᓄᑦ. ᐊᒻᒪ ᓱᓕ, ᒪᒃᑯᒃᑐᒃᑯᕕᖕᒥ ᐃᖅᑲᓇᐃᔭᖅᑎᐅᓪᓗᓂ, ᒪᒃᑯᒃᑐᓂᒃ ᑎᒍᔭᐅᓯᒪᔪᓂᒃ ᓴᔅᑳᑦᓱᐋᓐ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᓪᓗᓂ.

ᐃᓕᓐᓂᐊᕆᐊᒃᑲᓐᓂᓚᐅᕋᓂ, ᕈᔅᑏᔅᑭ−ᒧᕋᔅᑎ ᐱᓕᕆᐊᖃᓚᐅᖅᑐᖅ ᐆᑕᕐᓇᖅᑐᓕᕆᔨᐅᓪᓗᓂ ᓄᖑᔪᐃᑦᑐᓄᑦ ᐅᔭᕋᖕᓂᐊᕐᕕᖕᒥᑦ. ᐃᖅᑲᓇᐃᔭᕐᖢᓂ ᐱᓇᓱᐊᕈᓯᖅ ᐊᑕᐅᓯᖅ, ᐊᑕᐅᓯᖅ ᐱᓇᓱᐊᕈᓯᖅ ᓄᖅᑲᖓᑎᓪᓗᒍ, ᐋᖅᑭᒃᓯᓪᓗᓂ ᐊᓯᔾᔨᕆᐊᖃᓕᕐᖢᓂ ᐸᓂᖓ. ᑐᙵᑦᑎᐊᒃᑲᓐᓂᕈᒪᓚᐅᖅᑐᖅ ᐊᖏᕐᕋᖅᓯᒪᓗᓂᓗ. "ᐃᓱᒪᒋᖅᑲᐅᕙᕋ, ᖃᓄᐃᒻᒪᑦ ᐃᓕᓴᐃᙱᒻᒪᖔᑦ? ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᖓ ᐅᔭᕋᑦᑕᕆᐊᓂᑦ ᐅᔭᕋᓐᓂᐊᕕᒻᒥ, ᐊᒻᒪ ᐃᓕᓐᓂᐊᖅᑎᑦᑎᓪᓗᖓ ᐱᓕᕆᐊᕆᔪᓐᓇᖅᑐᒋᓚᐅᖅᑕᕋ. ᖃᐅᔨᒪᓚᐅᖏᑦᑐᖓ, ᐃᓕᑦᑎᔭᕆᐊᖃᕐᔪᐊᖅᑐᖅ," ᐃᖅᑲᐅᒪᔪᖅ.

ᐃᖅᑲᓇᐃᔭᕆᐊᒃᑲᓐᓂᙱᖔᕐᓗᓂ ᕿᑐᕐᖓᖅᑖᕋᑖᓚᐅᖅᑎᓪᓗᒍ, ᕈᔅᑎᑭ-ᒥᐅᕋᔅᑎ ᐃᓕᓐᓂᐊᕆᐊᓚᐅᖅᐳᖅ ᐃᖅᑭᓖᑦ ᐃᓕᓴᐃᔨᕈᖅᓴᓂᕐᒧᑦ ᐃᓕᓐᓂᐊᕈᑎᒧᑦ ᓵᔅᑳᑦᓱᐋᓐᒥ ᓯᓚᑦᑐᓴᕐᕕᕐᔪᐊᕐᒥᑦ. ᐊᕐᕌᒍᓄᑦ ᑎᓴᒪᓄᑦ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ ᓄᓇᖃᖅᑳᖅᓯᒪᔪᓂᑦ, ᐊᓪᓚᖓᔪᓂᑦ ᐊᒻᒪ ᐃᓄᑦ ᐃᓗᓕᖏᓐᓂᑦ, ᖃᓂᑦᑐᒥᑦ ᓄᓇᓕᒻᒥᑦ ᐊᒻᒪ ᐃᑲᔪᒃᑲᓐᓂᓂᕐᒥᑦ, ᐱᓕᕆᐊᖅ ᐊᖏᕐᕋᖅᓯᒪᔫᔮᖅᑐᖅ. ᐃᓕᓐᓂᐊᕌᓂᖕᒪᑦ, ᕿᒪᐃᔪᒪᙱᖦᖢᓂ ᐃᑲᔪᖅᑐᐃᔾᔪᑎᒥᓂᒃ ᐱᕈᖅᑎᖦᖢᓂᐅᒃ, ᐊᓱᐃᓛᒃ ᑭᖑᕝᕕᖅᑎᑖᕐᖢᓂ ᐃᓕᓴᐃᔨᓄᑦ ᑎᑎᕋᖅᓯᒪᔪᓂ, ᐃᖅᑲᓇᐃᔭᓚᐅᑲᒃᑎᑦ ᐊᑎᖃᕐᕕᖏᓐᓂ ᒪᒃᑯᒃᑐᒃᑯᕕᖕᒥ ᐱᓇᔪᒃᖢᓂᓗ TakingITGlobal−ᒥ.

ᐃᓕᕋᓱᒃᑎᑕᐅᓕᓚᐅᖅᑐᖅ ᐱᓕᕆᔾᔪᑎᓕᕆᔪᓐᓇᑦᑎᐊᙱᓐᓂᖓᓄᑦ ᑭᓯᐊᓂ ᐱᔪᒃᓯᑎᑕᐅᓪᓗᓂ ᐱᕈᖅᓯᒪᓕᖅᖢᓂ ᐅᑭᐅᖅᑕᖅᑐᒥ, ᐱᓇᔪᒃᖢᓂ ᐃᖅᑲᓇᐃᔮᖃᓕᖅᖢᓂᓗ ᐊᕐᕌᒍᓄᑦ ᒪᕐᕉᖕᓄᑦ. ᓱᓕ ᐊᓯᔾᔩᖃᑦᑕᕐᑐᖅ ᒪᒃᑯᒃᑐᒃᑯᕕᖕᒥᑦ, ᑭᓯᐊᓂᓕ ᐅᓪᓗᓕᒫᖅ ᐃᖅᑲᓇᐃᔭᖅᖢᓂ ᐊᖓᔪᖅᑳᑦᑎᐊᕙᐅᓪᓗᓂᓗ ᑐᑭᖃᖅᖢᓂ ᐃᓱᒪᖅᓱᖅᖢᓂ.

ᐊᐳᖅᑕᕈᑎᖃᖅᑎᓪᓗᒍ ᐃᓅᓯᕐᒥᓂ, ᕈᔅᑎᑭ−ᒥᐅᕋᔅᑎ ᐊᓈᓇᙳᓚᐅᖅᑐᖅ ᒪᒃᑯᒃᑎᓪᓗᒍ. ᐃᕐᓂᖓ 17-ᖑᓚᐅᕐᒪᑦ ᓱᓕ ᐃᓕᓐᓂᐊᕐᕕᕐᔪᐊᕐᒦᑎᓪᓗᒍ ᐃᕐᓂᖓ ᐃᓕᓐᓂᐊᕆᐊᖃᑎᒋᓪᓗᓂᐅᒃ, ᓄᑦᑐᑦᑐᓂᐅᒃ ᓄᓇᓯᐅᑎᒥᓂᒃ ᐃᑦᓯᕚᖅᓱᓂ ᐱᔭᕇᕋᓱᐊᖅᓱᓂ ᖁᕝᕙᓯᓐᓂᓕᒻᒥᒃ 12-ᒥᒃ. ᓯᓚᑦᑐᓴᕐᕕᓕᐊᓚᐅᖅᑐᖅ ᐃᑲᕐᕌᓐᓂᒃ ᒪᕐᕉᓐᓂᒃ ᓄᓇᒥᓂᒃ ᐃᓕᓐᓂᐊᓚᐅᖅᑎᓪᓗᒍ ᑭᓯᐊᓂ ᐊᔅᓱᕈᕈᑎᖃᓚᐅᖅᑐᖅ ᑮᓇᐅᔭᓂᒃ ᐊᑐᖅᑐᔅᓴᓂᒃ ᐊᒻᒪᓗ ᐃᓕᓐᓂᐊᖅᑕᒥᓂᒃ ᑲᒪᒋᔭᖃᖅᑐᓂ.

ᓯᓚᑦᑐᖅᓴᕐᕕᒡᔪᐊᕐᒥ, ᐃᓕᑦᑎᓚᐅᖅᐳᖅ ᐊᑭᕋᖅᑐᕐᓂᕐᒥᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᓲᕐᓗ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐊᒻᒪ 60-ᓂᒃ 1960-ᖏᓐᓃᖦᖢᑎᒃ ᐊᒻᒪ ᓇᖕᒥᓂᖅ ᐱᕈᖅᓴᑎᖦᖢᓂᒋᑦ. "ᑭᖑᒻᒧᑦ ᑕᑯᒋᐊᓚᐅᖅᑐᖓ ᖃᓄᖅ ᐱᕈᖅᓴᓚᐅᖅᓯᒪᖕᒪᖔᕐᒪ, ᐃᓕᑦᑎᔭᕆᐊᖃᓚᐅᖅᑐᖓᓗ ᐊᓂᒍᐃᔪᓐᓇᕐᓂᕐᒥᑦ ᑐᑭᓯᐅᒪᓂᕐᒥᒡᓗ ᐃᒻᒪᖄ ᐊᖓᔪᖅᑳᒃᑲ ᐱᕈᖅᓴᓚᐅᖅᓯᒪᙱᓐᓂᖏᓐᓂᑦ ᖃᓄᐃᙱᑦᑐᑎᒍᑦ, ᐃᓕᑦᑎᔭᕆᐊᖃᓚᐅᖅᖢᑎᒡᓗ ᐅᐸᒃᑕᒥᓂᒃ," ᐊᒃᑐᐊᓂᖃᖅᑐᖅ. ᐃᓕᑦᑕᕆᐊᖃᓚᐅᖅᑐᖅ ᐊᒻᒪᓗ ᐃᓕᓐᓂᐊᑲᓐᓂᖅᑐᓂ ᖃᓄᖅ ᐊᖓᔪᖅᑳᑦᑎᐊᕙᐅᓂᕐᒥᒃ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᓱᒪᔪᓄᑦ ᐊᐅᓪᓚᕈᒪᓗᑎᒃ ᓄᓇᒥᓂᒃ ᐃᒪᓐᓇᐅᔪᖅ, "ᐃᓱᒪᒋᒍᕕᐅᒃ ᐊᐅᓪᓚᕆᐊᒃᓴᖅ, ᐱᑐᐃᓐᓇᕐᓗᒍ ᐱᓕᕆᐊᕆᑐᐃᓐᓇᕐᓗᒍᓗ. ᑭᓱᓕᒫᑦ ᖃᐅᔨᒪᔭᐃᓐᓇᕆᔭᕆᐊᖃᙱᓐᓇᕕᒋᑦ. ᐃᓕᓐᓂᐊᓚᐅᖅᑐᖓ ᐊᑯᓂᐅᙱᑦᑐᖅ, ᐊᓯᔾᔨᕈᒪᓕᕐᐳᖓᓗ ... ᖃᓄᐃᙱᑦᑐᖅ ᐃᓱᒪᐃᑦ ᐊᓯᔾᔨᕆᐊᒃᓴᖅ... ᑲᑎᑉᐸᒡᓗᒋᑦ ᐃᓄᐃᑦ ᐃᓱᒪᒥᐅᑕᓖᑦ, ᐃᓕᖕᓂᒃ ᐃᑲᔪᕋᔭᖅᑐᓂᒃ. ᐊᖏᕐᕋᖅᓯᓂᐊᕋᕕᑦ. ᐃᓛᓐᓂᒃᑯᑦ ᐃᓄᑑᓗᐊᓕᓲᑦ. ᐃᓕᑦᑎᒋᐊᕐᓗᑎᑦ ᑮᓇᐅᔭᑎᑦ ᐊᑐᖅᑐᒃᓴᑦᑎᐊᕙᖕᓂᑦ... ᐃᓕᑦᑎᓗᑎᑦ ᐊᑭᓕᒃᓴᓂᒍᓐᓇᐅᑎᑦ ᐊᐅᒃᑕᔫᑦ ᐊᒻᒪ ᕿᑐᕐᖏᐅᕈᑎᑦ ᒥᒃᓵᓄᑦ... ᑮᓇᐅᔭᑲᓪᓚᖕᓂ ᐊᑐᑐᐃᓐᓇᙱᓪᓗᑎᑦ ᐊᑭᓖᒃᑲᓐᓂᕆᐊᖃᕋᓱᒋᙱᑕᕐᓂᒃ... ᐃᓚᑎᑦ ᐃᓚᑎᓪᓗ ᑐᓴᐅᒪᑏᓐᓇᕐᓗᒋᑦ, ᖃᐅᔨᒪᑐᐃᓐᓇᕐᓗᓯᓗ ᓄᓇᖅᑲᑎᓯ ᑕᐃᑲᓃᖏᓐᓇᐅᔭᕐᒪᑦ ᐅᑎᑐᐃᓐᓇᕆᐊᖃᓕᕈᕕᑦ ᐊᒻᒪ ᓇᓗᓇᙱᑦᑐᖅ ᑕᓖᒃᑭᒃ ᒪᑐᐃᖓᓗᑎᒃ ᑐᙵᓱᒃᑎᑦᑎᓂᐊᖅᑐᑦ. ᑲᑉᐱᐊᓱᙱᓪᓗᑎᑦ ᑲᔪᓯᙱᑦᑕᕆᐊᒃᓴᖅ ᓄᖅᑲᕈᕕᑦ ᐱᔭᕇᕈᓐᓇᙱᓪᓗᑎᓪᓗ ᐃᓕᓐᓂᐊᒐᒃᓴᒥᒃ ᑭᓱᒧᒃᑭᐊᖅ ᐱᔾᔪᑎᖃᕐᓗᑎᑦ. ᖃᓄᐃᓐᖏᑦᑐᖅᑕᐅᖅ. ᐊᔪᓕᖅᑐᐃᓐᓇᐅᓚᐅᖅᑐᒍᑦ." ᐊᑐᓕᖁᔨᖃᑦᑕᕐᒥᔪᖅ ᖃᐅᔨᓴᕐᓂᕐᒧᑦ ᑲᑎᙵᐅᖅᑐᓂᑦ ᐃᓕᓐᓂᐊᕐᓂᕐᒧᑦ ᐃᓅᖃᑎᒌᓐᓂᕐᒧᓪᓗ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ ᐃᒪᐃᓐᓇᔭᖅᑐᖅ "ᖁᕕᐊᓱᒡᓗᑎᑦ ᓇᒡᓕᒋᓗᑎᓪᓗ ᐊᑦᑕᕐᓇᖅᑐᒦᙱᖦᖢᑎᓪᓗ. ᐃᓱᒪᔪᖓ ᐊᒥᓱᑦ ᐊᖑᑏᑦ ᐊᕐᓇᐃᓪᓗ, ᐊᒃᓱᕉᑎᖃᖃᑦᑕᕋᑦᑕ ᓇᖕᒥᓂᖅ ᐊᑑᑎᖃᕐᓂᕐᒥᒃ, ᐊᒻᒪᓗ ᐊᔾᔨᒌᙱᑦᑐᓂᒃ ᐊᖅᑯᑎᖃᕐᓗᑕ ᐊᒻᒪᓗ ᐱᖃᓐᓇᕇᖕᓂᖃᕐᓗᑕ ᐅᕝᕙᓘᓐᓃᑦ ᐱᖃᑎᖃᕐᓗᑕ ᐃᓄᖕᓂᒃ ᐃᒻᒪᖃ ᐱᓯᒪᔭᕆᐊᖃᙱᑕᑦᑎᓐᓂᒃ ᓲᖃᐃᒻᒪ ᐊᖏᕐᓂᖏᓐᓄᑦ, ᑭᓯᐊᓂ ᐃᖅᑲᐅᒪᑐᐃᓐᓇᕐᓗᑎᑦ ᓇᒡᓕᖕᓂᖃᕐᓂᕐᓂᒃ ᖁᕕᐊᓱᖕᓂᕐᒥᒡᓗ ᐊᒻᒪᓗ ᐃᓕᓴᖅᓯᓇᓱᒡᓗᑎᑦ ᐱᐅᔪᓂᒃ ᐃᓄᖕᓂᒃ ᐃᓅᓯᕐᓂ."

ᕿᓂᖅᖢᓂ ᓇᑭᙶᕈᓘᔭᖅᑐᓂᒃ ᐱᔪᒃᓯᑎᑦᑎᕙᖕᒪᖔᑦ, ᕌᔅᑭ−ᒥᐅᕋᔅᑎ ᐱᔪᒃᓯᑎᑕᐅᕗᖅ ᖃᑦᑎᕆᔨᑦ ᐅᖃᖃᑎᒌᒃᑎᓪᓗᒋᑦ ᐅᓂᒃᑳᖅᐸᒃᖢᑎᒡᓗ ᓴᐱᓕᖅᓴᕋᐃᙱᓐᓂᕐᒥᒃ ᐊᒻᒪ ᓴᐱᓕᖅᓴᕋᐃᙱᓐᓂᕐᒥᒃ. ᕿᑐᕐᖓᒥᓂᒃ ᐱᖃᑎᖃᕆᐊᒃᓴᖅ ᐊᓕᐊᓇᐃᒋᔭᖃᑦᑎᐊᖅᑐᖅ ᐊᒻᒪ ᕿᑐᕐᖓᒥᓂᒃ ᐃᓕᓐᓂᐊᖅᖢᓂ. ᐱᔪᒪᓂᖃᑦᑎᐊᖅᑐᖅ ᐃᓄᖕᓄᑦ ᐅᖃᖃᑎᒌᒍᑎᓄᓪᓗ.

ᐃᓱᒪᖓ ᖃᐅᔨᒋᐊᖃᑦᑕᖁᓪᓗᒍ ᓇᓗᓇᖅᑐᒃᑰᖅᑎᓪᓗᒍ, ᕈᔅᑭ−ᒥᐅᕋᔅᑎ ᐊᔪᕈᓐᓃᖅᓴᖃᑦᑕᖅᑕᖏᑦ ᖁᔭᓕᔾᔪᑎᒋᕙᒡᓗᒋᑦ ᐅᓪᓛᑕᒫᑦ. smuds, ᑐᒃᓯᐊᖅᑎᑦᑎᓪᓗᓂ ᖁᔭᓕᓪᓗᓂᓗ. ᐊᑐᖅᖢᓂ ᐊᓂᖅᓵᖅᑐᕐᓂᕐᒧᑦ ᐊᑐᖅᑕᐅᕙᒃᑐᓂᒃ ᐱᖃᓐᓇᕆᔭᒥᓄᑦ, ᐱᓕᕆᖃᑎᒋᕙᒃᑕᒥᓄᑦ ᐱᓕᕆᔨᓪᓚᕆᐅᓂᕐᒧᓪᓗ ᐃᑲᔪᖅᑐᖅᑕᐅᓂᕐᒥᒃ ᐃᑲᔪᖃᑦᑕᖅᓯᒪᒋᕗᖅᑕᐅᖅ. ᐃᒃᐱᒋᔭᖏᑦ ᐅᐱᒋᓗᒋᑦ, ᐃᒻᒥᓂᒃ ᓂᔾᔭᐅᓯᒪᓗᑎᑦ, ᑐᓴᕐᓈᕐᓗᑎᑦ, ᐅᕕᓂᖕᓂᐊᕐᓗᑎᑦ, ᓇᑉᐸᖅᑕᓂᑦ ᐃᑯᒻᒪᒃᑎᑦᑎᓗᑎᑦ, ᒧᒥᕐᓗᑎᑦ ᐊᒻᒪ ᖃᓱᖓᑎᑦᑎᓗᑎᑦ ᐊᓯᒋᒻᒥᔭᖏᑦ.

ᐃᖅᑲᓇᐃᔭᓯᒋᐊᓚᐅᖅᑎᓪᓗᒍ ᐅᔭᕋᖕᓂᐊᖕᓂᖕᒥᑦ, ᒫᓐᓇ ᑲᐃᓚ ᕉᔅᑭ−ᒥᐅᕋᔅᑎ ᐊᒃᓱᕈᒻᒪᕆᓕᖅᑐᖅ ᐃᓕᓐᓂᐊᖕᓂᓕᕆᓂᖕᒥᑦ. ᓄᑖᒥ ᐱᓕᕆᐊᒃᓴᖓᓂ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᕐᒧᑦ ᑲᒪᔨᐅᓪᓗᓂ ᐊᒃᑐᐊᓂᓕᖕᓄᑦ ᐅᑭᐅᖅᑕᖅᑐᒥ ᐱᓕᕆᐊᒃᓴᓄᑦ TakingItGlobal−ᒥ ᒪᒃᑯᒃᑐᓄᓪᓗ ᐱᓕᕆᕝᕕᖕᒥ ᐃᖅᑲᓇᐃᔭᖅᑎ ᐱᓕᕆᖃᑎᖃᖅᖢᓂ ᒪᒃᑯᒃᑐᓂᒃ ᑎᒍᔭᐅᓯᒪᔪᓂᒃ, ᐋᖅᑭᒃᓯᔪᖅ ᓄᑖᒥᒃ ᐱᓕᕆᔨᒻᒪᕆᐅᓂᕐᒧᑦ ᐃᓅᓯᖃᕐᓂᕐᒥᒃ ᐃᑲᔪᕐᓂᕐᒥᒃ ᒪᒃᑯᒃᑐᓂᒃ. ᐅᕕᒃᑲᐅᓗᐊᖅᑐᐊᓘᓪᓗᓂ ᐊᒻᒪᓗ ᑕᐃᑲᓃᑦᑐᖅ ᐃᑲᔪᕆᐊᖅᑐᖅᑐᓂ ᐊᓯᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.