"ᐃᓕᓐᓂᐊᕐᓂᖅ ᓴᖅᑭᔮᖅᑎᑦᑎᓇᓱᓪᓚᕆᖕᒪᑦ ᐱᐅᓯᒋᐊᖅᑎᑦᑎᓂᕐᒥᒡᓗ ᑭᖑᕚᒃᓴᑦᑎᓐᓄᑦ," ᑲᑐᔾᔭᐅᔪᖅ ᑭᐋᓇ ᐅᓛᕝᓴᓐ, ᐊᓪᓚᑎᔅ ᐊᕐᓇᖅ ᓴᐃᓐᑦ ᓗᐃ, ᓴᔅᑳᑦᓱᐊᓐ ᐃᖅᑲᓇᐃᔭᖅᑐᖅ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐃᓅᓯᓕᕆᔨ ᓄᓇᓕᐸᐅᔭᕐᒥ ᐱᕈᖅᓴᕝᕕᒋᓚᐅᖅᑕᖓᓂ, ᓯᓕᕚᒃ, ᐳᕆᑎᔅ ᑲᓚᒻᐱᐊᒥ. ᐃᓅᓯᓕᕆᖃᑦᑕᖅᓯᒪᔪᖅ ᐊᑯᓪᓕᕐᒥ ᐃᓕᓐᓂᐊᕐᕕᖕᒥ, ᐃᖅᑲᓇᐃᔭᕐᖢᓂ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᕐᒧᑦ ᐱᐅᓯᒋᐊᖅᑎᓪᓗᒍ ᐃᓕᓴᐃᔨ ᐊᒻᒪ ᐊᕐᕕᓂᓕᖕᓂ ᖁᑦᑎᖕᓂᓕᒃ ᐃᓕᓴᐃᔨᐅᓪᓗᓂ. ᖃᑕᙳᑎᒋᔭᐅᔪᑦ ᐱᓕᕆᓪᓚᕆᒃᖢᑎᒃ ᐃᓕᓐᓂᐊᕐᓂᓕᕆᓂᕐᒥᒃ, ᐃᖅᑲᓇᐃᔮᒃᓴᐅᖏᓐᓇᐅᔭᓚᐅᖅᑐᖅ ᐃᓱᒪᖓᑕ ᑐᓄᐊᒍᑦ. 

ᐱᔪᒪᓂᕆᔭᐅᔪᖅ ᑐᕌᕈᑕᐅᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᒧᑦ UBC−ᑯᓐᓂ, ᓈᒻᒪᖅᑰᔨᓚᐅᖅᑐᖅ ᐱᔾᔪᑎᒋᓪᓗᒍ ᐃᓚᓕᐅᔾᔨᖃᑦᑕᕐᓂᖓᓄᑦ ᓄᓇᖃᖅᑳᖅᓯᒪᔪᑦ ᑕᐅᑐᖅᑰᖅᑕᖏᓐᓂᒃ ᐊᒻᒪ ᐃᓕᓐᓂᐊᖅᑎᑦᑎᔾᔪᓯᖏᓐᓂᒃ ᐃᓕᓐᓂᐊᕐᕕᐊᕈᓯᓪᓗᐊᑕᕐᓄᑦ. ᐃᓕᓴᐃᔨᙳᕐᓂᖅ ᑐᑭᖃᑦᑎᐊᓚᐅᖅᑐᖅ ᓲᖃᐃᒻᒪ ᐊᒃᓱᕉᑎᖃᕐᒪᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓂᒃ ᐊᒻᒪ ᒪᒃᑯᒃᑐᓂᒃ ᐱᓕᕆᖃᑎᖃᕈᒪᑦᑎᐊᖅᖢᓂ, ᒥᑭᑦᑐᑯᓗᖕᒥ ᐊᓯᔾᔩᔪᓐᓇᕋᓗᐊᕈᓂ ᐱᓕᕆᐊᕆᔭᒥᓂᒃ.

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᑎᓪᓗᒍ, ᓯᓚᑦᑐᖅᓴᕐᕕᒡᔪᐊᓕᐊᑲᐅᑎᒋᓚᐅᖅᐳᖅ ᐃᓕᓐᓂᐊᑲᑕᖕᓂᖅᓴᐅᓕᖅᖢᓂᓗ ᑭᓱᓂᒃ ᐱᐅᒃᓴᕐᒪᖔᑦ ᖃᐅᔨᓇᓱᒃᖢᓂ. ᐅᖃᖃᑎᖃᓚᐅᖅᑎᓪᓗᒍ ᐃᓕᓐᓂᐊᖅᑐᓕᕆᓂᕐᒧᑦ ᐅᖃᐅᔾᔨᒋᐊᖅᑎᒥᒃ, ᖃᐅᔨᓕᓚᐅᖅᑐᖅ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᖅ ᖃᓄᐃᓕᐅᕈᒪᖕᒪᖔᑦ. ᐃᓕᓐᓂᐊᕈᑎᑐᐃᓐᓇᐃᑦ ᓅᖦᖢᓂᒋᑦ ᐃᓕᓐᓂᐊᒐᒃᓴᒧᑦ ᑲᔪᓯᓪᓗᓂᓗ ᐱᔭᕇᕋᓱᖕᓂᖓᓂ. ᐅᓪᓗᒥ ᐃᓕᓐᓂᐊᕐᕕᖕᒧᑦ ᐅᑎᖅᑕᓕᖅᑐᖅ ᐱᓕᕆᐊᖃᖅᖢᓂ ᐃᓕᓐᓂᐊᖅᑕᒥᓄᑦ ᐃᓕᓐᓂᐊᕐᕕᖕᒥ ᐃᓅᓯᓕᕆᓂᕐᒥᒃ ᐃᑲᔪᖅᓱᕐᓗᒍ ᒫᓐᓇ ᐃᖅᑲᓇᐃᔮᖓᓄᑦ. 

ᑮᓇᐅᔭᓂᒃ ᓇᓂᓯᒐᓱᐊᖅᑐᓂ ᐱᒡᒐᓇᖅᑐᒻᒪᕆᐅᓚᐅᖅᐳᖅ ᐱᓪᓗᒍ ᓅᒋᐊᖃᓚᐅᕐᒪᑦ ᐃᓕᓐᓂᐊᕐᓂᖓᓄᑦ. ᐊᑭᖏᑦ ᐃᓚᒋᐊᖅᑕᐅᓚᐅᖅᑐᑦ ᑭᓯᐊᓂ ᓇᓂᓯᓚᐅᖅᑐᖅ ᐃᓕᓐᓂᐊᕆᐊᒃᑲᓐᓂᕈᓯᐊᓂᑦ ᐊᒻᒪ ᐃᓕᓐᓂᐊᕈᑎᓂᑦ ᐃᑲᔫᑎᐅᓂᐊᖅᑐᓂᑦ. ᐅᖃᖅᑐᖅ ᓄᓇᖃᖅᑳᖅᓯᒪᔪᑦ ᒪᒃᑯᑦᑐᑦ ᑐᑦᓯᕋᖁᔨᓂᕐᒥᑦ ᐃᓘᓐᓇᖏᓐᓄᑦ ᐊᑐᐃᓐᓇᐅᔪᓄᑦ ᐃᑲᔪᖅᑐᖅᑕᐅᓂᕐᒧᑦ. "ᑮᓇᐅᔭᑎᒍᑦ ᐃᑲᔪᖅᑕᐅᓂᖅ ᐃᓚᒋᔭᐅᔪᖅ ᐱᔾᔪᑎᕐᔪᐊᓄᑦ ᖃᓄᐃᒻᒪᑦ ᑲᔪᓯᑦᑎᐊᕈᓐᓇᕐᓂᓐᓂ ᐱᓪᓗᖓ ᓇᓗᓇᐃᒃᑯᑕᕋ ᐃᕐᖐᓐᓇᖅ ᐃᓱᒫᓗᒋᐊᖃᙱᖦᖢᖓᓗ ᐃᖅᑲᓇᐃᔭᕐᓂᕐᒥᒃ ᐃᑲᕐᕋᒐᓴᖕᓂᒃ ᐊᑭᓕᕋᓱᒃᓗᒍ," ᐃᖅᑲᐅᒪᔪᖅ. 

ᓅᒻᒪᑦ ᐃᖅᑲᓇᐃᔭᖅᑐᓂ ᓄᓇᕐᔪᐊᕐᒧᑦ, ᐅᓛᕝᓴᓐ ᒪᒃᑯᓛᖑᖃᑕᐅᖏᓐᓇᐅᔭᖅᑐᖅ ᐃᖅᑲᓇᐃᔮᖏᓐᓂ. ᐃᖅᑲᓇᐃᔭᕐᕕᖕᒦᑎᓪᓗᒍ ᐊᒃᓱᕈᖃᑦᑕᖅᓯᒪᖕᒪᑦ ᐊᒻᒪ ᐊᒃᓱᕉᑎᖃᖃᑦᑕᖅᓯᒪᓪᓗᓂ ᓇᖕᒥᓂᖅ−ᐱᔪᓐᓇᙱᖦᖢᓂ ᑕᒪᐃᓐᓂᒃ ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᑭᖑᓂᐊᒍᑦ. ᖀᒥᒍᓱᓕᓚᐅᖅᑐᖅ ᐃᒻᒥᓂᒃ ᐅᒃᐱᕆᓪᓗᓂ ᐅᒃᐱᕈᓱᒃᖢᓂᓗ ᐊᔪᙱᓐᓂᕐᒥᓂᒃ.  ᐱᓕᕆᖃᑎᖃᖅᖢᓂ ᐊᓯᖏᓐᓂᒃ ᐃᓕᓴᐃᔨᓂᒃ, ᐅᔾᔨᕈᓱᒃᓯᒪᕗᖅ ᑭᓱᓂᒃ ᐃᑲᔫᑎᖃᕆᐊᖃᕐᓂᕐᒥᓂᒃ ᐊᒻᒪᓗ ᐃᓕᑦᑎᕙᓪᓕᐊᓪᓗᓂ ᐃᒻᒥᓂᒃ ᓈᓴᐃᔪᒪᙱᖦᖢᓂ ᒪᒃᑯᖕᓂᖅᓴᐅᓂᖓᓄᑦ ᐊᒻᒪᓗ ᓄᑖᖑᓂᖅᓴᐅᓂᖓᓄᑦ. 

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᓯᓚᑦᑐᖅᓴᕐᕕᓕᐊᕆᐊᒃᓴᖅ ᐃᓱᒪᓗᑎᒃ ᑐᕌᕆᔭᖏᓐᓂ ᑭᓱᓂᒡᓗ ᓯᕗᓂᒃᓴᖏᑦ ᑕᐅᑦᑐᖃᖁᖕᒪᖔᒋᑦ. ᓯᓚᑦᑐᖅᓴᕐᕕᔾᔪᐊᖅ ᐃᓕᕋᓇᕈᓐᓇᖅᑐᖅ, ᑭᓯᐊᓂ ᐃᒃᓯᕙᖃᑎᖃᕐᓗᓂ ᐅᖃᐅᔾᔨᒋᐊᖅᑎᒥᑦ, ᓄᓇᖃᖅᑳᖅᓯᒪᔪᓄᓪᓘᓐᓃᑦ−ᑐᕌᖓᔪᒥᑦ ᐅᖃᐅᔾᔨᒋᐊᖅᑎᒥᑦ, ᐃᑲᔪᕈᓐᓇᖅᑐᖅ ᐅᖃᐅᓯᖃᕐᓂᕐᒥᑦ ᐃᓚᖏᓐᓂᑦ ᐊᐱᖅᑯᑎᓂᑦ ᐃᓱᒫᓘᑎᓂᓪᓗ, ᖃᓄᐃᓕᐅᕐᓂᕐᒥᑦ ᓱᕋᐃᓂᕐᒥᑦ ᑕᖏᓕᓐᓄᑦ. ᐃᑲᔪᖅᓱᕐᓂᖏᑦ ᐃᑲᔪᕐᓂᖃᒻᒪᕆᓚᐅᖅᐳᑦ ᐅᓛᕝᓴᓐᒧᑦ ᐃᓕᓐᓂᐊᖅᑎᓪᓗᒍ.

"ᑕᒪᑦᑕ ᐊᑕᐅᑦᑎᒃᑯᑦ ᑕᒪᓐᓇ ᐊᑐᕐᓚᕗᑦ. ᐊᔾᔨᒌᙱᑦᑐᓂᙶᖅᑐᐃᓐᓇᐅᔪᒍᑦ ᐃᓅᓯᑦᑎᓐᓂ, ᑭᓯᐊᓂ ᐱᓕᕆᔪᐃᓐᓇᐅᔪᒍᑦ ᐊᔾᔨᒌᕐᓚᖕᒧᑦ ᑐᕌᒐᒧᑦ."

ᐊᓯᐊ ᐃᑲᔫᑎᐅᔪᖅ ᐅᓛᕝᓴᓐ ᐊᑐᓕᖁᔨᔪᖅ ᐃᓕᓐᓂᐊᖃᑎᖏᓐᓄᑦ ᐃᑲᔪᖅᑐᖅᑕᐅᓂᕐᒥᑦ, ᐊᐱᕆᓂᕐᒥᑦ ᐱᖃᑎᖏᓐᓂᑦ ᐃᓕᓐᓂᐊᖃᑎᖏᓐᓂᓪᓗ ᐸᕐᓇᐅᑎᖏᓐᓂᑦ ᐃᓕᓐᓂᐊᕐᓂᕐᒥᓪᓗ ᐱᓕᕆᔾᔪᓯᖏᓐᓂᑦ. ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᑎᓪᓗᒍ, ᐃᑲᔪᖅᓱᖅᑕᐅᕐᔪᐊᓚᐅᖅᐳᖅ ᐊᒻᒪ ᓄᓇᖅᑲᑎᒥᓄᑦ. ᐃᓱᒪᒋᓪᓗᒋᑦ ᐊᑐᖅᓯᒪᔭᖏᑦ ᐅᖃᐅᔾᔪᐃᔾᔪᑎᖏᓪᓗ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᑎᖏᓐᓄᑦ, ᑲᑉᐱᐊᓱᖁᙱᖦᖢᓂᒋᑦ ᐊᐱᖅᓱᕆᐊᒃᓴᖅ ᐃᑲᔪᖅᑕᐅᓗᑎᒡᓗ.

ᐅᖃᐅᔾᔨᒋᐊᕈᓐᓇᕈᓂ ᒪᒃᑯᖕᓂᖅᓴᓄᑦ, "ᖃᓄᐃᖏᑦᑐᖅ ᐸᕐᓇᓯᒪᔪᐃᓐᓇᐅᙱᒃᑯᑎᑦ ᐊᒻᒪ ᖃᐅᔨᔪᐃᓐᓇᐅᖁᙱᖦᖢᒋᑦ." ᑭᓇᑐᐃᓐᓇᖅ ᐸᕐᓇᖕᓂᓕᕆᔪᒪᒍᓂ, ᖃᐅᔨᒪᔭᐅᙱᑦᑐᖅ ᓯᓚᑦᑐᖅᓴᕐᕕᒡᔪᐊᖅ ᑲᑉᐱᐊᓇᓚᐅᖅᑐᖅ. "ᑭᖑᒻᒧᑦ ᐅᑎᕐᓗᖓ, ᓇᓗᓇᙱᑦᑐᖅ ᐅᕙᓐᓄᑦ ᐱᓕᕆᐊᖑᑦᑎᐊᓚᐅᖅᑐᖅ, ᒫᓐᓇᓗ ᐃᓂᖃᖅᑰᓕᖅᑐᖓ ᖁᕕᐊᒋᓪᓗᒍ ᓄᓇ ᐱᓕᕆᐊᕆᔪᒪᓚᐅᖅᑕᕋ ᐊᒻᒪ ᐊᖅᑯᑎᒋᓚᐅᖅᑕᓐᓄᑦ, ᑕᒪᓐᓇᓗ ᐸᕐᓇᐅᑎᒋᓯᒪᓚᐅᙱᑕᕋ ᐊᕐᕌᒍᓄᑦ ᓯᕗᓂᐊᒍᑦ. ᑕᐃᒪᐃᒻᒪᑦ, ᖃᓄᐃᙱᓚᖅ ᖃᐅᔨᒪᙱᒋᐊᖓ. ᖃᓄᐃᙱᑦᑐᖅ ᐃᓕᖕᓂᒃ ᐅᒃᐱᕆᑐᐃᓐᓇᕐᓗᑎᑦ ᐅᒃᐱᕆᓗᒍᓗ ᐱᕙᓪᓕᐊᓂᖓ. ᓇᒧᙵᐅᔭᕆᐊᖃᕐᒪᖔᖅᐱᑦ ᐊᐱᕆᑲᑕᒃᑯᕕᑦ ᐊᒻᒪ ᐅᒃᑯᐃᖓᐃᓐᓇᕈᕕᑦ," ᑲᔪᓯᓗᓂ. 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᐅᓛᕝᓴᓐ ᓄᖅᑲᖓᓚᐅᑲᓲᖅ ᐱᓇᓱᐊᕈᓯᖓᓄᑦ ᐊᖑᒻᒪᑎᙱᖦᖢᓂ ᐃᖅᑲᓇᐃᔭᐃᓐᓇᕐᓂᕐᒥᒃ. "ᐊᔪᕐᓇᙱᑦᑐᑯᓘᖕᒪᑦ ᐱᕕᖃᖅᑎᑐᐃᓐᓇᕆᐊᒃᓴᖅ ᖃᓄᐃᓕᐅᕆᐊᖃᖅᑕᓕᒫᕐᓂᒃ," ᐅᖃᑦᑎᐊᙱᖦᖢᓂ, ᐅᖃᐅᓯᕆᓪᓗᓂᐅᒡᓗ ᐱᓕᕆᐊᕆᙱᖦᖢᓂᒋᑦ ᐸᕐᓇᐃᔨᖓᓄᑦ ᐃᓕᖦᖢᓂᐅᒡᓗ ᐃᖅᑲᓇᐃᔮᒥᓂᒃ ᕿᒪᐃᔪᓐᓇᖅᓯᓪᓗᓂ.

 "ᐊᒃᓱᕈᕐᓇᖅᑐᓂᒃ ᑐᓴᖃᑦᑕᖅᑐᖓ ᐅᓪᓗᓕᒫᖅ. ᑕᒪᓐᓇ ᐱᔭᕆᐊᑭᑦᑐᖅ ᐃᓱᒪᒋᐊᖓ ᐅᓐᓄᒃᑯᑦ ᐊᒻᒪᓗ ᐅᓂᒃᑳᓕᕆᓗᓂ ᐊᒻᒪᓗ ᑕᒪᒃᑯᐊᓕᒫᑦ ᐊᖏᕐᕋᐅᑎᖃᑦᑕᖅᑕᑎᑦ. ᐊᔪᕐᓇᓚᐅᕐᒪᑦ ᐅᕙᓐᓄᑦ ᐊᕐᕌᓂ ᐊᔾᔨᐅᓐᖏᑎᑕᐅᓪᓗᖓ ᐊᒻᒪᓗ ᑕᒪᓐᓇ ᐊᕕᓯᒪᑎᓪᓗᒍ. ᑭᓯᐊᓂ ᑕᒪᑐᒪᓂ ᐊᕐᕌᒍᒥ, ᐱᓕᕆᑦᑎᐊᖅᓯᒪᓂᖅᓴᐅᔪᖓ," ᑕᑯᒃᓴᐅᑎᑦᑎᔪᖅ. ᓄᓇᓯᐅᑎᒃᑯᑦ ᐊᖏᕐᕋᖓ ᓂᑲᒍᓱᖕᓂᐅᕗᖅ ᐊᑐᖅᐸᒃᖢᓂᐅᒡᓗ ᓅᑉᐸᓪᓕᐊᓪᓗᓂ ᐊᖏᕐᕋᖓᑕ ᐃᓅᓯᖓᓄᑦ ᐃᖏᕐᕋᑦᑎᐊᕐᓂᖅᓴᐅᓪᓗᓂ. 

ᐱᕕᖃᕐᓂᖅ ᐊᐃᑉᐸᕇᖕᓂᕐᒥ ᐱᔾᔪᑎᓕᖕᒧᑦ ᐃᑲᔪᕈᑎᖃᖅᓯᒪᖕᒥᔪᖅ ᖃᓄᐃᙱᑦᑎᐊᕐᓂᕐᒥ. ᐃᖅᑲᓇᐃᔮᖓ ᐃᓄᑑᑎᑕᐅᔪᓐᓇᖅᑐᖅ ᖃᐅᔨᒐᒥ ᐃᓛᓐᓂᒃᑯᑦ ᐃᓐᓇᑐᐊᖑᓂᖓᓂᒃ ᐃᒡᓗᕈᓯᕐᒥ ᑭᓯᐊᓂ ᐱᐅᔪᒥᒃ ᐃᓅᖃᑎᖃᕐᓂᖅ ᐊᓯᖏᓐᓂᒃ ᐃᓐᓇᕐᓂ ᐋᖅᑭᒍᓐᓇᖅᑕᖓ ᐊᑐᖅᑕᖓ. ᐅᓛᕝᓴᓐ ᐱᕕᖃᖅᑎᑦᑎᖕᒥᔪᖅ ᐅᐸᒃᓯᒪᔭᕆᐊᒃᓴᖅ ᐃᖕᒥᓄᑦ, ᔫᒐᒃᑯᑦ, ᐃᓱᒪᒥᐅᑕᖃᑦᑎᐊᕐᓂᖅ ᐱᕕᖃᕐᓂᕐᓗ ᐅᖃᓘᑎᖓᓂᒃ. 

ᖃᐅᑕᒫᑦ ᐊᐅᓚᖃᑦᑕᐃᓐᓇᕈᒪᓪᓗᓂ, ᐅᓛᕝᓴᓐ ᐱᔪᒃᓯᑎᑕᐅᕙᒃᐳᖅ ᐃᓕᓐᓂᐊᖅᑎᓄᑦ ᐱᓕᕆᖃᑎᒋᕙᒃᑕᒥᓄᑦ ᖁᕕᐊᓱᒃᖢᓂᓗ ᑕᑯᔭᕆᐊᒃᓴᖅ ᐃᓕᑦᑎᕙᓪᓕᐊᓂᕐᒥᒃ ᐱᓕᕆᖃᑎᒌᖕᓂᕆᔭᒥᑎᒍᑦ, ᕿᒪᐃᕙᒃᖢᓂᓗ ᖁᖓᔮᕐᓂᕐᒥᒃ ᑮᓇᒥᓂᒃ. "ᑕᒪᕐᒥᑦᑎᐊᖅ ᑖᒃᑯᐊ ᒪᒃᑯᒃᑐᑦ ᑲᒪᓇᖅᑐᓂᒃ ᐱᓕᕆᕗᑦ ᐊᓂᒍᐃᕙᓪᓕᐊᓪᓗᑎᒡᓗ ᐊᖏᔪᒻᒪᕆᖕᓂᒃ ᐊᓂᒍᖅᑎᓐᓇᓱᐊᖅᑕᒥᓂᒃ. ᑕᒪᓐᓇ ᐅᕙᓐᓄᑦ ᐱᔪᒃᓯᑎᑦᑎᑐᐃᓐᓇᖅᐳᖅ ᐱᓕᕆᐊᕇᓐᓇᕐᓗᒋᑦ, ᐱᕕᒃᓴᓕᐅᖏᓐᓇᕐᓗᖓᓗ," ᐊᓕᐊᓇᐅᔭᖅᑐᖅ. ᐊᓯᔾᔩᔪᓐᓇᑐᐃᓐᓇᕆᐊᓕᒃ ᑲᔪᓯᑎᑦᑏᓐᓇᕈᓐᓇᖅᐳᖅ. 

ᐅᓛᕝᓴᓐ ᐅᖃᕐᖓᑦ, ᐃᓕᓐᓂᐊᕐᓂᖅ ᓴᖅᑭᔮᖅᑎᑦᑎᓂᓪᓚᕆᐅᕗᖅ ᐊᒻᒪᓗ ᐋᖅᑮᒋᐊᕐᓂᕐᒥᑦ ᑭᖑᕚᕆᓂᐊᖅᑕᑎᓐᓂ ᐊᒻᒪᓗ ᑕᐃᒪᐃᑉᐸᑉᐳᖅ ᐃᓕᓐᓂᐊᕐᕕᕐᔪᐊᕐᒥ ᐃᑲᔪᖅᑎᐅᓪᓗᓂ. ᑕᒪᓐᓇ ᐊᖅᑯᑎᒋᓯᒪᓪᓗᓂᐅᒃ ᐃᓕᓴᐃᔨᓄᑦ ᐃᓚᒥᓄᑦ, ᓂᕆᐅᒃᑐᖅ ᐱᔪᒃᓯᑎᑦᑎᔪᓐᓇᕐᓂᐊᕐᓂᖓᓂᒃ ᐊᓯᒥᓄᑦᑕᐅᖅ. ᐃᓕᓴᐃᔨᙳᓚᐅᖅᑐᖅ ᐃᑲᔪᖅᑕᐅᓪᓗᓂ ᓄᓇᓕᖕᓂ ᐃᓕᓐᓂᐊᖃᑎᖏᓐᓄᑦ ᐃᓕᓐᓂᐊᕐᕕᐊᕈᓯᖓᓂ, ᒫᓐᓇᓗ ᐃᑲᔪᓕᖅᑐᖅ ᐊᑦᑕᕐᓇᙱᑦᑐᓂᒃ ᐃᓂᒃᓴᓕᐅᕐᓂᕐᒥᒃ ᐃᓕᓐᓂᐊᖅᑎᓄᑦ ᑲᔪᓯᑦᑎᐊᖁᓪᓗᒋᑦ ᓇᖕᒥᓂᖅ ᐃᓕᓐᓂᐊᕐᓂᖏᓐᓂ, ᐊᑭᓕᕐᓗᒍ ᓯᕗᒻᒧᑦ ᑐᙵᓇᕐᓗᓂ ᓇᒡᓕᒍᓱᑦᑎᐊᕐᓗᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.